Month: September 2021

“Тэнгэр баганадсан барилгуудын” өдөр өнөөдөр тохиож байна

Post author By
Post date 2021-09-03
No Comments on “Тэнгэр баганадсан барилгуудын” өдөр өнөөдөр тохиож байна

Жил бүрийн Есдүгээр сарын 3-нд тэнгэр баганадсан өндөр барилгыг барихад хувь нэмрээ оруулсан барилгачид, архитектор болон инженерүүдийн хөдөлмөр, бүтээлийг зүй ёсоор үнэлэх өдөр болгон тэмдэглэдэг юм байна.

1880-аад оноос эхлэн тухайн үед баригдсан 10-20 давхар барилгуудыг ингэж нэрлэж байж. Харин 20-р зуун гарсаар барилгын технологиуд эрс сайжран асар өндөр барилгууд баригдах болсон тул 40-өөс дээш давхар 150 метрээс /492 фут/ өндөр барилгыг энэ ангилалд тооцохоор болжээ. Харамсалтай нь Монголд маань энэ шаардлагыг хангасан байшин одоогоор баригдаагүй байгаа юм байна.

3 хүн, зогсож буй хүмүүс болон гадаа гэх мэтийн зураг байж болно

Хэт өндөр барилгуудыг ган араг ясан дээр хэмнэлтийг харгалзан барьдаг. Барилгын геометрийг дээд зэргийн боломжит орон зайг тулгуур бүтцийн доод өртөгтэй хослуулах замаар төслийг нь зохиодог. Ийм барилгын хувьд салхины үүсгэдэг ачааллын үед тогтвортой байдлыг хангах нь хүндхэн зорилт болдог. Барилгын өндөр нэмэгдэх тусам салхины хүч шугаман бус, харин гадагш чиглэсэн (y = aЧ хэлбэрийн функцээр явагдана, х –үл хамаарах хувьсагч) байдлаар өсдөг. Барилгын төслийг үнэн зөв зохиохын тулд үүнийг яг онож тооцоолох шаардлагатай.

Тэнгэр баганадсан барилгуудыг үндсэндээ ган каркасан дээр босгодог. Модон араг ястай барилга шиг тулгуур бүтцүүдийг босоо багануудаар болон хэвтээ дам нуруу ашиглан босгодог.

Босоо тулгуурууд нь янз бүрийн хэлбэртэй байдаг. Үүнд: ган араг яс, бетонон гол хэсэг, том руу нь багыг хийх замаар угсарсан ган хоолойнууд болон том том бүтцүүд зэрэг багтана.

Олон тооны хяналтын тогтолцоог хослуулсны ачаар өргөгч шат нь хөдөлгөөний хамгийн аюулгүй хэрэгсэл болжээ. Нэг бүхээгийг 10 хүртэлх утас хангадаг. Агшин бүрт тэдгээрийн зөвхөн нэг нь ажилладаг. Мөн өргөдөг шатанд эрчим хүч тасрахд автоматаар ажиллах механик тоормосууд бий.

Өнөөдөр дэлхий даяар 150 метрээс өндөр 100 болон түүнээс дээш барилгатай 9 хот байна. Үүнд: ХонгКонг 355, ШэнЖинь 289, Нью Йорк 284, Дубай 201, Шанхай 163, Токио 158, Чонгжин 127, Чикаго 127, Гуанжоу 118 тэнгэр баганадсан барилгатай хэмээн жагсчээ.

Дэлхийн хамгийн өндөр барилгын рекордыг 1857 оны гуравдугаар сарын 23-нд ашиглалтад орсон 79 фут өндөр Манхэттэний “E. V. Haughwout” барилга эзэмшиж байсан бол удалгүй 1894 онд анхны 150 метрээс өндөр барилга баригдсан нь АНУ-ын Филадельфи хотын захиргааны 155,8 метр /511 фут/ барилга боссоноор жинхэнэ утгаараа тэнгэр баганадсан барилгын үе эхэлжээ. Харин өнөөдөр 2010 онд АНЭ улсад ашиглалтанд орсон 2,717 фут буюу 828 метр өндөр 163 давхар “Бурж Халифа” тэргүүлж байна. Араас нь 2015 онд ашиглалтанд орсон 632 метр “Шанхай” цамхаг жагсдаг аж.

Харин Монголын хувьд 2016 онд ашиглалтад орсон “Шангрила” зочид буудлын 35 давхар 135 метрийн өндөр С цамхаг тэргүүлдэг бол ардаас нь 2013 онд ашиглалтанд орсон 25 давхар 109 метрийн өндөр “Туушин” зочид буудал жагсдаг ажээ.

Одоогоор Монголд баригдаж байгаа хамгийн өндөр барилгыг “Мак Товер” гэж нэрлэсэн байх бөгөөд 2013 онд ажил нь эхэлсэн энэ барилга бүтэн босвол 40 давхар 180 метрийн өндөртэй байх бөгөөд бид утгаараа тэнгэр баганадсан /Skyscraper/ барилгатай болох юм байна.Энэ өдрийг та тэнгэр баганадсан өндөр барилгын дээрээс тольдонгоо оройд нь байх ресторанд хооллон тэмдэглэвэл сайн гэнэ. Тийм барилгагүй бид өндөр барилгыг барих шинжлэх ухаанч технологийг судлах, угсардаг тоглоомоор мөрөөдлийн өндөр барилгаа барьж өнгөрүүлнэ гэнэ шүү.

мэдээ нийгэм

Гурван настнуудыг цэцэрлэгт хамруулах эсэхийг 21 хоногийн дараа шийднэ

Post author By
Post date 2021-09-03
No Comments on Гурван настнуудыг цэцэрлэгт хамруулах эсэхийг 21 хоногийн дараа шийднэ

Коронавирусийн нөхцөл байдлаас шалтгаалан есдүгээр сарын 1-нээс эхлэн 2-3 настнуудыг цэцэрлэгт хамруулахгүй, зөвхөн 4-5 настнуудыг хамруулахыг Боловсрол шинжлэх ухааны яамнаас мэдэгдсэн.

Гэвч цэцэрлэгийн үйл ажиллагаа эхэлснээс гурван долоо хоногийн хугацаанд ажиглалт хийж, халдварын нөхцөл байдлыг тогтоосны дараа 2-3 настнуудыг элсүүлэх эсэхийг шийдэж аж.

Хэрэв бага насны хүүхдүүдийн дунд халдвар ихэсвэл 2-3 настныг хамруулахгүй бөгөөд нэг ангид халдвар илэрвэл давхраар нь хөл хорио тогтоох аж.

мэдээ нийгэм цаг-үе

Давхардсан тоогоор 4938 хүнийг өршөөн хэлтрүүлээд байна

Post author By
Post date 2021-09-03
No Comments on Давхардсан тоогоор 4938 хүнийг өршөөн хэлтрүүлээд байна

Шүүхийн ерөнхий зөвлөлөөс “Өршөөл үзүүлэх тухай хууль”-ийн хэрэгжилтийн талаар мэдээлэл хийлээ.

Тулгар төр байгуулагдсаны 2230 жил, Их Монгол Улсын 815 жил, Ардын хувьсгалын 100 жилийн ойг тохиолдуулан хүмүүнлэг, энэрэнгүй ёсны зарчмыг удирдлага болгон коронавируст халдварын цар тахлын нийгэм, эдийн засагт үзүүлэх сөрөг нөлөөллийг бууруулах зорилгоор “Өршөөл үзүүлэх тухай хууль”-ийг УИХ-аас 2021 оны долдугаар сарын 2-ны өдөр баталсан.

Хуулийн хэрэгжилт 2021 оны долдугаар сарын 6-ны өдрөөс хүчин төгөлдөр мөрдөгдөж байна. Энэ хуулиар зарим гэмт хэрэг, зөрчил үйлдсэн хүн, хуулийн этгээдийг эрүүгийн хариуцлага, зөрчлийн шийтгэлээс нэг удаа өршөөн хэлтрүүлэх, чөлөөлөх, хасах, ялын төрлийг сольж шийдвэрлэж буй.

“Өршөөл үзүүлэх тухай хууль”-д:

2017 оны зургадугаар сарын 30-ний өдрийн 24 цаг 00 минутаас өмнө 2002 оны нэгдүгээр сарын 3-ны өдөр баталсан Эрүүгийн хуульд заасан гэмт хэрэг үйлдсэн
2021 оны зургадугаар сарын 24-ний өдрийн 24 цаг 00 минутаас өмнө 2015 оны арванхоёрдугаар сарын 3-ны өдөр баталсан Эрүүгийн хуульд заасан гэмт хэрэг үйлдсэн
2021 оны зургадугаар сарын 24-ний өдрийн 24 цаг 00 минутаас өмнө Зөрчлийн тухай хуульд заасан зөрчил үйлдсэн
Өршөөл үзүүлэх тухай 1991, 1996, 2006, 2009, 2015 онд батлагдсан хуульд заасны дагуу хорих ялаас чөлөөлөгдсөнөөс хойш санаатай гэмт хэрэг үйлдэж хорих ял шийтгүүлсэн хүнийг хамруулахгүй байхаар тогтоожээ.

Шүүхээс өршөөл үзүүлэх тухай хуулийн:

4-р зүйлийн 4.1 дэх хэсэгт зааснаар нийт 1897 ялтныг өршөөн хэлтрүүлсэн.
5-р зүйлийн 5.1-5.3 зүйлд зааснаар 499 хүнд холбогдох 425 хэргийг өршөөн хэрэгсэхгүй болгосон.
6-р зүйлийн 6.1-6.3 дахь зүйлд зааснаар 602 ялтны эдлээгүй үлдсэн хорих ялаас хоёр жилийг хассанаас 166 ялтан суллагдсан.
7-р зүйлийн 7.1-7.3 зүйлд зааснаар 1061 ялтанд оногдуулсан хорих ялыг дүйцүүлэн хассан.
8-р зүйлийн 8.1 дэх хэсэгт зааснаар 879 хүнд холбогдох 873 хэргийг өршөөн шийтгэлээс чөлөөлсөн.

Нийт давхардсан тоогоор өршөөл үзүүлэх хуульд 4938 хүн хамрагдсан байна.

Хорих ялаас өршөөн хэлтрүүлснээр суллагдсан иргэд /нийт 253/ :

Насанд хүрээгүй – 1
Эмэгтэй – 7
Эрэгтэй – 245 байна.

Урьд гэмт хэрэг үйлдэж ял шийтгэгдсэн эсэхээр нь ангилбал

Анх удаа – 160
2 удаа – 50
3-с дээш удаа – 43

Согтуугаар тээврийн хэрэгсэл жолоодсон үедээ хүний аминд санамсаргүйгээр хүрсэн иргэд өршөөлийн хуульд хамрагдсан.

гадаад мэдээ

Хятад улс Бээжинд хөрөнгийн бирж байгуулна

Post author By
Post date 2021-09-03
No Comments on Хятад улс Бээжинд хөрөнгийн бирж байгуулна

Хятадын эрх баригчид нийслэл Бээжин хотдоо шинэ хөрөнгийн бирж байгуулахаар төлөвлөж байна.

Энэ тухай БНХАУ-ын дарга Ши Жиньпин энэ сарын 2-нд нээгдсэн Хятадын олон улсын үйлчилгээний худалдааны үзэсгэлэнд дүрс бичлэгээр үг хэлэхдээ мэдэгджээ.

“Бид жижиг, дунд үйлдвэр эрхлэгчдийн инновацын хөгжлийг үргэлжлүүлэн дэмжиж, шинэ биржээс гадуурх үнэт цаасны зах зээлийн шинэчлэлийг гүнзгийрүүлэхийн сацуу Бээжинд хөрөнгийн бирж байгуулж, шинэлэг жижиг, дунд үйлдвэр эрхлэгчдэд үйлчлэх томоохон тавцан байгуулна” гэж тэрбээр цохон тэмдэглэсэн байна.

Хятад улсын хөрөнгийн гол биржүүд Шанхай, Шэньжэн, Хонконгт байрладаг. Үүнээс гадна, Далянь, Жэнжоу, Шанхай зэрэг хэд хэдэн хотод түүхий эдийн биржтэй.

Хятадын олон улсын үйлчилгээний худалдааны үзэсгэлэн бол энэ салбартаа дэлхийн хамгийн том үзэсгэлэн юм. Үзэсгэлэн есдүгээр сарын 2-7-ны өдрүүдэд Бээжинд болно.

мэдээ улс-төр цаг-үе

УИХ-ын гишүүн асан С.Жавхлан АН-аас гарч байгаагаа зарлалаа

Post author By
Post date 2021-09-03
No Comments on УИХ-ын гишүүн асан С.Жавхлан АН-аас гарч байгаагаа зарлалаа

Монгол Улсын гавьяат жүжигчин, УИХ-ын гишүүн асан С.Жавхлан мэдээлэл хийлээ.

Тэрбээр “Сүүлийн үед болж байгаа үйл явдлуудын талаар сэтгэгдлээ хуваалцах гэж өнөөдрийн хэвлэлийн бага хурлыг хийж байгаа юм.

Нөхөн сонгууль болох гэж байна. Энэ сонгуульд намайг дэвшинэ, дэвшихгүй гэдэг мэдээлэл явсан. Би энэ мэдээллийг маш их гайхаж хүлээж авсан. Надад нөхөн сонгуульд оролцох ямар ч санаа байгаагүй. Миний саяны хэлсэн зүйлийг ямарваа нэгэн байдлаар битгий гуйвуулаасай гэж хүсэж байна.

Миний бие “Хамаг Монгол” төслийн 2012 оноос эхлүүлсэн. Би соёлын биет өвийг хамгаалах, мартагдсан зүйлийг сэргээн хойч үедээ өвлүүлэхийн төлөө явдаг.

Сүүлийн үед Ардчилсан нам маш их хэрүүл уруултай байх болсон. Миний зан, зарчимд нийцэхгүй байгаа учраас өнөөдөр АН-аас гарч байгаагаа зарлаж байна. Цаашид хийх ажил маш их байна. Соёлын өвөө ганц хоёр хүнээр тоглуулаад баймааргүй байна. Тиймээс өв соёлоо хамгаалж, уран бүтээлээ хийх зорилгоор АН-аас гарч байна.

Би ямар нэгэн байдлаар гомдож, туниагүй. Хэрэв гомдсон бол шууд л хэлдэг зантай хүн. Тиймээс АН-ын залуучууд, ах нартаа хамгийн сайн сайхныг хүсэн ерөөё. Хэрэв надаас асуух зүйл гарвал холбогдож байгаарай гэж хэлье” гэв.

мэдээ нийгэм

БШУЯ: Хичээлийн хоцрогдлыг арилгахад ахмад багш нартай хамтарч ажиллана

Post author By
Post date 2021-09-03
No Comments on БШУЯ: Хичээлийн хоцрогдлыг арилгахад ахмад багш нартай хамтарч ажиллана

2021-2022 оны хичээлийн жил цахим болон танхимын гэсэн хосолмол хэлбэрээр эхэллээ. Боловсролын байгууллагууд эхний ээлжид хоёр жил орчим хугацаанд цахимаар хичээллэсэн сурагчдын хоцрогдлыг арилгахад анхаарч ажиллах юм.

БШУ-ны сайд Л.Энх-Амгалан “Хичээлийн хоцрогдлыг нөхөх үндэсний хөтөлбөр эхэлж байгаа. Нэгдүгээрт, хоцрогдлыг танхимаар нөхөхөөр зорьж байна. Улсын хэмжээнд 180 гаруй мянган хүүхэд цахилгаан, интернет, гар утасгүй байна гэх судалгаа гарсан. Энэ хүүхдүүдэд зөвхөн компьютер, гар утас өгөөд хоцрогдлыг нөхөх боломжгүй. Тэгэхээр танхимын хичээлээр нөхөх нь зүйтэй гэж үзэж байна. Хоёрдугаарт тэтгэвэрт гарсан багш нартай хамтарч ажиллахаар хөтөлбөрт багтаасан. Зөвхөн энэ намрын асуудал биш учраас гурван жилийн хугацаанд хичээлийн хоцрогдол нөхөх хөтөлбөрийг хэрэгжүүлнэ” гэж ярилаа.

Мөн цаашид бүх сургууль, цэцэрлэгийн интернетийн хурд, шилэн кабелын холбогдолтыг одоо байгаагаас гурав дахин өндөр хэмжээнд хүргэх ажлууд хийгдэж байгааг хэлэв.

мэдээ нийгэм

Өчигдөр 83 жолооч согтуугаар жолоо барьж, 155 хүн эрүүлжүүлэхэд хоножээ

Post author By
Post date 2021-09-03
No Comments on Өчигдөр 83 жолооч согтуугаар жолоо барьж, 155 хүн эрүүлжүүлэхэд хоножээ

Энэ сарын 2-нд буюу өчигдөр цагдаагийн байгууллагын 102 дугаарын утсанд нийт 2089 гомдол мэдээлэл бүртгэгджээ. Үүнээс зөрчлийн дуудлага мэдээлэл 1710, хулгайтай холбоотой 24, гэр бүлийн хүчирхийллийн дуудлага 136, гэмт хэргийн шинжтэй 89 мэдээлэл бүртгэгдсэн байна.

Үүнээс гадна автомашин согтуу жолоодсон 83, олон нийтийн газар зүй бусаар биеэ авч явж, танхайрсан 100, хүний биед халдсан 48, Архидан согтуурахтай тэмцэх тухай хууль зөрчсөн 145, эрүүлжүүлэх байранд хоносон 155, оршин суугчдын амгалан тайван байдал алдагдуулсан 67 тохиолдол гарчээ.

мэдээ нийгэм цаг-үе

Ж.Байгалмаа: 0-17 насныхны халдварын 45.2 хувийг 5-11 насны хүүхдийн өвчлөл эзэлж байна

ХӨСҮТ-ийн дэд захирал Ж.Байгалмаа өнгөрсөн долоо хоногт коронавируст халдварын нөхцөл байдал хэрхэн өөрчлөгдсөн талаар мэдээлэл өглөө.

Тэрбээр “Манай улсад өмнө нь халдварын хоёр давалгаа гарсан. Сүүлийн өдрүүдэд өдөрт бүртгэгдэх тохиолдлын тоо нэмэгдэж байна. Улаанбаатар хотод шинжилгээнд эерэг эзлэх хувь ойролцоогоор 10 хувьтай байсан бол сүүлийн долоо хоногт 20 орчим хувьд хүрлээ. Орон нутгийн хувьд долдугаар сарын дундаас халдварын тохиолдол нэмэгдэж байгаа бөгөөд шинжилгээнд эерэг эзлэх хувь маш өндөр байна.

Нийт бүртгэгдэж байгаа тохиолдлуудын 73 хувь нь орон нутагт, 27 хувь нь Улаанбаатар хотод бүртгэгдэж байгаа. Хүн амын хөл хөдөлгөөн огцом нэмэгдээд байна.

Наймдугаар сарын 28-нд хийсэн тооцооллоор Улаанбаатарт дараагийн 14 хоногт өдөрт бүртгэгдэж, тохиолдлын тоо 900-аас давахаар байгаа.

Дельта хувилбарын тандалтын хүрээнд эерэг сорьцуудад шинжилгээ хийж байгаа бөгөөд сүүлийн долоо хоногт хийсэн шинжилгээгээр 35 хувьд нь дельта хувилбар илэрсэн.

0-17 насны хүүхдийн өвчлөл нийт өвчлөлийн 19.6 хувийг эзэлж байгаа. Есдүгээр сарын 2-ны байдлаар 43 мянган хүүхэд өвчлөөд байгаагийн 70.4 хувь нь Улаанбаатарт бүртгэгдсэн. Хүүхдүүдийн халдвар авах тохиолдол наймдугаар сарын дундаас нэмэгдэж байгаа бөгөөд 5-11 насны хүүхдийн өвчлөл хамгийн өндөр хувьтай байна.

Эмнэлэгт хэвтэн эмчлүүлэгчдэд илэрч буй эмнэл зүйн шинж тэмдэгийн хувьд мэдэгдэхүйц өөрчлөлт ажиглагдахгүй байгаа. Дельта хувилбарын халдвар тархаад байгаа энэ үед хөнгөн, хүнд хүмүүсийн эзлэх хувьд өөрчлөлт ороогүй. Харин маш хүнд хүний тоо үл ялиг буурч хүндэвтэр хүний тоо ялимгүй нэмэгдсэн.

Нас баралт халдварын өмнөх давалгаанаас хойш тогтмол буурч байсан ч дараагийн долоо хоногт ялимгүй нэмэгдэх хандлага ажиглагдаж байна” хэмээн хэллээ.

Өвчлөл хэрхэн, ямар орчинд тархаж байна вэ?

мэдээ спорт

Дэлхийн шатрын онлайн олимпиадад Монголоос 12 тамирчин оролцоно

Post author By
Post date 2021-09-03
No Comments on Дэлхийн шатрын онлайн олимпиадад Монголоос 12 тамирчин оролцоно

Дэлхийн шатрын онлайн олимпиад энэ сарын 8-15-ны хооронд зохион байгуулагдана.

Үүнд 155 улсын баг, тамирчин таван хэсэгт хуваагдан оролцож байгаа бөгөөд Монгол улсын баг энэ жил дэлхийн шилдгүүдийн хамтаар тэргүүн хэсэгт тоглохоор болсон.

Олимпиадад манай улсаас 12 тамирчин, хоёр дасгалжуулагчийн бүрэлдэхүүнтэй баг оролцоно.