Month: October 2021

Categories
мэдээ энтертаймент-ертөнц

Кристиано Роналду ихэр хүүхэдтэй болж буйгаа зарлав

Кристиано Роналду болон түүний эхнэр Жоржина Родригес нар ихэр хүүхэдтэй болж буйгаа зарлалаа. Хосууд өөрсдийн цахим хуудаснаа “Бид ихэр хүүхэд хүлээж байгаагаа зарлахад баяртай байна. Бидний зүрх хайраар бялхаж байна.Та нартайгаа уулзана гэхээс хүлээж тэсэхгүй нь” гэжээ.

Залуу хос 2017 онд Алана Мартина гэх охинтой болсон бөгөөд одоо дөрвөн хүүхдийн ээж аав болсон. Өдгөө 36 настай Роналдугийн том хүү 2010 онд төрсөн бөгөөд ээж нь одоог хүртэл нууцлаг байдаг. Харин 2017 онд тээгч эхээс ихэр охин, хүүтэй болсон билээ.

Роналду, Родригес нар 2016 онд Испанийн Мадрид хот дахь “Gucci” брендийн дэлгүүрт танилцаж байжээ. Тухайн үед Родригес цагийн 10 еврогийн цалинтай худалдааны зөвлөхийн ажил хийж байсан гэнэ. Англидаа эргэн ирсэн Роналдугийн хувийн амжилт сайн байгаа ч багийнх нь үзүүлэлт тааруу байна. “Манчестер Юнайтед” баг өнгөрсөн долоо хоногт Премьер лигийн хүрээнд Ливерпүүл багтай тоглож, 0-5 гэсэн харьцаатай ялагдсан.

Categories
мэдээ улс-төр

Албан тушаалын 519 хууль бус томилгоо хийжээ

Төрийн албаны зөвлөл (ТАЗ) төрийн албаны шинэтгэлийн бодлогыг хэрэгжүүлэх, Төрийн албаны тухай хууль тогтоомжийн хэрэгжилтийг хангах чиглэлээр 2021 оны гуравдугаар улирлын байдлаар авч хэрэгжүүлсэн ажлын үр дүн, олон нийтийн анхаарал татсан зарим асуудлаар өнөөдөр мэдээлэл өглөө.

Төрийн жинхэнэ албан тушаалд хууль зөрчиж томилсон болон төрийн жинхэнэ албан хаагчийн эрх, хууль ёсны ашиг сонирхлыг зөрчсөн гэж үзэн 568 гомдол, мэдээллийг ирүүлснийг хүлээн авч, хуулийн хүрээнд хянан шийдвэрлэжээ.

2021 онд Төрийн албан тухай хууль тогтоомжийн хэрэгжилтийг хангах чиглэлээр нийт 87 ажлын хэсэг байгуулан ажиллаж, нийт 282 байгууллагын 2,543 төрийн жинхэнэ албан хаагчтай холбоотой хяналт шалгалтын болон маргаан хянан шалгах ажлыг зохион байгуулсан аж. Үүний хүрээнд нийт 80 байгууллагын 55 албан хаагчтай холбоотой хууль зөрчсөн шийдвэр эрх бүхий албан тушаалтан гаргасныг тогтоож, хүчингүй болгож, хугацаатай үүрэг даалгавар өгч, холбогдох албан тушаалтанд хариуцлага тооцох арга хэмжээ авсан гэдгийг Төрийн албаны зөвлөлийн Маргаан хянан шалгах газрын дарга Ч.Бат-Эрдэнэ хэллээ.

Өөрөөр хэлбэл Төрийн албаны тухай хууль тогтоомжийг зөрчиж албан тушаалд томилсон нийт 519 хууль бус томилгоог хяналт шалгалтаар тогтоожээ.

Мөн тэрбээр “АТГ-аас ирүүлсэн мэдээлэлд үндэслэн 115 байгууллагын 280 алба тушаалтныг томилсон шийдвэрт хяналт шалгалтын үйл ажиллагааг зохион байгуулж нийт 100 албан тушаалтантай холбоотой хууль зөрчсөн томилгоог илрүүлсэн. Цаашид энэ үйл ажиллагааг үргэлжлүүлнэ. Архангай аймагт 88, Булган аймагт 59, Ховд аймагт 55, Хөвсгөл аймагт 93, Увс аймагт 90 төрийн жинхэнэ албан хаагчтай холбоотой хууль бус томилгоог илрүүлж, зөрчил арилгуулах хугацаатай үүрэг даалгавар өгсөн.

ТАЗ нь гаргасан шийдвэрийнхээ хэрэгжилтэд хяналт тавьж ажилладаг. ТАЗ-ийн тогтоолыг эрх бүхий албан тушаалтан заавал биелүүлэх зохицуулалт Төрийн албаны тухай хуульд байдаг юм. Үндсэндээ Төрийн албаны зөвлөлөөс гаргасан шийдвэрийн хэрэгжилтийн 60.3 хувь нь зөвлөлөөс тогтоосон хугацаанд биелэгдсэн нь хангалттай үзүүлэлт. Харин заасан хугацаанд үүрэг даалгавар биелүүлээгүй нийт 36 хууль бус томилгооны шийдвэрийг ТАЗ хуульд заасан эрх хэмжээний хүрээнд хүчингүй болгох арга хэмжээ авсан” хэмээв.

Түүнчлэн Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн хүрээнд төрийн албан тушаалд томилогдсон албан тушаалтны асуудал олны анхаарлын төвд байгаа.

Үүнтэй холбоотойгоор хэлэхдээ “Энэхүү хуулийн хүрээнд томилогдсон албан тушаалтан бүр хууль зөрчсөн гэж ойлгож болохгүй. Энэ дотор Төрийн албаны тухай хуульд заасан ерөнхий болон тусгай шаардлагаа хангасан, хуулийн хүрээнд томилогдон ажиллаж байгаа олон албан тушаалтан байгаа. Харин хуульд заасан шаардлага хангаагүй иргэнийг албан тушаалд томилсон асуудал тодорхой хувийг эзэлж байна. ТАЗ-өөс холбогдох тооцоо судалгааг гаргаж яваа” гэв.

Мөн Төрийн албаны ерөнхий болон тусгай шалгалт 100 хувь цахимжсан гэдгийг ТАЗ-ийн удирдлагууд онцолсон билээ.

2021 оны гурав дахь удаагийн төрийн албаны ерөнхий шалгалтыг зохион байгуулахаар товыг нийтэд зарлаж арваннэгдүгээр сарын 15-ны өдрөөс зохион байгуулах бэлтгэл ажлыг хийж эхэлжээ.

Categories
мэдээ спорт

ОХУ-ын гимнастикч Дина Аверина ДАШТ-ээс 16 дахь алтан медалиа хүртлээ

Японы Китакюшю хотноо уран сайханы гимнастикийн 38 дахь удаагийн дэлхийн аварга шалгаруулах тэмцээн хоёр дахь өдрөө үргэлжилж байна. 1963 оноос эхлэн зохиогдсон энэхүү тэмцээнд энэ жил 47 орны 180 орчим тамирчин оролцож байгаа бөгөөд эхний өдөр хувийн цагариг, бөмбөгтэй дасгалд, хоёр дахь өдөр тууз болон булавтай дасгалд медалийн эзэд тодорлоо.

ОХУ-ын гимнастикч Дина Аверина цагариг, бөмбөг, булавтай дасгалд алт, туузтай дасгалд мөнгөн медаль хүртсэн бол түүний ихэр Арина Аверина бөмбөг болон цагаригтай дасгалд мөнгө, туузтай дасгалд хүрэл медаль хүртлээ.

2 хүн гэх мэтийн зураг байж болно

Туузтай дасгалд Беларусийн Алина Горносько аварга болсон бөгөөд тэрбээр цагаригт мөнгө, бөмбөгтэй дасгалд хүрэл хүртэв.
Туузтай дасгалд ихрүүдийн дасгалжуулагч Ирина Винер протест өгсөн ч орос охидын оноо өөрчлөгдсөнгүй. Хэрэв Дина туузтай дасгалд түрүүлсэн бол ДАШТ-ий 17 алтан медаль зүүсэн Евгения Канаевагийн түүхэн рекорд эвдэгдэх байв.
Гэхдээ нөгөөдөр болох хувийн олон төрөлтөд түрүүлбэл Аверина Канаевагийн амжилттай зэрэгцэх юм.
Динад одоогоор ДАШТ-ий 16 алт, 3 мөнгө, 1 хүрэл, харин Аринад 4 алт, 6 мөнгө, 4 хүрэл медальтай.
Categories
мэдээ эдийн-засаг

ББСБ-уудын хөрөнгийн хэмжээ 26.7 хувиар өсөж, 2.5 их наяд төгрөг болжээ

2021 оны III улирлын байдлаар Банк бус санхүүгийн 531 байгууллагын хөрөнгийн хэмжээ 2.5 их наяд төгрөг хүрч, өмнөх оны мөн үеэс 26.7 хувиар өслөө.

Мөн зээлийн нийт үлдэгдэл өмнөх оны мөн үеэс 30 хувиар өсөж, 1.8 их наяд төгрөгт хүрсэн байна. Олгосон зээлийн 62.3 хувь хэрэглээний зээл байгаа аж. Зээлийн үлдэгдлийн 86.6 хувийг иргэд, 13.4 хувийг хуулийн этгээд бүрдүүлж байна. Салбарын зээлийн нийлүүлэлт нэмэгдсэн болон технологид суурилсан санхүүгийн бүтээгдэхүүн, үйлчилгээ зах зээлд нэвтэрч эхэлсэнтэй холбоотой нийт зээлдэгчдийн тоо өмнөх оны мөн үеэс 1.8 дахин өсжээ.

Банк бус санхүүгийн байгууллагуудын хувь нийлүүлсэн хөрөнгийг нэмэгдүүлснээр зээлийн бүтээгдэхүүний эх үүсвэр нэмэгдэж, нийлүүлэлт өсөн, улмаар зээлийн сарын жигнэсэн дундаж хүүгийн түвшин 2.6 хувь болсон байна.

Categories
мэдээ нийгэм цаг-үе

Улаанбаатараас Сөүл чиглэлийн нислэгээр зорчих иргэдийн анхааралд

Улаанбаатар-Сөүл чиглэлийн зорчигчдоос “Ковид-19” халдварын тохиолдол олон батлагдаж байнгын өсөлттэй байгаа тул БНСУ-ын хорио цээр, халдвартай тэмцэх газраас “БНСУ руу нислэг үйлддэг бүх агаарын тээвэрлэгчдэд мөрдүүлэх заавар”-ын дагуу ирэх сарын 2-ны өдрийн нислэгээр Улаанбаатар-Сөүл чиглэлд Сөүл хотод буух зорчигч тээвэрлэхгүй байх шийдвэр гаргасан байна.

Улаанбаатар хотоос Инчон нисэх буудлаар дамжин гуравдагч улс руу зорчих транзит зорчигчид болон Сөүл-Улаанбаатар чиглэлийн зорчигчдод өөрчлөлт ороогүй болно.
Дээрх өдрүүдэд Улаанбаатараас Сөүл хот руу зорчих зорчигчид тийз авсан газраа хандана уу гэж МИАТ ХК-иас мэдээллээ.
Categories
мэдээ эдийн-засаг

Газрын тосны үнэ 84.4 ам.долларт хүрчээ

Өнөөдрийн байдлаар газрын тос 84.4 ам.долларт хүрсэн байна. Өнгөрсөн долоо хоногт эл төрлийн тос 86 ам.доллар давж өсөөд байв. Энэ дүнгээс 83 ам.доллар болж буурсан ч буцаад өсөх хандлагатай байна.

Ер нь газрын тосны үнэ өсөх үндсэн гурван шалтгаан байдаг. Анхдагч шалтгаан нь цаг үеийн нөхцөл байдал, хоёрдогч хүчин зүйл нь улс төрийн нөлөөллөөс болдог бол гуравдагч хүчин нь байгалийн гамшиг юм.

Categories
мэдээ нийгэм цаг-үе

Томуу томуу төст өвчнөөр өвчлөгсдийн 31.9 хувийг 4 хүртлэх насныхан эзэлж байна

Томуу, томуу төст өвчин идэвхжлийн түвшинд хүрчээ. Улсын хэмжээнд амбулаториор үйлчлүүлж буй иргэдийн дунд томуу томуу төст өвчин 10 мянган хүн амд 25.9 хувьтай байна.

Томуу томуу төст өвчнөөр өвчлөгсдийн 51.5 хувийг 15 хүртэлх насныхан эзэлж байгаа бол үүний 31.9 хувь нь 4 хүртлэх насныхан байна. Өмнө долоо хоногтой харьцуулахад өвчдөл 4 хүртлэх насанд 2.7 хувиар нэмэгджээ.

Мөн 16 хүртэлх насны 1299 хүүхэд эмнэлэгт хэвтэн эмчлүүлсний 25.1 хувь нь буюу 326 нь амьсгалын замын цочмог халдвартай байжээ. Томуугийн дэгдэлт өмнө нь улирал хоорондын түвшинд байсан бол өнгөрсөн долоо хоногоос идэвхжлийн түвшинд ирээд байгааг анхаарах ёстой. Иймээс коронавируст халдвараас гадна томуугийн эрсдэл байгаа тул иргэд хүн хоорондын зайгаа барьж, амны хаалтаа тогтмол зүүх зайлшгүй шаардлагатай байна гэж Эрүүл мэндийн яамнаас мэдээллээ.

Categories
мэдээ нийгэм

2-3 настнуудыг цэцэрлэгт хамруулах эсэх асуудлаар эрсдэлийн үнэлгээ хийж байна

УОК-ын шуурхай штаб, Онцгой байдлын Ерөнхий газар, ЭМЯ, БШУЯ, МХЕГ, ХӨСҮТ, Нийгмийн эрүүл мэндийн хүрээлэн зэрэг мэргэжлийн байгууллагуудаас бүрдсэн ажлын хэсэг сургуулийн өмнөх боловсролын байгууллагын коронавируст халдварын эрсдэлийн үнэлгээ хийж байна.

Ажлын хэсгийн гишүүд зарим цэцэрлэг дээр очиж нөхцөл байдалтай танилцаж байгаа аж. Энэхүү үнэлгээний үр дүнд үндэслэн цэцэрлэгт 2-3 настнуудыг танхимын сургалтад хамруулах, эсэх асуудлыг шийдвэрлэх юм.

2021 оны аравдугаар сарын 27-ны өдрийн байдлаар коронавируст халдвараар 0-17 хүртэлх насны хүүхдийн өвчлөл нийт тохиолдлын 19.1 хувийг эзэлж байна. Үүнээс 2-3 хүүхдийн өвчлөл 9-11 хувийг эзэлж байгаа аж. Хүүхдийн халдварын тохиолдлын дийлэнх буюу 70.5 хувь нь Улаанбаатар хотод бүртгэгдсэн байна.

Багш, ажилтны КОВИД-19 халдварын эсрэг вакцинд хамрагдалт улсын хэмжээнд 95 хувьтай байгаа. Харин цэцэрлэгийн насны хүүхдийн томуугийн вакцинд хамрагдалт улсын хэмжээнд 60 хувьтай байгаа юм.

Categories
мэдээ нийгэм онцлох-нийтлэл туслах-ангилал

Мэлхийт хөшөөнд хүндэтгэл үзүүлж, Сүлдэт хуураа цэнгүүллээ

Монгол Улсын нийслэл Улаанбаатар хот үүсэн байгуулагдсаны түүхт 382 жилийн ойг тохиолдуулан нийслэлийн удирдлагууд Мэлхийт хөшөө, Монголын нууц товчоо, Чингис хааны хөшөөнд хүндэтгэл үзүүлэн, Нийслэлийн Сүлдэт хуурыг цэнгүүллээ.

Мэлхийт хөшөөнд Нийслэлийн Засаг дарга өгөөд Улаанбаатар хотын Захирагч Д.Сумъяабазар, НИТХ-ын дарга Ж.Батбаясгалан, Нийслэлийн Засаг даргын орлогч нар, УИХ-ын гишүүн Б.Саранчимэг, Т.Билэгт тэргүүтэй үе үеийн Хотын дарга нар, НИТХ-ын төлөөлөгч нар хүндэтгэл үзүүлсэн юм.

Улаанбаатар хотын анх шав тавьсан Хүн чулууны хонхорт 1994 онд дурсгалын Мэлхийт хөшөөг босгож байсан түүхтэй. Монгол Улсын Ерөнхийлөгч Морин хуураа дээдлэн дэлгэрүүлэх тухай, Уртын дуугаа өвлүүлэх тухай, Монголын нууц товчоог мөнхөд эрхэмлэн дээдлэх тухай зарлиг гаргасан. Уг зарлигийн дагуу нийслэлийн төр, захиргааны байгууллагууд монгол төрийн бодлогыг хэрэгжүүлж, Нийслэлийн Сүлдэт хуур, Монголын нууц товчоог хүндэтгэлтэйгээр залж, жил бүр нийслэл хотынхоо төрсөн өдрөөр хүндэтгэл үзүүлдэг уламжлалтай.

Хүндэтгэл үзүүлэх ёслолын үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар мэндчилгээ дэвшүүллээ. Тэрбээр “Монгол Улсын нийслэл Улаанбаатар хот анхлан шав тавьсан энэ сайхан билэгт өдрийн мэндийг хүндэт зочид, төлөөлөгч, нийслэлийн иргэдэд дэвшүүлж байна. Тэртээ 382 жилийн өмнө Ширээт цагаан нууранд Монгол Улсын нийслэлийн шавыг тавьсан гэж үздэг. Тэр цагаас хойш Улаанбаатар хот 20 гаруй удаа бууриа сэлгэж, хатан Туулын хөндийд суурьшсан. Өнгөрсөн үеийн түүх уламжлалаа хадгалан үлдэх, үр хойчдоо өвлүүлэх, залуу үеийнхэнд таниулан сурталчлах зорилгоор жил бүр Мэлхийт хөшөөнд хүндэтгэл үзүүлдэг уламжлалтай. Энэ түүхт хөшөөг сүндэрлүүлэх үед ажиллаж байсан, удирдаж байсан нийслэлийн үе үеийн удирдлага, албан хаагчдад чин сэтгэлээсээ талархал илэрхийлж байна. Өнөөдөр хүрэлцэн ирсэн та бүхэнд нийслэл Улаанбаатар хотын түүхт 382 жилийн ойн мэндийг хүргэхийн ялдамд Улаанбаатар хотын нийт 1.5 сая иргэнд эрүүл энх, аз жаргал, хөдөлмөр бүтээлийн арвин их амжилтыг хүсэн ерөөе. Монгол Улсын нийслэл Улаанбаатар хот өдөр бүр цэцэглэн хөгжих болтугай” хэмээв.

Мэлхийт хөшөө, Монголын нууц товчоонд хүндэтгэл үзүүлэн, Нийслэлийн Сүлдэт хуурыг цэнгүүлсний дараа Чингис хааны хөшөөнд хүндэтгэл үзүүлж, нийслэл Улаанбаатар хотын тугийг мандууллаа.

Categories
амьдралын-өнгө мэдээ

Төв аймгийн Бүрэн, Сэлэнгэ аймгийн Мандал сум хогоо ангилдаг болно

Төв аймгийн Бүрэн сум, Сэлэнгэ аймгийн Мандал сум хогоо ангилдаг болох нь. Тодруулбал, Хоггүй Монгол ТББ GEF SGP Mongolia -гийн дэмжлэгтэйгээр дээрх хоёр суманд прессний машин өгч, хог хаягдлын менежментийг сайжруулах төлөвлөгөөгөө хамтран хэрэгжүүлж байна.

Нэг жилийн хугацаанд идэвхтэй ажиллаж дахивараа тушаан, хог хаягдлаа ангилдаг сум болох эхлэлээ бүрэн тавьж чадахгүй бол тус ТББ прессний машинаа буцааж авах аж. Үүнээс гадна боломжийг ашиглаж чадаагүй сумын удирдлагуудын бодит байдлын талаар мэдээлэл хийж баримтжуулан олон нийтэд түгээх юм байна.

нэг буюу түүнээс олон хүн, сууж буй хүмүүс болон дотор гэх мэтийн зураг байж болно