Month: December 2021

Санхүүгийн зохицуулах хорооны ээлжит 23 дугаар хуралдаанаар “Санхүүгийн зохицуулах хорооны хяналт шалгалтын бодлогын баримт бичиг”-ийг баталлаа. Бодлогын баримт бичиг үндсэн хоёр бүлэгтэй бөгөөд эхний буюу “Санхүүгийн зохицуулах хорооны өнөөгийн хяналт шалгалтын тогтолцоо” бүлэгт хяналт шалгалт хийхэд баримтлах зарчмууд, эрсдэлийн үнэлгээ, хяналт шалгалтын үе шат, төрөл хэлбэр, тэдгээрийн уялдаа холбооны тухай тусгасан.

Харин “Санхүүгийн зохицуулах хорооны хяналт шалгалтыг боловсронгуй болгох дунд болон урт хугацааны төлөвлөгөө” бүлэгт Хорооны хяналт шалгалтад хийсэн шинжилгээ, цаашдын хандлага, бодлогын зорилго, хүрэх зорилт, шалгуур үзүүлэлтүүдийг тодорхойллоо. Бодлогын баримт бичигт хяналт шалгалтын үйл явцыг тайлбарлахаас гадна үйлчлүүлэгч, хөрөнгө оруулагчдын эрх ашгийг хамгаалах, мэдээллийн ил тод байдлыг хангах, мэргэжлийн ёс зүйг эрхэмлэх, цахим аюулгүй байдлыг хангахтай холбоотой асуудлуудыг хөндсөн. Түүнчлэн дэвшилтэт технологид суурилсан цахим санхүүгийн бүтээгдэхүүн үйлчилгээ, тархмал бүртгэлийн системд суурилсан криптовалют, их өгөгдөл, виртуал хөрөнгийн үйл ажиллагаанд чухал ач холбогдол өгч, Хороо инноваци, дэвшилтэт технологийг дэмжихийн сацуу зохистой эрх зүйн орчинг бүрдүүлж, бодлогоор зохицуулж, эрсдэлд суурилсан хэлбэрээр хяналт шалгалт хэрэгжүүлэх бодлого баримтлах талаар тусгасан.

Монгол Улсад хүчин төгөлдөр мөрдөгдөж буй хууль тогтоомж, Олон улсын санхүүгийн хориг арга хэмжээ авах байгууллага /ФАТФ/, Базелийн хороо, Олон улсын валютын сан, Үнэт цаасны хороодын олон улсын байгууллага, Олон улсын даатгалын хянан шалгагчдын холбооноос гаргасан стандарт, зөвлөмж, Сингапур, Канад, Австрали зэрэг олон улсын судалгаа, манай улсын санхүүгийн болон санхүүгийн бус салбаруудын хяналт шалгалтын өнөөгийн нөхцөл байдлын судалгааны үр дүн зэрэг мэдээлэлд суурилж баримт бичгийг боловсруулсан.

Бодлогын баримт бичиг батлагдсанаар Хорооноос зохицуулалттай санхүүгийн болон санхүүгийн бус салбаруудад хэрэгжүүлж буй хяналт шалгалтын үйл явц, төрөл хэлбэр, тэдгээрийн уялдаа холбоог тайлбарлах, хяналт шалгалтын чиг хандлага, бодлогыг тодорхойлж, дунд ба урт хугацаанд хүрэх зорилт, шалгуур үзүүлэлтийг тогтоох боломж бүрдэж байна. Ингэснээр ил тод байдлыг дэмжих, хяналт шалгалтын үр ашгийг сайжруулах, үйлчлүүлэгч, хөрөнгө оруулагчдын эрх ашиг, мэдээллийн аюулгүй байдал, нууцлалыг хангах, инновацийг дэмжсэн оновчтой хяналтын орчныг бүрдүүлэх, мэргэжлийн ёс зүйг тэргүүн чиглэл болгож, уялдаа холбоог хангаснаар санхүүгийн тогтвортой байдлыг хангаж ажиллах юм.

Өмнөговь аймгийн Цогт-Овоогийн улаан ямаа, Ханбогдын гавилууд хонь омог болон баталгаажлаа.

Ханбогд сумын гавилууд хонь нь нутгийн шилмэл хонины бүлэгт хамаарах боловч говийн бүс нутгийн гео-экологийн өвөрмөц нөхцөлд ардын селекцийн аргын үр дүнд бий болсон голдуу хар халзан, харман, хар толгойтой, их бие нь цагаан зүстэй, бие цогцос, галбир, мах, ноосон ашиг шимийн гарц, чанараар харьцангуй жигд сайн, тэсвэр хатуужилтай, аж ахуйн ашигтай чанараа үр төлдөө тогтвортой дамжуулдаг зэрэг аж ахуй, биологийн онцлог чанараараа ялгаатай сүрэг гэж Өмнөговь аймгийн ЗДТГ-аас мэдээллээ.

Монголын чөлөөт бөхийн холбооны түүхт 60 жилийн ой энэ онд тохиож байгаа билээ. Түүхт ойгоо тэмдэглэж буй чөлөөтийнхөнд баяртай мэдээ дуулгахад, чөлөөт бөхийн тамирчин, дасгалжуулагч, шүүгчдэд яг одоо төрийн дээд одон, медаль гардуулж байна.

Монгол Улсын Гавьяат тамирчин, Гавьяат дасгалжуулагч Зэвэгийн Дүвчинд Ардын багш цол олголоо.

Хос гавьяат цолтой гуравхан эрхийн нэг (Нөгөө хоёр нь Х.Болдбаатар, Х.Эрдэнэт-Од) тэрбээр Хөдөлмөрийн баатар З.Ойдовын төрсөн дүү нь.

Өвөрхангай аймгийн харьяат, ДАШТ-ий мөнгөн медальт, улсын заан З.Дүвчин Хөдөлмөрийн баатар С.Батцэцэг, ДАШТ-ий мөнгөн медальт Э.Сумъяа, ДАШТ-ий хүрэл медальт Э.Гантуяа, Азийн наадмын аварга Г.Наранчимэг, улсын аваргын олон түрүүтэй, Ш.Түмэнцэцэг, үндэсний бөхийн улсын аварга Ч.Санжаадамба, улсын харцага Ш.Пүрэвгарьд нарын олон шилдгийн багш нь юм.

Хөдөлмөрийн баатар, олимпын аварга, улсын заан Н.Түвшинбаяр согтууруулах ундаа хэрэглэсэн үедээ багын найз, улсын начин Э.Энхбатыг зодож, эрүүл мэндэд нь хүнд хохирол учруулсан хэрэг өнгөрсөн дөрөвдүгээр сард гарсан.

Тэгвэл Н.Түвшинбаярт холбогдох хэргийг шүүхэд шилжүүлэх эсэхийг шийдвэрлэх урьдчилсан хэлэлцүүлгийн шүүх хуралдаан Хан-Уул дүүргийн Эрүүгийн хэргийн анхан шатны шүүхэд өнөөдөр 14.00 цагт боллоо. Улмаар шүүх хуралдаанаар нөхөн гүйцэтгэх боломжгүй мөрдөн шалгах ажиллагаа хийлгэхээр хэргийг дахин прокурорт буцаалаа.

Н.Түвшинбаярын өмгөөлөгч Л.Данзанноров мэдээлэл өглөө. Тэрбээр хэлэхдээ “Н.Түвшинбаяр маргаад байгаа зүйл байхгүй. Өнгөрсөн хугацаанд гурван тэрбумын хохирол нөхөн төлсөн. Мэдээж төлж л таарна. Цаашдаа ч төлөх ёстой. Ойлгож, ухамсарлаж, гэмшиж байгаа. Сая шүүхээс хэргийг хянаад нэмэлт мөрдөн байцаалт шаардлагатай гээд прокурорт буцааж шийдвэрлэлээ.

Хамгийн гол нь хохирогчийн эрүүл мэндийн байдалд маш их санаа зовж байгаа. Маш харамсалтай хэрэг болсон” гэв.

Волейболын ахмадын улсын аварга шалгаруулах тэмцээн Өвөрхангай аймагт болж байна. Тэмцээнд нийслэлийн 9 дүүрэг, 21 аймгаас, 46 баг, 460 гаруй тамирчид оролцож байгаа юм.

“Монголын волейболын холбооны түүхэнд урьд өмнө нь ийм олон баг, тамирчид оролцсон тэмцээн болж байсныг санахгүй байна. Энэ удаагийн тэмцээн өндөр ач холбогдолтой болж байна” хэмээн тус холбооны ерөнхийлөгч Ц.Чингарьд хэлж байв. Тэмцээний эхэнд волейболын спортыг хөгжүүлэхэд үнэтэй хувь нэмэр оруулж буй нэр бүхий хүмүүсийг шагнан урамшууллаа. Монгол Улсын Гавьяат дасгалжуулагч, Өвөрхангай аймгийн уугуул Д.Солонгыг аймгийн ИТХ-ын нэрэмжит шагнал “Өвөрхангай аймгийн Алдартан” цолоор шагнасан бөгөөд Өвөрхангай аймгийн Волейболын холбооноос хүндэтгэл үзүүллээ. Мөн Монгол Улсын Гавьяат дасгалжуулагч, Өвөрхангай аймгийн уугуул Д.Баасансүрэнд Монголын волейболын холбооноос хүндэтгэл үзүүлэв. 62-оос дээш насны ахмад тамичрдад Өвөрхангай аймгийн Волейболын холбооноос гарын бэлгийг гардуулсан юм.

Волейболын ахмадын улсын аварга шалгаруулах тэмцээн Өвөрхангай аймагт анх 2010 онд зохиогдож байсан бөгөөд 11 жилийн дараа дахин зохион байгуулж байгаад баяртай байгаагаа аймгийн ИТХ-ын дарга О.Пүрэвдорж хэллээ. Дашрамд дурдахад гавьяатаас дээш цолтой 36 тамирчин Өвөрхангай аймгаас төрж, нутаг орныхоо нэрийг өндөрт өргөсөн бөгөөд гурав нь волейболын спортын тамирчид аж.

Монголын волейболын холбоо, Өвөрхангай аймгийн иргэдийн Төлөөлөгчдийн хурал, Засаг даргын Тамгын газар, аймгийн Биеийн тамир, спортын газар хамтран зохион байгуулж буй уг тэмцээн 12 дугаар сарын 22-оос 26-ны өдрүүдэд үргэлжилнэ.

Олимпийн аварга Н.Түвшинбаярт холбогдох хэргийг Хан-Уул дүүргийн прокурорын газраас хянаад, 2021 оны арванхоёрдугаар сарын 1-ний өдөр тус дүүргийн Эрүүгийн хэргийн анхан шатны шүүхэд шилжүүлэх саналыг хүргүүлээд буй. Өнөөдөр Хан-Уул дүүргийн Эрүүгийн хэргийн анхан шатны шүүхэд 14:00 цагт Н.Түвшинбаярт холбогдох хэргийг шүүхэд шилжүүлэх эсэхийг шийдвэрлэх урьдчилсан хэлэлцүүлгийн шүүх хуралдаан боллоо. Урьдчилсан хэлэлцүүлгийн шүүх хуралдаанаар Н.Түвшинбаярын холбогдох хэрэгт нэмэлт мөрдөн байцаалтад буцаасан байна.

Энэ талаар шүүгдэгч Н.Түвшинбаярын өмгөөлөгч мэдээлэл өглөө. Тэрээр “Хэргийг хянаад, нэмэлт мөрдөн шалгах ажиллагаа явуулах шаардлагатай гэж үзлээ. Улмаар прокурорт хүргүүлсэн. Түвшинбаярын тухайд гэм буруутай гэдэг дээрээ маргаагүй байхгүй. Гарсан хохирлыг төлж, барагдуулж байгаа. Одоогоор 3 тэрбум төгрөгийн хохирол төлж, барагдуулсан. Цаашдаа ч шаардлагатай хохирлыг төлнө. Н.Түвшинбаяр хийсэн хэрэгтээ маш их харамсаж байгаа. Хамгийн гол нь хохирогчийн эрүүл мэндэд их санаа зовж байна. Хэвлэл мэдээллийн байгууллагад хохирол барагдуулахгүй байгаа гэж мэдээлээд байгаа нь үндэслэлгүй. Шаардлагатай бүх зардлыг төлж барагдуулж байгаа” гэлээ.

Хөлбөмбөгийн нэрт тайлбарлагч Э.Балжинням агсны гэгээн дурсгалыг хүндэтгэж, түүний гэр бүл, төрөл төрөгсөд, мэргэжил нэгт сэтгүүлч, спортын тайлбарлагч дүү нар нь хамтран нийгмийн сайн үйлсийн “Балжинням сан”-г байгуулан, үйл ажиллагаагаа эхлүүлжээ.

Тус сангаас өнөөдөр буюу 2021 оны 12 дугаар сарын 23-ны өдөр Эх, хүүхдийн эрүүл мэндийн үндэсний төвийн Нярайн эрчимт эмчилгээний тасагт нэн шаардлагатай тоног төхөөрөмжүүд болох шарлагын аппарат, пульсоксиметр зэргийг хандивлалаа. Цаашид “Балжинням сан”- гийн зүгээс нийгэм, хүмүүнлэгийн олон талт үйл ажиллагааг тогтмол санаачлан хэрэгжүүлж, нээлттэй үйл ажиллагаа явуулах юм байна.