Month: May 2021

Categories
мэдээ эдийн-засаг

“SouthGobi Resources”-ийн үйл ажиллагааны ашиг I улиралд 7.5 сая ам.доллар хүрчээ

Хонконг, Торонтогийн Хөрөнгийн биржид давхар бүртгэлтэй “SouthGobi Resources” компанийн үйл ажиллагааны ашиг I улиралд 7.5 сая ам.доллар хүрсэн байна.

Өмнөх оны мөн үед тус компани 1.3 сая ам.долларын алдагдалтай ажиллаж байжээ. Өнгөрсөн улиралд “SouthGobi Resources”-ийн борлуулсан нүүрсний үнэ тонн тутамдаа 43.5 ам.доллар болж өссөн нь үүнд голлон нөлөөлсөн гэж тайлбарлаж байна. Түүнчлэн борлуулалтын хэмжээ нэмэгдсэн нь ашиг өсөхөд дэмжлэг болсон аж. Тус компани Өмнөговь аймаг дахь “Овоот толгой” уурхайд коксжих нүүрс олборлож байгаа юм.

Categories
мэдээ нийгэм

Өнөөдрөөс XII анги төгсөгчдөд сэтгэл зүйн зөвлөгөө өгч эхэллээ

“Ковид-19” халдварт цар тахлын үед ЕБС-ийн 12-р анги төгсөгчдөд шалгалтын өмнөх стресс менежмент, сэтгэл зүйн бэлтгэлд дэмжлэг үзүүлэх зорилгоор мэргэжлийн сэтгэл зүйчид 2021 оны тавдугаар сарын 24-ний өдрөөс эхлэн фэйсбүүк чатбокс үйлчилгээг ашиглан зөвлөгөө өгөхөөр боллоо.

Та сэтгэлзүйн зөвлөгөөг мэргэжлийн хүнээс авах бол Боловсролын үнэлгээний төвийн чатботоор холбогдоорой. Мөн 7011-9498 утсанд 10-22 цагийн хооронд хандах боломжтой юм.

Categories
мэдээ нийгэм

ГССҮТ орчин үеийн 64 зүслэгтэй компьютерт томографийн аппаратыг суурилуулжээ

Гэмтэл Согог Судлалын Үндэсний Төв нь эрүүл мэндийн тусламж үйлчилгээний төрлөө нэмэгдүүлэн олон улсын дэвшилтэд технологийн шийдэлтэй NIPRO- NCU 18 аппаратыг суурилуулан бөөрний хурц дутмагшлын үеийн гемодиалез эмчилгээг эрчимт эмчилгээний тусламж үйлчилгээндээ шинээр нэвтрүүлж эхэллээ.


Гемодиалез эмчилгээг эмнэлгийн тусламж үйлчилгээнд нэвтэрүүлсэнээр осол гэмтэл, үжлийн халдвар, хордлого болон түлэнхийн өвчний хүндрэлийн улмаас бөөрний дутагдалд орох эрсдэлийг бууруулах боломжтой боллоо. Тус төвийн гемодиалез эмчилгээний багийн хамт олон өнөөдөр түлэнхийн өвчний хүндрэлээс бөөрний хурц дутагдалд орсон анхны үйлчлүүлэгчид гемодиалез эмчилгээг хийж эхэллээ. Эрчимт эмчилгээний клиник бие даасан гемодиалез эмчилгээний тасгийн үйл ажиллагааг Эмчилгээ эрхэлсэн дэд захиарал Р.Гантуяа нээж гемодиалез эмчилгээний тасгийн эмч Ө.Бямбаринчин сувилагч Б.Бурмаа инженер Б.Ариунболд, түлэнхийн эрчимт эмчилгээний эмч Мөнхбаяр болон УГТЭ гемодиалезийн эмчилгээний хамт олонтой хамтран гемодиалез эмчилгээг амжилттай хийлээ. Ингэснээр цаашид тус багийн хамт олон тусламж үйлчилгээний төрлөө нэмэгдүүлж хэвлийн диалез эмчилгээг нэвтрүүлэх зорилготой болж байна.

Гемодиалез эмчилгээний эмч Ө.Бямбаринчин тэрээр хэлэхдээ: Юуны өмнө гемодиалезийн эмчилгээний тасаг байгуулан эрчимт эмчилгээний болон гемодиалезийн эмчилгээний аппарат тоног төхөөрөмжөөр бүрэн тоноглосон тасгийг шинээр байгуулж өгсөн байгууллагын удирдлагууд болон эмнэлгийн хамт олондоо баярлалаа. Түүнчлэн гемодиалезийн эмч болон сувилагч, инженерийг мэргэшүүлсэн багш нартаа баярлалаа. Цаашид манай багийн хамт олон тусламж үйлчилгээний төрлийг нэмэгдүүлж хэвлийн диалез эмчилгээг нэвтрүүлэх боломжтой болоо.


Categories
мэдээ нийгэм

Амралтын өдрүүдэд 45.1 тонн мах борлуулжээ

Сүхбаатар дүүргийн Засаг даргын Тамгын газраас хүн амын хүнсний хангамжид махны хүртээмжийг нэмэгдүүлэх зорилгоор нөөцийн махны худалдааг энэ сарын 8-9-ний өдрөөс эхлэн амралтын өдрүүдэд өргөтгөсөн байдлаар зохион байгуулж байна.

Сүхбаатарын дүүргийн хэмжээнд нөөцийн мах бэлтгэн нийлүүлдэг “Баатрууд тэнгэр”, “Булган мах”, “Тэс шим” ХХК-иудтай хамтран ажиллаж, 45.1 тонн хонины махыг гулуузаар нь худалдан борлуулжээ.

Эх сурвалж: Сүхбаатар дүүргийн ЗДТГ

Categories
мэдээ нийгэм

“Дулааны шугам, сүлжээн дээр газар олгодог асуудлыг цэгцэлнэ” гэв

Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Улаанбаатар дулааны сүлжээ” ТӨХК-ийн хамт олонтой уулзаж, санал солилцлоо.

Уулзалтын эхэнд тус компанийн дарга Г.Баярсайхан өвлийн бэлтгэлээ базааж, зуны засварын ажлуудыг хуваарийн дагуу хийж байгаагаа онцолсон юм. Тэрбээр “Улаанбаатар Дулааны сүлжээ” ТӨХК нь Дулааны цахилгаан II, III, IV станцууд, Амгалан дулааны станцад үйлдвэрлэсэн дулааны эрчим хүчийг өөрийн эзэмшлийн дулааны шугам болон даралт өргөх насосын станцаар дамжуулан Улаанбаатар хотын төвлөрсөн дулаан хангамжийн системд холбогдсон 2838 аж ахуйн нэгжийн хэрэглэгчийг хангаж байна. Мөн улсын болон хувийн орон сууцны конторуудын 12500 орчим барилга, объектын халаалт, халуун ус, салхивчийн дулааны эрчим хүчний хэрэглээг жилийн турш тасралтгүй, найдвартай, хэвийн ханган ажиллаж байна” гэлээ.

Үүний дараа Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Дулаан хангамж бол Улаанбаатар хотын тулгамдаж байгаа асуудал. Энэ асуудалд анхаарал хандуулж Засгийн газар, холбогдох яаманд санал, хүсэлтээ хүргүүлж байгаа. Тиймээс та бүхэнтэй уулзаж, санал бодлоо солилцох гэж ирлээ. Засгийн газрын хуралдаанаар Улаанбаатар хотын тулгамдсан асуудлыг шийдэх түүхэн шийдвэр гаргаж, жил бүр 420 тэрбум төгрөгийг өгөхөөр болсон. Мөн Улаанбаатар хотын хөгжлийг дэмжих Түр хороо УИХ-д байгуулагдаж байгаа. Тиймээс бидэнд хийх ажил их бий. Ирэх жилүүдэд хийх бүтээн байгуулалтын ажлын дулаан хангамжийн эх үүсвэрийг шийдэхэд танай хамт олны үүрэг, оролцоо чухал. Бидэнд мэргэжлийн инженерүүд шаардлагатай байгаа. Том бүтээн байгуулалт хийхэд мэргэжлийн хүмүүсээс бүрдсэн Ажлын хэсэг байгуулна. Метроны төслийн хажуугаар хонгилын системийг хийх судалгаа хийнэ” гэлээ. Мөн Хотын дарга хууль, эрх зүй, засаглал, эдийн засгийн шинэчлэл хийх тухайгаа товч танилцуулсан юм.

Хотын хөгжлийг тэлэх ажлын хүрээнд дулааны шугамын өргөтгөл, газар чөлөөлөлт хамгийн их тулгамдаж байгаа асуудал. Өнөөдрийн байдлаар Улаанбаатар хотын хэмжээнд дулаан хангамжийн эх үүсвэрийг нэмэгдүүлэхэд 358 тэрбум орчим төгрөг, газар чөлөөлөлтөд 600 тэрбум гаруй төгрөг шаардлагатай аж. Тиймээс уг асуудлыг шийдвэрлэхэд хууль, эрх зүйн орчныг тодорхой болгох шаардлагатай байгаа юм. Эрх зүйн чадамжтай болсноор тулгамдсан асуудлаа шийдэж чадна гэдгийг Хотын дарга энэ үеэр онцоллоо. Тэрбээр “Дулаан хангамж нь айл гэрээр бол гал голомт гэж боддог. Тийм учраас Засаг даргын хувьд бүх талаас нь дэмжиж ажиллана” гэлээ.

“Улаанбаатар дулааны сүлжээ” ТӨХК-ийн ажилтнуудын төлөөлөл “Шугам, сүлжээний засварын ажил хийхэд газрын асуудал их гардаг. Иргэд өөрсдийн дураар дулааны шугам, сүлжээн дээр өргөтгөл барьдаг. Эсвэл дулааны шугам дээр газар олгосон тохиолдол их байдаг” гэж ярьж байлаа. Мөн хуучин дулааны шугам, сүлжээ байнга хагарч, эвдэрдэг. Засвар хийх гэхээр зам хаах шаардлагатай болдог. Төрийн байгууллагуудын уялдаа муу байдаг зэрэг саналыг хэлж байсан юм.

Харин Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Дулааны шугамууд дээр газар олгодог асуудлыг цэгцэлнэ. Дахиж ийм асуудал гаргахгүй. Дулааны шугам, сүлжээн дээр олгосон газруудыг хуулийн хүрээнд цуцлах хүртэл арга хэмжээ авна” гэлээ. Мөн үргэлжлүүлэн “Хуульд захирагддаггүй, дураараа дургисан байдал газар авсан. Үүнийг цэгцэлнэ. Нийтийн эзэмшил, дулаан хангамж, ус сувагтай холбоотой газруудыг бид хамгаална” гэв.

Уулзалтын төгсгөлд Хотын дарга дулааны шугам, сүлжээний зуны засварын ажлыг хугацаанд нь хийж, дуусгах үүрэг өглөө.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС

Categories
мэдээ улс-төр

У.Хүрэлсүх “Баялагтаа эзэн Монгол”, С.Эрдэнэ “Дарангуйлалгүй Монгол”, Д.Энхбат “Монгол чадна” гэсэн уриагаар өрсөлдөнө

Монгол Улсын Ерөнхийлөгчийн 2021 оны ээлжит сонгуульд нэр дэвшигчид СЕХ-ноос нэр дэвшигчийн үнэмлэхээ гардан авч, өнөөдрөөс эхлэн сонгуулийн сурталчилгаагаа албан ёсоор эхлүүлэх боломжтой боллоо.

Энэ удаагийн Ерөнхийлөгчийн сонгуульд нэр дэвшигчдийн уриаг танилцуулж байна.

  • МАН-аас нэр дэвшигч У.Хүрэлсүх “Баялагтаа эзэн монгол”
  • АН-аас нэр дэвшигч С.Эрдэнэ “Дарангуйлалгүй Монгол-Ардчилсан Монгол”
  • “Зөв хүн электорат” эвслээс нэр дэвшигч Д.Энхбат “Монгол чадна” уриатай оролцож байна.

У.Хүрэлсүх: Ерөнхийлөгчөөр сонгогдвол ард түмнийхээ эв нэгдлийг нүдний цөцгий мэл хайрлана

Хэрвээ би Монгол Улсын Ерөнхийлөгчөөр сонгогдвол дараах зүйлүүдэд анхаарч ажиллана. Нэгдүгээрт, Хараат бус хяналтын байгууллагын тогтолцоог бий болгоход анхаарна. Хүн засагладаггүй, хууль засагладаг төр улстай болох ёстой гэж үзэж байна.
Хоёрдугаарт, Хүний эрх, эрх чөлөө, ардчилсан тогтолцоо, эрх зүйт төрийг бэхжүүлэх чиглэлд ихээхэн анхаарч ажиллана. Хүний эрх, эрх чөлөөг хадгалсан парламентыг засаглалыг төлөвшүүлэхэд анхаарна. МАН-ын Монгол, Ардчилсан намын Монгол гэж байхгүй. Бид нэгдмэл нэг улс, ахан дүүс.
Би Ерөнхийлөгчөөр сонгогдвол ард түмнийхээ эв нэгдлийг нүдний цөцгий мэт хайрлан хамгаалах болно. Монгол Улсын тусгаар тогтнол, аюулгүй байдал, хөгжил дэвшлийн үндэс нь эв нэгдэл юм. Түүнчлэн байгалийн баялгийн эзэн нь монголчууд байх ёстой. Баялагтаа эзэн монгол байх ёстой. Өнгөрсөн хугацаанд хийж хэрэгжүүлсэн ажлуудын нэг нь хууль бусаар алдагдсан улсын үйлдвэрийн газрууд, орд газруудыг төрд авах явдал байлаа. Байгалийн баялаг гэдэг бол хэн нэгэн хүний хийсэн бүтээл биш, бурхны хишиг. Монголын иргэн бүр байгалийн баялгийг ижил тэгш хүртэх ёстой. Тиймээс төрийн тэргүүн хүний хувьд энэ чиглэлд анхаарч ажиллах ёстой гэж бодож байна.

Д.Энхбат: Нам бус, мэдлэг боловсролтой хүмүүсээр багаа бүрдүүлнэ

Энэ сонгуулиар Монгол Улсынхаа ардчиллыг хөгжүүлэх, нийгэм, эдийн засгийг улам төгөлдөршүүлэх, иргэдийнхээ амьжиргааг дээшлүүлэхийн төлөө, шударга ёсны төлөө, авлигатай тэмцэхийн төлөө, монгол хүн бүр улсын хөгжилд идэвхтэй оролцуулахын төлөө сонгуульд оролцож байна. Монгол Улс маань их сонголтын өмнө ирж байна. Бид 30 жилийн ардчиллыг ардаа үлдээлээ. Харин ирэх 30 жилд ямар байх вэ, дэлхийн дээр ямар байр суурь эзлэх вэ, залуучууд хүүхдүүддээ ямар өв үлдээх вэ гэсэн шинэ сонголтын өмнө ирж байна. Дэлхийн ертөнц ч өөрчлөгдөж байна. Өнөөдөр Монгол Улс туулсан замаа эргэж хараад шинэ үедээ итгэж, мэдлэг, ур чадвар, технологид итгэж, XXI зууны шинэ Монгол Улсыг байгуулахын төлөө ажиллах болж байна. Үндсэн хуульд заасны дагуу Ерөнхийлөгч өөрийн тодорхой үүрэгтэй. Монголын төрийн нэгдмэл байдлыг хангаж, гурван салаа мөчрийн уялдааг хангаж, гадаад бодлогын тулгуурыг залгамжлан өвлөж, ард түмнийхээ төлөө зүтгэхээр сэтгэл шулуудаад байна. Сонгуулиар бид шударгаар, нээлттэйгээр, аль болох олон хүнд хүрч ажиллахыг хичээх болно. Манай сонгогчид өөрсдийнхөө мэргэн сонголтыг хийнэ байх. Бид монголчууд шинэ замаар, шинэ мөрөөдлөөр явахыг хүсэж байгаа гэдэгт гүнээ итгэж байна. Тийм учраас нам бус, инженер миний биеийг энэ эвслээс олон нийтийн санал асуулгаар тодруулсан билээ. Хэрэв Ерөнхийлөгчөөр сонгогдвол нам бус, мэдлэг боловсрол өндөртэй хүмүүсээр шинэ баг бүрдүүлэн ажиллах болно. Энэ баг маань нэг намын бус Монголын баг байх болно. Бид “Монголчууд чадна” гэсэн уриатай оролцож байгаа. Бидний зорилт бол нэг намын төлөө бус нийт олны төлөө байгаа.

С.Эрдэнэ: Миний нэн тэргүүний зорилго айдасгүй амьдралыг бий болгох

Би асар том үүрэг хариуцлага хүлээж байгаагаа гүнээ ухамсарлаж байна. Монголын ард түмний эрх, эрх чөлөөний төлөө өөрт байгаа бүхий л хүч чадлаа дайлчлан ялах болно. Бид энэ удаагийн Ерөнхийлөгчийн сонгуульд ялж чадахгүйд хүрвэл сүүлийн чөлөөт сонгууль болно гэдэгт сэтгэл эмзэглэж байна. Энэ бол аль намыг, аль нэр дэвшигчийг сонгох сонгууль биш. Харин ирээдүйн гурван салаа замын альнаар нь амьдрахаа сонгох сонгууль юм. Та бүхэн ямар төрлийн гурван амьдралаар амьдрахаа сонгоорой. 1992 оноос хойш Монголын ардчилал устан үгүй болоход ойртлоо. Миний нэн тэргүүний зорилго айдасгүй амьдралыг авч ирэх. Ковидизмыг нураан унагах болно. Ковид бус ковидизмыг эмчлэх цаг ирлээ. Вакцин бол эрх чөлөө юм. МАН-аас нэр дэвшигч ковидизмыг дэмжигч этгээд биш харин үүсгэн бий болгосон хүн нь. Ковидоор далдалж, иргэдийн амьдрах, үгээ хэлэх, бизнес эрхлэх эрхийг хааж, өөртөө хүч хуримтлуулсан хүн. Сөрөг хүчингүй үед эрх баригч нам дураараа авирлах болно. Монгол Улс хэзээний эдийн засгийн хямралд ороод байна.

Categories
мэдээ нийгэм

ААН байгууллагууд дархлаажсан иргэнийг таньж, нэвтрүүлэх заавар

Аж, ахуй нэгж байгууллагууд дархлаажсан иргэнийг хэрхэн таньж, нэвтрүүлэх талаарх зааврыг хүргэж байна.

-Иргэн вакцины гэрчилгээгээ биедээ эсвэл гар утсандаа авч яваа тохиолдолд аж, ахуй нэгж байгууллагууд дурын QR SCANNER-аар вакцины гэрчилгээний доод буланд байрлах QR уншуулна.

– Харин иргэн иргэний үнэмлэх эсвэл вакцины цахим батламж буюу / вакцины QR / биедээ авч яваа бол COVID 19 QR VERIFY аппликейшныг үйлчилгээний байгууллагын ажилтан гар утсандаа суулгаж, үйлчлүүлэгчээ таньж нэвтрүүлнэ.

iOS үйлдлийн системтэй гар утсанд татах линк: http://bitly.ws/dwEb

Android үйлдлийн системтэй гар утсанд одоогоор тус аппликейшн нь ороогүй байгаа гэдгийг анхаараарай.

Categories
мэдээ онцлох-нийтлэл туслах-ангилал эдийн-засаг

Газрын тосны эрэлт нэмэгджээ

Саудын Араб, ОХУ-ын зүгээс газрын тосны нийлүүлэлтийг ирэх гурван сард нэг өдрийн 2 сая баррелиар нэмэгдүүлэх санаачлага гаргасныг OPEC нэгдлийн гишүүд дэмжээд байна.

Түүнчлэн, газрын тосны нэг өдрийн эрэлт 6 сая баррель хүрч өсөх төсөөлөлтэй байгаа тухай OPEC мэдээлэв.

Энэтхэг, Бразил зэрэг зарим улс оронд цар тахлын дэгдэлт нэмэгдэж буй хэдий ч дэлхийн эдийн засгийн өсөлт сэргэж байгаа тул газрын тосны эрэлт нэмэгдэх эерэг хүлээлттэй байгааг мэдэгдээд байна. Мөн өнгөрсөн онд буураад байсан газрын тосны эрэлт энэ оны 2-р улирлын эцэст хэвийн түвшинд шилжинэ гэж үзжээ.

Цар тахлаас шалтгаалан OPEC-ийн улс орнууд газрын тосны нийлүүлэлтийг аажмаар, болгоомжтой нэмэгдүүлэх стратеги барина хэмээн нарийн бичгийн дарга Мохаммад Баркиндо хэлжээ.

Categories
мэдээ утга-зоxиол

“Илиада” туулийг монгол хэлээр унших боломжтой боллоо

Эртний Грекийн уран зохиолын гурван оргилын нэг болох Илиада их хөлгөн туулийг анх удаа бүрэн эхээр нь монгол хэлээр орчуулан уншигч олны сонорыг мялаахад бэлэн болжээ.

Өрнийн уран зохиолын анхдагч бүтээлүүдэд зүй ёсоор тооцогддог сохор туульч Хомэрын Илиада, Одиссэй зэрэг их хөлгөн туульсыг өмнө нь монгол хэлнээ тууль хэлбэрээр нь бүрэн төгс орчуулсан удаагүй бөгөөд МУСГЗ Д.Цахилгаан уншигч түмнийг яруу тансаг орчуулгаараа хүргэж байна.
Зохиолын тухайд Тройн дайны арав дахь буюу сүүлийн жилийн 51 өдрийн үйл явдлыг нийт 24 дуулал, 15,693 бадгаар өгүүлнэ. Тройн дайны тухай гэхээсээ илүүтэй Ахиллын уур хилэн, түүний учир шалтгаан, уг хэлбэр, уршигт үр дагаврын тухай өгүүлэх уг тууль хүмүүний сэтгэл хөдлөл хэмээх хөндөхөд хялбар ч давж гарахад бэрх зүйлийн талаар өгүүлсэн тул туурвисан цагаас 2700 жилийн дараа ч уншигчдад хүртээмжтэй, ойлгомжтой хэвээр ажээ.
Дэлхийн уран зохиолын төрөл зүйл бүрд өнөөг хүртэл онцгой байр суурь эзэлж, тоолж барамгүй олон зохиолчийн цаашдын бүтээл туурвилд нь сэдэл болсон Илиада туулиас хүн төрөлхтний хүсэл тэмүүллийг олж харах нь дамжиггүй. Түүнчлэн 2020 онд Монсудар хэвлэлийн газраас Одиссэй туулийг монгол хэлээр орчуулан уншигчдын хүртээл болгосон билээ.

Эх сурвалж: Монсудар

Categories
мэдээ улс-төр

АН-ын бүлэг Цэцийн дүгнэлтийг хэлэлцэв

УИХ дахь Ардчилсан намын бүлэг өнөөдөр /2021.05.24/ ээлжит хуралдаанаараа Үндсэн хуулийн Цэцийн 2021 оны 05 дугаар дүгнэлт болон бусад асуудлыг хэлэлцжээ.

Монгол Улсын иргэн Т.Сумъяабазар, Л.Эрдэнэхүү нар Үндсэн хуулийн Цэцэд хандан гомдол гаргасныг Цэцийн дунд суудлын хуралдаанаар хэлэлцжээ. Дээрх хоёр иргэн Төрийн болон албаны нууцын тухай хуулийн зарим зохицуулалт Үндсэн хууль зөрчсөн гэж үзэж байгаа юм. Тус хуульд “Албаны нууцад хамаарах мэдээллийн жагсаалтыг тухайн хариуцсан байгууллага боловсруулж, асуудал эрхэлсэн Засгийн газрын гишүүн, байгууллагын даргын шийдвэрээр батална” гэж хуульчилсан. Гэвч Үндсэн хуульд “Хүний эрх, нэр төр, алдар хүнд, улсыг батлан хамгаалах, Үндэсний аюулгүй байдал, нийгмийн хэв журмыг хангах зорилгоор задруулж үл болох байгууллага хувь хүний нууцыг хуулиар тогтоон хамгаална. Нууцад хамаарахгүй асуудлаар мэдээлэл хайх, хүлээн авах эрхтэй” гэж заасан.

Тиймээс Төрийн болон албаны нууцын тухай хуулийн дээрх зохицуулалт Үндсэн хууль зөрчиж байна гэж тэд үзсэн байна. Цэц энэхүү гомдлыг хэлэлцээд Үндсэн хууль зөрчөөгүй гэж дүгнэжээ. Үүндсэн хуулийн Цэцийн дүгнэлттэй холбоотойгоор гишүүд өөр өөрсдийн байр сууриа илэрхийлэв. Зарим гишүүний хувьд, төрийн байгууллагууд энэ хуулийн хүрээнд, хууль бус асуудлаа төрийн болон албаны нууц болгон далдалдаг учраас Үндсэн хуультай зөрчилдөж байгаа гэсэн байр суурийг илэрхийлэв. Мөн Бүлгийн өнөөдрийн хуралдаанаар улс төрийн болон цаг үеийн асуудлыг хэлэлцсэн байна.