Month: October 2021

Нийслэлийн статистикийн газраас өргөн хэрэглээний хүнсний барааны долоо хоногийн үнийн танилцуулгыг гаргав.

Махны дундаж үнэ

2021 оны 10 дугаар сарын IV долоо хоногт хонины ястай мах нэг килограмм нь дунджаар 10974 төгрөг, үхрийн ястай мах нэг килограмм нь дунджаар 13322 төгрөгийн үнэ ханштай байна. Үхрийн ястай махны үнэ өмнөх долоо хоногтой харьцуулахад 241 төгрөгөөр (1.8%), үхрийн цул махны үнэ 224 төгрөгөөр (1.5%) төгрөгөөр тус тус өссөн байв.

Энэ долоо хоногийн ажиглалтаар үхрийн ястай мах “Хүчит шонхор” хүнсний захад хамгийн хямд буюу 10500 төгрөг, харин “Саруул” захад хамгийн өндөр үнэтэй буюу 16500 төгрөг байна. Өмнөх долоо хоногтой харьцуулахад хонины ястай махны үнэ 22 (0.2%) төгрөгөөр буурч, харин хонины цул махны үнэ 126 (1.1%) төгрөгөөр өссөн байлаа. Энэ долоо хоногийн ажиглалтаар хонины ястай мах “Хархорин” хүнсний захад хамгийн хямд буюу 8500 төгрөгөөр, харин “Саруул” захад хамгийн өндөр үнэтэй буюу 14500 төгрөгөөр худалдаалж байна.

Гурилын үнэ

2021 оны 10 дугаар сарын IV долоо хоногт нийслэлийн хүнсний томоохон зах, дэлгүүрт “Алтан тариа” савласан нэг кг гурилын үнэ дээд зэрэг нь 1500-1800 төгрөг, 1-р зэргийнх 1300-1600 төгрөг, 2-р зэргийнх 969-1200 төгрөг байна.

Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин”, “Барс” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1500-1600 төгрөг, 1-р зэргийн гурил 1300-1400 төгрөгөөр тус тус зарагдаж байна. “Атар” талх хүнсний зах, дэлгүүрт 1430-1540 төгрөгийн үнэтэй байна.

“М-март” супермаркетад “Атар” талхыг хамгийн хямд буюу 1430 төгрөгөөр, харин “Сансар”, “Оргил”, “Е-март” супермаркетуудад хамгийн өндөр үнээр буюу 1540 төгрөгөөр худалдаалж байна.

Хүнсний ногооны үнэ

2021 оны 10 дугаар сарын IV долоо хоногт өмнөх долоо хоногтой харьцуулахад монгол төмс 6.3 хувиар өсч 893 төгрөгөөр, монгол лууван 6.4 хувиар өсч 2518 төгрөгөөр, монгол байцай 2.9 хувиар өсч 1966 төгрөгөөр, монгол хүрэн манжин 3.7 хувиар өсч 3118 төгрөгөөр, сонгино 4.2 хувиар өсч 2658 төгрөгөөр тус тус худалдаалагдаж байна.

Эх сурвалж: Нийслэлийн статистикийн газар

Монгол Улсын Засгийн Газраас эх, хүүхэд, нөхөн үржихүйн эрүүл мэндийн тусламж, үйлчилгээг сайжруулахаар хэрэгжүүлж буй бодлого, арга хэмжээ” сэдэвт нөхөн үржихүйн эрүүл мэндийн үндэсний IV зөвлөгөөн өчигдөр болжээ. НҮБ-ын Хүн амын сангийн дэмжлэгтэйгээр танхим болон цахим хэлбэрээр Монголын эх барих, эмэгтэйчүүдийн эмч нарын холбооноос зохион байгуулсан энэ зөвлөгөөнд ЭМЯ-ны хэлтсийн дарга, холбогдох мэргэжилтнүүд, НҮБ-ын ХАС, Хүүхдийн сан, ДЭМБ, АХБ зэрэг олон улсын байгууллагууд, ЭХЭМҮТ, ЭНЭҮТ-II, ЭМХТ, НЭМҮТ, аймаг, нийслэлийн ЭМГ, нэгдсэн эмнэлэг, эрүүл мэндийн төвийн удирдлага, эх барих, эмэгтэйчүүд, өрх, сум, нарийн мэргэжлийн эмч нар, засаг захиргаа, төрийн бус байгууллагын төлөөлөл бүхий нийт 180 хүн оролцсон байна.

Дэлхийн шинэчлэгдсэн стратегийн гурван гол зорилт нь Эсэн мэнд амьдрал, эрсдэлгүй хөгжил, эргэлтгүй шинэчлэл юм. Энэ асуудлыг дэмжигч улс орнууд “Эмэгтэй хүн бүр, Хүүхэд бүр” хөдөлгөөнийг дэмжин ажилласны үр дүнд эмэгтэйчүүд, хүүхдүүд, өсвөр үеийнхэн тэд хаана хэрхэн амьдарч байгаагаасаа үл хамааран сэргийлж болох эрсдлээс ангижрах болно гэж үзэж байна. Дэлхийн тогтвортой хөгжлийн зорилго 2030, Төрөөс эрүүл мэндийн талаар баримтлах бодлого, Алсын хараа-2050, Монгол Улсын Ерөнхийлөгчийн мөрийн хөтөлбөр, Монгол Улсын Засгийн газрын үйл ажиллагааны мөрийн хөтөлбөр зэрэгт эх хүүхэд, нөхөн үржихүйн эрүүл мэндийн талаар дэвшүүлсэн зорилт, арга хэмжээнүүд хэрэгжиж байна.

Монгол Улсын Засгийн газрын 2017 оны 78 дугаар тогтоолоор батлагдсан “Эх, хүүхэд, нөхөн үржихүйн эрүүл мэнд” үндэсний хөтөлбөрийн төгсгөлийн үнэлгээний дүнгээс үзэхэд нярай болон 1, 5 хүртэлх насны хүүхдийн эндэгдлийн үзүүлэлт Тогтвортой хөгжлийн зорилтод тусгасан түвшинд хүрсэн байна. Харин эхийн эндэгдлийн хувьд харьцангуй бууж байсан хэдий ч сүүлийн хоёр жилд нэмэгдэж, 2021 оны 9 сарын байдлаар 45 эх эндэж, эхийн эндэгдэл 100,000 амьд төрөлтөд 89,7 болж өнгөрсөн оны мөн үеэс гурав дахин нэмэгдсэн байна. Эхийн эндэгдэл өсөхөд улс оронд үүсээд буй цар тахлын асуудал нөлөөлж байгаа хэдий ч, хүний нөөцийн бэлэн байдал, эмнэлгийн тусламж үйлчилгээний чанар сул, орны хүрэлцээ дутмаг зэрэг нь зохих нөлөө үзүүлсээр байна.

Монгол улсын Засгийн газрын 2020-2024 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөөний 2.1.1.3 дах заалтад тусгагдсан “эх, хүүхэд, нөхөн үржихүйн эрүүл мэнд” арга хэмжээний төлөвлөгөөг боловсруулан, Эрүүл мэндийн сайдаар батлуулан хэрэгжүүлнэ гэсэн заалтыг үйл ажиллагаандаа мөрдлөг болгох шаардлага тавигдаж байна. Энэхүү арга хэмжээний төлөвлөгөөг цаашид үргэлжлүүлэн хэрэгжүүлснээр эх, хүүхэд нөхөн үржихүйн эрүүл мэндийн тусламж, үйлчилгээний чанар, хүртээмж нэмэгдэн, сэргийлж болох эх, хүүхдийн эндэгдлээс сэргийлж, нөхөн үржихүйн насны эмэгтэйчүүдийн дундах эрсдэлт хүчин зүйлийн тархалт, өвчлөл нас баралтын байдал, тэдгээрийн шалтгаан нөхцөлийн талаар нотолгоонд тулгуурласан бодлого, шийдвэр гарсан байх болно.

Арваннэгдүгээр сарын цаг агаарын урьдчилсан төлөвийг танилцуулж байна.

Ирэх сард агаарын дундаж температур ихэнх нутгаар олон жилийн дунджаас дулаан, харин нутгийн зүүн хэсгээр буюу Дорнодын нутаг, Сүхбаатарын зүүн хэсгээр олон жилийн дунджийн орчим байна.

Хур тунадас ихэнх нутгаар олон жилийн дунджаас бага байх боловч Баян-Өлгийн баруун, Увсын зүүн, Завханы хойд, Хөвсгөлийн баруун хэсэг болон Дорнод, Сүхбаатарын нутгаар олон жилийн дунджийн орчим байх төлөвтэй байна.

Сарын эхээр буюу нэгдүгээр арав хоногийн эхээр нутгийн баруун хэсгээр, дунд үеэр төв болон говь талын нутгаар, хоёрдугаар арав хоногийн эхэн болон дунд үе, гуравдугаар арав хоногийн сүүлчээр ихэнх нутгаар цас орж, Алтайн салбар уулс болон говь талын нутгаар салхи ширүүсч цасан болон шороон шуурга шуурч болзошгүй байна.

Мөн нэгдүгээр арав хоногийн дунд үеэр агаарын температур бага зэрэг сэрүүсэх бол хоёрдугаар арав хоногийн дунд үеэр ихэнх нутгаар хүйтрэх төлөвтэй байгааг анхааруулж байна.

ЦАГ АГААРЫН ТӨЛӨВИЙГ БҮС НУТГААР НЬ ТАНИЛЦУУЛЖ БАЙНА

Баруун аймгуудын нутгаар. (Баян-Өлгий, Ховд, Увс, Завхан, Говь-Алтай, Баянхонгор)

Энэ сард агаарын дундаж температур нийт нутгаар олон жилийн дунджаас дулаан, хур тунадас Баян–Өлгийн нутаг, Увсын зүүн, Завханы хойд, Хөвсгөлийн баруун хэсгээр ОЖД–ийн орчим, бусад нутгаар дунджаас бага байх төлөвтэй байна.

Нэгдүгээр арав хоногийн эхээр ихэнх нутгаар бага зэрэг сэрүүснэ, хоёрдугаар арав хоногийн дунд үеэр ихэнх нутгаар агаарын температур өмнөх үеэсээ 3–8°С–аар хүйтэрнэ.

Нэгдүгээр арав хоногийн эхэн, хоёрдугаар арав хоногийн эхэн болон дунд үе, гуравдугаар арав хоногийн сүүлчээр ихэнх нутгаар цас орно. Салхи ихэнх хугацаанд 5–10 м/с, нэг болон хоёрдугаар арав хоногийн сүүлчээр Алтайн салбар уулсаар түр зуур 18–20 м/с хүртэл ширүүсч болзошгүй байна.

Төвийн аймгуудын нутгаар. (Архангай, Өвөрхангай, Хөвсгөл, Булган, Сэлэнгэ, Төв, Орхон, Дархан-Уул)

Энэ сард агаарын дундаж температур нийт нутгаар олон жилийн дунджаас дулаан, хур тунадас мөн нийт нутгаар олон жилийн дунджаас бага байна.

Нэгдүгээр арав хоногийн эхээр ихэнх нутгаар бага зэрэг сэрүүснэ, хоёрдугаар арав хоногийн дунд үеэр ихэнх нутгаар агаарын температур өмнөх үеэсээ 3–8°С–аар хүйтэрнэ.

Нэгдүгээр арав хоногийн эхэн, хоёрдугаар арав хоногийн эхэн болон дунд үе, гуравдугаар арав хоногийн сүүлчээр ихэнх нутгаар цас орно. Салхи ихэнх хугацаанд 4–9 м/с, зарим үед түр зуур 10–12 м/с хүрч ширүүснэ.

Зүүн аймгуудын нутгаар. (Хэнтий, Дорнод, Сүхбаатар)

Энэ сард агаарын дундаж температур Дорнодын нутаг болон Сүхбаатарын зүүн хагаст ОЖД–ийн орчим, бусад нутгаар дунджаас дулаан, хур тунадас Дорнод, Сүхбаатарын нутгаар олон жилийн дунджийн орчим, бусад нутгаар дунджаас бага байх төлөвтэй байна.

Нэгдүгээр арав хоногийн дунд үеэр ихэнх нутгаар бага зэрэг сэрүүснэ, хоёрдугаар арав хоногийн дунд үеэр ихэнх нутгаар агаарын температур өмнөх үеэсээ 5–10°С–аар хүйтэрнэ.

Нэгдүгээр арав хоногийн дунд, хоёрдугаар арав хоногийн эхэн болон дунд үе, гуравдугаар арав хоногийн сүүлчээр ихэнх нутгаар цас орно. Салхи ихэнх хугацаанд 4–9 м/с, зарим үед түр зуур 10–12 м/с хүрч ширүүснэ.

Говийн аймгуудын нутгаар. (Дундговь, Өмнөговь, Дорноговь, Говь-Сүмбэр)

Энэ сард агаарын дундаж температур нийт нутгаар олон жилийн дунджаас дулаан, хур тунадас Дорноговийн зүүн хэсгээр олон жилийн дунджийн орчим, бусад нутгаар дунджаас бага байх төлөвтэй байна.

Хоёрдугаар арав хоногийн дунд үеэр ихэнх нутгаар агаарын температур өмнөх үеэсээ 3–8°С–аар хүйтэрнэ.

Нэгдүгээр арав хоногийн дунд үе, хоёрдугаар арав хоногийн эхэн болон дунд үе, гуравдугаар арав хоногийн сүүлчээр ихэнх нутгаар цас орно. Салхи ихэнх хугацаанд 5–10 м/с, зарим газраар түр зуур 12–14 м/с, ялангуяа нэг болон хоёрдугаар арав хоногийн сүүлчээр зарим газраар түр зуур 18–20 м/с хүртэл ширүүсч цасан болон шороон шуурга шуурч болзошгүй байна гэж ЦУОШГ-аас мэдээллээ.