Month: September 2021

Categories
гадаад мэдээ

НҮБ-ын энхийг сахиулагчдын баруун бүсийн штабт айлчлав

НҮБ-ын Баруун бүсийн ажиллагаа хариуцсан дарга ноён Сэм Мухумур /HOFO/ бригадын генерал Б.Эрдэнэбатыг хүлээн авч уулзжээ.

Тодруулбал, БНӨСУ-д явагдаж буй НҮБ-ын энхийг сахиулах ажиллагааны Жуба бүсийн командлагч, бригадын генерал Б.Эрдэнэбатын удирдсан штабын зарим бүрэлдэхүүн ажиллагааны газар оронтой танилцах, бусад бүсийн хариуцлагын бүс, ажиллагааны онцлогтой танилцан, туршлага судлах зорилгоор ажлын айлчлалуудыг төлөвлөсний дагуу хийж байгаа юм.

Баруун бүсийн командлагч Этиоп Улсын бригадын генерал Mеашо Хагос Сеюум болон түүний штаб зочдыг найрсгаар хүлээн авч ажиллагааны газар орон болон штабын үйл ажиллагааны талаар танилцуулга хийж, ажлын онцлог, дэвшилтэт арга барилын талаар туршлага солилцов. Түүнчлэн НҮБ-ын баазад байрлаж буй Бангладеш Улсын мотобуудлагын батальон, БНХАУ-ын Инженерийн ротын үйл ажиллагаатай танилцсан байна.

Categories
мэдээ нийгэм

Сонсголын болон хэл ярианы бэрхшээлтэй 20 мянга орчим иргэн байна

2017 оны арванхоёрдугаар сарын 19-ны өдөр баталсан НҮБ-ын Ерөнхий Ассемблей Чуулганаар жил бүрийн есдүгээр сарын 23-ны өдрийг “ОЛОН УЛСЫН ДОХИОНЫ ХЭЛНИЙ ӨДӨР” болгохоор албан ёсоор баталсан.

Ингээд бүх гишүүн орнууд, НҮБ-ын системийн холбогдох байгууллагууд, иргэний нийгэм, төрийн бус байгууллага, хувийн хэвшлийг дохионы хэлний талаарх олон нийтийн мэдлэгийг дээшлүүлэх зорилгоор Олон улсын дохионы хэлний өдрийг зохих ёсоор тэмдэглэн өнгөрүүлэхийг уриалсан билээ.

Сонсголгүй Иргэдийн Дэлхийн Холбооны (СИДХ) санаачилгаар Сонсголгүй Иргэдийн Олон Улсын долоо хоногийг анх удаагаа Италийн Ром хотноо 1958 онд тэмдэглэжээ. СИДХ-ны анхны Конгресс есдүгээр сарын сүүлийн долоо хоногт чуулсан ба энэ үед Сонсголгүй иргэдийн олон улсын долоо хоногийг тэмдэглэн өнгөрүүлсэн түүхтэй. Тэр цагаас хойш энэхүү долоо хоногийг олон улсын Сонсголгүй иргэд жил бүр тэмдэглэдэг болсон бөгөөд жил бүрийн есдүгээр сарын сүүлийн долоо хоногт зохион байгуулдаг.

Сонсголгүй иргэдийн олон улсын долоо хоногийн ажлын хүрээнд жагсаал, хэлэлцүүлэг, компанит ажил, үзэсгэлэн, уулзалт зэрэг төрөл бүрийн арга хэмжээ, үйл ажиллагааг зохион байгуулж гэр бүл, үе тэнгийнхэн, төр засгийн байгууллагууд, дохионы хэлний мэргэжлийн хэлмэрчид, Хөгжлийн бэрхшээлтэй иргэдийн байгууллага зэрэг уялдаа холбоотой байгууллага, холбоод, хувь хүн, хамт олны оролцоотойгоор тэмдэглэн өнгөрүүлдэг юм.

Манай улс 2005 оноос хойш жил бүр Олон улсын сонсголгүй иргэдийн эрхийн өдрийг зохион байгуулсаар ирсэн. СИДХ-ноос 2021 онд сонсголгүй иргэдийн долоо хоногийг “ӨӨДЛӨН ДЭВЖСЭН СОНСГОЛГҮЙ ОЛОН НИЙТИЙГ АЛДАРШУУЛЪЯ” уриатайгаар дэлхий дахинд тэмдэглэн өнгөрүүлж байна.

Энэхүү аяны хүрээнд Монгол Улсын Сонсголгүй Иргэдийн Үндэсний Холбоо болон бусад төрийн байгууллагууд төрөл бүрийн цуврал арга хэмжээ, нөлөөллийн компанит ажил зохион байгуулж буй юм. Энэ хүрээнд МУСИҮХолбоо болон Сонсголгүй иргэдийн ТББ-уудтай хамтарч Олон Улсын Дохионы хэлний өдрийг өнөөдөр Сүхбаатарын талбайд тэмдэглэн өнгөрүүлнэ.

Монгол Улсад сонсголын бэрхшээлтэй 8,300 гаруй иргэн, хэл ярианы бэрхшээлтэй 12,671 иргэн байдаг. Эдүгээ манай улсад дөнгөж 20 шахам монгол дохионы хэлний хэлмэрч байгаа бөгөөд Сонсголгүй иргэдийн иргэний нийгмийн байгуулгуудаас гадна Монгол Улсын хэмжээнд монгол дохионы хэлний хэлмэрч бэлтгэж байгаа сургууль байхгүй байна.

МОНГОЛ ДОХИОНЫ ХЭЛ БОЛ АЛБАН ЁСНЫ ХЭЛ МӨН гэж Хөгжлийн бэрхшээлтэй хүний эрхийн хуулийн 12-р бүлгийн 1-р зүйлд заасны дагуу бид ОЛОН УЛСЫН ДОХИОНЫ ХЭЛНИЙ ӨДРӨӨР эх хэлээрээ бахархах, баярлахын сацуу Монгол дохионы хэлний хуультай болох санаачилга дэвшүүлж байгаа ажээ. Монгол дохионы хэлний хуультай болсноор монгол дохионы хэлний хэлмэрч, орчуулагчдын мэргэжлийн сургуулиудаар бэлтгэх, улмаар сонсголгүй иргэдийн мэдээллийн хүртээмж сайжрах үндсэн нөхцөл бүрдэх юм байна.

Categories
мэдээ нийгэм

Хөдөлмөр, нийгмийн хамгааллын салбарын статистик мэдээлэлтэй холбоотой хэлэлцүүлэг зохион байгууллаа

Үндэсний статистикийн хорооноос хэрэгжүүлж буй “Төрийн их өгөгдөл төсөл”-ийн хүрээнд Монгол Улсын хэмжээнд нийгмийн статистикийн мэдээллийн өнөөгийн байдлыг үнэлэх, цаашдын хэрэгцээ шаардлагыг тодорхойлох, бодлого, төлөвлөлтөд шаардлагатай нэмэлт мэдээллийг тооцон гаргахад их өгөгдлийг хэрхэн ашиглах асуудлаар хэлэлцүүлэг зохион байгууллаа.

Энэ үеэр

Хэлэлцүүлэгт Хөдөлмөр, нийгмийн хамгааллын яам, харьяа агентлагийн удирдлага, албан хаагчид, Үндэсний статистикийн хорооны дэд дарга Д.Лхамсүрэн болон холбогдох албаныхан оролцлоо.

“Хөдөлмөр, нийгмийн хамгааллын салбарын статистик, мэдээллийн сангийн өнөөгийн байдал, тулгамдаж буй асуудал, цаашид авч хэрэгжүүлэх арга хэмжээ” сэдвээр ХНХЯ-ны Мэдээллийн технологи, статистикийн хэлтсийн дарга Б.Даваа-Эрдэнэ, “Нийгмийн хамгааллын статистикийн өнөөгийн байдал” сэдвээр ҮСХ-ны Нийгмийн статистикийн газрын дарга А.Амарбал, “Төрийн их өгөгдлийн төслийн танилцуулга” сэдвээр ҮСХ-ны Тооллого, өгөгдлийн шинжилгээний газрын даргын үүргийг түр орлон гүйцэтгэгч Н.Өлзийханд мэдээлэл хийв.

Тус хэлэлцүүлгээр хөдөлмөр, нийгмийн хамгааллын салбарын албан хаагчид статистик мэдээлэл, мэдээллийн сангийн бүтэц, зохион байгуулалт, тогтолцооны талаар нэгдсэн ойлголтод хүрч, хариуцсан асуудлын хүрээнд санал, бодлоо илэрхийлж, харилцан туршлага солилцлоо.

Энэ арга хэмжээ нь салбарын мэдээллийн сангуудын статистик мэдээллийн уялдаа холбоог сайжруулах, мэдээллийг нэгтгэх, бодлого, хөтөлбөр боловсруулахад ашиглах үйл ажиллагааг боловсронгуй болгох зэргээр салбарын статистик мэдээллийг шинэ түвшинд гаргаж хөгжүүлэхэд чухал ач холбогдолтой юм хэмээн Хөдөлмөр, нийгмийн хамгааллын яамнаас мэдээллээ.

Categories
мэдээ улс-төр

Ерөнхийлөгч У.Хүрэлсүх БНСВУ-ын Ерөнхийлөгчтэй уулзав

Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 76 дугаар чуулганд оролцох үеэрээ БНСВУ-ын Ерөнхийлөгч Нгуен Суан Фуктай уулзлаа.

Уламжлалт найрсаг харилцаа, хамтын ажиллагаа өргөжин хөгжиж байгаад сэтгэл хангалуун байгаагаа Ерөнхийлөгч У.Хүрэлсүх хэлэв. Цаашид улс төрийн яриа хэлэлцээг идэвхжүүлж, хамтын ажиллагааны цар хүрээг бэхжүүлэхийн төлөө байгаагаа илэрхийлэв.

2016 онд Улаанбаатар хотноо болсон АСЕМ-ийн дээд түвшний 11 дүгээр уулзалтын үеэр БНСВУ-ын Ерөнхий сайдын хувиар албан ёсны айлчлал хийсэн нь харилцааг өргөжүүлэн хөгжүүлэхэд чухал түлхэц болсныг хэлэв.

Дайны хүнд хэцүү цагт Монгол Улсын үзүүлж байсан тусламж, дэмжлэгийг сайнаар дурсаж явдаг, ахан дүүсийн харилцаатай улсууд гэдгийг БНСВУ-ын Ерөнхийлөгч Нгуен Суан Фук тэмдэглэв.

Өмнөд Хятадын тэнгис дэх маргааны асуудлаар дүрэмд суурилсан зохицуулалт, энхийн шугамаар шийдэх шийдлийг эрхэмлэдэг гэдгээ хэлээд, энэ чиглэлээр Монгол Улс байр сууриа илэрхийлж байхыг хүсэв.

Уулзалтын үеэр худалдаа, хөрөнгө оруулалтыг нэмэгдүүлэх, тээврийн нөхцөлийг сайжруулах болон хүнс, хөдөө аж ахуй, хөнгөн үйлдвэр, уул уурхай, аж үйлдвэрийн салбарт хамтрах боломжийн талаар санал солилцлоо.

Categories
амьдралын-өнгө мэдээ

Хөвсгөл нуурт живсэн автомашин, техникийн байршлыг тогтоож байна

Онцгой байдлын ерөнхий газраас ОХУ-ын Байгалийн эрэн хайх, аврах отрядтай хамтран Хөвсгөл нуурт зохион байгуулж байгаа дадлага сургалт живсэн техник хэрэгслийг илрүүлэх техникийн сургалтаар үргэлжлэн явагдаж байна.

Сургалтад хамрагдаж байгаа хоёр улсын алба хаагчид Хөвсгөл нуурт хамтарсан гүний шумбалт хийж, тусгай зориулалтын багаж ашиглан нуурын ёроолд живсэн автомашин техникийн байршлыг тогтоож байгаа юм.

Сургалт дадлага энэ сарын 27-ныг хүртэл үргэлжилнэ гэж Онцгой Байдлын Ерөнхий Газраас мэдээллээ.

Categories
мэдээ нийгэм

Ковидын халдвар авсан 5286 хүн эдгэрч, эмнэлгээс гарчээ

Сүүлийн 24 цагт коронавируст халдварын 3361 тохиолдол бүртгэгдэж, 5286 хүн эдгэжээ. Халдвар аваад эмнэлэгт болон гэртээ тусгаарлагдан эмчлүүлж байсан эдгээр иргэд ийнхүү хяналтаас гарч байна.

Харин өнөөдрийн байдлаар эмчлүүлж байгаа иргэдийн биеийн байдал:

  • Хөнгөн – 12.702
  • Хүндэвтэр – 7004
  • Хүнд – 2103
  • Маш хүнд – 395 хүн байна.
Categories
мэдээ нийгэм цаг-үе

Өнөө шөнө тариалангын бүс нутгаар хөрсөн дээр 0-5 хэм хүрч, цочир хүйтэрнэ

Дохио!!! Цаг агаарын аюултай үзэгдлээс сэрэмжлүүлэх мэдээ: Өнөө шөнө Хэнтий, Дорнодын хойд хэсгийн газар тариалангын бүс нутгаар хөрсөн дээр 0-5 хэм хүрч цочир хүйтэрнэ.

Малч­ид, иргэд, хадланчид, тариаланчдын анхааралд: Маргааш өдөртөө баруун аймгуудын нутгийн зарим газраар хүчтэй салхи шуургатай байхыг анхааруулж байна.

2021 оны 09 сарын 23-ны 20 цагаас 09 сарын 24-ний 20 цаг хүртэлх цаг агаарын урьдчилсан мэдээ

Хур тунадас: Ихэнх нутгаар үүлшинэ. Шөнөдөө говийн аймгуудын нутгийн зүүн, зүүн аймгуудын нутгийн өмнөд хэсгээр, өдөртөө баруун аймгуудын нутгийн баруун, төв, говийн аймгуудын нутгийн зүүн хэсгээр, зүүн аймгуудын нутгийн зарим газраар бороо орно.

Салхи: Шөнөдөө нутгийн зүүн хэсгээр баруун хойноос, бусад нутгаар баруун өмнөөс, өдөртөө ихэнх нутгаар баруун өмнөөс секундэд 6-11 метр, баруун аймгуудын нутгийн зарим газраар секундэд түр зуур 18-20 метр хүрч ширүүсэж шороон шуурга шуурна.

Агаарын температур: Шөнөдөө Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө 7-12 хэм хүйтэн, говийн бүс нутгийн өмнөд хэсэг, Халх голын хөндийгөөр 9-14 хэм, Туул Хэрлэн голын хөндий, Дарьгангын тал нутгаар 2-7 хэм дулаан, бусад нутгаар 2 хэм хүйтнээс 3 хэм дулаан, хөрсөн дээр цочир хүйтэрнэ, өдөртөө Монгол-Алтайн уулархаг нутгаар 5-10 хэм, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр 11-16 хэм, говийн бүс нутгийн өмнөд хэсэг, Дарьгангын тал нутгаар 21-26 хэм, бусад нутгаар 16-21 хэм дулаан байна.

2021 оны 09 дүгээр сарын 25-наас 09 дүгээр сарын 29-нийг хүртэлх цаг агаарын урьдчилсан төлөв

25-нд баруун болон төвийн аймгуудын ихэнх нутаг, зүүн аймгуудын нутгийн баруун хэсгээр, 26-нд төв болон зүүн аймгуудын нутгийн хойд хэсгээр хур тунадас, 27-нд баруун аймгуудын нутгийн хойд, төвийн аймгуудын нутгийн баруун хойд хэсгээр, 28-нд баруун болон төвийн аймгуудын нутгийн зарим газраар бага зэргийн бороо, уулархаг нутгаар нойтон цас орно. Салхи 25-нд ихэнх нутгаар секундэд түр зуур 18-20 метр хүрч ширүүсэж шороон шуурга, 26-28-нд нутгийн зарим газраар секундэд 14-16 метр хүрч ширүүснэ. 25-наас нутгийн баруун хэсгээр цаашдаа нутгийн хойд хэсгээр сэрүүсэж Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Завхан голын эх, Идэр, Тэс голын хөндийгөөр шөнөдөө 7-12 хэм хүйтэн, өдөртөө 9-14 хэм, говийн бүс нутгийн өмнөд хэсгээр шөнөдөө 9-14 хэм, өдөртөө 22-27 хэм дулаан, бусад нутгаар шөнөдөө 2 хэм хүйтнээс 3 хэм дулаан, өдөртөө 13-18 хэм дулаан байна.

Categories
мэдээ нийгэм цаг-үе

“Роснефть” компаниас энэ сард 1500 тонн АИ-92 шатахуун авчрахаар болжээ

ОХУ манай улсад сард хамгийн багадаа 28 мянган тонн шатахуун нийлүүлэх гэрээтэй ч тус улсын дотоодын нөхцөл байдал, цар тахлаас үүдэн энэ сард 17 мянган тонныг л нийлүүлэх боломжтой гэж наймдугаар сард мэдэгдсэн аж.

Иймээс манай улс БНХАУ-аас шатахуун импортлох ажлыг эхэлж, наймдугаар сараас АИ-95 болон АИ-98 автобензин авч эхэлсэн бөгөөд 1037 вагон АИ-92 автобензин авахаар шатахуун импортлогч компаниуд мөнгөө төлж, захиалгаа хийн, вагоны кодоо өгсөн ч тээвэрлэлт асуудалтай байгаа юм.

Үүссэн нөхцөл байдлыг шийдэх үүднээс Монголын шатахуун импортлогч компаниуд, УУХҮЯ-ны төлөөлөл өнөөдөр ОХУ-ын “Роснефть” компанийн удирдлагатай уулзалт хийжээ.

Уулзалтын үеэр энэ сард 1500 тонн АИ-92 бензин, аравдугаар сард 44 мянган тонн АИ-92 бензин, есдүгээр сард ачигдаагүй байсан 10 мянган тонн АИ-92 шатахуун авахаар боллоо гэж “Петровис”-ээс мэдээллээ.

7 хүн, сууж буй хүмүүс, зогсож буй хүмүүс болон дотор гэх мэтийн зураг байж болно

Categories
мэдээ спорт

Залуучуудын ДАШТ-ий медальт бөхчүүдэд мөнгөн шагнал олгоно

ОУОХ-ны ивээл дор зохион байгуулагддаг дэлхийн наадам болон тив дэлхийн тэмцээнд амжилттай оролцож медаль хүртсэн тамирчин түүний дасгалжуулагчийг шагнаж урамшуулж мөнгөн шагнал олгодог.

Үүний дагуу өнгөрсөн наймдугаар сард ОХУ-ын Уфа хотод болсон залуучуудын ДАШТ-ий мөнгөн медальт Б.Энхзул, хүрэл медальт М.Мөнхгэрэл болон тэдний дасгалжуулагч Т.Сүхбаатар, П.Чулуунбаатар нарт нэг удаагийн мөнгөн шагнал олгохоор болсныг Монголын чөлөөт бөхийн холбоо мэдээллээ.

5 хүн, зогсож буй хүмүүс болон "ALROSA DIAMONDS TaiShan UWW ORG WRESLING UNITED WORLD WRESTLING UWW ORG WRESTLING JUNIOR WORLD CHAMPIONSHIPS ALROSA TaiShan ORLD LING UWW.ORG JUNIOR WORLD CHAMPIONSHIPS S UNITED WORLD WRESTLING JUNIO CHA IUNIOR NORLD ሀfገ 2021" гэсэн бичвэр гэх мэтийн зураг байж болно

Categories
мэдээ спорт

Ёкозүна Тэрүнофүжи Г.Ган-Эрдэнэ 11 даваатай башёг тэргүүлж байна

Токио хотноо үргэлжилж байгаа сумо бөхийн намрын тэмцээн буюу Аки башёгийн 12 дахь өдрийн барилдаанд 73 дахь Их аварга Тэрүнофүжи Г.Ган-Эрдэнэ, Сэкиваке Мэйсейтэй барилдаж, түүнд шитатэнагe мэхээр унаж, 10 даваа, 2 унаатай боллоо.

Аки башёгийн 11 дэх өдөр Кирибаяама /М-2/ Б.Лхагвасүрэн, Окиноүми/М-8/-тай хүч үзэж, түүнд уватэнагe мэхээр унаж, 7 даваа, 5 унаатай болов

Хошёорюү С.Бямбасүрэн /М-1/, Дайэйшо /М-4/-той учраа таарч барилдан, түүнд ошидаши мэхээр унаснаар 3 даваа, 7 унаатай /тэр гэмтлийн улмаас 2 өдөр өнжсөн/ боллоо. Комүсүби Ичиножёо /М-2/ А.Ичинноров, Окэки Шодай нар өнөөдөр таарч барилдан Ичиножёо хатакикоми мэхээр давснаар 6 даваа, 6 унаатай башёг үргэлжлүүлж байна.

Тамаваши /М-4/Б.Мөнх-Оргил энэ өдөр Комүсүби Такаясү-тэй таарсан боловч, тэр өчигдөр гэмтэл авсан учраас өнжиж, Тамаваши 5 даваа, 7 унаатай башёг үргэлжлүүлж байна.

Харин энэ башёд 2 даваатай яваа Чёошома /М-5/ Г.Мөнхсайхан, Вакатакакаге /М-3/-тэй барилдан, түүнд ошидаши мэхээр унаснаар 3 даваа, 9 унаатай боллоо.

Аки башёгийн 12 дахь өдрийн байдлаар 10 даваатай шинэ Их аварга Тэрүнофүжи Г.Ган-Эрдэнэ энэ башёг ганцаараа тэргүүлж байна. Харин Их аваргын араас Миёогирюү, Окиноүми нар 3 унаатай нэхэж явна.