Month: August 2021

Categories
мэдээ нийгэм

МУБИС-аас Офицеруудын ордон хүртэл дугуйн замтай болох ажил эхэллээ

МУБИС-аас Офицеруудын ордон хүртэл дугуйн зам тавих ажил эхэлсэн байна. Одоогийн байдлаар дугуйн зам хучилт авах эсэхийг шалгаж, хоёр бульварийг бүрэн тэгшилж хучилт хийхэд бэлэн болгожээ. Гурав дахь бульварт таван хүн ажиллаж байгаа үүн дээр 10 хүн нэмж ажиллуулан өнөөдөртөө хучилтаа эхлүүлэхээр төлөвлөөд байна.

Дугуйн замын ажлыг 30 хүний бүрэлдэхүүнтэйгээр хийх төлөвлөгөөтэй боловч хүн хүчний хомс байдлаас хамаарч 5-6 хүн байнгаар ажиллаж байгаа гэдгийг холбогдох албаны хүмүүс мэдээллээ.

Дашрамд дуулгахад Баянзүрх дүүрэгт энэ жилдээ багтаан

  • Энхтайваны өргөн чөлөө, МУБИС-ийн урд уулзвараас Зүүн 4 замын уулзвар хүртэл 1.5 км дугуйн зам
  • Энхтайваны өргөн чөлөө, Зүүн дөрвөн замын уулзвараас Офицеруудын ордон хүртэлх 2.57 км дугуйн зам
  • Маршалын гүүрнээс Зайсангийн гүүр хүртэлх Туул голын арын далан дагуу 2.35 км дугуйн зам тус тус хийхээр төлөвлөөд байгаа аж.

МУБИС-аас Офицеруудын ордон хүртэл дугуйн замтай болно

Categories
гадаад мэдээ

Олимптой холбоотой халдварын тохиолдлын тоо 400 давжээ

Токиогийн олимпийн наадамтай холбоотой 22 хүнээс коронавирусийн халдвар илэрснээр тохиолдлын нийт тоо 404 боллоо гэж тус наадмыг зохион байгуулагчид бямба гаригт мэдээллээ.

Шинээр илэрсэн халдварын тохиолдлуудын 13 нь гэрээт ажилтан, дөрөв нь наадамтай холбоотой төлөөлөгч, хоёр нь хэвлэл мэдээллийн байгууллагын ажилтан мөн зохион байгуулах хорооны ажилтан болон сайн дурын ажилтан юм.

Харин тамирчдын дунд сүүлийн хоёр өдөр дараалан халдварын тохиолдол бүртгэгдээгүй байна. Шинжилгээний хариу нь эерэг гарсан 22 хүний 16 нь Японы иргэн бол тамирчдын хотхонд байрлаж байсан хилийн чанадаас ирсэн нэг хүнээс мөн халдвар илэрчээ.

Нийт 17 өдөр үргэлжлэх олимпийн наадам өнөөдөр өндөрлөнө. Энэхүү наадмыг зохион байгуулж буй Токио хотын хувьд халдварын улмаас онцгой байдал тогтоосон хэвээр байгаа бол Японы бусад бүсүүдэд сүүлийн долоо хоногуудад халдварын тохиолдлын тоо нэмэгдэх болоод байна.

Мөн Японы нийслэлд пүрэв гарагт 5042 хүнээс халдвар илэрсэн нь цар тахал дэгдсэнээс хойш өдөрт бүртгэгдсэн хамгийн өндөр үзүүлэлт болсон бөгөөд баасан гарагт 4515 тохиолдол илэрчээ. Ингэснээр улсын хэмжээнд илэрсэн халдварын нийт тохиолдлын тоо баасан гаргийн байдлаар нэг саяд хүрсэн юм.

Тамирчдын хувьд “COVID-19”-өөс урьдчилан сэргийлэх хатуу арга хэмжээнүүдийг мөрдөж буй “зэрэгцээ ертөнцөд” амьдарч байгаа тул хотхоны гаднах нөхцөл байдалтай харьцуулахад харьцангуй цөөн тохиолдол бүртгэгдээд байгааг холбогдох албаны төлөөлөгчид мэдээлжээ.

Categories
мэдээ нийгэм

Ази тивийн сурагчдын шатрын тэмцээнд Монгол охин хүрэл медал хүртлээ

Дунд сургуулийн сурагчдын Ази тивийн аварга шалгаруулах олон улсын шатрын онлайн тэмцээнд Монгол Улсаас М.Анандзаяа охин хүрэл медалийн болзол хангав.

Олон улсын энэ тэмцээнд Монгол Улсаа төлөөлөн оролцсон М.Анандзаяа нь Ховд аймгийн “Прогресс” сургуулийн 1 дүгээр ангийн сурагч бөгөөд тэрээр охидын 7 настнуудын ангилалд амжилттай оролцож багийн төрөлд хүрэл медалийн болзол хангажээ. Ази тивийн сургуулиудын аварга шалгаруулах тус тэмцээнд 24 улсын 890 тамирчид өрсөлджээ.

Categories
амьдралын-өнгө мэдээ

ЭМЯ: Орон нутагт бүртгэгдсэн 985 тохиолдлын 516 нь Баян-Өлгийд илэрлээ

Сүүлийн 24 цагийн хугацаанд Баян-Өлгий аймагт коронавирусийн халдварын 516 тохиолдол бүртгэгджээ байна. Орон нутагт нийт бүртгэгдсэн 985 тохиолдлын 50 орчим хувь зөвхөн тус аймагт илрээд байна.

Үүнээс 20 хүрэхгүй хоногийн өмнө халдварын нийт тохиолдол 300 гаруй байсан Баян-Өлгий аймагт өнөөдөр 3606-д хүрлээ.

Энэ талаар ХӨСҮТ-ийн захирал Л.Баттөр “Баян-Өлгий аймагт ХӨСҮТ-ийн баг энэ өдрүүдэд ажиллаж байгаа. Тэндээс ирүүлсэн тандалтын багийн мэдээгээр, аймагт хурим найраас гадна аялал жуулчлалыг дагаад хөл хөдөлгөөн их байна. Түүнчлэн вакцинжуулалтын хувь хамгийн бага байгаа” гэж хэлсэн билээ.

Categories
мэдээ нийгэм

Налайх-Чойрын уулзварын авто замын хөдөлгөөнийг нээлээ

БНХАУ-ын Засгийн газрын хөнгөлөлттэй зээлийн хөрөнгөөр хэрэгжүүлж байгаа Гачууртын уулзвараас Налайх-Чойрын уулзвар хүртэлх 20,9 км авто замын бүтээн байгуулалтын ажлын хүрээнд Налайх Чойрын уулзварыг өргөтгөн шинэчилж авто замын хөдөлгөөнийг нээлээ.

Налайх-Чойрын уулзвар өргөтгөн шинэчлэгдсэнээр зорчигч тээврийн аюулгүй, тав тухтай зорчих нөхцөл бүрдэж, замын хөдөлгөөний нэвтрүүлэх чадвар нэмэгдэж байна.

Categories
мэдээ нийгэм цаг-үе

​Өнөөдөр аавуудын баярын өдөр тохиож байна

Өнөөдөр аавуудын баярын өдөр тохиож байна. Манай улсад 2005 оноос наймдугаар сарын 8-ны өдрийг “Аавуудын баяр” болгон тэмдэглэж ирсэн.

2003 онд байгуулагдсан “Монголын эрэгтэйчүүдийн холбоо” энэ өдрийг албан ёсоор аавуудын баярын өдөр болгосон юм.

Манай улсын хувьд энэ өдрийг тэмдэглэн өнгөрүүлдэг дэлхийн 18 дахь орон. Дэлхий дахины улс орнуудад тэмдэглэн өнгөрүүлдэг энэхүү баярыг 1910 онд АНУ-ын Вашингтон мужийн Додд хэмээх охин аавдаа зориулан бий болгосон.

Монгол Улс нийт 3,296,866 хүн амтай, үүнээс 1,619,573 нь эрэгтэй. Тэдний 20 гаруй мянга нь өрх толгойлсон аавууд байдаг аж.

Categories
мэдээ нийгэм спорт цаг-үе

Өнөөдөр “ТОКИО-2020” олимпийн хаалтын ёслол болно

Токиогийн олимпийн бамбарыг буулгаж, “Парис-2024”-т шилжүүлэн өгөх хаалтын ёслолын ажиллагаа Улаанбаатарын цагаар 19.00-д эхэлнэ.

Хаалтын ёслолд Монголын багийн тугийг чөлөөт бөхийн тамирчин Мөнхтөрийн Лхагвагэрэлд зална. Тэрбээр чөлөөт бөхийн хамгийн хүнд жинд медалийн төлөө барилдан тавдугаар байрт орсон билээ.
Урьд өмнөх олимпоос ялгаатай нь энэ удаагийн хаалтын ёслолд харьцангуй цөөн тамирчин оролцоно. Учир нь коронавирусийн цар тахлын улмаас тэмцээн уралдаанаа дуусгасан тамирчид 48 цагийн дотор олимпийн тосгоныг орхих журам үйлчилж буй.
Тиймээс ихэнх тамирчин хэдийн нутаг буцаад буй. Харин тэмцээн уралдаан нь наадмын сүүлчийн өдрүүдэд болсон төрлийн тамирчид хаалтын ёслолын гол цөмийг бүрдүүлэх болно.
Categories
мэдээ нийгэм цаг-үе

ЭМЯ: 1463 хүнээс халдвар илэрч, зургаан хүн нас барлаа

Коронавируст халдварын нөхцөл байдлын талаар Эрүүл мэндийн яам ээлжит мэдээллээ хүргэж байна.

“Сүүлийн 24 цагт 1463 хүнээс халдвар илэрлээ. Эдгээрийн 478 нь Улаанбаатар хотод, 985 нь орон нутагт бүртгэгдлээ. Мөн сүүлийн 24 цагт 2269 хүн эдгэрч, эмнэлгээс гарчээ.

Мөн зургаан хүн ковидын нэн хүнд хэлбэрээр нас барлаа. Нийт нас баралт 852 боллоо.

Өнөөдрийн байдлаар 8764 хүн хэвтэн эмчлүүлж байна.

May be an image of text

Categories
мэдээ нийгэм цаг-үе

Өнөөдөр дархлаажуулалтын цэгүүд 10:00-15:00 цаг хүртэл ажиллана

Өнөөдөр буюу наймдугаар сарын 8-ны өдөр Улаанбаатар хотод суурин 14 цэгт 23 багийн 116 эмч, ажилтан ажиллаж, 5765 иргэнийг дархлаажуулахаар төлөвлөжээ.

Багахангай, Багануур, Налайх дүүргийн дархлаажуулалтын цэгүүд амрах бөгөөд төвийн зургаан дүүрэгт ажиллах дархлаажуулалтын цэгүүдийг танилцуулж байна.

Дархлаажуулалтын цэгүүд 10:00-15:00 цаг хүртэл ажиллана.







Categories
мэдээ нийгэм цаг-үе

Сибирийн түймрийн утаа Улаанбаатарыг ирэх долоо хоног хүртэл бүрхэх төлөвтэй байна

ОХУ-ын Бүгд Найрамдах Саха улсын нутагт гарсан ой хээрийн түймрийн утааны улмаас манай орны төвийн болон зүүн аймгуудын нутгаар утаан хөшиг энэ сарын 4-нд тогтсон билээ. Тэгвэл Сибирийн түймрийн утаа манай улсын нутаг дэвсгэрт дахин орж ирж, Улаанбаатар хотыг бүрхсэн байна.

Энэ талаар Цаг уур, орчны шинжилгээний газраас тодруулахад “Сибирийн ой хээрийн түймрийн утаа нийслэлээс гадна Дархан, Булган, Сэлэнгэ орчмын нутаг дэвсгэрийг бүрхсэн. Европын Холбооны агаар мандлыг судлах “Copernicus” төслийн вэбсайтаас үзвэл Якутын түймрийн утаа ирэх долоо хоногийн дунд хүртэл манай улсын газар нутгийн төв болон зүүн хэсгийг бүрхэх төлөвтэй байна” гэлээ.

ОХУ-ын Сибирийн бүс нутагт сүүлийн 150 жилд үзэгдээгүй хуурайшилттай зун болж байгаа. Үүний улмаас өнгөрөгч зургаадугаар сараас хойш тус бүс нутагт нийт 200 гаруй удаа түймэр гарч, 15 мянган км газар нутагт галд өртсөн. Одоогоор ОХУ-ын Якутад гарсан түймэр 12140 км талбайг хамарч түймэрт 5500 булга, 2700 буга, 1500 хандгай, 300 баавгай өртсөн байна.