Month: August 2021

Categories
мэдээ үндэсний-бөx цаг-үе

Аймгийн арслан Э.Нямаа Улсын аварга Э.Оюунболдоор тав давлаа

Монгол Улсад залуучуудын байгууллага үүсэж хөгжсөний 100 жил, Монголын үндэсний бөхийн холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан хүчит бөхийн барилдааны тавын даваа эхэллээ.

Энэ давааны эхэнд улсын аварга Э.Оюунболд Өмнөговь аймгийн Ноён сумын харьяат, “Хилчин” спорт хороо, “Эрхэт Монгол” группийн бөх, аймгийн арслан Э.Нямаад өвдөг шороодлоо.

Барилдаанд улсын аварга 4, улсын арслан 3, улсын гарьд 5, улсын заан 9, улсын харцага 18, улсын начин 64, нийт 103 улсын цолтон тэргүүтэй улс, аймгийн алдар цолтой 512 бөх хүч үзэж байгаа юм.

Тавын давааны ам авсан байдлыг танилцуулъя.

ТАВЫН ДАВАА

  1. Г.Эрхэмбаяр У.ав – Б.Хадбаатар А.а
  2. П.Бүрэнтөгс У.ав – Д.Төрболд А.а
  3. Э.Оюунболд У.ав – Э.Нямаа А.а
  4. Н.Жаргалбаяр У.з – Ц.Адьяа А.а
  5. Б.Батмөнх У.з – Ш.Дарханбат У.н
  6. М.Бадарч У.з – Б.Чимэдвандан У.н
  7. Б.Бат-Өлзий У.х – Х.Оргилболд А.а
  8. Д.Анар У.х – Н.Батсайхан А.а
  9. Д.Бат-Эрдэнэ У.х – Б.Уртнасан А.з
  10. Б.Зоригтбаатар У.х – Г.Өсөхбаяр А.а
  11. Ч.Хөхчирэнгэр У.н – Г.Жамбалдорж Ц.а
  12. Л.Батзориг У.н – Т.Довчинсэмбээ А.а
  13. Д.Амарсайхан У.н – Э.Ууганбаяр А.а
  14. Д.Хүдэрбулга У.н – Э.Мөнхбаатар А.а
  15. Ц.Мөнхбаяр У.н – Э.Энх-Амгалан А.з
  16. О.Мөнх-Эрдэнэ У.н – Э.Мөнхжаргал А.з
Categories
мэдээ улс-төр

Засгийн газар 200 хоногийн тайлангаа танилцуулав

Энэ оны нэгдүгээр сарын 27-ны өдөр Ерөнхий сайд Л.Оюун-Эрдэнэ одоогийн Ерөнхийлөгч У.Хүрэлсүхээс тамгаа гардаж авсан. Үүнээс хойш долоон сарын хугацаа өнгөрчээ.

Засгийн газар гүйцэтгэх засгийн эрхийг хүлээж аваад 200 хоногт ямар ажлууд хийснээ дараах постеруудаар танилцуулав.








Categories
мэдээ нийгэм

​Нийт 2.3 сая иргэн нийгмийн халамжид хамрагдаж байна


Улсын хэмжээнд нийгмийн халамжид хамрагдаж байгаа 2.3 сая иргэн байгаа нь өнгөрсөн оны мөн үеэс 113 мянгаар нэмэгдсэн талаар Үндэсний статистикийн хорооноос мэдээллээ.

2.3 сая иргэний 53 хувь нь хүүхдийн мөнгө авдаг аж. Үлдсэн нь тэтгэвэр, тэтгэмжийн үйлчилгээ авч байгаа болон олон хүүхэдтэй өрх толгойлсон эцэг, эхийн тэтгэмж авч буй иргэд байна.

Нийгмийн даатгалын сангийн орлого 1.9 их наяд төгрөгт хүрчээ. Тус сангаас энэ оны эхний долоон сарын байдлаар 457.4 мянган иргэн тэтгэвэр, тэтгэмж авч байгаа. Энэ нь өнгөрсөн оны мөн үетэй харьцуулахад 16.4 мянган хүнээр нэмэгдсэн үзүүлэл юм. Ингэж нэмэгдэхэд тэтгэврийн насны иргэдийн тоо 18.4 мянгаар нэмэгдсэн нь голлон нөлөөлжээ.

Categories
гадаад мэдээ

Францын хотуудад эсэргүүцлийн жагсаал өрнөв

Францын хотуудад “Ковид-19”-ийн эрүүл мэндийн гэрчилгээг эсэргүүцсэн жагсаал таван долоо хоног дараалан өрнөж байна.

Гэвч жагсаалд оролцсон хүмүүсийн тоо өмнөх долоо хоногийнхоос цөөрсөн аж. Тэд Парис, Марсель, Ницца, Монпелье зэрэг хотын гудамжуудаар “Гэрчилгээ=Ялгаварлах үзэл” хэмээн бичсэн лоозонгуудыг барин “Эрх чөлөө, эрх чөлөө” хэмээн хашхирч байжээ.

Өнгөрсөн даваа гаригаас эхлэн Францын иргэд олон нийтийн газруудаар үйлчлүүлэхдээ вакцинд хамрагдсан эсэх,эсвэл саяхан өгсөн шинжилгээний хариугаа сөрөг гарсныг батлах гэрчилгээ үзүүлэх шаардлагатай болсон юм.

Засгийн газар ирэх долоо хоногоос эрүүл мэндийн гэрчилгээг шалгах ажлыг чангатгахаас гадна 10 дугаар сараас эмчийн заавар зөвлөгөөгүй тохиолдолд үнэгүй шинжилгээ авахгүй гэдгийг мэдэгджээ.

Эрүүл мэндийн гэрчилгээг эсэргүүцэгчид “Ковид-19”-ийн дөрөв дэх давлагааг хяналтад авч, эдийн засгийн сэргэх үйл явцад хувь нэмрээ оруулах ерөнхийлөгч Эмманюэль Макроны хууль тогтоомжийг эсэргүүцэж буй хүмүүстэй мөн нэгдсэн байна.

Дотоод хэргийн яамны мэдээлснээр, бямба гаригт болсон жагсаалд оролцсон хүмүүсийн тоо 215 мянга орчимд хүрчээ. Энэ сарын 17-нд болсон эхний жагсаалд 114 мянган хүн оролцож байсан бол түүнээс хойш аажмаар нэмэгдэж, наймдугаар сарын 7-нд болсон жагсаалд 237 мянга орчим хүн оролцсон юм.

France24

Орчуулсан

Г.АМАРСАНАА

Categories
мэдээ нийгэм

Долоо хоног бүрийн лхагва гаригт иргэдэд хууль, эрх зүйн үнэ төлбөргүй зөвлөгөө өгнө

НЗДТГ-аас “Нийслэлийн иргэдийн хууль, эрх зүйн боловсролыг дээшлүүлэх” дэд хөтөлбөрийн хүрээнд Монголын хуульчдын холбоотой хамтран сар бүрийн гурав дахь 7 хоногийн лхагва гаригт иргэдэд хууль, эрх зүйн үнэ төлбөргүй зөвлөгөө өгөх өдөрлөгийг тогтмол зохион байгуулдаг.

Энэ сарын өдөрлөг маргааш буюу 2021 оны наймдугаар сарын 18-ны 09:00-17:00 цагийн хооронд үргэлжилнэ. Иймд иргэн та 75050801, 75050802, 75050803, 75050804 дугаарын утсаар холбогдож хууль, эрх зүйн зөвлөгөө, мэдээлэл авах боломжтой.

Categories
амьдралын-өнгө мэдээ

Замын-Үүд сумаас Улаанбаатарт суралцдаг оюутнууд нэгдсэн журмаар нийтийн тээвэрт сууна

Хичээлийн шинэ жил эхлэхтэй холбогдуулан Дорноговь аймгийн Замын-Үүд сумын Онцгой комиссоос Улаанбаатарт суралцдаг тус сумын оюутан залуусыг нэгдсэн журмаар нийтийн тээврийн хэрэгслээр зорчуулахаар болжээ.

Оюутан сурагчдыг энэ сарын 20-ноос 25-ны хооронд зорчуулах бөгөөд зорчих бүртгэлийг сумын ЗДТГ зохион байгуулж, эмнэлгийн ажилтнууд түргэвчилсэн тестээр шинжилгээ авна.

“Ковид-19” цар тахлаас урьдчилан сэргийлэх зорилгоор дээрх шийдвэрийг гаргасан гэж сумын Онцгой комисоос мэдээлэв.

Categories
мэдээ үндэсний-бөx

Дөрвийн даваанд Улсын аварга С.Мөнхбат, гарьд Ө.Бат-Орших нар өвдөг шороодлоо

Монгол улсад залуучуудын байгууллага үүсэж хөгжсөний 100 жил, Монголын Үндэсний Бөхийн Холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан “Үндэсний бөх-Үнэт өв” бөхийн барилдаан дөрвийн даваа үргэлжилж байна.

Хүчит бөхийн барилдааны дөрвийн даваанд улсын аварга С.Мөнхбат аймгийн заан Э.Мөнхжаргалтай оноолт тааран барилдаж өвдөг шороодлоо.

Аварга гурвын даваанд аймгийн начин Т.Мөнх-Эрдэнийг амлан авч давсан.

Мөн дөрвийн даваанд улсын гарьд Ө.Бат-Орших аймгийн заан Э.Энх-Амгаланд, улсын харцага А.Цацабшир аймгийн арслан Г.Жамбалдоржид, улсын харцага О.Хангай аймгийн арслан Т.Довчинсэмбээд, улсын гарьд Б.Гончигдамба аймгийн заан Б.Уртнасанд өвдөг шороодлоо.

Categories
мэдээ үндэсний-бөx

Долоон аймагт цол олгох барилдаан боллоо

Цар тахлын нөхцөл байдлаас шалтгаалж үндэсний их баяр наадам хойшилсон. УОК задгай талбайд 128 бөх барилдахыг долдугаар сарын 24-ний хуралдаанаар зөвшөөрсөн. Энэ шийдвэрийг үндэслэн Монголын үндэсний бөхийн холбоо /МҮБХ/ аймгуудын бөхийн холбоодод үндэсний бөхөөр хичээллэж цол амжилтын төлөө яваа залуусын хөдөлмөрийг үнэлэж эрэмбэ тогтоож, цол олгох 128 бөхийн барилдаан зохион байгуулах санал хүргүүлсэн. Аймгууд саналыг хүлээн авч цол олгох барилдааныг зохион байгууллаа. Мөн Ховд аймагт “Баруун бүсийн хурд” уралдаанд зориулсан улс, аймгийн алдар цолтой бөхчүүдийн барилдааныг зохион байгуулсан. Барилдаануудын талаарх мэдээлэл, дүгнэлтийг нэгтгэсэн тоймыг хүргэж байна.

Ховд аймгийн цол олгох барилдаан

Ховд аймагт наймдугаар сарын 6-нд аймгийн цол олгох, эрэмбэ тогтоох үндэсний бөхийн барилдааныг зохион байгууллаа. Тус барилдаанд Ховд аймгийн харьяат аймаг, цэрэг, сумын цолтой бөхчүүд зодоглосон. Ховд аймгийн Булган сумын харьяат, олон улсын хэмжээний мастер, сумын заан Г.Ганхуяг энэ наадмын чимэг нь байлаа. Начны даваанд улсын цолтнуудын халгаа аймгийн харцага Б.Сосорбарамтай тунасан. Уран хурц барилдаантай хоёр хүчтэн цолны даваанд тунасан нь үзсэн хүн ч халгамаар. Барилдаан эхлээд удаагүй байхад Г.Ганхуяг баруун хөлийг нь авч дэрлэж давж аймгийн цолтны босгыг алхлаа. Тавын даваанд тунаж цолонд хүрнэ гэдэг бөх хүний бахдам сайхан амжилт төдийгүй олон түмний хайр хүндэтгэлийг татдаг.

Г.Ганхуяг уран хурц барилдаанаараа үзэгчдийг өндөлзүүлсээр түрүүлж үхэр жилийн ууган аймгийн арслан болсон. Ховд аймгийн Жаргалант сумын харьяат, сумын заан М.Баяржавхлан 20 насандаа аймгийн начин цолонд хүрч том цолтон болох ирээдүйтэйгээ харууллаа.

“Баруун бүсийн хурд” уралдаанд зориулсан улс, аймгийн алдар цолтой бөхчүүдийн барилдаан

Ховд аймагт зохион байгуулсан “Баруун бүсийн хурд” уралдаанд зориулсан улс, аймгийн алдар цолтой бөхчүүдийн барилдаан энэ сарын 9-нд болсон. Тус барилдаанд Ховд, Говь-Алтай, Булган аймгийн 96 бөх барилдлаа. 2021 оны анхны улсын алдар цолтой бөхчүүдийн барилдаанд Ховд аймгийн Буянт сумын харьяат, улсын харцага О.Хангай түрүүлж, Ховд аймгийн Чандмань сумын харьяат, улсын заан Б.Пүрэвсайхан үзүүрлэсэн юм.

Дорнод аймгийн цол олгох барилдаан

Дорнод аймагт зохиосон барилдаан олны дунд шуугиан дагууллаа. Энэ барилдаан Ховд аймагт болсон цол олгох барилдаанаас ялгаатай нь улсын цолтой бөх зодоглохыг зөвшөөрсөн юм. Дорнод аймгийн Дашбалбар сумын харьяат улсын харцага Д.Анар түрүүлж, Дорнод аймгийн Баян-Уул сумын харьяат, аймгийн арслан Г.Төрмөнх үзүүрлэсэн.

Хөвсгөл аймгийн цол олгох барилдаан

Хөвсгөл аймгийн цол олгох барилдаан бөхчүүдийн бүртгэлээс эхлээд их асуудал дагуулсан. Улсын цолтой бөхчүүд барилдах эсэх дээр удтал маргалдсаны эцэст бөхчүүдийг бүртгэж барилдахаар болсон юм. Хөвсгөл аймгийн цол олгох барилдаанд илт худлаа барилдах, өрсөлдөгчөө үл хүндэтгэж цохих, түлхэх ёс бус үйлдэл хийж үндэсний бөхийг нийгэмд буруугаар таниулсан учраас хүчингүйд тооцсон. Мөн МҮБХ-оос худлаа барилдсан болон үндэсний бөхийн ёс, дүрэм журмыг зөрчсөн бөхчүүдэд хариуцлага тооцно гэж мэдэгдсэн.

Сэлэнгэ аймгийн цол олгох барилдаан

Сэлэнгэ аймгийн Баянгол суманд цол олгох барилдаанд даваа болгоны дараа наадмын талбайг ариутгаж, халдвар хамгааллын дэглэм баримталж буйгаараа бусад аймгаас онцлог байлаа. Бөхчүүдийн бүртгэл, оноолт, барилдаан маргаангүй, шударга болсон нь бусад аймагт жишээ болохуйц байсан юм. Энэ барилдаанд Сэлэнгэ аймгийн Хүдэр сумын харьяат, аймгийн арслан Д.Төрболд түрүүлж аймгийн хурц чимэг, Сэлэнгэ аймгийн Сайхан сумын харьяат, сумын заан О.Төрбат үзүүрлэж аймгийн заан цолны болзол хангасан. Гэвч энэ барилдааныг аймгийн Засаг дарга, аймгийн онцгой комиссын зөвшөөрөлгүй зохиосон учраас хүчингүй болгож түрүүлж, үзүүрлэсэн болон тав давсан бөхчүүдийн цол чимгийг олгохгүй болсныг Сэлэнгэ аймгийн үндэсний бөхийн холбооны тэргүүн Т.Өсөх-Ирээдүй өчигдөр мэдэгдсэн.

Архангай аймгийн цол олгох барилдаан

Архангай аймгийн цол олгох барилдаанд 17 аймгийн арслан зодоглож сумын харцага, начин цолтой болон залуу бөхчүүд бөхийн тоо гүйцснээс барилдаж чадсангүй. Арван засгийн наадмаас хүчит бөхчүүдээрээ алдартай Архангайн наадам аргагүй чансаатай болж нэгийн даваанаасаа бөхийн өргөөнд шуугиулж барилддаг сумын заанууд хоорондоо таарч үзэгчдийг суудлаас нь өндөлзүүлж байлаа. Чансаа өндөр 128 бөхийн барилдаанд Архангай аймгийн Цэнхэр сумын харьяат, аймгийн харцага Б.Батсайхан түрүүлж аймгийн арслан цол, Жаргалант сумын харьяат, аймгийн нэмэх начин Б.Энх-Амгалан үзүүрлэж аймгийн заан цол хүртлээ. Энэ барилдаанд аймгийн шинэ цолтон төрөөгүй нь Архангайд цол авна гэдэг амаргүй даваа гэдгийг баталсан юм. Архангай аймгийн Хашаат сумын харьяат, сумын заан С.Сүхбат аймгийн арслан Д.Ням-Очир, Х.Мэндбаяр, П.Баярхүү, аймгийн заан Э.Мөнхбат нарыг дараалан өвдөг шороодуулж начны даваанд гарсан. Начны даваанд түрүү бөхтэй тунаж өвдөг шороодсон ч өөрийгөө бие бялдар, арга барил хэр хэмжээнд өсөж дэвжсэнээ харууллаа.

Баянхонгор аймгийн цол олгох барилдаан

Баянхонгор аймгийн цол олгох барилдаан Баянхонгор аймгийн Жинст сумын харьяат, аймгийн заан Т.Дүүрэнсаран түрүүлж аймгийн арслан цол, Богд сумын харьяат, сумын заан Э.Өлзийбаяр үзүүрлэж аймгийн заан цол хүртлээ.

Их шөвгийн дөрөвт Баянлиг сумын аймгийн арслан Ч.Алтангэрэл, Хүрээмарал сумын харьяат, аймгийн арслан Г.Жамбалдорж нар үлдсэн. Баянхонгор аймгийн баяр наадмын түрүү бөхийн тааварт байсан 20 настай аймгийн заан Э.Батмагнай тавын даваанд аймгийн арслан Ч.Алтангэрэлд өвдөг шороодсон байна.

Говь-Алтай аймгийн цол олгох барилдаан

Цар тахалтай үед баяр наадмаа зохион байгуулсан анхны аймаг Говь-Алтай боллоо. Ардын хувьсгалын 100 жилийн ой, Говь-Алтай аймаг байгуулагдсаны 98 жилийн ойн баяр наадам энэ сарын 14,15-нд Алтай хотод үзэгчгүй зохион байгуулагдсан. Баяр наадмын хүчит бөхийн барилдаанд Говь-Алтай аймгийн Шарга сумын харьяат, аймгийн арслан Э.Даваажаргал түрүүлж хурц чимэг, Халиун сумын харьяат, аймгийн арслан Б.Отгонбаатар үзүүрлэсэн. Говь-Алтай аймгийн Халиун сумын харьяат, сумын заан М.Өгөдэй уран хурц барилдаан гаргаж тав даван аймгийн начин цолны болзол хангасан юм.

Долоон барилдаанаас гурав нь цуцлагдлаа. Дорнод, Сэлэнгэ, Хөвсгөл аймгийн баяр наадамд түрүүлж, үзүүрлэж, шөвгөрсөн бөхчүүдийн цол чимгийг тооцохгүй болсон. Аймгийн арслан дөрөв, аймгийн заан хоёр, аймгийн начин гурав төржээ.

Categories
гадаад мэдээ улс-төр

НҮБ-ын Аюулгүйн Зөвлөл яаралтай хуралдана

НҮБ-ын Аюулгүйн зөвлөл Афганистан дахь нөхцөл байдлын талаар даваа гаригийн өглөө хуралдана гэж тус байгууллагад ойр эх сурвалж “TASS” агентлагт мэдээлжээ.Эх сурвалжийн мэдээлснээр, Аюулгүйн зөвлөл наймдугаар сарын 16-ны өглөө Афганистаны асуудлаар хуралдах аж. Аюулгүйн зөвлөлийн өглөөний хуралдаан ихэвчлэн орон нутгийн цагаар 10 цагт эхэлдэг байна.

“Al Arabiya” телевизийн мэдээлснээр, “Талибан” хөдөлгөөний босогчид Афганистаны нийслэл Кабул хот руу ням гаригт ямар нэгэн эсэргүүцэлтэй тулгарахгүйгээр нэвтэрч, Засгийн газрын байруудыг хяналтдаа авчээ. Үүний зэрэгцээ Афганистаны ерөнхийлөгч Ашраф Гани улс орноо орхин явсан байна. Талибанчууд нийслэлийг ойрын хэдэн цагт бүрэн хяналтдаа оруулна гэдгээ мэдэгдээд байна.

TASS

Орчуулсан

Г.АМАРСАНАА

Categories
мэдээ энтертаймент-ертөнц

Мадонна 63 насныхаа төрсөн өдрөө Италид тэмдэглэжээ


Өчигдөр Америкийн поп дууны хатан гэгдэх Мадонна 63 насныхаа төрсөн өдрөө Итали улсад гэр бүл, найзуудынхаа хамт тэмдэглэжээ.

1958 оны наймдугаар сарын 16-ны өдөр төрсөн бөгөөд ийнхүү 63 нас хүрч байгаа аж.

Тэрээр анх 1978 онд бүжигчнээр урлагийн ертөнцөд хөл тавьж байсан. Хожим нь ганцаарчлан дуулж эхэлснээр амжилтын гараагаа эхлүүлсэн билээ. 1983 онд анхны цомгоо хэвлүүлж байжээ.

Түүний гаргасан бүхий л цомог, дууны бичилт, хөгжмийн хэмнэл нь өвөрмөц.

No description available.

“Like a Virgin”, “Papa Don’t Preach”, “Like a Prayer”, “Vogue”, “Frozen”, “Music”, “Hung Up” болон “4 Minutes” зэрэг дуунууд нь дэлхийн улс орнуудын хөгжмийн жагсаалтуудыг тэргүүлж байсан билээ.

No description available.1979 онд кинонд тоглон дэлгэцийн бүтээлийн гараагаа эхлүүлж байсан тэр хожмоо “Алтан бөмбөрцөг”-ийн хөгжимт инээдмийн бүтээлийн Шилдэг эмэгтэй жүжигчин шагналыг Эвита (1996) кинонд бүтээсэн дүрээрээ хүртэж байв. Мадонна дэлхий даяар цомгоо 300 сая хувиар борлуулснаараа “Гиннессийн дээд амжилтын ном”-нд бичигдсэн байдаг.

No description available.

Б.Ангирмаа