Month: September 2021

Сонгинохайрхан дүүргийн 122 дугаар сургуулийн өргөтгөлийн барилга ашиглалтад орж шинэ хичээлийн жилд хүүхдүүдээ хүлээж авлаа. Боловсрол, шинжлэх ухааны яамны захиалгаар Азийн хөгжлийн банкны санхүүжилтээр “Цамхаг констракшн” ХХК барилгын ажлыг гүйцэтгэжээ.

Тус сургуулийн өргөтгөл нийтдээ 640 хүүхэд хүлээж авах хүчин чадалтай аж. Сургуулийн барилга угсралтын ажил 2019 онд хэрэгжиж эхэлсэн бөгөөд энэ оны арваннэгдүгээр сарын 30-нд барилгын ажлыг дуусгахаар төлөвлөж байсан ч ийнхүү хугацаанаас нь өмнө ашиглалтад хүлээлгэж өгчээ.

Нийгэм, эдийн засгийн бүхий л салбарын хөгжлийн хурдасгагч болсон мэдээллийн технологи, дижитал шилжилтийг иргэд, олон нийтэд илүү ойртуулах, салбарын тоглогчдын хамтын ажиллагааг дэмжих, гарааны бизнес эрхлэгчдийн шинэ технологийг олон нийтэд танилцуулах зорилгоор “Үндэсний шилдэг стартап шалгаруулах тэмцээн” -ийг 2021 оны 09 дүгээр сарын 18-ны өдөр White Rock центрт зохион байгуулах гэж байна.

Тус тэмцээнд оролцох хүсэлтэй стартап компаниуд digitalnation.mn/#section-register орж, стартап тэмцээн хэсэгт бүртгүүлээрэй. Бүртгэл 2021 оны 09 дүгээр сарын 15-ны 12.00 цаг хүртэл явагдах аж.

Дашрамд мэдээлэхэд, жил бүр уламжлал болгон зохион байгуулдаг харилцаа холбоо, мэдээллийн технологийн салбарын үзэсгэлэн “ICT EXPO” нь 16 дахь жилдээ хүрээгээ өргөжүүлж, цахим шилжилтэд түүчээлэх үндэсний арга хэмжээ “Digital Nation – 2021” нэр дор Үндэсний соёл, амралтын хүрээлэнд 2021 оны 09 дүгээр сарын 17-19-ний өдрүүдэд зохион байгуулагдана.

Тус үндэсний арга хэмжээний хүрээнд

• “Цахим Үндэстэн” хэлэлцүүлэг
• Салбарын сайд нарын уулзалт
• Мэдээллийн технологийн салбар дахь эмэгтэйчүүдийн оролцоо хэлэлцүүлэг
• Олон улсын цахим спортын тэмцээнд
• Үндэсний шилдэг стартап шалгаруулах тэмцээн
• Хөгжмийн фестиваль
• Cosplay
• Үндэсний компаниудын үзэсгэлэн зэрэг олон арга хэмжээ зохион байгуулагдах гэж байна.

Замын цагдаагийн газрын ойролцоо гүүрэн гарц барих төслийн барилгын ажилд түр ашиглахаар төлөвлөсөн гүүрэн байгууламжийг өнгөрсөн зургадугаар сард үргэлжлэн орсон борооны улмаас сэтэлсэн. Үүнээс үүдэн буцаж эргэх чиглэлийн автомашины хөдөлгөөнийг хязгаарлаад байсан юм.

Үндсэн гүүрний ажил дуустал түр ашиглахаар төлөвлөж байсан уг гүүрийг байнгын болгох хүсэлтийг иргэд олон удаа өгчээ. Тэдний хүсэлт болоод зорчих хөдөлгөөний эрчимд тулгуурлан түр гүүрийг байнгын ашиглалттай гүүрэн байгууламж болгохоор барилгын ажлыг эхлүүлээд байна.

Одоогийн байдлаар гүүр барих ажлын явц 30 хувьтай үргэлжилж байгаа бөгөөд 1.5 метрийн диаметртэй шон суурийг 20 метрийн гүнд суулгаж, дам нуруу бэлтгэж буй аж. Шинэ гүүр 60 метрийн урттай байх юм.

Гүүрийг төлөвлөсөн хугацаанд нь ашиглалтад өгөхөөр ажиллаж байна.

Бүгд Найрамдах Чех Улсын алдарт хийлч Яраслов Косианы сангаас зохион байгуулдаг Чехийн морин хийлч Хираны нэрэмжит мэргэжлийн морин хийлчдийн олон улсын уралдаанд амжилттай оролцсон сурагчдад Соёлын сайд Ч.Номин өнөөдөр батламж, мөнгөн шагналыг нь гардууллаа.

Шагнал гардуулах үеэр Соёлын сайд Ч.Номингийн хэлэхдээ, “Косианы нэрэмжит “Олон улсын залуу хийлчдийн уралдаан”-аас шагнал хүртэж, монголын сонгодог урлагийн хөгжил, чанар чансааг олон улсад таниулсан залуу хийлч сурагчид та бүхэнд талархал илэрхийлж, баяр хүргэе. Мөн энэхүү уралдаанд амжилттай оролцох нөхцөл бололцоогоор хангасан Монгол Улсын Гавьяат багш Ш.Дуламсүрэн, багш Д.Амармэнд, ОХУ-ын Ардын жүжигчин В.Тонка болон эцэг, эхчүүд та бүхэнд талархсанаа илэрхийлье. Хэдийгээр энэхүү мөнгөн шагнал нь Та бүхний гаргасан амжилт, урлагийн авьяасыг хэмжихгүй ч урам болж, урлаг, уран сайхныг дэмжих зөв хөрөнгө оруулалт болж чадна хэмээн найдаж байна” гэлээ.

1959 оноос эхлэн зохион байгуулагдаж буй энэхүү уралдаанд манай улсаас анх 2009 онд Монгол Улсын гавьяат багш Ш.Дуламсүрэн сурагч Т.Энхмаагийн хамтаар оролцож байсан түүхтэй.

Энэхүү уралдааны нэг онцлог нь оролцогчдыг зөвхөн кодоор буюу нэр, улс орныг зарлалгүйгээр тоглуулдаг бөгөөд хоёр шаттай зохион байгуулагддаг. Уралдааны 1 дүгээр шатанд зөвхөн нэр заасан зохиолыг тоглодог бол 2 дугаар шатанд тоглолтын хугацааг зааж өгдөг онцлогтой.

Зөвхөн мэргэжлийн уран бүтээлчид өрсөлддөг энэхүү уралдаанд 2021 онд дэлхийн 10 гаруй орноос 16 хүртэлх насны сурагчид цахим хэлбэрээр оролцож ур чадвараа сорьж өрсөлдсөнөөс Монгол Улсын Консерваторийн мэргэжлийн сургуулийн 5 сурагч амжилттай оролцож, Засгийн газрын тогтоолоор баталсан мөнгөн урамшуулал авах журмын болзлыг хангасан юм.

Энэ журмын дагуу Монгол Улсын Консерваторийн Сонгодог хөгжмийн мэргэжлийн сургуулийн сурагч Ж.Нарансоёмбо, Ч.Цэцэн Б.Марал, ОХУ-ын Гнесиний нэрэмжит хөгжмийн сургуулийн сурагч Т.Удвал нарт тус бүр 14,0 сая төгрөг, мөн сургуулийн сурагч Л.Энэрэлд 9,0 сая төгрөгийн урамшуулал олгосныг Соёлын сайд Ч.Номин гардууллаа.

Энэхүү уралдаанд 2009 оноос-2021 он хүртэл давхардсан тоогоор 17 сурагч амжилттай оролцжээ.

Дохио!!! Цаг агаарын аюултай үзэгдлээс сэрэмжлүүлэх мэдээ: Өнөө шөнө Архангай, Булганы нутаг, маргааш өдөр Булган, Сэлэнгийн нутаг, Архангайн зүүн, Төв аймгийн баруун хэсгээр ахиухан хэмжээний бороо орно.

Малчид, иргэд, хадланчид, тариаланчдын анхааралд: энэ сарын 3-нд төвийн аймгуудын ихэнх нутгаар, цаашдаа төв болон зүүн аймгуудын нутгаар бороо, уулархаг нутгаар нойтон цас орж, 4-нөөс 6-нд газар тариалангийн бүс нутгаар шөнөдөө хөрсөн дээр цочир хүйтрэхийг онцгойлон анхааруулж байна.

2021 оны 09 сарын 02-ны 20 цагаас 09 сарын 03-ны 20 цаг хүртэлх цаг агаарын урьдчилсан мэдээ:

Хур тунадас: Ихэнх нутгаар үүлэрхэг. Шөнөдөө баруун аймгуудын нутгийн өмнөд болон зүүн хэсэг, төвийн аймгуудын ихэнх нутаг, зүүн аймгуудын нутгийн зүүн хэсгээр, өдөртөө баруун аймгуудын нутгийн зүүн, говь болон зүүн аймгуудын нутгийн баруун хэсэг, төвийн аймгуудын ихэнх нутгаар бороо, дуу цахилгаантай аадар бороо орно.

Салхи: Баруун болон төвийн аймгуудын нутгаар баруун өмнөөс баруун хойш эргэж, бусад нутгаар баруун өмнөөс секундэд 6-11 метр, нутгийн зарим газраар секундэд 14-16 метр хүрч ширүүснэ.

Агаарын температур: Шөнөдөө Алтай, Хангай, Хөвсгөлийн уулархаг нутаг, Хүрэнбэлчир орчим, Завхан голын эх, Идэр, Тэс, Тэрэлж голын хөндийгөөр 1-6 хэм, говийн бүс нутгийн өмнөд хэсгээр 13-18 хэм, бусад нутгаар 7-12 хэм, өдөртөө Алтай, Хангай, Хөвсгөлийн уулархаг нутаг, Дархадын хотгор, Хүрэнбэлчир орчим, Завхан голын эх, Идэр, Тэс, Эг, Үүр, Орхон, Сэлэнгэ, Хараа, Ерөө голын хөндийгөөр 9-14 хэм, говийн бүс нутаг, Дорнод-Дарьгангын тал хээр нутгаар 24-29 хэм, бусад нутгаар 17-22 хэм дулаан байна.

УЛААНБААТАР ХОТ ОРЧМООР: Шөнөдөө багавтар үүлтэй, бороо орохгүй. Өдөртөө үүлшинэ, дуу цахилгаантай аадар бороо орно. Салхи баруун өмнөөс хойш эргэж секундэд 6-11 метр. Шөнөдөө 8-10 хэм, өдөртөө 19-21 хэм дулаан байна.

БАГАНУУР ОРЧМООР: Шөнөдөө багавтар үүлтэй, бороо орохгүй. Өдөртөө үүлшинэ, дуу цахилгаантай бага зэргийн аадар бороо орно. Салхи баруун өмнөөс хойш эргэж секундэд 6-11 метр. Шөнөдөө 7-9 хэм, өдөртөө 20-22 хэм дулаан байна.

ТЭРЭЛЖ ОРЧМООР: Шөнөдөө багавтар үүлтэй, бороо орохгүй. Өдөртөө үүлшинэ, дуу цахилгаантай аадар бороо орно. Салхи баруун өмнөөс хойш эргэж секундэд 6-11 метр. Шөнөдөө 3-5 хэм, өдөртөө 18-20 хэм дулаан байна.

2021 оны 09 дүгээр сарын 04-нөөс 09 дүгээр сарын 08-ныг хүртэлх

цаг агаарын урьдчилсан төлөв:

4-нд баруун аймгуудын нутгийн зүүн хэсэг, төв болон говийн аймгуудын нутгийн зарим газар, зүүн аймгуудын ихэнх нутгаар, 5, 6-нд төв болон зүүн аймгуудын нутгийн зарим газраар, 7-нд төв болон зүүн аймгуудын нутгийн хойд хэсгээр бороо, уулархаг нутгаар нойтон цас орно. Салхи ихэнх хугацаанд говь, тал, хээрийн нутгаар секундэд 14-16 метр хүрч ширүүснэ. Ихэнх нутгаар сэрүүсэж Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Завхан голын эх, Идэр, Тэс, Туул, Тэрэлж голын хөндийгөөр шөнөдөө 4 хэм хүйтнээс 1 хэм дулаан, өдөртөө 6-11 хэм, Их нууруудын хотгор, говийн бүс нутгийн өмнөд хэсгээр шөнөдөө 8-13 хэм, өдөртөө 17-22 хэм, бусад нутгаар шөнөдөө 0-5 хэм, өдөртөө 11-16 хэм дулаан байна.