Month: August 2021

Бүгд Найрамдах Солонгос Улсын Гадаад харилцааны яамнаас “Зүүн Хойд Азийн Эрүүл мэнд, халдвар хамгааллын салбарын хамтын нийгэмлэг” санаачилгын хүрээнд тус улсын “SD Biosensor” үйлдвэрлэгчийн 300 мянган ам.долларын үнэ бүхий 2,850 ширхэг багц буюу 71,250 ширхэг түргэвчилсэн оношлуурыг хандивлаж байгааг БНСУ-аас Монгол Улсад суугаа Онц бөгөөд бүрэн эрхт Элчин сайд ноён Ли Ё Хун өнөөдөр Эрүүл мэндийн яаманд хүлээлгэн өглөө. Уг арга хэмжээнд БНСУ-аас Монгол Улсад суугаа Элчин сайдын яам, Гадаад харилцааны яам болон ЭМЯ-ны холбогдох албаны хүмүүс оролцлоо.

Оношлуурыг хүлээн авах үеэр Монгол Улсын Засгийн газрын гишүүн, Эрүүл мэндийн сайд С.Энхболд “КОВИД-19” халдварын цар тахлын эхэн үеэс БНСУ-аас Монгол Улсад “КОВИД-19” халдвартай тэмцэх, сэргийлэхэд зориулж лабораторийн тоног төхөөрөмж, оношлуур, эмнэлгийн болон хувийн хамгаалах хэрэгслийн тусламжийг удаа дараа үзүүлж ирсэн нь цар тахалтай тэмцэх, эрүүл мэндийн байгууллагын хариу арга хэмжээ, бэлэн байдлыг хангах, эмч мэргэжилтнийг чадавхжуулах, лабораторийн тоног төхөөрөмж, оношлуур, хувийн хамгаалах хэрэгслийн нөөцийг бүрдүүлэхэд үнэтэй хувь нэмэр оруулсныг онцлон тэмдэглэж, Засгийн газрын нэрийн өмнөөс болон салбарынхаа нэрийн өмнөөс талархал илэрхийллээ. Элчин сайд Ли Ё Хун хэлэхдээ “КОВИД-19” халдварын цар тахлын хүнд сорилтыг даван туулахад улс орнуудын нягт хамтын ажиллагаа, харилцан ойлголцол, дэмжлэг туслалцаа нэн чухал болохыг онцоллоо.

Тэрбээр хүн амын дунд коронавирусийн тархалт тууштай буурахгүй байгаа нөхцөлд БНСУ-ын “SD Biosensor” үйлдвэрлэгчийн “КОВИД-19” халдварын эсрэгтөрөгчийг илрүүлэх түргэвчилсэн оношлуурыг хүлээлгэн өгч байгаа нь цаг үеэ олсон нэн чухал ач холбогдолтой болохыг онцлоод эдгээр оношлуур халдварыг богино хугацаанд илрүүлэхэд нь туслах болно гэдэгт итгэлтэй байна гэлээ. Элчин сайд Ли Ё Хун хэлэхдээ “КОВИД-19” халдварын цар тахлын хүнд сорилтыг даван туулахад улс орнуудын нягт хамтын ажиллагаа, харилцан ойлголцол, дэмжлэг туслалцаа нэн чухал болохыг онцлоод БНСУ-ын Ерөнхийлөгч Мүн Жэ Ин- ийн санаачилсан “Зүүн Хойд Азийн Эрүүл мэнд, халдвар хамгааллын салбарын хамтын нийгэмлэг”-ийн хүрээнд олгосон тусламж нь дээрх санаачилгын хүрээний цаашдын хамтын ажиллагааны эхлэл болж байгааг тэмдэглэв.

Энэ хичээлийн жил нийслэлийн 25 цэцэрлэгийн 60 бүлэгт туршилтаар ээлжийн багш ажиллуулахаар болсон билээ. Ээлжийн багштай болсноор цэцэрлэгийн эхлэх болох тарах цагийн хуваарьт өөрчлөлт орох юм. Сонгогдсон цэцэрлэгийн хүүхдүүдийг аав ээж нь өглөө 07:00-09:30 цагийн хооронд хүргэж өгөөд орой хүргэж өгсөн цагаас хамааран 17:30-20:00 цагийн хооронд авна. Ингэснээр:

• Замын түгжрэл буурна
• Цэцэрлэгийн үндсэн багшийн ачааллыг багасгаж, өөрийгөө хөгжүүлэх боломжийг нэмэгдүүлнэ
• Аав ээжүүд бүтэн цагаар ажиллах боломж бүрдэх ач холбогдолтой гэж үзжээ.

Ээлжийн багш нь Сургуулийн өмнөх боловсролын сургуулийн төгсөх ангийн оюутнууд байна.

Тэд үндсэн багшийн ажил дууссаны дараа буюу 16:30-20:00 цагийн хооронд ажиллаж, хөдөлмөрийн хөлсний доод хэмжээгээр цалинжина. Суралцангаа ажиллах нь дадлагажих боломж, төгсөөд шууд ажлын байртай болох ач холбогдолтой.

Туршилтаар ээлжийн багш ажиллуулах шийдвэрийн талаар Ерөнхий сайд Л.Оюун-Эрдэнэ “Манай Засгийн газар нийслэлийн тулгамдсан асуудал болох түгжрэлийг бууруулахыг зорьж байгаа. Түгжрэл бол маш олон хүчин зүйлээс шалтгаалах цогц асуудал юм. Тиймээс түгжрэлийг бууруулахад салбар бүрийн сайд нар хувь нэмрээ оруулах цогц бодлого хэрэгжүүлэх нь зүйтэй гэж үзсэн.

Боловсрол, шинжлэх ухааны сайд хамгийн түрүүнд зөв манлайллыг эхлүүлсэн. Энэ нь туршилтаар 25 цэцэрлэгийн цагийг уртасган 07:00-20:00 цагийн хооронд ажиллуулах шийдвэр юм.

Ингэснээр хүүхдээ 07:30 цагт хүргэх, 17:30 цагт авах гэж түгжрэх шаардлагагүй болж байна. Нөгөө талд хүүхдийг хэтэрхий урт хугацаагаар цэцэрлэгт нь байлгах юм бишүү гэдэг шүүмжлэл гарч байгаа. Үүнийг тухайн цэцэрлэг нь зохицуулна.

Цэцэрлэгийн тухайд хамгийн их түгжрэлтэй газарт байрладаг 25 цэцэрлэгийг сонгож байгаа. Энэ ажил маань тодорхой хэмжээнд нөлөө үзүүлэх юм бол цаашид нийслэлийн хэмжээнд ирэх жилийн улсын төсөвт тусгаж шийдвэрлэнэ” гэсэн юм.

Боловсрол, шинжлэх ухааны сайд Л.Энх-Амгалан “Хүүхдээ цэцэрлэгт нь хүргэж өгөх, авах гэсэн эцэг эхчүүдийн хөдөлгөөний ачаалал өглөө, оройн түгжрэлийн 25-30 хувийг тус бүр эзэлж байна. Тиймээс бид нийслэлийн хамгийн их ачаалалтай байдаг 25 цэг дэх цэцэрлэгийн 60 бүлгийг сонгож, эцэг эхчүүдэд боломж олгож байна.

Энэхүү шийдвэр нь зөвхөн эцэг, эхчүүдээс гадна цэцэрлэгийн багш нарын ачааллыг бууруулахад чиглэгдэж байгаа юм. Сургуулийн өмнөх боловсролын багш нар өдөрт хамгийн багадаа 10-11 цаг ажилладаг. Хүүхэд нэг бүртэй ажиллах, өөрийгөө хөгжүүлэх боломж нь хомс байдаг. Тиймээс энэ ажил үр дүнд хүрэх юм бол нийслэл, улсын хэмжээнд энэ туршлагыг нэвтрүүлж, шаардлагатай зардлыг улсын төсөвт суулгах боломжой” гэлээ.

“Олон улсын гал унтраах техникийн олон төрөлт спортын холбоо”-ны 20 дахь удаагийн олон улсын хуралдааны шийдвэрийн дагуу Бүгд Найрамдах Казахстан Улсын Караганда хотод “Гал унтраах техникийн олон төрөлт спорт”-ын насанд хүрэгчдийн 16 дахь удаагийн дэлхийн аварга шалгаруулах тэмцээн 2021 оны наймдугаар сарын 30-ны өдрөөс есдүгээр сарын 06-ны өдрүүдэд зохион байгуулагдах гэж байна.

Тэмцээн “довтолгооны шат, саадтай 100 метр, 4х100 метрийн буухиа гүйлт, байлдааны тархалт” гэсэн 4 төрлөөр зохион байгуулагдаж аваргуудаа шалгаруулна.

Манай улсын баг тамирчид Дэлхийн аварга шалгаруулах тэмцээнд оролцох нэгдсэн бэлтгэл сургуулилтад хамрагдаж байгаа бөгөөд шигшээ багийн ахлагчаар ОБЕГ-ын Гал түймэртэй тэмцэх газрын дарга, хурандаа Ц.Нямбаяр, дасгалжуулагчаар Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн захирагч, хошууч Н.Адьяадорж нар ажиллаж байна.

Манай баг тамирчид 2017 онд Турк улсын Измир хотноо зохион байгуулагдсан Гал унтраах техникийн олон төрөлт спортын 13 дахь удаагийн дэлхийн аварга шалгаруулах тэмцээний “Байлдааны тархалт”-ын төрөлд 27:08 секундын амжилтаар хүрэл медаль хүртэж байсан билээ.

Энэхүү ДАШТ-ний “Довтолгооны шатны” төрөлд дундын шүүгчээр Онцгой байдлын ерөнхий газрын Гал түймэртэй тэмцэх газрын дарга, хурандаа Ц.Нямбаяр ажиллах юм.

Монгол Улсын баг тамирчиддаа спортын өндөр амжилтыг хүсэн ерөөе гэж Онцгой байдлын ерөнхий газраас мэдээллээ.