Month: June 2021

Categories
мэдээ

COVID-19-тэй холбоотой хичээл хоцрогдлоос болж Монголын эдийн засагт ирээдүйд ₮2 их наядын хохирол үүснэ

Боловсрол, шинжлэх ухааны сайд Л.Энх-Амгалан танхимаар орох хичээл хуульд заасны дагуу есдүгээр сарын 1-нээс эхэлнэ хэмээн

хэллээ.

Тэрбээр “Танхимын сургалт есдүгээр сарын 1-нд эхэлнэ. Учир нь хичээлийн шинэ жил есдүгээр сарын 1-нээс эхлэх хуультай. Энэ хуулийнхаа дагуу л явах ёстой.

Манай улсын хүн амын 60 гаруй хувь нь вакцинд хамрагдсан байж сүргийн дархлаа тогтоно. Тиймээс 15-17 насны хүүхдүүдийг дархлаажуулж байж есдүгээр сарын 1-нд хичээл эхлэх боломж үүснэ.

Магадгүй хоёр хэсэг хуваагдаж, хэсэг хүүхдүүд маань вакцинд хамрагдахгүй бол ирэх хичээлийн жилд вакцин хийлгэсэн, хийлгээгүй гэсэн хоёр тусдаа ангид хичээллэх болж байна уу. Ийм зүйл байж болохгүй. Уг нь вакцинжуулалт гэдэг бол үндэсний хэмжээний асуудал” гэв.

“COVID-19-тэй холбоотой хичээл хоцрогдлоос болж Монголын эдийн засагт ирээдүйд ₮2 их наядын хохирол үүснэ”

Үргэлжлүүлэн “Биднийг хамгийн ихээр санаа зовоож байгаа асуудал бол хүүхдүүдийн хичээлийн хоцрогдол.

Өнөөдрийн байдлаар Монголын боловсролын салбарт гурван төрлийн хоцрогдол үүссэн.

Үүнд, хамгийн эхэнд, COVID-19 өвчин гарахаар өмнөх боловсролын хоцрогдол. Энэ хоцрогдлын улмаас гурван хүүхэд тутмын нэг л сайн сурч байсан.

Түүнчлэн цар тахлын улмаас гэрэл цахилгаан, интернэтгүйгээс шалтгаалсан болон танхимаар хичээллэж чадаагүйгээс болж хоцорсон хоцрогдол үүссэн байгаа юм.Дээр дурдсан хичээлийн хоцрогдол есдүгээр сарын 1-н гэхэд нөхөгдөхгүй. Өөрөөр хэлбэл, уг хоцрогдлын нөхөхийн тулд гурван жил шаардлагатай.

Дэлхийн улс орнууд хичээлээ нээж, хоцрогдлоо нөхөх концепцыг шинээр гаргаж байна. Үүнтэй адил бид ч яаж боловсролыг нөхөх вэ гэдэг дээр үндэсний хэмжээнд хөрөнгө хүч, цаг хугацаа шаардсан ажил хийх ёстой.

Бид хүүхдүүдийн боловсролын хоцрогдлыг нөхөхгүй бол ирээдүйд хоёр жилийг алдсан бүхэл бүтэн “харанхуй үе” гарч ирэх бодитой эрсдэл нүүрлээд байгаа.

Дэлхийн банкны хийсэн судалгаагаар, зөвхөн COVID-19-тэй холбоотой хичээлийн хоцрогдлоос улмаас Монголын эдийн засагт ирээдүйд 2 их наяд төгрөгийн бодитой хохирол үүснэ гэж дүгнэсэн байна.

Хүүхэд авах ёстой мэдлэгийнхээ 60-70 хувийг заавал танхимаар сууж авдаг гэх судалгаа бий. Гэтэл өнгөрсөн хичээлийн жил дээрх байдал эсрэгээрээ үйлчилсэн.

Бидний гаргасан тооцоогоор, тог цахилгаан, интернэт, гар утасгүй 174 мянган хүүхэд бодитойгоор хичээлийн хоцрогдолд ороод байна. Үүнээс 40 мянган хүүхэд нь Улаанбаатар хотод байгаа юм” хэмээн ярилаа.

Categories
мэдээ нийгэм цаг-үе

УОК-ын дэргэдэх эрдэмтдийн багаас хөл хорио тогтоох санал гаргажээ

ЭМЯ-ны ээлжит мэдээллийн цагт УОК-ын дэргэдэх Эрдэмтдийн багийн гишүүн О.Батбаяр оролцлоо. Тэрбээр “Эрдэмтдийн багийн зөвлөлөөс халдварын тохиолдлыг зургаадугаар сарын 15-наас буурна гэж тооцоолсон ч нэмэгдлээ. Үүнд маш олон зүйл нөлөөлсөн. Иргэдийн хөл хөдөлгөөн маш их нэмэгдсэн. 16.000 гаруй иргэн шагнал авлаа. Энэ 16.000 гаруй иргэн шагналынхаа найр наадмыг хийсэн. Энэ бүх зүйл нөлөөллөө. Мөн Монголд байгаа вирус мутацид орсон байж болзошгүй гээд олон нөхцөл байдал нөлөөлсөн. Иргэд вакциндаа итгэх хэрэгтэй.

УОК-ын Эрдэмтдийн баг бүх заавар, зөвлөмжөө хараат бусаар гаргаж, УОК-т хүргүүлдэг. Өнөөдрийн байдлаар Эрдэмтдийн багаас УОК-т хүргэж байгаа дүгнэлт бол “Вакцинжуулалтын явц, судалгаануудаа хараад хөл хориог тогтоох зайлшгүй шаардлага байгаа”-г хэлж байна. Тохиолдлын тоо 3000-3500 руу хүрэх магадлал өндөр байна. Нэг сарын дотор шинээр өвчлөх хүмүүсийн тоо 100-120 мянгад хүрэх эрсдэлтэй байна.

Хөл хорио тогтоох шаардлага үүссэн. Нэгт, халдварын тоогоо харах ёстой. Өвчлөлэ өндөр байна.

Хоёрдугаарт, орны ачаалал хамгийн өндөр түвшинд хүрчихлээ.

Гуравдугаарт, лабораторийн ачаалал нэмэгдчихлээ.

Дөрөвдүгээрт, нас баралт маш их байна. Зөвхөн долдугаар сард өвдөх тохиолдлын тоо 100-120 мянга давах тооцоолол байна. Үүнийгээ дагаад эрсдэлт бүлгийнхэн маш их эрсдэлд орно. Тиймээс зайлшгүй арга хэмжээ авах шаардлага байна” гэлээ.

Categories
мэдээ нийгэм

Нийт 15.9 сая ам.метр талбайд орчны цэвэрлэгээ, халдваргүйтгэл хийлээ

УОК-ын 01 дүгээр тогтоолын хэрэгжилтийг хангах, коронавируст халдвар /КОВИД-19/-ын цар тахалтай тэмцэх, тархалтыг бууруулах зорилгоор Онцгой байдал, Зооноз, Мэргэжлийн хяналт, Эрүүл мэндийн байгууллагууд, Мал эмнэлгийн газар хамтран улсын хэмжээнд халдваргүйтгэлийн ажлыг зохион байгуулж байна.

Тус ажлын хүрээнд 2021 оны зургадугаар сарын 18-ны өдрийн байдлаар улсын хэмжээнд нийтдээ 15.9 сая метр квадрат талбайд (нийтийн эзэмшлийн 12.389 сая м2 талбай, мал, мах бэлтгэх цэг, байр, оффис, тээврийн хэрэгсэл, түүхий эд, бэлтгэх цэг, агуулах, муу, усны жорлон бусад обьектыг хамруулан) орчны цэвэрлэгээ, халдваргүйтгэлийг зөвшөөрөгдсөн бодисоор хийж гүйцэтгэлээ.

Түүнчлэн ХХААХҮ-ийн сайдын 01 дүгээр албан даалгаврыг хэрэгжүүлэх ажлын хүрээнд улсын хэмжээнд зүй бусаар хорогдсон мал, амьтны сэг зэмийг цуглуулж устгах ажил 71.2 хувийн гүйцэтгэлтэй явагдаж байна гэж УОК-ын Шуурхай штабаас мэдээллээ.

Categories
мэдээ энтертаймент-ертөнц

Хосуудын хийх боломжтой 10 өдрийн “challenge”

Хайртай хүнтэйгээ мартагдашгүй дурсамж бүтээхийг хүсдэггүй хүн үгүй. Тэгвэл хайрттайгаа хамгийн нандин дурсамжийг бүтээлцэхэд тань туслах 15 өдрийн challenge-ийг хүргэж байна.

Өдөр 1: Өглөөний мэнд хүргэх

Хэчнээн богино хэдий ч сэтгэлийн үгс хэн нэгнийг бүхий л өдрийн турш эрч хүч, амжилтаар дүүрэн байхад нь тусалж чаддаг. Тиймээс хайртдаа шинэхэн өдрийг нь эрч хүчтэйгээр эхлүүлэхэд нь дэм болоод мэнд хүргээрэй.

Өдөр 2: Хамтдаа видео тоглоом тоглох

Одоогоос хэдэн жилийн өмнө нийгэмд “видео тоглоом донтуулахаас өөр ид шидгүй” гэсэн сөрөг хандлага түгсэн байв. Гэхдээ биеийн тамирын дасгал хөдөлгөөн хүний бие махбодыг бялдаржуулдаг шиг танин мэдэхүйн дасгал нь тархины үйл ажиллагааг сайжруулдаг аж. Видео тоглоомыг өмнө нь зөвхөн найз нөхөдтэйгөө тоглодог байсан бол одоо хостойгоо тоглоод үзээрэй. Та хоёрын харилцаанд цоо шинэ уур амьсгал бий болно гэдэгт итгэлтэй байна. Өдөр

3: Анх танилцсан мөчөө дурсах

Та хоёроос анх хаана, хэзээ, яаж танилцсан тухайг чинь асуувал нэгэн зэрэг ижил хариулт өгч чадах болов уу? Анхны дурсамж гэдэг хүний амьдралын хамгийн нандин мөчүүдийн нэг байдаг. Тиймээс анх уулзаж байсан тэр мөч рүүгээ хамтдаа аялаарай. Ядаж л ирээдүйд нэг нэвтрүүлэг, тэмцээнд оролцох үед хэлэх түүхээ нэгтгэчихсэн сууж байвал амар биз дээ. Өдөр

4: Бие биенээ сонсох

Сонсох нь харилцааны гол чадварт тооцогддог. Өмнө нь түүнийгээ хэлж буй үгсийг тоолгүй өнгөрөөдөг байсан бол энэ удаад чих тавин сонсоорой. Үг гэдэг зүйл хайр халамж, харуусал зэмлэл, уучлал зэрэг бүхнийг илтгэдэг шүү дээ.

Өдөр 5: Чамайг хайрлах шалтгаан

Бүх зүйл утга учир, түүнийг тойрсон олон шалтгаантай байдаг. Тиймээс бие биендээ зориулан “Чамайг хайрлах шалтгаан” сэдэвтэй бичвэр бичээрэй. Магадгүй хайрт чинь өөрийгөө хайрлах шалтгаанаа хараахан олоогүй байгаа бол чи түүнд тус болж болох юм.

Өдөр 6: Уран зөгнөлөө хуваалцах

Хүн бүр дотроо ямар нэгэн зүйлийг ургуулан бодож “хэрвээ” гэсэн таамаглалыг дэвшүүлж суудаг шүү дээ. Тэгвэл үүнийгээ хайртай хүнтэйгээ хуваалцаж яагаад болохгүй гэж? Хэний ч төсөөлшгүй сонирхолтой зөгнөлүүд байхыг таашгүй шүү дээ.

Өдөр 7: Хамтдаа кино үзэх

Цаг сайхан байх үеийнх шиг хайрттайгаа ундаа, попкорноо худалдаж аваад кинотеатрын харанхуй орчинд зөөлөн сандал дээр тухлан суугаад кино үзэх боломжгүй байгаа хэдий ч интернэтээр хүссэн киногоо хамтдаа үзэх бүрэн боломжтой.

Өдөр 8: Асуултын өдөр

Хамтдаа ярилцаад нэг өдрийг асуултын өдөр болгон товлоорой. Энэ өдөр та хоёр өөр өөрийнхөө тухай арван асуултыг бие биенээсээ асуух юм. Жишээ нь, чи өөрийнхөө тухай арван асуултыг бэлдэж хайртаасаа асууна гэсэн үг. Асуулт сонгохдоо амархнаас хүндрэх дараалалтай байвал сонирхолтой байх болно.

Өдөр 9: Ирээдүйгээ төлөвлөх

Хамтдаа 5, 10, 15 жилийн дараах ирээдүйгээ төлөвлөж, түүндээ хүрэх алхмуудыг жагсаан бичээрэй. Ингэснээр та хоёр зорилгоо биелүүлэхийн төлөө өдөр бүр хичээнэ шүү дээ.

Өдөр 10: Хайрын хэлээ тодорхойлох

Хүн болгонд хайрын хэл бий. Энэ нь зөвхөн хосуудыг хамраад ч зогсохгүй харилцаж буй хүнийхээ арга эвийг олоход хүртэл тусалдаг.

Categories
мэдээ нийгэм

“Нэг ч хүүхдийг ЭЕШ-аас хоцроохгүй. Халдвартай, сэжигтэй, эрүүл хүүхдүүдийг тусад нь оруулахаар 3 төрлийн анги бэлдсэн” гэв

Элсэлтийн ерөнхий шалгалттай холбоотой асуудлаар Боловсрол, шинжлэх ухааны сайд Л.Энх-Амгалан мэдээлэл хүргэлээ.

“ЭЕШ өгөхөөр бүртгүүлсэн нэг ч хүүхдийг шалгалтаас гадуур үлдээхгүйг хариуцлагатайгаар мэдэгдье”

Тэрбээр “Боловсролын үнэлгээний төвийн зарим албан тушаалтан хариуцлагагүй, ойлгомжгүй мэдэгдэл хийснээс болж иргэдийн дунд бухимдал үүсээд байна.

Тодруулбал, тавдугаар сарын 20-ноос өмнө Элсэлтийн ерөнхий шалгалтын бүртгэл дуусаж, 40,420 хүүхэд шалгалтад орохоор бүртгүүлсэн бөгөөд хэн, аль сургууль дээр очиж шалгалтаа өгөх нь тодорхой болчихсон.

Дээрх хүүхдүүдээс 2,000 орчим нь коронавируст халдварын сэжигтэй тохиолдол болсон бөгөөд 1,500 нь эмнэлэгт хэвтэн эмчлүүлж байгаа юм.

Би Боловсрол, шинжлэх ухааны сайдын хувиар хэлэхэд, энэ жил Элсэлтийн ерөнхий шалгалтад орохоор бүртгүүлсэн бүх хүүхдэд боломж олгоно. ЭЕШ өгөхөөр бүртгүүлсэн нэг ч хүүхдийг бид шалгалтаас гадуур үлдээхгүйг хариуцлагатайгаар мэдэгдье.

Харин халдвар авсан тухайн хүүхдүүдийг энэ жил шалгалтад орж чадахгүй тул ирэх жил хүртэл хүлээхээс өөр аргагүй гэсэн ойлгомжгүй мэдэгдэл хийсэн БҮТ-ийн тэр албан тушаалтанд хариуцлага тооцно” хэмээн хэллээ.

“Халдвар авсан хүүхдүүдээс байгаа газар нь ЭЕШ авах боломжийг туршиж байна”

Үргэлжлүүлэн “Бид улсын хэмжээнд ЭЕШ авах 48 төвийг бэлдсэн. Нэг ангид 15-аас дээшгүй хүүхдийг оруулах бөгөөд тухайн төвүүдэд гурван төрлийн анги бэлдсэн.

Тодруулбал,

  1. Халдваргүй хүүхдүүд шалгалт өгөх боломжтой анги,
  2. Тухайн өдөр өндөр халуунтай буюу халдварын сэжигтэй хүүхдүүдийн шалгалт өгөх анги,
  3. Хамгийн сүүлд коронавирусийн халдвараар өвчилсөн байгаа хүүхдүүдийг шалгалтын төвүүд дээр авчраад шалгалт өгүүлэхээр танхим бэлдсэн байгаа.

Түүнээс гадна, сэжигтэй эсвэл халдварын улмаас гэртээ эсвэл эмнэлэгт эмчлүүлж байгаа хүүхдүүдэд Ipad хүргэж өгөөд хяналтын камерын тусламжтайгаар байгаа газар нь ЭЕШ авах боломжийг туршиж байна.

Хэрвээ энэ туршилт амжилттай болбол бид ирэх долоо хоногт үүнийг нэвтрүүлнэ гэж тооцоолж байгаа.

ЭЕШ улс орон даяар нэг өдөр болдог тул нэг ч хүүхэд түүнээс хоцрох ёсгүй. Тиймээс хүүхдүүдийн дунд халдвар илүү өсөж, УОК-оос хөл хорио тогтоох эрсдэл үүсвэл хүссэн хүсээгүй ЭЕШ-ыг хойшлуулахаас өөр аргагүй” гэдгийг нэмж хэллээ.

Categories
мэдээ нийгэм эдийн-засаг

2020 оны улсын төсвийн тайлангаас 3.6 их наяд төгрөгийн зөрчил илэрчээ

Төрийн аудитын байгууллага Монгол Улсын 2020 оны нэгдсэн төсвийн гүйцэтгэл, Засгийн газрын 2020 оны санхүүгийн нэгтгэсэн тайланд аудитын дүгнэлт хийжээ.

Төсвийн тухай хуулийн 8.10.2-т заасан хугацаанд буюу энэ сарын 10-ны өдөр УИХ-д хүргүүлсэн байна.

Монгол Улсын 2020 оны нэгдсэн төсвийн гүйцэтгэлийн тэнцвэржүүлсэн нийт орлого ба тусламжийн дүн 9.463.8 тэрбум, нийт зарлага ба цэвэр зээлийн дүн 13.904.3 тэрбум төгрөгийн гүйцэтгэлтэй болохыг аудитаар баталгаажуулжээ. Дүгнэлтэд үндэслэн Улсын Их Хуралд хоёр асуудал толилуулж, Ерөнхий сайдад тав, Сангийн сайдад гурван зөвлөмж өгсөн байна.

Засгийн газрын 2020 оны санхүүгийн нэгтгэсэн тайланд төсвийн 56 ерөнхийлөн захирагчийн санхүүгийн нэгтгэсэн тайлан, тэдгээрийн харьяа нийт 6890 санхүүгийн тайланг нэгтгэсэн. Аудитаар нийт 3.607.7 тэрбум төгрөгийн 5.318 алдаа зөрчил илэрсэн байна.

Аудитын явцад 2.283.5 тэрбум төгрөгийн 1.095 алдааг залруулж, 17.7 тэрбум төгрөгийн 440 алдаа, зөрчилд төлбөрийн акт тогтоож, алдаа зөрчлийг арилгах давтан гаргахгүй байх 924.1 тэрбум төгрөгийн 1.260 зөрчилд албан шаардлага хүргүүлж, 382.4 тэрбум төгрөгийн зөрчлийг арилгах давтан гаргахгүй байх 2.523 зөвлөмжийг хүргүүлээд байна.

Засгийн газрын 2020 оны санхүүгийн нэгтгэсэн тайланд хийсэн аудитын дүгнэлтийг үндэслэн Улсын Их Хуралд 3 асуудал толилуулж, Монгол Улсын Ерөнхий сайдад тав, Сангийн сайдад гурван зөвлөмж өглөө гэж Үндэсний Аудитын газраас мэдээлэв.

Categories
мэдээ нийгэм цаг-үе

Сургууль, цэцэрлэгийн үйл ажиллагаа есдүгээр сарын 1-нд эхэлнэ

БШУ-ны сайд Л.Энх-Амгалан хичээл наймдугаар сарын 15-нд эхлэхгүйг мэдэгдлээ.

Тэрбээр АСА станцын ярилцлагад орох үеэрээ “ЭЕШ өгөхөөр бүртгүүлсэн 40.420 хүүхдийн нэгийг нь ч шалгалтаас гадуур үлдээхгүй. Улсын хэмжээнд 48 шалгалт авах төв бэлдсэн. Эдгээр төвүүдэд халдваргүй хүүхдийг оруулах, халдвартай байж болзошгүй шинж тэмдэг илэрсэн хүүхдүүдийг тусгай өрөөнд шалгалт авах, эмнэлэгт байгаа хүүхдүүдэд зориулсан хэсэг гэж 3 хуваан шалгалт авна. Коронавирус туссан, тусгаарлалтад байгаа хүүхдүүдээс ЭЕШ авна. Нийт шалгуулагчдаас 4000-6000 нь халдвар авбал ЭЕШ-ыг хойшлуулна.

Хичээлийн шинэ жил наймдугаар сарын 15-нд бус есдүгээр сарын 1-нд эхэлнэ” гэсэн юм.

Categories
гадаад мэдээ

“Монголын тал зөвшөөрвөл “Turkish Airlines” нислэг үйлдэхэд бэлэн” гэв

“Turkish Airlines” компани Монгол Улс руу хийх байсан бүх нислэгээ цуцалсан гэх мэдээлэл энэ сарын 17-нд гарсан. Тэгвэл энэ мэдээлэлтэй холбогдуулан Туркийн элчин сайдын яамнаас мэдэгдэл гаргажээ. Тус мэдэгдэлд дурдсанаар “Turkish Airlines” компани долдугаар сар дуустал нислэгээ цуцалсан гэдэг нь ор үндэслэлгүй. Энэ асуудлаар “Turkish Airlines” компани нь Монголын холбогдох байгууллагуудтай зохих уулзалтуудыг хийж байгаа. Хэрэв Монголын эрх бүхий байгууллагуудын зөвшөөрсөн хэмжээний дээд хязгаараар нислэгээ үйлдэхэд бэлэн байгаа болно” хэмээжээ.

Categories
мэдээ нийгэм

Өчигдөр зам тээврийн ослын шинжтэй 198 дуудлага бүртгэгдэж, нэг хүн амиа алджээ

Тээврийн цагдаагийн албаны Жижүүрийн шуурхай удирдлагын хэлтэст өчигдөр зам тээврийн ослын шинжтэй 198 дуудлага бүртгэгдэж, ослын улмаас хоёр хүн гэмтэж, нэг хүн амиа алджээ.

Ноцтой ослыг хэлбэрээр нь авч үзвэл:

  • Явган зорчигч автомашинд мөргүүлэх хэлбэрээр-1
  • Гэрлийн шон мөргөх хэлбэрээр-1
  • Онхолдох хэлбэрээр-1 бүртгэгдсэн байна.

Мөн хугацаанд улсын хэмжээнд согтууруулах ундааны зүйл хэрэглэсэн үедээ тээврийн хэрэгсэл жолоодсон 91 зөрчлийг хяналт шалгалтаар илрүүлжээ.

Жолооч нарыг согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх, эцэг эх, асран хамгаалагч нар бага насны хүүхдийг хараа хяналттай гараас хөтөлж хөдөлгөөнд оролцох, явган зорчигчид зам тавьж өгөх, явган зорчигчид гарц, гарамтай хэсгээр зам гарах, хүүхдийг харгалзах хүнгүй замын хөдөлгөөнд оролцуулахгүй байх, мотоциклтой замын хөдөлгөөнд оролцохдоо хамгаалах малгай хэрэглэх, хурд хэтрүүлэх байхыг Тээврийн цагдаагийн албанаас анхаарууллаа.

Categories
гадаад мэдээ

Гутеррешийг НҮБ-ын Ерөнхий нарийн бичгийн даргаар хоёр дахь удаагаа томилов

НҮБ-ын Ерөнхий Ассамблей баасан гарагт болсон хуралдаанаараа Антонио Гутеррешийг тус байгууллагын Ерөнхий нарийн бичгийн даргаар хоёр дахь удаагаа томилов.

Холбогдох шийдвэрийг Ерөнхий Ассамблейн 75 дугаар чуулганы дарга Волкан Бозкыр хуралдаан дээр зарласан байна.

Томилгоог зарласны дараа Бозкыр шийдвэрийг хүлээж байсан Гутеррешийг танхимд урьж, тэрбээр тангаргаа өргөсөн байна. Гутерреш Ерөнхий Ассемблейд хэлсэн үгэндээ ирэх таван жилд НҮБ хүнд суртлыг багасгаж, мэдээлэл цуглуулах, дүн шинжилгээ хийх, солилцоог сайжруулах замаар өөрчлөлтийг түргэтгэх шаардлагатай байгааг мэдэгдээд, ажлын шинэ арга барилаа үргэлжлүүлэн сайжруулахыг уриалжээ.

Гутерреш НҮБ-ын Ерөнхий нарийн бичгийн даргын албан тушаалд нэр дэвшсэн цорын ганц нэр дэвшигч байсан юм. Өмнө нь түүнийг НҮБ-ын Аюулгүйн Зөвлөл дэмжсэн байна. НҮБ-ын Ерөнхий Ассамблей Аюулгүйн Зөвлөлийн зөвлөмжтэй ганц удаа буюу 1950 онд санал зөрж байжээ.