Month: August 2021

Хот, нийтийн аж ахуй, инженерийн дэд бүтцийн ашиглалт, үйлчилгээний нэгдсэн хяналт удирдлагын UB ENGINEERING системийн сургалт үргэлжилж байна. Тус цогц системийг “Алсын хараа-2050” Монгол Улсын урт хугацааны хөгжлийн бодлогын хүрээнд санаачлан, Нийслэлийн Засаг даргын захирамжаар хэрэгжүүлж эхлэхээр Ажлын хэсэг гаргасан юм. Тэгвэл UB ENGINEERING цогц системийг хэрэглээнд нэвтрүүлэх хүрээнд эхний ээлжид нийслэлийн засаг захиргааны 35 байгууллагын 130 орчим инженер, техникийн алба хаагчдад системийн танилцуулга сургалтыг явуулж байна.

Улаанбаатар хотын инженерийн хангамжийн зарим байгууллага мэдээллийн технологийн шийдлийг нэвтрүүлж, байгууллагынхаа үйл ажиллагаанд мэдээллийн сангийн дэвшилтэт технологийг ашиглаж байгаа хэдий ч нэгдсэн зохион байгуулалтгүй байдаг. Энэ нь нийслэлийн нутаг дэвсгэрт хийж буй тохижилт, бүтээн байгуулалт, инженерийн дэд бүтцийн ажлууд уялдаа холбоогүй болоход нөлөөлдөг. Мөн улс, нийслэлийн өмч, хөрөнгө үнэгүйдэх, ажил удаашрах, иргэд, аж ахуйн нэгжид хүндрэл, чирэгдэл учруулах, төрийн байгууллагаас үзүүлэх ажлын үнэлэмж буурах зэрэг асуудал үүссээр байна. Харин UB ENGINEERING цогц системийг бий болгосноор Улаанбаатар хотод үйл ажиллагаа явуулж буй төрийн болон бусад есөн чиглэлийн 507 байгууллага, 1245 СӨХ-ны 16 мянган инженер, техникийн ажилтан, алба хаагчдыг хамруулан, нэгдсэн удирдлагаар хангах юм. Ингэснээр хот нийтийн аж ахуйн өдөр тутмын үйл ажиллагааг удирдан зохион байгуулж, нийслэлийн иргэдийн ая тухтай амьдрах нөхцөлийг бүрдүүлэх, иргэдийн мэдээлэл олж авах сувгийг нээлттэй, хүртээмжтэй, ил тод болгох давуу талтай юм.

Улаанбаатар хотын Захирагчийн ажлын албаны Хотын инженерийн байгууламжийн хэлтсийн ахлах мэргэжилтэн М.Балдандорж “UB ENGINEERING цогц системийн тусламжтайгаар төрийн байгууллагууд хоорондоо нэгдэж, уялдаа холбоотой ажилласнаар иргэд болоод аж ахуй нэгжид аливаа хүнд суртал үүсгэхгүй, мэдээллийг хурдан шуурхай, хүртээмжтэй, ил тод солилцох боломжийг үүсгэх юм. Гол нь цахимаар асуудлаа хэлэлцдэг, ил тод шийдвэрлэдэг байх нь чухал” хэмээн онцолж байлаа.

UB ENGINEERING цогц системийг энэ ондоо нийслэлийн дотоод хэрэгцээнд туршилтын журмаар хэрэглэх бөгөөд 2022 оны нэгдүгээр сараас эхлэн олон нийтэд нээлттэй, ил тод байдлаар ашиглахаар төлөвлөж байна. Тус систем нэвтэрснээр иргэд хотын нийтийн аж ахуй, инженерийн дэд бүтцийн ашиглалт, үйлчилгээний талаар санал хүсэлт, өргөдөл гомдлыг цаг тухай бүрд нь системээрээ дамжуулан хүргэх боломжтой. Иргэдийн илгээсэн санал хүсэлтийг системд бүртгэлтэй нийслэлийн 1800 орчим төрийн болон хувийн байгууллага шууд хүлээн авч, хариуцсан холбогдох албаныхан нь цаг алдалгүй шийдвэрлэх, эргэн тайлагнах боломж үүсэх юм.

Чингэлтэй дүүргийн ЗДТГ-ын захиалгаар 2019 онд эхлүүлсэн тус дүүргийн есдүгээр хорооны цогцолбор барилгыг төвлөрсөн дулаан хангамжид холбох барилга угсралтын ажил өнөөдрийг хүртэлх хугацаанд дуусаагүй байгаа тул дулааны шугамын угсралтын ажлыг дуусгахад дэмжлэг үзүүлэн шийдвэрлэж өгөхийг хүсэж наймдугаар сарын 13-нд Улаанбаатар хотын Захирагчийн албанд ханджээ.

Дүүргийн цогцолбор барилгыг төвлөрсөн дулаан хангамжид холбох ажлыг “Рутан” ХХК гүйцэтгэж байгаа бөгөөд “Хүрд” ХК-ийн ашиглалт борлуулалтыг хариуцан ажиллаж буй Дэнжийн 1000-ын УДДТ-ын хоёрдугаар хэлхээнд холбогдохоор техникийн нөхцөл олгож ашиглагч байгууллагаас техникийн тодруулга авч, зураг төслийг зөвшилцөлгүйгээр батлуулж, барилга угсралтын ажлыг эхлүүлсэн хэдий ч хоёр жил гацсан тул холбогдох талуудыг байлцуулан уулзалт зохион байгууллаа.

Уулзалтад Улаанбаатар хотын Ерөнхий менежер Т.Гантөмөр, Захирагчийн ажлын албаны Хотын инженерийн байгууламжийн хэлтсийн дарга Т.Хэрлэн, мэргэжилтэн О.Батмөнх, Д.Сүхбат, Чингэлтэй дүүргийн Засаг даргын Тамгын газрын Тохижилт, нийтийн аж ахуйн хэлтсийн дарга Б.Саруул-Од, есдүгээр хорооны Засаг дарга С.Уянгазул, Улаанбаатар Дулааны сүлжээ ТӨХК-ийн Шинэ хэрэглэгчийн хэлтсийн ахлах инженер н.Мөнхтөр, “Хүрд” ХК-ийн инженер Н.Бүжинин, Рутан ХХК-ийн захирал н.Бямбабаатар нар оролцож зураг төсөлд өөрчлөлт оруулан УДДТ-ийн хоёрдугаар хэлхээний Ф150 мм-ийн голчтой шугамаас дулааны худаг гарган тусдаа салаа шугам татаж авах техникийн шийдлийг гарган маргааш буюу наймдугаар сарын 18-ны өдрөөс ажлыг эхлүүлж 14 хоногийн хугацаанд хийж гүйцэтгүүлэхээр шийдвэрлэлээ.

ОХУ-ын Батлан хамгаалах яамнаас жил бүр уламжлал болгон зохион байгуулдаг “Олон улсын цэргийн наадам-2021” цогцолбор тэмцээний хүрээнд явагдах “Танкийн биатлон” тэмцээнд оролцох Монгол Улсын Зэвсэгт хүчний баг, тамирчид 2021 оны наймдугаар сарын 10-ны өдөр Оросын холбооны улсыг зорьсон билээ. Сонирхуулахад, энэ жилийн “Танкийн биатлон” тэмцээнд 19 орны баг, тамирчид оролцохоор бэлтгэлээ хангасан ажээ.

ЗХЖШ-ын Материал, техникийн газрын штабын удирдлага, төлөвлөлтийн ахлах мэргэжилтэн, дэд хурандаа Х.Санчирдоржийн ахалсан Монгол Улсын Зэвсэгт хүчний баг, тамирчид ОХУ-ын Москва хотноо хүрэлцэн очиж, тусгаарлалтад хоёр хоносон ба энэ сарын 13-ны өдөр дээрх тэмцээнийг зохион байгуулж явуулах “Алабино” полигоны ойролцоох цэргийн ангид шилжин байрлажээ.

Энэ сарын 16-ны өдөр тэмцээнд оролцох багуудын дунд танкийн өнгө болон оролцох танкуудыг сонгох сугалаа явагдсан бөгөөд манай улсын баг, тамирчид шар өнгийг сугалснаар Вьетнам, Сири, Венесуэл улсын баг, тамирчидтай нэг гараанд уралдахаар болсон тухай мэдээлэл ирсэн юм.

Тэмцээний урьдчилсан төлөвлөгөөгөөр манай баг, тамирчид 23, 26, 29-ний өдрүүдэд уралдах ба одоогоор тэмцээний бэлтгэл ажлуудыг ханган өөрсдийн сонгосон танкуудыг тэмцээнд бэлтгэх, зэвсэглэлийг нь тусгалд оруулах ажил явагдаж буй ажээ.

Ташрамд, “Олон улсын цэргийн наадам-2021”-ын нээлтэд зориулсан ёслолын ажиллагаа энэ сарын 23-ны өдөр болох ба энэ үеэр цэргийн мэргэжлийн олон улсын тэмцээнүүдийн нээлт хамтдаа явагдах юм.

Баянгол дүүргийн 12 дугаар хорооны нутаг дэвсгэрт иргэн “М” гарал үүслийн бичиг, зохих тодорхойлолтгүйгээр 37 ширхэг тарвагыг бусдаас худалдан авч, хадгалж байсан үйлдлийг Экологийн цагдаагийн алба өнөөдөр буюу 17-ны өдөр илрүүлэн, холбогдох шалгалтын ажиллагааг явуулж, хуульд заасан үндэслэл журмын дагуу Мэргэжлийн хяналтын байгууллагад шалгуулахаар харьяаллын дагуу шилжүүлээд байна.

Шалгалтын явцад хураагдсан тарвагыг ариутгал, халдваргүйжүүлэлт хийлгэн Зооноз өвчин судлалын үндэсний төвд хүлээлгэн өгсөн аж.

Байгаль орчин, аялал жуулчлалын сайдын 2021 оны 193 дугаар тушаалаар Монгол орны тарваганы тоо толгой, тархац нутаг, халдварт өвчний голомт нутгийг тогтоох, тарваган тахал өвчнөөс урьдчилан сэргийлж, иргэдийн эрүүл аюулгүй байдлыг хангах зорилгоор тарвагыг ахуйн болон үйлдвэрлэлийн зориулалтаар агнахыг Монгол орны хэмжээнд 3 жилийн хугацаатай хориглосон.

Мөн Зөрчлийн тухай хуулийн 7.6 дугаар зүйлийн 5 дахь хэсэгт “Агнуурын амьтан, тэдгээрийн гаралтай түүхий эдийн зүйлийг тусгай зөвшөөрөл, гарал үүслийн бичиг, дагалдах тодорхойлолтгүйгээр худалдсан, худалдан авсан бол зөрчил үйлдэхэд ашигласан эд зүйл, хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг гурван зуун нэгжтэй тэнцэх хэмжээний төгрөгөөр, хуулийн этгээдийг гурван мянган нэгжтэй тэнцэх хэмжээний төгрөгөөр торгоно” гэж заасан юм.

Үүнээс гадна иргэд олон нийтийн цахим хуудсаар дамжуулан хууль бусаар тарвага агнах, мах, түүхий эдийг худалдах, худалдан авах зөрчлийг ихээр үйлдэж байгаа тул хяналт шалгалтыг эрчимжүүлжээ.