Month: November 2021

Бүртгэгдсэн гэмт хэрэг өмнөх оны мөн үеэс 889 (4.2%)-өөр буурсан гэдгийг Үндэсний статистикийн хорооноос мэдээллээ.

Бүртгэгдсэн гэмт хэрэг 2021 оны эхний арван сард 20,253 болж, өмнөх оны мөн үеэс 889 (4.2%)- өөр буурсан аж.

Нийт бүртгэгдсэн гэмт хэрэг өмнөх оны мөн үеэс буурахад,

• Өмчлөх эрхийн эсрэг гэмт хэрэг 673 (5.8%),
• Хүний эрүүл мэндийн халдашгүй байдлын эсрэг гэмт хэрэг 181 (2.9%),
• Хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 99 (11.7%),
• Хүрээлэн байгаа орчны эсрэг гэмт хэрэг 70 (12.7%)- аар тус тус буурсан нь голлон нөлөөлжээ.

Харин олон нийтийн аюулгүй байдал, ашиг сонирхлын эсрэг гэмт хэрэг 177 (68.6%)- гоор өсжээ.

Энэ оны аравдугаар сард 3,376 хэрэг бүртгэгдсэн нь өмнөх сараас 434 (14.8%)- өөр өсөхөд өмчлөх эрхийн эсрэг гэмт хэрэг 409 (23.6%)- өөр өссөн нь голлон нөлөөлжээ.

Гэмт хэргийн улмаас учирсан хохирол 2021 оны эхний арван сард 141.5 тэрбум төгрөг, нөхөн төлүүлсэн хохирлын хэмжээ 63.8 тэрбум төгрөг болж, өмнөх оны мөн үеэс учирсан хохирол 115 (44.8%) тэрбум төгрөгөөр буурч, харин нөхөн төлүүлсэн хохирол 3.1 (5.1%) тэрбум төгрөгөөр өссөн гэдгийг мэдээллээ.

Засгийн газрын ээлжит хуралдаанаар Улаанбаатар хотын хог хаягдлын менежментийг сайжруулах асуудлыг хэлэлцлээ.

Энэ үеэр нийслэлийн Засаг дарга бөгөөд Улаанбаатар хотын захирагч Д.Сумъяабазар “Улаанбаатар хотын иргэд хогоо ялгах, ангилах соёлд төдийлөн суралцаагүй байгаа. Нус, цэрээ гудамжинд хаях, нийтийн эзэмшлийн талбайд хүнд, хөнгөнөөр бие засахаас эхлээд хотын иргэний гаргаж болохгүй үйлдлийг гаргадаг. Хотын иргэн хотын стандарт, дүрэм журамд хашигдаж амьдрах ёстой. Цаашдаа иргэдэд хүлээлгэх хариуцлагыг нэмэгдүүлнэ. Хөдөө орон нутгаас ирж байгаа иргэдээ бид хотжих соёлд сургана. Соён гэгээрлийн ажил зохион байгуулна. Таван үеэрээ хотод амьдарч байж хотын иргэн гэдэг ойлголтод хүрнэ гэж боддог.

Ундааны сав, тамхины ишээ машиныхаа цонхоороо гаргаад шидчихдэг иргэдэд 2022 оны нэгдүгээр сарын 1-нээс хуулийн дагуу арга хэмжээ авч эхэлнэ. Нийслэлийн эрх зүйн байдлын тухай хуулиар тодорхой эрх мэдлүүд нийслэлд шилжиж ирсэн” гэлээ.

Монгол Улсад Эрчим хүчний зохицуулах байгууллага үүсгэн байгуулагдсаны 20 жилийн ой энэ онд тохиож байгаатай холбогдуулан эрчим хүчний зохицуулалтын ололт амжилт, үр дүнг хэлэлцэх, цаашдын хөгжлийн чиг хандлага, зохицуулалтын үйл ажиллагааг сайжруулахад чиглэсэн “Эрчим хүчний зохицуулалт-20” сэдэвт онол практикийн бага хурал өнөөдөр Эрчим хүчний зохицуулах хороон дээр болж байна.

Онол практикийн бага хуралд ЭХЯ, ДҮТ ХХК, МХЕГ, СХЗГ, ШӨХТГ, Хот, суурины ус хангамж, ариутгах татуургын ашиглалт,үйлчилгээг зохицуулах “Эрчим хүчний хөгжлийн төв”, “Эрчим хүчний эдийн засгийн хүрээлэн”, “Сэргээгдэх эрчим хүчний үндэсний төв”, ШУТИС, Монголын эрчим хүчний инженерүүдийн холбоо, Сэргээгдэх эрчим хүч үйлдвэрлэгчдийн холбоо, Монгол энержи клубд зэрэг байгууллагуудаас гадна ЭХЗХ-ны тусгай зөвшөөрөл эзэмшигч 180 гаруй хуулийн этгээдийн болон 21 аймгийн, Нийслэлийн эрчим хүчний зохицуулах зөвлөлийн гишүүд хамтран ажилладаг олон улсын байгууллагууд болох ERRA, Дэлхийн банк, GIZ, GGGI зэрэг байгууллагуудын зочид төлөөлөгчид оролцсон 400 гаруй оролцогчтойгоор цахим хэлбэрээр зохион байгуулагдаж байгаагаараа онцлогтой юм.

Энэ хурлаар Эрчим хүчний зохицуулах хорооны 20 жилийн зохицуулалтын үр дүн, цаашид хэрэгжүүлэх арга хэмжээ, Үнэ тарифын зохицуулалт сэдвүүдээр, ЭХЯ-наас Эрчим хүчний салбарын хөгжлийн бодлого хэтийн төлөв, ДҮТ-өөс Диспетчерийн горим зохицуулалт, ШУТИС-иас Эрчим хүч хэмнэх нөөц боломж зарим асуудлаар илтгэл тавьж оролцох юм.

Мөн ERRA, Дэлхийн банк, GIZ, GGGI байгууллагууд эрчим хүчний эх үүсвэрийн шилжилт, зохицуулалтын олон улсын хөгжлийн чиг хандлага зэрэг сэдвээр илтгэл тавьж, Эрчим хүчний зохицуулалтын 20 жилийн ололт амжилтын талаар тусгай зөвшөөрөл эзэмшигч ДЦС-4, Клин-Энержи, ДСЦТС ХК-иуд илтгэл танилцуулах юм байна гэж Эрчим хүчний зохицуулах хорооноос мэдээллээ.

МУИС дархлаажуулалтын нэмэлт тунд хамрагдсан оюутнуудаа кино үзэх тасалбараар урамшуулна. Тодруулбал, маргааш буюу арваннэгдүгээр сарын 18, 19-ний өдрүүдэд МУИС-ийн Төв номын сангийн 203 тоот Лекцийн танхимд 09:00-20:00 цагуудад коронавирусийн эсрэг дархлаажуулалтын явуулын цэг ажиллах гэнэ. Ингэхдээ вакцины дархлаа сэргээх нэмэлт тун буюу III тундаа хамрагдсан оюутнуудыг “Өргөө” кино театрт кино үзэх тасалбараар урамшуулна. Иймд нийт багш, ажилтан, оюутнуудыг вакциндаа идэвхтэй хамрагдахыг уриалж байна.

Санамж

• Дархлаа сэргээх нэмэлт тун буюу вакцины III тунд хамрагдахдаа вакцины хоёр тунд хамрагдсанаас гурван сарын дараа хамрагдах боломжтой.
• Хэрэв та хоёр тунд хамрагдаад КОВИД-19-ийн халдвар авч өвчилсөн бол эдгэснээс 21 хоногийн дараа III тундаа хамрагдаарай.

Засгийн газрын ээлжит хуралдаанаар Улаанбаатар хотын хог хаягдлын менежментийг сайжруулах асуудлыг хэлэлцлээ. Улаанбаатар хотод хог боловсруулах зөвшөөрөл авсан 36 аж ахуйн нэгж байдаг ажээ. Үүний 17 нь идэвхтэй үйл ажиллагаа явуулдаг байна. Нийслэлийн гэр хороололд 201 мянган өрх амьдарч байгаа гэсэн судалгааны дүн гарчээ. Эдгээр өрхүүдийн гаргаж буй хог хаягдлын 48 хувийг сайжруулсан шахмал түлшнээс гарч буй үнс эзэлдэг байна. Хог хаягдлын зардалд жилд 26 тэрбум төгрөг зарцуулдаг ажээ.