Month: June 2021

Categories
мэдээ нийгэм цаг-үе

Өнөөдрөөс эхлэн зарим байгууллагууд үйл ажиллагаагаа хэвийн үргэлжлүүлж, заалаар үйлчилж эхэлнэ гэдгээ УОК-т мэдэгдлээ

УОК-ын ээлжит хуралдаан өчигдөр болж хуралдаанаар хоолны болон амралтын газарт тогтоосон хязгаарлалтыг 10 хоногоор сунгаж, зарим газрын үйл ажиллагааг мөн хязгаарлах шийдвэрийг гаргасан билээ. Тус шийдвэрийг эсэргүүцэж зарим байгууллагууд өнөөдрөөс эхлэн үйл ажиллагаагаа хэвийн үргэлжлүүлж заалаар үйлчилж эхэлнэ гэдгээ УОК-т мэдэгдээд байна.

Үүнд:

“Төр засгийнхаа ковидтой тэмцэх бодлогыг хүндэтгэн өнөөдрийг хүртэл хорио цээр, эрүүл ахуй халдвар хамгааллын дэглэмийг чандлан баримталлаа.

Заалны үйлчилгээ явуулахгүй бол манайх орлогогүйтэй адил байдаг. Тиймээс заалаар үйлчлэхгүй гэсэн хязгаарлалтын үед үйл ажиллагаагаа зогсоож нилээд олон сар ажилласангүй.
Ажилчид маань ардаа амьдралтай, үр хүүхэдтэй монгол улсын иргэд. Тодорхой үр дүнгүй удаан хугацааны хорионы улмаас тэд маань амьдралаа авч явахад улам хэцүү болж байна.
Сүүлийн үед халдварын тоо ихэссэн нь хоолны газраас боллоо гэж үзэн хязгаарлалт тогтоож байгаа нь оновчгүй байна. Сонгууль хийн, одон гардуулж найр наадам хийлгэн, олон хүний бөөгнөрөл үүсгэн халдвар ихэсгэсэн нь төр засаг. Гэтэл төр засаг яагаад хариуцлага хүлээхгүй байгаа юм бэ?
Халдварын тархалтыг зогсоохын тулд төр засаг манлайлан хүний бөөгнөрөл үүсгэх ажлуудаа зогсоох ёстой биш үү.
Тиймээс төр засгийн хариуцлагагүй үйлдлийн хариуцлагыг бид үүрмээргүй байна. Үр дүнгүй хорио, хязгаарлалтууд бидний аж амьдрал, эдийн засгийг сэргээхгүй гэж үзэж байна. Тиймээс өнөөдрөөс үйл ажиллагаагаа хэвийн үргэлжлүүлж заалаар үйлчилж эхэлнэ гэдгээ УОК-т үүгээр мэдэгдэж байна.
Халдвар хамгааллын дэглэмээ чандлан мөрдөж ажиллах болно.
Үйлчлүүлэгчдийнхээ ухамсарт ч бүрэн итгэж байна.
Хамтдаа, ухамсартайгаар халдвар хамгааллын дэглэмээ барьж, ковидтой тэмцэж, эдийн засгаа сэргээцгээе.
УОК, Мэргэжлийн хяналтын болон хууль хүчний байгууллагууд ТОРГОХ• ХҮЧЭЭР ҮЙЛ АЖИЛЛАГАА ЗОГСООХ арга хэмжээнүүдээ төр засагт ч адилхан хэрэгжүүлнэ үү.
Мөн үйлчилгээний чиглэлээр нь хавтгайруулалгүй, байгууллага нэгж бүрт халдвар хамгааллын дэглэмээ баримталж байгаа эсэх дээр хяналт тавьж, зөрчлийг арилгуулж, хязгаарлалт тавьж хариуцлага тооцож ажиллана уу” гэлээ.

Categories
мэдээ нийгэм

​КОВИД-ийн хуулийн өөрчлөлтөөр “Хилийн боомтын онцгой бүрэн эрхт захиргаа”-г байгуулна

Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг УИХ-ийн чуулганаар хэлэлцэж байна.

Засгийн газраас өргөн мэдүүлсэн хуулийн төсөл дэх онцлох заалтуудыг танилцуулж байна.

7.4. Ашигт малтмал, газрын тосны экспорт, худалдааны эргэлтийг нэмэгдүүлэх зорилгоор хилийн боомтын хяналт, хил орчмын тээврийн зохицуулалт, эрүүл ахуй, аюулгүй байдал болон орон нутгийн засаг захиргааны байгууллагуудын ажлын уялдаа холбоог нэгдсэн удирдлага, зохицуулалтаар хангах чиг үүрэг бүхий Хилийн боомтын онцгой бүрэн эрхт захиргаа (цаашид “Захиргаа” гэх)-г байгуулна.

7.5.Захиргааны бүтэц, зохион байгуулалт, орон тооны дээд хязгаар, үйл ажиллагааны дүрмийг Засгийн газар баталж, Хилийн боомтын үндэсний зөвлөлийн санал болгосноор даргыг нь томилж, чөлөөлнө.

7.6. Захиргаа нь энэ хууль болон дүрэмд заасан зорилго, чиг үүргээ хэрэгжүүлэх ажлын хүрээнд дараах эрхтэй байна:

  • 7.6.1.хилийн боомтын хяналт, хил орчмын тээврийн зохицуулалт, эрүүл ахуй, аюулгүй байдал болон орон нутгийн засаг захиргааны байгууллагуудад үүрэг, даалгавар өгч биелэлтийг хангуулах;
  • 7.6.2.хил орчмын тээвэрлэгч, гадаад худалдаа эрхлэгчдэд үзүүлэх төрийн үйлчилгээ, хяналт шалгалтыг шуурхай, боловсронгуй болгох саналыг эрх бүхий этгээдэд гаргах, бүрэн эрхийн хүрээнд шийдвэр гаргах, зохион байгуулалтын болон санхүүжилтийн асуудлыг зохих журмын дагуу шийдвэрлүүлэх, хэрэгжилтийг зохион байгуулах;
  • 7.6.3.хилийн боомтын үндэсний зөвлөлөөс өгсөн чиглэл, удирдамжийн хүрээнд өөрийн чиг үүрэгт хамаарах асуудлаар гадаад улсын эрх бүхий байгууллагатай хуульд нийцүүлэн харилцаа тогтоож хамтран ажиллах;
  • 7.6.4.иргэн, хуулийн этгээдээс шаардлагатай мэдээ мэдээллийг гаргуулан авах;
  • 7.6.5.чиг үүргээ хэрэгжүүлэх явцад зөрчил гаргасан холбогдох албан тушаалтанд сахилгын шийтгэл ногдуулах саналыг эрх бүхий этгээдэд хүргүүлж шийдвэрлүүлэх;
  • 7.6.6.байгууллага, обьектэд саадгүй нэвтрэх, албан тушаалтан, иргэдэд шаардлага тавих;
  • 7.6.7.дүрэмд заасан бусад”

7.1.37.Коронавируст халдвар /КОВИД-19/-ыг илрүүлэх, оношлох, эмчлэх, тусламж үйлчилгээ үзүүлэх зорилгоор Эрүүл мэндийн даатгалын санд төвлөрсөн мөнгөн хөрөнгийг захиран зарцуулах, үүнтэй холбоотой журам батлах.

18.1.Энэ хууль 2021 оны 12 дугаар сарын 31-ний өдрийг хүртэл үйлчилнэ.

Categories
мэдээ нийгэм цаг-үе

Ковидын халдвар авсан ээжүүдэд “Амин дэмийн багц” бэлтгэн хүргүүлжээ

Ковидын халдвар жирэмсэн эхчүүд болон хүүхдүүдэд хүнд тусч байгаа тул ковидын халдвараар өвдсөн 1600 гаруй ээжүүдэд Нийслэлийн Засаг даргын нөөц хөрөнгөөс дархлаа дэмжих “Амин дэмийн багц”-ыг бэлтгэн хүргүүлжээ.

Өнөөдрийн байдлаар нийслэлийн хэмжээнд нийт 21,959 эх жирэмсний хяналтад байна. Нийт 1613 жирэмсэн эх ковидын халдвараар өвчилснөөс 648 нь эмнэлэгт хэвтэн эмчлүүлж, 203 нь гэрийн эмчилгээнд, 762 жирэмсэн эх эмчлэгдэж эдгэрсэн байна.

Улаанбаатар хотын удирдлагын баг, нийт албан хаагчид, Нийслэлийн онцгой комиссын бие бүрэлдэхүүн, эмч эмнэлгийн ажилтнууд жирэмсэн эхчүүд болон хэвлийд нь өсөн бойжиж буй үр хүүхдийн эрүүл мэнд, сайн сайхны төлөө цаг ямагт хичээнгүйлэн ажиллаж байна гэжээ.

Categories
мэдээ улс-төр

​УИХ-ын гишүүд Залуучуудын хөгжлийг дэмжих лобби бүлэг байгууллаа

Улсын Их Хурлын гишүүн Н.Учрал, Э.Бат-Амгалан, Х.Булгантуяа, Х.Ганхуяг, Г.Дамдинням, Г.Тэмүүлэн, Ч.Ундрам нар Залуучуудын хөгжлийг дэмжих лобби бүлэг байгуулжээ. Энэ талаарх албан бичгээ 2021 оны зургадугаар сарын 22-ны өдөр Улсын Их Хурлын дарга Г.Занданшатарт хүргүүлжээ.

Улс орнууд нийгмийн хөгжлийг шинжлэх ухаан, технологийн ололт амжилт, эдийн засгийн өсөлтөөр хэмжихээс гадна тухайн улс орны хүний хөгжил, чадамжаар тодорхойлдог хандлага давамгайлж, тэр тусмаа залуучуудыг хүн амын бүлгийн хувьд нийгэм-эдийн засгийн томоохон хөрөнгө оруулагч, хөгжлийг түүчээлэгч гэж үзэж байна.

Манай улсын хүн ам 2020 онд 3.3 саяд хүрч, үүнээс 1 сая гаруй нь 15-34 насны залуучууд байна.

Залуучуудын бүлэг нийт хүн амын 33.7 хувийг, хөдөлмөрийн насны хүн амын 46.5 хувийг бүрдүүлж, хөдөлмөрийн насны хүн амын нийгэм, эдийн засагт үзүүлэх хамгийн таатай үе тохиож байгаа бөгөөд энэ нь 2030-аад он хүртэл үргэлжилж, үүнээс цааших хугацаанд хүн ам идэршиж, улмаар насжилтын үе эхэлнэ.

Хүн ам зүйн энэ зурвас үед залуучуудаа боловсрол, мэдлэгтэй, мэргэжилтэй, эрүүл саруул оюун ухаан, эрүүл чийрэг бие бялдартай, эх оронч, хариуцлагатай иргэн болгон төлөвшүүлж, ажил орлоготой болгох талаар Улсын Их Хурлаас тогтвортой, тодорхой зорилго чиглэл бүхий арга хэмжээг хэрэгжүүлэх, цаашид залуучуудын хөгжлийн бодлогыг зөв тодорхойлж төрийн дэмжлэг, оролцоог оновчтой болгох шаардлагатай хэмээн гишүүд үзжээ.

Иймд Улсын Их Хурал дахь залуучуудын хөгжлийг дэмжих лобби бүлгийг байгуулжээ хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ улс-төр

С.Амарсайхан: КОВИД-19-ийн цар тахлаас урьдчилан сэргийлэх хуулийн үйлчлэх хугацааг сунгах, нэмэлт өөрчлөлт оруулах шаардлагатай байна

Шадар сайд С.Амарсайхан УИХ-ын чуулганд КОВИД-19-ийн цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг танилцууллаа.

Тэрээр “КОВИД-19-ийн цар тахлаас урьдчилан сэргийлэх хуулийг анх 2020 оны 4-р сарын 29-нд яаралтай горимоор хэлэлцэн баталж байсан. Монгол Улсад одоогоор 101263 хүн халдвар авсан нь батлагдаж 479 иргэн нас бараад байна. Бүх нийтийн бэлэн байдалд таван удаа шилжиж, хоёр удаа сунгасан. Бид бүхий л бололцоогоо дайчлан цар тахалтай тэмцэж буй энэ үед нөхцөл байдал, эдийн засгийн байдал хангалтгүй байна. Тиймээс хуулийн үйлчлэлийг сунгах, нэмэлт өөрчлөлт оруулах зайлшгүй шаардлагатай байна. Халдварын тохиолдол ихсэхийн хэрээр оношлуур, эм, эмнэлгийн хэрэглэгдэхүүний нөөц дуусаж байна.

КОВИД-19-ийн цар тахлаас урьдчилан сэргийлэх, нийгэм, эдийн засагт үзүүлэх сөрөг нөлөөллийг бууруулахаар 40 тэрбум төгрөг төсөвлөсөн ч зарцуулах дүн 52 тэрбум төгрөгт хүрээд байгаа нь санхүүгийн хүндрэл үүсэхээр байх тул хоёрдугаар заалтыг шинэчлэн оруулж байна. Мөн ЭМД-ын сангаас 1,2 их наяд төгрөг зарцуулахаар төлөвлөгдсөн ч 34,2 хувийн гүйцэтгэлтэй байгаа нь хангалтгүй байна. Тиймээс хуулийн үйлчлэх хугацааг сунгах, нэмэлт өөрчлөлт оруулах шаардлагатай байна” гэлээ.

Categories
мэдээ нийгэм цаг-үе

ЭМЯ: 2366 хүнээс халдвар илэрч, 13 хүн нас барлаа

Коронавируст халдварын нөхцөл байдлын талаар Эрүүл мэндийн яам ээлжит мэдээллээ хүргэж байна.

“Сүүлийн 24 цагт 2366 хүнээс халдвар илэрлээ. Эдгээрийн 1482 нь Улаанбаатар хотод, 879 орон нутагт, 5 эмнэлгээс шалтгаалах халдвар тохиолдол бүртгэгдсэн байна.

Ингэснээр улсын хэмжээнд нийт батлагдсан тохиолдол 102629 боллоо.

Мөн 13 иргэн ковидын нэн хүнд хэлбэрээр нас барлаа. Нийт нас баралтын тоо 482 боллоо.

Сүүлийн 24 цагт 1059 хүн эдгэрч эмнэлгээс гарлаа. Нийт эдгэрсэн хүний тоо 66602 боллоо.

Хэвтэн эмчлүүлж буй хүмүүс:

хөнгөн- 8352 хүн

хүндэвтэр- 3097 хүн

хүнд- 1221 хүн

маш хүнд- 228 хүн байна. Нийт 12898 хүн хэвтэн эмчлүүлж байна.

Categories
мэдээ нийгэм

Цагдаагийн байгууллагад Фургон, Соната-8 маркийн автомашин хүлээлгэн өглөө

Нийслэлийн Гэмт хэргээс урьдчилан сэргийлэх ажлыг зохицуулах салбар зөвлөлөөс нийслэлийн Цагдаагийн Удирдах газар, Экологийн цагдаагийн албанд иж бүрэн тоноглосон, туулах чадвар сайтай автомашин болон шаардлагатай техник хэрэгслийг хүлээлгэн өглөө.

Тодруулбал, НГХУСАЗСЗ-өөс цагдаагийн байгууллагын үйлчилгээг иргэдэд шуурхай хүргэх зорилгоор бүрэн тоноглосон 2 ширхэг УАЗ Фургон автомашин, Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн алба хаагч нарын ажлын хэрэгцээнд, “Хүүхдийн нэгдсэн бүртгэл” мэдээллийн системд шаардлагатай 59 ширхэг компьютер, техник хэрэгслийг хүлээлгэн өгсөн юм.

Одоогийн байдлаар НЦУГ-ын технологийн парк шинэчлэл 90 хувьтай явж байгаа бөгөөд үүний 40 орчим хувийг НГХУСАЗСЗ-өөс шийдвэрлэжээ.

Мөн Экологийн Цагдаагийн алба хаагчдын ажиллах нөхцөлийг сайжруулах, хүрээлэн буй орчны гэмт хэргээс урьдчилан сэргийлэх, байгаль экологид учрах хохирлыг бууруулах зорилгоор туулах чадвар сайтай Соната-8 маркийн автомашин, шаардлагатай техник хэрэгслийг хүлээлгэн өгсөн юм.

Шүүхийн шинжилгээний газарт гэмт хэрэг илрүүлэх, эрэн сурвалжлах, цогцос таниулах папилон-7 төхөөрөмж өгнө

Нийслэлийн ИТХ-ын дарга, НГХУСАЗСЗ-ийн дарга Ж.Батбаясгалан “НГХУСАЗСЗ-өөс гэмт хэрэг, зөрчлөөс урьдчилан сэргийлэх, төрийн үйлчилгээг иргэдэд чанартай, хүртээмжтэй хүргэх зорилгоор цагдаагийн байгууллагууд болон НОБГ, НМХГ-т явуулын ажлын байр, ариутгалын хаалга, бүрэн тоноглосон автомашин, нийслэлийн Шүүхийн шинжилгээний газарт гэмт хэрэг илрүүлэх, эрэн сурвалжлах, цогцос таниулах папилон-7 төхөөрөмжийг шийдвэрлэж өгөхөөр ажиллаж байна.

Түүнчлэн гэмт хэрэг, зөрчлөөс урьдчилан сэргийлэх нь зөвхөн цагдаагийн алба хаагчдын хийх ажил биш юм. Үүнд иргэд, олон нийтийн оролцоо чухал” гэдгийг онцоллоо.

Арга хэмжээний төгсгөлд ХЗДХ-ийн сайд, Гэмт хэргээс урьдчилан сэргийлэх ажлыг зохицуулах зөвлөлийн дарга Х.Нямбаатар “Цагдаагийн байгууллагын парк шинэчлэлийг салбар яам дангаараа бүрэн шийдэх эдийн засгийн боломжгүй. НХГУСАЗЗ-өөс сүүлийн жилүүдэд цагдаагийн байгууллагуудын техник хэрэгсэл, автомашины асуудлыг шийдэж өгч байна. Энэ нь гэмт хэрэг, зөрчлөөс урьдчилан сэргийлэх ажилд оруулж буй бодит дэмжлэг, нийслэлийн ИТХ, НГХУСАЗЗ-д талархал илэрхийлье” гэв.


Categories
мэдээ нийгэм

Товчоогоор нэвтрэх, байгууллагаар үйлчлүүлэхдээ иргэний үнэмлэхний QR кодыг уншуулна

“E-Mongolia” төслийн хүрээнд коронавируст халдвараас сэргийлэх дархлаажуулалтын бүрэн тунд хамрагдсан иргэдийн мэдээллийг таних “COVID-19 QR Verify” аппликейшныг нэвтрүүлээд байна. Тус аппликейшны талаар УОК-ын шуурхай штабын “Мэдээлэл технологийн баг”-ийн гишүүн Т.Уламбаатартай ярилцлаа.

– “COVID-19 QR Verify” аппликейшны ач холбогдол юу вэ. Зөвхөн вакцины гэрчилгээ авах уу, өөр нэмэлт үйлчилгээ байгаа юу??

-Аппликейшнаас дархлаажуулалтанд хамрагдсан иргэдийн мэдээллийг харах боломжтой. Ингэснээр хот хооронд зорчих хөдөлгөөн хийх явцад хяналт тавих, зарим аймаг руу зорчиход зөвшөөрөл олгож буй сектор нь тухайн иргэнийг дархлаажсан эсэхийг мэдэх боломжийг олгож байгаа. Мөн аж ахуйн нэгжүүд үйл ажиллагаагаа нээсэнтэй холбоотойгоор үйлчлүүлж буй хүмүүсийг хоёр тундаа хамрагдсан байхыг шаардаж байгаа. Энэ шаардлагыг андройд болон IOS үйлдлийн системтэй гар утсыг ашиглан биелүүлэх боломжтойгоор бүтээсэн.

“COVID-19 QR Verify” аппликейшнд вакцины гэрчилгээгээс өөр нэмэлт үйлчилгээ байхгүй. Өөрөөр хэлбэл, “E-Mongolia”-аас авах боломжтой дархлаажуулалтын гэрчилгээ болон иргэний үнэмлэхний ард байгаа QR кодыг тус аппликейшнаар уншуулахад тухайн иргэнийг дархлаажуулалтад хэдэн тунгаар хамрагдсан талаарх мэдээллийг авах боломжтой. Дархлаажуулалтын гэрчилгээгээ хэвлэх, ухаалаг утаснаас харуулах боломжгүй үедээ иргэний үнэмлэхээ ашиглахад хангалттай гэсэн үг.

– Байгууллагуудын хувьд яаж ашиглах вэ, шинэ тоног төхөөрөмж авах шаардлагатай юу?

-Иргэн вакцины гэрчилгээгээ биедээ эсвэл гар утсандаа авч яваа тохиолдолд аж ахуй нэгж байгууллагууд дурын QR Scanner-аар вакцины гэрчилгээний доод буланд байрлах QR кодыг уншуулна. Харин иргэний үнэмлэх эсвэл вакцины цахим батламжаа биедээ авч яваа бол “COVID-19 QR VERIFY” аппликейшныг үйлчилгээний байгууллагын ажилтан гар утсандаа суулгаж, үйлчлүүлэгчээ нэвтрүүлнэ.

-Хувь хүн хэрхэн ашиглах вэ?

-Иргэдийн хувьд аль нэг товчоогоор нэвтрэх, байгууллагаар үйлчлүүлэх зөвшөөрөл авахдаа иргэний үнэмлэхний QR кодоо уншуулахад хангалттай.

-Хүний хувийн мэдээллийг ямар нэг байдлаар хувилж авах уу. Нэвтрэхэд хүнээс ямар мэдээлэл шаардах вэ?

-Иргэний үнэмлэхний ард байгаа QR код цаанаа олон оронтой тоотой байдаг. Тэр тооны тусламжтайгаар тулгалтаа хийдэг ба иргэний нэр болон бусад дагалдах мэдээлэл аппликейшн дээр гарч ирэхгүй. Иргэн өөрөө зөвшөөрөөд дархлаажсан эсэхээ шалгуулахад ямар нэг хувийн нууцын талаар онцолж авах зүйл байхгүй.

-Цар тахлын нөхцөл байдалтай уялдуулан “COVID-19 QR VERIFY” аппликейшныг бүтээсэн.Ковид дууссаны дараа устгах уу?

-Гадаад улс руу зорчих, хот хоорондын замын хөдөлгөөнд оролцох, ялангуяа тээврийн хэрэгслийг бүртгэлжүүлэх ажлуудад QR кодыг ашигладаг жишээ бий. QR бол хамгийн богино хугацаанд мэдээллийг дамжуулдаг ба хэрэглээ нь хаа сайгүй байдаг.

Categories
гадаад мэдээ спорт

​Кристиано Рональдо нийт 109 гоол хийж дэлхийн хамгийн олон гоол хийсэн хоёр хөлбөмбөгчний нэг боллоо

Евро 2020 хөлбөмбөгийн тэмцээний хэсгийн тоглолтууд өчигдөр өндөрлөж, хасагдах шатны тоглолтууд эхлэхэд бэлэн боллоо.

F хэсэг буюу “үхлийн хэсэг”-ээс хасагдах шатанд шалгарахын төлөө Португалийн шигшээ баг Францын шигшээ багтай тоглож 2:2 харьцаагаар тэнцсэн юм.

Хэдийгээр энэ хэсгийн дөрвөн багаас гуравдугаарт эрэмбэлэгдсэн ч Португалийн баг дараагийн шатанд шалгарч үлджээ. Евро 2020 тэмцээний хэсэг тус бүрийн эхний хоёр багаас гадна хамгийн өндөр үзүүлэлттэй гуравдугаар байрын дөрвөн баг, нийт 16 баг хасагдах шатанд тоглох юм.

Францын хаалганд хийсэн тэнцээний хоёр гоолыг хоёуланг нь Португалийн супер од Кристиано Рональдо хийжээ.

Ингэснээр Рональдогийн олон улсын тэмцээнүүдэд хийсэн гоолын тооны нийлбэр 109 болж, дэлхийн дээд амжилтыг Ираны хөлбөмбөгчин Али Даеитай хуваан эзэмшиж байна.

“Шариар” (перс хэлээр хаан гэсэн үг) хочтой Даеи 1993-аас 2006 оны хооронд Ираны шигшээ багийн бүрэлдэхүүнд 149 тэмцээнд оролцохдоо 109 гоол хийж дэлхийн дээд амжилтыг тогтоосон юм. Харин 36 настай Рональдогийн хувьд энэ тоог ахиулах боломжтой.

Тэрбээр бас Европ тивийн аварга шалгаруулах тэмцээний түүхэнд 14 гоол хийсэн үзүүлэлтээр дээд амжилт тогтоож байна. Энэ нь өмнөх дээд амжилтыг эзэмшигч Францын домогт хөлбөмбөгчин Мишель Платинигийн гоолын тооноос даруй таваар илүү юм.

Рональдо одоогоор гурван тоглолтод таван гоол хийсэн амжилтаар Евро 2020 тэмцээний мэргэн бууч болоод байна.

Өчигдөр F хэсгийн бусад хоёр баг болох Герман, Унгарын шигшээ багуудын тоглолт бас 2:2 харьцаагаар өндөрлөжээ.

Тэдгээрээс Германы баг дараагийн шатанд шалгарч, Унгарын баг хасагдаж байна.

Categories
мэдээ улс-төр цаг-үе

Өнөөдрийн чуулганаар дараах асуудлуудыг хэлэлцэнэ

Улсын Их Хурлын чуулган нэгдсэн хуралдаан өнөөдөр /2021.06.24/ 10:00 цагаас эхэллээ. Өнөөдрийн хуралдаанаар дараах асуудлуудыг хэлэлцэнэ.

1.Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төсөл /Засгийн газар өргөн мэдүүлсэн, хэлэлцэх эсэх/;

2.Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /эцсийн хэлэлцүүлэг/;

3.Аж ахуйн нэгжийн орлогын албан татварын тухай хуульд өөрчлөлт оруулах тухай, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд өөрчлөлт оруулах тухай, Мэдээллийн ил тод байдал ба мэдээлэл авах эрхийн тухай хуульд өөрчлөлт оруулах тухай, Татварын ерөнхий хуульд өөрчлөлт оруулах тухай, Эх, олон хүүхэдтэй өрх толгойлсон эх, эцэгт тэтгэмж олгох тухай хуульд өөрчлөлт оруулах тухай, Хөдөлмөрийн тухай хуулийн шинэчилсэн найруулгыг дагаж мөрдөх журмын тухай хуулийн төсөл болон Хууль баталсантай холбогдуулан авах арга хэмжээний тухай Улсын Их Хурлын тогтоолын төсөл /Хөдөлмөрийн тухай хуулийн шинэчилсэн найруулгын төсөлтэй холбогдуулан боловсруулсан, анхны хэлэлцүүлэг/;

4.Соёлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /эцсийн хэлэлцүүлэг/;

5.Хууль баталсантай холбогдуулан авах арга хэмжээний тухай Улсын Их Хурлын тогтоолын төсөл /Соёлын тухай хуулийн шинэчилсэн найруулгын төсөлтэй холбогдуулан боловсруулсан, анхны хэлэлцүүлэг/;

6.Кино урлагийг дэмжих тухай хуулийн төсөл болон хамт өргөн мэдүүлсэн хуулийн төслүүд /анхны хэлэлцүүлэг/;

7.Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл /анхны хэлэлцүүлэг/;

8.“Ардын хувьсгалын 100 жилийн ойн хүндэт медаль бий болгох тухай” Улсын Их Хурлын тогтоолын төсөл /анхны хэлэлцүүлэг/;

9.“Монгол Улсын хөгжлийн 2022 оны төлөвлөгөө батлах тухай” Улсын Их Хурлын тогтоолын төсөл /анхны хэлэлцүүлэг/;

10.Монгол Улсын нэгдсэн төсвийн 2020 оны гүйцэтгэл, Засгийн газрын санхүүгийн нэгтгэсэн тайлан болон “Монгол Улсын 2020 оны төсвийн гүйцэтгэл батлах тухай” Улсын Их Хурлын тогтоолын төсөл /Засгийн газар өргөн мэдүүлсэн, нэг дэх хэлэлцүүлэг/.

11.Нийтийн мэдээллийн тухай хуулийн төсөл болон хамт өргөн мэдүүлсэн хуулийн төслүүд /Засгийн газар өргөн мэдүүлсэн, хэлэлцэх эсэх/;

12.Хүний хувийн мэдээлэл хамгаалах тухай хуулийн төсөл болон хамт өргөн мэдүүлсэн хуулийн төслүүд /Засгийн газар өргөн мэдүүлсэн, хэлэлцэх эсэх/;

13.Цахим гарын үсгийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар өргөн мэдүүлсэн, хэлэлцэх эсэх/;

14.Онцгой албан татварын тухай хуульд нэмэлт, өөрчлөлт оруулах тухай хуулийн төсөл /анхны хэлэлцүүлэг/;

15.Гамшгаас хамгаалах тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн С.Чинзориг нарын 4 гишүүн өргөн мэдүүлсэн, хэлэлцэх эсэх/;

16.Шүүхийн шийдвэр гүйцэтгэх тухай хуульд нэмэлт оруулах тухай хуулийн төсөл /Улсын Их Хурлын гишүүн С.Чинзориг нарын 4 гишүүн өргөн мэдүүлсэн, хэлэлцэх эсэх/.