Month: September 2021

ХНХ-ын сайд А.Ариунзаяа өнөөдөр болсон Засгийн газрын хуралдааны шийдвэрийг танилцуулав.

Өнөөдөр болсон Засгийн газрын хурлаар Нийгмийн даатгалын багц хуулийн төслийг хэлэлцэн, УИХ-д өргөн барих зөвшөөрлийг өгчээ.

А.Ариунзаяа “Нийгмийн даатгалын хуульд нийт 30 гаруй удаа өөрчлөлт оруулжээ. Ингэхдээ нийгмийн даатгалын хамрах хүрээг өргөтгөсөн. Нийгмийн даатгалын шимтгэлийн хувь хэмжээг өөрчилсөн.

Шимтгэлийн хувийг бууруулснаар сангийн алдагдал нэмэгдэж, тогтвортой үйл ажиллагаа явуулах боломжгүй болсон. Гэтэл манай улсын хүн амын насжилт өссөөр байна. Алсын хараа-2050 бодлогын баримт бичиг болон Засгийн газрын 2020-2024 оны үйл ажиллагааны хөтөлбөр зэрэгт нийгмийн даатгалын хамрах хүрээг өргөжүүлэх талаар тусгасан. Мөн олон давхарга бүхий тогтолцоо руу шилжинэ. Санг алдагдалгүй болгох шаардлагатай. Иргэд бодит хуримтлалтай болох шаардлагатай. Шинэ хуульд НДШ-д өөрчлөлт оруулаагүй. Санхүүгийн зах зээлийг дэмжих заалт мөн бий.

Онцлох заалтууд:

• Тэтгэврийн даатгалын нэрийн дансыг мөнгөжүүлнэ. Одоогоор энэ санд зөвхөн бичилт хийж, бодит мөнгөн хөрөнгө байхгүй. Хуваарилалтын буюу өнөөгийн тогтолцооноос хагас хуримтлалтай дараа нь бүрэн хуримтлалын тогтолцоонд шилжинэ. Мэргэжлийн хороодыг ажиллуулна.
• Тэтгэврийг жил бүр хэрэглээний үнийн өсөлтөөр нэмнэ.
• Ихэр хүүхэд төрүүлсэн эхийн тэтгэмжийг 20 хоногоор нэмнэ.
• Үйлдвэрлэлийн осолд орсон бол тэр хугацаанд НДШ-ээс чөлөөлнө.
• Хувийн нэмэлт тэтгэврийн тухай хуулийн төсөлд зааснаар иргэд нэмэлт даатгалд даатгуулах, хуримтлал үүсгэх, цаашлаад хөрөнгө оруулалт хийх боломжтой. Иргэд нэмэлтээр цуглуулсан тэтгэврээ өвлүүлэх боломжтой.

  Хуулийн төслийг хэлэлцэх явцад эдгээр төсөл улам сайжирна гэж найдаж байна.

Капитал банкнаас Нийгмийн даатгалын сангийн 95 тэрбум төгрөгийн авлага үлдсэн. Үүний 22 тэрбум төгрөгийг эд хөрөнгө худалдан барагдуулахаар ажиллаж байна. шүүхэд маргаан дуусаагүй байна гэв.

БНХАУ-аас есдүгээр сард багтаж гурван удаагийн ачилтаар 150 вагон нийт 8,250 тонн АИ-92 автобензин импортоор орж ирэх байсан бол дахин 50 вагон нэмэгджээ.

Хятадын тал Монгол Улс руу АИ-92 автобензин тээвэрлэх 200 вагоныг тус улсын төмөр замын есдүгээр сарын хуваарьт нэмэлтээр оруулж, ачилт, тээвэрлэлтийг тусгай горимоор зохион байгуулж,

• эхний ээлжийн 50 вагон 2021 оны есдүгээр сарын 26-ны өдөр,
• хоёр дахь ээлжийн 50 вагон 2021 оны есдүгээр сарын 27-ны өдөр
• гурав дахь ээлжийн 50 вагон өчигдөр буюу 2021 оны есдүгээр сарын 28-ны өдөр тус тус Замын-Үүд боомтоор орж ирээд байгаа юм.

Мөн дөрөв дэх ээлжийн 50 вагон Хөх хотоос Эрээн боомт руу хөдөлсөн байна.

Хилээр орж ирсэн шатахууныг шилжүүлэн ачих ажлыг “Шингэн түлш шилжүүлэн ачих байгууламж” ТӨҮГ бүх хүчин чадал, нөөц боломжоо дайчлан ажиллаж, эхний 56 вагон өчигдөр Улаанбаатар хот руу хөдөлсөн.

Мөн 2021 оны есдүгээр сарын 23-ны өдөр ОХУ-ын “Роснефть” компанитай хийсэн уулзалт, хэлэлцээрийн үр дүнд есдүгээр сард яаралтай нийлүүлэхээр тохирсон 1,500 тонн АИ-92 автобензиний эхний ээлж буюу 1,210 тонн АИ-92 автобензин ачсан 20 вагон 2021 оны есдүгээр сарын 26-27-нд шилжих шөнө Улаанбаатар хотын Толгойт өртөөнд ирж шатахууны агуулахууд руу хуваарилж дууссан.

Үлдсэн 300 орчим тонн АИ-92 автобензин ачсан таван вагон үйлдвэрээс ачигдан замдаа явж байна.

Хятад улсаас импортлох 724 вагон автобензинийг төмөр замын хуваарьт оруулах, төмөр замын тээвэрлэлтийг саадгүй, шуурхай гүйцэтгэх, Замын-Үүд боомтоор яаралтай татан авах асуудлаар Гадаад харилцааны яам, Зам, тээврийн хөгжлийн яам, Монгол Улсаас БНХАУ-д суугаа элчин сайдын яам, Улаанбаатар төмөр зам, Шингэн түлш шилжүүлэн ачих байгууламж болон бусад холбогдох байгууллагуудтай хамтран, холбогдох арга хэмжээг шуурхай авч ажиллаж байна гэж Уул уурхай, хүнд үйлдвэрийн яамнаас мэдээллээ.

2017 оны долдугаар сарын 1-нээс 2021 оны зургаадугаар сарын 25-ны 00:00 цаг хүртэлх хугацаанд оногдуулсан торгуультай бол 50 хувийг 2021 оны аравдугаар сарын 1-ний дотор төлснөөр Өршөөлийн хуульд хамрагдан, үлдсэн 50 хувь нь өршөөгдөх боломжтой юм. Иргэн Та www.smartcar.mn болон www.toruuli.police.gv.mn сайтуудад хандан өөрийн тээврийн хэрэгслийн дугаарыг оруулан Зөрчлийн тухай хуулиар бэлэн бус хэлбэрээр оногдуулсан торгууль байгаа эсэхийг шалгах боломжтой.

Нийслэлийн Мэдээлэл, технологийн газраас хариуцан хөгжүүлдэг Тээврийн хэрэгслийн цахим үйлчилгээний https://smartcar.mn системээр иргэд тээврийн хэрэгслийн татвар торгуулиа идэвхтэй төлж байна. Тодруулбал, есдүгээр сарын байдлаар л гэхэд тус системд 253.573 удаа ханджээ. Сүүлийн нэг сарын хугацаанд 206.620 иргэн төлбөрийн мэдээллээ шалган, 6929 татвар амжилттай төлөгдөн 502.678.107 төгрөг, 126.053 торгууль амжилттай төлөгдөн 1.835.650.692 төгрөгийг төсөвт төвлөрүүлсэн байна. Өчигдөр буюу есдүгээр сарын 28-ны өдөр нийт 33 мянган хүн хандаж, 20.880 иргэн төлбөрийн мэдээллээ шалган, 7.359 татвар, торгууль амжилттай төлөгдөн, 108.497.066 төгрөгийг төвлөрүүллээ.

Системд хандаж байгаа иргэдийн тоо эрс нэмэгдэж, системийн ачаалал өсөж байна. Иймээс Нийслэлийн Мэдээлэл технологийн газраас https://smartcar.mn системтэй холбоотой иргэдээс ирсэн дуудлага, хүсэлтүүдийг хүлээн авч шуурхай шийдвэрлэн, системийн хэвийн ажиллагааг хангах, хурд, хүчин чадлыг нэмэгдүүлэх, нэмэлт сайжруулалтын ажлыг Үндэсний дата төв УТҮГ-тай хамтран хэрэгжүүлж байна.

Иргэн та дараах төлбөрийн шийдлүүдийг ашиглан татвар, торгуулиа төлөх боломжтой.

1. E-mongolia.mn цахим хуудас.
2. “Smartcar” аппликэйшн, Smartcar.mn цахим хуудас.
3. mn системийн “Интернэт банк”-аар, “Golomt bank” аппликэйшн, “SocilalPay” аппликэйшнээр, “Голомт” банкны салбар дээр биеэр очиж төлбөр төлөх.
4. “Гялс банк” аппликэйшн, Statebank.mn сайтын “Гялс цахим банк”-аар, мөн Төрийн банкны салбар дээр биеэр очиж төлбөр төлөх.
5. “Gerege” аппликэйшнээр, “Гэрэгэ киоск” машинаар дамжуулан биеэр очиж төлбөр төлөх .
6. Худа­­­лдаа хөгжлийн банкны салбар төвүүдээр өөрийн биеэр очиж төлбөр төлөх боломжтой.

Гэр хорооллын дахин төлөвлөлтөд хамрагдсан ч газраа алдаж хохирсон иргэд өнөөдөр мэдээлэл хийлээ.

Э.Бат-Үүл хүүтэйгээ нийлж олон айлын газрыг чөлөөлж хохироочхоод одоо ямар нүүрээрээ Сонгинохайрхан дүүрэгт нэр дэвшинэ гээд явж байгаа юм бэ. Долоон жил шүүх цагдаагаар явж, үнэхээр цөхрөнгөө барлаа. Энэ асуудлыг хурдан шийдэж өгөхгүй бол би эсэргүүцлээ илэрхийлж, Сонгинохайрхан дүүргийн сонгогчдод булайг нь дэлгэнэ. Болохгүй бол өлсгөлөн зарлана” гэв.

Иргэдийн төлөөлөл “Би БЗД-ийн 12 дугаар хорооны иргэн болох ах Отгонбаярыгаа төлөөлж ирсэн. Ах маань харваад хэвтэрт орчихсон. Найман жилийн өмнө газар чөлөөлөх гэрээ хийгээд Гранд Лайн ХХК-д газраа эзэмшүүлэхээр болсон.

Гэтэл өдийг хүртэл байшин ч үгүй, байр ч үгүй, хашаа ч үгүй явж байна. Гранд Лайн компанийн захирал нь Чулуудай буюу Э.Бат-Үүлийн хүү юм билээ. 2020 онд гуравдугаар шатны шүүхээр тус компани иргэдийг хохироосон нь үнэн зөв болохыг тогтоосон байхад өнөөдрийг хүртэл иргэдийн хохирлыг барагдуулаагүй. 12 дугаар хорооноос 48 өрх өнөөдөр орох оронгүй явж байна. Хариуцлагаа хүлээ. Ингэж ард иргэдийг хохироож, улс төрийн наймаа хийдгээ болимоор байна. Болохгүй бол суулт зарлана” гэв.

БОАЖЯ: Биологийн олон янз байдлыг хамгаалах, уур амьсгалын өөрчлөлтөд дасан зохицох төслийн II, III шат хэрэгжиж эхэллээ.

Ойн тогтвортой менежментийн суурь судалгааны баг Увс аймгийн Тусгай хамгаалалттай газар нутгийн ойн сан бүхий Түргэн, Цагаанхайрхан, Өндөрхангай, Зүүнхангай сумдад ажиллалаа. Тус баг тухайн бүсийн ойн төлөв байдлыг үнэлэхээс гадна, ой болон түүний дагалдах баялгийг зохистой ашиглах, орон нутагт менежментийн ямар шийдэл байх тал дээр түлхүү ажиллахаараа онцлогтой.

Судалгааны ажлын гүйцэтгэгч ШУТИС-ийн ойн судалгаан хүрээлэн явцын талаар аймгийн БОАЖГ-ын холбогдох хүмүүст мэдээлэл өглөө. Төслийг эрдэмтдийн зөвлөлөөр хэлэлцүүлж, 2021 оны 11 дүгээр сард эцэслэн хүлээлгэж өгөх юм

2021-2022 оны хичээлийн жилийн эхний нэг сар өндөрлөж байна. Энэ хугацаанд цэцэрлэг, сургуулийн орчинд коронавирусийн халдвар ямар түвшинд байгаа болон халдвар илэрсэн тохиолдолд ямар арга хэмжээ авч буй талаар Нийслэлийн Боловсролын газрын Бодлогын хэрэгжилтийн хэлтсийн дарга Ц.Жаргалантуулаас тодрууллаа.

-Коронавирусийн халдварын улмаас танхимын сургалтыг цахимд шилжүүлсэн сургууль хэр олон байна вэ?

-Нийслэлийн Боловсролын газраас долоо хоног тутамд хоёр удаа сургууль, цэцэрлэгүүдээс судалгаа авч нэгтгэн, нэгдсэн дүгнэлт гаргаж байна.

Есдүгээр сарын 28-ны буюу өчигдрийн байдлаар нийслэлийн хэмжээнд 106 сургуулийн бага ангийн 64 бүлэг, дунд ахлах ангийн 52 бүлгийн сурагчид зайны сургалтад шилжин суралцаж байгаа. 

Харин хоёр сургууль бүхэлдээ цахим хэлбэрт шилжсэн бол нэг сургуулийн нэг хичээлийн байрыг түр хааж, зайны сургалтад шилжүүлээд байна. Налайх дүүргийн Чандмань-Эрдэнэ, Сүхбаатар дүүргийн зургадугаар сургуулиуд сургуулиараа зайны сургалтад шилжсэн байдалтай байна.

-Цэцэрлэгүүд цахим сургалтад шилжсэн үү?

-Өчигдрийн мэдээнээс харахад нийслэлийн хэмжээнд долоон цэцэрлэг зайны сургалтад шилжсэн байна. Баянгол дүүргийн “Амгалангуа”, “Монгени”, 30, 76, 198 дугаар цэцэрлэг, Сүхбаатар дүүргийн 24, Сонгинохайрхан дүүргийн “Хөх тэнгэр” цэцэрлэг зайны сургалтад шилжсэн. Нийслэлийн хэмжээнд ахлах 36 бүлэг, бэлтгэл 35 бүлгийн хүүхдүүд зайны сургалтад хамрагдаж байна.

-Ямар тохиолдолд зайны сургалтад шилжүүлж байгаа вэ. Халдвар авсан хүүхэд багачууд, багш нарын тоог нарийвчлан гаргаж байгаа юу?

-Эрүүл мэндийн болон Боловсрол, шинжлэх ухааны сайдын хамтарсан тушаалд ямар тохиолдолд анги бүлгээр нь, ямар тохиолдолд давхар, хичээлийн байраар нь, ямар тохиолдолд сургуулиар нь зайны сургалтад шилжүүлэх талаар нарийн зааж өгсөн. Тэр дагуу танхимын сургалтыг түр зогсоож цахим сургалтад шилжүүлж буй. Цэцэрлэгийн хүүхдүүдээс нэг нь л халдвар авсан бол шууд зайны сургалтад шилжүүлнэ. Сурагчдын хувьд 12-оос доош насныхан вакцинд хамрагдаагүй. Тиймээс нэг анги, бүлгээс нэг хүүхдээс халдвар илэрвэл зайны сургалтад шилжүүлж байгаа. Харин 12 болон түүнээс насныхны хувьд нэг ангиас гурван хүүхдээс халдвар илэрвэл зайны сургалтад шилжүүлнэ. Хичээлийн байрын тухайд хоорондоо хамааралтгүй гурван бүлгээс халдвар илэрвэл зайны сургалтад шилжүүлэх журамтай. Ерөнхий боловсролын сургуулийн 177 багш, 53 ажилчин, 539 хүүхэд, цэцэрлэгийн 85 багш, 112 ажилчин, 87 хүүхэд ковид туссан байна.

-Цаашид ямар бодлого баримтлан ажиллах вэ?

-Хичээлийн шинэ жил эхлэхээс өмнө нийт халдварт өртсөн хүмүүсийн 19 хувь нь хүүхдүүд байсан. Хичээл сургууль эхэлсэн ч энэ хувь өсөөгүй. Нөгөөтээгүүр халдвар авч өвчилж буй хүүхдүүдийн хувьд сургуулийн орчноос илүүтэй ахуйн хүрээнд халдвар авч байна. Мөн зайны сургалтад шилжиж буй анги бүлгийн тоо ч буурах магадлалтай. Тиймээс Боловсрол, шинжлэх ухааны яам болоод Нийслэлийн Боловсролын газраас танхимын сургалтыг илүү зохион байгуулах бодлого баримталж байна. Эцэг эхчүүдийн тухайд ч хүүхдийн хичээлийн хоцрогдлоос шалтгаалан танхимын сургалтыг дэмжиж байгаа.

-Зайн сургалтад шилжсэн сургууль, цэцэрлэгүүд хэзээнээс буцаж танхимын сургалтад шилжих вэ?

-Зайны сургалтад шилжсэнээс хойш долоо хоног дотор дахин халдвар илрэхгүй бол танхимын сургалтыг эхлүүлэхээр журамд заасан. Өвдөөд эдгэрсэн хүүхэд болон багш нарыг сургалтын үйл ажиллагаанд шууд оруулахад эргэлзэх зүйлгүй юм.