Month: August 2021

“Тавантолгой-Зүүнбаян” чиглэлийн төмөр замын төслийн талаар Зам, тээврийн хөгжлийн сайд Л.Халтар Засгийн газарт танилцуулжээ.

Үүнтэй холбогдуулан, Тавантолгой-Зүүнбаян чиглэлийн төмөр замын төслийн гүйцэтгэсэн ажлын хүлээгдэж байгаа төлбөр болон төслийн бүтээн байгуулалтын ажлыг бүрэн дуусгахад шаардагдах үлдэгдэл санхүүжилтийг 2021 оны гуравдугаар улиралд багтаан шийдвэрлэхийг Уул уурхай, хүнд үйлдвэрийн сайд Г.Ёндон болон “Эрдэнэс Тавантолгой” ХК-ийн удирдах зөвлөл, гүйцэтгэх захирал нарт даалгасан байна. Санхүүжилтийг шийдвэрлэсний үндсэн дээр Тавантолгой-Зүүнбаян чиглэлийн төмөр замын барилгын ажлыг 2022 оны хоёрдугаар улиралд багтаан ашигалтад оруулахыг холбогдох хүмүүст үүрэг болгов.

Богдхан төмөр замын суурь бүтцийн барилгын ажил гуравдугаар улиралд эхэлнэ

Богдхан төмөр замын суурь бүтэц барих тусгай зөвшөөрлийг “Тавантолгой төмөр зам” ХХК-д олгож, суурь бүтцийн барилгын ажлыг 2021 оны гуравдугаар улиралд багтаан эхлүүлэхээр болов.

Богдхан төмөр замын төслийг холбогдох хууль тогтоомжийн дагуу хэрэгжүүлэх, төслийн бүтээн байгуулалт, төмөр замын суурь бүтцийн барилгын ажилд Зэвсэгт хүчний жанжин штаб, “Улаанбаатар төмөр зам” ХНН-ийг оролцуулж ажиллахыг холбогдох хүмүүст үүрэг даалгажээ.

Хүйтний улиралд гэр хорооллын айл өрхөөс үнс ихээр гарч, агаар орчны бохирдлыг нэмэгдүүлэхэд ихээхэн нөлөө үзүүлдэг. Улаанбаатар хотод үнс нь өвлийн улиралд нийт хог хаягдлын 48.2 хувийг эзэлж байна.

Сайжруулсан нүүрсэн шахмал түлшний үнсийг хэд хэдэн лабораторид судалж шинжлэн, туршилтууд хийж явган зам, талбайн хавтан, барилгын эдлэл үйлдвэрлэхэд, авто замын суурь хөрсийг цемент эсвэл шохойгоор бэхжүүлэхэд, хөрсийг сайжруулах бордоонд нэмэлтээр ашиглах, шавар тоосго, портландцементийн болон керамзитан хөнгөн дүүргэгчийн зэрэг үйлдвэрт түүхий эдээр хэрэглэх зэргээр ашиглах бүрэн боломжтой нь нотлогдсон тул үйлдвэрлэл явуулахад нэн шаардлагатай бичиг баримт болох суурь стандартыг боловсруулжээ.

Уг стандартыг боловсруулахад ШУТИС-ийн дэд профессор, доктор, Монгол Улсын зөвлөх инженер Д.Сүнжидмаа, дэд профессор, доктор, Монгол Улсын зөвлөх инженер Р.Болормаа, дэд профессор, доктор, Монгол Улсын зөвлөх инженер Б.Намжилдорж, Монголын Барилгын материал үйлдвэрлэгчдийн холбоо ТББ–ын гүйцэтгэх захирал, техникийн ухааны магистр, Монгол Улсын зөвлөх инженер О.Лхагвадорж, эрдэм шинжилгээний ажилтан Н.Баяржавхлан нар ажилласан байна.

Стандартчилал хэмжил зүйн газрын Барилгын стандартчиллын техникийн хорооны ТХ-22-р хурлаар 2021 оны наймдугаар сарын 3-ны өдөр “Сайжруулсан нүүрсэн шахмал түлшний үнс. Техникийн шаардлага, турших арга” стандартын бичиг баримтыг хэлэлцэн дэмжлээ.

Үнсийг дахин ашиглах, агаар орчны бохирдлыг бууруулахад иргэн бүрийн оролцоо нэн чухал юм.

Улаанбаатар хотын Захирагчийн ажлын албанаас агаар орчны бохирдлыг бууруулах, хөрсний бохирдол үүсэхээс сэргийлэх зорилгоор үнсийг судалгаа шинжилгээнд оруулж турших, дахин ашиглах, хэрэглээнд нэвтрүүлэх, иргэдийг эх үүсвэр дээр ангилан ялгаж хэвшүүлэх, тээвэрлэх, шаардлагатай бичиг баримтуудыг боловсруулах зэрэг олон ажлуудыг үе шаттайгаар зохион байгуулан ажиллаж байгаа юм.

Турк улсаас өнгөрсөн онд карго ачаа ачуулсан иргэд 40-50 тэрбум төгрөгөөр хохирсон талаар мэдээлэл хийлээ.

“БНХАУ-ын нутагт орсон ширүүн борооны улмаас чингэлгүүд урсаж байна гэх мэдээлэл байна”

“Турк бараа” онлайн худалдаа эрхлэгч н.Уугантамир “Турк улсын Истанбул хотод ажиллаж амьдардаг иргэд 2020 оны долдугаар сараас хойш онлайн худалдаанд идэвхтэй орж эхэлсэн.

Гэтэл 2020 оны аравдугаар сард цар тахлын нөхцөл байдлын улмаас Засгийн газраас 2021 оны зургаадугаар сарын 1-н хүртэл Алтанбулагийн хилийг хаах шийдвэр гаргасан. Үүний дараа Турк улсад албан ёсны карго эрхэлдэг компаниуд газрын тээврээр ачаа бараа авахыг зогсоох тухай мэдэгдэл гаргаж эхэлсэн байдаг.

Тухайн үед газрын карго ачаа килограмм тутамдаа 2.5 долларын үнэ ханштай байсан юм.

Яг энэ үеэр “Гэрээт ложистик” гэх компани далайн тээврээр 60-90 хоногийн хугацаанд ачаа барааг авчирна гэх мэдээлэл тарааж, килограмм тутамдаа 1 долларын ханшаар 80 орчим хүний барааг авсан.

Гэвч тухайн явдлаас хойш гурван сарын дараа буюу өнгөрсөн оны 10, 11, 12 дугаар сарын ачаа барааг 2021 оны хоёрдугаар сард Турк улсаас гаргасан бөгөөд одоо БНХАУ-ын Тяньжинь боомтод манай улсын бусад чингэлэгтэй хамт саатаад байгаа аж.

Худалдаа аж үйлдвэрийн танхимаас биднийг луйварын хэрэгт өртсөн байж болзошгүй гэх зөвлөмжийг өгөөд байгаа тул тус компанийг шүүхэд өгөхөөр шийдээд байна.

Түүнээс өмнө хэвлэл мэдээллийн байгууллагад хандаж байгаа нь төрийн зүгээс карго ачааны талаарх мэдээлэл нь бодит байдлаас хол зөрж байна. Карго ачаа одоо хүртэл гацсан хэвээр байгааг хэлье.

Хэдхэн хоногийн өмнө БНХАУ-ын нутагт орсон ширүүн борооны улмаас чингэлгүүд урсаж байна гэх мэдээлэл байна” хэмээн ярилаа.

“Энэ асуудал ачаа барааны гацалтыг шийдвэрлэж чадахгүй байгаа төр засгийн буруу байж магадгүй”

Үргэлжлүүлэн “Манай компанийн хувьд, “Гэрээт ложистик” компанид өгсөн нийт бараа 2.5 тонн бөгөөд 887.8 сая төгрөгийн үнэтэй. Энэ бол ганцхан манай компанийн ачааны үнийн дүн. Гэтэл миний ард яг ийм асуудалтай 70-80 хүн бий. Бүр 4 тонн жинтэй 1.4 тэрбум төгрөгийн ачаа барааг дээрх каргонд өгөөд одоог хүртэл авч чадахгүй байгаа хүн ч бий. Би тэдгээр иргэнийг төлөөлж Туркээс Монголд ирсэн.

Нөгөөтээгүүр, Засгийн газар энэ асуудалд анхаараасай гэж хүсэж байна. Энэ асуудал ганц компанийн буруу биш, хилээр орж ирэх ачаа барааны гацалтыг шийдвэрлэж чадахгүй байгаа төр засгийн буруу ч байж магадгүй.

Энэ ганц каргоны асуудал биш бөгөөд Монголын тэр их мөнгөн тэмдэгт Турк улсад очоод түгжигдсэнтэй адил.

Дээрээс нь тэр барааг зарж борлуулж, талхныхаа мөнгийг олдог Монгол дахь худалдаа эрхлэгчдийн амьдрал яахыг бодож үзэн, анхаарлаа хандуулж туслаасай гэж хүсэж байна” гэсэн юм.

“Бараа захиалсан иргэд хохирч байна”

Бараа захиалсан иргэдийн төлөөлөгчийн нэг “Миний захиалсан бараа бүтээгдэхүүн гэхэд л нийт таван сая төгрөгийн өртөгтэй. Гэтэл надаас өөр өчнөөн хүмүүс бараа захиалаад авч чадахгүй хохирч байна” хэмээн ярьсан бол өөр нэг иргэн “2020 оны арванхоёрдугаар сард зөвхөн гэр бүлийн хэрэглээнд онлайн дэлгүүрээр дамжуулж Туркээс 500,000 төгрөгийн бараа захиалсан нь одоог хүртэл ирээгүй. Одоо хэнийг буруутгахаа мэдэхгүй байна” хэмээн бухимдаж байсан юм.

Авлигын индексийг бууруулах зорилго бүхий Ажлын хэсгийн ажлын явцын талаар Хууль зүй, дотоод хэргийн сайд Х.Нямбаатар танилцуулав. Ажлын хэсэг нь 2021-2022 онд авлигын төсөөллийн индексийн Монгол Улсын үнэлгээг өсгөх хүрээнд хэрэгжүүлэх арга хэмжээний төлөвлөгөө боловсруулж байна.

Төрийн болон хувийн хэвшлийн аж ахуйн нэгж, байгууллагын үйл ажиллагааг шүүмжилсэн, хууль бус үйлдлийг мэдээлсэн, илчилсэн тохиолдолд эрүүгийн хариуцлага татах, дарамтлахаас мэдээлэгчийг хамгаалах, шүгэл үлээгчдийг аливаа өш хонзон гэмт хэргийн хохирогч болохоос хамгаалах эрх зүйн зохицуулалтыг боловсронгуй болгох үүднээс Шүгэл үлээгчдийг хамгаалах тухай, сэтгүүлчдийн хэвлэн нийтлэх, эрэн сурвалжлах, мэдээллийн эх сурвалжаа нууцлах эрхийг хангасан эрх зүйн орчныг боловсронгуй болгох хуулийн төслийг боловсруулахыг Ажлын хэсгийн дарга, Хууль зүй, дотоод хэргийн сайд Х.Нямбаатарт даалгалаа.

Хүнд суртал, авлигын шинжтэй гомдол, саналаа иргэд 1111 төвд ирүүлж байгаа ажээ. Өнгөрөгч долдугаар сарын 22-30-нд ирсэн дуудлагын 114 нь хүнд сурталтай холбоотой байжээ.

Харъяа дүүргийн Газрын албаны үйл ажиллааны хүнд суртал, төрийн байгууллагууд иргэдээс ирсэн дуудлагыг хүлээн авахгүй байх, төрийн зарим үйлчилгээ иргэдэд ойлгомжгүй, тодруулах байгууллага, албан тушаалтан нь тодорхойгүй байгааг иргэд шүүмжилж байна.

Цагдаагийн байгууллагын шалгалтаар сэжигтэн О, П нар бүлэглэн 2021 оны 08 дугаар сарын 02-ны өдрөөс хойш Улаанбаатар хотын нутаг дэвсгэрт байшин, гэр хорооллын гадна зогсоолд байрлуулсан тээврийн хэрэгслүүдийг хулгайлж, орон байранд нэвтэрч бусдын эд зүйл хулгайлсан нийт зургаан удаагийн үйлдлээр гэмт хэрэг үйлдсэн нь эд мөрийн баримт, гэрчийн мэдүүлгээр тогтоогджээ.

Иргэд өөрсдийн өмч хөрөнгөө гэрэлтүүлэггүй, камергүй гудамж болон шороон замд байршуулснаар энэ төрлийн гэмт хэргийн хохирогч болоод байгаа юм.

Тиймээс иргэн та өөрийн эзэмшлийн тээврийн хэрэгслээ нүдэнд ил харагдахуйц газар, гарааш болон хяналтын камертай гэрэлтүүлэгтэй газар байршуулах мөн гэр, орон сууцныхаа аюулгүй байдлыг хангаж цонхны хаалт, цоож бүрэн цоожлогдож байгааг нягтлан шалгах, хөршийн хяналтын холбоогоо сайжруулснаар хулгайлах гэмт хэргээс урьдчилан сэргийлэх юм. Энэ гэмт хэргийг үйлдсэн бол:

ЭРҮҮГИЙН ХУУЛИЙН АРВАН ДОЛДУГААР БҮЛЭГӨМЧЛӨХ ЭРХИЙН ЭСРЭГ ГЭМТ ХЭРЭГ

17.1 дүгээр зүйл.

Хулгайлах

1.Бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ.

Засгийн газраас энэ оны долдугаар сарын 7-ны өдөр гадаадаас уригдан ажиллах мэргэжилтнүүдийн хөдөлмөр эрхлэх зөвшөөрөл, ажлын байрны төлбөрөөс чөлөөлөх тухай тогтоол гаргажээ.

Уг тогтоолд “Монгол Улсын Засгийн газар болон Бүгд Найрамдах Франц Улсын Засгийн газар хоорондын санхүүгийн хэлэлцээрийн хүрээнд “Нийслэлийн нийтийн тээвэрт дүүжин замын тээвэр нэвтрүүлэх” төсөл хэрэгжүүлэх “Дүүжин тээврийн ашиглалтын өмнөх захиргаа” УТҮГ-ын 12 гадаадын ажиллах хүч, мэргэжилтнийг 2021 онд ажлын байрны төлбөрөөс чөлөөлсүгэй” гэж дурдсан байна.

Энэ тогтоолын дагуу ажиллуулах гадаадын ажиллах хүч, мэргэжилтнийг хөдөлмөр эрхлүүлэх, буцаан гаргах ажлыг зохион байгуулж, тогтоолын хэрэгжилтэд хяналт тавьж ажиллахыг Хөдөлмөр, нийгмийн хамгааллын сайд А.Ариунзаяа, Улсын oнцгой комиссын дарга С.Амарсайханд тус тус даалгажээ.

Ташрамд мэдээлэхэд “Дүүжин тээврийн ашиглалтын өмнөх захиргаа” УТҮГ-ыг төсөл гүйцэтгэх явцад захиалагчийг төлөөлөн хяналт тавьж, дэмжлэг үзүүлэх, ашиглалтын өмнөх захиргааны үйл ажиллагаа зохион байгуулах зорилгоор 2020 онд байгуулсан.

Шадар сайд С.Амарсайхан Нийслэлийн Засаг даргаар ажиллаж байх үедээ “Агаарын дүүжин тээврийн техник эдийн засгийн үнэлгээг хийж дууссан. Францын Засгийн газрын хөнгөлөлттэй зээлийн санхүүжилтээр хийх уг төслийг Засгийн газар, Сангийн яам шийдвэрлэвэл 2020 оны дөрөвдүгээр сард эхлүүлнэ. Улмаар дүүжин тээвэр 2021 оны зургадугаар сард ашиглалтад орно” хэмээсэн билээ.

УИХ-ын гишүүдэд нийслэлийн Худалдан авах ажиллагааны газрын дарга Г.Энхтайван ажлын хэсгийн зорилго, чиглэлийн дагуу боловсролын салбарын худалдан авах ажиллагааны мэдээг 2021 оны наймдугаар сарын 03-ны өдрийн байдлаар танилцууллаа.

Боловсрол, шинжлэх ухааны яамнаас эрх шилжсэн нийт 31 ажил байгаа бөгөөд төсөв өртөг нь 19.8 тэрбум төгрөг юм байна. Үүнээс 9 ажилд гэрээ байгуулах эрх олгож, 3 ажилд гэрээ хийгдэж, 14 ажилд тендерийн материал хүлээн авч байгаа бол үнэлгээ хийгдэж байгаа 5 ажил байна. Төрлөөр нь авч үзвэл сургууль, цэцэрлэгийн засвар 13, тоног төхөөрөмж худалдан авалт 5, сургуулийн барилга 1, цэцэрлэгийн барилга 4, сургуулийн өргөтгөл 1, сургуулийн автобус 1 буюу дийлэнх нь засварын ажил байгааг танилцууллаа.

Худалдан авалттай холбоотой төрийн бүх байгууллагын уялдаа холбоо муугаас шалтгаалан сургууль, цэцэрлэгийн барилгын бараг 20-иод төсөл гацаанд оржээ. “Газрын асуудал нь шийдэгдчихсэн, бага хувьтай гэлтгүй гүйцэтгэл хийгдчихсэн хэрнээ гацчихсан төслүүдийг нэн түрүүнд дуусгах нь бидний зорилгын нэг болж харагдлаа” гэж УИХ-ын гишүүн Х.Ганхуяг хэллээ.