Month: August 2021

Завхан аймагт JCI байгууллагын “SAVE ANGELS” төсөл хэрэгжиж эхэллээ гэж аймгийн Нэгдсэн эмнэлгээс мэдээлэв.

“Төслийн хүрээнд нярайн нэн шаардлагатай тоног төхөөрөмжүүд нийлүүлэгдлээ. Мөн бусад төслийн хүрээнд эх баригч, эмч, мэргэжилтнүүдэд сургалт явуулна. Ингэснээр сүүлийн үеийн шаардлагатай тоног төхөөрөмжүүд дээр ажиллах эмч мэргэжилтнүүдийг сургаж дадлагажуулах юм. “SAVE ANGELS” төслийн 105 сая төгрөгийн үнэ бүхий дээрх тоног төхөөрөмжүүд нь нярайн эрчимт эмчилгээнд нэн чухал төхөөрөмжүүд юм. Цаашид тус аймагт нярайн эндэгдэл гарах эрсдэлээс хамгаалж чадна” гэв. Ташрамд Аймгийн 50 ортой Амаржих газарт өдөрт дунджаар 5-8 эмэгтэй төрдөг. 15 ортой эмэгтэйчүүдийн тасагтаа төрөх насны эмэгтэйчүүдийг оношилж, хэвтүүлэн эмчилж байна.

Орон нутагт нярайн эрчимт эмчилгээний багаж хүрэлцээ муу байдаг

JCI Монгол байгууллагын залуусын санаачилгаар 2015 оноос эхлэн нярайн эндэгдлийг буруулах зорилготой Save Angels төсөл зургаа дахь жилдээ амжилттай хэрэгжиж байна.

Тус байгууллага 2015 оноос эхлэн нярайн эндэгдлийг бууруулах хөтөлбөрийг санаачлан эхлүүлж, хөтөлбөрийн хүрээнд тогтвортой урт хугацаанд шат дараалсан төсөл арга хэмжээ хэрэгжүүлж байна. “Save Angels” хөтөлбөрийн хүрээнд эх хүүхдийн эрүүл мэндийг хамгаалах Улаанбаатар хот дахь төв эмнэлгүүдтэй хамтран ажиллаж тэдгээр эмнэлгүүдэд нэн шаардлагатай тоног төхөөрөмжүүдийг хандивлажээ. Тухайлбал хүүхдийн түргэн тусламжийн дуудлагын тусгай зориулалтын автомашин, дутуу болон бага жинтэй нярайн эмчилгээ сувилгааны чанар хүртээмжийг сайжруулах зорилгоор нярайн эрчимт эмчилгээний тасгийг шинэчлэн зохион байгуулсан байна. 2021 онд тус байгууллага орон нутгийн амаржих газруудад эх нярайн шаардлагатай тоног төхөөрөмжүүдийг нийлүүлэхэд анхааран ажиллаж байна. Ялангуяа хөдөө орон нутагт дутуу болон бага жинтэй нярайд шаардлагатай тоног төхөөрөмжийн хүрэлцээ муу байдаг. Тэгвэл тус төслөөс манай аймгийн Амаржих газарт нярайн тусламж үйлчилгээнд нэн шаардлагатай багаж, тоног төхөөрөмжийг хандивлаад буй нь цаг үеэ олсон ажил боллоо гэж аймгийн Нэгдсэн эмнэлгээс нэмж дуулгав.

Ерөнхий сайд болон засгийн газрын гишүүд Хан-Уул дүүргийн 75 дугаар сургуульд ажиллав. 75 дугаар сургууль бол бүгдэд хүртээмжтэй төлөвлөлтийн жишиг барилга юм. Яг үүнтэй ижил 4 барилга Жайкагийн төслийн хүрээнд манай улсад баригдсан. Энэ сургуулиуд нь хөгжлийн бэрхшээлтэй иргэд болон бага насны хүүхдэд ээлтэй, гамшгаас сэргийлсэн, газар хөдлөлт, гал түймрийн үед хорогдох байрны зориулалттай. Байгаль орчинд ээлтэй эрчим хүчний хэмнэлттэй. Цаашид олон хүүхэд суралцах сургуулийн барилгыг энэ жишгээр барина.

Үүнээс гадна Өргөө цэцэрлэг, Хүрээ сургууль буюу цөөн хүүхэд суралцах төлөвлөлтийг хийж байна. Энэ нь цэцэрлэг сургууль хүртээмжгүй гэр хорооллын дунд 2-4 айлын газар чөлөөлж 50 ортой цэцэрлэг, 160 хүүхдийн суудалтай сургууль барих төлөвлөлтүүд юм. Кластер хэлбэрээр ажиллуулж захиргааны зардал хэмнэх боломжтой. Мөн сургууль, цэцэрлэггүй орон сууцны хорооллын дунд нэгдүгээр давхарт цэцэрлэг, сургууль байгуулах боломжтой.

Цаашид боловсролын салбарт хөрөнгө оруулалт, бүтээн байгуулалт хийхдээ Google maping буюу газарзүйн мэдээллийн системийг ашиглана гэж Боловсрол, шинжлэх ухааны яамнаас мэдээллээ.

2016 онд хийсэн судалгаагаар Улаанбаатар хот орчимд бамбай хоншоорт, рашааны гэх хоёр зүйлийн могой тархсан байдаг.

Бамбай хоншоорт могой нь хортой могойн төрөлд ордог. Хур бороо ихтэй үед үерийн усаар дамжих, мөн идэш тэжээл хайн хотын захын хэсгээр могой орж ирж байгаа бол хотын төв хэсэгт аялал зугаалгаар явсан иргэдийн тээврийн хэрэгслээр дамжин могой орж ирэх тохиолдол ажиглагдаж байна.

Иймд иргэд суурьшлын бүсэд могой харсан тохиолдолд Нийслэлийн Байгаль орчны газрын 11-323780, ажлын бус цагаар Нийслэлийн Шуурхай удирдлага зохицуулалтын төвийн 11-310005 дугаарын утсаар яаралтай мэдээлэл өгч, мэргэжлийн хүмүүс иртэл могойн байршлыг сайтар харж байх, хэрэв хатгуулсан тохиолдолд яаралтай эмнэлгийн байгууллагад хандана уу.

Суурьшлын бүсийн тэлэлттэй холбоотойгоор зэрлэг амьтдын тархац нутаг хумигдаж, улмаар идэш тэжээл хайх, гэмтэж бэртэх байдлаар хот руу орж ирэх тохиолдлууд нэмэгддэг.

2018 онд хот руу орж ирсэн амьтны 30 дуудлага ирсэн бол 2019 онд 43, 2020 онд 116 болж өссөн байна. Харин 2021 он гарсаар 53 удаагийн дуудлага хүлээн авсны дийлэнх хувийг хортой могойн дуудлага эзэлж байна.

Малчид, иргэдэд зориулсан мэдээ: Ойрын өдрүүдэд нутгийн хойд хэсгээр бороо, дуу цахилгаантай аадар бороо орж, нутгийн өмнөд хэсгээр хална.

2021 ОНЫ НАЙМДУГААР САРЫН 13-НЫ 20.00 ЦАГААС НАЙМДУГААР САРЫН 14-НИЙ 20.00 ЦАГ ХҮРТЭЛХ ЦАГ АГААРЫН УРЬДЧИЛСАН МЭДЭЭ

Хур тунадас: Нутгийн баруун хэсгээр үүлшинэ, бусад нутгаар солигдмол үүлтэй. Шөнөдөө баруун аймгуудын нутгийн баруун, төв болон говийн аймгуудын нутгийн зүүн хэсэг, зүүн аймгуудын нутгийн зарим газраар, өдөртөө баруун аймгуудын нутгийн баруун болон хойд, говийн аймгуудын нутгийн зүүн хэсэг, төв болон зүүн аймгуудын нутгийн зарим газраар бороо, дуу цахилгаантай аадар бороо орно.

Салхи: Нутгийн зүүн хэсгээр баруун хойноос, бусад нутгаар баруун өмнөөс секундэд 5-10 метр, зарим газраар борооны өмнө түр зуур ширүүснэ.

Агаарын температур: Шөнөдөө Монгол-Алтай, Хангай, Хөвсгөлийн уулархаг нутаг, Хүрэнбэлчир орчим, Завхан голын эх, Идэр, Эг, Үүр, Тэрэлж голын хөндийгөөр 3-8 градус, говийн бүс нутгийн өмнөд хэсгээр 16-21 градус, бусад нутгаар 10-15 градус, өдөртөө Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Эг, Үүр, Туул, Тэрэлж, Онон, Улз, Халх голын хөндийгөөр 19-24 градус, Их нууруудын хотгор болон говийн бүс нутгийн өмнөд хэсгээр 28-33 градус, бусад нутгаар 23-28 градус дулаан байна.

2021 ОНЫ НАЙМДУГААР САРЫН 15-НААС НАЙМДУГААР САРЫН 19-НИЙГ ХҮРТЭЛХ ЦАГ АГААРЫН УРЬДЧИЛСАН ТӨЛӨВ

Энэ сарын 15-нд баруун аймгуудын нутгийн хойд, төвийн аймгуудын нутгийн баруун хойд, зүүн аймгуудын нутгийн зүүн хэсгээр, 16-нд баруун аймгуудын нутгийн баруун, төвийн аймгуудын нутгийн хойд хэсгээр, 17-нд нутгийн баруун хагаст, 18-нд ихэнх нутгаар бороо, дуу цахилгаантай аадар бороо орно. Салхи наймдугаар сарын 17-нд Алтайн салбар уулсаар, 18-нд зарим газраар секундэд 13-15 метр, бусад хугацаанд нутгийн зарим газраар борооны өмнө түр зуур ширүүснэ.

Нутгийн өмнөд хэсгээр халж, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Завхан голын эх, Туул, Тэрэлж голын хөндийгөөр шөнөдөө 3-8 градус, өдөртөө 20-25 градус, говийн бүс нутгаар шөнөдөө 19-24 градус, өдөртөө 30-35 градус, бусад нутгаар шөнөдөө 11-16 градус, өдөртөө 25-30 градус дулаан байна. Энэ сарын 17-ноос баруун аймгуудын нутгийн хойд хэсгээр сэрүүснэ.

Баянгол дүүргийн дөрөвдүгээр хорооны нутаг дэвсгэрт, 20 дугаар сургуулийн хойд талд байрлах тоосгон гражуудыг чөлөөлж нийтийн эдэлбэр газар гаргажээ. Энэ байршилд 53 тоосгон байшин байсан бөгөөд Баянгол дүүргийн Засаг даргын 2021 оны А/351 дүгээр газар захирамжийн хүрээнд албадан чөлөөлөх ажлыг Нийслэлийн Газар зохион байгуулалтын албаны албан хаагчид хийж гүйцэтгэсэн байна.