Month: August 2021

Categories
мэдээ

Монгол орны нийт нутгийн 25 хувьд бэлчээрийн даац 1-3 дахин хэтэрчээ

Ус цаг уур, орчны судалгаа, мэдээллийн хүрээлэнгээс 2021-2022 оны өвөл, хаврын бэлчээрийн даацыг баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэл дээр үндэслэн багийн нутгаар тооцоолон гаргажээ.

Зуншлагын байдлыг 10 хоног тутамд үнэлсэн зургаас үзвэл долдугаар сарын 20-ны байдлаар нийт нутгийн 60 орчим хувьд, долдугаар сарын 31-нд 70 гаруй хувьд, найдугаар сарын 10-н гэхэд 80 орчим хувьд сайн гэж үнэлэгдсэн байна.

Улмаар найдугаар сарын 20-ны байдлаар нийт нутгийн 80 орчим хувьд буюу Хөвсгөл, Архангай, Булган, Сэлэнгэ, Орхон, Дархан-Уул, Дорнодын нийт, Увс, Ховд, Говь-Алтай, Завхан, Баянхонгор, Өвөрхангай, Төв, Хэнтийн ихэнх, Баян-Өлгий, Говьсүмбэр, Дорноговь, Өмнөговь, Дундговь, Сүхбаатарын зарим нутгаар сайн, Дундговь, Өмнөговь, Говь-Алтай, Дорноговь, Сүхбаатарын ганц нэг сумдын нутгаар муу, бусад нутгаар дунд буюу зуншлага оройтсон, ургамал гандаж хатсан байдалтай байна.

Бэлчээрийн даацыг тооцоолж гаргасан дүнгээс үзвэл нийт нутгийн:

  • 42.1 % – 50 хүртэлх хувь (бэлчээрийн нөөцтэй)
  • 24.6 % – 51-100 хувь (бэлчээр хүрэлцээтэй)
  • 25.0 % – 101-300 хувь (даац 1-3 дахин хэтэрсэн)
  • 3.6 % – 301-500 хувь (даац 3-5 дахин хэтэрсэн)
  • 4.7 % – 500 хувиас их (даац олон дахин хэтэрсэн) байна.

Өөрөөр хэлбэл нийт нутгийн 70 орчим хувьд өвөл-хаврын бэлчээрийн даац хүрэлцээтэй байхаар, харин 30 гаруй хувьд хэтэрч гарчээ.

Аймгийн дүнгээр авч үзвэл Баян-Өлгий, Увс, Ховд, Говь-Алтай, Өвөрхангай, Архангай, Дундговь, Говьсүмбэр, Дорноговь, Сүхбаатар аймгуудын зарим сум, багийн нутгаар даац хэтэрч гарсан байна.
Энэ жил зуншлага оройтсон говийн зарим нутгаар болон малын тоо ихтэй аймаг, сумдын нутгаар даац хэтэрч гарчээ. Бэлчээрийн даац олон дахин хэтэрч (улаан) гарсан сумдад Баян-Өлгийн Булган, Дундговийн Цагаандэлгэр, Говь-Угтаал, Баянжаргалан, Өндөршил, Сүхбаатарын Баяндэлгэр сумд, 3-5 дахин хэтэрч (улбар шар) гарсан сумдад Баян-Өлгийн Цэнгэл, Увсын Сагил, Ховд, Завхан, Төвийн Баяндэлгэр сумд орж байна. Харин нийт нутгийн 25%-д даац 1-3 дахин хэтэрч (шар) гарсан байна.

Өвөл-хаврын бэлчээрийн даац хэтэрч гарсан аймаг, сумдын нутагт өвс хадлан бэлтгэх, нэмэгдэл тэжээл нөөцлөх, отор нүүдэл хийх, малын тоог бууруулах зэргээр арга хэмжээг эртнээс авч хэрэгжүүлэх шаардлагатайг Ус цаг уур, орчны судалгаа, мэдээллийн хүрээлэнгээс зөвлөжээ.

Categories
амьдралын-өнгө мэдээ

Элсэлтийн ерөнхий шалгалтын дүнгээр Өвөрхангай аймаг тэргүүллээ

Өвөрхангай /МОНЦАМЭ/. 2021-2022 оны хичээлийн жилийн Элсэлтийн ерөнхий шалгалтын дүнгээр Өвөрхангай аймаг дахин тэргүүллээ.

Аймгийн хэмжээнд энэ жил 1103 сурагч ахлах ангиа төгссөн бөгөөд өмнөх оны 171 төгсөгчийн хамтаар 1200 гаруй хүүхэд шалгалт өгснөөс нийгэм судлал, монгол хэл, англи хэл, математикийн хичээлээр тус тус нэгдүгээр байр, түүх, физикийн хичээлээр хоёдугаар байранд шалгарч, нэгдсэн дүнгээр тэргүүн байр эзлэжээ.

Тус салбарынхан жилийн Элсэлтийн ерөнхий шалгалтын дүнгээрээ 2013 оноос хойш тасралтгүй эхний 3 байрт орж байгаа аж.

Categories
мэдээ нийгэм

Монгол Улсын Үндсэн хуулийн цэц олон улсын нэр хүнд бүхий байгууллагыг даргалах боллоо

Үндсэн хуулийн шүүх, түүнтэй адилтгах байгууллагуудын Азийн нийгэмлэгийн хурал 2021 оны 8 дугаар сарын 26-27-ны өдрүүдэд Бүгд Найрамдах Казахстан Улсын нийслэл Нур-Султан хотноо цахимаар зохион байгуулагдлаа.

Тус нийгэмлэгийг одоо даргалж буй Бүгд Найрамдах Казахстан Улсын Үндсэн хуулийн Зөвлөлөөс зохион байгуулж буй энэхүү хуралд Ази тивийн 30 гаруй улсын Үндсэн хуулийн шүүхийн байгууллагуудын Ерөнхийлөгч, дарга, Ерөнхий шүүгч нар түүний дотор Монгол Улсын Үндсэн хуулийн цэцийн дарга Н.Чинбат тэргүүтэй төлөөлөгчид болон Европын Зөвлөлийн Венецийн комисс, Үндсэн хуулийн шүүх эрх мэдлийн Дэлхийн бага хурал, Европын Аюулгүй байдал, хамтын ажиллагааны байгууллага, Евразийн Эдийн засгийн Холбоо зэрэг олон улсын байгууллагын төлөөлөгчид оролцов.

Хурлын хүрээнд Үндсэн хуулийн хяналтын байгууллагуудын Евразийн нийгэмлэг, Үндсэн хуулийн шүүх, түүнтэй адилтгах байгууллагуудын Азийн нийгэмлэгийн Ерөнхий нарийн бичгийн дарга нарын хурал, Нийгэмлэгийн Удирдах Зөвлөлийн хурал тус тус боллоо.

Эдгээр хурлаар Үндсэн хуулийн шүүх, түүнтэй адилтгах байгууллагуудын Азийн нийгэмлэгийг даргалагчийн тайлан, судалгаа-шинжилгээ, захиргаа-зохион байгуулалт, сургалт хариуцсан нарийн бичгийн дарга нарын газруудын тайланг сонсохоос гадна, шинэ гишүүн элсүүлэх, тус нийгэмлэгээс Үндсэн хуулийн шүүх эрх мэдлийн Дэлхийн бага хуралд оролцох, Европын Үндсэн хуулийн шүүхүүдийн Бага хуралтай хамтран ажиллах, харилцан ойлголцлын Санамж бичигт гарын үсэг зурах зэрэг асуудлыг хэлэлцэж холбогдох шийдвэр гаргасан байна.

Түүнээс гадна “Интернэтийн эрин үе: хууль дээдлэх ёс, хүний үнэ цэнэ ба улсын тусгаар тогтнол” сэдэвт олон улсын симпозиум болж, оролцогчид хэлэлцүүлэг өрнүүллээ.

Нийгэмлэгийн Удирдах Зөвлөлийн хурлаар Монгол Улсын Үндсэн хуулийн цэцэд Үндсэн хуулийн шүүх, түүнтэй адилтгах байгууллагуудын Азийн нийгэмлэгийг 2021-2023 онд даргалах эрх олгохоор өмнө нь гаргасан шийдвэрээ баталгаажууллаа. Үүнтэй холбогдуулан нийгэмлэгийн даргалагчийн тугийг Монгол Улсын Үндсэн хуулийн цэцийг төлөөлж Монгол Улсаас Бүгд Найрамдах Казахстан Улсад суугаа Онц бөгөөд Бүрэн эрхт Элчин сайд Л.Баттулга хүлээн авч Монгол Улсын Гадаад харилцааны яамаар дамжуулан Үндсэн хуулийн цэцэд хүлээлгэн өгөх юм.

Монгол Улсын Үндсэн хуулийн цэц бол Үндсэн хуулийн шүүх, түүнтэй адилтгах байгууллагуудын Азийн нийгэмлэгийг үүсгэн байгуулагчдын нэг билээ.

Categories
мэдээ эдийн-засаг

Зэсийн үнэ 9300 ам.долларт хэлбэлзэж байна

Лондоны металлын бирж дээр тонн зэсийн үнэ 9300 ам.доллар орчимд хэлбэлзсэн хэвээр байна. Тус бирж дээр өнгөрсөн Пүрэв гаригт зэсийн фьючерс үнэ 0.2 хувиар буурч, тонн нь 9356 ам.доллар байсан бол Баасан гаригт 9323 ам.доллар болж буурчээ.

Зэсийн ханшийн сулралт түр зуурынх бөгөөд зэсийн зах зээлд хаягдал зэсийн нийлүүлэлт нэмэгдэхгүй бол цаашид зэсийн агуулах дахь нөөц багасч, ханш нь 20 мянган ам.долларт хүрч болзошгүйг “Bank of America”-гийн шинжээчид мэдэгдсэн билээ.

Энэ онд дэлхийн зах зээлд 186 мянган тонн зэсийн нийлүүлэлтийн хомсдол үүсч болзошгүй аж. Гэвч 2022 онд 369 мянган тоннд хүрч, түүнээс хойш нийлүүлэлт эрэлтээ давах төлөв ажиглагдаж эхэлжээ.

Олон улсын зэсийн судалгааны группийн таамаглалаар ч ирэх жилүүдэд зэсийн нийлүүлэлт эрэлтээ давах төлөвтэй байгаа аж. Тус групп энэ онд дэлхийн зэсийн олборлолт 3.5 хувиар, ирэх онд 3.7 хувиар тус тус өсөх таамаглал дэвшүүлэв. Мөн 2021 онд дэлхийн зэсийн зах зээлд нийлүүлэлтийн илүүдэл 79 мянган тонн, ирэх онд 109 мянган тоннд тус тус хүрнэ гэж тооцоолжээ.

“BHP Group”-ийн Чили улс дахь “Cerro Colorado” зэсийн уурхайн ажилтнууд ажил хаялт зарлаж, тус компаниас тавьсан цалингийн саналаас татгалзжээ. Энэ нь нийлүүлэлт буурах эрсдэл үүсгэж, цаашид үнэ эргэн өсөхөд нөлөөлнө гэж шинжээчид үзэж байгаа аж.

“Ногоон” хөгжлийн хувьсгалд зэс тэргүүлнэ гэж үзэж буй “Goldman Sachs” банк 2025 оноос дэлхийн цэвэр эрчим хүчний хэрэглээний үлэмж өсөлт зэсийн эрэлтэд ачаалал үүсгэнэ гэж тооцоолсон билээ.

Сүүлийн нэг жил зэсийн үнэ бараг 80 хувиар өссөн ч ирээдүйд нэмэгдэх эрэлтэд өнөөгийн зах зээл бэлэн бус байгааг шинжээчид онцолж байна. Тэд ирэх дөрвөн жилд зэсийн үнэ 60 хувиар нэмэгдэж, 15 мянган ам.доллар хүрэх таамгийг ч дэвшүүлсэн. Хэрэв зэсийн ханш 9000 ам.долларт хэлбэлзвэл хоёр жилийн дараа зах зээлд бодитой хомсдол нүүрлэнэ гэжээ.

CRU-ийн Зэсийн ахлах шинжээч Эрик Хеймлих шинээр төслүүд хэрэгжихгүй тохиолдолд 2030 он гэхэд 5.9 сая тонн зэсийн хомсдол үүснэ гэж төсөөлжээ.

Монгол Улсын хувьд 2021 оны төсвөө батлахдаа зэсийн үнийг 5991 ам.доллар байхаар тооцсон. Улмаар энэ онд экспортын хэмжээг 1.43 сая тоннд хүргэн нэмэгдүүлж, 1.5 их наяд төгрөг олно гэж тооцоолсон юм. Цар тахал намжсанаар 2023 оныг дуусталх хугацаанд манай улсын эдийн засгийн өсөлт дунджаар 6 хувьтай байна гэсэн таамаглал бий. Үүнд аж үйлдвэрийн гол металл болох зэсийн ханшийн өсөлт таатай нөлөөлөл үзүүлэхээр байгааг эдийн засагчид онцолж буй юм.

Өнөөдөр дэлхийд зэсийн олборлолтоор Чилийн “Codelco” компани тэргүүлж байна. Цар тахлын улмаас өнгөрсөн онд тус компанийн үйл ажиллагаа тасалдах эрсдэл үүссэн ч дөрвөн шат бүхий арга хэмжээ хэрэгжүүлж, олборлолтоо хэвийн үргэлжлүүлжээ. Гарц нь энэ хугацаанд 1.7 сая тонн хүрсэнийг “Mining Intelligence” байгууллага онцлов.

Оюутолгой төслийн хөрөнгө оруулагч “Rio Tinto” компани жагсаалтын есдүгээрт бичигдэж байна. Өнгөрсөн онд тус компанийн зэсийн гарц 486.8 мянган тонн болж буурсанд цар тахлын үед төслүүдийн үйл ажиллагаа тасалдсан нь нөлөөлжээ.

Categories
мэдээ энтертаймент-ертөнц

Жүжигчин Кристен Стюарт Диана гүнжийн дүрд тогложээ

Холливудын алдарт жүжигчин Кристен Стюарт “Спенсер” киноны гол дүр, Диана гүнжийн дүрийг бүтээжээ. Киноны трэйлер өчигдөр цацагдсан бөгөөд киног арваннэгдүгээр сарын 5-ны өдөр дэлгэцнээ гаргахаар төлөвлөжээ.


Уг кинонд Диана гүнжийн тухай гарах бөгөөд хунтайж Чарльзтай гэрлэлтээ цуцлуулах шийдвэрийг гаргасан 1991 оны үймээн самуунтай амьдралынх нь тухай өгүүлнэ.

Пүрэв гаригт цацагдсан шинэ трейлер хааны гэр бүлийнхэнтэйгээ хамт оройн зоог барихаар хүлээлгэсэн Диана ариун цэврийн өрөөнд түгшиж буйгаар эхлэх аж. Мөн түүний хажууд суух нэгэн эмэгтэй “Тэд бүгдийг мэднэ” гэхэд тэрээр “Тэд мэдэхгүй” гэхээс харилцан яриа бараг гарахгүй.

“Twilight” киноны од, өдгөө 31 настай жүжигчин бүсгүй Диана гүнжийн алхаа гишгээ, толгойгоо үл ялиг гилжийлгэдэг гээд түүний биеийн хэлэмжийг мэдрэмжтэй илэрхийлж дүрээ гаргажээ.

“Спенсер” киноны найруулагчаар Пабло Ларрейн ажилласан бөгөөд тэрээр өмнө нь 2016 оны “Жеки” киног мөн найруулж жүжигчин Натали Портманыг тэргүүн хатагтай асан Жеки Кеннедийн дүрд сонгон тоглуулсан юм.

Categories
мэдээ нийгэм

Монгол орны цөлжилтийн зургийг боловсруулжээ

Ус цаг уур, орчны судалгаа мэдээллийн хүрээлэнгээс “Монгол орны цөлжилтийн атлас, 2020 он” бүтээлийг гаргалаа.

Цөлжилтийн зургаас харвал өнгөрсөн оны байдлаар Монгол орны нийт нутаг дэвсгэрийн 76,9 хувь нь ямар нэг хэмжээгээр цөлжилтөнд өртжээ. Үүнээс 31.5 хувь нь сул, 22.1 хувь нь дунд, 18.6 хувь нь хүчтэй, 4.7 хувь нь нэн хүчтэй зэрэглэлд хамрагдаж байна.

БОАЖЯ-ны захиалгаар“Монгол Улсын газрын доройтол, цөлжилтийн атлас зураглал хийх, тайлан гаргах” ажлыг нэг жилийн хугацаанд хийсэн байна.

Манай орны цөлжилтийн байдлыг илтгэх 30 гаруй үзүүлэлтийг тооцоолж, тэдгээрээс 18-ынх нь сүүлийн 20-40 жилийн мэдээг нэгтгэн боловсруулж, цөлжилтийн зургийг гаргасан аж.

Categories
гадаад мэдээ

​Гадаад оюутнууд ОХУ-д очиж суралцах боломжтой болжээ


ОХУ-ын Шинжлэх ухаан, дээд боловсролын яам Коронавирусын халдвараас урьдчилан сэргийлэх, тархалтыг зогсоох чиг үүрэг бүхий Шуурхай штабаас өгсөн чиглэлийн дагуу гадаад оюутнуудыг хүлээн авах ажлыг зохион байгуулах журмыг боловсруулж дуусгасан тухай ОХУ-ын Шинжлэх ухаан, дээд боловсролын сайд Валерий Фальков мэдээлжээ.

Гадаад оюутнууд ОХУ тухайн оронтой агаарын хилээ нээсэн эсэхээс үл хамааран ОХУ-д суралцахаар ирэх боломжтой болсон байна.

Вакцинжуулалтын хувьд гадаад оюутнуудад Оросын оюутнуудтай ижил дүрэм үйлчлэх бөгөөд эрүүл мэндийн албан журмын даатгалтай гадаадын иргэд бүртгэгдсэн вакцинуудаас алийг нь ч хийлгэх боломжтой байх бол бусад нь «Спутник лайт» вакцинд хамрагдах боломжтой юм байна.

Энэ оны есдүгээр сараас ОХУ-ын 710 их, дээд сургууль сургалтаа энгийн горимоор эхлүүлж байгаа бөгөөд, 422 сая оюутан суралцагчид хичээлд хамрагдах аж. Ихэнх сургалтын байгууллагууд уламжлалт хэлбэрээр буюу танхимаар сургалтаа зохион байгуулах хэдий ч шаардлагатай тохиолдолд зайн сургалт руу шилжих бэлтгэлийг хангажээ.

Оюутнууд вакцин хийлгэсэн эсэхээс үл хамааран лаборатори, семинар, лекцэд хамрагдах, биеийн тамирын заал, усан бассейнд орох, дотуур байранд байрлах эрхтэй байх болно гэж ОХУ-ын Шинжлэх ухаан, дээд боловсролын сайд Валерий Фальков мөн мэдээлсэн байна.

Categories
мэдээ нийгэм

Хаягдал гялгар уут цуглуулах “зүгээр битгий хая” аян маргааш болно

“Асуудлаар асуудлыг шийдье” уриатай тус аян нь гялгар уутны хаягдлыг байгальд ээлтэйгээр шийдвэрлэх замаар дахин боловсруулан 100 хувь битүүмжлэлтэй нүхэн жорлонгийн доторлогоо үйлдвэрлэхийн зэрэгцээ эко бизнес моделиор дамжуулан хүүхдэд ээлтэй жишиг орчныг бүтээн байгуулах, олон нийтийг хог хаягдлаа ялган ангилах эерэг дадал хэвшилд уриалах зорилготой.

2019 онд хийгдсэн “Хог хаягдлын бүтцийн судалгаа”-ны дүнгээрМонгол Улс жилд дунджаар 3,5 сая тонн хог хаягдал гаргадаг ба 42 хувь нь зөвхөн Улаанбаатар хотод үүсдэг. Нийг хаягдлыг ялган ангилбалУлаанбаатар хот ойролцоогоор жилд 44,000 тонн хаягдал гялгар уут гаргадаг бөгөөд ердөө 4 хувь хүрэхгүй хувийг дахин боловсруулж үлдсэн хэсэг нь байгальд хаягдал болдог. Тиймээс Өнгө нэм ТББ нь гялгар уут дахин боловсруулах “Пластик центр” ХХК болон хүүхэд хамгаалал, хөгжлийн “Лантуун дохио” ТББ-тай хамтран гялгар уут цуглуулах“Зүгээр битгий хая” аяныг санаачлан хэрэгжүүлж байгаа. АяныгЕвропын холбооны дэмжлэгтэй хэрэгжиж буй “Монгол улс дахь хуванцар хог хаягдлын дахин боловсруулалтын тогтвортой байдлыг хангах” төсөл болон Байгаль орчин, аялал жуулчлалын яам дэмжин хамтран ажиллаж байна.

Энэхүү аян аж ахуйн нэгж байгууллага болон иргэд олон нийтэд нээлттэй. Аянд нэгдэхдээУлаанбаатар хотын иргэдтомоохон супермаркетуудад байрлуулсан “Зүби” саванд цуглуулсан гялгар уутаа хандивлана. ААНБ нь гялгар уутаа тусад нь цуглуулан тээвэрлүүлж аянд нэгдэх боломжтой. Мөн хөдөө орон нутгийн иргэд, аж ахуйн нэг байгууллагуудтай хамтран ажиллахад боломжийг бүрдүүлснээ онцолъё.

Өдөр бүр, хаа нэгтээ үргэлж хаягдаж байдаг гялгар уутыг энэхүү аянд хандивлаж нийгэмд тулгамдаж буй асуудлын нэг болох хүчирхийллийн эсрэг ид шидийг бүтээгээрэй. Хог хаягдлын асуудлыг шийдэл болгон ашиглаж нийгмийн асуудлыг хамтдаа өөрчлөн шинэчилцгээе.

Тус аяны талаарх олон нийтэд мэдээлэх арга хэмжээ 2021 оны наймдугаар сарын 28-нд буюу маргааш 11:00-16:00 цагийн хооронд “Автомашингүй өдөр”-өөр УИД-ийн урд талын Понтам дээр болох бөгөөд сонирхсон ААНБ болон иргэд тус арга хэмжээнд ирж мэдээлэл авч аянд нэгдээрэй.

Та аяны үйл ажиллагаанд ААНБ болон өөрийн гэрээс үүсэх ГЯЛГАР УУТ, ХУВАНЦАР САВ, ЛААЗ, ШИЛний хаягдлаа авч очоод урамшуулалт хамрагдаарай.

Эхний байдлаар та бүхэн дараах байршилд шууд очоод гялгар уутаа өгөх боломжтой

ӨНГӨ НЭМ /Be Colorful -ийн төв оффис дээр /103-ын хажууд Шүрэн оффис 2 давхар 9 тоот
Efes сүлжээ дэлгүүрийн бөхийн өргөө салбар
Emart – ХУД дахь салбар
Nomin United Center – ХУД дахь салбар
БОСА сүлжээ дэлгүүрийн – Баян хошууны салбар
Nitro B coffee shop – Blue Sky -ийн урд талд
Ид шидийн орон 2 төв -Улиастайн эцсийн салбар
CU Mongolia – Blue sky салбар
Jur Ur Bakery – Хороолол салбар
Миний дэлгүүр – нарны замын төв салбар
Сансар сүлжээ дэлгүүр – 21-р хорооллын Содон хороолол салбар
М март сүлжээ дэлгүүр – Цамбагарав салбар

Categories
гадаад мэдээ

Ж.Байден “Лалын улс” бүлэглэлд цохилт өгөхөд, бэлтгэхийг үүрэг болгожээ

АНУ-ын Ерөнхийлөгч Жо Байден “Вилаят Хорасан” террорист бүлэглэлийн объектууд болон толгойлогч нарынх нь байгаа газруудад цохилт өгөхөд бэлтгэхийг үүрэг болгожээ.

“Лалын улс” бүлэглэлийн жигүүрүүдийн нэг болох уг бүлэглэл Кабулын нисэх онгоцны буудалд болсон хоёр дэлбэрэлтийн хариуцлагыг хүлээсэн юм.

“ЛУ-Вилаят Хорасан”-ы хөрөнгө мөнгө, объектууд, толгойлогч нарт цохилт өгөх төлөвлөгөөг шуурхай боловсруулах үүргийг бид командлалдаа өгсөн. Бид өөрсдийн сонгосон өдрөө хариуг нь хатуу бөгөөд оновчтой өгнө” гэж Байден хэлжээ.

Халдлага үйлдсэн этгээдүүдийг олж, шийтгэлийг нь хүлээлгэнэ гэж тэрбээр хэлээд тэдэнд хүрэх арга замыг хайж олох л болно гэж цохон тэмдэглэсэн байна.

Үүний зэрэгцээ Афганистанд болж буй бүх үйл явдлын хариуцлагыг “үндсэндээ” хүлээн зөвшөөрч байгаагаа АНУ-ын төрийн тэргүүн хэлэв.

Пүрэв гарагт Кабулын нисэх онгоцны буудалд хоёр дэлбэрэлт болсон юм. Эхний дэлбэрэлтийг амиа золиослогч-террорист үйлдэж, дараа тэсрэх төхөөрөг суурилуулсан автомашин дэлбэрчээ. Хоёр дахь дэлбэрэлт Их Британи, АНУ-ын иргэдийг байрлуулж байсан “Барон” зочид буудлаас холгүй болсон байна.

Халдлагын улмаас 90 орчим хүн амиа алдаж, 150 гаруй хүн шархадсан гэж Афганистаны Эрүүл мэндийн яамнаас мэдээлжээ. Пентагоны мэдээлснээр, амиа алдсан хүмүүсийн 15 нь, шархадсан хүмүүсийн 12 нь АНУ-ын цэргүүд аж.

Кабулд болсон террорист халдлагад амиа алдагсдад эмгэнэл илэрхийлж, АНУ-ын төрийн далбааг орон даяар бөхийлгөхөөр болжээ.

Нисэх онгоцны буудалд үйлдсэн халдлагын хариуцлагыг “Лалын улс” бүлэглэл хүлээсэн гэж хэвлэлүүд уг бүлэглэлийн мэдэгдлээс эш татан мэдээлсэн юм. Энэ халдлагад “Вилаят Хорсан” бүлэглэл холбоотой гэж АНУ-ын эрх баригчид үзэж байгаа аж.

Categories
мэдээ нийгэм

Энэ амралтын өдрүүдэд ХӨСҮТ PCR шинжилгээ авахгүй

Халдварт өвчин судлалын үндэсний төв наймдугаар сарын 28, 29-нд коронавирусийн халдвар илрүүлэх PCR шинжилгээ авахгүй ажээ.

Тус төв нь гадаад оронд зорчигч иргэд болон халдварын шинж тэмдэг илэрсэн иргэдээс өдөр бүр 09:00-12:00 цагийн хооронд PCR шинжилгээг үнэгүй авдаг ч энэ долоо хоногийн амралтын өдрүүдэд үйл ажиллагаагаа түр зогсоохоор болж буйг цахим хуудсаараа мэдээлэв.

Харин маргааш нийслэлд коронавирусийн халдвар илрүүлэх түргэвчилсэн шинжилгээний доорх гурван цэг ажиллах юм байна.