Month: June 2021

Монгол Улсын Ерөнхийлөгчийн Зарлигаар өнөөдөр сэтгүүлч, нийтлэлч, МОНЦАМЭ агентлагийн дарга асан А.Баатархуяг Монгол Улсын Соёлын гавьяат зүтгэлтэн хэмээх хүндтэй цолоор шагнууллаа.

Нэрт сэтгүүлч, нийтлэлч Торгууд овогт Авиан Баатархуяг 1973 онд Улаанбаатар хотод төрсөн. 1981-1991 онд Нийслэлийн Налайх дүүргийн 10 жилийн 2 дугаар дунд сургууль, 1992-1993 онд “Есөн эрдэнэ” брокерийн пүүст нягтлан бодогч, 1994-1995 онд Налайх дүүргийн ЗДТГ-ын Статистикийн тасагт оператораар ажиллаж, улмаар 1995-1999 онд С.Жамъянгаравын нэрэмжит “Их Монгол” Дорно дахины дээд сургуулийн Сэтгүүл зүйн ангид суралцаж төгсчээ.

А.Баатархуяг “25 дугаар суваг” телевизийн Мэдээний албанд 2000-2006 онд сурвалжлагч, редактор, ерөнхий редактор, 2006-2007 онд АН-ын Нарийн бичгийн дарга, Олон нийттэй харилцах хэлтсийн дарга, 2003-2008 онд “Монгол таймс”, “Улс төрийн сонин”-ы тоймч, 2009-2010 онд “25 дугаар суваг” телевизийн Мэдээний албаны дарга, 2010-2011 онд “25 дугаар суваг” телевизийн 2 дугаар сувгийн Ерөнхий редактораар тус тус ажиллаж байлаа.

А.Баатархуяг Үндэсний мэдээллийн МОНЦАМЭ агентлагийн даргаар 2012-2016 онд ажилласан бөгөөд өдгөө чөлөөт уран бүтээлч, нийтлэлчийн ажил эрхэлж байгаа юм. Тэрбээр “Нэрээ мартагсад”, “Цогт чандманийн эрэлд”, “Мартагдсан бэлгэдлүүд” зэрэг судалгааны бүтээлүүдээ олны хүртээл болгоод байгаа юм.

Түүний Монголын нийгэм, улс төрийн өнөөгийн байдлыг хурц, ил тодоор эрэн сурвалжилж бичсэн нийтлэлүүд нь Монголд ардчилсан, хүнлэг нийгэм цогцлоох, үзэл бодлоо чөлөөтэй илэрхийлэхийг хүсэгч хүн бүхний итгэл үнэмшлийг төрүүлдэг билээ.

Нийслэлийн Засаг дарга бөгөөд Улаанбаатар хотын захирагч Д.Сумъяабазар ресторан, зоогийн газрын холбооныхонтой уулзаж байна.

Тэрээр “Засгийн газраас бүх боломжийг ашиглан үзэж байна. Хойш суусан зүйл огт байхгүй. Халдварын тархалтыг намжаах хүсэл эрмэлзэж байна. Цахим орчинд буруу ойлголт түгээж байгаа зохион байгуулалттай хэсэг байх шиг байна.

Олон улсад хүлээн зөвшөөрөгдсөн журмыг ААН-үүдэд хүргүүлсэн. Хөл хорио, вакцин гэсэн хоёр арга хэмжээг дэлхийд авч байна. Халдварын эсрэг өөр дорвитой арга хэмжээ авч байгаа газар алга.

Та хэд өөрсдөө хариуцлагатай байгаад өгөөч. Харилцан ойлголцлын санамж бичиг байгуулна. Хүндрэлтэй тал байгааг бид ойлгож байна. Дэглэмээ бариад, хариуцлагын гэрээнд гарын үсэг зурна.

Төр тусгай зөвшөөрлийг тогтоох зүйл огт байхгүй. Жирэмсэн эмэгтэйчүүд, хүүхдүүд халдвар авч нөхцөл байдал хүндрээд байна. Хэдүүлээ нэг шийдэл гаргалгаа, дүрмээ тохиръё.

Иргэд, ААН, төр аль аль нь хариуцлагатай байх хэрэгтэй. Манайхан ААН-үүдийг нээчихээр хэвийн юм шиг бөөнөөрөө бужигнадаг. Эзэн биегүй болоод байгаа зүйлийн эсрэг гэрээний дагуу тохиролцож үйл ажиллагаагаа явуулж болно. Хариуцлага алдахгүй дэглэмээ мөрдөөд ажиллавал бид дэмжинэ” гэлээ.

Энэ жилийн Олон улсын мэдээлэл зүйн 33 дугаар олимпиадыг Сингапур улс энэ сарын 19-25-ний өдрүүдэд цахимаар зохион байгуулж байна. Тус олимпиадад дэлхийн 88 орны 353 сурагчид авьяас чадвараа сорьж буй юм. Олон улсын Мэдээлэл зүйн олимпиадад оролцож буй сурагчид хоёр өдөр, өдөр тус бүр гурван бодлогыг таван цагийн хугацаанд бодож уралддаг. Нийт зургаан бодлогыг бодох ба хамгийн их оноо болох 600 онооны төлөө өрсөлддөг.

Тус олимпиадад Монгол улсаа төлөөлөн:

• Олон улсын мэдээлэл зүйн олимпиадын АЛТ, МӨНГӨН медальт, Сант сургуулийн 12 дугаар ангийн сурагч А.Нямдаваа,
• Сант сургуулийн 11 дүгээр ангийн сурагч Ш.Билгүүдэй,
• Нэст сургуулийн 11 дүгээр ангийн сурагч Б.Билгүтэй,
• Сэлбэ сургуулийн 11 дүгээр ангийн сурагч Б.Бат-Эрдэнэ нар оролцож байна.

Эдгээр сурагчид нь Монголын мэдээлэл зүйн олимпиадыг зохион байгуулах хорооноос зохион байгуулсан цуврал зургаан удаагийн онлайн олимпиадад амжилттай оролцож, 2021 оны Ази номхон далайн орнуудыг олимпиадад Монгол улсаас оролцсон сурагчдаас нэмэлт сорилоор шалгарч, олон улсын мэдээлэл зүйн олимпиадад Монгол улсаа төлөөлөн оролцох эрхийг авсан юм.

Монгол улсын багийн ахлагчаар МУБИС-ийн профессор Д.Цэдэвсүрэн, дэд ахлагчаар ШУТИС-ийн дэд профессор А.Хүдэр нар ажиллаж байна.

Монгол улсаас олон улсын мэдээлэл зүйн онлайн олимпиадад оролцох үйл ажиллагааг МУ-ын БШУЯ дэмжин ажиллаж байна. Тус олимпиадад Монгол улсаас оролцох сурагчдын ажиллах технологийн орчин болоод бусад боломжийг бүрдүүлэхэд ММЗОЗБХороо, МУБИС, ШУТИС-ийн профессор багш нар ажиллаж байна. Олимпиадын технологийн орчин, түүний найдвартай ажиллагааг хангахад “Эрин системс” ХХК хамтран ажиллаж байна.

Нийслэлийн шинжлэх ухаан, үйлдвэрлэл, инновацын газар “Залуучуудын хөдөлмөр эрхлэлтийг дэмжих хөтөлбөр”-ийг Нийслэлийн хөдөлмөр эрхлэлтийн газартай хамтран хэрэгжүүлэхээр боллоо. Энэ хөтөлбөрийг 15-34 насны ажилгүй, ажил идэвхтэй хайж байгаа залуучуудад зориулж байгаа юм.

Тухайлбал, хөдөлмөр эрхлэлтийн нийтлэг үйлчилгээ үзүүлэх, ажилд дадлагажуулан зуучлах цогц үйлчилгээг туршин нэвтрүүлж, шинэлэг санаа, санаачилгыг дэмжихэд тус хөтөлбөрийн зорилго оршиж байна. Энэ ажлын хүрээнд Нийслэлийн шинжлэх ухаан, үйлдвэрлэл, инновацын газрын дарга Л.Тулгабаатар, Нийслэлийн хөдөлмөр эрхлэлтийн газрын дарга С.Нямдорж тэргүүтэй холбогдох албаны хүмүүс уулзалт хийж, санал солилцлоо.

Энэ оны эхний таван сарын байдлаар улсын хэмжээнд хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 247 бүртгэгдсэн ба зам тээврийн ослын улмаас 62 хүн амиа алдаж, 207 хүн гэмтсэн бол 98 хүүхэд гэмтэж 10 хүүхэд нас барсан байна.

Цагдаагийн байгууллагаас орон нутгийн замд үйлдэгдэж байгаа хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг, зөрчлөөс урьдчилан сэргийлэх хүүхдийг зам тээврийн осолд өртөхөөс хамгаалах зорилгоор “Орон нутгийн зам-хөдөлгөөний соёл” нэгдсэн арга хэмжээг “Ирээдүйгээ хамгаалъя” уриатайгаар энэ оны зургаадугаар сарын 25-ны өдрөөс эхлэн улсын хэмжээнд зохион байгуулна.

Арга хэмжээний хүрээнд гэмт хэрэг, зөрчлөөс урьдчилан сэргийлэх, иргэдийн амь нас, эрүүл мэнд, аюулгүй байдлыг хангахад чиглэсэн нөлөөллийн ажлуудыг үе шаттай зохион байгуулахаас гадна замын хөдөлгөөнд оролцож байгаа жолооч, зорчигч, явган зорчигч нарт зөв дадал, хандлага, соёл төлөвшүүлж, эрх зүйн боловсролыг дээшлүүлэх, жолоочоос гадна зорчигч нарын хариуцлагыг нэмэгдүүлж, бие биедээ шаардлага тавих хэлбэрээр эерэг, хайр, халамжийг агуулсан нөлөөллийн аргаар явуулахаар төлөвлөжээ. Мөн аяны хүрээнд Дорноговь аймгийн Сайншанд-Замын-Үүд чиглэлийн олон улсын чанартай автозамд дундаж хурд хэмжигчтэй хяналтын камер суурилуулах юм.

Цагдаагийн ерөнхий газар, “Оюутолгой” ХХК, “Мобиком Корпораци” ХХК 2019 онд хамтран ажиллах “Санамж бичиг”-т гарын үсэг зурсан бөгөөд энэ хүрээнд “Яараад яах вэ дээ” нөлөөллийн аяныг зохион байгуулснаар аяны хугацаанд

• хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг аяны хугацаанд өмнөх оны мөн үеэс 50.8,
• нас барсан хүн 11.7,
• гэмтсэн хүн 49.7 хувиар,

үүнээс орон нутагт үйлдэгдсэн хэрэг 63.9,

• нас барсан хүн 21.7,
• гэмтсэн хүн 59.5 хувиар тус тус буурсан бол 2020 онд арга хэмжээний хүрээнд Хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 203 бүртгэгдсэн нь өнгөрсөн оны мөн үеэс 40.6, гэмтсэн хүн 255 бүртгэгдсэн нь 30.5 хувиар, зам тээврийн осол 2402 бүртгэгдсэн нь 8.1 хувиар тус тус буурсан эерэг үзүүлэлттэй байна. Тус аян, арга хэмжээг “Оюутолгой” ХХК гурав дахь жилдээ санхүүжүүлж, хамтран зохион байгуулж байна.

Энэ удаагийн аяныг төрийн болон төрийн бус байгууллага, аж ахуй нэгж дэмжин оролцож байгаа ба гэмт хэрэг, зөрчлөөс урьдчилан сэргийлэхэд төр, хувийн хэвшлийн аж ахуйн нэгж, байгууллагууд нэгдэн нийгмийн сайн сайхан, иргэдийн амь нас, эрүүл мэндийг хамгаалах, аюулгүй байдлыг хангахад хамтран ажиллаж байгаа хамтын ажиллагааг харуулсан явдал юм.