Month: July 2021

Categories
гадаад мэдээ

Токиогийн олимпийн наадмыг үзэгчгүй зохион байгуулах санал гаргажээ

Японд коронавирусийн халдварын нөхцөл байдал хүндэрч байгаатай холбогдуулан олимпийн наадмыг үзэгчгүй зохион байгуулах эсэх талаар Олон улсын олимпийн хороо, Олон улсын паралимпийн хороо, Япон улсын Засгийн газар, Токио хотын захиргаа, Олимпийн наадмын Зохион байгуулах хороотой зөвлөлдөхөөр төлөвлөж байгаа хэмээн Япон улсын Олимп, паралимпийн асуудал эрхэлсэн сайд Т.Марүкава мэдэгдлээ.

Японы Засгийн газар болон эрх баригч Либерал ардчилсан намын зүгээс ч олимпийн наадмыг үзэгчгүй зохион байгуулж, халдварын эсрэг арга хэмжээг чангатгах талаар нухацтай авч хэлэлцэх нь зүйтэй гэсэн санал гаргаад буй.

Токио хотод долдугаар сарын 1-ний өдөр халдварын 673 шинэ тохиолдол бүртгэгдэж, өмнөх долоо хоногийн мөн өдрийн тоог 12 хоног дараалан давжээ. Ингэснээр Токио хотын халдвар авсан нийт иргэдийн тоо 174.604 болоод байна.

Харин Япон улсын хэмжээнд 801.553 хүн коронавирусийн халдвар авч, 2236 хүн нас баржээ.

Өмнө нь олимпийн наадмыг үзэгчдийн суудлын 50 хувийн дүүргэлттэйгээр явуулах шийдвэр гаргаад байв.

Categories
мэдээ улс-төр цаг-үе

Ардчилсан намаас Монгол Улсын Их Хурал, Засгийн газарт шаардлага хүргүүллээ

Ардчилсан намаас Монгол Улсын Их Хурал, Засгийн газарт шаардлага хүргүүллээ.

Шаардлага хүргүүлэх тухай:
Цар тахлын халдвар ихсэж, халдвар авсан зарим иргэдийн өвчлөл хүндэрч, улмаар нас баралтын тоо өдөр ирэх тусам өсөж байгаад Ардчилсан нам /АН/-ын зүгээс гүнээ санаа зовниж байна. Засгийн газрын урагшгүй удирдлагын улмаас амь насаа цаг бусаар алдсан иргэдийн ар гэрийнхэн, төрөл төрөгсдөд гүн эмгэнэл илэрхийлж байна. Ковидоос үүдэлтэй эрүүл мэндийн салбарт үүссэн бэрхшээлтэй зэрэгцэн эдийн засаг хямарч, ядуурал гүнзгийрэн, үнийн өсөлт тэнгэрт тулж, ААН-үүд олноороо хаалгаа барьж, бизнесийн салбарынхан бүрэн дампууралд тулж ирээд байна. Энэ гамшгаас хэрхэн гарах гарц, шийдлийн хувилбар бүхий дараах шаардлагыг Ардчилсан намаас Улсын Их Хурал /УИХ/, Засгийн газар /ЗГ/-т хандан гаргаж байна. Үүнд:
Нэгдүгээрт: Төсвийн тодотголыг жинхэнэ утгаар нь хийж, хэмнэсэн мөнгийг эрүүл мэндийн салбарт зарцуулах!
2021 онд нийт 3.8 их наяд төгрөгийн хөрөнгө оруулалт төсөвлөсөн ба үүнээс 1.6 их наяд төгрөгийн санхүүжилтийг ондоо баггаж хийхээр төлөвлөж байгаа юм байна. Тодотголоор хөрөнгө оруулалт буурсангүй харин ч өсжээ. Төсвийн нийт алдагдлыг анх хоёр их наяд төгрөгөөр төсөвлөж байсан бол тодотголоор 1.5 их наяд төгрөгөөр нэмэгдүүлж 3.7 их наяд төгрөгт хүргэжээ.
Хүүхдийн мөнгийг үргэлжлүүлэн олгох зэрэг сайшаалтай зүйлүүд байгаа боловч сонгуульд зориулсан байж болох зардал маш их байна. Малчдад тараасан “100 мянган төгрөгийн тэтгэмж”-ийг өнгөрсөн хойно нь тодотголд суулгаж байгаа бололтой. Учир нь 2021 оны төсвийн тодотголоос үзэхэд ковидтой тэмцэхэд нэмж 230 тэрбум тегрөг төсөвлөжээ. Гэтэл анх 14 их наяд төгрөгийн зарлагатай байсан төсвийг 16 их наяд хүргэж өсгөсөн байна. Ингэж зарлага бараг 2 их наяд төгрөгөөр өсөж байхад ковидтой шууд тэмцэх эрүүл мэндийн салбарын нэмэлт хөрөнгө оруулалт нь үүний 10 гаруй хувьтай л тэнцэж байна. Өөрөөр хэлбэл ковид нэрийн дор “бай”-гаа олоогүй үрэлгэн тодотголыг МУЗГ-т өргөн барьсан нь туйлын хариуцлагагүй үйлдэл юм.
Хувийн хэвшилд эрх чөлөөг нь өгөх замаар хэмнэх боломжтой зардлууд төсөвт нэлээн их хэмжээгээр туссан байна. Жишээ нь: Увс аймагт Баруун бүсийн логистик төвийн техник, эдийн засгийн үндэслэл, зураг төсвийг 250 сая төгрөгөөр хийх гэнэ. Мөн Цагаан ултай гутлын кпастер төвийн техник, эдийн засгийн үндэслэл, зураг төсөв 100 сая төгрөг гэнэ.
Гурил, тэжээлийн үйлдвэрийн техник, эдийн засгийн үндэслэл, зураг, төсөв 200 сая төгрөг байна. Мөн бизнес инкубатор төвийн ТЭЗҮ нэртэй тус бүр нь 100 сая төгрөгийн хөрөнгө оруулалтууд цөөнгүй тусгагджээ. Зөвхөн нэг аймгийн хувьд ийм байна. Хувийн хэвшлийнхэн зах зээлийнхээ зарчмаар хийж болох эдгээр төсөл хөтөлбөрүүдийг зогсоох шаардлагатай.
Хэнтий аймагт маш олон соёлын ордон баригдахаар төсөвлөжээ. Түүнээс гадна, Хэнтий аймгийн Батноров сумын Хөгжпийн ерөнхий төлөвлөгөөг 200 сая төгрөгөөр хийх гэнэ. Норовлин суманд “Шихихутаг нууц товчоо” цогцолборын тохижилтод нэг тэрбум төгрөг зарцуулна гэнэ. Биндэр суманд “Их хуралдай” цогцолборын барилгын интерьер, дотоод уран сийлбэр шинэчлэл, гадна цахилгаан хангамжид 2.6 тэрбум төгрөг төсөвлөжээ. Бэрх тосгонд 1.4 тэрбум төгрөгөөр иргэдэд үйлчлэх төв барих гэнэ. Мөн Иргэдэд үйлчлэх мэдээллийн төвийг тус аймгийн Баян- Овоо суманд 1.4 тэрбум төгрөгөөр ашиглалтад оруулах аж. Иргэдэд үйлчлэх мэдээллийн төвийг Баян-Адрага суманд мөн л 1.4 тэрбум төгрөгөө барих аж. Бэрх тосгонд далд уурхайн музей барихад 3.7 тэрбум төгрөг төсөвлөсөн байна.
Энэ мэт соёлын ордон, музей, иргэдэд үйлчлэх төв нэртэй төсвийн бүх хөрөнгө оруулалтуудыг зогсоож, хойшлуулж болох урсгал зардлуудыг царцаан, энэхүү хөрөнгийг ковидын дэгдэлтийг намжаахад чиглэсэн яаралтай арга хэмжээнүүдэд зарцуулахаар зориулалтыг нь яаралтай өөрчлөн батлахыг УИХ-аас шаардаж байна.
Хоёрдугаарт: Эмнэлгийн орны хүрэлцээг нэмэгдүүлэхэд онцгой анхаарч, урин дулаан цагийг ашиглан хээрийн эмнэлгийг яаралтай байгуулах, тэнд ажиллагсдын цалин урамшууллыг нэмэгдүүлж, тоног төхөөрөмж, орны тоо, эм хангамжид төсвийн хөрөнгө оруулалтаас хэмнэсэн мөнгийг зарцуулахыг УИХ, ЗГ-аас шаардаж байна. Цаашид эрүүл мэндийн салбарыг төрийн мэдэлд хямд өртөгөөр барьж, тэнд ажиллагсдыг бага цалингаар урам зориггүй, эдийн засгийн ямар ч хөшүүрэггүй ажилладаг байдлыг яаралтай халах, энэ салбарт хийх хувьчлалыг түргэтгэхийн тулд УИХ-аас яаралтай ажпын хэсэг гаргаж, суурь судалгаа, хэлэлцүүлгүүдийг даруй эхлүүлэхийг шаардаж байна.
Гуравдугаарт: Төрийн бүх шатны албан хаагчдын сахилга хариуцлагыг чангатгаж, ялангуяа иргэдэд үйлчилдэг төрийн үйлчилгээний болон төрийн тусгай албаныханд иргэдийн Үндсэн хуулиар олгогдсон эрхийг хүндэтгэх чиглэлээр Үндсэн хууль болон бусад олон улсын актуудыг танилцуулах, харилцааны наад захын соёлыг таниулсан сургалтуудыг яаралтай зохион байгуулах шаардлагатай байна. Одоогийн байдлаар өвдсөн иргэд тусламж эрээд онцгой байдлын газар руу хандахад ХӨСҮТ эсвэл түргэн тусламж руу, тэдгээр нь харьяа дүүргийн эмнэлэг рүү, дүүргийн эмнэлгүүд нь өрхийн эмнэлэг, өрхийн эмнэлэг нь иргэдийг цахим сайтаас мэдээлэл аваад өөрөө өөрсдийгөө эмчил гэж түлхдэг байдал түгээмэл болсон байна. Тийм ч учраас тусламж эрж очсон Монгол иргэн эмнэлгийн гадна өрөвдөлтэйгээр нас барлаа. Ерөөс төрийн албаны дунд доод шатныхан асуудлыг өөрсдөөсөө холдуулсан, хариуцлагаас мултрах гэсэн хандлагаар ажиллаж байна. Энэ байдалд даруй дүгнэлт хийж, тусламж эрсэн иргэдэд төрөөс үзүүлэх ёстой бүхий л үйлчилгээний “замын зураг”-ийг тодорхой, ойлгомжтой гаргаж, хэвлэл мэдээллийн хэрэгслүүдээр дамжуулан иргэдэд таниулах ажлыг нэн яаралтай зохион байгуулахыг шаардаж байна.
Дөрөвдүгээрт: Хоёр жил гаруйн хугацаанд бизнес зогсож, айл өрхүүдийн орлого эрс багасаад буй хүнд нөхцөлд өргөн хэрэглээний барааны үнийн өсөлт хэд дахин нэмэгдэж, энэ нь иргэдийн амьдралд маш хүндээр тусч байна. Тухайлбал, 2019 онд нэгдүгээр гурил 1,000 төгрөг байсан бол 1,400 болж 40 хувиар, үхрийн мах 10,000 байсан бол 16,000 болж 60 хувиар тус тус өсжээ. Гэтэл нөгөө талд иргэдийн хөдөлмөр эрхлэх боломж хумигдаж, ядуурал 50 хувьд хүрээд байна. Энэ байдалд ЗГ онцгой анхаарч, зүүн төвийн үзэлтэй намын хувьд үнэ тогтворжуулах хөтөлбөрийг яаралтай зохион байгуулахыг санал болгож байна.
Тавдугаарт: Улс орон эдийн засгийн гүн хямралд орсон энэ үед иргэдийн амьдралд тулгамдаад буй дээрх асуудлуудыг шийдэхийн тулд УИХ-д амрах эрх байхгүй гэж АН үзэж байна.
Иймд чуулганаа үргэлжпүүлж, эдийн засаг, эрүүл мэндийн чиглэлд авах дээрх арга хэмжээнүүдийг яаралтай хэлэлцэж, хариуцлага алдсан Засгийн газрын сайдуудыг болон ковидын үеийн гадаад зээл тусламжийн нийт 1.3 их наяд төгрөгийн зарцуулалтад хөндлөнгийн аудит оруулж, тайланг нээлттэй сонсголын хуулийн дагуу УИХ-аар авч хэлэлцэхийг шаардаж байна.
Зургаадугаарт: Үндсэн хуулийн нэмэлт өөрчлөлтийн дагуу Ерөнхий сайд Л.Оюун-Эрдэнэд танхимын гишүүддээ хариуцлага тооцох бүрэн эрх бий. Зөвхөн танхимын гишүүд төдийгүй улс орны эдийн засгийн гол зангилаа болсон асуудлуудыг шийддэг томоохон агентлагуудын удирдлагуудад ч хариуцлага тооцох бүрэн эрх бий. Гэтэл Замын-Үүд боомт дээр ажлаа хийж чадахгүй байгаа ГЕГ-ын дарга, МХЕГ-ын дарга нарт Ерөнхий сайд хариуцлага тооцож чадахгүй байгаа нь түүний бүрэн эрхэд эргэлзэх байдал үүсгэж байна. Иймд Ерөнхий сайд Л.Оюун-Эрдэнийг асуудлыг гартаа бүрэн авч, ажлаа хийж чадахгүй байгаа албан тушаалтнуудад хариуцлага тооцон, чадварлаг мэргэжпийн багийг томилон ажиллуулах, эс бөгөөс АН улстөрийн дараагийн шийдвэртэй алхамд шилжин өнөөгийн Загийн газрыг огцруулах Улс төрийн тэмцэлд манлайлан оролцоно гэдгээ мэдэгдэж байна.
Categories
мэдээ нийгэм

ФОТО: Монголын анхны “Мөсөн өргөө”-г ашиглалтад оруулахад бэлэн болжээ

Хан-Уул дүүргийн “Шинэ яармаг” хороололд барьсан “Мөсөн өргөө”-ний барилгын ажил дуусаж, ашиглалтад оруулахад бэлэн болжээ. Австри улсын AST компанийн мэргэжилтэн Вейландс-Гинко Андрей, Жерри Жулиус Мансиккавита нар Монголын инженерүүдтэй хамтран мөсөн дэвжээ тавьсан байна.

Монголын анхны битүү дээвэртэй ордон 3500 хүний суудалтай. “Мөсөн өргөө”-г барьснаар өвлийн спортын бүхий л тамирчид бэлтгэл хийх, тэмцээн зохион байгуулах боломж бүрдэнэ.

Эл ордон олимпийн стандартаар буюу 60х30 хэмжээтэй, 12.7 мянган м.кв талбайтай. 15 сая ам.долларын өртөгтэй.







гадаа гэх мэтийн зураг байж болно

Categories
амьдралын-өнгө мэдээ нийгэм

Өнөөдрийн байдлаар 16 аймгийн 43 сумын чиглэлд зорчигч тээвэрлэлт түр зогссон байна

Хот хоорондын нийтийн зорчигч тээврийн үйлчилгээнд 59 чиглэл явж байгаагаас өнөөдрийн байдлаар 16 аймгийн 43 сумын чиглэлд тээвэрлэлт түр зогссон байна. Энэ нь нийт чиглэлийн 72.8 хувь нь хөдөлгөөний хязгаарлалт хийгээд байна.

Архангай, Булган, Говь-Алтай, Дархан, Дорнод, Дундговь, Дорноговь, Завхан, Ховд, Хөвсгөл, Хэнтий, Төв, Сүхбаатар, Өмнөговь, Өвөрхангай болон Баянхонгорын чиглэл рүү тээвэрлэлт зогсон бол 17 чиглэлд тээвэрлэлт хэвийн явагдаж байна.
Дэлгэрэнгүй мэдээллийг 1900-1234 дугаараас лавлах боломжтой.
Categories
мэдээ нийгэм

“МСҮТ-д сургаж байгаа нэрээр IX анги төгсөж буй хүүхдүүдийн хувь заяаг хаячхаж болохгүй” гэв

Боловсрол, шинжлэх ухааны сайд Л.Энх-Амгалан Мэргэжлийн сургалт үйлдвэрлэлийн төвийн сургалтын талаарх байр сууриа илэрхийллээ.

Тэрбээр “Заавал эзэмших ёстой боловсролыг 12 жил болгох нь Үндэсний Аюулгүй байдалтай холбоотой гэж би үзэж байгаа. Манай улс хоёр том гүрний дунд байдаг. Энэ том гүрнүүд хэдэн хүн амтай билээ. Бид гуравхан сая гаруй хүн амтай. Иймээс иргэдээ хамгийн мэдлэгтэй, чадвартай болгох чиглэл рүү л анхаарах ёстой.

Ажилчин анги бэлдэнэ гэдэг энэ тогтолцооноос салмаар байна. Өнөөдөр есдүгээр анги төгсөөд 8000-10000 хүүхэд МСҮТ-д ороод 2.5 жил сурдаг. ЕБС-ийнхаа үзэх ёстой хичээлийн 40 хувийг үздэг. МСҮТ-ийн хичээлийн хөтөлбөрийг 100 хувь гэж үзвэл үүнийхээ 50 хувийг үздэг. Ингээд ийм нэг хагас дутуу боловсролтой болоод гарч байна.

Тэгээд 2.5 жил сурчхаад хөдөлмөрийн зах зээл дээр очихын тулд зургаан сар хүлээнэ. Яагаад гэвэл 18 нас хүрээгүй. Тийм учраас есдүгээр анги төгссөн 8000-10,000 хүүхдийн хувь заяаг яавал яаг гээд өөрт нь даатгаад хаячхаж болохгүй.

Бид 10-12 дугаар ангид нь МСҮТ, коллеж, их, дээд сургуулиудыг нь дагуулсан төрөлжсөн ахлах сургуулиудыг байгуулж байж чадвартай, мэдлэгтэй залуучуудыг бий болгоно” гэлээ.

Categories
мэдээ нийгэм

25 тэрбум төгрөгийн хохирол учруулсан Э.Оюунчимэгт оноосон ялыг хэвээр үлдээлээ

Нийслэлийн Эрүүгийн хэргийн давж заалдах шатны шүүхийн 2021 оны зургадугаар сарын 30-ны өдрийн шүүх хуралдаанаар шүүгдэгч Э.Оюунчимэгт холбогдох хэргийг хянан хэлэлцлээ.

Нийслэлийн Эрүүгийн хэргийн давж заалдах шатны шүүхийн магадлалаар: “Жи тайм корпорейшн” ХХК нь нийт 12.365 иргэнийг 27.965 хөтөлбөрт элсүүлж нийт 11.398 иргэнд 25.801.307.70 төгрөгийн хор уршиг учруулан залилах гэмт хэрэг үйлдсэн хэрэгт анхан шатны шүүхээс шүүгдэгч Э.Оюунчимэгт Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад зааснаар 5 жилийн хорих ялыг нээлттэй хорих ангид эдлүүлэхээр шийдвэрлэснийг хэвээр үлдээж, нэр бүхий 200 иргэний хариуцагч, хохирогч нарын гомдол болон хэргийг бүхэлд нь хянаж хохиролтой холбоотой шийтгэх тогтоолын зарим заалтыг өөрчилж, бусад заалтуудыг хэвээр үлдээж шийдвэрлэв.
Categories
гадаад мэдээ

“Instagram богино бичлэгээр TikTok-той өрсөлдөнө” гэв

Facebook компанийн Instagram платформыг хариуцсан удирдлага болох Адам Моссери, Инстаграмыг Tik Tok-той адил богино бичлэг хийж хуваалцдаг болгоно гэж мэдээллээ.

Мөн ойрын саруудад Instagram дээр хийж болох маш олон шинэ зүйлүүд нэмэгдэх бөгөөд томоохон өөрчлөлт та бүхнийг хүлээж байна гэсэн юм.

Богино бичлэгийн зах зээлд нэвтэрснээрээ өрсөлдөөн маш хүчтэй болохыг Адам Моссери онцолсон бөгөөд үүнд TikTok болон Youtube хамгийн том өрсөлдөгчид нь байна гэжээ.

2020 онд Instagram 1-15 секундын бичлэг хийх боломж бүхий “Reels”-ийг нэвтрүүлж байсан бөгөөд тухайн үед “Facebook” компанийн хувьцааны ханш 6 хувиар өсөж байжээ.

Categories
мэдээ улс-төр цаг-үе

69 хувийн саналаар Нийтийн мэдээллийн тухай хуулийг хэлэлцэхийг дэмжлээ

УИХ-ын чуулганы нэгдсэн хуралдаан хуралдаж эхэллээ. Үүгээр Засгийн газраас өргөн барьсан Нийтийн мэдээллийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж эхэллээ.

Хууль санаачлагчийн илтгэл болон байнгын хорооны санал, дүгнэлттэй холбогдуулан УИХ-ын гишүүд асуулт асууж болон үг хэлж дууслаа.

Ингээд чуулганы нэгдсэн хуралдаан хуралдаж эхэллээ. Үүгээр Засгийн газраас өргөн барьсан Нийтийн мэдээллийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх нь зүйтэй гэсэн саналын томъёоллоор санал хураалт явууллаа.

Санал хураалтад 63 гишүүн оролцсоноос 44 нь дэмжиж, тус хуулийн төслүүдийг хэлэлцэхийг дэмжлээ.

Ийн УИХ-ын чуулганы хуралдаан дараагийн хэлэлцэх асуудалдаа орлоо.

Categories
мэдээ нийгэм

Минж нутагшуулах, үржүүлэх 145 га газрыг хамгаалалтад авна

Нийслэлийн ИТХ-ын Тэргүүлэгчдийн ээлжит хуралдаанаар “Минж нутагшуулах, үржүүлэх” төвийг нийслэлийн орон нутгийн хамгаалалтад байгууллагын нөөц ангиллаар авах тухай асуудлыг хэлэлцлээ. Нийслэлийн байгаль орчны газраас энэ онд нийт 145 га талбайг дээрх зорилгоор орон нутгийн тусгай хамгаалалтад авах төсөл боловсруулсныг Нийслэлийн Агаар, орчны бохирдлын асуудал хариуцсан төслүүдийн удирдагч З.Төмөртөмөө танилцуулсан юм.

“Минж нутагшуулах, үржүүлэх төслийн нэгж” ОНӨҮГ-ыг Баянзүрх дүүргийн 20 дугаар хороо, Гачууртын төвөөс 7 км орчим газарт Туул голын экосистемийг байгалийн аясаар нэмэгдүүлэх, сайжруулах зорилгоор 2012 онд байгуулсан. Харин 2019 оноос Нийслэлийн байгаль орчны газарт харьяалагдах болсон юм.

Минж нь усны төвшин багассан үед голын эрэгт суваг татах, далан барих зэргээр орчноо намагжуулах, орчны чийгшлийг нэмэгдүүлэхэд гол үүрэгтэй мэрэгч амьтан. 2012 оноос хойш нийт 57 бодгаль минжийг Туул голын эх болон түүний цутгал болох Заан, Тэрэлж голуудад нутагшуулаад байгаа.

Судлаачид Туул голын эхэнд 100-150 бүл минжний популяц үүсгэсэн үед байгалийн болон хүний сөрөг нөлөөлөлд бага өртөх, улмаар тогтвортой өсөж үржих боломж бүрдэнэ гэж зөвлөдөг. Тиймээс уг ажлыг өргөжүүлэхийн тулд Минж үржүүлгийн төв орчмын газрыг нэмэгдүүлэн, 145 га газрыг орон нутгийн хамгаалалтад авахыг танилцуулсан юм. Улмаар үржүүлгийн төв орчимд цүнхээл үүсгэн минж нутагшуулж, тоо толгойг нэмэгдүүлэх, байгальд дасгах нөхцөлийг бүрдүүлэн, усны урсацыг нэмэгдүүлэн нөөцийг арвижуулах, экологийн боловсролын тогтолцоонд арга зүйн туслалцаа үзүүлэх эко тур болгон хөгжүүлэхийг зорьж байна. “Минж нутагшуулах, үржүүлэх” төвийг нийслэлийн орон нутгийн хамгаалалтад байгалийн нөөц ангиллаар авахыг Нийслэлийн ИТХ-ын Тэргүүлэгчдийн олонхын саналаар дэмжлээ.

Орон нутгийн хамгаалалтад авахаар төлөвлөсөн 145 га газарт нийслэл, дүүргийн захирамжаар иргэн аж ахуйн нэгжид өмчлөх, эзэмших эрх зүйн актаар газар олгогдоогүй байна.

Categories
амьдралын-өнгө мэдээ цаг-үе

Өнөөдрийн байдлаар 18 аймгийн 168 сум иргэдийн зорчих хөдөлгөөн, төрийн болон хуулийн этгээдийн үйл ажиллагааг хязгаарлаад байна

Цар тахлын нөхцөл байдлаас шалтгаалан өнөөдрийн байдлаар 18 аймгийн 168 сум иргэдийн зорчих хөдөлгөөн, төрийн болон хуулийн этгээдийн үйл ажиллагаанд хязгаарлалт тогтоогоод байна.
Тодруулбал,

1.Архангай аймгийн 19 сум бүгд,

2. Хөвсгөл аймгийн 24 сум бүгд
3. Булган аймгийн 6 сум буюу Хутаг-Өндөр, Тэшиг, Могод, Баян-Агт, Сайхан, Баяннуур

4. Төв аймгийн 4 сум буюу Лүн, Баян-Өнжүүл, Зуунмод, Батсүмбэр

5. Сүхбаатар аймгийн 5 сум буюу Онгон, Наран, Дарьганга, Баяндэлгэр, Асгат,

6. Баянхонгор аймгийн 20 сум бүгд

7. Хэнтий аймгийн 18 сум бүгд

8. Дорнод аймгийн 5 сум буюу Халхгол, Матад, Булган, Гурванзагал, Хөлөнбуйр

9. Ховд аймгийн 2 сум буюу Б Манхан, Алтай
10. Дундговь аймгийн 10 сум буюу Сайнцагаан, Дэлгэрхангай, Сайхан-Овоо, Цагаандэлгэр, Өлзийт, Дэрэн, Эрдэнэдалай, Хулд, Адаацаг, Говь-Угтаал
11. Дорноговь аймгийн 14 сум бүгд

12. Сэлэнгэ аймгийн 5 сум буюу Баянгол, Түшиг, Мандал, Цагааннуур, Сүхбаатар

13. Увс аймгийн 7 сум буюу Давст, Малчин, Тэс, Зүүнхараа, Ховд, Завхан, Өмнөговь
14. Өмнөговь аймгийн 15 сум бүгд
15.Дархан-Уул аймгийн 2 сум буюу Дархан, Шарын гол

16.Баян-Өлгий аймгийн 1 сум буюу Булган,

17.Завхан аймгийн 9 сум буюу Баянтэс, Тэлмэн, Ургамал, Сантмаргад, Отгон, Цагаанчулуут, Алдархаан, Идэр, Тэс
18.Говьсүмбэр аймгийн 3 сум бүгд иргэдийн зорчих хөдөлгөөн, төрийн болон хуулийн этгээдийн үйл ажиллагаанд хязгаарлалт тогтоогоод байна.

Иймд дээрх аймаг, сумд руу зорчих иргэд тухайн аймаг, сумынхаа Онцгой комиссоос урьдчилан мэдээлэл авч зорчихыг анхааруулж байна