Month: September 2021

Categories
мэдээ үндэсний-бөx цаг-үе

Ерөнхийлөгчийн зарлигаар Э.Оюунболдын цолыг хурааж, Н.Батсуурьт Даян аварга цол хүртээхээр боллоо

Монгол Улсын Ерөнхийлөгч У.Хүрэлсүхийн зарлигаар 2019 оны Үндэсний их баяр наадмын түрүү бөх Э.Оюунболдын аварга цолыг хураахаар болжээ.

Тодруулбал, Шүүхийн шийдвэрийн дагуу Ерөнхийлөгч зарлиг гарган улсын аварга Э.Оюунболдын цолыг хураахаар болсон байна.

2019 оны Улсын баяр наадмын түрүү бөх Э.Оюунболд сэргээш хэрэглэснийг тогтоосон Улсын Дээд шүүхийн 2020 оны арваннэгдүгээр сарын 2-ны өдрийн 398 дугаар тогтоолоор түүний Улсын аварга цолыг хүчингүй болгосон юм.

Уг шийдвэр биелсээр Үндэсний баяр наадмын тухай хуульд заасны дагуу Э.Оюунболдод есийн даваанд өвдөг шороодсон Увс аймгийн Ховд сумын харьяат, “Химон Констракшн” ХХК, “Увс нуур” бөхийн дэвжээний бөх Монгол Улсын Аварга Н.Батсуурь Монгол Улсын даян аварга цолыг хүртэж байна.

Мөн Э.Оюунболдод наймын даваанд унасан Улсын арслан Содномдорж “Үлэмж бадрах” чимэг, долоогийн даваанд унасан Д.Анар “Улсын заан”, 6-ын даваанд унасан Б.Цэдэнсодном “Улсын харцага”, тав даваанд унасан Н.Мустафа “Улсын начин” цолыг тус тус хүртжээ.

Мөн өнгөрсөн оны Үндэсний баяр наадмаар нэр бүхий бөхчүүдээс сэргээшийн төрлийн бодис илэрч тус бөхчүүд хүлээн зөвшөөрсөн. Иймд Үндэсний баяр наадмын тухай хуульд заасны дагуу М.Бадарч “Улсын гарьд”, Ц.Одбаяр “Улсын заан”, Ц.Мөнхбаяр, Ш.Пүрэвгарьд, Б.Орхонбаяр нар “Улсын харцага”, Б.Суманчулуун, Ц.Сандагдорж нарт “Улсын начин” цолыг тус тус хүртэж байна.

Categories
мэдээ нийгэм цаг-үе

ЭМД: Өрхийн эрүүл мэндийн төвүүдэд нэхэмжлэхэд үндэслэн 70 хувийн санхүүжилт олгожээ

ЭМД-ын сангаас нийслэлийн Өрхийн эрүүл мэндийн төвүүдэд “Ковид-19”-ийн гэрээр үзүүлэх тусламж, үйлчилгээний наймдугаар сарын нэхэмжлэхэд үндэслэн 70 хувиар олгосон урьдчилгаа санхүүжилтийн мэдээллийг танилцуулж байна.

Зургийн тодорхойлолт алга байна.

Зургийн тодорхойлолт алга байна.

Categories
мэдээ эдийн-засаг

ҮСХ: Засгийн газрын өр оны эхний хагас жилд 4.5 хувиар өсөж, 27.1 их наяд төгрөг болов

Засгийн газрын нийт өр оны эхний хагас жилд 4.5 хувиар өсөж, 27.1 их наяд төгрөг болсон байна. Нийт өрийн хэмжээ өсөхөд гадаад өр өмнөх оны мөн үеэс 7.2 хувиар өссөн нь нөлөөлжээ.

Харин дотоод өр болон Засгийн газрын өрийн баталгаа мөн Барих-Шилжүүлэх концесс аль аль нь буурсан байна. Засгийн газрын нийт өрийн дийлэнх хэсэг буюу 89.8 хувийг нь гадаад өр эзэлж байгаа аж. Оны эхний хагас жилийн байдлаар Засгийн газрын гадаад өр 24.3 их наяд төгрөг хүрсэн байна.

Улсын хэмжээнд гадаад өр 33 тэрбум ам.доллар болж, өмнөх оны мөн үеэс долоон хувиар өсөөд байгаа юм. Үүнээс 36.4 хувь буюу 12 тэрбум ам.доллар нь шууд хөрөнгө оруулалт, компани хоорондын зээллэг байна.

Тайлант хугацаанд Засгийн газар үндсэн төлбөрт 893.0 тэрбум төгрөг, хүүгийн төлбөрт 342.8 тэрбум төгрөг төлжээ.

Ерөнхийдөө ирэх оны эцэс хүртэл төлөгдөх томоохон гадаад валютын өр төлбөр байхгүй байгаа ч Засгийн газар 2022 оны 12 дугаар сард төлөгдөх “Чингис”, 2023 онд төлөгдөх “Гэрэгэ” бондын тодорхой хэсгийг дахин санхүүжүүлж, нэг тэрбум ам.долларын “Century” бондыг гаргаад байна.

Энэхүү бондыг гаргаснаар ирэх жилүүдэд төлөгдөх байсан өндөр хүүтэй бондуудыг бага хүүтэй бондоор сольж, эргэн төлөх хугацааг хойшлуулсан гэж Сангийн яам мэдээлж байсан юм.

“Century” төслийн хүрээнд тус бүр 500 сая ам.долларын 6, 10 жилийн хугацаатай хоёр бонд арилжиж байна.

Эх сурвалж: BloombergTV

Categories
мэдээ нийгэм

Нийслэлийн Үйлчилгээний нэгдсэн төв төрийн 451 үйлчилгээг үзүүлж байна

Нийслэлийн Үйлчилгээний нэгдсэн төв төрийн 47 байгууллагын 451 төрлийн үйлчилгээг иргэн, хуулийн этгээдэд үзүүлж байна.

Үүнээс хоёр байгууллагын есөн төрлийн тусгай зөвшөөрлийн үйлчилгээг үзүүлдэг. Тодруулбал, Улаанбаатар хотын Захирагчийн ажлын албаны тав, Нийслэлийн Эрүүл мэндийн газрын дөрвөн үйлчилгээг үзүүлж байгаа юм. Мөн дөрвөн байгууллагын 15 төрлийн үйлчилгээнд зөвшөөрөл олгодог. Эдгээрт Нийслэлийн Соёл, урлагийн газрын тав, Нийслэлийн Аялал жуулчлалын газрын дөрөв, Нийслэлийн Байгаль орчны газрын гурав, Хот байгуулалт, хөгжлийн газрын гурван үйлчилгээ багтаж байгаа юм.

Мөн Улаанбаатар хотын Захирагчийн ажлын албаны согтууруулах ундаа худалдах, түүгээр үйлчлэх тусгай зөвшөөрөл болон Нийслэлийн Аялал жуулчлалын газар, Нийслэлийн Соёл урлагийн газраас үзүүлдэг зөвшөөрөл олгодог үйлчилгээг төрийн үйлчилгээний цахим систем /www.e-mongolia.mn/-ээр 2020 оны арваннэгдүгээр сараас эхлэн үзүүлж байна. Тусгай зөвшөөрөл болон зөвшөөрлийн үйлчилгээ нь шат дамжлага ихтэй, олон төрлийн баримт шаардлагатай байдаг. Иймээс эдгээр үйлчилгээний шат дамжлага, баримт бичгийн тоог багасгах, цахимжуулах арга хэмжээнүүдийг холбогдох байгууллагуудтай хамтран шат дараатай хийж, хэрэгжүүлж байгаа юм.

Түүнчлэн Нийслэлийн Лавлагаа, мэдээллийн 1800-1200 тусгай дугаар нь иргэдэд нийслэлийн нутгийн захиргааны байгууллагуудаас иргэн, хуулийн этгээдэд үзүүлж буй төрийн үйлчилгээ, үйл ажиллагаа болон “Ковид-19”-ийн цар тахлаас урьдчилан сэргийлэх, иргэдийн эрүүл мэндийг хамгаалахтай холбоотой мэдээ, мэдээллийг 24 цагийн турш тасралтгүй өгч, шуурхай үйлчилгээ үзүүлэн ажиллаж байна. Есдүгээр сарын 9-15-ны хооронд дээрх тусгай дугаарт нийт 1637 иргэн хандаж мэдээ, мэдээлэл авлаа. Нийт дуудлагын хүлээлгийн дундаж хугацаа 34 секунд, иргэнтэй ярьсан дундаж хугацаа 2.25 минут байна. Мөн тус хугацаанд “Нийслэлийн мэдээ” фэйсбүүк хуудасны чатботод 38 иргэн хандаж, 15 иргэн автомат хариулагчаас, 23 иргэн оператор ажилтантай холбогдон мэдээлэл авлаа. Дархлаажуулалтын явуулын болон суурин цэгийн байршлыг 1800-1200 тусгай дугаарын утас, “Нийслэлийн мэдээ” фэйсбүүк хуудас болон тус хуудасны чатботоос авах боломжтой.

Categories
мэдээ нийгэм

Сүхбаатарын талбайд “Үндэсний номын баяр” болж байна

30 дахь удаагийн номын баяр өнөөдөр Сүхбаатарын талбайд эхэллээ. Есдүгээр сарын 19-нийг дуустал Төв талбайд болох уг номын баярт зохиолч, яруу найрагчид, хэвлэн нийтлэгчид, ном эрдмийг сурталчилж түгээн дэлгэрүүлдэг олон байгууллага, уншигчид нэгэн дор цугладаг билээ.

УИХ-аас Номын баяр зохион байгуулах арга хэмжээг албан ёсоор хуульчилж Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулсан. Хуульд зааснаар “Үндэсний бичиг соёл, номын өдрүүд”-ийг 5, 9-р сарын гурав дахь долоо хоногийн бямба, ням гарагт зохион байгуулж байхаар болсон юм.

Categories
мэдээ нийгэм цаг-үе

Маргааш “Хүрээ цам 2021” шашин, соёлын үйл ажиллагаа болно

Монголын Бурхан Шашинтны Төв Гандантэгчэнлин хийдээс жил бүр хурж ирсэн “Хүрээ цам 2021” шашин, соёлын үйл ажиллагаа маргааш буюу есдүгээр сарын 18-нд “Батцагаан” дуганы өмнөх талбайд болно.

Цам харайх ёслолын үйл ажиллагааг 2015 оноос хойш тасралтгүй зохион байгуулж иржээ. Цам хайрахаас өмнө балин тахил, цамын баг, хувцас хэрэглэлийг адислах болон “Жахар цам”-ын хурал ном эхэлж хурдаг.

Дашрамд дурдахад, Цам цамнах үйл нь VIII зууны үед Төвд орноо дэлгэрсэн байдаг. Монгол орноо анхны цамыг IV Богд Жавзандамба хутагтын тааллаар 1811 онд Их хүрээнд цамнасан аж. Олноо “Жахар цам” хэмээн алдаршсан “Хүрээ цам” нь Монгол түмнийг ивээгч Очирваань бурхны дүр, Цагаан өвгөн, Улаанбаатар хотын дөрвөн уулын эздийн дүр гардгаараа онцлогтой юм.

No description available.

Categories
мэдээ улс-төр

Нөхөн сонгуулийн сонгогчдын нэрийн жагсаалтыг цахим хуудастаа байршуулжээ

УИХ-ын 18, 28 дугаар тойргийн нөхөн сонгууль ирэх аравдугаар сарын 10-нд болно.

Монгол Улсын Их Хурлын сонгуулийн тухай хуулийн 21 дүгээр зүйлийн 21.2 дахь хэсэгт “Улсын бүртгэлийн асуудал эрхэлсэн төрийн захиргааны байгууллага сонгогчдын нэрийн жагсаалтыг ээлжит бус, нөхөн сонгууль товлон зарласнаас хойш 50 хоногийн дараагаас эхлэн сонгууль дуустал өөрийн цахим хуудаст байршуулна” гэж заасны дагуу Монгол Улсын Их Хурлын сонгуулийн 18, 28 дугаар тойрогт хамаарах сонгогчдын нэрийн жагсаалтыг шалгах холбоосыг өөрийн цахим хуудсанд байршууллаа.

Та election.burtgel.gov.mn холбоосоор нэвтэрч өөрийн санал өгөх тойргоо сонгон, регистрийн дугаараа оруулж өөрт холбогдох мэдээллээ шалган баталгаажуулна. Хэрэв таны мэдээлэл зөрүүтэй бол Улсын бүртгэлийн нэгдсэн лавлах утас 1800-1890 болон Сонгинохайрхан дүүрэг дэх Улсын бүртгэлийн хэлтсийн 7722-1890, Хэнтий аймаг дахь Улсын бүртгэлийн хэлтсийн 7056-2079 дугаарт тус тус холбогдож лавлана уу.

Categories
мэдээ нийгэм цаг-үе

Төр, нийгмийн нэрт зүтгэлтэн, маршал Ю.Цэдэнбалын хөшөөнд цэцэг өргөж, хүндэтгэл үзүүллээ

Монгол Улсын төр, нийгэм, цэргийн нэрт зүтгэлтэн, маршал Юмжаагийн Цэдэнбалын мэндэлсний 105 жилийн ой өнөөдөр тохиож байна.

Монгол Улсын Ерөнхий сайд Л.Оюун-Эрдэнэ, УИХ-ын дэд дарга Т.Аюурсайхан, Ерөнхийлөгчийн Тамгын газрын дарга Я.Содбаатар, Нийслэлийн Засаг дарга Д.Сумъяабазар, МАН-ын Ерөнхий нарийн бичгийн дарга Д.Амарбаясгалан болон Ю.Цэдэнбал агсны төрөл төрөгсөд бусад албаны хүмүүсийн хамт Ю.Цэдэнбалын хөшөөнд цэцэг өргөж, хүндэтгэл үзүүлж, үг хэллээ.

Ерөнхий сайд Л.Оюун-Эрдэнэ “Түүхэн ойг тэмдэглэхийн утга учир нь өнгөрсөн түүхээ эгнэгт үл умартаж, өрнөх ирээдүйгээ бүтээхийн төлөө өнөөдөр хичээнгүйлэн зүтгэхэд оршдог. Ю.Цэдэнбал нам, улсыг хагас зуун жил тэргүүлэхдээ хүйтэн дайны хүнд бэрх цаг үед төрийнхөө тусгаар тогтнолыг бэхжүүлэн хадгалж чадсан төдийгүй эдийн засгийн тусгаар тогтнолын үндэс суурийг хөгжүүлсэн билээ.

Ю.Цэдэнбал Монгол Улсыг НҮБ-д элсүүлэх талаар тууштай зүтгэл гаргаж, НҮБ-ын Аюулгүйн Зөвлөлд Монголын төрийн удирдагчдаас анх удаа үг хэлсэн төдийгүй 16 жил үргэлжилсэн ухаалаг гадаад бодлогын үр дүнд 1961 онд Монгол Улс НҮБ-д элсч, үе үеийн эх орончдын мөрөөдөл болсон тусгаар тогтнолоо олон улсад хүлээн зөвшөөрүүлж чаджээ. Нэгэн зууны тэртээ хатан зоригт эх орончдын байгуулсан Монгол Ардын Намыг Ю.Цэдэнбал дөч гаруй жил удирдахдаа цаг үеийнхээ сорилт бэрхшээлийг хамтын зүтгэл, холч ухаанаар даван туулж, хөгжин мандсан Монгол Улсыг үлдээсэн түүхтэй. Түүний удирдлагын он жилүүд буюу 1940-1984 онд аж үйлдвэрийн бүтээгдэхүүний хэмжээ 50 дахин, цахилгаан эрчим хүчний үйлдвэрлэл 244 дахин, 1976-1986 онд уулын үйлдвэрийн бүтээгдэхүүн 18.7 дахин өсчээ. Аж үйлдвэржүүлэх бодлогын үр дүнд Эрдэнэт, Дархан зэрэг үйлдвэрийн цогцолбор хотууд баригдаж, олон арван үйлдвэрүүд ашиглалтад орж, хөгжин цэцэглэсэн Монгол Улсыг цогцлоосон билээ” гэв.

Харин “Эрдэм судлалын төв-Ю.Цэдэнбалын Академи”-ийн Ерөнхийлөгч дэд Ерөнхийлөгч Т.Жаргалсайхан “Академи үүсгэн байгуулагдсан цагаасаа хойш Ю.Цэдэнбалын улс орноо хөгжүүлэхэд байгуулсан гавьяа зүтгэл, ажил амьдралыг тусган харуулсан цуврал 10 боть ном, судалгааны чиглэлээр 58 ном, 70 өгүүлэл, 8 удаагийн эрдэм шинжилгээний хурал, цуврал баримтат кино зэрийг олны хүртээл болгосон. Цаашид үйл ажиллагаагаа эрчимжүүлэн Ю.Цэдэнбалын гэр музей байгуулж залуу хойч үедээ өвлүүлэн үлдээх зорилготой ажиллаж байна” гэв.

Жил бүрийн энэ өдөр Монгол Улсын төр, нийгэм, цэргийн нэрт зүтгэлтэн, маршал Юмжаагийн Цэдэнбалд хүндэтгэл үзүүлдэг уламжлалтай.

Categories
мэдээ нийгэм цаг-үе

Эмнэлэг болон тусгаарлан ажиглах 407 байранд 24239 иргэн байна

Улсын хэмжээнд өнөөдрийн байдлаар эмнэлэг болон тусгаарлан ажиглах 407 байранд 24239 иргэн байна.

Үүнээс нийслэлд 9 тусгаарлах байранд 233, эмнэлгийн 42 байршилд 5966 иргэн байна.

Түүнчлэн 2021 оны есдүгээр сарын 16-ны өдөр эмнэлэг болон тусгаарлах ажиглах байранд 3104 иргэн нэмэгдэж, 2275 иргэн гэрийн ажиглалтад шилжиж, 29 иргэн шилжин эмчлүүлж байна.

Тусгаарлан ажиглах байранд Онцгой, Цагдаа, Эрүүл мэндийн байгууллагын нийт 3303 алба хаагч үүрэг гүйцэтгэж байгаа юм гэж УОК-ын Шуурхай штабаас мэдээллээ.

Categories
мэдээ нийгэм

Өнгөрсөн жил нийслэлд 126 удаа хээрийн түймэр гарч, 59.7 га талбай шатжээ

Самар түүх, аялал зугаалгад гарах, хашааны шар өвсөө шатаах зэргээр санамсаргүй гал тавьдаг шалтгааны улмаас өнгөрсөн жил нийслэлд 126 удаагийн хээрийн түймэр гарч, 59.7 га талбай шатжээ.

Тиймээс”Алдвал галдана” нэртэй ой, хээрийн түймрээс урьдчилан сэргийлэх нөлөөллийн аяныг өнөөдрөөс нэг сарын хугацаанд зохион байгуулахаар болжээ. Тус аяныг Нийслэлийн Байгаль орчны газар, Экологийн цагдаагийн алба, Нийслэлийн гэмт хэргээс урьдчилсан сэргийлэх ажлыг зохицуулах салбар зөвлөлтэй хамтран хэрэгжүүлж байгаа аж.

Нийслэлийн Байгаль орчны газрын дарга М.Нямбаяр: Жил бүр есдүгээр сарын 20-ноос 11 дүгээр сарын 10-ны хооронд хуурайшилт буюу түймрийн аюултай үе гэж үздэг. Энэ үеэр ойн түймэр ихсэх хандлагатай байдаг. Тэр дундаа самар түүх, аялал зугаалга, хашааны шар өвсөө шатаах зэрэг санамсаргүй үйлдлээс ой хээрийн түймэр маш их гардаг. Өнгөрсөн жил таван удаагийн ой хээрийн түймэрт 22 га талбай газар, шар өвсний 275 дуудлагаар 59.7 га газар шатсан байдаг. 2021 оны байдлаар улсын хэмжээнд ой хээрийн 25 дуудлага тохиолдол бүртгэгдсэн. Үүнээс ойн 1765 га, хээрийн 120 мянган га талбай өртсөн. Ойд гал алдсан бол нэг секундийн дотор хоёр метрийн талбай галд өртдөг. Цаашлаад ан амьтан амьдрах орчингүй болно. Иймээс иргэдийг ой хээрийн түймрээс хамтдаа урьдчилан сэргийлэхийг уриалж байна.

НОБГ-ын мэргэжилтэн Г.Нэргүй: Гал түймэр ой хээрийн түймрээс урьдчилан сэргийлэхэд аливаа мэргэжлийн байгууллагаас гадна иргэдийн хамтын ажиллагаа маш чухал. Өнгөрсөн жил ой хээрийн түймэр 48 хувиар буурсан байсан. Иргэд хавар намрын хуурайшилтын үед шар өвсөө шатаадаг. Түүнчлэн самар түүх зэрэг хүний үйл ажиллагаатай холбоотой үйлдлийн улмаас ой хээрийн түймэр гардаг.