Month: May 2021

Засгийн газрын 100 хоногийн өнөөдрийн уулзалтын үеэр Хууль зүйн сайд Х.Нямбаатар Увс аймгийн цагдаагийн газрын хоёр албан хаагч нас барсантай холбоотой асуудалд тайлбар өглөө.

Тэрээр “Увс аймгийн цагдаагийн газрын харуулын ахлагч Л… 2016 онд зүрхний шигдээс гэсэн оноштойгоор зүрхэндээ стент тавиулахад хөдөлмөрийн чадвараа 70 хувийг алдсан гэж үзэн ажлаасаа гарсан.

Жилийн дараа түүний биеийн байдлыг харгалзан ажлаа хийх боломжтой гэж үзэхэд, тэрээр ажилдаа буцаад орсон байсан. Тус байгууллагын ажилчдад 2021 оны дөрөвдүгээр сарын 6-8-нд вакцин хийсэн ба вакцин хийж байсан эмнэлгийн ажилтнууд ийм оноштой хүнд заавал эмчийн зөвшөөрөлтэйгөөр вакцин хийнэ гэсний дагуу тэрээр 9-ний өдөр өөрийн эмчээсээ зөвшөөрлийн бичгээ аван вакцинаа хийлгэсэн юм билээ. Улмаар түүний биеийн байдал хүндэрч гэртээ нас барсан гэсэн мэдээлэл байна.

Шүүх эмнэлгийн дүгнэлт гараагүй байгаа ба тэрээр зүрхний судасны нарийсалтай учир стент тавиулсан, вакцины эсрэг заалттай хүн байсан. 

Удаах иргэн нь тус байгууллагын мөрдөгч, талийгаач Ц юм. Хамт ажиллагсад нь түүнийг сүүлийн үед их турж байгааг хэлж байсан гэсэн. Аймгийн эмнэлэгт үзүүлэхэд дотор муухайрч, бөөлжих шинж тэмдэгтэй эмчлэгдэж байгаад нийслэлийн 1-р эмнэлэгт яаралтай шилжин хэвтэн эмчлүүлж байхдаа нас барсан ба чихрийн шижин өвчтэй байсан. Нэгдүгээр эмнэлэгт хэвтэхдээ шинжилгээ өгөхөд сөрөг гарсан. Вакцинаас болж нас барсан гэсэн шүүхийн дүгнэлт гараагүй байгаа ба одоогоор шүүх эмнэлэг нас барсан шалтгааныг тодруулахаар ажиллаж байна” гэлээ.

Засгийн газрын 100 хоног тохиож байгаатай холбогдуулан Ерөнхий сайд Л.Оюун-Эрдэнэ мэдээлэл хийж, сэтгүүлчдийн сонирхсон асуултад хариулж байна.

Тэрээр танхимынхаа сайд нарын нэр холбогдоод буй хариуцлагагүй асуудалд хэрхэн анхаарлаа хандуулж байгаа тухай сэтгүүлчийн асуултад хариуллаа.

Тэрээр “Цэргийн амь нас эрсдэж байгаа нь туйлын хүнд бөгөөд харамсалтай явдал. Гэхдээ нэг цэрэг эрсдэх бүрт Батлан хамгаалахын сайд огцроод байж болохгүй. Ийм улс дэлхий дээр хаана ч байхгүй. Манай улс геополитикийн хувьд туйлын эмзэг. Хэрэв ийм тогтолцоо руу ороод Засгийн газар нь хөнхөн, сайд нар нь үлээхэд нисээд уначихдаг байж болхогүй. Тиймээс би сайд нартаа сануулж байгаа. Шадар сайдад, Ц.Нямдорж сайдад сануулга өгсөн. Авлигатай холбоотой ямар нэгэн асуудал үүсвэл тухайн сайдыг чөлөөлөх захирамж шууд гаргана. Үүнийг Засгийн газрынхаа хамгийн эхний хурал дээр хэлсэн” гэлээ.

Монгол Улсын Ерөнхий сайд Л.Оюун-Эрдэнийн тэргүүлсэн Засгийн газрын 100 хоногт зориулсан ярилцлагыг шууд дамжуулж байна.

Тэрээр хүүхдийн вакциныг долдугаар сарын 1-нээс өмнө татан авахаар төлөвлөж байна гэлээ.

Ерөнхий сайд Л.Оюун-Эрдэнэ “Бид Файзер компанитай холбоо тогтоон ажиллаж байгаа ба долоодугаар сарын 1-нээс өмнө хүүхдийн вакциныг татан авахаар төлөвлөж байна. Худалдан авалтад ямар нэгэн асуудал гарахгүй. Одоо хийгдэж буй вакцины 80 орчим хувийг бид гаднаас худалдан авсан. Өнөөг хүртэлх худалдан авалтад ямар нэгэн хүндрэл гараагүй” хэмээлээ.