Month: September 2021

Categories
мэдээ эдийн-засаг

Иргэдийн зээлийн өрийн үлдэгдэл 940 тэрбумаар нэмэгджээ

Үндэсний статистикийн хорооноос мэдээлснээр, аж ахуйн нэгж, байгууллага, иргэдэд олгосон нийт зээлийн өрийн үлдэгдэл энэ оны наймдугаар сарын эцэст 19.9 их наяд төгрөг болжээ. Энэ нь өмнөх сарынхаас 426.9 (2.2 хувь) тэрбум, өмнөх оны мөн үеийнхээс 2.5 (14.4 хувь) их наяд төгрөгөөр нэмэгдсэн үзүүлэлт аж. Нийт зээлийн өрийн үлдэгдлийн 10.1 (50.6 хувь) их наяд төгрөг нь иргэдийнх байна.

Хэвийн зээлийн өрийн үлдэгдэл өнгөрсөн сарын эцэст 16.7 их наяд төгрөг болж, өмнөх сарынхаас 422.6 (2.6 хувь) тэрбум, өмнөх оны мөн үеийнхээс 2.4 (16.8 хувь) их наяд төгрөгөөр нэмэгджээ. Хэвийн зээлийн өрийн үлдэгдэл нийт зээлийн өрийн үлдэгдлийн 83.9 хувийг эзэлж, өмнөх оны мөн үеийнхээс 1.8 нэгж хувиар нэмэгдсэн байна.

Хугацаа хэтэрсэн зээлийн өрийн үлдэгдэл энэ оны наймдугаар сарын эцэст 1.2 их наяд төгрөг болж, өмнөх сарынхаас 3.8 (0.3 хувь) тэрбум төгрөгөөр багасч, өмнөх оны мөн үеийнхээс 68.2 (6 хувь) тэрбум төгрөгөөр нэмэгджээ. Хугацаа хэтэрсэн зээлийн өрийн үлдэгдэл нийт зээлийн өрийн үлдэгдлийн 6.1 хувийг эзэлж, өмнөх оны мөн үеийнхээс 0.5 нэгж хувиар багассан байна.

Банкны системийн хэмжээгээр чанаргүй зээл өнгөрсөн сарын эцэст 2 их наяд төгрөгт хүрч, өмнөх сарынхаас 8 (0.4 хувь) тэрбум, өмнөх оны мөн үеийнхээс 26 (1.3 хувь) тэрбум төгрөгөөр нэмэгдэв. Чанаргүй зээл нийт зээлийн өрийн үлдэгдлийн 10 хувийг эзэлж, өмнөх оны мөн үеийнхээс 1.3 нэгж хувиар багасчээ.

Арилжааны банкуудаас иргэдэд олгосон зээлийн өрийн үлдэгдэл энэ оны долдугаар сарын эцэст 9.5 их наяд төгрөг болж, өмнөх сарынхаас 160.9 (1.7 хувь) тэрбум, өмнөх оны мөн үеийнхээс 940.8 (11 хувь) тэрбум төгрөгөөр нэмэгдэв. Иргэдэд олгосон зээлийн өрийн үлдэгдлийн 48 хувийг бизнес эрхлэх зээл эзэлж, өмнөх оны мөн үеийнхээс 6.8 нэгж хувиар, 9.1 хувийг малчны зээл эзэлж, өмнөх оны мөн үеийнхээс 1 нэгж хувиар, 6.9 хувийг хадгаламж, данс барьцаалсан зээл эзэлж, өмнөх оны мөн үеийнхээс 0.6 нэгж хувиар, 2.4 хувийг бусад зээл эзэлж, өмнөх оны мөн үеэс 0.7 нэгж хувиар нэмэгджээ.

Зээлийн 28.1 хувийг цалингийн зээл эзэлж, өмнөх оны мөн үеийнхээс 5.9 нэгж хувиар, 2 хувийг автомашины зээл эзэлж, өмнөх оны мөн үеийнхээс 1.2 нэгж хувиар, 2 хувийг картын зээл эзэлж, өмнөх оны мөн үеийнхээс 0.9 нэгж хувиар, 0.9 хувийг тэтгэврийн зээл эзэлж, өмнөх оны мөн үеийнхээс 0.7 нэгж хувиар, 0.5 хувийг өрхийн хэрэглээний зээл эзэлж, өмнөх оны мөн үеийнхээс 0.3 нэгж хувиар багасчээ. Иргэдийн зээлийн өрийн үлдэгдлийн хугацаандаа байгаа 8.7 их наяд төгрөгийн зээлийн 9.3 хувь нь 1 жилийн, 55.7 хувь нь 1-5 хүртэлх, 35 хувь нь 5 ба түүнээс дээш жилийн хугацаатай байв.

Categories
мэдээ нийгэм цаг-үе

Энэтхэгийн элчин сайд Хил хамгаалах газарт 1.2 сая ам.долларын серверийн систем хүлээлгэн өглөө

БНЭУ-аас Монголд суугаа Онц бөгөөд бүрэн эрхт элчин сайд хил хамгаалах байгууллагад айлчилжээ. Тэрээр Хил хамгаалах байгууллагад Хяналт, удирдлагын төвийн 1.2 сая ам.долларын, серверийн шинэчлэгдсэн системийг хүлээлгэн өгсөн байна.

Энэ сарын 23-нд Хил хамгаалах байгууллагын төв байранд болсон товч ёслолын үеэр БНЭУ-аас Монгол Улсад суугаа Онц бөгөөд бүрэн эрхт Элчин сайд эрхэмсэг ноён Мохиндер Пратап Сингх шинэчилсэн командлалын төвд серверийн системийг танилцуулав. Серверүүд болон холбогдох тоног төхөөрөмжийг өнгөрсөн сард Энэтхэгийн “Amtrak Technologies” компани Энэтхэгийн хилийн аюулгүй байдлын хүчний нэрийн өмнөөс нийлүүлж, суурилуулжээ.

Энэтхэгийн Дотоод хэргийн яам, Монгол Улсын Хууль зүйн яам хоорондын хилийн хамгаалалт, цагдаа, тандалтын чиглэлээр хамтын ажиллагааг өргөжүүлэх тухай санамж бичгийн дагуу эдгээрийг суурилуулжээ.

Элчин сайдтай хийсэн хэлэлцүүлэгт ХХЕГ-ын тэргүүн дэд дарга бөгөөд Хилийн цэргийн штабын дарга, бригадын генерал Н.Ганболд ХХЕГ -ийн урт хугацааны хамтын ажиллагаа, 2017, 2018 онуудад ахлах түвшний уулзалт хийж, хилийн хяналт, нөөцийн менежментийн хэд хэдэн асуудлыг хамтран хэрэгжүүлэх талаар ярьжээ. Тэрээр өнгөрсөн арван жилийн хугацаанд хилийн тусгай ажиллагаа, кибер аюулгүй байдал, компьютер, мэдээллийн технологи, зэвсэг, тактик, тэсрэх бөмбөг устгах, гамшиг гэх мэт салбаруудад тусалж, чадавхыг бэхжүүлэх, 123 албан тушаалтныг сургасанд болон ХХЕГ-ийн тоног төхөөрөмж, технологийн байгууламжийг сайжруулахад дэмжлэг үзүүлсэнд Энэтхэгийн Засгийн газарт талархал илэрхийлэв.

Элчин сайд Мохиндер Пратап Сингх уулзалтын үеэр Хил хамгаалах байгууллагын алба хаагчдыг цаашид БНЭУ-д сургах, ялангуяа англи хэл, кибер аюулгүй байдал, мэдээллийн технологийн чиглэлд сургах талаар хамтран ажиллахаа мэдэгдэж, ХХЕГ-ын “Шуурхай удирдлагын төвийг өргөжүүлэх төсөл”-ийг цаашид идэвхтэйгээр дэмжин ажиллахаа илэрхийлэв гэж тус ЭСЯ-наас мэдээлэв.

Categories
гадаад мэдээ

Галт уул идэвхжиж байгаатай холбогдуулан суугчдыг нүүлгэн шилжүүлэхээр болжээ

Испанийн Ла Пальма арлын эрх баригчид Кумбре-Вьеха галт уул идэвхжиж байгаатай холбогдуулан дахин гурван хотын оршин суугчдыг нүүлгэн шилжүүлэх шийдвэр гаргажээ.

Арлын шуурхай албанаас мэдээлснээр, галт уулын халуун хайлмаг 240 га газарт урсаж, 400 орчим байшинг сүйтгэсэн байна.

Эрх баригчид Тажуйи, Таканде де Абахо, Таканде де Арриба хотуудын хүн амыг нүүлгэн шилжүүлэх шийдвэр гаргажээ.

Аюултай бүсүүдээс нийтдээ 1300 хүнийг нүүлгэн шилжүүлэхээр төлөвлөсөн байна.

Өмнө нь арлын 6000 орчим хүн галт уул оргилсны улмаас орон гэрээ орхижээ.

Испанийн Засгийн газар галт уул идэвхжсэнтэй холбоотойгоор Канарын арлууд дээгүүр үйлдэх нислэгийг хязгаарлах шийдвэр гаргасан байна.

Канарын арлуудын бүрэлдэхүүнд багтдаг Пальма арлын Кумбре-Вьеха галт уул есдүгээр сарын 19-нд оргилж эхэлжээ. Өнгөрсөн долоо хоногт гал уулын ойролцоо 21 мянга гаруй чичиргээ бүртгэгдсэн байна.

Categories
мэдээ нийгэм

Эрчим хүчний салбарынхан 100 мянган мод тарихаар болжээ

Эрчим хүчний сайд Н.Тавинбэх салбарын хамт олондоо уриалга гаргаж 100 мянган мод тарих ажлыг эхлүүлж байна.

Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 76 дугаар чуулганы Ерөнхий санал шүүмжлэлд үг хэлэх үеэр 2030 он гэхэд нэг тэрбум мод тарих хөдөлгөөнийг эхлүүлж буйгаа мэдэгдсэн. Нүүрсхүчлийн хий ялгаруулдаг салбар тул энэхүү санаачлагыг эрчим хүчний салбарын хамт олон түүчээлж, Дундговь аймаг болон нийслэлийн Багахангай, Налайх дүүрэгт агч, гүйлс, буйлс, голт бор, хайлаас, гоёлын бургас зэрэг олон төрлийн модыг үе шаттайгаар тарих юм.
Энэхүү ажлын хүрээнд орон нутгийн удирдлагуудтай ойрын хугацаанд уулзаж, санал солилцож, мод тарих газар, түүнийг дагалдах ажлууд, тарьсны дараах арчилгаа зэрэг асуудлуудыг шийдэх юм.
Сайд Н.Тавинбэх байгаль орчинд олон талын эерэг нөлөө үзүүлэх энэхүү ажлыг дэмжихийг иргэд, бусад салбарын хамт олонд уриалж байна гэж ЭХЯ-наас мэдээллээ.
Categories
мэдээ нийгэм

Орхон голын Онгоцтойн амны шинэ гүүр ашиглалтад орлоо

Өвөрхангай аймгийн Бат-Өлзий сумын Орхон голын Онгоцтойн амны шинэ гүүр ашиглалтад оржээ.

Орхон голын хамгийн өргөн энэ гармаар үерлээгүй байхад нь гарахад л автомашины цонхны шилэн дээгүүр ус давдаг, муухан унаа туулж чаддаггүй, малчид, иргэд өвөлжөө, хаваржаагаа сэлгэн нүүдэллэх, дотоод, гадаадын аялагч жуулчид байгалийн үзэсгэлэнт газраар аялахад хүндрэл учирдаг байсан.
Тэгвэл энэ том гарам дээр улсын төсвийн хөрөнгөөр 220 метр урттай төмөр бетонон гүүр барьж, ашиглалтад оруулаад байна.
Өвөрхангай аймгийн аялал жуулчлалын гол бүс нутаг Бат-Өлзий суманд бүтээн байгуулалтын хэд хэдэн томоохон ажил хийгдэж байгаагийн нэг нь энэхүү гүүр юм байна.

May be an image of road and body of water

May be an image of 1 person, standing and outdoors

Categories
мэдээ нийгэм

ШХАБ-ын гишүүн орнуудын цэрэг дайчид оролцсон сургуулилалт өндөрлөлөө

ОХУ-ын Оренбург хотын ойролцоо болсон Шанхайн хамтын ажиллагааны байгууллагын гишүүн орнуудын цэрэг дайчид оролцсон терроризмыг эсэргүүцэх хамтарсан сургуулилалтын үндсэн шат өндөрлөөд байна.

“Энхийн ажиллагаа-2021” нэртэй тус цэргийн сургуулилалтад ОХУ, Беларусь, Төв Азийн Узбекистан, Киргизстан, Таджикистан болон Хятад, Энэтхэг, Пакистаны нийтдээ гурван мянга гаруй цэрэг дайчин оролцсон юм.

Талибан хөдөлгөөнийхөн Афганистаны засгийн эрхэнд гарч нөхцөл байдал нь тогтворгүйжсэн, Төв Азийн бүс нутагт террорист аюулын түвшин нэмэгдсэн цаг үед цэргийн хамтарсан сургуулилалтыг зохион байгуулж байгааг ажиглагчид онцолж байна.

Categories
мэдээ нийгэм цаг-үе

Өнөө шөнө төвийн аймгуудын нутгийн хойд хэсгээр нойтон цас орж, хүйтэрнэ


Малч­ид, иргэд, хадланчид, тариаланчдын анхааралд: Өнөө шөнө төвийн аймгуудын нутгийн хойд хэсгээр нойтон цас орж, хүйтрэх тул зам, даваа, гүвээнд халтиргаа гулгаа үүсэхийг онцгойлон анхааруулж байна.

2021 оны 09-р сарын 25-ны 12-18 цаг хүртэлх цаг агаарын мэдээ: Үүлэрхэг. Бага зэргийн бороо орно. Салхи баруун өмнөөс секундэд 7-12 метр. 17-19 хэм дулаан байна.

2021 оны 09 сарын 25-ны 20 цагаас 09 сарын 26-ны 20 цаг хүртэлх цаг агаарын урьдчилсан мэдээ

Хур тунадас: Нутгийн хойд хэсгээр үүлэрхэг. Бусад нутгаар солигдмол үүлтэй. Шөнөдөө баруун аймгуудын нутгийн зүүн хойд, говийн аймгуудын нутгийн зүүн хэсэг, төв болон зүүн аймгуудын ихэнх нутгаар, өдөртөө төвийн аймгуудын нутгийн хойд хэсэг, зүүн аймгуудын нутгийн зарим газраар бороо, нойтон цас орно.

Салхи: Нутгийн зүүн хагаст баруун өмнөөс баруун хойш эргэж, бусад нутгаар баруун хойноос секундэд 6-11 метр, Алтайн уулархаг нутаг болон говь, тал, хээрийн нутгаар секундэд 15-17 метр хүрч ширүүсэж, шороон шуурга шуурна.

Агаарын температур: Шөнөдөө Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө 8-13 хэм хүйтэн, Орхон, Сэлэнгэ, Хараа, Ерөө, Эг-Үүр, Туул, Тэрэлж голын хөндийгөөр 4 хэм хүйтнээс 1 хэм дулаан, говийн бүс нутгийн зүүн өмнөд хэсэг болон Дорнод-Дарьгангын тал нутгаар 9-14 хэм дулаан, бусад нутгаар 1 хэм хүйтнээс 4 хэм дулаан, өдөртөө Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Туул, Тэрэлж голын хөндийгөөр 5-10 хэм, говийн бүс нутгийн өмнөд хэсэг болон Дарьгангын тал нутгаар 15-20 хэм, бусад нутгаар 10-15 хэм дулаан байна.

УЛААНБААТАР ХОТ ОРЧМООР: Үүлэрхэг. Шөнөдөө ялимгүй хур тунадас орно. Өдөртөө бороо орохгүй. Салхи баруун хойноос секундэд 6-11 метр. Шөнөдөө Яармаг-Сонгино орчмоор 0-2 хэм хүйтэн, бусад хэсгээр 1-3 хэм, өдөртөө 8-10 хэм дулаан байна.

БАГАНУУР ОРЧМООР: Үүлэрхэг. Шөнөдөө ялимгүй хур тунадас орно. Өдөртөө бороо орохгүй. Салхи баруун хойноос секундэд 6-11 метр. Шөнөдөө 1-3 хэм, өдөртөө 8-10 хэм дулаан байна.

ТЭРЭЛЖ ОРЧМООР: Үүлэрхэг. Шөнөдөө ялимгүй хур тунадас орно. Өдөртөө бороо орохгүй. Салхи баруун хойноос секундэд 6-11 метр. Шөнөдөө 1-3 хэм хүйтэн, өдөртөө 6-8 хэм дулаан байна.

2021 оны 09 дүгээр сарын 27-ноос 10 дугаар сарын 01-нийг хүртэлх цаг агаарын урьдчилсан төлөв

27-нд баруун болон төвийн аймгуудын нутгийн хойд хэсгээр, 28-нд баруун болон төвийн аймгуудын нутгийн зарим газар, зүүн аймгуудын нутгийн хойд хэсгээр, 29-нд төв болон зүүн аймгуудын нутгийн хойд хэсгээр, 30-нд баруун, төв болон зүүн аймгуудын нутгийн зарим газраар бороо, нойтон цас орно. Салхи 27-30-нд нутгийн зарим газраар секундэд 15-17 метр хүрч ширүүсэж, шороон шуурга шуурна. Нутгийн хойд хэсгээр сэрүүсэж Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Завхан голын эх, Идэр, Тэс голын хөндийгөөр шөнөдөө 9-14 хэм хүйтэн, өдөртөө 4-9 хэм, говийн бүс нутгийн өмнөд хэсгээр шөнөдөө 5-10 хэм, өдөртөө 15-20 хэм дулаан, бусад нутгаар шөнөдөө 3 хэм хүйтнээс 2 хэм дулаан, өдөртөө 10-15 хэм дулаан байна.

Categories
амьдралын-өнгө мэдээ

Гэрээсээ гараад сураггүй болсон иргэнийг эрэн хайж байна

Архангай аймгийн Эрдэнэбулган сумын Цагаандаваа багт оршин иргэн Г энэ сарын 14-нд гэрээсээ гараад сураггүй болжээ. Түүнийг эрэн хайх ажиллагаанд хүч нэмэх тухай хүсэлтийг Цагдаагийн байгууллагаас энэ сарын 18-нд гаргасан байна.

Тус аймгийн Онцгой байдлын газрын Эрэн хайх, аврах салбар, Цагдаагийн газрын алба хаагчид, ар гэрийнхний хамт нэг эрэлч нохойтой 18-ны өдрийн 11:20 цагаас эрэх ажиллагааг тус сумын Цагаан даваа багийн “Булган” уул орчмоор нийт 20 км-т зохион байгуулжээ.

Үр дүнд хүрээгүй тул мөн өдрийн 18:28 цагт түр зогсоож, 19-ний өдөр ар гэрийн хүсэлтээр эрэн хайх ажиллагааг зогсоосон. 24-ний өдрийн 10:45 цагт ар гэр нь дахин хүсэлт гаргасны дагуу тус аймгийн Онцгой байдлын газрын Эрэн хайх, аврах салбарын алба хаагчид, ар гэрийнхний хамт 11:42 цагт эрэн хайх ажиллагааг эхлүүлж, Булган уулын баруун зүүн энгэр, Цагаан давааны зүүн энгэр нийт 45 км газар эрэн хайх ажиллагааг зохион байгуулж 18:45 цагт ар гэрийн хүсэлтийг үндэслэн, Онцгой байдлын газрын орлогч, урьдчилан сэргийлэх тасгийн даргын шийдвэрээр эрлийн ажиллагааг түр зогсоожээ.

Categories
мэдээ нийгэм

Манай улс тархины цус харвалтын шалтгаант нас баралтаар дэлхийд нэгдүгээрт бичигдэж байна

Манай улсын 100 мянган хүнд ногдох цус алдах хэлбэрийн тархины цус харвалтын нас баралтаар дэлхийд 1-рт бичигдэж байна. Энэ нь дэлхийн дунджаас бараг 4 дахин их гэсэн үг. Ялангуяа зүрх судасны өвчний шалтгаантай нас баралтын 45 хувь, цус харвалтын шалтгаант нас баралтын 51 хувь нь цусны даралт ихсэлтээс үүдэлтэй байна.

Хүн амын төвлөрөл, хотжилт болон бусад олон хүчин зүйлстэй холбоотойгоор дэлхий дахинд халдварт бус өвчний тохиолдол 2000 оноос хойш тасралтгүй өсөж, нас баралтын тэргүүлэх шалтгаан болсон төдийгүй энэ тоо цаашид ч нэмэгдэх хандлагатай байгаа юм. Дэлхий дахинд жил бүр 18 сая хүн зүрх судасны өвчнөөр нас бардаг гэх тоо баримт байгаа бөгөөд эдгээр нас баралтын талаас илүү буюу 9.4 сая нь цусны даралт ихсэлтээс үүдэлтэй байна. Зүрх судасны эмгэг нь 45-аас дээш насныханд зонхилон тохиолддог ч сүүлийн үед нийгмийн хөгжил, стерсс, ажлын ачаалал, амьдралын буруу хэв маягтай холбоотойгоор залуужиж байгаа аж. Цусны даралт ихсэх өвчнийг эрт илрүүлж, тогтмол хянах явцыг сайжруулснаар зүрх судасны өвчлөлөөс сэргийлэх бүрэн боломжтой юм.

No description available.

Categories
гадаад мэдээ

“Huawei” компанийн өв залгамжлагч Мэн Ванжоуг суллажээ

Нью-Йорк хотын Зүүн дүүргийн прокурорын газраас өчигдөр болсон шүүх хуралд Хятадын “Huawei” компанийн санхүүгийн захирал Мэн Ванжоуг буруутгасан банкны луйврын хэргийг хэрэгсэхгүй болгохоо мэдэгджээ. Түүнчлэн түүнийг прокурортой байгуулсан гэрээг дагаж мөрдвөл Канад улсаас шилжүүлэн авах хүсэлтээ ч эргүүлэн татахаа мэдэгдсэн байна.

“Huawei” компанийн үүсгэн байгуулагчийн охин Мэн Ванжоу нь АНУ-аас Ираны эсрэг хоригоос зайлсхийхийн тулд тус улсын санхүүгийн инситутыг луйвардахыг оролдсон гэдгээ хүлээсэн юм. ““Huawei” компани нь Иранд төвтэй “Skycom” компанитай “хэвийн бизнесийн хамтын ажиллагаатай” хэмээн Мэн Ванжоу АНУ-ын санхүүгийн институтад мэдүүлсэн боловч үнэн хэрэгтээ “Huawei” компани нь “Skycom” компанийг удирддаг, өөрийнх нь ажилчид ажилдаг байжээ.

Мэн Ванжоу нь 2018 онд Канадад баривчлагдсанаасаа хойш АНУ-д шилжүүлэхийн эсрэг тэмцсээр ирсэн юм. Түүний хэрэг АНУ, Хятадын хоорондох зөрчилд нэлээд нөлөө үзүүлсэн. АНУ-ын ерөнхийлөгч асан Дональд Трамп Хятадын даргатай Их-20 бүлгийн чуулганы үеэр уулзаж, худалдааны дайныг зогсоохоор ярилцсан өдөр түүнийг баривчилсан юм. Улмаар хоёр орны хооронд зөрчил үргэлжилсэн.

АНУ-д болсон шүүх хуралд Мэн Ванжоу цахимаар оролцсон аж. АНУ-ын прокурортой тохиролцсон гэрээний дагуу тэрбээр Канадад суллагджээ. Түүнчлэн суллагдсаныхаа дараа өөрөө болон өмгөөлөгчид нь нийтэд мэдээлэл хийх ёсгүй. Түүний хэргийг албан ёсоор 2022 оны арванхоёрдугаар сарын 1 -нд хэрэгсэхгүй болгоно.