Month: November 2021

Categories
гадаад мэдээ

АНУ, БНХАУ-ын цахим дээд хэмжээний уулзалтын бэлтгэл ажлын талаар хэлэлцжээ

АНУ-ын Төрийн нарийн бичгийн дарга Энтони Блинкен БНХАУ-ын Төрийн зөвлөлийн гишүүн, Гадаад хэргийн сайд Ван И-тэй утсаар ярьж, хоёр орны удирдагчдын цахим дээд хэмжээний уулзалтын бэлтгэл ажлын талаар хэлэлцжээ.

АНУ-ын Төрийн департаментын хэвлэлийн албаны дарга Нед Прайсын мэдээлснээр, Э.Блинкен, Ван И нар 11 дүгээр сарын 12-нд утсаар ярьсан байна.

Тус уулзалт нь ашиг сонирхол нь давхцаж буй салбаруудад хамтран ажиллах замаар АНУ, БНХАУ-ын өрсөлдөөнийг хэрхэн хариуцлагатай зохицуулах талаар ярилцах боломжийг хоёр улсын удирдагчдад олгоно гэж Э.Блинкен утсаар ярих үеэрээ онцлон тэмдэглэжээ.

АНУ-ын Төрийн нарийн бичгийн дарга мөн дэлхийн эрчим хүчний хангамж, үнийн хэлбэлзэл нь дэлхийн эдийн засгийн сэргэлтэд аюул учруулахгүй байх арга хэмжээ авах нь чухал болохыг онцлон тэмдэглэсэн байна.

Харин Хятадын Гадаад хэргийн яамнаас мэдээлснээр, Ван И АНУ-ын Төрийн нарийн бичгийн даргад мэдэгдэхдээ, Тайванийн хоолойн энх тайван байдлыг Вашингтон чин сэтгэлээсээ дэмжиж байгаа бол арлын салан тусгаарлах үзэлтнүүдийг дэмжихээ зогсоож, Хятад-Америкийн гурван мэдэгдэлд заасан заалтуудыг, мөн “нэг Хятад” зарчмыг даган мөрдөж, Тайванийн тусгаар тогтнолыг дэмжигч хүчинд худал дохио өгөхөө зогсоох ёстой гэжээ.

Categories
мэдээ спорт

Кюүшюү башёгийн эхний өдөр Тэрүнофүжи, Кирибаяамаг давлаа

Японы мэргэжлийн сумо бөхийн Кюүшү башё /2021.11.14/-гийн эхний өдрийн барилдаанд 73 дахь Их аварга Тэрүнофүжи Г.Ган-Эрдэнэ, Комүсүби Кирибаяама Б.Лхагвасүрэнтэй учраа таарч, түүнийг коматасүкүи хаяж 1 даваатай болов.

Энэ өдөр Комүсүби Ичиножёо А.Ичинноров, Окиноүми /М-3/-тэй таарч барилдан түүнийг ёрикири мэхээр давсан Хошёорюү С.Бямбасүрэн /М-5/, Шиманоүми /М-6/-тэй хүч үзэж түүнийг шитатэнаге мэхээр унагаж 1 даваатай болов.

Тамаваши Б.Мөнх-Оргил /М-6/, Ура /М-7/-тай учраа таарч түүнд ашитори мэхээр ойчиж башёг унаагаар эхлүүллээ. Харин Чиёошома Г.Мөнхсайхан /М-7/, Котоеко /М-8/-той барилдаж, түүнийг уватэдашинаге мэхээр давж 1 даваатай болов.

Озэки Шодай, Дайэйшо /М-1/-той таарч барилдан, ошитаоши мэхээр ойчиж 1 унаатай башёг эхлүүлсэн бол Озэки Такакэйшо, Вакатакакаге /М-1/-тэй хүч үзэн түүнийг цүкиотоши мэхээр давлаа.

Харин Сэкивакэ Митакэүми, Оношо /М-2/-г ёрикири мэхээр давсан бол Сэкиваке Мэисэй, Таканошо/М-2/-д цүкиотоши мэхээр ойчиж 1 унаатай башёг эхлүүллээ.

Categories
мэдээ улс-төр

“ДЦС-3”-ыг өргөтгөх ТЭЗҮ-ийг ОХУ-ын компаниар хийлгэнэ

Тавантолгойн цахилгаан станц, Амгалан дулааны станц, “ДЦС-2”, “ДЦС-3”, Чойбалсангийн дулаан цахилгааны станцыг өргөтгөхөөр болжээ.

Ерөнхий сайд Л.Оюун-Эрдэнэ энэ сарын 9-нд ОХУ-ын Ерөнхий сайд М.В.Мишустинтай утсаар ярьж “ДЦС-3”-ын өргөтгөлийн төслийн талаар санал солилцсон байна. ОХУ-ын Эрчим хүчний орлогч сайдаар ахлуулсан ажлын хэсэг байгуулагдаж хамтран ажиллаж байгаа аж. Манай улсын эрчим хүчний салбартай хамтын ажиллагааны туршлагатай ОХУ-ын “Интер РАО-Экспорт” компани ТЭЗҮ-ийг нь 180 хоногт багтаан манай талд ирүүлэхээр тохиролцжээ. ТЭЗҮ-г үндэслэн ОХУ-ын Засгийн газраас авах экспортын зээлийн асуудлыг ирэх оны нэгдүгээр улиралд багтаан Засгийн газрын хуралдаанаар хэлэлцэхээр төлөвлөсөн байна.

Categories
гадаад мэдээ

Лукашенко Оросын пуужингийн системийг хил дээр байрлуулах хүсэлтээ илэрхийлжээ

Польштой залгаа Беларусийн хил дээр Европын Холбооны газар нутагт нэвтрэх гэсэн Ойрх Дорнодын олон мянган дүрвэгч бөөгнөрөөд байгаа билээ.

Эдийн засгийн хоригийн хариуд Беларусийн ерөнхийлөгч Александр Лукашенко зориуд дүрвэгчдийг цуглуулж, Польшийн хилээр нэвтрүүлэх оролдлого хийж байна гэж Европын Холбоо үзэж байгаа.

Ийм шалтгаанаар Европын Холбоо дахин шинэ хориг арга хэмжээг Минскийн эрх баригчдын эсрэг авахаар бэлдэж байна.

Польш улс дүрвэгчдийг газар нутагтаа нэвтрүүлэхгүйн тулд 15,000 орчим цэргийг зүүн хил дээрээ байрлуулаад байгаа юм. Энэ долоо хоногт Беларусийн тал ОХУ-тай хамтарсан цэргийн сургуулилалтыг Польшийн хилийн орчимд зохион байгуулсан.

Тэгвэл өчигдөр Оросын батлан хамгаалахын сэтгүүлд ярилцлага өгөхдөө Лукашенко өөрийн баруун болон өмнөд хил дээр Оросын Искандер пуужингийн системийг байрлуулах хүсэлтэй байгаагаа илэрхийлжээ.

Энэ нь цөмийн цэнэгт хошуу тээвэрлэх чадвартай, орчин үеийн зэвсэг юм.

Бямба гарагт Лукашенко бас Минск хотод болсон мөсний хоккейн тэмцээнд оролцжээ.

Беларусийг сүүлийн 27 жил тасралтгүй удирдаж байгаа 67 настай Лукашенко өрсөлдөгчийнхөө хаалганд гоол хийж, баг нь энэ тоглолтод 5-2 харьцаатай хожсон байна.

Эх сурвалж: Reuters

Categories
мэдээ нийгэм

Улаанбаатарт шөнөдөө 11 хэм хүйтэн байна

Малч­ид, иргэдэд зориулсан мэдээ: Өнөө маргаашдаа ихэнх нутгаар цаг агаар тогтуун байна.

2021 оны 11 сарын 14-ний 20 цагаас 11 сарын 15-ны 20 цаг хүртэлх цаг агаарын урьдчилсан мэдээ

Хур тунадас: Нутгийн хойд хэсгээр солигдмол үүлтэй, бусад нутгаар багавтар үүлтэй. Монгол-Алтайн уулсаар ялимгүй цас орно. Бусад нутгаар цас орохгүй.

Салхи: Ихэнх нутгаар баруун өмнөөс секундэд 4-9 метр, тал, хээрийн нутгаар секундэд 12-14 метр хүрч ширүүснэ.

Агаарын температур: Шөнөдөө Монгол-Алтайн уулархаг нутаг, Дархадын хотгор, Завхан голын эх, Хүрэнбэлчир орчмоор 18-23 хэм, Хангай, Хөвсгөл, Хэнтийн уулархаг нутаг, Идэр, Тэс, Эг, Үүр, Туул, Тэрэлж голын хөндийгөөр 12-17 хэм, говийн бүс нутгийн өмнөд хэсгээр 0-5 хэм, бусад нутгаар 6-11 хэм хүйтэн, өдөртөө Монгол-Алтайн уулархаг нутаг, Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр 0-5 хэм хүйтэн, говийн бүс нутгийн өмнөд хэсгээр 5-10 хэм, бусад нутгаар 1-6 хэм дулаан байна.

УЛААНБААТАР ХОТ ОРЧМООР: Багавтар үүлтэй. Цас орохгүй. Салхи баруун өмнөөс секундэд 4-9 метр. Шөнөдөө Яармаг-Сонгины орчмоор 15-17 хэм, бусад хэсгээр 9-11 хэм хүйтэн, өдөртөө 3-5 хэм дулаан байна.

БАГАНУУР ОРЧМООР: Багавтар үүлтэй. Цас орохгүй. Салхи баруун өмнөөс секундэд 5-10 метр. Шөнөдөө 13-15 хэм хүйтэн, өдөртөө 2-4 хэм дулаан байна.

ТЭРЭЛЖ ОРЧМООР: Багавтар үүлтэй. Цас орохгүй. Салхи баруун өмнөөс секундэд 5-10 метр. Шөнөдөө 14-16 хэм хүйтэн, өдөртөө 2-4 хэм дулаан байна.

2021 оны 11 дүгээр сарын 16-наас 11 дүгээр сарын 20-ныг
хүртэлх цаг агаарын урьдчилсан төлөв

16, 18-нд баруун болон төвийн аймгуудын нутгийн хойд хэсгээр, 17-нд Алтай, Хангай, Хөвсгөл, Хэнтийн уулархаг нутгаар, 19-нд нутгийн хойд хэсгээр цас орно. Салхи 16, 17, 18-нд нутгийн зарим газраар, 19-нд Монгол-Алтай уулархаг нутаг болон говь, талын нутгаар зарим үед секундэд 14-16 метр хүрч ширүүснэ. Монгол-Алтайн уулархаг нутаг, Дархадын хотгор, Завхан голын эх, Хүрэнбэлчир орчим, Тэс голын хөндийгөөр шөнөдөө 20-25 хэм, өдөртөө 1-6 хэм, Хангай, Хөвсгөл, Хэнтийн уулархаг нутаг, Идэр, Эг, Үүр, Туул, тэрэлж голын хөндийгөөр 14-19 хэм хүйтэн, өдөртөө 2 хэм хүйтнээс 3 хэм дулаан, Их нууруудын хотгор болон говийн бүс нутгийн өмнөд хэсгээр шөнөдөө 2-7 хэм хүйтэн, өдөртөө 4-9 хэм дулаан, бусад нутгаар шөнөдөө 8-13 хэм хүйтэн, өдөртөө 0-5 хэм дулаан байна. 18-нд нутгийн баруун хэсгээр, 19-нд ихэнх нутгаар бага зэрэг хүйтэрнэ.

Categories
мэдээ улс-төр

Ц.Мөнх-Оргил НҮБ-ын Олон улсын эрх зүйн комиссын гишүүн болжээ

УИХ-ын гишүүн, Монгол-Америкийн парламентын бүлгийн дарга Ц.Мөнх-Оргил НҮБ-ын Олон улсын эрх зүйн комиссын гишүүнээр сонгогджээ.

Олон улсын эрх зүйн комисс нь НҮБ-ын хүрээнд олон улсын эрх зүйг хөгжүүлэн, олон талт конвенц боловсруулах ажил эрхэлдэг шинжээчдийн комисс юм. Тус комисс жилдээ нэг удаа хуралддаг.

Categories
мэдээ спорт

Монголын 18 сумоч Кюүшюү башёд барилдана

Японы мэргэжлийн сумо бөхийн 11 дүгээр сарын буюу энэ оны сүүлийн тэмцээн Кюүшү башё өнөөдөр Фүкүока Кокүсаи төвд эхэлж байгаа бөгөөд Монголын 6 сумоч Макүүчи зиндаанд барилдана.

Энэ башёд Японоос озэки Шодай, Такакэйшо болон Сэкивакэ Митакэүми, Мэисэй нарын цолтой сумочид барилдана.

Аварга цолтой ганцаараа хүч үзэж байгаа 73 дахь их аварга Тэрүнофүжи Г.Ган-Эрдэнэ, Кюүшү башёгийн эхний өдөр Комүсүби Кирибаяама Б.Лхагвасүрэнтэй оноолт таарсан байна.

Энэ өдөр Комүсүби Ичиножёо А.Ичинноров, Окиноүми /М-3/-тэй, Хошёорюү С.Бямбасүрэн /М-5/, Шиманоүми /М-6/-тэй, Тамаваши Б.Мөнх-Оргил /М-6/, Ура /М-7/-тай, Чиёошома Г.Мөнхсайхан /М-7/, Котоеко /М-8/-той тус тус барилдана.

Кюүшюү башёгийн бусад зиндаанд хүчээ сорих монгол сумочдыг танилцуулж байна.

Жүрёо зиндаа: Дайшохо Ч.Шижирбаяр, Кёокүшүхо Т.Эрдэнэбаатар, Азүмарюү С.Тодбилэг, Миторюү Б.Төрболд

Макүшита зиндаа: Хокүтэнкай Г.Сүхбат, Сакигакэ Я.Баттүшиг, Тамашохо Э.Энхманлай, Ёшояама Б.Анхбаяр, Дэванорюү Т.Тэмүүлэн, Саданохикари Д.Наранцогт

Жонидан зиндаа: Араүма Б.Төртогтох, Хокүтомарү Н.Чинзориг

Categories
мэдээ нийгэм

Шинэ дайчид 10 километрийн марш үйлдлээ

2021-2022 оны сургуулийн жилийн сургалтын төлөвлөгөөний дагуу 2021 оны намар хугацаат цэргийн албанд татагдан ирсэн шинэхэн дайчид болон офицер, ахлагчийн бүлгүүд энэ сарын 12-ны өдөр 10 километрийн явган марш үйлдлээ. Маршийн маршрутын дагуу хичээлийн цэгүүдийг урьдчилсан байгуулсан бөгөөд дасгал сургалт, тэмцээнүүд тус бүртээ амжилттай явагдсан юм.

Тухайлбал, офицер, ахлагчийн бүлгүүдийн дунд гранат шидэлтийн тэмцээнд офицерын бүлгээс дэслэгч Г.Төгөлдөр, ахлагчийн бүлгүүдээс ахлагч Л.Надмиддорж, дэд ахлагч Э.Мөнх-Очир нар тэргүүлж, шагнуулав. Мөн энэхүү тэмцээний үеэр хугацаат цэргийн алба хаагчдад гранатыг хэрхэн зөв шидэх тухай техникийн анхан шатны сургалт давхар зохион байгуулагдлаа.

Үүний дараа галын бэлтгэлийн анхны дасгалыг боловсруулж, байр зүйн баримжаалал, тактик болон химийн бэлтгэлийг тодорхой хичээлийн цэгүүдэд гүйцэтгэж, хугацаат албаны дайчдынхаа бие бялдар,сэтгэл зүйн бэлтгэлжилтийг дээшлүүлсэн юм гэж Хуурай замын цэргийн командлалаас мэдээллээ.

Categories
мэдээ нийгэм цаг-үе

ЕБС-ийн сурагчид ирэх сарын 20-ноос амарна

БШУ-ны сайдын тушаалаар ЕБС-ийн сурагчдын хичээллэх нийт долоо хоног, улирал болон амралтын хуваарьт өөрчлөлт орсон. Энэ дагуу сурагчид дөрөв би гурван улирал хичээллэхээр болсон.

Түүнчлэн өвлийн эхэн сар гарсан өдий цагт ЕБС-ийн сурагчдын эхний улирлын амралт эхэлдэг байсан бол энэ хугацаа хойш сунасан билээ. Тодруулбал, эхний улирлын амралт 16 долоо хоног хичээллээд арванхоёрдугаар сарын 20-ноос эхлэх хуваарьтай болсон. Ингээд зургаан долоо хоног амрах юм.

Харин хоёрдугаар улирлын хичээл нэгдүгээр сарын 31-нд эхлэх бол гуравдугаар улирлынх гуравдугаар сарын 28-наас эхэлнэ.

Categories
мэдээ спорт

Монголын 4 тулаанч Сан Францискогийн дэвжээнд өрсөлдөгчдөө яллаа

АНУ-ын Сан Франциско хотноо өнөөдөр /2021.11.14-нд/ “Mongol Fighting Champion” буюу холимог тулааны MFC холбооны ээлжит тэмцээн болж байгаа билээ.

Энэ удаагийн тулаанд нийт 22 тулаанч октагонд хөл тавих бөгөөд Монгол улсаас Өлзий-Оршихын Тэмүүжин, Пүрэвжавын Өнөрбат, Батбаатарын Баттөр, Мөнгөнцоожийн Нандин-Эрдэнэ нар оролцож байна. Өнөөдрийн байдлаар Сан Францискогийн дэвжээнд Монголын 4 тулаанч бүгд өрсөлдөгчдөө яллаа.

Холимог тулааны MFC холбооны ээлжит тулаанд хүч үзэж байгаа Б.Баттөр эхний тулаанаа хийж 1 дүгээр үед Америкийн тулаанч Нэйтан Монтаног хүнд цохилтоор ялсан бол гавьяат тамирчин /чөлөөт бөх/ П.Өнөрбат ММА дэбютээ MFC-3 эвэнтэд амжилттай эхлүүлж өрсөлдөгчөө 2 дугаар үед хүнд цохилтоор ялж, эхний тулаанаа дуусгав. Мөн АНУ-ын СанРамон хотод амьдардаг залуу тулаанч Өлзий-Оршихын Тэмүүжин өрсөлдөгчөө 1 дүгээр үед хүнд цохилтоор ялсан байна.

Энэхүү MFC холбооны ээлжит тэмцээний хамгийн оргил тулаанд Монголын шилдэг тамирчин М.Нандин-Эрдэнэ MFC холбооны хөнгөн жингийн аваргын бүсээ хамгаалах тулаанаа Серхио Квинонестэй хүч үзэн өрсөлдөгчөө гурван үеийн турш илт илүүрхэн х аваргын бүсээ хамгаалаа. Өдгөө 34 настай түүний хувьд ийнхүү мэргэжлийн холимог тулааны замналдаа 14 ялж, 7 ялагдсан үзүүлэлттэй болж байна.