Month: August 2021

Засгийн газрын хуралдаанаар Байгаль орчныг хамгаалах тухай хуульд нэмэлт оруулах тухай болон дагалдах хуулийн төслийг хэлэлцэн дэмжиж, УИХ-д өргөн мэдүүлэхээр тогтлоо.

Байгаль орчныг хамгаалах тухай хуулийн “Байгаль орчныг хамгаалах талаарх иргэний эрх, үүрэг” гэсэн 14 дүгээр зүйлд “тухайн нутаг дэвсгэрийн хүрээнд газрын хэвлийн баялгийн ашиглалтын нөхцөл байдал, байгаль орчинд үзүүлж байгаа нөлөөлөл, нөхөн сэргээлт болон эрх бүхий байгууллагаас хяналтын чиглэлээр хэрэгжүүлж байгаа ажлын талаар мэдэх” эрхийг хангах заалтыг нэмж байна.

Мөн хуулийн “Аймаг, нийслэл, сум дүүргийн Засаг даргын бүрэн эрх” гэсэн 16, 17 дугаар зүйлд “харъяа нутаг дэвсгэрийн хүрээнд газрын хэвлийн баялгийг ашиглалтын нөхцөл байдал, байгаль орчинд үзүүлж байгаа нөлөөлөл, нөхөн сэргээлт болон эрх бүхий байгууллагаас хяналтын чиглэлээр хэрэгжүүлж байгаа арга хэмжээний талаар иргэдэд нээлттэй мэдээлэх, байгаль орчны төлөв байдлын мэдээлэлд тусгаж, иргэдийн Төлөөлөгчдийн хуралд тайлагнах” гэсэн үүрэгжүүлсэн заалтыг нэмэхээр тусгасан байна.

Түгжрэлийг бууруулахад шууд нөлөө үзүүлэх 223 км авто замыг ирэх гурван жилд барих төлөвлөгөөний дагуу шинэ тойрог 71,5, гол ба туслах 73,5 км, авто зам, гол болон туслах гудамж 78 км зам тус тус баригдана. Зураг төслийг энэ онд боловсруулж, 2022 оны дөрөвдүгээр сараас эхлүүлэхээр төлөвлөжээ.

Улаанбаатар хотын төвлөрлийг сааруулах, авто замын түгжрэлийг бууруулах нэгдсэн төсөл арга хэмжээний хэрэгжилтийн талаар Засгийн газрын гишүүдэд танилцууллаа.

Дэлхийн банкны “Улаанбаатар хотын тогтвортой авто зам, тээвэр төсөл”-ийн зээлийн хэлэлцээрийг өнгөрөгч зургадугаар сард Засгийн газраар хэлэлцүүлсэн. УИХ-аар зээлийн хэлэлцээрийг соёрхон батлуулах бэлтгэл ажлыг хангаж байна. Энэ зээлийн хүрээнд Улаанбаатар хотын авто зам, тээврийн хөдөлгөөний аюулгүй байдлыг хангах, авто замын сүлжээг засварлах, шинэчлэх, шинээр барих, шинэчлэлт хийх, нийтийн тээвэр, замын хөдөлгөөний удирдлагын төвийг шинэчилж, нэгдсэн ухаалаг системийг бий болгох замаар түгжрэлийг бууруулах, хотын зам, тээврийн стратеги судалгаа, чадавхи бэхжүүлэх цогц ажлыг таван жилийн хугацаанд хийж хэрэгжүүлэх юм байна.

Хотын төвлөрлийг сааруулах хүрээнд томоохон зах худалдааны төвийг нүүлгэх, ачааны терминал, логистикийн төвийг байгуулах тооцоо судалгаа хийж аж ахуйн нэгж, байгууллагуудтай уулзалт зохион байгуулж буй аж.

Засгийн газраас хэрэгжүүлж буй Түрээсийн орон сууц хөтөлбөрийн хүрээнд Хангай хотхонд орон сууц түрээслэн амьдарч буй иргэд зарим асуудлыг шийдвэрлэж өгөхийг хүсжээ.

Энэ талаар Барилга, хот байгуулалтын сайд Б.Мөнхбаатар “Улсын хэмжээнд 3,000 гаруй түрээсийн орон сууцны сан бий. Үүний 2,000 гаруй нь нийслэл хотод бий. Тодруулбал, Буянт Ухаа-1, 2, Хангай хотхон юм.

Хангай хотхоны иргэд үндсэн гурван асуудлыг хөндөж байгаа. Уг хотхоны иргэд 240-400 мянган төгрөгөөр түрээсэлдэг. Өмнө нь иргэд зөвхөн түрээсэлж байсан бол түрээслээд өмчлөх журам гарснаар тухайн байраа өмчилж авах боломжтой болсон.

Энэ журмаар хоёр боломжийг нээсэн. Эхнийх нь түрээсийн төлбөрийн зэрэгцээ илүү мөнгө төлж байгаад урьдчилгааны 30 хувьд хүрмэгц ипотекийн зээлд хамрагдах. Дараах нь түрээсээсээ илүү мөнгө төлж байгаад өмчлөх юм.

Хангай хотхоны зарим иргэн нэгдүгээрт метр квадратын зөрүүний асуудлыг гарган тавьж байна. 2016 оны тавдугаар сарын 31-ний Засгийн газрын хуралдаанаар тухайн үеийн Барилга, хот байгуулалтын сайд Г.Баянсэлэнгэд даалган, уг хотхоноос 15 тэрбум төгрөгөөр орон сууц худалдаж авах тогтоол баталсан байдаг. Үүнтэй холбоотойгоор “Бэрэн” компанийн барьсан Хангай хотхоноос нийт 7,974 метр квадрат талбайг хувааж авсан. Метр квадратын үнэ нь 1,880,000 төгрөг байгаа юм.

Тухайн үед төрийн албан хаагчид, иргэдтэй гэрээ байгуулахдаа хавсралтаар өгсөн мэдэгдэлд нэг метр квадратыг 1,280,000 төгрөг байхаар бичсэн байгаа юм. Үүнээс болж хууль хүчний байгууллагууд тодорхой албан тушаалтнуудыг шалгаж байна. Энэ асуудлаар түрээслэгч нартай уулзсан бөгөөд хуулийн байгууллага шалгаж байгаа тул бид ямар нэг арга хэмжээ авах боломжгүй байгааг хэлсэн.

Хоёрдугаарт, таван жилийн хугацаанд төлсөн түрээсийн төлбөрөө урьдчилгаанд тооцуулъя гэсэн. Ийм боломжгүй. Төлсөн мөнгө нь СӨХ, цэвэрлэгээ үйлчилгээнд зарцуулагдсан тул урьдчилгаанд тооцохгүй.

Гуравдугаарт, түрээслээд өмчлөх хугацаа таван жил байгааг 15 жил болгох саналыг тавьсан. Өнөөдрийн мөрдөгдөж байгаа журмын дагуу улсын төсвийн хөрөнгөөр баригдсан орон сууцны үнийг таван жил, гадаад, дотоодын зээл, буцалтгүй тусламж, хувийн хэвшлийн хөрөнгөөр баригдсан орон сууцны үнийг 15 хүртэлх жилийн хугацаанд төлснөөр өмчилж авах боломжтой. Энэ асуудлаар Засгийн газарт танилцуулж, Сангийн яамтай ярилцах болно” гэлээ.

Мөн зарим иргэний түрээсийн хугацаа дуусаж байгаа тул сунгах боломжийг эрэлхийлж байгааг сайд Б.Мөнхбаатар мэдэгдэв.

Мэргэжлийн хяналтын байгууллагын цаг үеийн мэдээллийг та бүхэнд хүргэе.

Халдваргүйжүүлэлт:

Улсын хэмжээнд нийт 172 аж ахуйн нэгж, байгууллага, нийтийн эзэмшлийн талбай, гудамж зэрэг 28.970 м2 талбайд хийгдсэн урьдчилан сэргийлэх халдваргүйжүүлэлт, 243 объектын 71.552 м2 талбайд хийгдсэн голомтын эцсийн халдваргүйжүүлэлтэд хяналт тавин ажиллав. Үүнээс Улаанбаатар хотод 83 обьектын 18.340 м2 талбайд хийгдсэн урьдчилан сэргийлэх халдваргүйжүүлэлтэд хяналт тавин ажиллалаа.

Хяналт шалгалтаар зөрчил илрээгүй байна.

Вакцинжуулалт:

Нийслэлийн Сонгинохайрхан, Сүхбаатар дүүрэгт байрлах вакцинжуулалтын цэгүүдэд хяналт шалгалт хийхэд ажиглалт болон хүлээлгийн өрөө хүрэлцээгүй, яаралтай тусламжийн эмч, ажилтан, тоног төхөөрөмж дутуу, шар бүсийг зохион байгуулаагүй, аюултай хог хаягдал түр хадгалах өрөөгүй, хүн хоорондын зай барих тэмдэг, тэмдэглэгээгүй зэрэг дутагдал илэрчээ. Иймд зөрчлийг арилгуулахаар мэргэжил арга зүйгээр хангав.

Мөн Сүхбаатар дүүргийн вакцинжуулалтын цэгт вакцинд хамрагдах иргэд гүйцэд ирээгүй тул задалсан 5 хүн/тун “Файзер” вакциныг устгалд оруулсан байна. Коронавирусийн эсрэг вакцин нь үйлдвэрлэгч, нэр төрөл, савлагаанаас хамааран 1, 6, 10 хүн/тун зэргээр савлагдсан байдаг. Иймд дахин энэ төрлийн дутагдал гаргахгүй байх үүднээс тодорхой тооны иргэд цугласны дараа вакцины савлагааг задлаж, вакцинжуулалт хийхийг зөвлөлөө.

Вакцинжуулалтын цэгүүдэд хувийн хамгаалах хэрэгсэл, халдваргүйжүүлэлтийн бодисын нөөц хангалттай, дархлалын дараа урвал хүндрэл гараагүй байна.

Авто тээврийн шалган нэвтрүүлэх товчоо:

Улсын хэмжээнд авто замын шалган нэвтрүүлэх постод 309 байцаагч ажиллаж нийт 6,315 авто машинаар нэвтэрсэн 14,365 иргэнд коронавируст халдвараас урьдчилан сэргийлэх зөвлөгөө өглөө.

Улаанбаатар хотын авто тээврийн шалган нэвтрүүлэх товчоодоор /2021.08.10-ны 17:00 цагийн байдлаар/ хот руу орох чиглэлд 555 тээврийн хэрэгслээр 1092 зорчигч, хотоос гарах чиглэлд 781 тээврийн хэрэгслээр 1465 зорчигч нэвтэрсэн байна.

Хилийн хяналт шалгалт:

Улсын хилээр орсон 925 тээврийн хэрэгсэл, 1129 жолооч, зорчигчид эрүүл мэндийн тандалт хийн нэвтрүүлж, улсын хилээр гарсан 852 тээврийн хэрэгсэлд халдваргүйжүүлэлт хийж, хяналт тавьж, 1118 зорчигч, жолоочид эрүүл мэндийн тандалт хийв.

Лабораторийн мэдээлэл:

2021.08.10-ны өдөр улсын хэмжээнд МХБ-ын харьяа 25 лабораторид 209 дээж шинжилгээнд ирж, 148 дээжийн шинжилгээний хариу гарчээ. Шаардлага хангаагүй 4 дээж байна.

Халдвар хамгааллын дэглэм, түр журмын хэрэгжилт:

Нийслэлд 561 аж ахуйн нэгж байгууллага, иргэнийг хамруулан хяналт шалгалт хийж 33 зөрчил илрүүлэн 24 буюу 72.7 хувийг газар дээр нь арилгуулав.

Илэрч буй зөрчил дутагдлыг дурдвал:

• Коронавируст халдвар /Ковид-19/-аас сэргийлэх арга хэмжээг зохион байгуулах түр журмыг зөрчсөн -22
• Тусгай нөхцөл шаардлага зөрчсөн – 3
• Цаг хэтрүүлэн ажилласан – 1
• Тусгай зөвшөөрөл, батламжгүй үйл ажиллагаа явуулсан – 4
• Гар дээрээс согтууруулах ундаа худалдаалсан – 3