Month: October 2021

Монгол Улсын Орчин цагийн боловсрол, шинжлэх ухааны салбар үүсэж хөгжсөний 100 жилийн ойг тохиолдуулан салбартаа олон жил үр бүтээлтэй ажиллан ажил хөдөлмөрөөрөө тэргүүлсэн хүмүүст төрийн дээд шагнал гардууллаа. Шагналыг Боловсрол, шинжлэх ухааны сайд Л.Энх-Амгалан, Төрийн нарийн бичгийн дарга Д.Батбаатар нар гардуулан өглөө.

ТӨРИЙН ДЭЭД ШАГНАЛ ХӨДӨЛМӨРИЙН ГАВЬЯАНЫ УЛААН ТУГИЙН ОДОНГООР:

• БШУЯ-ны Хөрөнгө оруулалтын газрын дарга Чойдогдэмэдийн Энх-Амгалан
• Баянгол дүүргийн ерөнхий боловсролын 28-р сургуулийн сургалтын менежер Цэдэвдоржийн Мягмаржав

ТӨРИЙН ДЭЭД ШАГНАЛ АЛТАН ГАДАС ОДОНГООР:

• БШУЯ-ны Санхүү, эдийн засгийн газрын дарга Самбуудаваагийн Нансалмаа
• Өвөрхангай аймгийн ерөнхий боловсролын 2-р сургуулийн бага ангийн ахмад багш Тогтохын Лхагвасүрэн

ТӨРИЙН ДЭЭД ШАГНАЛ ХӨДӨЛМӨРИЙН ХҮНДЭТ МЕДАЛИАР:

• БШУЯ-ны Мэдээллийн технологи, статистикийн хэлтсийн дарга Оюунбилэгийн Дүнжиннамдаг
• БШУЯ-ны Бодлого, төлөвлөлтийн газрын шинжээч Цагаан-Өвгөний Бумангэрэл
• БШУЯ-ны Хуулийн хэлтсийн ахлах мэргэжилтэн Чимэдрэгзэнгийн Баярмаа
• БШУЯ-ны Хөрөнгө оруулалтын газрын ахлах мэргэжилтэн Төмөрбаатарын Сумъяа
• Нийслэлийн ерөнхий боловсролын 115-р сургуулийн сургалтын менежер Дуламжавын Оюун-Эрдэнэ

Монголын Залуучуудын холбооны “Тэргүүний залуу” алтан медалиар дэд сайдын туслах бөгөөд гамшгаас хамгаалах салбар зөвлөлийн нарийн бичгийн дарга Б.Сайнбилиг нарыг тус тус шагналаа.

Баянзүрх дүүргийн Прокурорын газраас Эрүүгийн хуулийн ерөнхий ангийн 3.7 дугаар зүйлийн 1 дэх хэсэгт заасныг журамлан, мөн хуулийн тусгай ангийн 17.3 дугаар зүйлийн 3 дахь хэсгийн 3.1 дэх заалтад заасан гэмт хэрэг үйлдсэн гэж ирүүлсэн Д.Гүрсоронз, Д.Батбаяр, Д.Одгэрэл нарт холбогдох эрүүгийн хэргийн шүүх хуралдаан Баянзүрх дүүргийн Эрүүгийн хэргийн анхан шатны шүүхэд 2021 оны есдүгээр сарын 20-ны өдрийн 09:00 цагаас эхлэн 2021 оны есдүгээр сарын 24-ний өдрийн 22 цаг хүртэл 5 өдөр 65 цагийн турш үргэлжилж шүүгдэгч нарыг залилах гэмт хэргийг бүлэглэн байнга үйлдэж амьдралын эх үүсвэр болгож бусдад их хэмжээний хохирол учруулсан гэм буруутайд тооцсон.

Шүүгдэгч нар нь холбогдох эрх бүхий байгууллагаас барилга барих зөвшөөрөл албан ёсоор аваагүй байхдаа буюу барилга баригдах эсэх нь эцэслэн шийдэгдээгүй байсан нөхцөл байдлаа нуух замаар “Орон сууцны хотхон барьж байгаа” гэж бусдыг төөрөгдөлд оруулж, улмаар барилгын зураг, загвар бүхий тараах материалыг бэлтгэн, түүнийгээ ашиглан иргэдэд “Хямд байр зарна, урьдчилгаа төлбөрийн дүн ихсэх тусам 1 мкв үнэ багасна, барьцаа хөрөнгө шаардахгүй, өрхийн орлого нотлох шаардлагагүй, жилийн 5 хувийн хүүтэй лизингийн гэрээ компанитай байгуулна” гэх мэтээр зохиомол байдлыг зориуд бий болгож “Орон сууц захиалгын гэрээ”-ний урьдчилгаа хэмээн 457 иргэнээс 8,661,779,880 төгрөг татан төвлөрүүлсэн байна.

Хуульд зааснаар шүүгдэгч нарын өмгөөлөгч нарын хүсэлтээр хохирол төлбөр төлөх зорилгоор ажлын 5 өдрийн хугацаагаар шүүх хуралдааныг завсарлуулсан бөгөөд 2021 оны аравдугаар сарын 01-ний өдрийн 14:00 цагаас шүүгдэгч нарт эрүүгийн хариуцлага хүлээлгэх шүүх хуралдаан болж шүүхээс Монгол Улсын нэрийн өмнөөс Шийтгэх тогтоол гарч шүүгдэгч Д.Гүрсоронзонд 10 жил хорих ял оногдуулж хаалттай хорих байгууллагад эдлүүлэхээр, шүүгдэгч Д.Одгэрэлд 6 жил хорих ял, шүүгдэгч Б.Батбаярт 6 жил хорих ял оногдуулж, тус тус нээлттэй хорих байгууллагад эдлүүлэх, шүүгдэгч нараас гэмт хэрэг үйлдэж учруулсан хохирлоос үлдэх 7,265,839,273 /долоон тэрбум хоёр зуун жаран таван сая найман зуун гучин есөн мянга хоёр зуун далан гурав/ төгрөгийг хувь тэнцүүлэн гаргуулж хохирогч нарт олгуулахаар шийдвэрлэв.

Прокурорын байгууллагаас битүүмжилсэн байсан шүүгдэгч нарын хөдлөх болон үл хөдлөх хөрөнгө болон хөрөнгийн шилжилт хөдөлгөөн, дансны гүйлгээ хязгаарласан арга хэмжээг гэмт хэргийн улмаас учирсан хохирлыг барагдуулах зорилгоор шүүхийн шийдвэр биелүүлэх байгууллагад шилжүүлэхээр шийдвэртээ заасан байна гэж Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газраас мэдээллээ.

Цэцэрлэг, сургуулийн хөгжмийн багш нарыг чадавхжуулах сургалтыг зохион байгууллаа. Монгол Улсын хэмжээнд байгаа 1700 гаруй багш нарын төлөөлөл болгож эхний ээлжид аймаг, дүүрэг бүрээс дөрвөн багш буюу нийт 120 багшийг энэхүү сургалтад хамрууллаа.

Сургалтын багшаар Төрийн соёрхолт, зууны манлай бүжиг дэглээч С.Сүхбаатар, Хурд хамтлагийн гитарчин, МУГЖ Д.Отгонбаяр, төгөлдөр хуурч Б.Чинбат, дуучин Э.Дашням, Монголын бүжгийн академийн тэргүүн Д.Сувдмаа нар ажиллажээ.

Сургалтад оролцсон 120 хөгжмийн багш сургууль бүртээ очиж сургалтаа бусад багш нартаа түгээх ментор багш хийх юм. Ийнхүү багш нар хүүхдүүддээ Уртын дууны амьсгалын дасгал, бие биелгээ, хөгжимт хөдөлгөөний зохиомжийг зааж, авьяаслаг сурагчдынхаа уран бүтээлд уран сэтгэмжээр дууны найруулга, дуу бичлэгийн анхны хичээлийг заах боломж бүрдэж байна.

Сайн дурын, авлагагүй, цусны донорын эгнээг өргөжүүлэх, тэднийг алдаршуулж урамшуулах зорилгоор сар бүрийн 3-ны өдөр “Цусаа бэлэглэх өдөр”-ийг тэмдэглэдэг.

Тэгвэл энэ жил 79 дэх удаагийн арга хэмжээ өнөөдөр 11 цагт болно. “Цусаа бэлэглэж, цохилох зүрх бүхнийг аваръя” уриатай энэхүү арга хэмжээг зургаа дахь жилдээ зохион байгуулж буй юм.

Цусны донорын тоо жил ирэх тусам өсөж байгаа аж. Тодруулбал, 2013 онд улсын хэмжээнд 23 мянган донор цусаа өгсөн бол 2020 онд энэ тоо 35600 болжээ. Хоёр болон түүнээс дээш цусаа өгсөн байнгын донорын тоо 2014 онд нийт цус цуглуулалтын 38 хувийг эзэлсэн бол 2020 оны байдлаар 65 хувь болж, мөн л өссөн байна.

Нийслэлийн хэмжээнд цус цуглуулах суурин таван төв ажиллаж байгаа бөгөөд явуулын баг ажилладаг аж.

Монголын шүдний мэргэжилтнүүдийн холбооноос 2019 оноос эмч, сувилагчийн хариуцлагын даатгалын бүтээгдэхүүнийг төрийн болон хувийн хэвшлийн шүдний эмнэлэгүүдэд хэрэгжүүлэх Ажлын хэсэг гарган судалж ажилласны үр дүнд хариуцлагын даатгалын бүтээгдэхүүн үйлчилгээг эрүүл мэндийн салбарт нүүр ам судлалын салбараас санаачлан, эхлүүлж, нэвтрүүлэхээр болжээ.

МШМХ-ны Ерөнхийлөгч, Анагаах ухаан доктор, профессор Ж.Цолмон, “Нүүр ам судлалын салбарын нийт ажилтан, ажиллагсдын эрх ашгийг хамгаалах, ажил мэргэжлийн хариуцлагын тогтолцоог сайжруулах, ажил мэргэжлээс шалтгаалах хариуцлагын алдаа, дутагдлыг даатгалын бүтээгдэхүүнээр шуурхай шийдвэрлэх, шүдний эмнэлэг, үйлчлүүлэгч, эмч, сувилагчдын хоорондын харилцааг зохицуулах, зохистой харьцааг хангах, үйлчлүүлэгчийн сэтгэл ханамжийг дээшлүүлэх хууль эрх зүйн зөв шийдэлд хүрэх эрх зүйн зөв зохицуулалт гэж үзэж байна” гэв.

Тус холбоо 2003 оноос үйл ажиллагаагаа явуулж, 2008 оноос хариуцлагын даатгалын үйлчилгээг гарган нэвтрүүлсэн анхны даатгалын компаниудын нэг “Амар” даатгалын компанитай ажиллахаар хамтын ажиллагааны гэрээнд гарын үсэг зуржээ. Гэрээний дагуу хариуцлагын даатгалын үйлчилгээ үзүүлэхээс гадна эмч, эмнэлгийн ажилчдад даатгалын бүтээгдэхүүн үйлчилгээний ашиг тус, давуу тал болон даатгалын талаар шинэ мэдээ, мэдээллээр хангах, сургалт явуулах юм.

Хариуцлагын даатгалд эмнэлэг, хувь эмч, сувилагчид хамрагдаж болох бөгөөд эмч сард 10000 төгрөг, сувилгагч 5000 төгрөгийн хураамж буюу жилд 60000-120000 төгрөг төлснөөр эмчид 15 сая, сувилагчид 8 сая төгрөгийн нөхөн олговор олгох юм байна. Шүдний эмнэлэг, хувь эмч, сувилагч нар МШМХ-ндоо бүртгүүлэн, тус даатгалын компанитай гурвалсан гэрээ байгуулснаар даатгалд хамрагдах, даатгалын хариуцлагын бүтээгдэхүүн үйлчилгээ авах бүрэн эрхтэй болно.

Нийслэлийн удирдах ажилтнуудын Шуурхай хурал болж байна.

Хурлаар хэлэлцэж буй асуудлын нэг нь сайжруулсан шахмал түлш борлуулах цэгийн тоог нэмэгдүүлэх тухай юм. Өнөөдрийн байдлаар сайжруулсан түлшний 281 цэг ажиллаж байгаа бөгөөд энэ долоо хоногт 450 болгоно гэж Тавантолгой түлш компанийн төлөөлөл нийслэлийн Засаг даргад танилцуулжээ.

Сайжруулсан түлшний үйлдвэрлэл, цэг байгуулах ажлыг Тавантолгой түлш болон Эрчим хүчний яам хариуцдаг. Харин нийслэлээс зөвхөн цэгүүдэд түгээлт хийх үүрэгтэй юм.

Нийслэлийн Засаг даргын Хэвлэлийн төлөөлөгч Н.Сугар “Өнөөдрийн байдлаар сайжруулсан түлшний нөөц өмнөх оноос 25 мянган тонноор бага байна. Энэ нь зүүн үйлдвэрийг нүүлгэнэ хэмээн таван сар зогсоосонтой холбоотой” хэмээн мэдээлэв.