СЕХ-ноос нөхөн сонгуулийн санал хураалтын 17:00 цагийн байдлаарх ирцийн мэдээллийг өглөө.
Энэ үеэр СЕХ-ноос “2.2 тэрбум төгрөгийн зардал баталж, 148 сонгуулийн хороонд, 2500 төрийн албан хаагч ажиллаж байна. Иймээс иргэдийг саналаа өгөхийг, төрд өөрийгөө төлөөлөх хүнийг сонгохыг уриалж байна” гэв.
Монгол Улсын хэмжээнд 2021 оны эхний есөн сард бүртгэгдсэн хэрэг бүсчилсан байдлаар нийт 17350 гэмт хэрэг бүртгэгджээ. Орон нутагт Увс, Завхан, Говь-Алтай, Дундговь, Сэлэнгэ аймагт гэмт хэргийн гаралт нэмэгдсэн бол бусад аймагт буурсан байна.
Нийслэлд Сонгинохайрхан, Багануур, Хан-Уул дүүрэгт гэмт хэрэг өссөн бол бусад дүүрэгт буурсан байна. Энэ нь өнгөрсөн жилийн мөн үеийнхтэй харьцуулахад 10,9 хувиар буурсан үзүүлэлт аж.
Сингапур улсын эрх баригчид өрнөдийн найман орны вакцинжуулалтад хамрагдсан иргэдэд тусгаарлалтгүй, чөлөөтэй зорчих аялал жуулчлалын корридор нээх болсноо өчигдөр зарлажээ.
Тус улс энэ оны гурвадугаар сараас эхлэн коронавирусийн халдвараас сэргийлэх зорилгоор хилээ хаагаад байсан юм.
Аравдугаар сарын 19-ний өдрөөс нээгдэх корридорт хамрагдах улсууд нь АНУ, Их Британи, Канад, Итали, Франц, Нидерланд, Испани, Дани юм байна.
Өчигдөр Сингапурын ерөнхий сайд Ли Сянь Лүүн телевизээр ард түмэндээ хандаж үг хэлэхдээ аялал жуулчлалын корридорын талаар анх мэдээлжээ.
Тэрбээр уг шийдвэрийг “Ковидтой зэрэгцэж амьдрах” ерөнхий төлөвлөгөөнийхөө нэг хэсэг болохыг тайлбарласан байна.
Хэдийгээр коронавирусийн халдвар тархалт, эндэгдэл нэмэгдэж байгаа ч Сингапур улс цаашид тодорхойгүй хугацаагаар хилээ хаагаад суух боломжгүйг Ли Сянь Лүүн мэдэгджээ.
Ингэснээр Сингапур улс дэлхийн 11 улстай аялал жуулчлалын корридор нээхээр болж байна. Есдүгээр сараас эхлэн тус улс Герман, Брунейн вакцинжуулалтад хамрагдсан иргэдэд хилээ нээсэн бол арваннэгдүгээр сарын 15-наас эхлэн Өмнөд Солонгосын иргэдэд хилээ нээх болсныг өнгөрсөн Баасан гарагт зарласан юм.
Сингапурын хамгийн том худалдааны түнш 20 орны тоонд дээрх 11 улс багтдаг бөгөөд цар тахлаас өмнө тус улсад гадаадаас ирэгсдийн 10 хувийг бүрдүүлдэг байжээ.
Корридорт хамрагдсан улсуудын иргэд Сингапурт ирээд тусгаарлагдахгүй, харин ирмэгцээ болон буцахын өмнө хоёр удаа PCR шинжилгээ өгөх журамтай юм байна.
Корридороор ирэгсэд вакцинжуулалтад заавал хамрагдсан байх ёстой бөгөөд хүүхдүүд болон эрүүл мэндийн шалтгаанаар вакцин тариулаагүй хүмүүсийг нэвтрүүлэхгүй юм.
Сингапур улс энэ оны тавдугаар сарыг хүртэл халдварын цөөн тохиолдолтой байсан бол Дельта хувилбарын улмаас сүүлийн саруудад өвчлөл эрс нэмэгджээ.
Бямба гаригт тус улсад халдварын 3,703 шинэ тохиолдол бүртгэгдэж, 153 хүн нас барсан байна.
Сүүлийн нэг сар орчим хугацаанд бүртгэгдсэн 49,658 халдварын тохиолдлын 98.4 хувь нь хөнгөн буюу шинж тэмдэггүй өвчилсөн, 1.3 хувь нь хүчилтөрөгчийн хангамж муудаж аппаратаар эмчлүүлсэн, 0.1 хувь нь хүндэрч эрчимт эмчилгээ хийлгэсэн, 0.2 хувь нь нас баржээ.
Ням гаригаас эхлэн Сингапурын эрх баригчид шинээр халдвар авсан иргэдэд гэртээ хэвтэж, өөрийгөө эмчлэх журам хэрэгжүүлэхээр болсон байна.
Харин тав хүртэл насны хүүхдүүд, вакцинжуулалтад дутуу хамрагдсан болон огт хамрагдаагүй 50-аас дээш насны иргэд, вакцинжуулалтад бүрэн хамрагдсан 80-аас дээш насны иргэдийг эмнэлэгт хүлээж авахаар болжээ.
Энэ сарын 15-ныг хүртэлх цаг агаарын урьдчилсан төлөв:
Салхи ихэнх хугацаанд секундэд 7-12 метр.
Ихэнх нутгаар өдөртөө бага зэрэг дулаарч Алтай, Хангай, Хөвсгөл, Хэнтэйн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө 12-17 градус хүйтэн, өдөртөө 1 градус хүйтнээс 4 градус дулаан, говийн бүс нутгийн өмнөд хэсгээр шөнөдөө 0-5 градус, өдөртөө 12-17 градус дулаан, бусад нутгаар шөнөдөө 1-6 градус хүйтэн, өдөртөө 5-10 градус дулаан байна.
13-14-нд нутгийн хойд хэсгээр бага зэрэг хүйтэрнэ.
БНХАУ-д өнөөдрөөс эхлэн бензин, дизель түлшний жижиглэнгийн үнийг мэдэгдэхүйц түвшинд нэмэгдүүлэх болно гэж тус улсын Үндэсний хөгжил, шинэчлэлийн хорооноос мэдээлжээ.
Тодруулбал, бензиний үнийг нэг тонн тутамд 345 юань буюу 53.4 орчим ам.доллароор нэмэгдүүлэх бол дизель түлшний үнийг нэг тонн тутамд 330 юаниар нэмэгдүүлнэ гэж тус хорооны мэдээлэлд дурджээ.
Түүнчлэн олон улсын зах зээлд нефтийн үнэ дэлхийн эдийн засгийн өсөлт, эрэлт нэмэгдэж байгаатай холбогдуулан богино хугацаанд өсөх төлөвтэй байгааг онцолсон байна.
Олон улсын зах зээлд нефтийн үнэ тонн тутамд 50 гаруй юаниар өөрчлөгдөж, ажлын 10 хоногийн турш энэ түвшинд байх юм бол БНХАУ-д бензин, дизель түлш зэрэг нефтийн бүтээгдэхүүний үнийг зохих ёсоор тохируулахаа илэрхийлжээ.
Үүнтэй холбогдуулан БНХАУ-ын үндэсний нефть, хийн корпорац /China National Petroleum Corporation, CNPC/, “China Petroleum and Chemical Corporation” буюу “Sinopec” компани, БНХАУ-ын үндэсний оффшор газрын тосны корпорац /China National Offshore Oil Corporation, CNOOC/ зэрэг тус улсын нефтийн гурван том компаниас тогтвортой нийлүүлэлтийг хангахын тулд газрын тосны үйлдвэрлэлээ хадгалах, тээвэрлэлтийг хөнгөвчлөхийг хүссэн байна.
Сонгуулийн ерөнхий хорооноос нөхөн сонгуулийн ирцийн 13.00 цагийн мэдээллийг хүргэлээ. Энэ үеэр СЕХ-ны Хууль эрх зүйн хэлтсийн дарга Д.Бат-Эрдэнэ дараах мэдээллийг өгсөн юм.
Тэрээр “Санал хураалттай холбоотой зөрчил, гомдол илэрсэн үү” гэх сэтгүүлчийн асуултад “Цагдаагийн ерөнхий газраас авсан мэдээллээр сонгуулийн сурталчилгаа үргэлжилсэн 21 хоногийн хугацаанд сонгуулийн хууль тогтоомж зөрчсөн асуудлаар 46 гомдол мэдээлэл ирсэн байна. Үүнээс зургаан зөрчилд шалгалт хийж байна. Гомдлын ихэнх нь зурагт самбар устгасан, гэмтээсэн, алга болсон гэх асуудлаар байгаа юм.
Цагдаагийн байгууллагаас сонгууль зохион байгуулах өдрийн хамгаалалт, санал авах байрны гаднах орчны хамгаалалтад шуурхай ажлын хэсгийг гарган ажиллаж байгаа. Одоогийн байдлаар СЕХ-д зөрчил, гомдолтой холбоотой мэдээлэл ирээгүй байна” хэмээн хариулав.
Тэрээр мөн хэсгийн хороонд болж буй үйл явцыг шууд харж байгаа. Тиймээс асуудлыг тухай бүрд нь шийдвэрлэх боломжтой гэдгийг онцолсон юм.
Улаанбаатар-Өндөрхаан чиглэлийн замд нойтон цас ихээр орсны улмаас зам мөстөж, халтиргаа гулгаа үүссэн талаар ТЦА-наас мэдээлжээ.
Тиймээс тээврийн хэрэгсэлийн өвлийн дугуй хийж, хурдаа тохируулж, шаардлагагүй тохиолдолд хол зам зорчихгүй байхыг зөвлөж, замын хөдөлгөөнд аюулгүй байдал, тээврийн хэрэгслийн бүрэн бүтэн байдлыг сайтар шалгаж хөдөлгөөнд оролцохын мөн анхаарууллаа.
УИХ-ын Хэнтий аймгийн 18 дугаар тойрог, Сонгинохайрхан дүүргийн 28 дугаар тойргийн нөхөн сонгуулийн санал хураалтын үйл ажиллагаа үргэлжилж байна.
Тэгвэл Сонгуулийн ерөнхий хорооноос нөхөн сонгуулийн ирцийн мэдээллийг өглөө. Энэ үеэр Сонгуулийн ерөнхий хорооны Ажлын албаны дарга Д.Баяндүүрэн “УИХ-ын сонгуулийн 18. 28 дугаар тойргийн санал хураалтын үйл ажиллагаа явагдаж байна. Хоёр тойрогт нийт хэсгийн 148 санал авах байранд сонгогчдын саналыг авч байна. Хэсгийн хороод сонгуулийн үйл ажиллагааг хэвийн зохион байгуулж байна. Хэнтий аймагт зөөврийн хайрцгаар 1164 сонгогч саналаа өгсөн. Сонгинохайрхан дүүрэгт 1260 сонгочг зөөврийн хайрцгаас саналаа өглөө. Хаяг дээрээ байхгүй байх зэрэг хүндрэл ажиглагдаж байна. Нийт улсын хэмжээнд 87.7 хувь нь зөөврийн саналын хайрцгаар саналаа өгсөн байна” гэв.
Түүнчлэн Хэнтий аймгийн 18 дугаар тойрогт 12:00 цагийн байдлаар 5575 сонгогч буюу 10.1 хувь байна. Харин Сонгинохайрхан дүүргийн 28 дугаар тойрогт 14857 сонгогч буюу 13 хувь нь саналаа өгөөд байна. Санал авах үйл ажиллагаа хэвийн зохион байгуулагдаж байна” гэдгийг тодотголоо.
Хан-Уул дүүргийн 20 дугаар хороонд байрлах барилгын суурийн нүхнээс цогцос олджээ.
Барилгын суурийн нүхнээс цогцос гаргахад тусламж хэрэгтэй байна гэх дуудлагыг Цагдаагийн Ерөнхий газрын Шуурхай штабаас аравдугаар сарын 08-ны өдрийн 15:10 цагт Онцгой байдлын газар хүлээн авсан байна.
Дуудлагын дагуу Нийслэлийн Аврах ангийн алба хаагчид очиход хоёр метр орчим гүн нүхэнд, 50 см орчим гүн усанд нэр, нас тодорхойгүй эрэгтэй хүний цогцос байжээ. Цогцсыг гарган тус дүүргийн Цагдаагийн нэгдүгээр хэлтэст шилжүүлэн өгсөн байна.
Коронавирусийн халдвар нэмэгдэж байгаа энэ үед нэмэлт дархлаажуулалтыг идэвхжүүлэхээр Эрүүл мэндийн сайдын тушаал гарсан. Үүний дагуу дархлаажуулалтын явуулын баг оюутны дотуур байруудад ажиллаж эхэллээ.
Нийслэлийн хэмжээнд оюутны 54 дотуур байр бий. Эдгээрт амьдардаг оюутнуудыг сайн дурын үндсэн дээр нэмэлт дархлаажуулалт буюу вакцины III тунд хамруулж байна. Өнөөдрийн байдлаар Анагаахын шинжлэх ухааны их сургууль, Дотоод хэргийн их сургууль, Үндэсний батлан хамгаалахын их сургуулийн оюутнуудыг III тунгийн вакцинд хамруулав. Орон нутгийн зарим оюутнууд дархлаажуулалтын цэгийн байршлыг мэдэхгүй байх тохиолдол гарч байна. Тиймээс оюутны дотуур байранд дархлаажуулалтын явуулын баг ажиллах нь үр дүнтэй байна гэдгийг Нэгдсэн шуурхай штабын орлогч дарга Р.Чингис хэллээ.
2021-2022 оны хичээлийн жилд Дотоод хэргийн их сургуульд 500 орчим хүүхэд элсэн суралцаж байна. Эдгээр сурагчдаас сайн дурын үндсэн дээр вакцины III тунд хамрагдах 450 гаруй сонсогчийг өнөөдөр нэмэлт дархлаажуулалтад хамрууллаа. Баянзүрх дүүргийн Эрүүл мэндийн төвөөс 12 хүний бүрэлдэхүүнтэй гурван баг ажиллаж, оюутнуудыг III тунд хамруулж байгаа юм. Мөн Монголын оюутны холбооноос оюутнуудыг сайн дураараа нэмэлт дархлаажуулалтад хамрагдахыг уриаллаа гэж НЗДТГ-ЫН Хэвлэл мэдээлэлтэй харилцах хэлтсээс мэдээлэв.