Month: November 2021

Өнгөрсөн шөнө 14 аж ахуйн нэгжийн 7 вагон ачаа “Барс”, “Нарантуул” захад буужээ. Ерөнхий сайдын захирамжаар бараа, бүтээгдэхүүний үнийн өсөлтийн асуудлыг судалж, шаардлагатай арга хэмжээ авах шуурхай Ажлын хэсэг байгуулагдсан. Тус ажлын хэсгийнхэн салбар бүрийн уялдаа холбоог сайжруулан ажилласнаар Эрээнд гацаад байсан ачааг Улаанбаатар руу үе шаттай тээвэрлэх ажлыг эхлүүлсэн байна.

Ажлын хэсгийнхэн сард 60 вагон ачаа татан авахаар ажиллаж байна. Ингэснээр хүнсний гол нэрийн бүтээгдэхүүний үнийн өсөлтөөс шалтгаалсан хомсдол, инфляц буурна гэж үзжээ.

Төрийн архивын улсын үзлэг өнөөдрөөс эхэлж байна. Архивын улсын үзлэг арваннэгдүгээр сарын 9-12-ны өдрүүдэд үргэлжилнэ.

Архивын улсын үзлэгийг дөрвөн жил тутамд улсын хэмжээнд зохион байгуулдаг бөгөөд энэ удаагийн үзлэг нь нийслэл, дүүргийн архивын үйл ажиллагааны удирдлага, зохион байгуулалт, архивын баримтын хадгалалт, хамгаалалт болон төрийн архивын цахим сан бүрдүүлэлтийн чиглэлээр явагдаж байгаа нь онцлог юм.

Архив, албан хэрэг хөтлөлтийн тухай хууль шинэчлэгдэж, 2020 оны арванхоёрдугаар сарын 1-нээс мөрдөгдөж эхэлсэнтэй холбогдуулан хууль тогтоомжийн хэрэгжилтийг нийслэл, дүүргийн хэмжээнд үзэж, үнэлэлт дүгнэлт өгч, цаашид салбар болон орон нутгийн хэмжээнд хэрэгжүүлэх чиглэлээ тодорхойлоход энэ удаагийн үзлэгийн зорилго оршиж байгаа юм.

Эх сурвалж: Нийслэлийн архивын газар

Хан-Уул дүүргийн 21 дүгээр хороонд байрлах Буянт-Ухаа хороололд 280 хүүхдийн ортой шинэ цэцэрлэгийг улсын төсвийн хөрөнгө оруулалтаар барьж байгаа. Цэцэрлэгийн барилга угсралтын ажил цар тахлын нөхцөлөөс шалтгаалж удааширсан ч одоогоор барилгын гадна угсралт дуусч, дотор заслын ажил хийж байгаа юм байна. Тус хороонд сургуулийн өмнөх боловсролын насны 944 хүүхэд оршин суудаг. 280 ортой шинэ цэцэрлэг ашиглалтад орсноор хүүхдүүд харьяа орчиндоо суралцах, хамран сургах тойргийн цэцэрлэгийн хүрэлцээ нэмэгдэх давуу талтай.

Энэ он гарсаар улсын хэмжээнд 987.787 зөрчлийн хэрэг бүртгэгджээ. Үүнээс 10 дугаар сард 216.858 зөрчлийн хэрэг бүртгэгдсэн нь өмнөх 9 дүгээр сартай харьцуулахад 8 хувиар өссөн байна. Нийт зөрчлийн хэргийн 79.1 хувь нь Нийслэлд бүртгэгдсэн бол 20.8 хувь нь орон нутагт бүртгэгджээ.

Зөрчил шалган шийдвэрлэх ажиллагаа явуулсан нийт хэргийн

• 99.3 хувийг Цагдаагийн байгууллага,
• 0.2 хувийг Мэргэжлийн хяналт,
• 0.01 хувийг Онцгой байдал,
• 0.4 хувийг бусад байгууллагын эрх бүхий албан тушаалтнууд шалгаж шийдвэрлэсэн байна.

Улсын хэмжээнд өнгөрөгч 10 дугаар сард зөрчил үйлдсэн 213.952 хүн, 263 хуулийн этгээд Зөрчлийн тухай хуульд зааснаар шийтгүүлжээ. Зөрчилд холбогдсон нийт хүмүүсийн 76.2 хувь нь эрэгтэй, 23.8 хувь нь эмэгтэй байгаа бол 65.5 хувь нь 26-45 насныхан байна.

Дээрх хугацаанд зөрчлийн хэргийн улмаас хүн, хуулийн этгээд, төр, нийтийн ашиг сонирхолд 699.109.000 төгрөгийн хохирол учирч 76 хувь нь буюу 531.537.000 төгрөгийн хохирол нөхөн төлөгджээ.

Өнгөрөгч 10 дугаар сард үйлдэгдсэн зөрчлийг 9 дүгээр сартай харьцуулахад ихэнх төрлийн зөрчил өссөн үзүүлэлттэй байна. Тодруулбал,

• Архидан согтуурахтай тэмцэх тухай хууль зөрчих зөрчил 64 хувиар,
• Гэр бүлийн хүчирхийлэлтэй тэмцэх тухай хууль зөрчих зөрчил 50 хувиар,
• Хүүхдийн эрхийг зөрчих зөрчил 33 хувиар,
• Танхайрах зөрчил 31 хувиар,
• Мөрийтэй тоглоом тоглох зөрчил 25 хувиар,
• Төрийн албан тушаалтны шийдвэрийг үл биелүүлэх, үйл ажиллагаанд нь саад учруулах зөрчил 21 хувиар
• Хүний биед халдах зөрчил 14 хувиар,
• Нийтийн зориулалтын орон сууцны оршин суугчдын амгалан тайван байдлыг алдагдуулах, Хулгайлах зөрчил тус бүр 13 хувиар,
• Замын хөдөлгөөний аюулгүй байдлын тухай хууль зөрчих зөрчил 7 хувиар тус тус өссөн байна.

Харин Гамшгаас хамгаалах тухай хууль зөрчих зөрчил 94 бүртгэгдсэн нь өмнөх сараас 8 хувиар буурсан үзүүлэлттэй байна.

Монгол Улсын Ерөнхийлөгчийн ивээл дор “Ойн салбарын үндэсний чуулган”-ыг 11 дүгээр сарын 08-наас 11 дүгээр сарын 15-ны өдрүүдэд Байгаль орчин аялал жуулчлалын яам Улаанбаатар хотноо зохион байгуулж байна.

Чуулганд Монгол Улсын 21 аймаг, нийслэлийн ойн салбарын эрдэмтэн судлаачид, төр, хувийн хэвшлийн төлөөлөл, ойн анги, нөхөрлөл, холбогдох салбарын мэргэжилтнүүд цахимаар болон биечлэн оролцож “Тэрбум мод” үндэсний хөдөлгөөний амжилттай зохион байгуулах, уур амьсгалын өөрчлөлт, цөлжилтийг бууруулах асуудлыг тооцоо судалгаанд үндэслэн, мэргэжлийн түвшинд хэлэлцэхээр нэгдэн чуулж байна .

Салбар хуралдааныг дараах 4 сэдвийн хүрээнд 4 өдрийн турш 800 орчим хүний бүрэлдэхүүнтэй цахим, танхим хосолсон хэлбэрээр зохион байгуулна.

11-р сарын 08-нд нэгдүгээр салбар хуралдаан “Төр, хувийн хэвшлийн хамтын ажиллагаа” сэдвийн хүрээнд

11-р сарын 09-нд хоёрдугаар салбар хуралдаан “Ойжуулалт, ойн нөхөн сэргээлт” сэдвийн хүрээнд

11-р сарын 10-нд гуравдугаар салбар хуралдаан “Цөлжилт, газрын доройтол” сэдвийн хүрээнд

11-р сарын 11-нд дөрөвдүгээр салбар хуралдаан “Агро-ойн аж ахуйг хөгжүүлэх нь” сэдвийн хүрээнд тус, тус болно.

Монгол Улс сүүлийн 80 гаруй жилийн хугацаанд уур амьсгалын өөрчлөлтийн нөлөөгөөр дулааны улирлын хур тунадасны хэмжээ ихээхэн буурч хуурайших, гандуу болох, цөлжих явц илүү ажиглагдах болсон. Манай орны агаарын жилийн дундаж температур 2.4 градусаар дулаарч, өвлийн улирлын хур тунадас 20% орчим нэмэгдэж, зуны улирлын хур тунадас 7% орчим буурсны зэрэгцээ хур борооны шинж байдал өөрчлөгдсөн нь хөрсөнд чийг өгөхөөсөө илүүтэйгээр эвдрэл үүсэхэд нөлөөлж байгаа юм.

Түүнчлэн сүүлийн жилүүдэд цаг агаарын гаралтай байгалийн гамшигт үзэгдлийн тоо нэмэгдсэн. 2020 онд Монгол орны нийт нутаг дэвсгэрийн 76.9 хувь буюу 120.3 сая га талбай бүхий газар нутаг цөлжилтөд тодорхой хэмжээгээр өртсөнөөс 23 хувь буюу 30 орчим сая га талбай цөлжилтийн нэн хүчтэй, хүчтэй зэрэглэлд хамрагдаж байна.

Монгол орны цөлжилт, газрын доройтлыг бууруулахаар Монгол Улсын Ерөнхийлөгч У.Хүрэлсүхийн санаачилгаар “Тэрбум мод” хөдөлгөөнийг орон даяар эхлүүлсэн. Энэ нь манай орны төдийгүй бүс нутаг, олон улсын хэмжээнд онцгой ач холбогдолтой тул бусад орнуудын анхаарал тавин ажиглаж байна.

“Тэрбум мод үндэсний хөдөлгөөн”-ийг амжилттай хэрэгжүүлэх, цөлжилт газрын доройтлыг бууруулах үйл ажиллагааг улсын хэмжээнд зохион байгуулах, салбар дундын уялдаа, нэгдсэн удирдлага зохицуулалтаар ханган ажиллахаар ойн салбарт үйл ажиллагаа явуулж байгаа эрх бүхий байгууллагууд, гишүүнчлэлтэй мэргэжлийн холбоод, төрийн бус байгууллагуудын төлөөллийг чиглэлийн дагуу салбар хуралдаанд оролцуулж, салбарын эрдэмтэн судлаачид, төрийн бус байгууллагын мэргэжилтнүүдийн санал, зөвлөмжийг тусгана.

Монгол улсын ой модны салбарт эрх зүйн шинэчлэл хийх, ойн тогтвортой менежмент, гадаад хамтын ажиллагаа, төр, хувийн хэвшил, мэргэжлийн байгууллагуудын оролцоог хангах, тодорхой шийдвэрт хүрч бодлогот тусгах, санал, зөвлөмж гарган цаашид хэрэгжүүлэхэд уг чуулганы зорилго оршиж байна.

Байгалийн нөөц баялаг ойн нөөцийг хамгаалах, нөхөн сэргээх, цөлжилттэй тэмцэх асуудлаар ирээдүйд гаргах шийдвэр, үйл ажиллагаанд ойжуулалт, ойн нөхөн сэргээлтийн бодлогыг эрчимжүүлэхэд чиглэсэн салбар хоорондын оролцоо, уялдааг хангах, санхүүгийн механизмыг бүрдүүлэх нь “Тэр бум мод” үндэсний хөдөлгөөнийг амжилттай хэрэгжүүлэх нэг хөшүүрэг юм. Энэ хүрээнд ойн үрийн аж ахуйн менежмент, тарьц суулгацын нөөц бүрдүүлэлт, байгаль орчин, ойн салбарын боловсон хүчний хэрэгцээ шаардлага, ойн салбарт хэрэгжүүлж байгаа технологи инновац, Монгол орны усны нөөц ашиглалт, усжуулах цэгүүд, Ногоон санхүүжилт, Агро-ойн аж ахуйг зэрэг асуудлуудыг цогцоор нь хэлэлцэх юм.

Салбар хуралдаануудаас гарсан санал, зөвлөмж, шийдлүүдийг 11-р сарын 15-нд Төрийн ордонд болох Үндсэн чуулганд танилцуулж харьяа яам болон холбогдох төрийн байгууллагууд нэгдсэн бодлого, чиглэлийг тодорхойлно.

Санаачлагч: Монгол Улсын Ерөнхийлөгчийн тамгын газар

Ерөнхий зохион байгуулагч: Байгаль орчин, аялал жуулчлалын яам

Пробиотик уухын давуу тал юу вэ?

Бактери гэхээрээ л бид өвчин үүсгэгч гэсэн бодол төрөөд байдаг, тэгвэл та өдөрт хэдэн тэрбум бактерийг гэдэс рүү гээ оруулж чадах уу? Хэцүүхэн л сонсогдож байгаа биз? Гэсэн хэдий ч шинжлэх ухааны олон судалгаагаар зарим амьд бактери агуулсан хүнс, нэмэлт тэжээл нь зарим өвчнөөс урьдчилан сэргийлээд зогсохгүй, заримыг нь эмчлэх ч боломжтой гэдгийг баталсаар байна.

Хойд Европчууд хоол хүнсэндээ их хэмжээний микроорганизм буюу бичил биетэнг хэрэглэдэг бөгөөд үүнийгээ пробиотик (pro and biota-амьдрал гэсэн утгатай) хэмээн нэрлэдэг аж. Мөн Японд пробиотик агуулсан уух зүйлсийн бизнесүүд ихээхэн хөгжиж байгаа ажээ.

Мөн мэргэжилтнүүд, уламжлалт анагаах ухаанд харшилдаг эмгэг болох цочромхой гэдэсний хам шинж гэх зэрэг эмгэгүүдэд пробиотик уухыг санал болгодог.

1990-ээд оны дунд үеэс эхлэн эмнэлзүйн судалгаагаар пробиотик эмчилгээ нь ходоод гэдэсний замын хэд хэдэн өвчнийг эмчлэх, хүүхдийн харшлын үед, эмэгтэйчүүдийн шээсний замын халдварыг эмчлэх болон урьдчилан сэргийлэх боломжтой болохыг судлан мэдэгдсэн.

Эрүүл гэдсэнд 500 гаруй төрөл зүйлийг төлөөлдөг 100 их наяд бичил биетэн байдаг байна. Эдгээр бичил биетүүд (эсвэл микрофлор) нь биднийг өвчлүүлдэггүй, түүгээр барахгүй ихэнх нь тустай байдаг ажээ. Гэдэс дотор амьдардаг бактери нь эмгэг төрүүлэгч (хортой бичил биетнүүд) -ийг хянаж, хоол боловсруулалт, шим тэжээлийг шингээж мөн дархлааны үйл ажиллагааг дэмждэг байна.

Гэвч бүх пробиотикууд ижил байдаггүй бөгөөд гарал үүслээсээ шалтгаалан өөр өөр нөлөө үзүүлдэг. Жишээлбэл, нэг төрлийн пробиотик бидний амны хөндийд цоорол үүсгэгч бичил биетэнтэй тэмцээд цааш гэдэс дотор ороод ирхээрээ амьд үлдэх шаардлагагүй байж болно. Пробиотикуудын боломжит ач тус нь дараах өвчний үед эмчилхэд болон урьдчилан сэргийлэхэд хэрэглэдэг. Үүнд:

Суулгалт
Цочромтгой гэдэсний хам шинж
Шархлаат колит
Шээсний замын халдвар
Давсагны хорт хавдар дахин давсан үед
Clostridium difficile -ээс үүдэлтэй хоол боловсруулах замын халдвар
Уушгины үрэвсэл
Хүүхдийн экзема зэрэг багтдаг.

ПРОБИОТИК БА ГЭДЭСНИЙ ЭРҮҮЛ МЭНД

Пробиотик эмчилгээний хамгийн сайн тохиолдол бол суулгалтыг эмчлэх явдал юм. Судалгаагаар нярай болон хүүхдүүдэд халдварт суулгалт өвчний явцыг богиносгодог болохыг харуулсан (насанд хүрэгчид биш). Хэдийгээр судалгаа хязгаарлагдмал мөн өгөгдөл зөрүүтэй байгаа ч хоёр том тоймыг нэгтгэн үзэхэд пробиотикууд нь плацеботой харьцуулахад антибиотиктой холбоотой суулгалтыг 60% бууруулдаг болох нь нотлогджээ.

Суулгалтаас илүү түгээмэл тохиолддог асуудал бол, өтгөн хаталт. Пробиотикууд өтгөн хаталтыг эмчлэхэд ямар ашиг тустай болохыг судалжээ. Пробиотикууд нь “гэдэсний дамжих хугацааг” 12.4 цагаар богиносгож, долоо хоног тутам гэдэсний гүрвэлзэх хөдөлгөөний тоог 1.3 дахин нэмэгдүүлж, өтгөнийг зөөлрүүлж, гадагшлуулахад хялбар болгодог болохыг тогтоожээ.

Пробиотик эмчилгээ нь Кроны өвчин, цочромтгой гэдэсний хам шинжтэй хүмүүст сайнаар нөлөөлдөг. Эмнэлзүйн туршилтын үр дүнд пробиотикууд нь шархлаат колитыг арилгаж, Кроны өвчний дахилт, уушигны үрэвсэл (шархлаат колитыг эмчлэх мэс заслын хүндрэл) -ийг урьдчилан сэргийлэхэд тусалдаг болохыг баталжээ.

ПРОБИОТИК БА ШЭЭСНИЙ ЗАМЫН ЭРҮҮЛ МЭНД

Пробиотикууд нь шээс болон бэлгийн замын эрүүл мэндийг сахихад бас ашиглагддаг. Гэдэсний нэгэн адил үтрээ нь нарийн тэнцвэртэй экосистем юм. Зонхилох Lactobacilli омгууд нь ихэвчлэн хортой бичил биетнийг амьд үлдэхэд хэт хүчиллэг болгодог. Гэсэн хэдий ч антибиотик, спермицид, жирэмслэлтээс хамгаалах эм гэх мэт олон хүчин зүйлээс болж систем тэнцвэргүй байдалд орж болно. Микрофлорын тэнцвэрийг сэргээдэг пробиотик эмчилгээ нь нянгийн вагиноз, мөөгөнцрийн халдвар, шээс бэлгийн замын халдвар зэрэг нийтлэг өвчлөлд тустай ажээ.

Пробиотик ерөнхийдөө аюулгүй гэж үздэг мөн энэ нь таны хоол боловсруулах системд аль хэдийн оршин байдаг билээ. Гэвч онолын хувьд, дархлаа султай хүмүүсд эрсдэлтэй байдаг байна.

ПРОБИОТИК БА НЭМЭЛТ БҮТЭЭГДЭХҮҮН

АНУ-д ихэнх пробиотикийг хүнсний нэмэлт бүтээгдэхүүн болгон зардаг бөгөөд энэ нь эмийн туршилт, зөвшөөрлийн процесст ордоггүй байна. Үйлдвэрлэгчид нь бүтээгдэхүүнийг зах зээлд гаргахаасаа өмнө шошго дээрх заалтуудыг үнэн эсэхийг шалгах мөн аюулгүй байдлыг хянах хэрэгтэй байдаг. Гэвч шошго дээрх бичсэн мэдээлэл үнэн эсэх, эсвэл тухайн бактерийн төрөл үр дүнтэй гэсэн баталгаа байхгүй юм.

Пробиотикийн ашигтай төрөл нь тусдаа байдаг учраас бүгд бас ашигтай гэсэн үг биш гэдгийг бүү мартаарай. Тиймээс пробиотик мэддэг эмчтэй зөвлөлдөн зөвлөгөө авахаа битгий мартаарай!

МҮХАҮТ хувийн хэвшил, бизнес эрхлэгчдээ төлөөлж УИХ-ын гишүүн Ц.Даваасүрэнд шаардлага хүргүүллээ. Тодруулбал, Улсын Их Хурлын 2021 оны намрын ээлжит чуулганы 11 дүгээр сарын 04-ний өдрийн хуралдааны хэлэлцүүлгийн үеэр Улсын Их Хурлын гишүүн Ц.Даваасүрэн “Манай бизнес эрхлэгчид дээрмээр мөнгө олсон учраас залхуу. Тэд нар хөдөлмөрлөж мөнгө олоогүй. Элдэв хулгай, луйвар хийж мөнгөтэй болсон учраас залхуурдаг. Татвар хөнгөлөөд өгөөч, хөрөнгө оруулалтыг дэмжээд өгөөч гэж хашхирахаас өөр юм байхгүй” хэмээн тун хариуцлагагүй мэдэгдэл хийсэнд бизнесийн төлөөллийн гол байгууллагын хувьд гүнээ харамсаж байгаагаа илэрхийлж, албан ёсоор уучлалт гуйхыг шаарджээ. Мөн хувийн хэвшил, бизнес эрхлэгчдийг гүтгэсэн, бизнесийн нэр хүндийг гутаасан энэхүү ёс зүйгүй үйлдлийг Улсын Их хурал, холбогдох Байнгын хороо авч үзэн зохих хариуцлагыг хүлээлгэх ёстой гэж үзсэн байна.

Шаардлагыг бүрэн эхээр нь хүргэе.

ШААРДЛАГА:

Улсын Их Хурлын 2021 оны намрын ээлжит чуулганы 11 дүгээр сарын 04-ний өдрийн хуралдааны хэлэлцүүлгийн үеэр Улсын Их Хурлын гишүүн Ц.Даваасүрэн “Манай бизнес эрхлэгчид дээрмээр мөнгө олсон учраас залхуу. Тэд нар хөдөлмөрлөж мөнгө олоогүй. Элдэв хулгай, луйвар хийж мөнгөтэй болсон учраас залхуурдаг. Татвар хөнгөлөөд өгөөч, хөрөнгө оруулалтыг дэмжээд өгөөч гэж хашхирахаас өөр юм байхгүй” хэмээн тун хариуцлагагүй мэдэгдэл хийсэнд бизнесийн төлөөллийн гол байгууллагын хувьд гүнээ харамсаж байна.
Монгол Улсын Үндсэн хуулинд Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална гэж заасан байдаг атал улс орны нийгэм, эдийн засгийн ачааны хүндийг үүрч яваа хувийн хэвшил, бизнес эрхлэгчдээ ийнхүү гутаан доромжлох нь зүйд нийцэхгүй хэрэг билээ.

Монгол Улс урт хугацааны хөгжлийн бодлогоороо “Төр нь хувийн хэвшлийн хөгжлийг бүх талаар дэмжиж, дэлхийд өрсөлдөх үндэсний компаниудтай болно” гэж зорьсон байтал Төрийн өндөр албан тушаалтнаас гарамгүй энэ ёс зүйгүй үйлдэл нь татвар төлж, улсын төсвийн орлогыг бүрдүүлж, ажлын байр бий болгож буй хувийн хэвшлийг гүтгэж, өнөөдрийг хүртэл бий болгосон үнэ цэнэ, нэр хүндэд нь шууд халдсан, нэг сая гаруй иргэнийг хамруулсан хувийн хэвшлийг олон нийтийн өмнө илтэд үгүйсгэж, харлуулсан, олон нийтийг талцуулж, хагаралдуулсан хорон үйлдэл гэж үзэж байна.

Коронавируст халдварын цар тахлын нөхцөл, түүнээс улбаалсан эдийн засгийн хямралын энэ хүнд амаргүй үед бизнес эрхлэгч аж ахуйн нэгж байгууллагууд, хувиараа бизнес эрхлэгчид бүхий л нөөц боломжоо шавхаж, хамаг хүчээ дайчлан ажиллаж байгаа бөгөөд эдийн засгаа сэргээхийн тулд төр хувийн хэвшил хамтдаа урьд урьдаас илүү хичээн ажиллах нэн шаардлагатай үед УИХ-ын гишүүн ийнхүү мэдэгдсэн нь төр хувийн хэвшлийн харилцан итгэлцлийг алдагдуулахад хүргэж байна. Хувийн хэвшлийн нийгэм эдийн засаг дахь хувь нэмрийг үгүйсгэж, хувийн хэвшил чадахгүй төр хийнэ гэсэн байдлаар асуудалд хандаж байгаа нь Монгол Улсын Засгийн газраас эдийн засгийг сэргээхэд хувийн хэвшлийн оролцоог хангах болон гадаадын хөрөнгө оруулагчдын итгэлийг олоход гаргаж байгаа хичээл зүтгэлийг үгүй хийсэн алхам боллоо.

Хувийн хэвшил, бизнес эрхлэгчдийг гүтгэсэн, бизнесийн нэр хүндийг гутаасан энэхүү ёс зүйгүй үйлдлийг Улсын Их хурал, холбогдох Байнгын хороо авч үзэн зохих хариуцлагыг хүлээлгэх нь зүйд нийцнэ гэж үзэж байна. Энэхүү хариуцлагагүй үйлдэлдээ УИХ-ын гишүүн Ц.Даваасүрэн нийт хувийн хэвшлийнхэн, бизнес эрхлэгчдээс албан ёсоор уучлалт гуйхыг шаардаж байна.

Монголын Үндэсний Худалдаа Аж үйлдвэрийн Танхим