Өчигдөр Япон улсын Рюүкю арлуудын баруун өмнөд хэсэгт 6.6 магнитудын хүчтэй газар хөдлөлт бүртгэгджээ. Энэ талаар АНУ-ын Геологийн албанаас мэдээлсэн юм. Газар хөдлөлтийн голомт нь Японы Наха хотоос өмнө зүгт 313 км, Хирара хотоос зүүн өмнө зүгт 181 км зайд 10 км-ын гүнд байжээ. 15 секунд үргэлжилсэн чичирхийлэл газар хөдлөлтийн голомтоос хойд зүгт 350 км-ийн зайд орших Ишикава мужийн иргэдэд тод мэдрэгдсэн байна. Газар хөдлөлтийн улмаас хүний амь нас эрсдээгүй, эврэл сүйрэл гараагүй ажээ.
УИХ-ын чуулганы хуралдаанаар 2022 оны төсвийн тухай хуулийн төслийн эцсийн хэлэлцүүлгийг хийж байна. Төсвийн төслийг боловсруулах ажлын хэсэг дараах төсвийн ерөнхийлөн захирагч нарын урсгал зардлыг нэмэгдүүлэх нь зүйтэй гэж үзжээ.
Мөн шинээр байгуулж буй Шүүхийн сахилгын хорооны урсгал зардлыг нэг тэрбум 738 сая төгрөгөөр тооцож төсөвт тусгажээ.
АНУ 2030 гэхэд нүүрсний хэрэглээг “тэглэнэ” гэж үзэж байгааг АНУ-ын Уур амьсгалын тусгай төлөөлөгч Жон Керри мэдэгдлээ.
Тодруулбал: “Bloomberg”-т тусгайлан өгсөн ярилцлагадаа “2030 он гэхэд бид нүүрс ашиглахаа зогсооно. Нүүрсний цахилгаан станцгүй болно” гэж дурдсан байна.
Үүнээс өмнө АНУ-ын Ерөнхийлөгч Жо Байден 2035 он гэхэд нүүрстөрөгчийн хийн ялгаруулалтыг тэнцвэржүүлэх зорилтыг танилцуулсан юм. Энэ хүрээнд 1.75 их наяд ам.долларын санхүүжилт гаргахаар төлөвлөжээ.
“Squid Game” цувралын хоёрдугаар бүлгийг хийхээр болсныг тус киноны найруулагч Хуан Дун Хюк мэдэгдлээ.
“Үзэгчид бидэнд өөр сонголт үлдээсэнгүй” гэж тэрбээр мягмар гарагт өгсөн ярилцлагынхаа үеэр онцолсон байна. “Squid Game” цувралын нэгдүгээр бүлэг “Netflix”-ийн амжилтыг эвдэж, 142 сая үзэгчдэд хүрсэн аж.
Энэхүү цуврал 900 сая ам.долларын үнэ цэн бүтээнэ гэж “Netflix” компани тооцоолсныг “Bloomberg” мэдээлж байсан юм.
Үндэсний бөхийн цол чимэг олгодог 30 дахь удаагийн “Бүх цэргийн наадам” ирэх Бямба гариг буюу 2021 оны 11 дүгээр сарын 13-ны өдөр 12:00 цагаас Монгол бөхийн өргөөнд болно. Барилдаанд цэрэг, хүчний 5 спорт хороонд харьяалагддаг аймаг, цэргийн цолтой болон залуу 256 бөх зодоглоно.
Чуулганы нэгдсэн хуралдаан үргэлжилж байна. Хуралдааны үеэр УИХ-ын гишүүн, АН-ын бүлгийн дарга Д.Ганбат “Өнөөдөр орчин цагийн боловсролын байгууллага үүссэний 100 жилийн баярын мэндийг монголчууддаа хүргэе. Өнөөдөр дэлхийн синглчүүдийн өдөр юм байна. Монголынхоо ганц бие иргэддээ баярын мэнд мэнд хүргэе. АН-ын бүлэг төсвөөр гурав хоногийн завсарлага авъя” гэв.
Коронавируст халдвараар өвчлөөд эдгэсэн иргэд эмнэлгийн магадалгааг “e-Mongolia” системээс цахимаар авах боломжтой болсон. Энэ ч үүднээс төв шууданд байрлах “e-Mongolia” төвд иргэд маш ихээр хандаж, эмнэлгийн магадалгааг гар утаснаасаа хэрхэн авах заавар, зөвлөгөөг авч байна. Иймээс эмнэлгийн магадалгааг цахимаар хэрхэн авах зааврыг хүргэж байна.
Хэрвээ та эмнэлгийн магадалгааг гар утаснаасаа авах бол:
Улаанбаатар хотын төвийн 6 дүүрэгт орон сууцны үнэ энэ оны гуравдугаар улиралд 2010 оны эцсийнхээс 81.7, өмнөх оны мөн үеийнхээс 1.3, өмнөх улирлынхаас 1.4 хувиар нэмэгджээ.
Тодруулбал, орон сууцны үнэ гуравдугаар улиралд өмнөх оны мөн үеийнхээс Баянгол дүүрэгт 2.5, Хан-Уул дүүрэгт 2.2, Чингэлтэй, Сүхбаатар дүүрэгт 1.8, Баянзүрх дүүрэгт 0.7 хувиар нэмэгдэв. Харин Сонгинохайрхан дүүрэгт 1.1 хувиар багассаныг Үндэсний статистикийн хороо мэдээлэв.
Ер бусын дизайнтай “Кетзалкоатл могойн үүр” хэмээх байшинг онцолж байна.
Уг аварга том могойн дүрстэй байшин Мексикийн Наукалпан де Хуарес хотод байрладаг ба үүнийг архитектор, шинийг санаачлагч Хавьер Сеносиян бүтээжээ.
Могойн хэлбэртэй байшин нь нийт 50 метрийн урттай ба орчин үеийн тансаг тавилга, чимэглэлүүдээс бүрджээ.
Ер бусын гэмээр уг байшин нь нэгэн зэрэг 10 хүртэлх зочин хүлээн авах зайтай аж.
Мөн дотроо таван унтлагын өрөө, дөрвөн ариун цэврийн өрөөг цогцлоожээ. Эдгээр өрөөнүүд нь хоорондоо хонгил болон коридороор холбогдсон. Харин өрөөнүүдийг гэрэлтэй байлгах үүднээс байшин дотор нэг ч хаалга хийгээгүй. Байгалийн гэрэл том хэмжээний, бөөрөнхий болон дугуй хэлбэртэй цонхнуудаар дамжин орж ирдэг. Тус үзэсгэлэнт барилгийн зургийг Airbnb сайтаас харах боломжтой юм.
ИНГЭЭД ТА БҮХЭНД СОНИРХОЛТОЙ БАРИЛГИЙН ДОТОР ДИЗАЙНЫГ ХҮРГЭЖ БАЙНА.
Өрөө бүрийн цонхоор цэцэрлэгийн үзэсгэлэнт дүр зургийг харах боломжтой бөгөөд бүхэлдээ өнгө өнгийн керамик чулуунуудаар чимэглэгдсэн могойн том толгой харагдана. Үнэхээр гайхалтай дүр зураг.
Хүрээлэнд нийт 10 мянга гаруй төрлийн мод, хиймэл усан сан, хүрхрээ, цэцэрлэг, мозайк хана зэргээр тоноглогджээ.
Уг байшингийн эзэн Патрисия хоноглохоор ирсэн зочдод зориулан 3-4 цагийн аялал зохион байгуулдаг гэнэ.
Аяллын үеэр “Кетзалкоатл могойн үүр”-ийн өвөрмөц архитектурын шийдлийн талаар төдийгүй “Huichol” буюу эртний Мексикийн уугуул иргэдийн зан заншил, тэдэнтэй холбоотой сонирхол татам домог, тэдний түүдэг эмийн ургамлуудын талаар мэдэж авах боломжтой юм.
Бэлтгэсэн: Д.ОТГОНТУЯА
Өнгөрсөн долоо хоногт Их Британийн Засгийн газраас “Ковид-19”-ийн эсрэг “Молнупиравир” эмийг баталсан дэлхийн анхны улс болсноо зарлажээ. Энэхүү бэлдмэлийг АНУ-д төвтэй “Merck Sharp&Dohme” болон “Ridgeback Biotherapeutics” компани хамтран бүтээсэн юм. Тус бэлдмэл нь ковидоор өвчилсөн хүмүүсийн эмнэлэгт хэвтэлтийн хугацаа, нас баралтын хэмжээг хоёр дахин бууруулж, хурдан эдгэрэхэд нөлөөтэй аж.
Их Британийн Эм, эрүүл мэндийн бүтээгдэхүүнийг зохицуулах агентлаг (MHRA) өнгөрсөн пүрэв гаригт энэ тухай онцлохдоо шууд ууж хэрэглэх боломжтой тус эм нь анхан шатны эмчилгээг илүү үр дүнтэй болгож, өвчин даамжрахаас сэргийлнэ гэв.
“Молнупиравир” эмийг коронавируст халдвараар хөнгөн болон хүндэвтэр өвдсөн хүмүүст шинж тэмдэг илэрснээс хойш тав хоногийн дотор өдөрт хоёр шахмал уухыг зөвлөх юм. Мөн архаг хууч өвчинтэй, таргалалт, чихрийн шижинтэй, хүндрэх эрсдэл өндөр хүмүүс эл эмийг хэрэглэснээр эмнэлэгт хэвтэх, нас барах эрсдлийг бууруулах юм байна.
Их Британийн Засгийн газар өнгөрсөн сарын сүүлээр “Merck Sharp & Dohme” компанитай гэрээ байгуулж, эхний ээлжинд 480 мянган тун “Молнупиравир” эм худалдан авахаар захиалгаа өгчээ. Харин АНУ болон Европын Холбооны эмийн зохицуулагч агентлагууд “Молнупиравир” эмийг коронавирусийн халдвараар өвдсөн иргэдэд хэрэглэж эхлэх эсэх асуудлыг судалж байгаа юм. Тэд энэ сарын сүүлээр эцсийн шийдвэрээ гаргах юм байна.
“Молнупиравир”-ыг анх Венесуэлийн адууны энцефалит вирусийг эмчлэх гэж гарган авчээ. 2015 онд Атланта дахь Эмори их сургуулийн ашгийн бус DRIVE (Эмори дахь Эмийн Инновацийн Үйлдвэрүүд )-ийн гүйцэтгэх захирал Жорж Пэйнтер тус бүтээгдэхүүн нь олон төрлийн вирусийн эсрэг (МERS г.м.) үр дүнтэй болохыг тогтоосон талаар дурдсан байдаг.
Молнупиравир эм нь ковидыг эмчлэхэд өргөн хэрэглэж буй ремдесивир шиг нуклеозидын аналог нэгдэл аж. Энэ нь SARS-CoV2 эсэд орсны дараа шинээр вирус үүсгэхийн тулд вирус өөрийн РНХ геномыг хуулбарлах шаардлагатай болдог. Харин уг эм нь шинээр нийлэгжиж буй РНХ-ийн гинжинд интеграцлагдаж ороод үр дүнд нь цистидин эсвэл уридин болгон цэгэн мутаци үүсгэснээр гинжний бүтэц байгууламжийг өөрчилдөг байна.
“Одоогоор уг эмийн аюулгүй байдлын талаар дэлгэрэнгүй мэдээлэл хараахан гаргаагүй байна. Хэрэв эмийг зориулалтын дагуу хэрэглэвэл айх аюулгүй гэдэгт бид итгэлтэй байна” гэж “Merck Sharp&Dohme” компанийн дэд ерөнхийлөгч Дариа Хазуда мэдэгджээ.
Ямартаа ч “Ковид-19”-ийн эсрэг амаар ууж хэрэглэх боломжтой эм хэрэглээнд нийлүүлэгдэж эхэлбэл дэлхийн даяар ялангуяа дархлаажуулалт багатай улс оронд ашигт тустай байх нь. Өнөөдрийг хүртэл хийсэн судалгаагаар “Молнупиравир” эм нь “Ковид-19”-ийн бүх хувилбарын эсрэг, нэн ялангуяа дельта вирусийн эсрэг өндөр үр дүнтэй нь батлагдаад байгаа аж. “Merck Sharp&Dohme” компани энэ оны эцэс гэхэд 10 сая ширхэг эм, харин ирэх жил 20 сая ширхэгийг үйлдвэрлэхээр төлөвлөжээ.
Д.ЦЭРЭНДОЛГОР