Цагдаагийн байгууллагад 2021 оны тавдугаар сарын 7-ны өдөр ирсэн дуудлага, мэдээлэллийг хүргэж байна.
Тодруулбал цагдаагийн ерөнхий газрын 102 дугаарт өчигдөр иргэдээс нийт 1045 гомдол иржээ. Мөн зөрчлийн 966, гэмт хэргийн шинжтэй 35, хулгайн 9, гэр бүлийн хүчирхийлэл 92, согтуугаар жолоо барьсан 41, эрүүлжүүлсэн 139, хүний биед халдсан 42, архидан согтуурсан 50- н дуудлага тус тус иржээ.
Ерөнхий сайд Л.Оюун-Эрдэнэ өнөөдөр Өмнөговь аймгийн Гашуунсухайт боомтод ажиллаа. Тус боомт нь Монгол Улсын экспортын гол цэг юм. Өнөөдрийн байдлаар барааны ес, нүүрсний 49, баяжмалын 16 буюу нийт 74 жолооч тээврийн хэрэгсэлтэй хил гарч байна. Дөрөвдүгээр сарын 30-ны өдрөөс тус боомтын үйл ажиллагаа хаагдсан байсан бөгөөд өнөөдрөөс тээвэр хэвийн явагдаж эхэлжээ.
Мөн тус боомтод дархлаажуулалт 2021 оны гуравдугаар сарын 18-нд эхэлж, богинын тээврийн жолооч, хил гаалийн ажилтан, суурьшлын бүсийн иргэд, багийн хүн амыг вакцинд хамруулж буй юм. Өнөөдрийн байдлаар нийт 40023 хүн вакцины нэгдүгээр тун, 12177 хүн хоёрдугаар тундаа хамрагджээ.
Гашуунсухайт боомтод Дотоодын цэргийн ангийн 50 цэрэг урт, богинын тээврийг тусгаарлах, хамгаалалтын ажилд тавдугаар сарын 4-ний өдрөөс үүрэг гүйцэтгэж эхэлсэн байна.
Ерөнхий сайд Л.Оюун-Эрдэнийн хилийн боомтуудад хийж буй томилолт үргэлжилж буй бөгөөд тэрбээр ажлын хэсгийн хамт “Эрдэнэс Тавантолгой”-д үргэлжлүүлэн ажиллах ажээ.
Улсын хэмжээнд өнгөрсөн 24 цагт 108 мянга 838 хүн коронавирусний дархлаажуулалтад хамрагджээ.
Ингэснээр улсны хэмжээнд 1 сая 476 мянга 776 хүн нэгдүгээр тунг, 610 мянга 74 хүн хоёрдугаар тунг хийлгэжээ.Тодруулбал, Улаанбаатар хотод 879 мянга 998 хүн нэгдүгээр тунд хамрагдсан байна. Үүнээс 470 мянга нь хоёрдугаар тунг хийлгэжээ. Харин орон нутагт 596 мянга 781 хүн нэг, 139 мянга 526 хүн хоёрдугаар тунг хийлгэжээ.
Ташрамд дурдахад, 18-аас дээш насны Монгол Улсад 2 сая 60 мянган иргэнийг коронавирусний вакцинд хамруулахаар төлөвлөж буй юм.
Монголын эмэгтэй чөлөөт бөхийн тамирчид түүхэнд байгаагүй амжилт үзүүлж, ирэх зуны Токиогийн олимпийн наадамд бүрэн багаараа буюу зургаан жинд бүгдэд нь оролцохоор боллоо.
Тодруулбал, Токио-2020 зуны олимпийн эрх олгох дэлхийн тэмцээний хоёр дахь өдрийн барилдаанууд өчигдөр явагдлсан юм. Хоёр дахь өдөр МУГТ Э.Бэхбаяр 57 кг-sн жинд алтан медалийн төлөө Японы Юки Такахашитай барилдаж, 0-1 гэсэн харьцаатайгаар ялагдаж, мөнгөн медалийн эзэн болсон ч гол зорилгоо биелүүлж, олимпийн эрхээ авч чадсан юм.
Мөн эмэгтэйчүүдийн 62 кг-ын жинд ОУХМ Х.Болортуяа хагас шигшээд Беларусийн Вероника Ивановатай учраа тааран, 1:9 гэсэн харьцаатайгаар хожигдож яваад гайхалтай эргэн ирэлт хийж, өрсөлдөгчөө цэвэр даран, Монголын олимпийн эрхийг нэгээр нэмсэн билээ.
Дөрөвдүгээр сард Нийслэлийн Засаг дарга бөгөөд Улаанбаатар хотын захирагч Д.Сумъяабазар болон холбогдох албаныхан иргэдийн ихээр зорчдог Богдхан уулын аяллын маршруттай танилцаж, тохижилт, бүтээн байгуулалтын ажил хийх үүрэг өгсөн юм. Энэ дагуу энэ сарын 7-нд болсон Засаг даргын зөвлөлийн хурлаар Зайсан-Богдхан уул чиглэлийн аяллын маршрутыг есөн байршилд тохижуулах ажлын танилцуулгыг хийлээ.
Зайсан-Дугуй цагаан-Баруун ширээт чиглэлд амралтын өдрүүдэд зуны улиралд 3000-4000 иргэн, өвлийн улиралд 1000-2000 иргэн ууланд тогтмол алхдаг гэсэн тоон үзүүлэлт байдаг аж.
Тиймээс Улаанбаатар хотын иргэд, оршин суугчдын эрүүл, аюулгүй орчинд амьдрах нөхцөлийг бүрдүүлэх, нийтийн биеийн тамир, уулын явган алхалтыг дэмжих, тусгай хамгаалалттай газар нутгийн байгалийн унаган төрх алдагдахаас хамгаалах, зөв боловсон эко аяллыг цогцоор нь хөгжүүлж, Богд хан эко парк бий болгохоор зорьж буй аж.
Одоо байгаа явган зам нь хөлийн явдлаар хад чулуу нь ил гарсан, бороо, цасны шавар болон байнгын сүүдэртэй хэсгүүдэд мөстөж гулгаа үүссэн эрсдэлүүд өндөр байгаа учраас тодорхой хэсгүүдэд эрсдэлийг бууруулах хүрээнд байгалийн материалыг ашиглан хэсэгчилсэн засвар хийх юм байна.
Мөн ууланд алхагчдад чухал хэрэгцээтэй зүйлийн нэг нь ус бөгөөд тодорхой төвлөрсөн цэгүүдэд ус уух цэгүүдийг төлөвлөх шаардлагатай байгаа гэлээ. Түүнчлэн иргэдийн амрах цэгүүдийг шинэчилж, өндөрлөг цэгт хот болон байгалийн үзэгдэх орчныг харах боломжийг бүрдүүлэх юм байна.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Богдхан уулын аяллын маршрутыг тохижуулах ажлыг чанарын өндөр түвшинд хийх хэрэгтэй”-г анхааруулаад олон улсын стандарт, Хот, тосгоны төлөвлөлт, барилгажилтын норм ба дүрмийг баримтлан тохижилтын ажлаа хийх ёстой гэлээ. Мөн урин дулааны улирал эхэлж буйтай холбогдуулан тохижилтын ажлаа шуурхай хийхийг үүрэг болгов.
Өнөөдөр буюу тавдугаар сарын 8-ны өдөр “дэлхийн хүмүүнлэгийн өдөр” тохиож байна. Энэ өдөр дэлхий нийтийг цочроож буй коронавируст халдварын цар тахлаас урьдчилан сэргийлэх, хариу арга хэмжээ авах чиглэлээр дэлхийн өнцөг булан бүрт Олон Улсын Улаан Загалмайн, Улаан хавирган сар хөдөлгөөний “ЗОГСОЛТГҮЙ” ажиллаж байгаа ажилтан, сайн дурын идэвхтэн, гишүүд, дэмжигчдэдээ талархал илэрхийлж, хүмүүнлэгийн үйл ажиллагааг олон нийтэд хүргэдэг уламжлалтай. Монголын улаан загалмай нийгэмлэг коронавируст халдварын цар тахалтай тэмцэх үйл ажиллагаанд төрдөө нэмэлт хүч болж ажиллах үүргээ биелүүлж, 21 аймаг, 9 дүүргийн улаан загалмайн ажилтан, албан хаагчид зогсолтгүй ажилласаар байна. МУЗН-ийн сүүлийн 1 жилийн хугацаанд хийсэн томоохон ажлыг товч дурдвал.
Ардчилсан намын төв байрны гадна тус намаас тайван жагсаал, сануулах цуглаан зохион байгууллаа. Тодруулбал, М.Тулгат даргатай АН-ын удирдлага, гишүүд дэмжигчид УИХ-ын гишүүд өлсгөлөн зарласантай холбоотойгоор тайван жагсаал хийсэн юм.
Тус намаас “Хууль дээдлэх ёсыг уландаа гишгэж, Төрийн болон шүүхийн байгууллагуудын ажилд илт нөлөөлөхөөр улаан цайм тохиролцож буй бусармаг хуйвалдааныг эсэргүүцэж, нийслэлийн АН-ын гишүүд цуглан, эв санааны нэгдлээ илэрхийлж байна” гэв.
Энэ үеэр Ардчилсан намын дарга асан С.Эрдэнэ Ардчилсан намын гишүүд өнөөдөр (2021.05.08) сануулах цуглаан зохион байгуулж буйг хэлээд, шаардлагатай тохиолдолд эсэргүүцлийн хөдөлгөөн өрнүүлж, жагсаал цуглаан хийж тэмцэхээ хариуцлагатайгаар мэдэгдэв.
Өнөөдөр коронавирусийн цаг үеийн мэдээгээр вакцины эсрэг заалттай хүмүүсийг эрүүл мэндийн үзлэгт хамруулж, вакцин хийх гурван түр цэг байгуулсныг ЭМЯ мэдээлсэн.
ЭМЯ-ны Хэвлэлийн төлөөлөгч Б.Ууганбаяр, “Архаг суурь өвчинтэй эсхүл бусад өвчний улмаас вакцинаа хийлгэж чадаагүй, харшилтай, нарийн мэргэжлийн эмчээс зөвлөгөө авах шаардлагатай гэсэн хүмүүсийг өнөөдрөөс ” Улсын нэг, хоёр, гуравдугаар төв эмнэлэгт” байгуулсан түр цэгт үзлэгт хамруулна. Түр цэгт нарийн мэргэжлийн эмч нар иргэдийг үзээд, шаардлагатай эрүүл мэндийн үйлчилгээг хүргэж, вакцинд хамруулахыг мэдэгдсэн.
Аугаа Эх орны дайны Ялалтын 76 жилийн ойд зориулсан цэргийн ёслолын жагсаалд Монгол Улсын Зэвсэгт хүчний цэргийн алба хаагчид анх удаа оролцох гэж байна.
Энэ тухай Дорнод цэргийн тойргийн олон улсын цэргийн хамтын ажиллагааны газрын дарга, хурандаа Иван Тараев мэдэгдэв.
Монголын цэргийн төлөөлөгчид Улаан-Үд хотод хүрэлцэн ирж, Ялалтын баярын парадын нэгдсэн бэлтгэлд оролцжээ.
Тавдугаар сарын 9-ний өдөр ОХУ-ын Буриад улсын нийслэлд болох цэргийн парадад Агаарын довтолгооноос хамгаалах хүчин, хууль сахиулах байгууллагууд, цэрэг-эх орончдын хөдөлгөөнүүдийн 1500 гаруй хүн, 50 гаруй нэгж техник хэрэгсэл оролцох аж.
Цэргийн парад олон зориулалттай Су-30СМ сөнөөгч онгоцууд болон Су-25 «Грач» дайрагч онгоцуудын үзүүлэх нислэгээр өндөрлөнө.
ОХУ, Монгол Улсын хооронд дипломат харилцаа тогтоосны 100 жилийн ой энэ онд тохиож байгаа билээ. Мөн Монгол Улсын Зэвсэгт хүчин үүсэн байгуулагдсаны 100 жилийн ойг энэ онд тэмдэглэнэ.
Тавдугаар сарын 10-наас тээврийн хэрэгслийн хөдөлгөөнийг энгийн горимд шилжүүлэх өөрчлөлт орсон болохыг УОК-ын Шуурхай штабаас мэдээллээ. Өөрөөр хэлбэл зөвхөн амралтын хоёр өдөр улсын дугаарын тэгш, сондгойгоор замын хөдөлгөөнд оролцуулахаар болсон байна.
Харин Даваа гаригаас тээврийн хэрэгслийг энгийн горимоор хөдөлгөөнд оролцуулах шийдвэр гарчээ.
УОК-ын шийдвэрийн дагуу өнөөдрөөс Бүх нийтийн бэлэн байдлын зэргийг бууруулж, өндөржүүлсэн бэлэн байдлын зэрэг буюу “Улбар шар” түвшинд шилжүүлээд байгаа билээ.
Үүнтэй холбогдуулан Нийслэлийн Засаг даргын А 357 дугаар захирамж гарч үйл ажиллагааг нь хязгаарлахгүй төрийн байгууллага, хүн, хуулийн этгээдийн ажилтан, албан хаагчдын хувийн болон албаны тээврийн хэрэгслийг улсын дугаарын сүүлийн орон тэгш, сондгой тоогоор төгссөнөөр хуанлийн өдрөөр (хүнс, эмнэлгийн тусламж үйлчилгээ, буяны үйлчилгээ, инженерийн байгууламж хот нийтийн аж ахуйн ажил, хэвлэл мэдээлэл, тусгай зориулалтын техник хэрэгслээс бусад) 06:00-22:00 цагт замын хөдөлгөөнд оролцуулах болсон.
Тэгвэл энэхүү хязгаарлалт нь өнөөдөр, маргааш буюу хагас, бүтэн сайн өдрүүдэд хэрэгжих бөгөөд энэ сарын 10-наас буюу ирэх Даваа гаригаас хэвийн горимд шилжүүлж, 06:00-22:00 цагт замын хөдөлгөөнд оролцуулахаар боллоо.
Өөрөөр хэлбэл, иргэд, аж ахуйн нэгж байгууллагууд автомашинаар замын хөдөлгөөнд оролцохдоо энэ сарын 10-наас эхлэн энгийн үеийн зохицуулалтаар буюу нэг дэх өдөр 1, 6 тоогоор төгссөн тээврийн хэрэгсэл хөдөлгөөнд оролцохгүй гэх зохицуулалтаар 06:00-22:00 цагт замын хөдөлгөөнд оролцохоор болж байгаа юм.