Month: May 2021

Монгол Улсад ирэх долоо хоногт коронавирусийн халдварын тоо өсөх магадлалтай байгааг УОК-ын дэргэдэх Судалгаа, шинжилгээ, эрдэмтдийн зөвлөлийн гишүүн Т.Бэгзсүрэн мэдээлээ.

Өнгөрсөн сарын 10-наас хөл хорио тогтоогоогүй бол энэ сарын сүүлээр өдөрт илрэх халдварын тоо 2500-3000 хүрэх байсан гэдгийг тэрбээр мэдээллийнхээ эхэнд онцлов. Харин хөл хорио тогтоосноор тархалт 1000 гаруй байсан. Түүнчлэн автозамын түгжрэл бага байсан тул халдварын ойрын болон дам хавьтлыг хайх, илрүүлэх ажлын явц 30-40 хувиар өссөн гэдгийг онцоллоо.

Тэрбээр, “Хэрэв хөл хорио тогтоогоогүй бол энэ оны есдүгээр сарын 1 гэхэд батлагдсан тохиолдол 190-200 мянгад хүрэх эрсдэлтэй гэсэн тооцоолол бий. Хөл хориог сулруулж, зарим төрлийн үйл ажиллагаа эхэлснээр ирэх долоо хоногт өдөрт илрэх тохиолдлын тоо өсөх магадлалтай. Цаашид 50 орчим мянган хүнээс халдвар илрэх магадлалтай гэсэн тооцоолол бий. Гэхдээ халдвар хамгааллын дэглэмээ сахиж, вакцинжуулалтын ажлыг амжилттай зохион байгуулснаар энэ тоог бууруулах боломж бий. Насанд хүрсэн хүн амаа долоодугаар сарын 1-ны дотор вакцинжуулж чадвал, энэ оны наймдугаар сар гэхэд өдөрт илрэх тохиолдлын тоо 90 хувиар буурна хэмээн тооцоолсон” гэв.

Түүнчлэн тэрбээр албан байгууллагуудыг ажилтнуудаа хоёроос гурван ээлжид шилжүүлэхийг зөвлөв. Ингэхдээ нэг ээлжийг албан байгууллага дээрээ 5 хоног, гэрээсээ 5-10 хоног ажиллуулах нь ажлын байранд халдвар тархах эрсдэлийг бууруулна хэмээн зөвлөсөн юм. Өөрөөр хэлбэл, ажиллаж байхдаа халдвар авбал гэрээсээ ажиллах үед нь өвчний нууц үе дуусан, халдвар илэрч, ажлын байраа эрсдэлээс хамгаалах боломжтой гэлээ.

Нийслэлийн Засаг даргын зөвлөлийн хурлаар мөн Хог хаягдлыг ангилах, цуглуулах, тээвэрлэх, хадгалах, дахин ашиглах, дахин боловсруулах, сэргээн ашиглах, устгах, булшлах, экспортлох үйл ажиллагаа эрхэлсэн болон байгаль орчинд ээлтэй, хаягдалгүй технологи нэвтрүүлсэн иргэн, аж ахуйн нэгж, байгууллагад эдийн засгийн урамшуулал олгох асуудлыг хэлэлцжээ.

Иргэн, аж ахуйн нэгжүүдэд мөнгөн болон кредит онооны системээр дамжуулан эдийн засгийн урамшуулал олгох тухай танилцуулгыг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр хийсэн юм.

Тухайлбал, өдөр тутмын амьдрал, үйлдвэрлэл, үйлчилгээндээ байгаль орчинд ээлтэй хаягдалгүй технологи нэвтрүүлсэн, хог хаягдлаа эх үүсвэр дээр багасгасан, үйлчилгээний хураамжийг тогтмол төлдөг иргэн, аж ахуйн нэгж, байгууллагад кредит онооны системээр дамжуулан эдийн засгийн урамшуулал олгох юм. Харин хог хаягдлыг ангилах, цуглуулах, тээвэрлэх, хадгалах, дахин ашиглах, дахин боловсруулах, сэргээн ашиглах, устгах, булшлах, экспортлох үйл ажиллагаа эрхэлдэг иргэн, аж ахуйн нэгж, байгууллагад мөнгөн урамшуулал олгох аж.

Хэлэлцэж буй асуудалтай холбогдуулан зөвлөлийн гишүүд саналаа хэлсэн бөгөөд Нийслэлийн Засаг дарга дээрх журмын төслийг бусад хууль, тогтоомжтой уялдуулж, илүү сайжруулах, зөвлөлийн гишүүдийн саналыг тусган, боловсронгуй болгож, дараагийн хуралд танилцуулахыг үүрэг болголоо.

Монгол Улсын Ерөнхий сайд Л.Оюун-Эрдэнэ Чингэлтэй дүүргийн дөрөвдүгээр хороон дахь Ерөнхий боловсролын V дугаар сургууль дээр байрлаж буй дархлаажуулалтын цэгт ажиллаа.

Тус цэгт өчигдрөөс эхлэн Чингэлтэй дүүргийн 65-аас дээш насны иргэдэд Спутник-V вакцинаар дархлаажуулалт хийж эхэлсэн юм. Өдөрт 600-800 орчим хүнийг хамруулж байна. Эхний өдөр 65-аас доош насны иргэд бага зэргийн ачаалал үүсгэж, хүндрэл учруулж байсан бол мэдээлэл түгээсний үндсэн дээр өнөөдрөөс хэвийн, чирэгдэлгүй болсон гэлээ.

Нийслэлийн хэмжээнд 65-аас дээш насны нийт 20.800 хүн бүртгэлтэй бөгөөд 9 дүүрэгт тус бүр дархлаажуулалтын нэг цэгт Спутник V вакцинд хамруулж байгаа аж.

Спутник V вакцины 40.000 нэгдүгээр тун орж ирсэн бөгөөд хоёрдугаар тунг 21-90 хоногийн хугацаанд хийх эмнэлзүйн заалттай, нийлүүлэлтийн гэрээ хэлэлцээр амжилттай хийгдэж байгаа, дээрх хугацаанд амжиж татан авна гэсэн хүлээлттэй байгаа гэж Эрүүл мэндийн сайд С.Энхболд хэллээ.

Улсын хэмжээнд зорилтот бүлгийн хүн амын 71.4 хувь нь буюу 1.5 сая хүн нэгдүгээр тун, 30 хувь нь буюу 610 мянган хүн хоёрдугаар тундаа хамрагджээ.

Нийслэлд 879.998 хүн буюу зорилтот бүлгийн 92.3 хувь нь нэгдүгээр тунд, үүний 49.4 хувь нь хоёрдугаар тунгаа авч дархлаажуулалтад бүрэн хамрагдаад байна.

Үүнээс үзвэл дөрөв, тавдугаар сард зорилтот бүлгийн хүн амаа үе шаттай вакцинжуулалтад хамруулах Засгийн газрын зорилт биелж, төлөвлөснөөс 10 орчим хоногоор түрүүлж байна гэж Эрүүл мэндийн сайд С.Энхболд хэллээ.