Month: October 2021

Categories
мэдээ нийгэм

Нийт шүүгчийн анхдугаар чуулган болно

“Нийт шүүгчийн анхдугаар чуулган”-ыг ирэх даваа гариг /2021.10.11/-т Төрийн ордонд зохион байгуулахаар болжээ.

Монгол Улсын шүүхийн тухай хуулийн 20 дугаар зүйлийн 20.1-д бүх шатны шүүхийн нийт шүүгчээс бүрдсэн Нийт шүүгчийн чуулганыг хоёр жил тутам зохион байгуулахаар заасан.

Мөн Коронавируст халдвар /Ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн 3 дугаар зүйлийн 3.3 дахь хэсэгт “Нийт шүүгчийн чуулганыг зохион байгуулах, Шүүхийн ерөнхий зөвлөл, Шүүхийн сахилгын хорооны гишүүнийг сонгон шалгаруулж, томилох ажиллагааг биечлэн зохион байгуулж болно” гэж заасны дагуу чуулганы үйл ажиллагааг зохион байгуулах аж.

Чуулганд анхан болон давж заалдах, хяналтын шатны шүүхийн шүүгчид биечлэн оролцоно. Нийт шүүгчийн чуулганаар хуульд заасны дагуу Шүүхийн ерөнхий зөвлөл, Шүүхийн сахилгын хорооны шүүгч гишүүдийг сонгоно. Мөн холбогдох дүрэм, журмыг хэлэлцэхээр төлөвлөжээ.

Categories
мэдээ нийгэм

Нийслэлийн шилдэг сургууль, цэцэрлэгүүдийг шалгарууллаа

Монгол Улсад орчин цагийн боловсролын салбар үүсэж хөгжсөний 100, Дэлхийн багш нарын 27, Монголын багш нарын 55 жилийн ойн баярын өдрийг тохиолдуулан нийслэлийн тэргүүний сургууль, цэцэрлэгийг шалгаруулж, индексийн урамшуулал олголоо. Төрийн болон төрийн бус өмчийн 20 сургууль, 20 цэцэрлэгийг нийслэлийн тэргүүний сургууль, цэцэрлэгээр шалгаруулж, шагналыг Нийслэлийн Засаг даргын орлогч Ж.Сандагсүрэн, Нийслэлийн Засаг даргын зөвлөх Б.Мягмар болон албаны бусад хүн гардуулсан юм.

Шилдэг сургуулиар Баянзүрх дүүргийн Тэмүүжин өрлөг, 33, 97 дугаар сургууль, Сүхбаатар дүүргийн 2, 31 дүгээр сургууль, Баянгол дүүргийн 73, 20, 93 дугаар сургууль зэрэг 20 сургууль шалгарсан бол шилдэг цэцэрлэгээр Сонгинохайрхан дүүргийн 113, 110, 107, 112 дугаар цэцэрлэг, Хан-Уул дүүргийн 121, 28 дугаар цэцэрлэг, Баянзүрх дүүргийн 64, 213, 136, 63 дугаар цэцэрлэг зэрэг 20 цэцэрлэг шалгарсан байна


Дэлхий нийтийг хамарсан цар тахлаас шалтгаалан сүүлийн хоёр жилд танхимын сургалт түр завсарлаж, хичээл сургалтын үйл ажиллагаа зайн сургалтад шилжсэн. Боловсролын салбар танхимын болон зайн хосолсон сургалт зохион байгуулах, цахим сургалтын шинэ арга зүйд суралцах, сургалтын цахим сан, контент боловсруулах, цахим хичээл бэлтгэх, сургууль, цэцэрлэгийн орчинд эрүүл аюулгүй орчин бүрдүүлэх, халдвар хамгааллын дэглэмийг мөрдүүлэх зэргээр ачаалал ихтэй ажиллаж байна. Иймд зөвхөн шилдэг сургууль, цэцэрлэг шалгаруулж индексийн урамшуулал олгодог байсныг өргөжүүлж Бүтээлч багш, Оюуныг тэтгэгч багш, Шилдэг сургалтын менежер, Шилдэг арга зүйч, Шилдэг нийгмийн ажилтан, Зөвлөгч багш, Судлаач багш нарыг шалгаруулан зөөврийн компьютероор урамшууллаа. Мөн боловсролын салбарт 10-аас доошгүй жил тасралтгүй ажиллаж, ажлын амжилт, ёс зүй, ур чадвараараа хамт олноо манлайлсан есөн багшийг дүүрэг бүрээс шалгаруулж, түрээслээд өмчлөх орон сууцны эрхээр шагнах шийдвэрийг Нийслэлийн Засаг дарга гаргаж, шагналыг гардуулсан юм.


Нийслэлийн Засаг даргын орлогч Ж.Сандагсүрэн “Коронавирусийн халдвар өндөр байгаа энэ үед боловсролын байгууллагын нийт ажилтан, албан хаагчид маань хүүхдүүдэд боловсрол олгохын төлөө олон эрсдэлийг туулж байна. УОК, НОК-оос гаргасан шийдвэрүүдийг чандлан биелүүлж, боловсрол, хичээл, хүмүүжлийн ажлыг тасралтгүйгээр зохион байгуулж байгаа багш нартаа нийслэлчүүдийнхээ өмнөөс талархал илэрхийлье. Нийслэлийн Засаг даргын санаачилгаар индексийн урамшуулал олгох ажлыг олон багш нарт хүртээхийн тулд түрээслээд өмчлөх орон сууцанд хамруулах, зөөврийн компьютероор урамшуулж эхэллээ. Энэ бол эхлэл. Бид цаашид энэ ажлыг уламжлал болгон зохион байгуулахаар төлөвлөж байна. Шавийн эрдэм багшаас гэдэг. Бид сайн багш нартай байж гэмээнэ сайн шавь нартай болно. Та бүгдийн цаашдын ажил хөдөлмөрт өндөр амжилт хүсэн ерөөе” гэлээ.

Categories
мэдээ

Мал бүртгэлжүүлэх ажил явагдаж байна

Хүнс хөдөө аж ахуй хөнгөн үйлдвэрийн яамнаас энэ жил мал бүртгэлжүүлэлтийн ажлыг эрчимжүүлэхээр аян зарласан. Аяны хүрээнд зохион байгуулагдаж буй ажлын талаар тус яамны Малын генетик нөөцийн хэлтсийн дарга Д.Батсүрэн мэдээлэл өглөө.

Тэрээр “ХХААХҮЯ-наас 2021 оныг малыг ялган тэмдэглэж бүртгэлжүүлэх, бүртгэл мэдээллийн нэгдсэн сан бүрдүүлэх аян болгон зарлаж, мал бүртгэлжүүлэлтийн ажлыг эрчимжүүлээд байна. Аяны хүрээнд мал сүргийг үе шаттайгаар бүртгэлжүүлэх ажлыг зохион байгуулж байна. Эхний ээлжид үржилд ашиглаж байгаа хээлтүүлэгчээ хавар, намрын технологит хугацаанд бүртгэлжүүлж байна. Малын үржүүлэг технологийн ажил, үйлчилгээний технологит хугацаа хавар гуравдугаар сарын 20-ноос тавдугаар сарын 25-ныг хүртэл, намар есдүгээр сарын 10-наас арванэгдүгээр сарын 10-ныг хүртэл байдаг. Намрын технологит хугацаанд цөм болон үржлийн сүргийн шаардлага хангасан мал сүргийг бүртгэлжүүлэх ажил ид өрнөж байна.

БНХАУ, ОХУ-тай хил залгаа аймаг, сумдын бод малыг бүртгэлжүүлэх ажлыг зохион байгуулахаар төлөвлөсөн. Хил нэвтрэх, нэвтэрсэн тохиолдолд хилийн байгууллага малыг ялгаж, танихад бүртгэлжүүлэлт маш чухал байдаг. Ээмэгнийх нь дугаараар аль аймаг, сум, багийн мал гэдгийг мөрдөн мөшгөж тогтоох боломжтой. Малчид малаа танихдаа зүсийг нь эсвэл им тамгыг нь хардаг. Монгол малын зүс ихэвчлэн ойролцоо байдаг учраас андуурах асуудал гардаг. Тийм учраас тухайн малын ээмэгний дугаар, бүртгэлээр дамжуулж олж таньдаг. Малыг бүртгэхдээ ялган тэмдэглэх хэрэгсэл гэж нэрлэдэг ээмэг болон чипийг ашигладаг. Чипийг адуунд, ээмгийг үхэр, тэмээ, хонь, ямаанд хэрэглэж байна. Ээмэг, чипэн дээр 12 оронтой код байдаг. Үүний эхний хоёр орон нь аймгийнх, дараагийн хоёр нь сумынх, дараагийн хоёр нь багийн код юм. Үлдсэн 6 орон нь тухайн малд дахин давтагдахгүйгээр олгогдсон хувийн дугаар юм. Жишээ нь, хар халзан зүсмийн бух байлаа гэхэд Хэнтий аймгийн Хэрлэн сумын гуравдугаар багийн ийм хувийн дугаартай бух байна гээд бүртгэл мэдээллийн нэгдсэн санд мэдээлэл нь орчихсон байдаг” гэсэн юм.

Түүнчлэн малыг ялган тэмдэглэж бүртгэлжүүлснээр малчид, мал бүхий иргэдэд тодорхой боломжууд бий болдог байна. Тухайлбал, мал сүргийг гэмт халдлагаас урьдчилан сэргийлэх, малаа алдсан тохиолдолд бүртгэлийн дугаараар мөрдөн мөшгөж олох боломжтой. Мөн малаа бүртгэл мэдээллийн нэгдсэн санд хамруулсан малчныг төрөөс олгож буй урамшуулалд хамруулдаг байх зарчимд шилжиж байгааг хэллээ. Түүнчлэн малаа барьцаалж банкнаас зээл авах, даатгалд хамруулахад бүртгэлтэй эсэхийг харгалзан, хөнгөлөлт үзүүлэх боломжтой болох ажээ.

Categories
мэдээ нийгэм

​Айл өрх, эмнэлэг, сургууль, цэцэрлэгийн халаалтыг бүрэн өгсөн бол ААН-үүдийнх 89 хувьтай байна


Дулааны төв шугамын 2021 оны зуны засварын ажлууд бүрэн хийгдэж дууссан байна.

Улаанбаатар хотын хэмжээнд есдүгээр сарын 15-наас дулаан дамжуулах 536 төвийн дүүргэлт хийн сүлжээнд залгаж, 4,105 орон сууц (ОСНААУГ болон ХОСК харьяа), аж ахуйн нэгжийн 1,224 байгууллага, 163 цэцэрлэг, 147 сургууль, эмнэлгийн 49 барилгын халаалтыг өгсөн нь 99.9 хувьтай байна.

Харин аж ахуйн нэгж байгууллагын халаалтыг аравдугаар сарын 1-нээс өгч эхлэн өнөөдрийн байдлаар халаалт залгалт 89 хувьтай байгааг УБДС компаниас мэдээллээ.

“Хасу мегаватт” ХХК-ийн гүйцэтгэж буй нэгдүгээр хорооллын араар шинээр татаж буй 2ф700мм-ийн голчтой 3.2 хос.км шугам угсралтын ажил 72 хувьд хүрчээ.

ЕСБХБ-ний санхүүжилтээр 8в /ДХ829-ДХ838/ магистралийн дулааны шугамын өргөтгөл, шинэчлэлтийн ажлыг гүйцэтгэгч “Энергио сервис монтаж” ХХК батлагдсан графикийн дагуу шугамын өргөтгөл, шинэчлэлтийн ажлуудыг хийж дууссан бөгөөд одоогийн байдлаар шугам дулаалах, нөхөн сэргээлт тохижилт хийгдэж, ажлын гүйцэтгэл 99 хувьтай байгаа аж.

Цар тахлын үеийн нөхцөл байдалтай уялдаж энэ жил ДЭХ гэрээг цахимаар байгуулан ажиллаж байна. 2,822 гэрээ байгуулахаас одоогийн байдлаар 2,285 хэрэглэгчтэй гэрээг байгуулжээ.

Мөн шинээр төвлөрсөн дулаан хангамжид холбогдохоор 380 гаруй хэрэглэгчийн гэрээг цахимаар хийхээр бэлтгэл ажлыг хангасан байна.

Улаанбаатар хотын төвлөрсөн дулаан хангамжийн системийн эх үүсгүүрүүдийг (ДЦС-2, ДЦС-3, ДЦС-4, АДС) ДҮТ ТӨХК-аас батлагдсан горимын дагуу ажиллаж, дамжуулах сүлжээний даралт өргөх насос станцууд, дулаан дамжуулах төвүүдийг хэвийн горимоор ажиллуулан хотын сүлжээнд холбогдсон нийт хэрэглэгчдийг дулааны эрчим хүчээр хэвийн найдвартай, тасралтгүй ханган ажиллаж байгааг тус компаниас онцлов.

Categories
мэдээ спорт цаг-үе

ОУХМ Э.Гантуяа ДАШТ-ээс хүрэл медаль хүртлээ

Норвегийн Осло хотод болж буй чөлөөт бөхийн ДАШТ-ээс эмэгтэйчүүдийн 62 кг-ын жинд 23 хүртэлх насны ДАШТ-ий хүрэл медальт “Хилчин” спорт хорооны тамирчин ОУХМ Энхбатын Гантуяа Монголын баг тамирчдын гурав дахь хүрэл медалийг эх орондоо авчирлаа. Энэ нь Монголын чөлөөт бөхийн тамирчдын ДАШТ-ий түүхэнд 66 дахь медаль болж байна.

Тэрбээр өчигдөр 1/8 шигшээд “Парис-2017” ДАШТ-ий хүрэл медальт, Пан Америкийн наадам болон Пан Америкийн аварга АНУ-ын Кайл Миракл 4:14-өөр ялагдсан ч өчигдөр үдээс өмнө дагахад энэ жилийн залуучуудын дэлхийн болон Европын аварга ОХУ-ын Алина Касабиеваг 12:8-аар ялсан юм. Тэгвэл Улаанбаатарын цагаар 03.00 цагийн үед хүрэл медалийн төлөөх барилдаанд Пан Америкийн АШТ-ий хоёр алт, гурван мөнгө, нэг хүрэл медальт Бразилын Лаис Нуньес Де Оливейратай тун хүнд барилдаан хийж 7:6-гаар ялав.

62 кг манай бүсгүйчүүд олимп, дэлхийгээс медаль авч өндөр амжилт үзүүлдэг жин. Хөдөлмөрийн баатар С.Батцэцэг, гавьяат тамирчин П.Орхон нар дэлхийн аваргын оргилд гарч, гавьяат тамирчин О.Насанбурмаа 2011 онд Стамбулын дэвжээнээс хүрэл медаль хүртэж байв. Тэгвэл Э.Гантуяа эгч нарынхаа амжилтыг үргэлжлүүлэн хүрэл медаль зүүж дэлхийн медальтан боллоо хэмээн МЧБХ-оос мэдээллээ.

Categories
амьдралын-өнгө мэдээ

Xовд аймагт “Тарвасны баяр 2021” боллоо

Тарвас бол Ховд нутгийн брэнд бүтээгдэхүүний нэг юм. Иймээс нутгийн онцлог, брэнд бүтээгдэхүүнийг сурталчлах зорилгоор “Тарвасны баяр 2021” үйл ажиллагааг Ховд аймгийн төв талбайд зохион байгууллаа.

Энэ хүрээнд мэргэжлийн байгууллага, тогооч нар тарвас болон бусад төрлийн жимс жимсгэнэ, хүнсний ногоо ашиглан хоол, ундаа зэргийг хийж, олон нийтийн хүртээл болгосон юм.

Мөн жижиг, дунд үйлдвэрлэл, үйлчилгээ эрхлэгчид, нөхөрлөл, хоршооны төлөөлөл үндэсний хувцас, цагаан идээ, гар урлал, сур суран эдлэл, гоёл чимэглэл зэрэг бүтээгдэхүүнээр үзэсгэлэн худалдаанд оролцлоо.

Энэ үeэр танилцуулсан бүтээгдэхүүнээс онцлоход хамгийн том хулуу 10 кг, тарвас 13 кг жинтэй байлаа. Мөн давсан дээр шарсан хонины хуйхалсан мах, тарвасын хуурга гэх зэрэг хоол иргэдийн сонирхлыг татав.

Ийнхүү Ховдын тарвас – хоол, ундааны баяр нь орон нутгийн үйлдвэрлэл эрхлэгчдийн үйл ажиллагааг дэмжих, хүн амын хүнсний хангамжийг сайжруулах, үндэсний үйлдвэрлэгчид, тариаланчдын шилдэг бараа бүтээгдэхүүн, шинэ ургацын дээжийг хэрэглэгчдэд хүргэх, борлуулалтыг нэмэгдүүлэхэд чиглэж байснаараа онцлогтой.

Ховд аймгийн тухайд жилд дунджаар 5000 гаруй тонн тарвас хураан авдаг гэх судалгаа гарчээ. Тарвасаар 20 гаруй нэр төрлийн бүтээгдэхүүн хийж, нэмүү өртөг шингээн худалдах, цаашлаад гадаад, дотоодын жуулчдыг татах, эдийн засгийн үр өгөөжийг дээшлүүлэх боломж байгааг энэхүү үйл ажиллагаагаар дамжуулан сурталчиллаа.

Categories
мэдээ нийгэм онцлох-нийтлэл туслах-ангилал

Төр хэвлэлийн байгууллагатай байгаа нь хууль зөрчиж байна

Монголд анх удаа Хэвлэл мэдээллийн эрх чөлөөний тухай хуультай болсон он цаг бол 1998 оны наймдугаар сарын 28 билээ. Хүний үг хэлэх эрх чөлөөг бататган, чөлөөт хэвлэлийг жам ёсоороо хөгжих үндэс суурийг тавьсан нь энэ хуулийн түүхэн үнэ цэнэ юм. Хэвлэл мэдээллийн эрх чөлөөний тухай хуулийн дөрөвдүгээр зүйлд “Төрийн байгууллага өөрийн мэдэлд хэвлэл мэдээллийн хэрэгсэлтэй байхыг хориглоно” гээд тов тодорхой заагаад өгсөн байдаг.

Гэтэл өнөөдрийн төрийн байгууллагуудыг хар даа. Төртэй холбоотой байгууллага бүхэн дэргэдээ Хэвлэлийн алба нэрийн дор хүчирхэг хэвлэл, мэдээллийн байгууллагуудтай болон данхайж байна. Төрийн байгууллага бүр өөрийн сэтгүүлчидтэй, вэб сайттай, пэйж, твиттер хаягуудтай, түүнийг нь хөгжүүлдэг мэргэжлийн багтай гээд бод. Үүн дээр нэмээд мэргэжлийн студитэй байгууллагууд олон. Тэдгээрээ телевизээр гарах бүхий л контентыг бэлтгэнэ. Ийм хүчирхэг хэвлэлийн байгууллагуудтай болсон төр өдөр тутмын бүхий л мэдээллээ өөрсдөдөө тавина. Өөрөө өөрсдийнхөө өнгө аят тохируулан өөрсдийнхөө хэвлэл, сайт, сошиалаар цацна. Хөөрхий гадаа үлдсэн жинхэнэ хэвлэлийн байгууллагуудад түүнээс нь хуулж авахаас өөр арга алга болжээ. Биднээр үйл ажиллагаагаа сурталчлуулаач, мэдээ сэлт, ярилцлагаа гаргаач гэхээр “Бид өөрсдийнхөө сайтад эхлээд тавина. Бид эхлээд өөрсдийнхөө хэвлэлээр цацна” гэж Төрийнхөн томорч байна. Хууль зөрчсөн төрийн энэ буруу үйл ажиллагаанаас болж Монголын хэвлэл мэдээллийн байгууллагууд хөл дээрээ босч чадахаа больсон. Цахилгаан, цалингаас өөр зарлага багатай сайтынхан бол өнөө маргаашдаа болоод байгаа байх. Үйл ажиллагааны өртөг өндөртэй өдөр тутмын сонин, телевизүүдэд маш хүнд тусч байгаа нь ойлгомжтой юм.

Төр өөрөө данхайгаад зогсохгүй хэвлэлийн байгууллага дэргэдээ байгуулж, төрийн мөнгөөр өөрсдийгөө зоргоороо сурталчилж байгаа нь Монголд чөлөөт хэвлэл хөгжих үндэс суурийг сүйтгэж байна. Учир нь эдийн засгийн чадамжтай байж л чөлөөт хэвлэл жинхэнэ утгаараа хөгждөг. Хараат бус байх, эдийн засгийн чадамжтай байх үндэс суурь нь реклам, зар сурталчилгааны орлого юм. Төр үйл ажиллагаагаа, тушаал шийдвэрээ нийтэд танилцуулсныхаа төлөө хувийн хэвлэлд төлбөрөө төлдөг жишиг хаана ч байдаг. Энэ жишгийг манайхан тасдаж аваад өөрсдөө өөрсдийнхөө төлөө хэрэглээд байгаа нь хууль зөрчсөн төдийгүй увайгүй, гутамшигтай үйлдэл юм. Тогтсон соёлтой, улстөрчид нь ёс зүйтэй орнууд бол бүгд хийх ёстой ажлаа дор дороо хийгээд л явдаг. Хувийнхны хийх ажлыг төр булаадаггүй. Төр өөрийнхөө хийлгэсэн ажлын хөлсөө ч төлөөд явдаг. Энэ нь цаагуураа чөлөөт хэвлэлээ додомдоод дэмжээд байгаа соёл гэж л харагддаг. Харин энэ бүхэн манайд эсрэгээрээ. Чөлөөт хэвлэл нүдэн дээр сүйрч байна. Хоосон хэтэвчтэй хэвлэлүүд үзэл санаагаа хэдэн төгрөгөөр худалдаж, мөнгөний төлөө юу л бол юу бичихэд бэлэн болсон. Мөнгө л байвал хэн юугаа бичихэд бэлэн болсон эмгэнэлтэй цаг үед ирээд байна. Нийгэмд сэтгүүл зүй шиг муу нэртэй газар одоо алга. Үнэндээ тэд өөрсдөө муу байна гэхээс илүүтэй муу байлгах сонирхол төрд бат нот суучихаад, тэр бодлогыг хэрэгжүүлээд яваа юм. Чөлөөт хэвлэл хүчирхэг байх нь улстөрчдөд огт ашиггүй болохоор тэднийг эдийн засгаар нь боомилж байгаа юм. Чөлөөт хэвлэл оршин тогтож байвал Монголын Ардчиллын баталгаа тэр юм.

Гэтэл өнөөдөр чөлөөт хэвлэл нь мөнгөний аясаар хөдөлдөг болчихлоо. Тэр хэрээр Ардчилал хэврэгшин эмзэгшиж байна. Үүнийг маш цөөн хүн мэдэрч, хаа нэг бичиж байгаа харагдах юм. Нийгэм бол тэр чигтээ сэтгүүл зүйг буруутгах аястай болчихсон. Утасны цаад үзүүрт хэт олонх болсон эрх баригчид суучихаад утсаа чангалсаар байгаа гэдгийг анзаарах хүн цөөн байна.

Дээр өгүүлсэнчлэн өнөөдөр төрийн байгууллагууд Хэвлэл, мэдээллийн эрх чөлөөний тухай хуулийг илт зөрчин, дэргэдээ хэвлэлийн байгууллагуудтай ажиллаж байна. Үүнээс гадна төр өөрөө Үндсэн хуулиа зөрчиж байна. Үндсэн хуулинд “…төрийн байгууллагууд хуулиа дээдэлж ажиллана” гэсэн заалт бий. Мөн Засгийг “…Үндсэн хууль болон бусад хуулийн биелэлтийг улс орон даяар зохион байгуулж хангах” үүрэгтэй гэж заасан. Төр ингэж хоёр ч хууль зөрчөөд хээв нэг өдөр хоногийг өнгөрөөж байна.

Одоогийн УИХ нэг намын хэт олонх гишүүдтэй ч тэдэн дунд сайн хуульчид бишгүй бий. Мөн сэтгүүл зүйн салбараас гарсан олон гишүүдтэй. Тэд нэгдэн нийлж Хэвлэл, мэдээллийн эрх чөлөөний хуулийн хэрэгжилтийг хангах талаар ажиллаж болно. Мөн шинэ хууль өргөн мэдүүлж, Монголын чөлөөт хэвлэлийн үндэс суурийг бэхжүүлэхэд хувь нэмрээ оруулмаар байна. Төрийн мэдээлэл чөлөөт хэвлэл дээр гарсны дараа өөрийнх нь сайт дээр гардаг гэх мэт хуулинд заалт оруулдаг ч юм уу, ямартаа ч ухаалаг бодлого барихгүй бол чөлөөт хэвлэл энэ намын үед сөхөрч унах нь. Чөлөөт хэвлэлгүй бол бид ардчилал, хүний эрх, эрх чөлөө гэж хичнээн яриад яах билээ. Өнөөдөр бидэнд хал палгүй, гай болохгүй бол яахав гэж амиа хичээж суухын оронд маргаашийн Монголын хөгжил ямархуу байхыг төсөөлж Чөлөөт хэвлэлийн үнэ цэнийг ойлгомоор байгаа юм.

Эцэст нь хэлэхэд, баруунд тэгдэг, Америкт ингэдэг гэж мэдэмхийрхэх хэрэггүй ээ. Монгол Улс баруун шиг өндөр хөгжилгүй, Америк шиг дэлхийн том тоглогч биш. Хоёр том гүрний дунд орших бидэнд өөрийн гэсэн өвөрмөц бодлого, алсын хараа байх ёстой. Ардчилал, чөлөөт хэвлэлийн амыг барьчихгүйхэн шиг явах асар том эрх ашиг байх ёстой.

Categories
мэдээ улс-төр цаг-үе

Шүүхээс Ю.Цэдэнбал агсныг цагаатгалаа

Сүхбаатар дүүргийн Иргэний хэргийн анхан шатны шүүхээс өнөөдөр Ю.Цэдэнбал агсныг цагаатгах шийдвэр гарчээ.

Ю.Цэндэнбал агсныг хэлмэгдсэнд тооцуулж, цагаатгуулах тухай нэхэмжлэл бүхий иргэний хэргийг өнөөдөр хэлэлцсэн бөгөөд нэхэмжлэлийн шаардлагыг хангаж шийдвэрлэсэн талаар Сүхбаатар, Чингэлтэй дүүргийн Иргэний хэргийн анхан шатны шүүхийн Тамгын газраас мэдээллээ.

УИХ-ын гишүүн С.Одонтуяа 2020 оны наймдугаар сарын 27-нд УИХ-ын дэд дарга, Цагаатгах ажлын удирдан зохион байгуулах комиссын дэд даргын хувьд Ю.Цэдэнбал, түүний гэргий А.Филатова нарыг хууль ёсны дагуу цагаатгуулахаар шүүхэд хандаж байв.

Categories
мэдээ нийгэм цаг-үе

​Өнөөдөр ихэнх нутгаар цаг агаар тогтуун байна


Малч­ид, иргэд, хадланчид, тариаланчидад зориулсан мэдээ:
Өнөөдөр ихэнх нутгаар цаг агаар тогтуун байна.
2021 оны 10 сарын 06-ны 08 цагаас 20 цаг хүртэлх цаг агаарын урьдчилсан мэдээ:
Ихэнх нутгаар солигдмол үүлтэй. Баруун аймгуудын нутгийн баруун хэсгээр хур тунадас орно. Салхи ихэнх нутгаар баруун өмнөөс секундэд 5-10 метр, Алтайн салбар уулсаар секундэд 12-14 метр хүрч ширүүснэ. Монгол-Алтайн уулархаг нутгаар 0-5 градус, Хангай, Хөвсгөлийн уулархаг нутгаар 6-11 градус, говийн бүс нутгийн өмнөд хэсгээр 15-20 градус, бусад нутгаар 11-16 градус дулаан байна.
Categories
мэдээ нийгэм цаг-үе

АИ-92 автобензиний нийлүүлэлт хэвийн үргэлжилж байна

БНХАУ-аас 2021.09.27-оос 10 дугаар сарын 02-ны хооронд 200 вагон 10131 тн, ОХУ-аас 9 дүгээр сарын 27-оос 30-ны өдрүүдэд 1573 тн шатахуун орж ирсэн.

Цаашид хоёр улсаас шатахууны татан авалтыг хэвийн үргэлжлүүлж 10 сард ОХУ-аас 54880 тонн шатахуун оруулж ирэхээс эхний ээлжийн 33 вагон энэ сарын 2-ны өдрөөс ачигдан Улаанбаатар хотод нийлүүллээ.
Харин БНХАУ-аас энэ сард 12700 тн шатахуун оруулж ирэхээс эхний 50 вагон 4-ны өдөр орж ирсэн ба дараагийн 100 вагон буюу 5000 тн-ыг Замын-Үүдийн Шингэн түлш шилжүүлэн ачих байгууламжид шилжүүлэн ачиж байна.
Өмнөд хилээр орж ирсэн шатахууныг шилжүүлэн ачих ажлыг “Шингэн түлш шилжүүлэн ачих байгууламж” ТӨҮГ 24 цаг бүтэн ээлжээр ажиллаж, хоногт 50 вагон бүтээгдэхүүнийг Улаанбаатар хот руу нийлүүлж байна.
Мөн ОХУ-аас 10 дугаар сарын 02-ны өдөр ОХУ-ын “Роснефть” компаниас 13 вагон 787 тн, 10 сарын 3-ны өдөр 5 вагон 302 тн, 10 сарын 4-ний өдөр 368 тонн, 10 сарын 5-ны өдөр 542 тн газрын тосны бүтээгдэхүүн ачигдсан бөгөөд эхний ээлжийн бүтээгдэхүүнүүдийг импортлогч компанийн агуулахуудад нийлүүлж эхэлсэн.
БНХАУ, ОХУ-аас импортолж буй АИ-92 автобензинийг төмөр замын хуваарьт оруулах, төмөр замын тээвэрлэлтийг саадгүй, шуурхай гүйцэтгэх, Сүхбаатар, Замын-Үүд боомтоор яаралтай татан авах асуудлаар УУХҮЯ нь Гадаад харилцааны яам, Зам, тээврийн хөгжлийн яам, Монгол Улсаас ОХУ, БНХАУ-д суугаа Элчин сайдын яамд, Улаанбаатар төмөр зам, Шингэн түлш шилжүүлэн ачих байгууламж болон бусад холбогдох байгууллагуудтай хамтран, холбогдох арга хэмжээг авч, шуурхай ажиллаж байна.
Өнөөдрийн байдлаар улсын хэмжээнд АИ-92 автобензиний 7 хоногийн, Улаанбаатар хотын хэмжээнд 5 хоногийн ердийн нөөцтэй, нийлүүлэлт хэвийн явагдаж байна.