Month: August 2021

Нийслэлийн Удирдах ажилтнуудын шуурхай зөвлөгөөнийг өнөөдөр Баянгол дүүргээс цахимаар зохион байгууллаа. Нийслэлийн Засаг дарга бөгөөд Улаанбаатар хотын Захирагч Д.Сумъяабазар өнгөрсөн удаагийн зөвлөгөөнөөр 14 үүрэг, даалгавар өгснөөс 78.1 хувийн биелэлттэй байна. Хурлын эхэнд Баянгол дүүргийн Засаг дарга Ө.Сумъяабаатар дүүргийнхээ хэмжээнд хэрэгжүүлж буй ажлууд болоод цаг үеийн нөхцөл байдлын талаар нийслэлийн удирдлагуудад мэдээллээ.

Баянгол дүүрэг 231 мянган оршин суугчтай бөгөөд үүнээс 142 мянган иргэн дархлаажуулалтын бүрэн тунд хамрагджээ. Дүүргийн хэмжээнд 8642 хүүхэд дархлаажуулалтад хамрагдсан бол сургууль, цэцэрлэг эхлэхтэй холбоотойгоор нийт багш, ажилчдын 45 хувийг урьдчилан сэргийлэх үзлэгт хамруулаад байна.

Гадаад харилцааны яамнаас ОХУ-д суралцаж буй оюутнууд хэрхэх талаар мэдэгдэл гаргалаа.

Уг мэдэгдэлдээ “ОХУ-ын Шинжлэх ухаан, дээд боловсролын сайд В.Фальков, Засгийн газрын даргын орлогч Т.Голикова нарын тэргүүлсэн Коронавирусын халдвараас урьдчилан сэргийлэх, тархалтыг зогсоох чиг үүрэг бүхий Шуурхай штаб нь тухайн улстай агаарын харилцаа нээсэн эсэхээс үл хамааран гадаад оюутнуудыг хилээр нэвтрүүлэх асуудлыг нааштайгаар шийдвэрлэж өгөх тухай Шинжлэх ухаан, дээд боловсролын яам, Гадаад хэргийн яам болон Холбооны хяналтын “Роспотребнадзор” албанаас хамтран гаргасан хүсэлтийг хүлээн авч, дээрх үйл ажиллагаанд холбогдох зохицуулалтыг боловсруулж эхэлсэн талаар наймдугаар сарын 20-ны өдөр мэдэгдэв.

Мэдэгдэлд ОХУ-д ирэн үргэлжлүүлэн суралцах гадаадын оюутнууд /насанд хүрсэн/ сайн дурын үндсэн дээр вакцинжуулалтад хамрагдах боломжтой, тодорхой шалтгааны улмаас биечлэн ирж чадахгүй оюутнууд зайны /цахим хэлбэрээр/ сургалтад хамрагдах нөхцлөөр үргэлжлүүлэн хангагдах талаар тус тус дурдсан байна.

Гадаадын оюутнуудыг хилээр хэрхэн нэвтрүүлэх асуудлаарх ОХУ-ын холбогдох эрх бүхий байгууллагын шийдвэр, зохицуулалт одоогоор хараахан гараагүй байгаа бөгөөд энэ талаар тодорхой мэдээлэл гармагц ГХЯ-наас мэдэгдэх болно” гэжээ

Өнөөдөр буюу наймдугаар сарын 23-ны өдрийн 15.28 цагт “Хүн өндрөөс уналаа” гэсэн дуудлага мэдээллийг цагдаагийн байгууллагад иргэнээс ирүүлсэн байна.

Шалгалтын явцад БГД-ийн 3 дугаар хорооны нутаг дэвсгэр, Нарны хороолол 27-р байрны урд эрэгтэй, 27 настай А гэгч унаж амь насаа алдсан болох нь урьдчилсан байдлаар тогтоогдож байна. Хэдэн давхраас, ямар шалтгаан нөхцлийн улмаас унасан зэргийг тогтоохоор хэргийн газар Баянгол дүүрэг дэх цагдаагийн газрын Нэгдүгээр хэлтсийн алба хаагчид мөрдөн шалгах ажиллагааг явуулж байна.

Монголчуудын сэтгэлд дотно үлдсэн “Улаанбаатарт байгаа миний аавд” киноны Гочоогийн дүрийг бүтээсэн жүжигчин Сийзийн Ямаахүү таалал төгсчээ.

Сийзийн Ямаахүү 1949 онд Улаанбаатар хотод төрсөн бөгөөд дөрөвдүгээр ангийн сурагч байхдаа “Улаанбаатарт байгаа миний аавд” кинонд тоглосон байна. Тэрбээр дэлгэцийн олон уран бүтээлд гэрлийн техникч, гэрэлтүүлэгчээр ажилласан бөгөөд 1994 оноос эхлэн Сүхбаатар дүүргийн хэд, хэдэн хорооны Засаг даргаар ажиллажээ.

Түүний зээ охин Фэйсбүүк хуудастаа “Энэ насаа Монгол Кино үйлдвэрт зориулж насаараа кино урлагт өөрийн авьяас, мэдлэг, чадвар, зүрх сэтгэлээ зориулсан Сийзийн Ямаахүү гэж хүн байлаа. Олон ч кинонд гар бие оролцож, заримд нь дүр бүтээж амжсанаас хүмүүсийн хамгийн их таньдаг нь “Улаанбаатарт байгаа миний аав” киноны бяцхан хүү Гочоо байсан. Кино зураг авалтад явахдаа бяцхан зээгээ дагуулаад явдаг байсан нь Би! ” хэмээн бичжээ.

Сүхбаатар дүүргийн 7, 8, 10 дугаар хорооны байруудад гадна фасад, дулаалга хийж байна. Тодруулбал, угсармал орон сууцны барилгын дулаан техникийн шинэчлэлийг хийх ажлын хүрээнд дээрх хороодын зайлшгүй засвар хийх шаардлагатай 3, 5а, 9/1, 13, 21, 34, 50 дугаар байрт гадна фасад, дулаалгын ажлыг гүйцэтгэж байгаа юм.

Угсармал орон сууцны барилгын дулаан алдагдлыг бууруулснаар оршин суугчдын эрчим хүч, дулааны хэрэглээ буурч, хэрэгтэй газарт тэрхүү илүүдэл цахилгаан, дулаанаа зарцуулах боломж бүрдэх юм. Барилгын гадна талын ханыг сүүлийн үеийн технологи болох дулаан тусгаарлалтын хөөсөнцөр тавьж, иж бүрэн шавардлага хийж дулаалж буй. Гүйцэтгэгчээр “Моксан” ХХК, “Үүлэн сүндэр” ХХК ажиллаж байна.

Хурандаа О.Батгэрэл захирагчтай Монгол Улсын баатар Ж.Нэхийтийн нэрэмжит хилийн 0101 дүгээр ангийн хилчид Монгол дахь герман хоньч нохой сонирхогчдын холбоотой хамтран ажиллаж, удам зүйн санд бүртгэлтэй цэвэр үүлдрийн 8 тооны овчарк нохойг Хилийн 0312 дугаар салбар дахь албаны нохойн хотхонд байрлуулан, сургалт бэлтгэлийг эхлүүлээд байна.

Дээрх нохойнуудаас “Хэрри” дуудлагатай цэвэр үүлдрийн нэг нохой үржлийн албан ёсны эрхтэй тул тус холбооноос “Хилчин” үржлийн газар нээх эрх олгон батламжилж, герман хоньч нохойны удмын санг бэхжүүлэхэд хамтран ажиллахаар тохиролцлоо.

Цаашид албаны нохойг төрөлжүүлэн бэлтгэх, үүрэг гүйцэтгэх чадварыг нь дээшлүүлэх, хил хамгаалалтад албаны нохой ашиглах боломж нөхцөлийг бүрдүүлэх зорилго тавин ажиллахаас гадна Монгол дахь герман хоньч нохой сонирхогчдын холбооноос зохион байгуулах тэмцээн, уралдаанд удмын санд бүртгэлтэй цэвэр үүлдрийн нохойнуудыг оролцуулан, үржлийн эрх авч, “Нэг манаа, нэг нохой” уриаг дэвшүүлэн ажиллахаар төлөвлөж байна.

ХХЕГ-ын Олон нийттэй харилцах алба