Month: August 2021

Ковид-19-ийн халдвараар эмнэлэгт хэвтэн эмчлүүлж буй өвчтөнүүдэд ремдесивир, умифеновир зэрэг вирусийн эсрэг эмийн нөөц эмнэлгүүдэд цөөн тооны үлдэгдэлтэй байгаа нь өвчтөний ар гэрээс эм тариа авчруулах үндэс болдог тул нэн түрүүнд шаардлагатай эмийн нөөцийг бүрдүүлэх хэрэгтэй байгааг Ажлын хэсгийнхэн хэлж байна.

Мөн маш хүнд, хүнд ангиллын өвчтөнүүдийг эмчилж буй эмнэлгүүд төрөөс тогтоосон эмчилгээний төсвөөс хэд дахин илүү зардлаар эмчилгээ үйлчилгээ үзүүлж байгаа нь бодит зардлын зөрүүг үүсгэх болсон тул нэгдсэн стандарт бий болгож олон улсын эмчилгээний удирдамжийн дагуу үйл ажиллагааг мөрдүүлж хэвшүүлэх нь чухал байгаа аж.

Улмаар эмчилгээний нэгдсэн удирдамжийн дагуу эмчилгээ, үйлчилгээ нь хийгдэж байгаа, эсэхэд өвчтөн болон тэдгээрийн ар гэрийнхэн хяналт тавих боломжийг бүрдүүлж, иргэдээс гомдол, мэдээлэл авах тусгай дугаар ажиллуулах хэрэгтэй байгааг дуулгав.

Шадар сайд С.Амарсайхан “Ковидын халдвар манай эрүүл мэндийн салбарт тулгамдсан олон асуудлыг ил болгож өглөө. Тогтолцоогоороо гажуудсаны нэг илрэл нь өнөөг хүртэл бид эмчилгээ үйлчилгээний стандарт, нэгдсэн удирдамж гэдэг зүйлийг хэвшүүлээгүй явж ирсэн явдал. Энэ нэгдсэн удирдамж, стандарт байхгүй учраас эмч эмнэлгийн ажилтнууд хувийн үзэмж, хандлагаараа өвчтөнүүдэд хандаж, дур дурын эм, тариагаа бичиж өгдөг. Тиймээс одоо бид Ковидын үеийн эмчилгээний нэгдсэн удирдамжаа яаралтай батлуулж, хэрэгжилтэд нь хяналт тавих ёстой. Үүнд иргэдийн оролцоог хангахын тулд Засгийн газрын иргэд олон нийттэй харилцах төвийн 1111 дугаарын утсаар эмнэлгүүдийн эм, эмийн хэрэгслийн хангамж болоод эмчилгээ үйлчилгээтэй холбоотой гомдол саналыг хүлээн авах шугам нээж ажиллуулна” хэмээн онцолж хэллээ.

Мөн Эм, эмнэлгийн хэрэгслийн хяналт, зохицуулалтын газрын үйл ажиллагааг жигдрүүлж, хараат бусаар ажлаа явуулах боломжийг бүрдүүлснээр эмийн дээд үнийн хязгаарыг тогтоох асуудал цэгцэрч, эм, эмнэлгийн хэрэгслийн худалдан авалтыг нэгдсэн байдлаар зохион байгуулах, өндөр үнэтэй, олдоц ховор эмийн нөөцийг тасалдуулахгүй бүрдүүлэх боломж нээгдэх учраас энэ тал дээр анхаарч ажиллахаа илэрхийлсэн юм.

Наймдугаар сарын 1-нээс хойш эмнэлгүүдийг өвчтөний ар гэрээс эм, тариа авахуулахгүй байх үүргэг өгсөн. Энэ хүрээнд Улсын нэгдүгээр төв эмнэлэг гаднаас авдаг эм, тарианы судалгааг төв, алба, тасгуудаас гаргуулж байгаа бол ХӨСҮТ-ийн тухайд Эмзүйн албанд гаднаас их авахуулдаг эм, тарианы сарын хэрэгцээний судалгааг хийлгэхийн зэрэгцээ эмчилгээнд хамгийн их хэрэглэгддэг эм, тариаг тасалдалгүй нийлүүлэх боломж нөөц хэр байгааг эм ханган нийлүүлэх байгууллагуудаас судалж эхэлжээ.

Эм, эмийн хэрэгслийн нөөц бүрдүүлэлт, чанар стандартад хяналт тавьж, наймдугаар сарын 1-нээс эхлэн эмнэлэгт хэвтэн эмчлүүлж байгаа иргэдээр гаднаас эм тариа авахуулахгүй байх зохион байгуулалтад шилжиж ажиллахыг Шадар сайд даалгасан. Энэ хүрээнд холбогдох яам, агентлагийн зүгээс эрүүл мэндийн байгууллагуудын эм, эмийн хэрэгслийн нөөц бүрдүүлэлт, үнийн тогтвортой байдлыг шалган, цаашид авах арга хэмжээний талаар өнөөдөр УОК-ын дэргэдэх шуурхай Ажлын хэсэгт танилцууллаа.

Өнөөдрийн байдлаар эм ханган нийлүүлэх төвүүдэд вирусийн эсрэг “Рeмдeсивeр” 37 мянга, “Умифeновир” 1.3 сая ширхэг нөөцтэй, эрүүл мэндийн байгууллагуудад эмийн нөөц тасалдаагүй, үнийн хувьд тогтвортой байгаа гэлээ. Цаашид Эрүүл мэндийн яамнаас вирусын эсрэг эмийн хангамжийг нэмэгдүүлэх хүрээнд 3 төрлийн эмийг ерөнхий гэрээгээр оруулж ирэхээр бэлтгэл ажлыг хангаж, 1 сая тунг захиалжээ. Мөн халдварын хүнд шинж тэмдэгтэй иргэдэд хэрэглэдэг, нас баралтаас урьдчилан сэргийлэх өндөр үйлчлэлтэй “Тоцилизумаб” эмнээс 2000 ширхэгийг ойрын хугацаанд нийлүүлэхээр болжээ. Түүнчлэн үндэсний үйлдвэрлэгчид дотооддоо вирусийн эсрэг Умифеновир/ арбидол/, Фабипиавир зэрэг 2 төрлийн эмийг үйлдвэрлэхээр бэлтгэж байгаа бөгөөд түүхий эд хангалттай байгаа гэлээ. Наймдугаар сарын 1-нээс эхэлж бүх эмнэлгүүд эм эмийн хэрэгслийн нөөц бүрдүүлэлтийг өөрсдөө хариуцахаар болж байгаа. Гэвч эмнэлгүүд өдгөө эм ханган нийлүүлэх байгууллагуудад их, бага хэмжээний өртэй явж байгаа нь эмийн нөөц бүрдүүлэлтэд хүндрэл учруулж болзошгүй байгааг Эм, эмийн хэрэгслийн хяналт зохицуулалтын газрын дарга Б.Цэцэгсайхан дуулгалаа.

Эмнэлгүүдийн өр төлбөрийн асуудлыг судлан шалтгаан нөхцөлийг бодитоор тодорхойлж, цаашид эм эмийн хэрэгслийн нөөцийг хэрхэн бүрдүүлэх чиглэлээр авч хэрэгжүүлэх арга хэмжээний санал дүгнэлтээ нэгтгэн танилцуулахыг Шадар сайд салбарын яам, холбогдох агентлагийнханд үүрэг болгов. Мөн эмийн нөөц, чанар стандарт, үнийн тогтвортой байдалд онцгой анхаарч, аж ахуйн нэгжүүдийг нээлттэй, ил тод мэдээллээр хангаж ажиллахыг Эм, эмийн хэрэгслийн хяналт зохицуулалтын газрын даргад анхаарууллаа.

Энэ сарыг тогтвортой хөгжлийн дөрөвдүгээр зорилгыг дэмжих сар болгон зарлалаа. Нэгдсэн үндэстний байгууллагын Монгол дахь Суурин төлөөлөгчийн газраас 2021 онд сар бүрийг Тогтвортой хөгжлийн аль нэг зорилгыг дэмжиж таниулан сурталчлах ажлыг зохион байгуулж байгаа билээ. Наймдугаар сард боловсролын “Тогтвортой хөгжлийн зорилт-4”-ийг таниулан сурталчлах ажил өрнөж байна.

Аяны хүрээнд Монгол Улс дахь НҮБ-ын Суурин зохицуулагчийн газар, ЮНЕСКО, НҮБ-ын Хүүхдийн сан, Монгол Улсын Боловсрол, шинжлэх ухааны яам болон ЮНЕСКО-ийн Монголын үндэсний комисс хамтран сурталчилгаа нөлөөллийн ажлыг зохион байгуулж байна.

Энэхүү аяны хүрээнд ТХЗ-уудыг таниулан сурталчлах, үндэсний боловсролын салбарын төлөвлөгөөнд уялдуулан нэгтгэх чиглэлд хийсэн ажлын явцыг үнэлэх, дүгнэх, Тогтвортой хөгжлийн Алсын хараа 2050 баримт бичиг, НҮБ-ын Монгол дахь Хөгжлийн тусламжийн хүрээ, НҮБ-ын Тогтвортой хөгжлийн хамтын ажиллагааны хүрээ зэрэг баримт бичгүүдийн хэрэгжилттэй уялдуулан нийцүүлэх, Боловсрол 2030 хөтөлбөрийг үндэсний стратеги, бодлоготой нийцүүлэх, хяналт, хэрэгжилтийн механизм, хэрэгжилтэд гарч буй бэрхшээлийн талаар хэлэлцэх, үндэсний бүх оролцогч талуудыг оролцуулах зорилготой юм.

Нийслэлийн Засаг даргын орлогч Ж.Сандагсүрэн, зөвлөх Б.Мягмар нар Хөдөлмөр, нийгмийн хамгааллын дэд сайд С.Зулпхар болон НҮБ-ын Шилжилт хөдөлгөөний байгууллагын төслийн удирдагч Виктор Лутенко тэргүүтэй төлөөллийг хүлээн авч уулзлаа.

НҮБ-ын Шилжилт хөдөлгөөний байгууллага болон Хөдөлмөр, нийгмийн хамгааллын яам хамтран Хөдөлмөрийн динамик загварыг ДТН аргачлалаар хэрэгжүүлэхээр ажиллаж байгаа юм. Тус хамтын ажиллагааны хүрээнд “Монгол дахь дотоодын шилжилт хөдөлгөөнийг ойлгож, удирдах нь” төслийг хэрэгжүүлэхээр Улаанбаатар хот, Дархан-Уул, Баян-Өлгий аймгийг сонгоод байгаа аж. Иймээс НҮБ-ын Шилжилт хөдөлгөөний байгууллагаас НЗДТГ-тай хамтран хөдөлмөрийн динамик загварыг Улаанбаатар хотод хэрэгжүүлэх чиглэлээр урт хугацааны гэрээ байгуулан ажиллах хүсэлтэй байгаагаа уулзалтын үеэр онцоллоо.

Хөдөлмөр, нийгмийн хамгааллын дэд сайд С.Зулпхар “Төслийг хэрэгжүүлэхээр сонгосон хоёр аймагт хүсэлт илгээсэн. Одоо бид нийслэлийн удирдлагуудтай зөвшилцөлд хүрэхээр ажиллаж байна. Нийслэлд хэрэгжүүлэхээр болбол есдүгээр сараас эхлэн төслөө эхлүүлэхээр төлөвлөж байна” хэмээв. Санал болгосон төслийн талаар дотооддоо хэлэлцэн, зөвшилцөж, тодорхой шийдэлд хүрсний дараа хариу мэдэгдэх тухайгаа Нийслэлийн Засаг даргын орлогч Ж.Сандагсүрэн хэллээ.

Монгол дахь НҮБ-ын Шилжилт хөдөлгөөний байгууллагаас сүүлийн жилүүдэд дотоодын шилжилт хөдөлгөөний талаар төрөл бүрийн судалгаануудыг явуулж, шилжилт хөдөлгөөний учир шалтгаан, үр дүн, тулгарч байгаа гол асуудлуудыг нь нарийвчлан судалжээ. Цаашид хамтарч ажиллахаар болбол судалгааны үр дүнгүүдийг дэлгэрэнгүй танилцуулан, төсөл, хөтөлбөрүүдэд ашиглах боломжтой аж.

ОХУ-д гарсан ой, хээрийн түймрийн утааны улмаас манай орны төвийн болон зүүн аймгуудын нутгаар утаан хөшиг тогтож агаарын чанар муудах нөхцөл үүссэн.

Улаанбаатар хотод байрлах агаарын чанарын хяналтын харуулуудын дүнгээс харахад агаар дахь тоосонцрын дундаж агууламж 2021 оны 8 дугаар сарын 4-ний өдрийн 15 цагаас эхлэн эрс нэмэгдэж PM10 тоосонцорын нэг цагийн дундаж агууламж 168мкг/м3, PM2.5 тоосонцорын нэг цагийн дундаж агууламж 103мкг/м3 хүрсэн байна.

Агаарын чанарын харуулуудын хэмжилтээр PM2.5 тоосонцорын хоногийн дундаж агууламж 8 сарын 4-ний өдөр 38-69 мкг/м3 байсан нь өмнөх өдрөөс 4-10 дахин их байгаа бөгөөд Хайлааст, 1-р хороолол, 5 буудал, баруун 4 зам орчимд агаарын чанарын стандартад заасан хүлцэх агууламжаас 1-1.4 дахин давсан үзүүлэлттэй байна.