Month: August 2021

НОК-ын Шуурхай штабын дарга Р.Чингис даргалж, Дүүргийн онцгой комиссын шуурхай штаб дүүргийн Эрүүл мэндийн төвийн удирдлагуудтай цахимаар хуралдсан байна.

Хурлаар коронавируст халдварын дельта хувилбарын тархалт, дархлаажуулалтын гуравдугаар тун, тандалт шуурхай хариу арга хэмжээнд ажиллаж буй хүний нөөц, техник хэрэгслийн бэлэн байдал, шаардагдах төсөв, цаашид авч хэрэгжүүлэх арга хэмжээ, аж ахуйн нэгжүүдтэй байгуулсан “Хариуцлагын гэрээ”-ний хэрэгжилт зэрэг асуудлыг хэлэлцсэн байна.

Түүнчлэн НОК-ын Шуурхай штабын дарга Р.Чингис холбогдох албан тушаалтнуудад хэлэлцсэн асуудалтай уялдуулж, хугацаатай үүрэг даалгавар өгчээ.

Тодруулбал, Их, дээд болон ерөнхий боловсролын сургууль, цэцэрлэгийн үйл ажиллагаа эхэлж, халдварын тархалт нэмэгдэх өндөр эрсдэлтэй байгаа тул тандалт хариу арга хэмжээ, хүн хүчний нөөц, техник хэрэгслийн бэлэн байдлыг хангахад Нийслэлийн Эрүүл мэндийн газар, Дүүргүүдийн шуурхай штаб, Эрүүл мэндийн төвийн удирдлагууд онцгой анхаарч ажиллахыг үүрэг болгосон байна.

Сургууль, цэцэрлэгийн хариу арга хэмжээний багийн гишүүд, эмч нарын судалгааг гаргаж ГЭРЭГЭ системд нэвтрэх эрх олгон, сургууль, цэцэрлэг бүрийн халдвараас сэргийлэх, хариу арга хэмжээг зохион байгуулах бэлтгэл, бэлэн байдал хангагдсан эсэхэд хяналт шалгалт зохион байгуулж есдүгээр сарын 1-ний дотор мэдээлэхийг Нийслэлийн Боловсролын газар, Нийслэлийн Эрүүл мэндийн газрын удирдлагад үүрэг болголоо.

Түүнчлэн хүн олноор цуглардаг нийтийн эзэмшлийн гудамж, талбайн ариутгал халдваргүйжүүлэлтийг тусгай тоног төхөөрөмжөөр есдүгээр сарын 1-ээс аравдугаар сарын 15-ны өдрүүдэд зохион байгуулахыг даалгав.

Мөн “Хариуцлагын гэрээ” байгуулан үйл ажиллагаагаа эхлүүлсэн аж ахуйн нэгжид халдвар хамгааллын дэглэм мөрдөж ажиллаж байгаад хяналт шалгалт хийж, сайн мөрдөж байгааг сурталчлан таниулах, мөрдөхгүй байгаад хариуцлага тооцон ажиллах юм.

Нэмэлт гурав дахь тунд зорилтот бүлгийн иргэдийг хамруулж эхэлсэнтэй холбогдуулж дархлаажуулалтын цэгийн тоог нэмэгдүүлж, иргэдийг сайн дурын үндсэн дээр хамруулах ажлыг зохион байгуулахыг холбогдох байгууллагуудад үүрэг болгожээ.

Нийслэлийн Засаг даргын 2021 оны А/250 дугаар захирамжид иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ, хангамжийг нэмэгдүүлэхээр тусгасан. Мөн авто замын түгжрэлийг бууруулах, тохижилтын ажил гүйцэтгэх боломжийг бүрдүүлэх зорилгоор газрын зөрчил арилган, газар чөлөөлөх байршлуудыг батлахаар заасан юм. Энэ захирамжийн дагуу өнөөдөр Баянзүрх дүүргийн 18 дугаар хорооны нутаг дэвсгэрт байрлах зөвшөөрөлгүй 53 гараашийг буулгалаа. Тус хороонд ерөнхий боловсролын 84 дүгээр сургууль болон 147, 129 дүгээр цэцэрлэг үйл ажиллагаа явуулдаг. Зөвшөөрөлгүй гарааш байсан хэсэгт явган хүний зам хангалтгүй байдаг байна. Тиймээс буулгасан гараашнуудын оронд ногоон байгууламж, явган хүний зам, авто зогсоол барина гэдгийг дүүргийн Газар зохион байгуулалтын албаны ахлах мэргэжилтэн Д.Энхтөр хэллээ.

18 дугаар хорооны Засаг дарга С.Ариунаа “Манай хороонд байрлах 84 дүгээр сургууль болон 147, 129 дүгээр цэцэрлэгийн хүүхдүүд энэ замаар замын хөдөлгөөнд оролцдог. Явган хүний зорчих хэсэг бага учир хүндрэлтэй байдаг байсан. Эдгээр гарааш 1992 оноос хойш байсан. Гэвч гэрээний хугацаа дууссан тул дахин сунгаагүй. Зөвшөөрөлгүй гараашнуудыг буулгаж байгааг иргэд талархалтай хүлээн авч байна” гэлээ. Тухайн гарааш эзэмшигчдэд долоо хоногийн өмнөөс газар чөлөөлөх шаардах хуудас хүргүүлсэн юм.

УУХҮЯ-аас Улсын хэмжээнд газрын тосны бүтээгдэхүүний 31 хоногийн нөөцтэй байна. Үүнээс А-80 41 хоног, Аи-92 25 хоног, дизелийн түлшний 35 хоногийн нөөцтэй байна хэмээн мэдээллээ.

Токио-2020 паралимпийн аварга МУГТ Э.Содномпилжээ, түүний багш дасгалжуулагч Д.Баттулга нарт “Эрхэт монгол” группын үүсгэн байгуулагч Х.Мандахбаяр сэтгэлийн бэлэг болгон байр бэлэглэж буйгаа өөрийн цахим хуудаснаа нийтэлсэн байна. Тэрбээр “Саяхандаа, Э.Содномпилжээ, түүнийг багш дасгалжуулагч Д.Баттулга нартай утсаар ярьж олимпын аварга болбол байр бэлэглэнэ ээ гэдгээ амласан юм. Энэ дагуу амлалтаа биелүүлж байна. Паралимп нь олимпийн наадмаас ч илүү их хүч, тэвчээр, эр зоригийг тамирчнаас шаарддаг наадам билээ. Би өөрөө хоёр хөгжлийн бэрхшээлтэй дүүтэй хүн. Энэ хүмүүсийн жаргал зовлонг мэдэрч өссөн хүмүүсийн нэг. Олимпын тамирчдынхаа амжилтыг бид эн тэнцүү, хана чацуу үнэлж явах учиртай. Монгол түмний бахархалт хүү “Рио 2016” паралимпийн наадмын хүрэл мeдальт, Дэлхийн хошой аварга, Дэлхийн рeкорд амжилтын эзэн, Монгол Улсын Гавьяат тамирчин Э.Содномпилжээдээ илүү их амжилт, аз жаргалыг хүсэн ерөөе. Энэ хүртэл тамирчнаа уйгагүй бэлдсэн багшийнх нь сэтгэл зүтгэлд талархан мөргөе өө. “Бид бүхэн жигүүртэй” уриан дор болж буй Токио-2020 паралимпийн наадмын пауэрлифтингийн төрөлд аваргын АЛТАН медалийг монголчууд хүртлээ. Хурай хурай хурай.

Швейцарын хөгжлийн агентлаг 17 жилийн өмнөөс бэлчээр нутгийн зүй зохистой хэрэглээ, нөхөн сэргээлт, малчдын орлогыг нэмэгдүүлэх, ирээдүй хойчийн төлөөх хариуцлагатай, тогтвортой арга хэлбэрээр уламжлалт нүүдлийн соёлыг хадгалж үлдэх “Ногоон алт-Малын эрүүл мэнд” төслийг хэрэгжүүлж, тодорхой үр дүнд хүрчээ.

Төслийн үр дүнг хүлээлгэн өгөх арга хэмжээг 7 аймагт зохион байгуулсан бол 2021 оны есдүгээр сарын 09-нд “Бэлчээрийн үндэсний IV форум”, 10-нд “Швейцарын Хөгжлийн агентлагийн “Ногоон алт-Малын эрүүл мэнд төслийн үр дүн(2004-2021)”-г цахим буюу 3D виртуал орчинд хэлэлцэхээр болжээ.

Нүүдлийн мал аж ахуйн соёлыг байгаль орчинд ээлтэйгээр, тогтвортой, үр ашиг өндөртэйгээр залуу хойч үедээ өвлүүлэх, тогтвортой хөгжлийн зорилтод нийцүүлэн ухаалаг хэрэглээг нэвтрүүлэх, тал хээрийн бэлчээр нутгийн экологийн тэнцвэрийг хадгалж үлдэхийг зорьж буй уг төслийг Архангай, Баян-Өлгий, Баянхонгор, Говь-Алтай, Завхан, Ховд, Увс зэрэг аймагт хэрэгжүүлж, төслийн үр дүнг хүлээлгэн өгчээ.

Байгалийн бэлчээрт суурилсан мал аж ахуйн хариуцлагатай үйлдвэрлэлийн үндэс суурийг тавьж, Монгол орны нийт бэлчээр нутгийн нөөц, нөхцөл байдлын судалгааг хийж, бэлчээр ашиглагчдын үндэсний сүлжээ(18 аймгийн 184 суманд нийт 1575)-г бий болгож, тогтвортой байдал, бэлчээр ашиглалтын гэрээг 1254 бэлчээр ашиглагчдын хоршоотой байгуулж, газрын нэгдсэн системд бүртгэлжүүлжээ.

Бэлчээр ашиглалтын горимыг баримтлах гэрээний үр дүнд манай улс сүүлийн 4 жил 44,2 сая га бэлчээрийг хамгаалж, 20,6 сая га талбайг сэргээн сайжруулж, мэргэжлийн судлаачдын дэмжлэгтэйгээр “Хариуцлагатай нүүдэлчид” стандартыг бүсчилсэн байдлаар 15 суманд нэвтрүүлжээ.

Түүнчлэн “Ногоон Алт-Малын эрүүл мэнд” төслийн хүрээнд малын эрүүл мэндийг мөшгих буюу Мал эмнэлгийн нэгдсэн системыг байгуулж, мал, амьтны гарал үүйсэл, эрүүл мэндийн түүхийг бүртгэлжүүлжээ. Малчдын хадгаламж зээлийн хоршоо 39, малын гаралтай түүхий эд бэлтгэн нийлүүлэлтийн 62 хоршоо байгуулагджээ.

Төслийн үр дүнг хэлэлцэн цаашид үргэлжлүүлэн хөгжүүлэх, шинжлэх ухааны үндэслэлтэйгээр уламжлалт соёлоо хадгалж үлдэх, соёлын өв тээгчдийн амьжиргаа, орлогыг нэмэгдүүлэх, мал, амьтны гаралтай бүтээгдэхүүн хэрэглэгчдэд эрүүл, баталгаатай, чанартай үйлдвэрлэлийн ашиг шимийг хүртээх зэргийг зорьж байна.

ХЗДХЯ: Нотариатын мэргэшлийн шалгалтыг энэ оны аравдугаар сарын 11-17-ны өдрүүдэд зохион байгуулахаар тов гарсан. Шалгалтад оролцох хүсэлтэй нотариатч, хуульчдыг есдүгээр сарын 01-нээс аравдугаар сарын 01 хүртэл http://burtgel.mojha.gov.mn/ цахим хаягаар бүртгэнэ.