Month: October 2021

Categories
мэдээ нийгэм

Улаанбаатар хотын хөгжлийг тодорхойлоход иргэдээс санал авч байна

Нийслэлийн хэмжээнд мөрдөж байгаа “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлага”-ын баримт бичгийн хэрэгжилтийн хугацаа дуусаж байгаа. Үүнтэй холбогдуулан “Улаанбаатар хотыг 2040 он хүртэлх хөгжлийн ерөнхий төлөвлөгөө”-ний төслийг боловсруулаад байна.

Монгол Улсын нийслэл Улаанбаатар хотын ирээдүйн 20 жилийн хөгжлийг тодорхойлох хариуцлагатай үйл ажиллагаанд иргэн бүрийн санал, оролцоо нэн чухал. Иймд аравдугаар сарын 29-нийг дуустал иргэд, олон нийтээс хөгжлийн ерөнхий төлөвлөгөөний төсөлд санал авч байна.

Санал авах үйл ажиллагааг дэлхий нийтийг хамарсан “Ковид-19” цар тахлаас шалтгаалан цахим хэлбэрээр авч байгаа юм. Харин цахимаар санал өгөх боломжгүй иргэд халдвар хамгааллын дэглэмийг баримтлан, харьяа хороондоо очиж, ерөнхий төлөвлөгөөний талаарх мэдээлэлтэй танилцан, саналаа өгөх боломжтой.

Иргэн та https://www.ulaanbaatar2040.mn/ вэб хуудас, https://ulaanbaatar2040.mn/p/166/sanal-xuselt, https://www.facebook.com/UB2040, https://twitter.com/Ulaanbaatar2040, https://www.instagram.com/ulaanbaatar2040/, https://www.youtube.com/channel/UC-SAZrRjAPJTvnOixYPUNeA зэрэг олон нийтийн цахим сүлжээний хэрэгсэл болон харьяа хороогоор дамжуулан Хөгжлийн ерөнхий төлөвлөгөөний төслийн талаарх мэдээллийг авч, саналаа идэвхтэй өгөөрэй. Дэлгэрэнгүй мэдээллийг https://home.uda.ub.gov.mn/?p=10603 цахим холбоос болон 94442040 дугаарын утаснаас авах боломжтой.

Categories
амьдралын-өнгө мэдээ

​Есөн аймагт 180 сая мод тарьж, ургуулах ажил эхэллээ


Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнд “Эрдэнэс Тавантолгой” компани нэгдэж “Сая тонн-Сая мод” хөтөлбөрөө хэрэгжүүлж эхэллээ.

Зүүнбаян-Тавантолгой чиглэлийн 416.1 км төмөр замын дагуу 10 сая мод тарьж, ногоон зурвас байгуулах ажлын нээлт 2021 оны аравдугаар сарын 7-ны өдөр боллоо. Нээлтэд Монгол Улсын Ерөнхийлөгчийн Тамгын газрын дарга Я.Содбаатар болон яам, аймаг, компанийн удирдлага оролцов.

“Эрдэнэс Тавантолгой” ХК болон охин компаниуд 2021-2030 онд Өмнөговь, Дорноговь, Дундговь, Өвөрхангай, Баянхонгор, Сэлэнгэ, Төв, Хэнтий, Увс аймагт 180 сая мод тарьж ургуулах юм.

Нийт модны 32 хувь буюу 57 саяыг нь говийн бүсэд, үлдэх 123 саяыг хувьцаа эзэмшигч бүрийг төлөөлөн ойт хээрийн болон хуурай хээрийн бүс нутгийн цөлжилтийг бууруулах, хуурайшилтыг багасгах болон уул уурхайн нөлөөлөд өртөж, эвдрэлд орсон газрыг нөхөн сэргээх зорилгоор тарина.

“Сая тонн-Сая мод” хөтөлбөрийн хүрээнд Зэвсэгт хүчний Жанжин штаб, “Эрдэнэс Тавантолгой” ХК, ХААИС-ийн Агроэкологийн их сургууль, Монголын тариаланчид, гурил үйлдвэрлэгчдийн холбооны удирдлагууд хамтран ажиллах гэрээнд гарын үсэг зурлаа.

Байгальд хөрөнгө оруулах цаг болсон. Гэхдээ мод тариад орхих биш, арчилж тордож ургуулах нь чухал гэдгийг Ерөнхийлөгчийн Тамгын газрын дарга Я.Содбаатар хэллээ.

Тэрбээр нийт нутаг дэвсгэрийн 77.8 хувийг хамарсан цөлжилт, газрын доройтлыг бууруулах, нөхөн сэргээх, байгаль орчноо хамгаалахад уул уурхайн компаниуд идэвх, санаачилгатай оролцож байгаад Ерөнхийлөгчийн нэрийн өмнөөс талархал илэрхийлэв.

Цөлжилтөд их нэрвэгдсэн аймгийн хувьд “Тэрбум мод” үндэсний хөдөлгөөн, “Сая тонн-Сая мод” хөтөлбөрт манлайлан оролцохоо Дорноговь аймгийн Засаг дарга О.Батжаргал хэллээ.

Батлан хамгаалах салбарынхан 10 жилийн хугацаанд 22 сая мод тарьж ургуулахаар төлөвлөсөн. Давхардсан тоогоор 150 мянга гаруй хугацаат болон гэрээт алба хаагч хамгийн хүнд гэгдэх байршилд ажиллах юм байна.

Говийн бүсэд мод тарьж, арчилж ургуулахын тулд шинээр худаг гаргахаас гадна Загийн усны хоолой, Цагаан цав гүний усны орд зэргээс усны хэрэглээг хангахаар тооцсоноо ”Эрдэнэс Тавантолгой ХК-ийн Дотоод хяналт, эрсдэлийн удирдлагын газрын захирал Х.Нурлат хэлэв.

“Сая тонн-Сая мод” хөтөлбөрт “Эрдэнэс Тавантолгой” ХК болон охин компани болох Нүүрс баяжуулах үйлдвэр, “Зүүнбаян төмөр зам”, “Гашуунсухайт төмөр зам”, “Тавантолгой түлш”, “Гашуунсухайт автозам” болон Цанхийн уурхайнуудын гэрээгээр туслан гүйцэтгэгчид оролцох юм байна

Categories
мэдээ энтертаймент-ертөнц

​Энэ жилийн “Halloween”-ы баяр “Squid Game”-ээр амьсгална

Есдүгээр сарын 17-нд цацагдаж эхэлсэн Өмнөд Солонгосын “Squid game” цуврал дэлхийн орон орны үзэгчдийг байлдан дагуулж, Netflix шилдэг шоуны дээд амжилтыг эвдээд байгаа.

Тэгвэл энэхүү цувралын хувцас, өмсгөл удахгүй болох “Halloween” буюу Сүнсний баярын гол трэнд болох гэж байгааг хэвлэлүүд мэдээлжээ.

Тухайлбал Amazon.com сайтад “Squid game costume” түлхүүр үгээр хайхад 2,000 гаруй бараа илэрч байгааг “The Wall Street Journal” сэтгүүл мэдээлсэн байна.

Squid Game' Paris: Viral Videos Show Fight Outside of Pop-up Store

Google-ийн хайлтын системд бас ийм түлхүүр үг өндөр эрэлттэй байгааг мэдээлжээ.

Хэдийгээр сүнсний баяр болоход олон хоног дутуу байгаа ч Инстаграм хэрэглэгчид #SquidGameCostume хаштагаар өөр өөрийн бэлдсэн хувцас, өмсгөлөө үзүүлж эхэлсэн байна.

“Squid Game” цувралд гардаг хамгаалагчдын хар багийг хэрхэн хийх аргыг заасан YouTube видео олон мянган хандалттай болжээ.

Яг ийм багийг Amazon сайтад $20-оор зарж эхэлсэн байна. Мөн цувралын гол дүрүүдийн дугаартай бэлтгэлийн хувцас $30 орчим үнээр зарагдаж эхэлжээ.

Хонг Конгийн South China Morning Post сонинд мэдээлснээр Хятадын үйлдвэрлэгчид сүүлийн үед “Squid Game” цувралын хувцас хэрэгслийн захиалгад дарагдах болсон байна.

Захиалга дэлхийн олон улсаас ирж байгаагаас гадна Хятадын дотоод зах зээлээс ч ирэх болжээ. Хэдийгээр Нэтфликс платформ тус улсын зах зээлд хаалттай, цувралыг албан ёсоор үзүүлээгүй байгаа ч эрэлт өндөр байгаа нь сонирхол татаж байна.

Squid Game | Netflix Official Site

Өчигдөр Америкийн телевизийн од Жимми Фэллоны хөтөлдөг NBC сувгийн “Tonight Show” шоунд “Squid Game” цувралын гол дүрийн жүжигчид зайнаас оролцож, хүүхдийн түгээмэл тоглоомуудаар хоорондоо өрсөлджээ.

Categories
амьдралын-өнгө мэдээ цаг-үе

Өмнөговь, Дундговь, Дорноговь, Говь-Алтай аймагт өвөлжилт, хаваржилт хүндрэх магадлалтай

Ирэх өвөл хаврыг өнтэй давах зорилгоор улсын хэмжээнд 1.2 сая тонн хадлан авахаар төлөвлөсөн ч энэ сарын 1-ний байдлаар 800.000 орчим тонн өвс тэжээлийг базаасныг Хүнс, хөдөө аж ахуй хөнгөн үйлдвэрийн яамнаас мэдээллээ.

Түүнчлэн 2021-2022 оны өвөл хаврын улиралд нийт бэлчээрийн 66.7 хувь хүрэлцээтэй, үлдсэн 33,3 хувь нь хүрэлцээ бага тухай Мал аж ахуйн бодлогын хэрэгжилтийг зохицуулах газрын дарга Д.Батмөнх хэллээ. Тэрээр цааш нь ”Өмнөговь, Дундговь, Дорноговь, Говь-Алтай аймагт өвөлжилт, хаваржилт хүндэрнэ. Иймээс малчдад аравдугаар сарын сүүлээр өвс тэжээл ханган нийлүүлэх, тус засаг, захиргаанд оновчтой бодлого боловсруулах чиг зүг, заавар зөвлөмж хүргүүлсэн. Малчдын гар дээр худалдан авах өвсний үнэ 9500-10500 төгрөгтэй байна” гэлээ.

2019-2020 оны хувьд Хөвсгөл, Архангай, Завхан аймагт ургамлын гарц байсан ч 10 сарын сүүлээр их хэмжээний цас орсны улмаас бэлчээр цасанд бүрэн дарагдаж, өвөлжилт хүндэрсэн юм. Иймээс өвөлжилт хаваржилтын бэлтгэлээ сайн хангахыг Ус, цаг уур, орчны шинжилгээний хүрээлэнгээс анхааруулж байна.

Нийт нутгаар зуншлагын байдал 7 дугаар дундаас сайжирч 50 гаруй хувьд хэвийн, 40 орчим хувьд дунд, 10 орчим хувьд муу байсан ч наймдугаар сарын сүүлч гэхэд нийт нутгийн 80 орчим хувьд сайн, 10 гаруй хувьд дунд, 10 хүрэхгүй хувьд буюу Говь-Алтай, Дундговь, Өмнөговь, Дорноговь, Сүхбаатарын ганц нэг сумдын нутгаар муу байжээ.

Өвөлжилт хаваржилт хүндрэх магадлалтай аймаг сумдын малчид өвсний нөөцөө сайтар базааж, онд орохгүй малаа эдийн засгийн эргэлтэнд оруулах шаардлагатай байна.

Categories
гадаад мэдээ

NASA дэлхийг солироос хамгаалах туршилт хийнэ

АНУ-ын Агаарын нислэг, сансрын уудмыг шинжлэн судлах төв болох NASA аюул учруулж болзошгүй солируудаас дэлхийг хамгаалах туршилтыг анх удаа хийх гэж байна. NASA ирэх сард солир руу тусгай зонд бүхий пуужин хөөргөх бөгөөд уг аппарат 2022 оны есдүгээр сарын сүүлч, 10 дугаар сарын эхээр уг солирыг мөргөж тойрог замыг нь өөрчлөх юм байна.

DART /“Double Aster­oid Redirection Test”- Хос солирын тойрог замыг өөрчлөх туршилт/ зонд бүхий, “SpaceX” компанийн “Falcon 9” зөөгч пуужинг Калифорни муж улс дахь Ванденберг сансрын хүчний баазаас арваннэгдүгээр сарын 24-ний өдөр АНУ-ын Зүүн эргийн цагаар 01 цаг 20 минут хөөргөхөөр товложээ.

Сансарт хүрсний дараа DART аппарат пуужингаас салж, Дидим-Диморф гэх хос солирыг чиглэн ниснэ. Гэхдээ 780 метрийн диаметртэй, том солир Дидимээ тойрон эргэлдэж байдаг хэмжээгээр жижиг солир болох 160 метрийн диаметртэй Диморфомтой мөргөлдөхөөсөө өмнө бүтэн жил шахам сансарт байх ажээ. NASA-гийн төлөөлөгч Жошуа Хэндалийн хэлснээр, DART аппарат Диморф солиртой 2022 оны есдүгээр сарын 26-наас аравдугаар сарын 2-ны хооронд мөргөлдөх гэнэ.Уг аппарат цагт 25 мянга орчим км-ийн хурдтайгаар жижиг солирыг мөргөх аж. Үүний дараа том солироо тойрон нэг эргэлт хийх хугацаа хэдэн минутаар багасах бөгөөд хос солирын хоорондох зай багасаж, тойрог зам нь өөрчлөгдөх ёстой юм байна. Хэдийгээр тойрог замын хазайлт нь тийм ч их ач холбогдол өгөхгүй ч дэлхийгээс огторгуйн дурангаар ажиглахад хангалттай байх аж. Дидим-Диморф хос солир нь нарыг тойрон эргэлддэг бөгөөд дэлхий рүү үе үе ойртдог ч одоогоор манай гаригт аюул учруулаагүй байгаа юм. Туршилтын зорилго нь ирээдүйд манай гаригт үнэхээр аюултай солирууд гарч ирэх тохиолдолд тойргийг нь хэрхэн өөрчилж дэлхийтэй зөрүүлэх аргыг боловсруулах гэнэ. NASA анх 2016 онд Дэлхийг солироос хамгаалах үйл ажиллагааг зохицуулах газар байгуулжээ. Энэхүү хөтөлбөрийн хүрээнд дэлхийгээс 48 сая км-ийн сансар огторгуйн орон зайд манай гаригт аюул учруулж болзошгүй солир, сүүлт одыг хайн илрүүлж, хэмжээ, тойрог зам, химийн найрлагынх нь талаар мэдээлэл цуглуулж, мөн дэлхий дээр унаж болзошгүй үр дагаврын дүн шинжилгээг хийж байгаа юм байна.

Г.АМАРСАНАА

Categories
мэдээ нийгэм цаг-үе

Вакцины III тун халдвараас 99 хувь хамгаалж байна

Эрүүл мэндийн яамнаас коронавируст халдварын нөхцөл байдлын талаар мэдээлж байна.

Өнөөдөр гуравдугаар тунгийн хамрагдалтын талаар голчлон мэдээлж байна. Өвчлөл тархах магадлал өндөр делта хувилбарын эсрэг хийгдэж байгаа ба одоогоор 310 мянган хүн III тундаа хамрагдаад байна. Тэдний 99 хувь нь халдвараас бүрэн хамгаалагдаж байна гэв.

ХӨСҮТ-ийн захирал Ц.Билэгтсайхан:
Эрсдэл бүхий бүлэг өндөр настай, архаг хууч өвчтэй иргэд болон хил гааль, цэргийн ангийн ажилтнуудаа III тунд идэвхтэй хамруулах болно. Монгол Улс дөрвөн төрлийн вакциныг сайн дурын үндсэн дээр хийж байгаа ба дархлаа өрнүүлэх чадамж хангалттай хэмжээнд үүсэж байгаа ба Вероселл, Файзер вакцинаас дархлаа сэдээх гурав дахь тунг хийж байна.

БГД-ийн нэгдсэн эмнэлгийн дарга З.Балдандугар:
БГД-т 53 мянга гаруй иргэн аваад байна. 47 мянга нь эдгэрсэн. Өдөрт 500-аас доош буухгүй байна. Тусламж үйлчилгээ хүргэхээр 653 ор дэлгэн ажиллаж байна. Зорилтот бүлгийн иргэд, өндөр настай иргэд, суурь өвчтэй хүмүүс хүндрэх тохиолдол 6-р сарын өмнөхтэй харьцуулахад өсөж байна.

ХӨСҮТ-ийн Дархлаажуулалтын албаны дарга О.Дашпагма:
Иргэд вакциндаа хангалттай хэмжээнд хамрагдахгүй байна. Нэмэлт тунд эхний хоёр тунгаа хугацаандаа хийлгэсэн, хоёр дахь тунгаа хийлгээд 3 сараас дээш хугацаа өнгөрсөн бол хийлгэж болно. Иргэд харьяа эрүүл мэндийн байгууллагын дархлаажуулалтын цэгт очин хийлгэнэ.
Categories
мэдээ нийгэм цаг-үе

ЭМЯ: 2410 хүнээс халдвар илэрч, 13 хүн нас барлаа

Коронавируст халдварын нөхцөл байдлын талаарх Эрүүл мэндийн яамнаас өгсөн мэдээллийг хүргэж байна.

Сүүлийн 24 цагт 2410 хүнээс халдвар илэрлээ.

Эдгээрийн 1368 нь Улаанбаатарт, хөдөө орон нутагт 1042 тохиолдол бүртгэгдсэн байна.

Мөн ковидын нэн хүнд хэлбэрээр 13 хүн нас барлаа. Ингэснээр нийт нас баралт 1331 болов.

Сүүлийн 24 цагт 6518 хүн эдгэрч, эмнэлгээс гарлаа.

Өнөөдрийн байдлаар 20482 хүн хэвтэн эмчлүүлж буйгаас:

  • Хөнгөн-11413
  • Хүндэвтэр-6578
  • Хүнд-2140
  • Нэн хүнд-351

бичвэр гэх мэтийн зураг байж болно

Categories
мэдээ нийгэм

​Богд ууланд төөрсөн хүүхдийг эсэн мэнд олжээ


Нийслэлийн Хан-Уул дүүргийн арваннэгдүгээр хороо, “Богд” уулын “Зайсангийн-Ам”, “Дугуй цагаан” гэдэг газрын чиглэлд аравдугаар сарын 7-ны өдрийн 18:00 цагийн орчим зургаан хүүхэд “Богд” ууланд алхалт хийж явснаас нэг хүүхэд төөрсөн тухай дуудлагыг мөн өдрийн 19:30 цагт нийслэлийн Аврах ангийн алба хаагчид хүлээн авчээ.

Алба хаагчид долоон км замыг туулан 20:20 цагт очиж, нийслэлийн ХУД-ийн харьяат, 11 дүгээр ангийн сурагчийг эрэн хайх ажиллагааг “Дугуй цагаан” гэдэг газраас “Батширээт” гэдэг газар хүртэл 7 км-тзохион байгуулжээ. Ингээд үр дүнд хүрээгүй тул аравдугаар сарын 8-ны өдрийн 01:51 цагт эрэн хайх ажиллагааг түр зогсоосон байна.

Аравдугаар сарын 8-ны өдрийн 05:12 цагт тухайн хүүхэдтэй утсаар холбоо тогтоож, “3 үгт хаяг” аппликэйшн ашиглан байршлыг тогтоосноор нийслэлийн Хан-Уул дүүргийн 14 дүгээр хороо “Бугын сангийн аж ахуйн-Ам” гэдэг газраас эсэн мэнд олж, ар гэрийнхэнд нь хүлээлгэн өгсөн хэмээн Онцгой байдлын ерөнхий газраас мэдээллээ

Categories
мэдээ нийгэм

Нийслэлд гурав хоног архи, согтууруулах ундаа худалдахгүй

Монгол Улсын Их хурлын сонгуулийн тухай хуулийг хэрэгжүүлэхтэй холбогдуулан Нийслэлийн Засаг дарга бөгөөд Улаанбаатар хотын Захирагч Д.Сумъяабазар А/753 тоот захирамж гаргалаа.

Захирамжид нийслэлийн нутаг дэвсгэрт 2021 оны аравдугаар сарын 9-11-ний өдрүүдэд согтууруулах ундаа худалдах, түүгээр үйлчлэхийг түр зогсоох, мөн соёл, урлаг, үзвэр, спортын зэрэг олныг хамарсан аливаа арга хэмжээ зохион байгуулахгүй байх тухай тусгажээ. Түүнчлэн гадаа болон битүү талбайд үйл ажиллагаа явуулдаг худалдаа, үйлчилгээний төвүүдийн хувьд тухайн долоо хоногийн амралтын өдрийг сонгуулийн санал авах өдөр буюу 2021 оны аравдугаар сарын 10-ны өдөрт шилжүүлэн, зохион байгуулалтын арга хэмжээ авахыг холбогдох аж ахуйн нэгж, байгууллагуудын удирдлагуудад үүрэг болгов.

Categories
мэдээ спорт

​ОСЛО-2021: ДАШТ-ээс Б.Шоовдор, Э.Даваачимэг нар хүрэл медаль хүртлээ

“ОСЛО-2021” ДАШТ-ийн сүүлийн өдөр эмэгтэйчүүдийн 57 кг-ын жинд өрсөлдсөн ОУХМ Э.Даваачимэг, 59 кг-ын жинд хүч үзсэн Б.Шоовдор нар хүрэл медаль хүртлээ.

Э.Даваачимэг тэгшитгэлийн барилдаанд энэ жилийн залуучуудын ДАШТ-ий хүрэл медальт Туркийн Элвира Камалоглуг 11:0-ээр ялсан ч шөвгийн наймд өсвөр үеийн дэлхийн аварга, өсвөр үе, залуучууд, насанд хүрэгчдийн Азийн аварга Энэтхэгийн Аншуд 1:5-аар ялагдсан юм. Харин дагах барилдаанд залуучуудын дэлхийн аварга Казахстаны 19 настай Нилуфар Раймоваг 10:0-ээр, хүрэл медалийн төлөө 2020 оны ЕАШТ-ий мөнгөн медальт Украины Соломиа Винникийг хүндхэн барилдааны эцэст 11:8-аар ялснаар дэлхийн медальтан боллоо.

Б.Шоовдор ДАШТ-ээс гурван жил дараалан медаль хүртлээ

Б.Шоовдорын хувьд медальтай үлдэх эсэхээ шийдэх хариуцлагатай барилдаанд 2017 оны залуучуудын дэлхийн аварга, энэ жилийн Пан Америкийн аварга, АНУ-ын Майя Нильсоныг тун хүнд барилдааны эцэст 4:3-аар яллаа.Б.Шоовдор сүүлийн дөрвөн удаагийн ДАШТ-ий медалийн төлөө барилдаж дараалан гурав дахь хүрэл медалиа зүүж байна.

“Осло-2021” бөхийн төрлүүдийн ДАШТ-ий чөлөөт бөхийн төрөл ийнхүү өндөрлөж, манай баг нийт зургаан хүрэл медальтай тэмцээнээ дуусгаж байна. Дөрвөн хүрэл медаль, хоёр шагналт байртай Монголын эмэгтэйчүүдийн шигшээ баг 34 орноос 78 оноогоор гуравдугаар байрт орж, хүрэл цомын эзэн боллоо.