Монголын урлагийн салбарт одоо ч гялалзан, орон зай нь томоос том хэвээр байгаа хамтлагуудын нэг нь “Камертон”. Тус хамтлагийн 26 жилийн ой энэ онд тохиож буй.
“Камертон” хамтлагийнхан хойшлуулаад байсан тоглолтоо энэ сарын 15-нд “Zaisan event hall”-д хийхээр товложээ.
Тоглолтын энгийн тасалбар нь 25 ам.доллар буюу 71000, VIP тасалбар 100 ам.доллар буюу 285.000 төгрөгийн үнэтэй.
Замын хөдөлгөөнд оролцож байх үедээ гар утсаа ашигласнаар жолоочийн хариу үйлдэл үзүүлэх хурд гурван секундээр буурдаг аж.
Энэ хугацаанд дунджаар 49.5 метр зайг туулсан байдаг. Мөн хөдөлгөөнд оролцохдоо гар утас тогтмол ашигладаг жолооч зам тээврийн осолд өртөх магадлал нь бусад жолоочоос 80 хувиар илүү байгааг Замын хөдөлгөөний удирдлагын төвөөс мэдээлэв.
Иймд жолооч та замын хөдөлгөөнд оролцож байх үедээ гар утас ашиглахгүй байж, анхаарал болгоомжтой зорчихыг тус төвөөс зөвлөлөө.
Өнөөдрийн байдлаар 54.5 мянган га талбайг ангилан хадаж, 87 мянган га-аас 124.4 мянган тонн улаанбуудай, 13 мянган га-аас 122.8 мянган тонн төмс, 5.7 мянган га-аас 67 мянган тонн хүнсний ногоо, 18.5 мянган га-аас 48 мянган тонн тэжээлийн ургамал, 20.9 мянган га-аас 12.9 мянган тонн тосны ургамал тус тус хураан аваад байна.
Ингэснээр үр тарианы хураалт 23.3 хувьтай, төмс, хүнсний ногооны хураалт 61-65 хувийн явцтай байгаа нь өнгөрсөн оны мөн үеийн түвшинд байна.
“James Bond” цувралын шинэ анги “No Time to Die” нээлтээ хийсэн эхний долоо хоногтоо 121 сая ам.долларын ашиг орлого оллоо гэж “Universal Pictures” компани даваа гарагт мэдээлжээ.
Түүнээс 35 сая ам.долларыг Их Британи, Ирландын зах зээлээс олоод буй нь коронавирусний цар тахал дэгдсэнээс хойш эдгээр оронд нээлтээ хийсэн хамгийн амжилттай кино, эхний гурван хоногтоо хамгийн их орлого олсон Бондын кино болжээ.
Английн жүжигчин Дэниел Крейгийн хувьд нэрт тагнуулчийн дүрийг тав дахиа буюу хамгийн сүүлийн удаа бүтээсэн энэхүү киноны нээлтийг анх 2020 оны дөрөвдүгээр сард хийхээр товлоод байсан боловч цар тахлын улмаас гурван удаа хойшлуулсан юм.
“Universal” компанийн мэдээлснээр, энэхүү кино нь 121 сая ам.долларыг дэлхийн киноны хамгийн том зах зээл болох Хятадад нээлтээ хийгээгүй байхдаа олжээ. Ингэснээр цар тахал дэгдсэнээс хойш Хятадын зах зээлээс үл хамааран эхний долоо хоногтоо 100 саяас дээш ам.доллар олсон Холливудын анхны кино болжээ.
“No Time to Die” Хятадад энэ сарын сүүлээр нээлтээ хийх юм. Мөн Хойд Америкийн кинотеатруудын дэлгэцнээ ч хараахан гарч эхлээгүй байгаа бөгөөд АНУ, Канадад баасан гаргаас үзэгчдийн хүртээл болно. “Universal” компани болон “MGM” студи энэхүү киногоо стриминг үйлчилгээгээр нэвтрүүлэхгүйгээр зөвхөн кинотеатрын дэлгэцээр үзүүлэхээр шийдвэрлэжээ.
Ойролцоогоор 200 сая ам.долларын өртгөөр бүтсэн адал явдалт төрөл жанрын “No Time to Die” нь кино шүүмжлэгчдээс таатай үнэлгээ аваад байна.
“No naadam” хөдөлгөөнийхөн Сүхбаатарын талбайд жагсан, Засгийн газрыг огцрохыг шаардаж байгаа билээ. Уг жагсаалыг удирдаж буй “Зон олны нам”-ын дарга Э.Одбаяр, иргэн Д.Монголхүү, Чинбат нарыг баривчлаад буй.
АН-ын гишүүдийн төлөөлөл өнөөдөр Хууль зүйн яамны өмнө жагсаж, тэднийг суллахыг шаардаж байна.
“Бидэнтэй адилхан залуус, жирийн иргэд. Сүхбаатарын талбайд жагсан, үзэл бодлоо илэрхийлж, эрхээ эдэлснийх нь төлөө ингэж хорьж, хавчиж болохгүй. Х.Нямбаатар яаман дээрээ эр хүн шиг хүрээд ир. Биднээс боловсрол, мэдлэгээр нэг их дээрдэхгүй л залуу. “Шударга тав” гээд баахан жагсан, ард түмний нэр барьж байгаад сайд болсон.
Засгийн газрыг огцруулчих вий гэж айсандаа Х.Нямбаатар байрандаа шөнөжин бөөлж байна. Тийм гомдол байрных нь иргэдээс их ирсээр байгаа гэнэ лээ. Хууль зүйн сайд хүн нь өөрөө Зөрчлийн хуулийг ингэж зөрчиж болохгүй.
Ерөнхий сайд Л.Оюун-Эрдэнэ Х.Нямбаатартаа хэл. У.Хүрэлсүх ард түмний Ерөнхийлөгч юм бол энэ хүндээ чиглэл өг. Гадаа хүйтэн байна. Х.Нямбаатарыг хүлээгээд, цай уугаад энд сууна” гэв.
Манай улс “Ковид-19”-ийн халдварын үеийн эмчилгээнд “Тоцилизумаб” гэх эмийг шинээр хэрэглэж эхэлжээ.
Эмийн хатуу зохицуулалт бүхий улс орнуудад хүлээн зөвшөөрөгдсөн уг эмийг албан ёсоор Монгол Улс 14 хоногийн өмнөөс хэрэглээнд нэвтрүүлсэн гэдгийг Эрүүл мэндийн яамны Эмнэлгийн тусламжийн зохицуулах газрын дарга Б.Буянтогтох хэллээ.
“Ковид-19-ийн эмчилгээнд хэрэглэх эмүүдийг зөвхөн эмчийн заалтаар уух ёстой”
Тэрбээр “Уг эм нь ДЭМБ-ын удирдамжид эрт орсон. Тодруулбал, өнгөрсөн долдугаар сард ДЭМБ-аас уг өвчний халдварын эмчилгээнд яаралтай нөхцөлд хэрэглэж болно гэж зөвлөсөн байдаг. Харин манай улс тус эмийг 14 хоногийн өмнөөс эмчилгээнд хэрэглэж эхэлсэн.
Гэхдээ өвчнийг эмчлэх үйл явц ганцхан эмээс хамаарахгүй гэдгийг иргэд ойлгох хэрэгтэй. Одоог хүртэл ДЭМБ болон дэлхийн улс орнууд цор ганц “Ковмд-19”-ийн эсрэг үйлчилгээтэй эмийг гаргаж ирээгүй байна. “Тоцилизумаб”-ын хувьд, гаднын улсуудад өмнө нь өөр өвчний үед хэрэглэгдэж байсан үрэвслийн эсрэг үйлчилгээтэй эм.
Түүнээс гадна, Merck компанийн бүтээсэн, коронавирусийн эсрэг үр дүнтэй гэгдэж буй Molnupiravir нэртэй шинэ эм нь бидний өнөөдөр эмчилгээнд хэрэглэж байгаа эмүүдтэй ижил вирусийн эсрэг үйлчилгээтэй.
Molnupiravir нь манай улсад орж ирээгүй ч бид тус эмийн хүрээний буюу адилхан вирусийн эсрэг үйлчилгээтэй эмийг коронавируст халдварын эмчилгээнд хэрэглэж байгаа. Өөрөөр хэлбэл, үйлдвэрлэл нь өөр л болохоос яг ижилхэн үйлчилгээтэй эмүүдийг эмчилгээнд хэрэглэж байна.
Аливаа өвчний үед дан ганц эм асуудлыг 100 хувь шийдэхгүйг анхаарах нь зүйтэй. Гол нь эмийг тухайн хүний биеийн онцлогоос хамааран хэрэглэж болохгүй заалт бий.
Тиймээс коронавирусийн эсрэг эмчилгээнд үр дүн үзүүлэх эмүүдийг зөвхөн эмчийн хяналтад, эмчийн заалтаар хэрэглэх ёстой” хэмээн асуултад хариуллаа.
Ташрамд дурдахад, халдварын үеийн эмчилгээнд вирусийн эсрэг болон дархлаа дэмжих үйлчилгээтэй эмүүд хэрэглэгдэж байгаа бөгөөд түүний нэгд “Тоцилизумаб” гэх эм шинээр багтаж байгаа юм.
Зураач Т.Рэгзэнгийн эмчилгээнд зориулсан хандивын үзэсгэлэнгийн талаар жүжигчин Б.Навчаа мэдээлэл хийлээ.
Тэрбээр “Миний найз зураач Т.Рэгзэн хүндээр өвдөж, одоогоор хоёр бөөр нь 95 хувь нь ажиллагаагүй болсон. Нэг талынх нь бөөрөн дээр хавдар үүссэн, биеийн байдал нь хүнд байна. Тиймээс зураачийн маань ах дүү, хамаатан садан, найз нөхөд нийлж, Амидурал гэх хандивын үзэсгэлэн худалдааг зохион байгуулах гэж байна. Энэ сарын 25-наас 7 хоногийн хугацаанд Занабазарын нэрэмжит дүрслэх урлагийн музейд болох уг үзэсгэлэнд Төрийн соёрхолт Ц.Энхжин, Төрийн соёрхолт, Урлагийн гавьяат зүтгэлтэн Ш.Чимэддорж, Урлагийн гавьяат зүтгэлтэн Ц.Мөнхжин нарын 80 гаруй уран бүтээлчдийн бүтээл тавигдахаас одоогоор 40 гаруй бүтээл нь цуглараад байна” гэлээ.
Уг нь зураач Т.Рэгзэн Нэгдүгээр эмнэлэгт бөөрний хагалгаанд орж болох байжээ. Гэвч тус эмнэлэг хагалгааны тасгаа ковидын улаан бүс болгосноос Монголдоо эмчлэгдэх боломжгүй болж арга буюу БНСУ-ыг зорихоор болсон байна. Хэрэв энэ төрлийн хагалгааг эх орондоо хийлгэвэл 10-20 сая болох ч ковидын улмаас тасаг нь хаагдсан тул БНСУ-д 10 дахин их үнээр буюу 300 сая төгрөгөөр хийлгэх болсон талаар тэд онцоллоо.
Mонгол Улсын Ерөнхийлөгчийн санаачилсан “Тэрбум мод” ногоон хөдөлгөөн улс даяар эхэлж буйтай холбогдуулан нийслэлийн дөрвөн байршилд мод тарьж байна.
Өнөөдөр МБШТ Гандантэгчэнлин хийдийн лам хуврагууд Баянгол дүүргийн 20 дугаар хороон дахь ТЭЦ4-ийн урд байрлах Баянгол Агропаркад 108 ширхэг мод тарьж арчилгааны албаныханд хүлээлгэн өглөө.
Коронавирусийн халдварын тохиолдол нэмэгдэж, эмнэлэгт хэвтэн эмчлүүлэгчдэд ор олдохгүй байна гэх мэдээлэл гарсан. Мөн эрүүл мэндийн салбарт хүний нөөцийн хомсдол үүсэж байгааг эрүүл мэндийн салбарынхан хэлж байгаа. Цаг үеийн нөхцөл байдлын талаар НЭМГ-ын дарга Б.Бямбадоржтой ярилцлаа.
-Нийслэлийн хэмжээнд III тунгийн дархлаажуулалтын явц ямар байна вэ?
-Нийслэлийн хэмжээнд “Ковид-19” вирусийн эсрэг дархлаажуулалт амжилттай хэрэгжиж байна. Өнөөдрийн байдлаар нийслэлийн хүн амын 70.7 хувь нь дархлаажуулалтын бүрэн тунд хамрагдсан. Бид бүрэн тунгийн суурин дээр дархлаажуулалтын нэмэлт тун хийх ажлыг эхлүүлсэн. Гуравдугаар тунд нийслэлийн хүн амын 11 хувь хамрагдаад байна. Вакцинжуулалтын цэг суурин болон явуулын байдлаар ажиллаж байгаа бөгөөд олон ажилтантай албан байгууллагууд, хэвтрийн хүмүүст гэрээр нь очиж үйлчлэх ажлыг зохион байгуулж байгаа. Гэсэн хэдий ч гуравдугаар тунгийн вакцинд хамрагдалт хангалттай биш байна.
Өнгөрсөн амралтын өдөр нийслэлийн хэмжээнд дархлаажуулалтын 22 цэгт 167 эмч, эмнэлгийн ажилтан ажилласан. Харин 772 хүн л вакцинжуулалтад хамрагдлаа. Тиймээс бид бүтэн сайн өдөр эрүүл мэндийн ажилчдаа амраахаар болсон. Иргэдийг даваагаас бямба гарагийн хооронд гэртээ аль ойрхон цэгт очиж дархлаажуулалтад хамрагдахыг уриалж байна. Гуравдугаар тунгийн дархлаажуулалтад хамрагдсан иргэд халдварын эрсдэлд өртөх, халдвар авсан тохиолдолд хүндрэх, эмнэлэгт хэвтэх тохиолдол бага байна гэсэн олон улсын судалгаа гарсан. Энэ нь бидний хийсэн ажиглалт судалгаагаар ч харагдаж байгаа юм.
-Хэвтэн эмчлүүлэх шаардлагатай иргэдийн орны хүрэлцээ муу байсан. Энэ тал дээр ямар арга хэмжээ авч байна вэ?
-Архаг хууч, суурь өвчтэй, таргалалттай, жирэмсэн эхчүүд хүндрэх тохиолдол нэмэгдэж байна. Тиймээс ор хоног нэмэгдэх, эрчимт эмчилгээний болон хүчилтөрөгчийн хэрэгцээт ороор эмчлүүлэх шаардлага гарч байна. Халдвар авсан иргэд хэвтэн эмчлүүлэх асуудал нийслэлийн хэмжээнд тулгамдсан асуудал болоод байгаа. Өнгөрсөн долоо хоногоос УОК-т дүүрэг бүрээс төлөөлөл оролцсон, ор зохицуулах шуурхай Ажлын хэсэг ажиллаж эхэлсэн. Улаанбаатар хотын хэмжээнд төрийн болон хувийн хэвшлийн 48 эмнэлэг, эрүүл мэндийн байгууллага ор дэлгэн ажиллаж байгаа. Эдгээр байгууллага өмнө нь өөрсдөө өвчтөнөө хэвтүүлэх, гаргах ажлыг зохион байгуулж байсан бол нэгдсэн зохион байгуулалт хийснээр өндөр эрсдэлтэй, хүнд, хүндэвтэр оноштой иргэд эмнэлэгт хэвтэж чадахгүй байх, ор хүлээж цаг алдах асуудлыг шийдвэрлэж чадсан. Тандалт, хариу арга хэмжээний багийнхан иргэдийг улаан болон улбар шар, шар, ногоон гэсэн дөрвөн хэсэгт эрэмбэлэн, улаан, улбар шар эрэмбэд орсон иргэдээ ор зохицуулалтын нэгдсэн удирдлагын төвөөр дамжуулж эмнэлэгт хэвтүүлж байна. Өнгөрсөн долоо хоногийн хугацаанд улаан буюу нэн хүнд эрэмбээс 710 хүн, улбар шар буюу эмнэлэгт хэвтэх шаардлагатай эрэмбээс 954 хүн эмнэлэгт хэвтэн эмчлүүлсэн. Өдөрт дунджаар улаан эрэмбийн 120 хүн, улбар шар эрэмбийн 160 хүн эмнэлэгт хэвтсэн байна.
-Коронавирусийн хариу арга хэмжээний багт сайн дурын ажилчдыг ажиллуулж байгаа. Хэдэн хүн ажиллаж байна вэ. Сайн дурын ажилд хамрагдах хүсэлтэй иргэд хаана хандах, цалин, урамшуулал ямар байх вэ?
-Нийслэлийн Засаг даргын захирамж гарч, халдварын эсрэг хариу арга хэмжээний үед дэмжлэгт удирдлагаар хангах ажлын хүрээнд 1.2 тэрбум төгрөгийн асуудлыг шийдсэн. ӨЭМТ-үүд тухайн хороонд 300 хүртэлх тохиолдол бүртгэгдсэн нөхцөлд өөрсдийн нөөц бололцоогоор хяналт, гэрийн ажиглалт хийн ажиллаж байгаа. Харин 300-гаас дээш тохиолдол бүртгэгдвэл бид нэмэлт баг гарган ажиллуулж байна. Өнгөрсөн долоо хоногт Баянзүрх, Баянгол дүүргүүд ачаалалтай байлаа. Бид сайн дурын ажилчид болон өөрийн машинтай иргэдийг тандалт, хариу арга хэмжээний багт ажиллахыг уриалснаар 550 гаруй хүн бүртгүүлээд байна. Эдгээр хүнээс одоогийн байдлаар 45 хүнтэй гэрээ хийн, ажилд нь оруулсан. Сайн дурын ажилчид өдөрт 50 мянган төгрөгийн цалин, 20 мянган төгрөгийн шатахууны дэмжлэг авна. Эдгээр иргэний машины элэгдэл, халдваргүйтгэл хийх зэрэг асуудал бий. Энэ ажлын байр халдвар авах эрсдэлтэй. Гэсэн хэдий ч иргэд маань нийгмийн сайн сайхны төлөө хувийн унаагаараа ажиллаж байгаад талархаж байна.
-Хариу арга хэмжээний багт нийслэлийн 29 байгууллагын ажилчид ажиллаж байгаа. Энэ талаарх мэдээллийг өгнө үү?
-Нийслэлийн төр, захиргааны байгууллагын албан хаагчид халдварын эсрэг хариу арга хэмжээний багийн үйл ажиллагаанд оролцож байна. Эмнэлгийн бус мэргэжлийн 910 ажлын байр байгааг бид өмнө нь мэдээлсэн. Төрийн албан хаагчид хариу арга хэмжээний багт ажиллаж, ажлын ачааллаас хуваалцаж байгаад дүүргийн болон ӨЭМТ-ийн ажилчид талархалтай байгаа. ӨЭМТ-үүдэд эмч нарын төрийн бус байгууллага, Глобал сан, Улаан загалмай нийгэмлэгээс сайн дурын ажилчид ажиллаж байгаа юм. Цар тахлын үед хариу арга хэмжээ, эмнэлэгт хэвтүүлэн эмчлэх ажиллагаа эрүүл мэндийн салбарын ажил боловч хүн хүч хүрэлцэхгүй нөхцөлд сайн дурын ажилчдыг татан оролцуулдаг. Хэрэв иргэн та сайн дурын ажилд хамрагдахыг хүсвэл НОК-ын Шуурхай штабын байранд ирж бүртгүүлээрэй.
-Иргэддээ хандаж анхааруулах зүйл юу байна вэ?
-Нийгмийн эрүүл мэндийн онц чухал үед урьдчилан сэргийлэх нь чухал. Халдвар хамгааллын дэглэмээ сайн баривал эрсдэлд орох, олноор өвдөх тохиолдол багасдаг. Иргэддээ н амны хаалтаа сайн зүүхийг уриалж байна. Амны хаалт бол дөрөвдүгээр тун. Сүүлийн үед иргэд ажил дээрээ, хэлэлцүүлэг, ярилцлага хийх үедээ амны хаалтгүй байх тохиолдол гарч байна. Мөн дэлгүүрээр үйлчлүүлэхдээ хүн хоорондын зайгаа барих, олон хүнтэй газраар явахгүй байхыг анхааруулъя.
Монголын волейболын холбоо /МВХ/-ны Үндэсний дээд лигийн аварга шалгаруулах тэмцээн 2021 оны аравдугаар сарын 19-нд эхэлж 2 сар гаруй үргэлжилж шилдгүүдээ шалгаруулна.
Үндэсний дээд лигийн аварга шалгаруулах тэмцээнд оролцох багуудын эзэн, дасгалжуулагч, ахлагч нарын уулзалт аравдугаар сарын 6-ны 18.00 цагт МҮОХ-ны байранд болно гэж МВХ-ноос мэдээллээ.
“Ковид-19” цар тахлын нөхцөл байдлын улмаас хойшлогдоод байсан энэхүү тэмцээний зохион байгуулах зөвшөөрлийг УОК-оос өгсөн бөгөөд МҮОХ-ны байранд үзэгчгүй болох юм. Үндэсний дээд лигийн аварга шалгаруулах тэмцээн аравдугаар сарын 19-нөөс арванхоёрдугаар сарын 25-ны хооронд зохион байгуулахаар болсон байна.