Month: July 2021

Categories
мэдээ спорт

Н.Төгсцогт Крис Колбертэд ялагдлаа

Калифорниа мужийн Карсон хотын “Dignity Health Sports Park” цэнгэлдэхэд өнөөдөр Монгол Улсын Гавьяат тамирчин Н.Төгсцогт ээлжит тулаанаа хийлээ.

Тэрбээр, WBA холбооны түр аваргын бүсийг эзэмшигч Крис Колбертын саналыг хүлээн авч шахуу хугацаанд бэлтгэл ханган тулалдсан юм.

Сонирхогчдын боксын олимп болон дэлхийн аваргын мөнгөн медальт Нямбаярын Төгсцогтын хувьд 13 тулаан хийхдээ нэг удаа ялагдал хүлээж байсан. Нийт тулааныхаа 69 хувьд нь хүнд цохилтоор ялжээ. Харин түүний өрсөлдөгч Крис Колберт нэг ч ялагдаагүй босоо амжилттай байсан аж. Ийнхүү тэдний тулаан үзэгч, фэнүүдийнх нь уухайн дуунд сонирхолтой болж өнгөрлөө.

Categories
мэдээ нийгэм цаг-үе

НЭМГ: Талийгаач сүүлийн 10 хоногт согтууруулах ундаа байнга хэрэглэж байсан

Нийслэлийн Баянзүрх дүүрэгт байрлах “Энэрэл” эмнэлгийн гадаа өчигдөр /2021.07.03/ “Covid-19” халдвараар өвчилсөн хүн нас барсан харамсалтай хэрэг гарсан.

Энэ асуудлаар Нийслэлийн эрүүл мэндийн газраас мэдээлэл хийж байна.

НЭМГ-ын дарга Б.Бямбадорж ” Талийгч долдугаар сарын 2-ны өдөр “Хатагтай” эмнэлгийн онош мед төвд түргэвчилсэн тест өгөхөд “эерэг” гарсан. Мөн ууршгины рентген зураг авахуулахад хатгаатай гэх оноштой байсан. Чингэлтэй дүүргийн VI хорооны 50 дугаар байранд амьдардаг.

Чингэлтэй дүүргийн 50 дугаар байр нь 6 дугаар хорооны өрхийн эмнэлгээс 10 метрийн зайтай байрладаг. Өөрөөр хэлбэл, өрхийн эрүүл мэндийн төв ойрхон байсан. Тус хорооны хэсгийн ахлагчийн өрхийн эмнэлгийн эмчид өгсөн мэдээллээр тус тоотод хоёр хүн алт мөнгөний дархан хийж амьдардаг. Амьдардаг өрөөнийх нь орчин тааруу, орон сууцны зоорийн давхарт байрладаг. Сүүлийн 10 хоногт согтууруулах ундаа байнга хэрэглэж байсан гэдэг өгүүлэмж өгсөн байна. НЭМГ-ын зүгээс талийгаачийн ар гэрээс уучлал хүсэж байна” гэв.

Categories
гадаад мэдээ

Японд хөрсний нуралтын улмаас 20 гаруй хүн сураггүй болжээ

Токио хотоос баруун өмнө зүгт орших Атами хотод хөрсний нуралт болж, хоёр хүн амиа алдсан талаар NHK мэдээлэв.

Мөн 20 гаруй хүн сураггүй алга болсныг авран хайх ажиллагаа үргэлжилж байна. Аврах ажиллагаа эхэлснээс хойш арав гаруй хүнийг эсэн мэнд олж, эмнэлгийн тусламж үзүүлээд байгаа юм.

Бямба гаригт орон нутгийн цагаар 10:00 цагийн орчимд хөрс гулгаж эхэлснээр наян орчим байшин барилга өртөөд буй. Номхон далайн эрэгт орших Атами хотод сүүлийн өдрүүдэд үргэлжилсэн хүчтэй бороо орж буйгаас хөрс элэгдэж нуралт үүсэхэд хүргэжээ.

Categories
мэдээ эдийн-засаг

Хөнгөлөлттэй зохицуулалтын арга хэмжээг хэсэгчлэн сунгалаа

Монголбанкнаас банк, санхүүгийн салбарт Covid-19 цар тахлын үзүүлэх сөрөг нөлөөг бууруулахад шаардлагатай арга хэмжээний хүрээнд банкууд нийт 181.783 зээлдэгчийн 5.3 их наяд төгрөгийн зээлд бүтцийн өөрчлөлт хийж, эргэн төлөх нөхцөлд өөрчлөлт оруулаад байна. Монголбанкны Банкны хяналт шалгалтын хорооны 2021 оны зургадугаар сарын 29-ний өдрийн хурлаас гарсан зөвлөмжийн дагуу банкуудад “Активыг ангилах, активын эрсдэлийн сан байгуулж, зарцуулах журам”-д түр хугацаагаар мөрдүүлж буй хөнгөлөлттэй зохицуулалтыг 2022 оны дөрөвдүгээр сарын 1-ний өдрийг хүртэл урьдчилан тогтоосон хуваарийн дагуу хэсэгчлэн сунгахаар шийдвэрлэлээ.

Ингэснээр банкуудад зээлдэгчдийн зээлийн эргэн төлөх нөхцөлийг дахин өөрчлөх, эргэн төлөлтийн доголдолтой зээлийн ангилал, зээлийн түүхийг түр хугацаанд бууруулахгүй, дордуулахгүй байх эсэхийг бие даан шийдвэрлэх боломжийг нээлттэй үлдээжээ.

Зээлийн чанарын ангиллыг бууруулах хугацаа хэтэрсэн хоногийг /90 хоног болгосон байгааг/ 2021 оны наймдугаар сараас 75 хоног, 2021 оны аравдугаар сараас 60 хоног, 2021 оны арванхоёрдугаар сараас 45 хоног, 2022 оны хоёрдугаар сараас 30 хоног, 2022 оны дөрөвдүгээр сараас 15 хоног болгож, хэвийн горимд аажмаар шилжүүлэхээр зохицуулсан байна.

Түүнчлэн банкуудад түр хугацаанд мөрдүүлж байсан төлбөр түргэн гүйцэтгэх чадварын зохистой харьцаа болон экспортын аккредитивт хамаарах хөнгөлөлттэй зохицуулалтыг тус, тус хэвийн горимд шилжүүлжээ.

Categories
мэдээ нийгэм онцлох-нийтлэл туслах-ангилал

Хөшигийн хөндий дэх “Чингис хаан” олон улсын нисэх буудлын нээлт боллоо

Хөшигийн хөндий дэх “Чингис хаан” олон улсын нисэх буудлын нээлтийн үйл ажиллагаанд Монгол Улсын Ерөнхийлөгч У.Хүрэлсүх оролцож, үг хэллээ.

Тэрээр “Монгол Улсын томоохон бүтээн байгуулалтын нэг, Монгол-Японы харилцаа, хамтын ажиллагааны бэлгэдэл, бэлгэ тэмдэг болсон, далайд гарцгүй манай улсыг дэлхий ертөнцтэй холбох Хөшигийн хөндий дэх “Чингис хаан” олон улсын нисэх буудал ашиглалтад орж, эхний нислэгээ үйлдэх үйл ажиллагаанд оролцож байгаадаа баяртай байна.

Өөдлөх айл үүднээсээ гэдэг. Энэ нисэх буудал бол манай улсын үүд хаалга юм. Одоогоос гурван жилийн өмнө Ерөнхий сайд байхдаа Япон Улсад айлчлахад шинэ нисэх онгоцны буудлыг байгуулах ажлыг онцлон ярилцсан. Өнгөрсөн жил бид нисэх онгоцны буудлаа хүлээн авсан. Цар тахлын улмаас ажлууд хойшлогдсон ч өнөөдөр нээлтээ хийж байна.

Жилдээ гурван сая хүн хүлээж авах боломжтой нисэх буудал Монголын нийгэм, эдийн засаг, аялал жуулчлал хөгжихөд ашиг тусаа өгнө гэж найдаж байна. УИХ-аар баталсан “Шинэ Зуун мод” хот бий болж, нисэх онгоцны буудлыг дагаж шинээр амьдрал цэцэглэнэ” хэмээв.

Categories
мэдээ нийгэм цаг-үе

ЭМЯ: 1886 хүн эдгэрч, нийт эдгэрсэн хүний тоо 84819 боллоо

Сүүлийн 24 цагт 1886 хүн эмнэлэг болон гэрийн хяналтаас эдгэрчээ. Ингэснээр Монгол Улсад халдвар аваад эдгэрсэн нийт хүний тоо 84819 боллоо.

  • Хөнгөн 9368
  • Хүндэвтэр 3341
  • Хүнд 1145
  • Маш хүнд 264 буюу 14100 хүн эмнэлэгт хэвтэн эмчлүүлж байна. Гэрийн хяналтад 25691 хүн хөнгөн хэлбэрийн оноштойгоор өрхийн эмчийн хяналтад эмчлүүлж байна.

Өчигдөр 9000 орчим хүнд PCR шинжилгээ хийхэд халдварын 2520 тохиолдол бүртгэгдэж, нийт тохиолдлын тоо 125260 боллоо. Найман хүн халдварын улмаас нас баржээ. Улмаар нас баралтын тоо 617-д хүрлээ.

Categories
мэдээ нийгэм цаг-үе

“Торгоны зам” ралли уралдааны Монгол Улсын нутагт явагдах хэсгийг цуцалжээ

“Торгоны зам” олон улсын авто ралли уралдааны Монгол Улсын нутагт дэвсгэрт зохион байгуулах хэсгийг цуцалсан тухай ОХУ-ын шадар сайд, уралдааныг зохион байгуулах хорооны дарга Дмитрий Чернышенко мэдээлжээ.

Коронавирусийн нөхцөл байдал болон тарваган тахлын тохиолдол бүртгэгдсэнтэй холбогдуулан уралдааныг Монголын нутгаар үргэлжлүүлэх боломжгүй гэж уралдааны ковидын протоколыг хөтлөх, хяналт тавих штабын дарга Денис Проценко өмнө нь мэдэгдсэн байна.

“Халдварын нөхцөл байдал хүнд байгаатай холбогдуулан зөвлөлдсөний эцэст Монголд зохион байгуулах үе шатыг цуцлах шийдвэр гаргасан. Денис Проценкогийн санал болгосноор Монголд явагдах үе шатанд ашиглахаар төлөвлөж байсан “COVID-19”-ийн лаборатори, хувийн хамгаалалтын хэрэгсэл, тоног төхөөрөмжүүдийг Монголын талд хандивлана” гэж Чернышенко мэдээлжээ. “Тэмцээнийг зохион байгуулахад дэмжлэг үзүүлж, хамтран ажилласан түншүүддээ талархаж байна. Ирэх жилүүдэд бид төлөвлөсөн ажлуудаа хэрэгжүүлж чадна гэж найдаж байна” гэж тэрбээр нэмж хэлжээ.

Түүний мэдээлснээр, ОХУ-ын нутагт уралдаан төлөвлөсний дагуу явагдах бөгөөд уралдааны маршрутын дагуу аюулгүй байдал, эрүүл ахуйн бүх шаардлагыг хангана.

“Торгоны зам” авто ралли уралдаан Омск хотоос баасан гарагт гараагаа эхэлсэн байна. Бямба гаргийн уралдаан Уулын Алтай хотод өндөрлөжээ. Төлөвлөгөөний дагуу оролцогчид ням гарагт Монголын хилээр гарах ёстой байв.

“Торгоны зам” уралдаан долоодугаар сарын 1-11-ний хооронд Орос, Монгол, Хятад улсын нутаг дэвсгэрт болох ёстой байв. Гэвч коронавирусийн улмаас БНХАУ хилээ хаасан учир тус улсыг уралдааны замаас хассан тухай зохион байгуулагчид хоёрдугаар сард мэдэгдсэн юм. Уралдаан Омск хотоос гараагаа эхэлж, Хятадын Өрөмч хотод барианд орох ёстой байжээ.

Categories
мэдээ спорт

Евро-2020: Хагас шигшээд өрсөлдөх багууд тодорлоо

“Евро 2020” тэмцээний хагас шигшээд өрсөлдөх багууд тодорлоо.

Өнгөрсөн шөнө Английн шигшээ Украины багийг 4:0-ээр хожиж хагас шигшээд шалгарсан бол Даничуудыг Чехийг 2:1-ээр буулган авчээ.

Баасан гаригт Мюнхен хотноо болсон тоглолтоор италичууд Бельгийг 2: 1-ээр хожсон бол Санкт-Петербургийн цэнгэлдэхэд учраа таарсан Испани, Швейцарийн тоглолтын хувь заяа торгуулийн цохиолтоор шийдэгдсэн юм.

Тэмцээн эхэлснээс хойш Англи хаалгандаа нэг ч гоол алдаагүй амжилттайгаар хагас шигшээд орж ирж байна. 1968, 1996 онд англичууд Европын аваргаас хүрэл медаль хүртэж байв.

Долдугаар сарын 07-нд Итали – Испанийн шигшээ, харин 8-нд Англи Данийн эсрэг тоглоно. Европын аварга шалгаруулах тэмцээн долдугаар сарын 11-нд өндөрлөх юм.

Categories
мэдээ нийгэм

ЭМЯ: 2520 хүнээс халдвар илэрч, найман хүн нас барлаа

Коронавируст халдварын нөхцөл байдлын талаар Эрүүл мэндийн яам ээлжит мэдээллээ хүргэж байна.

“Сүүлийн 24 цагт 9000 сорьцод шинжилгээ хийхэд 2520 хүнээс халдвар илэрлээ. Эдгээрийн 1302 нь Улаанбаатар хотод, орон нутагт 1217, зөөвөрлөгдсөн 1 тохиолдол бүртгэгдсэн байна. Ингэснээр улсын хэмжээнд нийт батлагдсан тохиолдол 125260 боллоо.

Мөн найман иргэн нас барж, ковид шалтгаант нас баралт 617 болж байна.

Өнөөдрийн байдлаар эмнэлэгт 14100 хүн хэвтэн эмчлүүлж буйгаас

-хөнгөн: 9368

хүндэвтэр: 3341

хүнд: 1145

маш хүнд: 246 хүн байна.

Сүүлийн 24 цагт 1886 хүн эдгэрч, эмнэлгээс гарлаа.

Categories
мэдээ нийгэм цаг-үе

Шарк.Аэро Прагаас шууд нислэг үйлдэн Улаанбаатарт газардлаа

Улаанбаатар, Монгол Улс – 2021 оны долдугаар сарын 3 Ноён Денис Гибадулин, Герхард Вакенхүт нар Прагаас Улаанбаатар хүрэх 7299 км урт нислэгээ 18 цаг 31 минутад газардаж дуусгалаа.

Нислэгийн явцад ОХУ-д 5 удаагийн зогсолт хийжээ. Хоёр нисгэгчийн бүрэлдэхүүнтэй ШАРК онгоцны баг агаарт 29 цагийг өнгөрөөж, дунджаар 252км/цаг хурдалсан байна. Агаарын хөлгийн бүртгэлийн дугаар болох ОК-AUR 71 нь Чех, Монголын дипломат харилцаа тогтоосноос хойших 71 жилийг бэлгэдсэн юм.

Түүнчлэн онгоцны их биеийн дизайныг зураач, уран бүтээлч Лхагвын Амарсанаа Монголын гоо үзэсгэлэн, үлгэр домгийг шингээн бүтээсэн байна. ШАРК онгоцны зүлгэн зурваст газардах чадвар, мөн 300 км/цагийн хурд, болоод автомашинд ашигладаг ердийн 95/98 шатахуунаар нэг дор 2,500 км хүртэлх зайг туулах хүчин чадал зэрэг олон талт байдал нь тус онгоцыг Монгол улсад хамгийн тохиромжтой агаарын хөлөг болгож байна.
“Чех улс нь ерөнхий зориулалтын нисэхийн зах зээл хамгийн өндөр хөгжсөн орнуудын нэг бөгөөд ялангуяа өндөр хүчин чадал бүхий хэт хөнгөн агаарын хөлөг үйлдвэрлэлээрээ дэлхийд тэргүүлдэг. ШАРК нь тус улсын нисэхийн салбарын 100 гаруй жилийн туршлага, хөгжлийн хамгийн шинэхэн төлөөлөл болсон онгоц юм. ШАРК онгоц Монголд шинээр хөгжиж буй ерөнхий нисэхийн салбарт асар их боломж, түлхэц болно гэдэгт би итгэлтэй байна гэж Герхард Вакенхүт хэллээ. Цааш нь тэрээр ШАРК онгоц Прагаас Улаанбаатарт нисэж ирсэн явдал нь тус онгоцны чадал чансааг нотоллоо. Мөн би хувийнхаа зүгээс нэг зүйлийг хуваалцах ёстой болов уу. Арилжааны холын зайн нислэгт 1.90м өндөр надад ихэвчлэн ямар нэг бэрхшээл тулгардаг. Харин ШАРК-н супер тав тухтай кабины ачаар надад ямар ч асуудал тулгарсангүй явж ирлээ” гэв.
Герхард Вакенхүт нь Монгол Улсад амьдардаг Германы иргэн бөгөөд бизнесээ эрхлэхээс гадна их сургуульд лекц уншдаг. Тэрээр олон зуун цагийн нислэгийн туршлагатай, маш урам зоригтой нисгэгчийн хувиар ШАРК-ын Монгол дахь шинэ албан ёсны төлөөлөгчөөр ажиллана. Маркетинг, ерөнхий зориулалтын нисэхийн болон орон нутгийн орчны туршлага дээрээ үндэслэн тэрээр Монголын ерөнхий зориулалтын нисэхийн салбарыг гайхалтай ирээдүй хүлээж байгаад бат итгэлтэй нэгэн.
Денис Гибадулин нь ШАРК онгоцыг Хойд Америк, Европын орнууд, Ойрх Дорнод, мөн Ази тивд нийлүүлдэг ШАРК.АЭРО компанийн Захирал бөгөөд Монгол Улсад гурав дахь удаагаа ирж байна. Өмнө нь тэрээр иргэний нисэхийн салбарттэргүүн туршлага солилцох, хамтын ажиллагаанд дэмжлэг үзүүлэх зорилготой Чех улсын засгийн газрын Худалдааг Дэмжих хөтөлбөрийн хүрээнд ирж байсан юм. 7-р сарын 4-ний Ням гарагт болох Улаанбаатар хотын Олон улсын нисэх онгоцны шинэ буудлын (Чингис хаан) нээлтийн үеэр тус ШАРК онгоц өөрийгөө Монгол Улсад танилцуулах юм.