Month: September 2021

“Зөв бүхний эхлэл-Зөв хандлагаас” сэдэвт сумдын “Хүүхдийн төлөө зөвлөл”, “Хамтарсан баг”-ийн гишүүдийг чадавхжуулах сургалт, “Хүүхдийн эрхийн хууль зүйн хороо”-ны үйл ажиллагааг сурталчлах ажлыг зохион байгуулж байна. Энэхүү ажлын хүрээнд:

Тус аймгийн Дэлгэр, Эрдэнэ, Чандмань, Бигэр, Халиун, Цээл, Алтай, Бугат, Төгрөг, Шарга сумын “Хамтарсан баг”-ийн гишүүдийг чадавхжуулах сургалтыг зохион байгуулж, “Гэр бүлийн хүчирхийллээс урьдчилан сэргийлэх ажилд инновац нэвтрүүлэх нь” аяны хүрээнд хамтарсан багийн үйл ажиллагаанд мэргэжил арга зүйн дэмжлэг үзүүлж, урьдчилан сэргийлэх ажилд шинэ санал санаачилга дэвшүүлэн, үр дүн гаргаж ажиллахад зөвлөгөө зөвлөмж өгч байгаа ажээ.

Мөн сумдын “Хүүхдийн төлөө зөвлөл”-ийн гишүүдийг чадавхжуулах сургалтыг зохион байгуулж, “Хүүхдийн эрхийн хууль зүйн хороо”-ны үйл ажиллагааг сурталчлан, гэмт хэрэг, хүүхдийн эрхийн зөрчлөөс урьдчилан сэргийлэх ажлыг эрчимжүүлэх үүхэг чиглэл өгч ажиллалаа хэмээн ГБХЗХГ-аас мэдээлэв.

2021 он хэдий Covid-19 цар тахлын нөлөөгөөр Монгол Улсын болоод олон улсын эдийн засагт томоохон шалгуур тавьж байгаа ч, манай улсын хувьд олон салбарын 100-н жилийн ой тохиосон тэмдэглэлт жил болж байна. Харилцаа холбоо, мэдээллийн технологийн салбар үүсч хөгжсөний 100-н жилийн ойн баяр дээр баяр нэмж, 15 жилийн дараа Монгол Улсад үүрэн телефоны хамгийн отгон буюу 5 дахь оператор мэндэлж байна. Тодруулбал, тус салбарын хамгийн том үйл ажиллагаа болох “Digital Nation-2021” экспо дээр үүрэн телефоны 5 дахь оператор ОНДО (Ай Эн Мобайл Нэтворк ХХК) “Телефон яриа” үйлчилгээний тусгай зөвшөөрлийн гэрчилгээгээ Харилцаа холбооны зохицуулах хорооны дарга Г.Чинзоригоос гардан авлаа.

ОНДО (Ай Эн Мобайл Нэтворк ХХК) уламжлал, шинэчлэл хоёрыг хослуулан урагш хөгжих хөгжлийн босгон дээр Харилцаа холбооны зохицуулах хороо, Харилцаа холбоо, мэдээллийн технологийн газраас хэрэгжүүлж буй цахим шилжилтийн бодлогыг дэмжин харилцаа холбооны технологийг бусад салбарын техник технологи, хиймэл оюун ухаантай хослуулан хэрэглэгчиддээ хамгийн бага зардлаар хамгийн хямд, хамгийн дэвшилтэт бүтээгдэхүүн үйлчилгээг хүргэхээр ханцуй шамлан ажилдаа орсон байна. Монгол Улсын ерөнхий сайд Л.Оюун-Эрдэнийн “Алсын Хараа-2050” Монгол Улсын урт хугацааны хөгжлийн бодлого, тэр дундаа Цахим шилжилтийн бодлогыг хэрэгжүүлэх, технологийн бизнес эрхлэгчдийг дэмжих чиг үүргийн хүрээнд амжилттай хийгдэж буй олон шийдлүүдийн нэг илрэл бол ХХЗХ болон ХХМТГ зүгээс 5 дахь оператор Ай Эн Мобайл Нэтворк ХХК-г дэмжиж буй явдал юм.

ОНДО-гийн баг хамт олон интернэтийн хангамж хамгийн бага байдаг захын дүүргүүдээс эхлэн сүлжээгээ нэвтрүүлж, аль хэдийн хэрэглэгчиддээ үйлчилгээгээ хүргээд байгаа бөгөөд энэ жилдээ багтаан Улаанбаатар хотыг бүхэлд нь сүлжээндээ хамруулахаар бүтээн байгуулалтын ажил ид явагдаж байгааг ОНДО-гийн үйл ажиллагаа эрхэлсэн захирал тус үйл явдлын үеэр дурдлаа. Хүртээмж гэдэг нь сүлжээг нэмэхээс гадна хэрэглэгчдэд очих өртөг буурах нь хамгийн том нөлөө юм. Одоогийн байдлаар 174 мянган өрх сүлжээнд холбогдсон байгаа ч, зах зээл дээр байгаа үнэ хүртээмжийн гол тушаа болж буйг ОНДО олж харж байна. ОНДО-гийн залуусын зорилго том, хийх ажил их, явах зам урт байгаа. Тэд харилцаа холбооны салбарт дэвшилтэт орчин үеийн технологи ашиглан Монголынхоо хэрэглэгчдэд дараа үеийн өндөр хурдны хөдөлгөөнт интернэт буюу 5G технологийг удахгүй танилцуулахаар туршилтын ажиллагааг хийж байгаа ба цаашлаад эх орныхоо бусад салбарт болон олон улсад бүтээгдэхүүнээ экспортлох том зорилготойгоор ажиллаж байна.

ОНДО-гийн залуусын зорилго хэрэгжиж эхлэх цагт Монгол Улс хэрэглэгч орон биш бүтээгч орон болох цаг тун ойрхон байна. Манайд аливаа бизнесийн ард хэн байгаа бол гэх ажиг сэжиг их байдаг. Тэгвэл ОНДО-гийн ард хэн нэгэн эрх мэдэлтэн ч юм уу, нөлөө бүхий этгээдүүд байхгүй. Технологи, инновацын салбарын залуусын л нэгдэл юм. Стартап гарааны бизнес эрхлэгч залуус томоохон корпорациудын хийдэг бизнес рүү өөрсдийн бүтээсэн технологиороо хөл тавин, орж буй нь хамгийн чухал үйл явдал юм. Түүнчлэн Засгийн газрын Алсын хараатай уялдаж байгааг дахин тодотгоё.

Улаанбаатар хотын Захирагчийн ажлын албанаас инженерийн хангамж, үйлчилгээний байгууллагууд өвөлжилтийн бэлтгэлээ танилцуулах “Хот өвөлд бэлэн” арга хэмжээг есдүгээр сарын 10-нд зохион байгуулсан. Энэ үеэр хог хаягдал, тээвэрлэлт, зам талбайн цэвэрлэгээ, үйлчилгээ болоод инженерийн хангамжийн 43 байгууллага 2021-2022 оны өвөлжилтийн бэлтгэл ажил, тоног төхөөрөмж, машин техник, хувцас, хэрэглэлийн бэлэн байдлаа иргэд, олон нийтэд танилцуулсан юм. Тэгвэл өнөөдөр Хотын Ерөнхий менежерийн шуурхай зөвлөгөөнөөр тус арга хэмжээнд хамт олноо манлайлан оролцсон аж ахуйн нэгжүүдийг шалгаруулж, шагнал гардуулав.

Нийслэлийн иргэдийн төлөөлөгчдийн хурал /НИТХ/ Тээврийн хэрэгслийг зөөвөрлөн шилжүүлэх, түр саатуулах журамд өөрчлөлт оруулахаар болсон. Тэгвэл тус ажлын хэсгийн бүрэлдэхүүн дараах өөрчлөлтүүдийг оруулахаар санал боловсруулжээ.

НИТХ-ын ажлын хэсгийн ахлагч Б.БАТЦОГТ:

-Одоо мөрдөгдөж буй журмаар зөвхөн иргэн, хувийн хэвшлийн хооронд харилцаа үүсээд байгаа юм. Гэтэл үүнд төрийн байгууллагын зохицуулалт дан ганц зөвхөн журмаар зохицуулагдана гэдэг нь ойлгомжгүй байдлыг үүсгэж байна. Ажлын хэсгийн зүгээс автомашин ачилтын журамд оруулах өөрчлөлтүүдийг боловсруулж байна. Тухайлбал, нэгдүгээр эгнээ болон автомашин зогсоохыг хориглосон байршлуудад автомашинаа байрлуулсан тохиолдолд олон нийтийн байцаагч ажиллана. Ачигч машин ирэхээс өмнө олон нийтийн байцаагч тухайн автомашины жолооч руу мэдэгдэн Зөрчлийн тухай хуулиар торгууль тавина. Тухайн торгууль тавьж буй мөнгө нь төрд төвлөрнө гэсэн үг. Харин тэр хугацаанд жолооч амжиж автомашинаа аваагүй тохиолдолд ачилтын компани ачих ёстой. Эдгээр зохицуулалтуудыг журамд өөрчлөлт болгон оруулахаар санал болгож байгаа юм.

ШӨХТГ-ын дарга Б.БАТ-ЭРДЭНЭ:

-Тээврийн хэрэгслийг зөөж шилжүүлэх, түр саатуулах журмыг Хууль зүй, дотоод хэргийн яамнаас баталсан байдаг. “Ачигч автомашинуудын нэгдсэн холбоо”-ныхонтой уулзаж байхад тус журамд тээврийн хэрэгслийг зөөж шилжүүлэхдээ эзэмшигчид нь мэдэгдэх шаардлагагүй гэж заасан байдаг талаар хэлдэг. Тиймээс чанга яригчаар 2-3 удаа зарлаад ачдаг гэсэн. Бидний зүгээс чанга яригчаар зарласнаас хойш 1-2 минут хүлээх боломж байдаг эсэхийг тодруулахад журамд хугацаа заагаагүй гэх тайлбарыг өгч байгаа. Тэдний зүгээс нэг автомашиныг ачих хугацаа нь хоёр минут болдог гэж хэлж байгаа ч яг гараад хэмжилт хийхэд 30-40 секундэд ачдаг.

Тиймээс үйлчилгээний байгууллагуудын зогсоолыг иргэдэд ашиглуулах саналыг өмнө нь гаргаж байсан, одоо ч гаргаж байна. “Ачигч автомашинуудын нэгдсэн холбоо”-ноос нэг удаад тээврийн хэрэгслийг зөөж шилжүүлэх төлбөр 60 мянган төгрөгийнхөө 10 хувийг нийслэлийн Автозамын санд төвлөрүүлэх санал гаргасан. Нийт ачилтын тоогоор тооцвол жилд 300 сая төгрөгийг нийслэлийн Автозамын санд төвлөрүүлэх тооцоотой байна. Гэхдээ энэ хэмжээний мөнгөөр нэмж авто зогсоол барих боломжгүй. Тэгэхээр хувь хэмжээг нь нэмэх шаардлагатай.

Өнөөдөр Эх дэлхийгээ цэвэрлэх өдөр тохиож байна. Дэлхийн олон улс, хотууд төдийгүй Улаанбаатар хотын тулгамдсан асуудлын нэг нь ил задгай хог хаях болон ангилах юм. Нийслэлд жил бүр бүх нийтийг хамарсан их цэвэрлэгээний 7-8 ажлыг зохион байгуулдаг.

Эх дэлхийгээ цэвэрлэх өдрийг тохиолдуулан НЗДТГ, Улаанбаатар хотын Захирагчийн ажлын алба, Европын Холбооны төлөөлөгчийн газар, Монгол Улс дахь Францын Элчин сайдын яам зэрэг байгууллага хамтран Сэлбэ голын ай сав дагуух хогийг цэвэрлэх сайн дурын арга хэмжээ зохион байгууллаа.

Мэргэжлийн ур чадварыг дээшлүүлэх сорил, сургалт дадлага өнөөдөр /2021.09.18/ эхэллээ

Гал түймэртэй тэмцэх байгууллага үүсч хөгжсөний 100 жилийн ойг угтан нийслэлийн Онцгой байдлын газраас Гал түймэр унтраах, аврах ангийн захирагч, салааны захирагч, аврах ангийн бүлгийн дарга, аврах ажиллагааны зааварлагч нарыг хамруулан сорил, сургалт дадлагыг Баянхошуун дах сургалт дадлагын талбайд зохион байгуулж байна.

Сорил дадлагын нээлтэнд дарга, хурандаа А.Дашням оролцож мэргэжлийн ур чадвараа ахиулах, харилцан туршлага солилцох үйл ажиллагаанд амжилт хүслээ. Сорил, дадлагад бүтцийн нэгжүүдийн нийт 80 гаруй алба хаагч оролцож байна гэж нийслэлийн Онцгой байдлын газраас мэдээллээ.