Month: May 2021

Categories
мэдээ нийгэм цаг-үе

Энэ долоо хоногт зам тээврийн ослоор 4 хүн амиа алджээ

Тавдугаар сарын 17-20-ны өдрүүдэд тээврийн цагдаагийн албаны жижүүрийн шуурхай удирдлагын зам тээврийн ослын шинжтэй 670 дуудлага мэдээлэл бүртгэжээ.

Бүртгэсэн зам тээврийн ослын улмаас нийслэлд 15, орон нутагт 9 хүн гэмтэж, ноцтой зам тээврийн ослын улмаас орон нутагт 3, нийслэлд 1 хүний амь хохирсон байна.

Хүний амь хохирсон хэргийг хэлбэрээр нь авч үзвэл:

  • Мотоциклтой автомашинтай мөргөлдөх хэлбэрээр жолооч-1
  • Явган зорчигч автомашинд мөргөгдөх хэлбэрээр-1
  • Автомашин онхолдох хэлбэрээр зорчигч-2 хүний амь хохирсон.

Хүний амь хохирсон осол, хэргээс дурдвал:

  • 2021 оны ,тавдугаар сарын 18-ны өдрийн 18:00 цагийн орчим баянхонгор аймгийн бөмбөгөр сум, сумын төвөөс 3 км зайд, шороон замд honda-stepwgn маркийн автомашин онхолдож, улмаар 2 хүн гэмтэж, 1 хүүхдийн амь хохирсон.
  • 2021 оны тавдугаар сарын 19-ний өдрийн 21:00 цагийн орчимд схд-ийн нутагт явган зорчигч автомашинд мөргүүлж, амь хохирсон.
  • 2021 оны тавдугаар сарын 19-ний өдрийн 16:00 цагийн орчимд баян-өлгий аймагт, шороон замд автомашин мотоциклтой мөргөлдөж, мотоциклын жолооч амь хохирсон.
  • 2021 оны тавдугаар сарын 20-ны өдрийн 06:00 цагийн орчимд хэнтий аймагт автомашин онхолдож, зорчигчийн амь хохирсон.

Хүн гэмтсэн ослыг хэлбэрээр нь авч үзвэл:

Нийслэлд:

  • Явган зорчигч автомашинд мөргөгдөх хэлбэрээр –10
  • Унадаг дугуйтай хүүхэд автомашинд мөргөгдөх хэлбэрээр-3
  • Хоёр автомашин мөргөлдөх хэлбэрээр жолооч-2 хүн тус тус гэмтсэн.

Орон нутагт:

  • Мотоцикл автомашинтай мөргөлдөх хэлбэрээр жолооч-3
  • Автомашин шон мөргөх хэлбэрээр зорчигч-1
  • Автомашин онхолдох хэлбэрээр зорчигч-3
  • Мотоцикл онхолдох хэлбэрээр жолооч-2 хүн тус тус гэмтсэн.

Согтууруулах ундааны зүйл хэрэглэсэн үедээ тээврийн хэрэгсэл жолоодсон 239 зөрчлийг илрүүлжээ

Алба хаагчдаас гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон нийслэлд 132, орон нутагт 107 буюу улсын хэмжээнд 239 зөрчлийг тус тус илрүүлж, учирч болох эрсдэлээс урьдчилан сэргийлж ажилласан.

Жолооч та бүхэн согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх, явган зорчигчид зам тавьж өгч байх, явган зорчигч та бүхэн гарц, гарамтай хэсгээр зам гарах, бага насны хүүхдийг харгалзах хүнгүй замын хөдөлгөөнд оролцуулахгүй байх, автомашин хөдөлгөөн эхлэхдээ зам орчны байдлыг тогтмол шалгаж байх, мотоциклтой замын хөдөлгөөнд оролцохдоо хамгаалах малгай хэрэглэх, хурд хэтрүүлэх байхыг цагдаагийн байгууллагаас анхааруулж байна.

Categories
мэдээ улс-төр

УИХ-ын гишүүн Н.Алтанхуягийн Шүүхэд гаргасан нэхэмжлэлийг хэрэгсэхгүй болгожээ

УИХ-ын гишүүн Н.Алтанхуягаас Сонгуулийн ерөнхий хороонд холбогдуулан “Монгол Улсын Сонгуулийн ерөнхий хорооны “Нэр дэвшигчээр бүртгэж, үнэмлэх олгох тухай” тогтоолыг хууль бус болохыг тогтоож, хүчингүй болгуулах” шаардлага бүхий нэхэмжлэл гаргажээ.

Энэ нэхэмжлэлийг Захиргааны хэргийн давж заалдах шатны шүүх анхан шатны журмаар тавдугаар сарын 12-ны өдөр хүлээн авч 2021 оны тавдугаар сарын 17-ны өдөр захиргааны хэрэг үүсгэж урьдчилсан хэлэлцүүлгийн шүүх хуралдааныг тавдугаар сарын 20-ны өдөр хянан хэлэлцсэн байна.

Захиргааны хэрэг шүүхэд хянан шийдвэрлэх тухай хуулийн 54 дүгээр зүйлийн 54.1.5-д /нэхэмжлэгчийг төлөөлөх бүрэн эрхгүй болон нэхэмжлэл гаргах эрхгүй этгээд нэхэмжлэл гаргасан/ зааснаар нэхэмжлэлийг хүлээн авахаас татгалзаж, холбогдох захиргааны хэргийг хэрэгсэхгүй болгож шийдвэрлэв хэмээн Захиргааны хэргийн давж заалдах шатны шүүхийн Тамгын газраас мэдээллээ.

Categories
мэдээ нийгэм цаг-үе

ЭМЯ: 629 хүнээс халдвар илэрч, таван хүн нас барлаа

Коронавируст халдварын нөхцөл байдлын талаар Эрүүл мэндийн яам ээлжит мэдээллээ хүргэж байна.

ЭМЯ-ны Хэвлэлийн төлөөлөгч Б.Ууганбаяр “Сүүлийн 24 цагт 6829 хүнээс шинжилгээ авахад 629 хүнээс халдвар илэрлээ.

Эдгээрийн 603 нь Улаанбаатар хотод, 24 орон нутагт , эмнэлгээс шалтгаалах халдвар 2 байна. Ингэснээр Улсын хэмжээнд нийт батлагдсан тохиолдол 51247 боллоо.

Мөн таван хүн нас барж, ковид шалтгаант нас баралт 240 болж байна.

Сүүлийн 24 цагт 754 хүн эдгэрч, эмнэлгээс гарлаа. Нийт эдгэрсэн хүний тоо 45145 боллоо.

Categories
мэдээ улс-төр цаг-үе

МАХН татан буугдаж байгаа талаар бичиг баримтаа Улсын дээд шүүхэд албан ёсоор гардууллаа

Улсын дээд шүүхэд МАХН татан буугдах материалаа хүлээлгэн өглөө. МАХН Их чуулганаа хуралдуулж, МАН-тэй нэгдэн энэ удаагийн Ерөнхийлөгчийн сонгуульд МАН-аас нэр дэвшигчийг дэмжин оролцохоо мэдэгдсэн.

Энэ талаар Н.Энхбаяр мэдээлэхдээ “МАХН татан буугдаж байгаа талаар бичиг баримтаа Улсын дээд шүүхэд албан ёсоор гардууллаа. Уг шийдвэрийг гаргахаас өмнө анхан шатны байгууллагын бүх гишүүдээсээ саналыг нь авсан. Бид МАН-тай нийлэхдээ хэд хэдэн зүйлийг баримталсан. Нэгдүгээрт, МАН, МАХН нэг гарал үүсэлтэй нам. Хоёрдугаарт, Оюу толгойн гэрээг засахтай холбоотой нэгдмэл байр сууринд хүрсэн. Гуравдугаарт, Дубайн гэрээг хүчингүй болгох ёстой гэдгийг бид олон жил илэрхийлсээр ирсэн. МАН-ын удирдлага Дубайн гэрээг хүчингүй болгоно гэдгээ албан ёсоор зарлаж байгаа. Мөн Эрдэнэтийн 49 хувийг авах үйл ажиллагаа хууль бус байсан гэдгийг би мэдэгдсээр ирсэн. Иймээс хууль шүүхийн байгууллагын гаж тогтолцоог засахын тулд нэгдэхээр болсон.

Монголд улс төрийн хүчин байгуулагдсаны 100 жилийн ой болж байна. Үүнийг хүндэтгээд цаашид залуучууддаа эх орноо сайн сайхан болгохын төлөө үүд хаалгаа нээж өгөхийн тулд нэгдэхээр шийдсэн. Энэ бол Монгол Улсын хөгжлийн шинэ эхлэлийн гараа. Хямралыг давж сүүлийн 30 жилийн ололт амжилтыг бататгах үйл хэрэг” гэж хэллээ.

Түүнчлэн тэрбээр “УИХ-ын гишүүн С.Ганбаатар Та бидний эвсэлд үлдэхээр тохирсон ч Ерөнхийлөгчийн үгийг илүү сонсдог байжээ. Ерөнхийлөгч Х.Баттулга манай С.Ганбаатарт биднээс илүү нөлөөтэй юм байна. Х.Баттулгын зохион байгуулсан Ардчилсан намд орсон” гэв.

Categories
мэдээ нийгэм

Дүнжингаравын төмөр замын гарамд засвар хийж, зам хаана

Толгойт өртөөнөөс Амгалан өртөө хүртэлх төмөр замын гармын их засварыг хийхээр болжээ.

Энэ хүрээнд Баянзүрх дүүргийн 25 дугаар хороо, төмөр замын 407 км, Дүнжингаравын төмөр замын гармын их засварын ажлыг 2021 оны тавдугаар сарын 21-ны өдрийн 22:00 цагаас тавдугаар сарын 22-ны өдрийн 08:00 цагийн хооронд замын хөдөлгөөнийг түр хааж гүйцэтгэнэ.

Та бүхэн доорх зургийн дагуу хөдөлгөөнд оролцох боломжтой.

Хөдөлгөөний эрчим багатай цаг үеийг тааруулж дээрх ажлыг зохион байгуулж байгаа тул та бүхэн явах чиглэлээ урьдчилан зөв тооцоолох, хурдаа зөв тохируулах, ялангуяа албан бус замаар явахгүй байхыг онцгойлон анхааруулж байна.

Categories
мэдээ нийгэм цаг-үе

​Хүн ам, орон сууцны 2020 оны улсын тооллогын дүнг танилцуулав

Хүн ам, орон сууцны 2020 оны улсын тооллогын дүнг Үндэсний статистикийн хорооны дарга Б.Батдаваа танилцуулав.

Тэрбээр “Хүн ам, орон сууцны 2020 оны улсын тооллогын дүнгээр нийт хүн ам 3,296,866, үүнээс Монгол Улсын нутаг дэвсгэр дээр амьдарч буй 3,197,020, зургаагаас дээш сарын хугацаатайгаар гадаад улс оронд амьдарсан Монгол Улсын иргэдийн тоо 122,301 байгаа юм байна. Хүн амын жилийн дундаж өсөлт 2010-2020 оны тооллогын жилд 2.2 хувийн өсөлттэй байгаа дүн мэдээг танилцууллаа. Манай улсын хэмжээнд хүн амын өсөлтийн оргил үе нь 1979-1989 онд 2.9 хувь, хамгийн бага нь 1935-1944 онд 0.3 хувь байжээ. Үндэсний статистикийн хорооноос 2015 онд гаргасан хүн амын хэтийн тооцоогоор 2031 онд Монгол Улсын хүн ам 4 сая хүрэх магадлалтай.

Монгол Улс насны бүтцийн хувьд залуу хэвээр байна. Тухайлбал, нийт хүн амын 31.5 хувийн 0-14 насны хүүхэд, 64.4 хувийг 15-64 насныхан, 4.1 хувийг 65-аас дээш насны хүн ам эзэлж байна. Хүн амын ачаалал буюу хөдөлмөрийн насны хүн амд ногдох хүүхэд, ахмад настан гэх мэт тэжээлгэгч хүн амын тоо 55.3 хувь байна. Хүн амын голч нас 27.9 болсон нь сүүлийн 30 жилд голч нас 10-аар нэмэгдсэнийг илэрхийлж байна” гэв.

Гадаад улсад аж төрж буй иргэдийн 34.2 хувь нь суралцах зорилготой байгаа бол 20.6 хувь нь ажиллах, 12.6 хувь нь гэр бүлийн шалтгаанаар, 11.7 хувь нь суурьших, 10.4 хувь нь хөдөлмөрийн гэрээгээр, 1 хувь нь албан томилолтоор амьдарч байгаа. Харин 9.5 хувь нь бусад шалтгаанаар гадаад улсад амьдарч байгаа гэх дүн мэдээлэл гарчээ.

Нийт өрхийн тоо 897,427 байгаа бол үүний 60.9 хувь нь байшин орон сууцанд, үүн дотроо орон сууцанд амьдардаг нь 29.4 хувь юм байна. 342,409 буюу нийт өрхийн 38.2 хувь нь гэрт, 8,039 өрх буюу 0.9 хувь нь бусад төрлийн сууцанд амьдардаг гэх дүн мэдээ гарчээ. Улсын хэмжээнд нийт өрхийн 8.4 хувь нь буюу 74.8 мянган өрх өөрийн гэсэн сууцгүй, эдгээрийн 80 орчим хувь нь хотод амьдардаг байна.

Categories
амьдралын-өнгө мэдээ нийгэм цаг-үе

Баруун аймгуудаар цас орж, цасан болон шороон шуурга шуурна

Цаг агаарын аюултай үзэгдлээс сэрэмжлүүлэх мэдээ: Өнөөдөр говь-алтайн нутаг, баянхонгор, өвөрхангайн өмнөд, өмнөговь, дундговийн баруун хэсгээр салхи секундэд 18-20 метр, зарим үед секундэд 24 метрийг давж ширүүснэ.

Малчид, иргэд, тариаланчдын анхааралд:

Өнөөдөр нутгийн баруун хагаст, маргааш төв болон зүүн аймгуудын нутгаар бороо, нойтон цас, цас орж цасан шуурга шуурч, нутгийн өмнөд хэсгээр хүчтэй салхи, шороон шуурга шуурч, эрс сэрүүсэхийг онцгойлон анхааруулж байна.

2021 оны тавдугаар сарын 21-ний 08 цагаас 20 цаг хүртэлх цаг агаарын урьдчилсан мэдээ:

Хур тунадас: Ихэнх нутгаар үүлшинэ. Баруун аймгуудын ихэнх нутаг, төвийн аймгуудын нутгийн баруун болон хойд хэсгээр бороо, нойтон цас орно. Бусад нутгаар бороо орохгүй.

Салхи: Баруун аймгуудын нутгаар баруун хойноос, бусад нутгаар зүүн өмнөөс секундэд 8-13 метр, баруун, төвийн аймгуудын нутгийн өмнөд, говийн аймгуудын нутгийн өмнөд хэсгээр секундэд 18-20 метр, зарим үед секундэд 24 метрийг давж ширүүсэж шороон шуурга шуурна.

Агаарын температур: Монгол-алтай, хангай, хөвсгөлийн уулархаг нутгаар сэрүүсэж 0-5 градус, хэнтэйн уулархаг нутаг, хүрэнбэлчир орчим, эг, үүр, орхон-сэлэнгийн сав газраар 16-21 градус, говийн бүс нутгийн зүүн хэсэг, дорнод-дарьгангын тал нутгаар 29-34 градус, бусад нутгаар 20-25 градус дулаан байна.

Улаанбаатар хот орчмоор: Үүлшинэ. Бороо орохгүй. Салхи зүүн өмнөөс секундэд 6-11 метр, зарим үед секундэд 14-16 метр хүрч ширүүсэж, шороон шуурга шуурна. 21-23 градус дулаан байна.

Багануур орчмоор: Үүлшинэ. Бороо орохгүй. Салхи зүүн өмнөөс секундэд 6-11 метр, өдөртөө зарим үед секундэд 15-17 метр хүрч ширүүсэж, шороон шуурга шуурна. 22-24 градус дулаан байна.

Тэрэлж орчмоор: Үүлшинэ. Бороо орохгүй. Салхи зүүн өмнөөс секундэд 7-12 метр. Өдөртөө 20-22 градус дулаан байна гэж цуошг-аас мэдээллээ.

Categories
мэдээ улс-төр

УИХ: Хүн ам, орон сууцны 2020 оны улсын тооллогын дүнг хэлэлцэж байна

УИХ-ын чуулганы Баасан гарагийн хуралдаан эхэллээ.

Өнөөдрийн хуралдаанаар хэлэлцэх асуудлууд:

  • Хүн ам, орон сууцны 2020 оны улсын тооллогын дүн;
  • Банк, эрх бүхий хуулийн этгээдийн мөнгөн хадгаламж, мөнгөн хөрөнгийн шилжүүлэг, зээлийн үйл ажиллагааны тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Эцэслэн батлах үе шат/.
Categories
амьдралын-өнгө мэдээ

Сүхбаатар аймагт Орон нутгийн анхны Lifestyle салбар нээгдлээ

Мобиком Корпораци нь хэрэглэгчдийнхээ ая тух, хэрэгцээ шаардлагад нийцүүлэн орчин үеийн дижитал шийдэл бүхий Lifestyle салбарыг орон нутагт анх удаа Сүхбаатар аймгийн төвд нээлээ.

Тус салбарт үйлчилгээний хамгийн сүүлийн үеийн стандарт хэв маягийг агуулсан тав тухтай орчныг бүрдүүлсэн бөгөөд хэрэглэгч харилцаа холбооны үйлчилгээ авахаас гадна Солонгосын албан ёсны франчайзинг Restime сүлжээ кофе шоп, аймагтаа танигдсан Оргил брэндийн бялуу, амттан зэргээр үйлчлүүлэх боломжтой юм. Түүнчлэн хамгийн сүүлийн үеийн, албан ёсны эрхтэй худалдаалагдаж буй гар утас, төхөөрөмж, дагалдах хэрэгслийг худалдан авах, үйлчилгээний ажилтанд хандахгүйгээр Мобикомын бүтээгдэхүүн үйлчилгээний мэдээллийг ширээн дээр байрлуулсан таблетуудаас авах боломжийг бүрдүүлснээрээ онцлогтой. Эдгээр үйлчилгээнүүдийг авахдаа төлбөр тооцооны хамгийн сүүлийн үеийн дэвшилтэт шийдэл болох MonPay апликейшныг ашиглан зайнаас, аюулгүй, шуурхай гүйлгээ хийх боломжтой.

Categories
мэдээ нийгэм

“Баян-Өлгий аймагт вакцины нөөц хангалттай ч иргэд хийлгэхгүй байсан” гэв

Баян-Өлгий аймагт “Ковид-19” вирусийн эсрэг вакцинжуулалтын ажил сул байгаа талаар энэ сарын 17-нд ЭМЯ-наас мэдээлсэн. Тэгвэл одоогийн байдлаар аймгийн хэмжээнд иргэдийг дархлаажуулах ажил ямар түвшинд байгаа талаар Баян-Өлгий аймгийн Засаг дарга Д.Бауыржанаас тодрууллаа.

-Коронавирусийн нөхцөл байдал аймгийн хэмжээнд ямар байна вэ. Түүнчлэн иргэдийг дархлаажуулах ажил сул байгаатай холбоотой энэ чиглэлд ямар арга хэмжээ авсан бэ?

-Засаг даргын захирамжид үндэслэн нийт 13 суманд 64 хүний бүрэлдэхүүнтэй ажлын хэсэг байгуулж, өнгөрсөн амралтын өдрүүдэд дархлаажуулалтын ажлыг зохион байгууллаа. уржигдар оройн 19:00 цагийн байдлаар аймгийн хэмжээнд вакцины нэгдүгээр тунд хамрагдсан хүний тоо 73.8 хувьд хүрсэн. Харин ковидын эсрэг вакцины хоёрдугаар тунгийн хамрагдалт 8.2 хувьтай байна. иргэдийн хоёр дахь тунгаа авах вакцинжуулалтын ажил энэ сарын 24-нд буюу ирэх долоо хоногийн даваа гаригт эхэлнэ.

Ингээд эрүүл мэндийн шалтгаантай, хөл хүнд, жирэмслэхээр төлөвлөсөн эмэгтэйчүүд, хөгжлийн бэрхшээлтэй учраас Pfizer ер тариулах ёстой гэх мэтчилэн шалтгаантай хүмүүс үлдэнэ гэсэн үг.

-Аймагт вакцины нөөц боломж ямар байна вэ?

-Вакцины нөөц хангалттай байгаа. Энэ долоо хоногийн даваа гаригт нийслэлээс нэмэлтээр 32 мянган тун вакцин татсан. Эдгээр вакциныг хоёр дахь тунд зориулна. Дархлаажуулалтад хамрагдсан түвшингээр авч үзвэл, Дэлүүн сум, Булган сум 90 хувьд хүрч байгаа бол Алтай сум 87.3 хувь, Өлгий сум 85.4 хувьтай байна. Харин Бугат сум 57.8 хувь, Буянт сум 58.9, Цэнгэл сум 53 хувьтай буюу идэвх сул байгаа юм.

-Бугат, Буянт, Цэнгэл суманд дархлаажуулалтын ажил сул байгаа шалтгааныг тайлбарлавал?

-Нэгдүгээрт, малчид зусландаа гарцгаасан учраас алслагдсан. Түүнчлэн сумын захад улстөржилт байна. Улмаар уржигдар аймаг, сумын Онцгой комиссыг хуралдуулж зарим нэг Засаг дарга нарт хариуцлагын асуудал ярьж байгаа.

-Өнгөрсөн сард ариун Рамада тохиож байсантай холбоотой, иргэд мацаг барьсан учраас дархлаажуулалтын идэвх сул байсан гэх мэдээлэл бий?

-Ариун Рамадагийн сар энэ сарын 13-ны өдөр дууссан. Энэ өдрүүдэд хүмүүс маань мацаг барьдаг учраас тариа хийлгэж, цус авахуулдаггүй зарчим байдаг. Тийм учраас үүнийг нь хүлээсэн. Тэгэхээр долоо хоногийн өмнө дууссан учраас дараа нь вакцины ажлыг эрчимжүүлсэн. Зарим нэгэн багийн дарга нар хүртэл ард түмнээ уриалан дуудахгүй байсан. Манай Баян-Өлгий аймаг чинь ногоон бүс дотооддоо халдвар алдаагүй ганц аймаг учраас та бүгд улстөржиж болохгүй гэж хэлсэн. Ингээд би аймгийн Засаг даргын хувьд өнгөрсөн баасан гаригт захирамж гаргаад 64 хүний бүрэлдэхүүнтэй 13 баг гаргаж аймгийн хэмжээнд ажиллуулсан.

-Аймгийн хэмжээнд халдвар авсан хэдэн хүн байна вэ?

-Ковидын зөөвөрлөгдсөн тохиолдол аймгийн хэмжээнд 12 илэрсэн байгаа. Тэдний ихэнх нь нийслэлээс ирсэн. Тодруулбал, буяны ажилд оролцсон, эмчилгээ хийлгээд ирсэн, хотоос ажлаар аймагт ирсэн хүмүүсээс илэрсэн гэсэн үг. Тухайн 12 тохиолдлоос долоо нь бүрэн эдгэрч гарсан байна. Маргааш (өнөөдөр) орой хоёр хүн гарна.

ӨНГӨРСӨН АМРАЛТЫН ӨДӨР БҮХ ҮЙЛЧИЛГЭЭНИЙ БАЙГУУЛЛАГЫН ҮЙЛ АЖИЛЛАГААГ ХААЖ ИРГЭДИЙГ ВАКЦИНД ХАМРУУЛСАН

Баян-Өлгий аймаг дахь Саян тв мэдээний сэтгүүлч Л.Юмдүжингээс тодрууллаа.

-Баян-Өлгий аймагт одоогийн байдлаар вакцинжуулах ажил ямар байна вэ?

-Өчигдрийн байдлаар 73 хувьтай үргэлжилж байгаа гэх мэдээлэл бий. Өмнө нь сул байсан ч ням гаригт бүх үйлчилгээний байгууллагын үйл ажиллагааг хаагаад иргэдийг вакцинд хамруулсан учраас дархлаажуулалтын явцад нөлөөлсөн. Тодорхой мэдээллийг дурдвал, энэ сарын 18-ны өдрийн 18:00 цагийн байдлаар вакцины нэгдүгээр тунг нийт 46.600 хүн хийлгэж, явц 74.7 хувьд хүрчээ. Харин хоёрдугаар тунг 5130 хүн хийлгэж, явц 8.2 хувь тай байна. Манай аймагт 18-ны байдлаар нийт 62.355 хүн вакцинд хамрагдах ёстой.

-Вакцинжуулалт аймагт хэзээ эхэлсэн юм бол?

-Вакцинжуулалтын ажил энэ сарын 7-нд эхэлсэн. Ингээд дархлаажуулалтад хамрагдах иргэдийн оролцоо сул байсан учраас өнгөрсөн амралтын өдөр дээрх арга хэмжээг авсан.

-Тэгэхээр иргэдийн оролцооноос шалтгаалан вакцинжуулалтын ажил удааширчээ?

-Ер нь вакцины нөөц хангалттай байсан ч иргэд хийлгэхгүй байсан. Одоо ч вакцин хангалттай бий. Иргэд чухам ямар шалтгааны улмаас вакцинд хамрагдахгүй байсныг тодорхой хэлж мэдэхгүй ч бие муутай, жирэмсэн гэх хүмүүс байгаа. Түүнчлэн хөдөө сумын иргэд мал ахуйгаа орхиод зорьж ирж тариулахад хэцүү. Тэгэхээр хүмүүс янз бүрийн шалтгаантай байсан болов уу.

П.САЙНАА