Month: May 2021

Монгол Улсын Ерөнхийлөгч Х.Баттулга зарлиг гаргаж, Мобиком Корпорацийн ТУЗ-ийн гишүүн, Ерөнхий захирал Тацуяа Хамадаг өнөөдөр Алтан гадас одонгоор шагналаа. Түүний харилцаа холбооны салбар, нийгэм, эдийн засгийн хөгжилд оруулсан хувь нэмрийг нь үнэлж ийнхүү төрийн дээд шагнал олгожээ.

Мобиком Корпорацийн ТУЗ-ийн гишүүн, Ерөнхий захирал Тацуяа Хамадагаас сэтгэгдлийг нь сонсоход:

“Би Монгол Улсад 2016 оноос хойш тав дахь жилдээ ажиллаж байна. Монголын харилцаа холбооны салбарт, Мобикомд оруулсан хувь нэмрийг маань үнэлж энэ нэр хүндтэй шагналыг надад гардууллаа. Гэхдээ энэ бол зөвхөн миний хөдөлмөрийг үнэлж байгаа хэрэг биш. Мобикомын бүх ажилтны хүчин чармайлтын үр дүнд бий болсон бидний амжилтыг үнэлж буй хэрэг юм. Хүн бүрийн хүчин чармайлтын ачаар Ерөнхийлөгчөөс нэр хүндтэй шагнал хүртсэндээ маш их баяртай байна.

Шагнал хүртэх мөчид салбартаа болон нийгмийн хөгжилд оруулах хувь нэмрээ улам батжуулна гэж бодон зогслоо. Мэдээж энэ бүхнийг би ганцаараа хийж хүчрэхгүй. Надтай хамт Мобиком групп болон Монгол Контент ХХК гэсэн баг ажиллаж байгаа учраас цаашдаа илүү их хувь нэмэр оруулж, хүчин чармайлт гаргах болно гэж амлаж байна. Энэ үйл явдал зөвхөн миний бизнесийн замнал төдийгүй амьдралд маань тохиолдсон маш том үйл явдал боллоо. Үнэхээр нэр хүндийн хэрэг байлаа” гэв.

Маргааш буюу тавдугаар сарын 26-нд Бурхан багшийн Их дүйчэн өдөр тохиож буй тул бүх нийтээр амарна. НИТХ-ын тогтоолд автомашины дугаарын хязгаарлалт амралтын өдрүүд болон бүх нийтээр тэмдэглэх баярын өдрүүдэд үйлчлэхгүй хэмээн заасан байдаг. Иймд маргааш дугаарын хязгаарлалт үйлчлэхгүй юм.

УИХ-ын 2019 оны 12 дугаар сарын 23-ны өдрийн хуралдаанаар “Нийтээр тэмдэглэх баярын болон тэмдэглэлт өдрүүдийн тухай хууль”-д өөрчлөлт оруулсан. Улмаар Бурхан багшийн Их дүйчин өдөр буюу зуны тэргүүн сарын шинийн 15-ныг баярын өдөр, бүх нийтийн амралтын өдөр болгосон юм.

Энэ өдрийг Гандантэгчэнлин Хийд “Энэрлээр нэгдэж, эвээр бүтээе” уриан дор тэмдэглэн өнгөрүүлэхээр үйл ажиллагааг зохион байгуулж буй аж.

Улсын хэмжээнд 2021 оны тавдугаар сарын 25-н буюу өнөөдрийн байдлаар нийт 1.176.167 тээврийн хэрэгсэл бүртгэлтэй байна.

Үүнээс:

• Дизель хөдөлгүүртэй тээврийн хэрэгсэл – 300.266
• Бензин хөдөлгүүртэй тээврийн хэрэгсэл -513.646
• Хийн хөдөлгүүртэй тээврийн хэрэгсэл – 240.079
• Цахилгаан хөдөлгүүртэй тээврийн хэрэгсэл – 387
• Хосолсон /HYBRID/ хөдөлгүүртэй тээврийн хэрэгсэл – 260.388 байгаа юм.

Түүнчлэн баруун гар талдаа буюу буруу талдаа жолооны хүрдтэй 590.799 тээврийн хэрэгсэл бүртгэлтэй бол зүүн гар талдаа буюу зөв талдаа жолооны хүрдтэй 447.549 тээврийн хэрэгсэл бүртгэлтэй байна.

Дээрх тээврийн хэрэгсэл эзэмшигчдийг УОК-ын гаргасан шийдвэрийн дагуу халдвар хамгааллын дэглэмийг чанд сахихыг Авто тээврийн үндэсний төвөөс мэдээллээ.

Сүүлийн жилүүдэд иргэд явган аялалд идэвхтэй хамрагддаг болсон. Энэ ч утгаараа Богдхан уул руу алхах иргэдийн тоо өдрөөс өдөрт нэмэгдэж байна. Нийслэлийн Засаг дарга бөгөөд Улаанбаатар хотын Захирагч Д.Сумъяабазар өнгөрсөн сард иргэд хамгийн ихээр зорин очдог Богдхан уулын Баруун ширээт, Дугуй цагаан руу алхдаг хэсэгт ажиллаж, энэ хэсгийн тохижилтын ажлыг төр, хувийн хэвшлийн түншлэлийн хүрээнд өнгө үзэмж, чанартай гүйцэтгэхийг холбогдох байгууллагуудад үүрэг болгосон.

Нийслэлийн Засаг даргын 2021 оны тавдугаар сарын 18-ны А/370 дугаар захирамжаар байгуулагдсан Ажлын хэсэг өнөөдөр хуралдаж, Богдхан уулын “Авто зогсоол-Дугуй цагаан” чиглэлийн явган аяллын замыг тохижуулах асуудлыг хэлэлцлээ. Хурлыг Нийслэлийн Засаг даргын орлогч Ж.Сандагсүрэн ахалсан бөгөөд Хот байгуулалт, хөгжлийн газар, Нийслэлийн байгаль орчны газар, Нийслэлийн аялал жуулчлалын газар, Хотын стандарт, орчны аюулгүй байдлын хяналт, зохицуулалтын газар, Богдхан уулын дархан цаазат газрын хамгаалалтын захиргаа, “Төгс хандлагаа өөрчилье” ТББ болон бусад холбогдох газрын төлөөлөл оролцсон юм.

Богдхан уулын Баруун ширээт, Зүүн ширээт рүү гарах замд нийт 11 амралтын цэг байгуулахаар, Дугуй цагаан буюу амралтын талбайг тохижуулахаар төлөвлөөд байгаа. Тэгвэл энэ ажилд “Төгс хандлагаа өөрчилье” ТББ хамтран ажиллаж байна. Тэд нийт таван га газарт тохижилт хийхээр төлөвлөж, иргэд амрах хэсэг, хүүхдийн тоглоомын талбай, хогийн цэг, нийтийн бие засах газар, явган зам, гэрэлтүүлэг зэрэг 19 төрлийн ажлын саналаа танилцуулсан. “Төгс хандлагаа өөрчилье” ТББ хоёр га газарт 4000 шинэс, нарс мод тарих ажлыг эхлүүлсэн бөгөөд маргааш буюу тавдугаар сарын 26-нд 20 аж ахуйн нэгж, 1800 иргэн мод тарих ажилд нэгдэхээр болжээ.

Нийслэлийн Ерөнхий архитектор бөгөөд Хот байгуулалт, хөгжлийн газрын дарга Ц.Тулга “Тохижилтын ажлын хүрээнд явган замыг байгалийн материал ашиглаж чулуу, модоор хийнэ. Горхи урсдаг учраас ус уух цэгүүд байгуулна” гэсэн бол Богдхан уулын дархан цаазат газрын хамгаалалтын захиргааны мэргэжилтэн Г.Ганзориг “Нийтийн бие засах газрыг Улсын комисс хүлээж авсан. Хувийн аж ахуйн нэгжтэй гэрээлэн ажиллуулна. Мөн хог ачилтыг долоо хоногт хоёр удаа хийхээр төлөвлөж байна” гэлээ.

Нийслэлийн Засаг даргын орлогч Ж.Сандагсүрэн “Зөвхөн Дугуй цагаан гэлтгүй Зүүн ширээт, Цэцээ гүн зэрэг явган алхалт хийхэд тохиромжтой шинэ маршрутыг судлах хэрэгтэй. Нийтийн эзэмшлийн талбайн иргэдэд зориулсан амралт, зугаалгын тохижилтын ажилд санаачилгаараа оролцож байгаа залуус, төрийн бус байгууллагын үйл ажиллагааг дэмжиж ажиллана” гэлээ.

Хөгжлийн бэрхшээлтэй хүний эрхийг хангах нийслэлийн салбар зөвлөл цахимаар хуралдаж, Нийслэлийн Засаг даргын орлогч Ж.Сандагсүрэн холбогдох байгууллагуудад үүрэг өглөө.

Тэрбээр төр, хувийн хэвшил, аж ахуйн нэгжүүд хөгжлийн бэрхшээлтэй иргэний үйлчилгээ авах боломж, нөхцөлийг нэмж, байгууллагын орц, гарц, мэдээллийн самбар, стандартын ариун цэврийн өрөө бий болгож, угтах үйлчилгээнд дохионы хэлмэрч орчуулагч ажиллуулах хэрэгтэйг онцолсон юм. Мөн бүтээн байгуулалтад хөгжлийн бэрхшээлтэй хүний хүртээмж, тэдний эрхийг хангах, төрийн үйлчилгээг хурдан, шуурхай авах боломжийг нэмэгдүүлэхэд нутгийн захиргааны байгууллага санаачилгатай ажиллах хэрэгтэй гэв.

Хөдөлмөрийн тухай хуулльд 25 болон түүнээс дээш ажилтантай аж ахуйн нэгж, байгууллага нь ажил, албан тушаалынхаа дөрөв, түүнээс дээш хувийн орон тоонд хөгжлийн бэрхшээлтэй буюу одой хүнийг ажиллуулна гэж заасан байдаг. Энэ дагуу байгууллага бүр бүтэц, орон тооны хязгаартаа багтаан, шинээр орон тоо нэмэхгүйгээр хөгжлийн бэрхшээлтэй иргэнийг ажиллуулах, энэ талаарх мэдээллээ нэгтгэж, эргэн мэдээлэхийг салбар зөвлөлийн гишүүдэд үүрэг болголоо.

Хөгжлийн бэрхшээлтэй иргэд нийтийн тээврийн парк шинэчлэлийн ажлын хэсэгт орох, хөгжлийн бэрхшээлтэй иргэдийг түрээслээд өмчлөх орон сууцанд хамруулах квотыг нэмэх зэрэг хүсэлт гаргажээ.

Нийслэлийн лавлагаа, мэдээллийн 1800-1200 тусгай дугаар нь иргэдэд 24 цагийн турш мэдээлэл өгч, шуурхай үйлчилгээ үзүүлэн ажиллаж байна. Өчигдөр буюу тавдугаар сарын 24-нд тус дугаарт иргэдээс нийт 391 дуудлага ирлээ. Нийт дуудлагын хүлээлгийн дундаж хугацаа 18 секунд, иргэнтэй ярьсан дундаж хугацаа 1.42 минут байна. Мөн “Нийслэлийн мэдээ” фэйсбүүк хуудасны чатботод нийт 17 иргэн хандсанаас таван иргэн автомат хариулагчаас мэдээлэл авч, 12 иргэнтэй оператор ажилтан холбогдож, иргэний асуултад мэдээлэл өгч ажиллалаа.

Өнөөдөр Улаанбаатар хотод 57 суурин цэгт, гурван явуулын дархлаажуулалтаар 123 багийн 807 эмч, ажилтан ажиллаж, 26606 иргэнийг дархлаажуулахаар төлөвлөөд байна. Маргааш бүх нийтийн амралтын өдөр хэдий ч дархлаажуулалтын болон PCR шинжилгээний цэгүүд хэвийн ажиллах юм. Тодруулбал, дархлаажуулалтын цэгүүд 09:00-17:00, PCR шинжилгээний зургаан цэг 09:00-12:00 цагийн хооронд ажиллана. Нийслэлийн төвийн зургаан дүүрэгт суурин гурав, явуулын гурван шинжилгээний цэг ажиллана. Үүнд:

1. Баянгол дүүрэг-96 дугаар цэцэрлэг
2. Сүхбаатар дүүрэг- 143 дугаар цэцэрлэг
3. Чингэлтэй дүүрэг-74 дүгээр цэцэрлэг
4. Баянзүрх дүүрэг- “Тэнгэр” худалдааны төвийн гадна талбай
5. Сонгинохайрхан дүүрэг- Таван шарын төмөр замын гармын ард байрлах “Номин” агуулах худалдааны гадна талбай
6. Хан-Уул дүүрэг- Буянт-Ухаа спорт цогцолборын гадна талбай.