Month: December 2021

2021.12.25-ны байдлаар Хөвсгөл аймгийн хэмжээнд 12 сумын 23 голомтод 9517 толгой мал малын гоц халдварт шүлхий өвчнөөр өвчлөөд байгаа бөгөөд Аймгийн засаг даргын 2021.12.05-ны өдрийн А/604 дугаартай “Хорио цээр хязгаарлалтын дэглэм тогтоох тухай” захирамж гарч Монгол улсын засгийн газрын 2018 оны 266-р тогтоол, Мал эмнэлгийн ерөнхий газарын даргын А/187-р тушаалаар батлагдсан “Шүлхий өвчинтэй тэмцэх заавар”-ын дагуу гоц халдварт шүлхий өвчинтэй тэмцэх, урьдчилан сэргийлэх арга хэмжээг хэрэгжүүлэн ажиллаж байна.

Хөвсгөл аймагт оношлогдсон шүлхий өвчний анхны тохиолдол Бүрэнтогтох сумын Сангийн далай багт 2021.12.02-нд бүртгэгдэж байсан бол өнөөдрийн байдлаар 12 сумын нутагт тархаж, өвчилсөн малын тоо 9517 хүрсэн нь тухайн өвчний халдвар маш хурдан тархаж байгааг харуулж байна.

Мал, амьтны гоц халдварт шүлхий өвчин нь олон улсын худалдааны хорио цээрт өвчин бөгөөд өвчлөл гарсан бүс нутгийн мал, мах, арьс, шир, ноос, ноолуур, сүү, цагаан идээг экспортод гаргах, зах зээлд нийлүүлэх асуудал бүрэн зогсдог тул цаашид халдварын тархалтыг нэмэгдүүлэхгүй байх, шинээр голомт үүсгэхгүй байхын тулд орон нутгийн удирдлагууд, мал эмнэлгийн эмч мэргэжилтнүүд, малчид, мал бүхий иргэд шат шатандаа дараах урьдчилан сэргийлэх, тэмцэх арга хэмжээг оновчтой хэрэгжүүлэх шаардлагатай байна. Үүнд:

-Орон нутгийн удирдлагууд сумынхаа мэдрэмтгий мал амьтныг шүлхий өвчнөөс урьдчилан сэргийлэхийн тулд Монгол улсын мал амьтны эрүүл мэндийн тухай хуулиар хүлээсэн үүргээ биелүүлж урьдчилан сэргийлэх арга хэмжээг хэрэгжүүлэх

– Мэдрэмтгий эрүүл мал амьтдыг үзлэг, тандалтанд хамруулж, хяналтад авах

-Эрсдэлтэй цэгүүдэд халдваргүйтгэлийн арга хэмжээ зохион байгуулах, хүн мал, тээврийн хэрэгслийн хөдөлгөөнд хяналт тавих

-Гоц халдварт шүлхий өвчний тухай, урьдчилан сэргийлэх арга хэмжээний талаар иргэд, малчдад мэдээлэл, сэрэмжлүүлэг, зөвлөмжийг байнга хүргүүлэх

-Сумын Мал эмнэлгийн тасаг, Мал эмнэлгийн үйлчилгээний нэгжийн малын эмч, мэргэжилтнүүд орон нутгийн удирдлагуудыг мэдээ, мэдээллээр хангах, шүлхий өвчнөөс урьдчилан сэргийлэх чиглэлээр хэрэгжүүлэх ажлын саналыг Сумын онцгой комисст хүргүүлэн гарсан шийдвэрийг үр дүнтэй хэрэгжүүлэх

-Малчид, мал бүхий иргэд шүлхий өвчнөөс урьдчилан сэргийлэх чиглэлээр Мал, амьтны эрүүл мэндийн тухай хуульд заасан үүргээ биелүүлэх, мал сүрэгтээ ажиглалт, тандалт хийж, байнгын хариулга, маллагаатай байлгах

-Мал сүрэгт шүлхий өвчний шинж тэмдэг илэрсэн тохиолдолд холбогдох байгууллага, албан тушаалтанд яаралтай мэдэгдэх

-Орон нутгийн иргэд, малчид шилжилт хөдөлгөөнөө хязгаарлах, онцын шаардлагагүй бол эрсдэлтэй бүс нутгаар явахгүй байж мал сүргээ гоц халдварт шүлхий өвчнөөс урьдчилан сэргийлэх шаардлагатай байгааг Мэргэжлийн хяналтын байгууллагаас анхааруулж байна

Нийслэлийн Цагдаагийн Удирдах Газрын Шөнийн эргүүлийн алба хаагчид 2021 оны 12-р сарын 25-26 шилжих шөнө үүрэг гүйцэтгэж, Баянгол, Багануур дүүргийн шүүхээс эрэн сурвалжлагдаж байсан 2 хүнийг олж тогтоон, Нийслэлийн Засаг даргаас тогтоосон цагийн хязгаар зөрчсөн, 21 насанд хүрээгүй хүнд согтууруулах ундаа худалдсан, согтуугаар болон эрхгүй үедээ тээврийн хэрэгсэл жолоодсон зэрэг 22 зөрчлийг илрүүлж, зөрчил гаргасан, гэр бүлдээ хүчирхийлэл үйлдэж болзошгүй 6 хүнийг эрүүлжүүлэх байранд хүргэж, 54 иргэнд зөвлөн тусалж, согтууруулах ундаа хэтрүүлэн хэрэглэж биеэ авч явах чадваргүй 19 хүнийг ар гэр асран хамгаалагчид, түргэн тусламжийн 103-т 7 хүнийг тус тус нь хүлээлгэн өгчээ.

Хүйтний эрч чангарч өдөртөө -22, шөнөдөө -30 дээш хүйтэрч байгаа үед шинэ жил тэмдэглэх нэрээр иргэд архидан согтуурч, хөлдөж осгох улмаар амь нас, эрүүл мэнд нь хохирох эрсдэл үүсч байгааг анхааруулж байна.

2021.12.25-нд нийслэлийн хэмжээнд I тунд 16, II тунд 32, нэмэлт сэргээх тунд 421, нийт 469 иргэнийг дархлаажууллаа. Вакцинжуулалт эхэлснээс хойш нийслэлийн нийт хүн амын I тунгийн хамралт 75 хувь, II тунгийн хамралт 71.7 хувь, нэмэлт тунгийн хамрагдалт 41.8 хувь байна. Зорилтот бүлгийн буюу 2987 (25.1 хувь) жирэмсэн эх, 12-15 насны 68.284 (76.8 хувь), 16-17 насны 26.908 (79.4 хувь) хүүхэд тус тус дархлаажуулалтын бүрэн тунд хамрагдлаа.

ЮНЕСКО-гийн соёлын биет бус өвийн хүн төрөлхтний төлөөллийн жагсаалтад бүртгэгдсэн, Монголын үндэсний их баяр наадмын нэг төрөл болох Шагайн харвааг олон нийтэд түгээн дэлгэрүүлэх, Монгол шагайн харвааны уламжлалт ёс жаягийг залуу хойч үедээ өвлүүлэх, харваачдын ур чадварыг нэмэгдүүлэх, Их Монгол улс байгуулагдсаны 815 жил, Ардын хувьсгалын 100 жил, Дорноговь аймаг үүсгэн байгуулагдсаны 90 жил, Сайншанд сум байгуулагдсаны 60 жилийн ойн баяр наадмын шагайн харвааг нөхөж явуулах, Харваачдын цол тэмдэг олгох зорилгоор нээлттэй тэмцээнийг Дорноговь аймгийн Шагайн салбар холбооноос санаачлан зохион байгуулж байна.

Тэмцээний нээлтийг 2021 оны 12 дугаар сарын 26-ны өдөр билгийн тооллын бэлгэдэлт Морин цаг буюу 11.40 минутад Соёмбо цогцолборт ёслол төгөлдөр хийлээ.

Тус тэмцээнд Архангай, Дорноговь, Дундговь, Өмнөговь, Хэнтий аймаг, Улаанбаатар хотоос нийт 26 багийн 200 гаруй харваачид онч мэргэнээ сорихоор хүрэлцэн ирж оролцож байна.

Эрүүл мэндийн салбарын 100 жилийн ой тохиож байгаа. Үүнд салбарын сайд С.Энхболд нийт эрүүл мэндийн салбарын хамт олондоо мэндчилгээ дэвшүүлжээ.

Тэрээр “Нийт эмч, эмнэлгийн мэргэжилтэн, эрүүл мэндийн ажилтнууддаа Монгол Улсад Эрүүл мэндийн алба, орчин цагийн анагаах ухаан үүсэж хөгжсөний 100 жилийн ойн мэнд дэвшүүлье. Улс орны үнэт баялаг бол хүн амын эрүүл мэнд юм шүү гэжээ.

Монголын урлагийн салбарт гялалзаж яваа уран бүтээлч, поп дива, Соёлын тэргүүний ажилтан С.Наранд Монгол Улсын гавьяат жүжигчин цол олгохоор болжээ. Хөвсгөл аймгийн харьяат уран бүтээлч түүнийг хүчирхэг хоолой, нүдний шилгүйгээр төсөөлөхийн аргагүй.