Month: August 2021

Өнөөдөр аавуудын баярын өдөр тохиож байна. Монголд 2005 оноос хойш наймдугаар сарын 8-ны өдрийг “Аавуудын баяр” болгон тэмдэглэж ирсэн.

Монгол Улсын хувьд энэ өдрийг тэмдэглэн өнгөрүүлдэг дэлхийн 18 дахь орон.

Дэлхий дахины улс орнуудад тэмдэглэн өнгөрүүлдэг энэ баярыг анх 1910 онд АНУ-ын Вашингтон мужийн Додд хэмээх охин аавдаа зориулан бий болгосон түүхтэй. Түүний ээж багад нас барж, аав Уэллиам Смарт нь түүнийг болон таван дүүг нь ганцаар өсгөсөн байна. Додд охин зургадугаар сарын тавны өдөр болдог аавынхаа төрсөн өдрийг аавуудын баяр болгон тэмдэглэх гэж төлөвлөн нутгийн эрх баригчдад санал тавьжээ. Тэд охины хүсэлтийг хүлээн авсан ч тавны өдөр тэмдэглэхэд хугацаа тун бага байсан тул зургадугаар сарын 19-ний өдөр тэмдэглэсэн байна.

Удалгүй энэ баярыг олон газар тэмдэглэх болж, 1966 онд АНУ-ын Ерөнхийлөгч Линдон Жонсон зарлиг гарган наймдугаар сарын албан ёсоор “Аавуудын өдөр” хэмээн нэрийдэж, тэмдэглэх болжээ. Харин Монгол Улсад 2003 онд байгуулагдсан “Монголын эрэгтэйчүүдийн холбоо” энэ өдрийг албан ёсоор аавуудын баярын өдөр болгох шийдвэр гаргаж байна.

Монгол Улс нийт гурван сая 296 мянга 866 хүн амтай, үүнээс нэг сая 619 мянга 573 нь эрэгтэй. Тэдний 20 мянга гаруй өрх толгойлсон аав байдгийг Үндэсний статистикийн хорооны цахим хуудаст бичжээ.

Улаанбаатар хотын автомашины түгжрэлийг бууруулах, хөдөлгөөний эрчмийг нэмэгдүүлэхээр томоохон уулзваруудад засварын ажил хийж эхэлжээ. Баянзүрх дүүргийн нутаг дэвсгэр дэх Зүүн дөрвөн замын уулзварын засвар шинэчлэлтийн ажлыг гүйцэтгүүлэхээр бэлтгэл ажлыг хангаж байна.

Засварын ажлаар авто замын хашлага солих, инженерийн байгууламжийн худгуудын өндрийн түвшнийг тохируулах, авто замын зорчих хэсгийг асфальт-бетоноор хучих болон хэвтээ тэмдэглэгээний ажлуудыг хийнэ. Засварын ажил үргэлжлэх хугацаанд замын хөдөлгөөнийг хэсэгчлэн хаах бөгөөд холбогдох байгууллагуудад хүргүүлэн, хөдөлгөөн зохион байгуулалтыг хийх гэж байна. Үүнд:

• Наймдугаар сарын 8-ны 23:00 цагаас наймдугаар сарын 10-ны 23:00 цаг хүртэл Зүүн дөрвөн замын уулзвараас хойш Сансарын туннель хүртэл
• Наймдугаар сарын 10-ны 23:00 цагаас наймдугаар сарын 12-ны 23:00 цаг хүртэл Зүүн дөрвөн замын уулзвараас урагш Намьянжугийн гудамжны “Петровис” шатахуун түгээх станцын уулзвар хүртэл
• Наймдугаар сарын 12-ны 23:00 цагаас наймдугаар сарын 16-ны 23:00 цаг хүртэл Зүүн дөрвөн замын уулзварын хөдөлгөөнийг тус тус хязгаарлан, засвар шинэчлэлтийн ажил хийнэ. Иймд иргэд, жолооч та бүхэн бусад замыг сонгон хөдөлгөөнд оролцохыг Нийслэлийн авто замын хөгжлийн газраас анхаарууллаа.

“Токио-2020” олимпийн наадмаас хүрэл медаль хүртэж, медалийн салхийг хагалсан М.Уранцэцэгт “Хайбрид хаус” компани хаус бэлэглэнэ хэмээн амлаж байсан. Тэгвэл тус компани маргааш МУГТ М.Уранцэцэгт амласан амлалтаа биелүүлэхээр болжээ.

Тодруулбал, маргааш Жаргалантын аман дахь “Хайбрид Вилла” төслийн талбайд хаус бэлэглэх аж. МУГТ М.Уранцэцэг нь энэ сарын 4-нд эх орондоо ирсэн юм.

Манай улсад өнөөдрийн байдлаар коронавирусийн халдварын эсрэг дархлаажуулалтын нэгдүгээр тунгын вакцинд 2.2 сая хүн хамрагдаад байна.

Хоёрдугаар тунд 1.9 сая иргэн мөн хамрагджээ. Тодруулбал, эхний тунд нийт хүн амын 67.7 хувь, хоёрдугаар тунд 61.4 хувийг хамруулаад байгаа талаар ЭМЯ-наас мэдээллээ. Вакцинжуулалт эхэлснээс хойш нийслэлийн 18-аас дээш насны 1.091.254 иргэн эхний тунд, 991.910 иргэн хоёр дахь тунд хамрагдаад байна. Мөн нийт 2120 жирэмсэн эх, 12-15 насны 32.482, 16-17 насны 16.843 хүүхэд тус тус хоёр дахь тунд хамрагджээ.

2021-2022 оны хичээлийн шинэ жил танхимын болон цахим гэсэн хосолсон хэлбэрээр эхлэх гэж буйтай холбоотойгоор нийт баг, сурагч, оюутныг коронавируст халдварын эсрэг вакциндаа бүрэн хамрагдахыг ЭМЯ-наас уриалж байна.

БШУЯ, ЭМЯ-ны мэдээллээр цэцэрлэг, сургууль, МСҮТ, политехникийн коллежийн багш ,ажилчдын 90 гаруй хувь нь коронавируст халдварын эсрэг дархлаажуулалтад хамрагдаж вакцин хийлгэсэн дүнтэй байна. Мөн 12-17 насны нийт хүүхдийн 74.8 хувь нь вакцинжуулалтад хамрагдаад байна.

Өнөөдөр нийслэлд суурин 14 цэгт 23 багийн 116 эмч, ажилтан ажиллаж, 5765 иргэнийг дархлаажуулна. Багахангай, Багануур, Налайх дүүргийн дархлаажуулалтын цэгүүд амрах юм. Нийслэлд өчигдөр халдварын эсрэг вакцины эхний тунд 728, хоёр дахь тунд 780, нийт 1019 иргэнийг дархлаажуулжээ.

Баянзүрх дүүргийн 14 дүгээр хорооны нутаг дэвсгэрт өчигдөр /2021.8.7/ бусдад олон удаа хутгалуулснаас болж 13 настай хүүхэд амиа алдаж, долоон настай хүүхэд хүнд гэмтсэн хэрэг гарчээ. Цагдаагийн ерөнхий газрын хэвлэл мэдээллийн албаны дарга Б.Баатархүүгийн өгсөн мэдээллээр:

-Хэрэгт холбогдуулан шалгаж байгаа хүүхэд 11 настай бөгөөд тухайн үед мансууруулах бодис хэрэглэсэн байсан эсэх болон сэтгэцийн ямар нэгэн өөрчлөлттэй үгүйг мөрдөн шалгалтын ажлаар олж тогтооно. Одоогийн байдлаар шалгалтын ажил дөнгөж эхэлж байгаа учраас шалтгааныг тодорхойлох боломжгүй.

Хэргийн талаар дуудлага мэдээлэл өчигдөр 18.00 цагт цагдаагийн байгууллагын 102 тусгай дугаарын утсанд БЗД-ийн 14-р хорооны нутаг дэвсгэрт байрлах автомашины зогсоолд хүн хэвтэж байна гэж ирсэн. Дуудлагын дагуу цагдаагийн газрын хөдөлгөөнт эргүүлийн алба хаагчид гурван минутын дотор хэргийн газарт очиход эрэгтэй, эмэгтэй бага насны хоёр хүүхэд халдлагад өртсөн байж болзошгүй ухаангүй байдалтай байсан. Тиймээс Яаралтай түргэн тусламж болон БЗД-ийн цагдаагийн газрын жижүүрийн шуурхай бүрэлдэхүүнийг дуудан хэргийн газрыг хамгаалалтад авч ажилласан байгаа.

Хэргийн газарт ирсэн Яаралтай түргэн тусламжийн эмчийн үзлэгээр нэг хүүхэд нь хутганы олон шархтай гадны нөлөөтэй нас барсан, нөгөө хүүхэд нь мөн хутганы шархтай гэмтсэн ухаангүй байдалтай байсан. Гэмтсэн хүүхдийг ГССҮТ хүргүүлэн хохирогчдын хэн болохыг тогтоосон. Энэ гэмт хэргийн улмаас 13 настай эмэгтэй “Э” гэх хүүхэд газар дээрээ амь насаа алдаж, түүний дүү болох долоон настай эрэгтэй “Э” хүнд гэмтсэн ухаангүй байдалтай байна. Уг хэрэгт дээрх хохирогчидтой төрөл садангийн холбоотой 11 настай эрэгтэй “Б” гэгчийг холбогдуулан гэмт хэрэг үйлдэгдэх болсон шалтгаан нөхцөлийг тогтоохоор дүүрэг дэх цагдаагийн газраас мөрдөн шалгах ажиллагааг явуулж байгаа” гэлээ.

Мөн өчигдөр БЗД-ийн 14 дүгээр хороонд нэгэн хотхоны байрны граашаас гарч явсан эмэгтэйг бусдад хутгалуулж их хэмжээний цус алдсан байхад олжээ. Эмэгтэй нас барсан байдалтай байсан бөгөөд хүүг нь мөн гэмтээсэн байна. Хохирогч хүүгийн биеийн байдал маш хүнд байгаа аж. Иймд та бүхэн сонор сэрэмжтэй байхыг анхааруулж байна.

Иргэний нисэхийн ерөнхий газраас ирэх есдүгээр сарын нислэгийн хуваарийг танилцууллаа.

Ирэх сард нийт 29 удаагийн тусгай нислэг үйлдэхээр төлөвлөсөн байна. Гадаадаас ирэх иргэд нислэгийн хуваарийн дагуу тасалбар захиалахдаа агаарын тээвэрлэгчдэд шууд хандана.