Month: November 2021

Categories
гадаад мэдээ нийгэм

Реппер Травис Скоттын тоглолтын үеэр 8 хүн нас баржээ

Бямба гараг /2021.11.06/-т АНУ-ын Техас мужийн Хьюстон хотноо Америкийн рэппер Трэвис Скоттын тоглолтын үеэр үзэгчдийн хөлд дарагдан хамгийн багадаа найман хүн амиа алдаж, хэд хэдэн хүн шархаджээ. Энэ талаар “Houston Chronicle” сонин орон нутгийн эрх баригчдын мэдэгдлээс иш татан мэдээлжээ.

Энэ эмгэнэлт хэрэг өнгөрсөн баасан гарагт “Astroworld” наадмын нээлтийн үеэр болсон бөгөөд нийтдээ 50 мянга орчим хүн уг арга хэмжээнд хүрэлцэн иржээ. Орон нутгийн гал түймрийн албаны даргын хэлснээр, концертын үеэр хүмүүс тайзны урд тал руу бөөгнөрч, гишгэх зайгүй болтлоо шахцалдан, сандралдсан гэнэ. Зарим нь бүр ухаан алдаж унасан аж.

Түүний хэлснээр, 17 хүн эмнэлэгт хүргэгдсэн байна. Өөр нэг эх сурвалжийн мэдээлснээр, концертын үеэр дөчөөд хүн бэртэж гэмтсэн ажээ. Хэрэг явдлын улмаас тоглолтыг зогсоож, наадмын хоёр дахь өдрийн тоглолтыг ч цуцалжээ.

(Эх сурвалж: Tass)

Categories
мэдээ нийгэм

Тяньжинд гацсан 4800 чингэлгийг энэ сард багтаан тээвэрлэнэ

Зам тээвэр хөгжлийн яамнаас Тяньжин болон Эрээн, Зам-Үүд боомтод гацаад байгаа чингэлэг, ачаа барааг арваннэгдүгээр сард багтаан татан авах талаар хэлэлцжээ. Улмаар Хятадын талаас Тяньжинд гацаад буй 4800 чингэлгийг энэ сард багтаан тээвэрлэж дуусгахаа Монголын талд мэдэгдсэн байна.

2021 оны чингэлэг таталтын мэдээллээр:

  • Наймдугаар сард 32 галт тэргээр 2190 чингэлэг
  • Есдүгээр сард 35 галт тэргээр 2285 чингэлэг
  • Аравдугаар сард 24 галт тэргээр 1493 чингэлэг, нийт 5968 чингэлгийн Тяньжинаас татаж авсан. Энэ оны зургадугаар сарын 9-нөөс хойш 12 мянган чингэлэг татаж авчээ.

Мөн Тяньжинаас Эрээний чиглэлд дотоодын галт тэргээр хоногт нэг галт тэрэг явуулж, Эрээнээс өргөн царигт тавьж, ачаа бараа татаж авахаар болсон байна.

Categories
мэдээ нийгэм цаг-үе

“Сүхбаатар” хөлөг онгоцыг татан гаргаж, эрэгт байрлуулжээ


Хөвсгөл нуурт 1985 онд живсэн “Сүхбаатар” хөлөг онгоцыг 33 жилийн дараа татан гаргаж, эрэгт байрлууллаа.

“Сүхбаатар” хөлөг онгоцыг татан гаргах ажиллагааг ШУТИС-ийн эрдэмтэн, судлаач, цэргийн зөвлөх инженерүүдийн тооцоо, судалгаанд үндэслэн дэлхийн жишигт болон Монгол Улсын боломжид нийцүүлэн боловсруулсан ажил гүйцэтгэх аргачлал буюу технологийн картын дагуу усны гүнд анх удаа зохион байгууллсан байна.

“Бор-500” загварын “Сүхбаатар” хөлөг онгоцны урт нь 43,3 м, өргөн нь 8,4м, өндөр нь 5,7м, жин нь 309 тн. Нуурын эргээс 110-120 метр, 12-16 метрийн гүнд живсэн байсныг нуурын гүнд, мандалд, эрэгт алба хаагчид ажиллан, татан гаргаад байна гэж Онцгой байдлын ерөнхий газраас мэдээллээ.

Categories
мэдээ нийгэм

Хууль бусаар ашигт малтмал олборлосон 19 хүнд ял оногдуулжээ

Экологийн цагдаагийн албанаас хууль бус, гар аргаар ашигт малтмал олборлодог иргэдтэй тэмцэх чиглэлээр зарим ажил, арга хэмжээг зохион байгуулжээ.

2020 онд Архангай, Булган, Говь-Алтай, Дархан-Уул, Дундговь зэрэг нийт 13 аймгийн нутаг дэвсгэрт байрлах алтны 20, жоншны 2, бусад 1 ашигт малтмалын илэрц бүхий газарт 58 удаагийн үйлдлээр, 18.000 орчим иргэн дайрч орж, хууль бусаар ашигт малтмал олборлож эрүүгийн болон хэв журмын нөхцөл байдлыг хүндрүүлсэн байна.

Цагдаагийн байгууллагаас дээрх үйлдлийг таслан зогсоож, буруутай этгээдүүдийг саатуулан мөрдөн шалгах ажиллагаа явуулж 23 хэргийг шүүхэд шилжүүлэх саналтай хүргүүлснээс 19 этгээдэд хуулийн дагуу ял оногдуулсан байна.

Categories
гадаад мэдээ нийгэм

Дэлхийн хэмжээнд коронавирусийн халдварын тоо 249 саяыг давлаа

АНУ-ын Жонс Хопкинсийн Их Сургуулийн мэдээлснээр өнөөдөр ням гараг /2021.11.07/-ийн өглөө Дэлхийн хэмжээнд “COVID-19” коронавирусийн халдварын бүртгэгдсэн тохиолдлын тоо 249,538,695 болж нэмэгджээ.

Дэлхий дахинд “COVID-19”-ийн халдвар тархаж эхэлснээс хойш 5,440,795 хүн нас баржээ.

“COVID-19”-ийн халдварын 20 сая гаруй тохиолдол бүртгэгдсэн улс орнуудад АНУ, Энэтхэг, Бразиль мөн тэргүүлсэн хэвээр байна.

Халдвар авсан болон нас барсан хүний тоогоор АНУ тэргүүлж, 46,461,714 хүн коронавирусийн халдвар авсан нь тогтоогджээ. Харин нас барсан хүний тоо 754,278 болжээ.

Халдвар авсан хүнийтоогоор хоёрдугаарт Энэтхэг орж, “COVID-19”-ийн батлагдсан тохиолдлын тоо 34,352,312 болж, тус улсад вирусийн халдварын улмаас нас барсан хүний тоо 460,747 болж нэмэгджээ.

Коронавируст цар тахлын тоогоор Дэлхийд гуравдугаарт Бразил улс орж байгаа бөгөөд тахлын үеэр 21,874,324 тохиолдол бүртгэгдэж, үүнээс 609,388 хүн нас баржээ.

Дэлхийн хамгийн чухал үйл явдлуудын статистик мэдээллээр мэргэшсэн “WorldoMeter” порталын мэдээлснээр, ням гараг /2021.11.07/-ийн өглөөний байдлаар Дэлхийн хүн амын 1 саяд ногдох нас баралтын түвшин 649,2 байна. АНУ-д 1 сая хүн амд 2,323 хүн, Энэтхэгт 330, Бразилд 2,840 хүн нас баржээ.

(Эх сурвалж: Interfax)

Categories
мэдээ спорт цаг-үе

“Улаанбаатар ММС энержи” баг олимпийн аваргуудыг хожлоо

Сагсан бөмбөгийн ФИБА 3х3 төрлийн Мексикийн Их дуулга тэмцээн энэ сарын 7-8-ны хооронд үргэлжлэн явагдаж байгаа билээ.

Тус тэмцээнд эх орноо төлөөлөн оролцож буй “Улаанбаатар ММС энержи” баг хэсгийн эхний тоглолтод Олимпийн Аваргууд болох Латви улсын Рига багийг 21:20 харьцаатай хожиж хэсгийн эхний ялалтаа авлаа.

Categories
мэдээ нийгэм цаг-үе

Самар түүхээр явсан нэг иргэн сураггүй болжээ

Самар түүхээр явсан нэг иргэн сураггүй болжээ.

Тодруулбал, Төв аймгийн Эрдэнэ суманд 10 дугаар сарын 30-ны өдөр 15 хүн самар түүж байгаад нэг нь сураггүй болсон байна. Энэ тухай дуудлагыг 11 дүгээр сарын 5-ны 21.30 цагт ОБЕГ хүлээж авсан аж.

Дуудлагын дагуу аймгийн Онцгой байдлын газрын даргаар ахлуулсан алба хаагчид нийслэлийн Баянзүрх дүүргийн есдүгээр хорооны харьяат иргэн Э/42 настай, эрэгтэй/-ыг эрэн хайх ажиллагааг зохион байгуулаж эхэлжээ.

Categories
гадаад мэдээ

АНУ-ын конгресс 1.2 их наядын дэд бүтцийн төслийг баталлаа


АНУ-ын ерөнхийлөгч Жо Байдены санаачилсан дэд бүтцийн хөрөнгө оруулалтын тухай хуулийн төсөл батлагдлаа. Конгресст олонхийн суудалтай ардчилсан намынхан олон сар сөргөлдсөний эцэст Жо Байдены мөрийн хөтөлбөрийг гол тулгуур болгон 1.2 их наяд долларын төсөвтэйгөөр баталсан юм.

Эцсийн санал хураалтад төлөөлөгчдийн танхимын 228 гишүүнээс 206 нь дэмжсэн санал өгчээ. Ардчилсан намын гишүүдийн олонх нь дэмжсэн санал өгсөн ч 6 гишүүн нь эсрэг санал өгсөн байна. Харин төлөөлөгчдийн танхим дахь бүгд найрамдах намын 13 гишүүн уг хуулийн төслийг дэмжсэн нь Ардчилсан намын гишүүдийн дунд удаан саатаж, маргаан дагуулсан уг хуулийн төсөл батлагдах нэг үндэс боллоо.

Одоогоор ерөнхийлөгч Жо Байден гарын үсэг зурахад л уг хууль хэрэгжиж эхлэх юм. Уг хуулийн төслийг өнгөрсөн 8 дугаар сард Сенатаар баталсан байна. Энэхүү хуулийн төсөлд зам гүүр, нийтийн тээвэр, төмөр зам, нисэх онгоцны буудал, усан онгоцны боомтууд, зэрэг дэд бүтцүүдэд ирэх 5 жилийн хугацаанд 550 тэрбум долларын шинэ хөрөнгө оруулалтууд хийгдэнэ хэмээн тусгагджээ. Мөн өргөн зурвасын дэд бүтцийг сайжруулахад 65 тэрбум долларын хөрөнгө оруулалт, хийхээр тусгажээ.

Мөн цахилгаан тээврийн хэрэгслийн цэнэглэгчийн сүлжээг улсын хэмжээнд бий болгоход 7.5 тэрбум доллар зарцуулагдах аж. Үүнээс гадна ундны цэвэр ус, өндөр хурдны интернет, хүүхэд асрах үйлчилгээг сайжруулах зэрэг санхүүжилтийг тусгажээ. Энэ нь тус улсын дэд бүтцэд сүүлийн жилүүдэд хийсэн хамгийн том хөрөнгө оруулалт болох юм.

АНУ-ын ерөнхийлөгч Байден мэдэгдэлдээ, “Өнөө орой бид улсынхаа ирээдүйд томоохон алхам хийлээ. 21 дугаар зууны эдийн засгийн өрсөлдөөнд “Америк ялалт байгуулсан” гэдгийг одооноос хүмүүс мэдрэх болно” гэжээ.

Энэ долоо хоногт болсон Виржиниа болон бусад мужуудын амбан захирагчийн сонгуульд ардчилсан намынхан ялагдал хүлээсэн нь Жо Байдены рейтингийг нам дотор нь ихээхэн унагаасан. Харин рейтинг нь унасан ч хуулийн төслөө батлуулж чадсан нь түүний засаг захиргаанд болж байгаа томоохон үйл явдлын нэг юм. Жо Байден өнөөдөр Төлөөлөгчдийн танхимын дарга Нэнси Пелоси руу утсаар ярьж дэд бүтцийн тухай хуулийн төсөл батлагдсанд баяр хүргэсэн хэмээн CNN онцолсон байна.

Categories
мэдээ нийгэм

Нярай хүүхдээ орцонд хаясан эцэг, эхийг хайж байна

Буянт-Ухаа хотхоны … байрны шатан дээр өлгийтэй хүүхэд орхисныг оршин суугч цагдаад мэдэгдсэнээр хүүхдийг ЭХЭМҮТ рүү авч явжээ.

Эх сурвалжийн мэдээлснээр 20 орчим хоногтой эрэгтэй хүүхэд байсан аж. Улмаар тус байрны оршин суугч орой 19:00 цагийн үед цагдаагийн байгууллагад дуудлага өгчээ.

Хүүхэд одоо эх нялхаст байгаа бөгөөд биеийн байдал хэвийн байгаа юм байна. Харин цагдаагийн байгууллагаас хүүхдийн эх, эцгийг тогтоохоор ажиллаж байна.

Categories
гадаад мэдээ

Хятад улсад коронавирус халдварын 50 тохиолдол илэрчээ

Хятадын эх газарт бямба гарагт “COVID-19”-өөр дотоодод халдварласан 50 тохиолдол шинээр илэрлээ гэж тус улсын Эрүүл мэндийн үндэсний хорооноос өнөөдөр мэдээлэв.

Шинээр илэрсэн тохиолдлуудын 21 нь Хэбэй мужид, ес нь Лянин мужид, зургаа нь Хар мөрөн мужид, дөрөв нь Сычуань мужид бүртгэгдсэн бол Хэнань, Юньнаньд тус тус гурав, Ганьсуд хоёр, Жянси, Нинсяд тус бүр нэг тохиолдол илэрчээ.

Мөн сүүлийн 24 цагийн хугацаанд халдварын 24 тохиолдол зөөвөрлөгдөн ирсэн бол Шанхай хотод сэжигтэй хоёр тохиолдол эх газрын гаднаас иржээ. Харин тухайн өдөрт халдварын улмаас нас барсан тохиолдол нэмж бүртгэгдээгүй байна.

Ингэснээр бямба гаргийн байдлаар, Хятадын эх газарт халдварын 97734 тохиолдол илэрснээс 91929 хүн эдгэрч, 4636 өвчтөн нас баржээ. Одоогоор нийт 1169 хүн эмчлүүлж байгаагаас 32 хүний биеийн байдал хүнд байна.

Мөн сүүлийн 24 цагт халдварын шинж тэмдэггүй 35 тохиолдол илэрсний 14 нь эх газрын гаднаас зөөвөрлөгдөн иржээ. Ингэснээр бямба гаргийн байдлаар эмнэлгийн хяналтад байгаа ийм тохиолдлын нийт тоо 442-т хүрснээс 337 нь зөөвөрлөгдөн ирсэн байна.

Энэ сарын 6-ны өдрийн байдлаар, Хонконгт халдварын 12367 тохиолдол илэрснээс 12036 хүн эдгэрч, 213 хүн нас барсан бол Макаод 77 тохиолдол илэрч, 75 нь эдгэрчээ. Мөн Тайваньд 16438 тохиолдол илэрснээс 13742 хүн эдгэрч, 847 өвчтөн нас барсан байна.