Month: April 2021

“Тавантолгой Түлш” ХХК-ийн гүйцэтгэх захирал М.Ганбаатар АНУ-ын ЭСЯ-ны Худалдааны ахлах мэргэжилтэн Майкл Ричмондыг өнөөдөр хүлээн авч уулзлаа. Уулзалтаар Монголд үйлдвэрлэж байгаа утаагүй түлшний үйлдвэрлэлд шинэ технологи, тоног төхөөрөмж нэвтрүүлж хэрэгжүүлэх талаар ярилцав.

“Тавантолгой Түлш” ХХК “Эрдэнэс Таван Толгой” ХХК-ийн олборлосон түүхий нүүрсийг угааж боловсруулах шинэ төслийн хүрээнд дэвшилтэт технологи, тоног төхөөрөмжийг хөгжингүй орнуудаас нэвтрүүлж, утаагүй түлшний чанарыг улам сайжруулах зорилт тавьж буйгаа илэрхийлэв.

Уг ажлын хүрээнд шинэ төслийг АНУ-ын ЭСЯ-ны төлөөлөлд танилцуулж, санал бодлоо солилцов. Утаагүй түлшний чанар сайжирснаар нийгмийн эрүүл мэндэд ашиг тустай гэдгийг талууд онцлоод энэ төслийг үр дүнтэй бодит ажил болгохын төлөө талууд хичээл зүтгэл гарган хамтран ажиллахаар тохиролцлоо.

Уулзалт МҮХАҮТ-д болов. Бизнесийн төлөөллийн байгууллага Худалдаа, аж үйлдвэрийн Танхим өнөөдөр хэрэглэж байгаа утаагүй шахмал түлшний чанарыг сайжруулах хамтын ажиллагааг дэмжиж буйгаа илэрхийлж өнөөдрийг уулзалтыг зохион байгуулав.

Иргэд болон ААН, байгууллагууд үйлчлүүлэгч, хэрэглэгчийнхээ вакцин хийлгэсэн эсэх тухай мэдээллийг E-Mongolia цахим хуудаснаас авч болно. Иргэд өөрийн хийлгэсэн вакцины нэр, үйлдвэрлэсэн улс, дархлаажуулалтад хаана, хэзээ хамрагдсан мэдээллээ мөн авах боломжтой.

ААН, байгууллагууд тухайн үйлчлүүлэгч, хэрэглэгч хэдэн тун вакцин тариулсан, баталгаажсан эсэхийг шалгаж болно. Вакцины гэрчилгээг лавлагаа хэлбэрээр монгол, англи хэлээр авах боломжийг мөн бүрдүүлжээ.

Монгол Улсын Засгийн газар, УОК энэ оны 5 дугаар сарын 1-ний дотор нийслэлийн насанд хүрсэн бүх хүнийг дархлаажуулалтад хамруулахыг зорьж байгаа юм.

Гадаадын иргэн, харьяатын газраас Монгол Улсын Засгийн газрын тогтоолоор барилга, зам гүүрийн бүтээн байгуулалт, хамтын ажиллагааны томоохон төсөл хөтөлбөрийн үйл ажиллагаанд зайлшгүй оролцох инженер, техникийн ажилтнуудад Гадаадын иргэний эрх зүйн байдлын тухай хуулийн дагуу хөдөлмөр эрхлэх буюу HG ангиллын визийн зөвшөөрөл олгодог.

Гэвч зарим уригч аж ахуйн нэгж нь Монгол Улсад хөрөнгө оруулагч болон хувийн бусад шалтгаанаар оршин сууж байгаад нутаг буцсан гадаадын иргэдийг хөдөлмөр эрхлэх буюу “HG” ангиллаар урих хүсэлтийг удаа дараа ирүүлж байна.

Иймд гадаадаас ажиллах хүч оруулж ирж буй уригч аж ахуйн нэгж, байгууллагууд нь Монгол Улсад оршин суух зорилго нь өөр, хөдөлмөр эрхлэх ангиллын визийн шаардлагад нийцэхгүй гадаадын иргэдийг HG ангиллын визийн зөвшөөрлөөр урихгүй байхыг хүсье.

Гадаадын иргэн, харьяатын газар

Азийн хөгжлийн банк, НЗДТГ-ын хөрөнгө оруулалтаар “Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн хүрээнд Сэлбэ дэд төвийн 28 МВт хүчин чадал бүхий дулааны станцыг 2019 оноос барьж эхэлсэн. Тэгвэл тус станцын барилга, шугам сүлжээний угсралтын ажлын гүйцэтгэл 85 хувьтай байна.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр долоо хоног бүрийн бямба гарагт дулааны станц барих ажлын явцыг газар дээр нь шалгаж, хийсэн ажилтай нэг бүрчлэн танилцаж, асуудал байвал шийдвэрлэх, үүрэг даалгавар өгөх ажлыг тогтмол зохион байгуулан ажиллаж байгаа. Мөн 2020 оны тавдугаар сарын 17-ноос Хэсэгчилсэн инженерийн хангамжийн удирдах газрын Сэлбэ дэд төвийн Ашиглалтын өмнөх захиргааны долоон хүний бүрэлдэхүүнтэй хяналтын инженерүүд барилга угсралтын ажилд хяналт тавьж байна.

ХЭСЭГЧИЛСЭН ИНЖЕНЕРИЙН ХАНГАМЖИЙН УДИРДАХ ГАЗАР

УОК-ын Шуурхай штабын дарга, хурандаа Ц.Ганзориг уржигдар мэдэгдэл хийхдээ ойрын хавьтлыг тусгаарлах байранд тусгаарлагдах төлбөрийг иргэн өөрөө төлнө гэж хэлж байсан. Тэгвэл өчигдрийн хийсэн мэдэгдлээ залруулга хийж, дээрх заалт Эрүүл мэндийн тухай хуульд нийцэхгүй тул өөрчилсөн гэлээ.

Шуурхай штабын дарга хурандаа Ц.Ганзориг “Тусгаарлан ажиглах үйл ажиллагааг зохицуулах түр журам”-ын 2.1-д “Коронавируст халдварын батлагдсан тохиолдлын ойрын хавьтлыг өөрийн хүсэлтээр нь тусгаарлан ажиглах байрны төлбөрийг төлүүлж долоо хоног тусгаарлан ажиглана” гэсэн заалт дээр өнөөдөр залруулга хийж байна.

Энэ заалт нь Эрүүл мэндийн тухай хуулийн 26.4-ийн 4-т “Нийгмийн эрүүл мэндийн үйл ажиллагаа, гамшиг, нийтийг хамарсан халдварт өвчин дэгдэлтийн үед эрүүл мэндийн тусламж үйлчилгээг үнэ төлбөргүй үзүүлэх буюу төр хариуцна” гэсэн хуулийн заалттай зөрчилдсөн.

Залруулж “Коронавируст халдварын батлагдсан тохиолдлын ойрын хавьтлыг тандалтын багийн санал эсхүл тухайн хүний хүсэлтийг харгалзан долоо хоног тусгаарлах байранд тусгаарлана” гэж оруулсан. Өөрөөр хэлбэл тусгаарлах байрны зардлыг төр хариуцна, ямар нэг төлбөр төлөхгүй. Эрүүл мэндийн тухай хуультай нийцүүлж өөрчилсөн учир энэ залруулгыг хийж байна” гэлээ.

Энэ сарын 10-25-ны хооронд улаан түвшинд шижиж, хатуу хөл хорио тогтоож, иргэн бүрт 300 мянган төгрөг олгох Засгийн газрын шийдвэр гарсан.

Үүнтэй холбоотойгоор үнийн хөөрөгдөл, үгсэн хуйвалдаж үнэ тогтоох байдлыг хянан шалгах ажлын хэсгийг байгуулсан талаар Шударга өрсөлдөөн, хэрэглэгчийн төлөө газрын дарга Б.Бат-Эрдэнэ мэдээллээ.

Иргэд 115 дугаарт холбогдох, Шударга өрсөлдөөн, хэрэглэгчийн төлөө газрын фэйсбүүк пэйж рүү үнийн хөөрөгдлийн талаар мэдээлэх боломжтой. Түүнчлэн Ибаримт апп ашиглан барааныхаа үнийг нэмсэн дэлгүүрийн зургийг, бараа бүтээгдэхүүний зурагтай хавсарган ШӨХТГ-т мэдээлэх боломжтой аж.

Монгол Улсын Засгийн газар, Азийн хөгжлийн банк хооронд 2019 оны есдүгээр сарын 13-нд байгуулсан МОН-3786 зээлийн хөрөнгөөр “Бүс нутгийн авто зам хөгжүүлэх, засвар арчлалтын төсөл”-ийн хүрээнд баруун аймгууд чиглэлийн гол авто замын сүлжээний хэсэг болох Хүйтний хөндий-Арвайхээр чиглэлийн 57.56 км авто замын их засварын ажлыг хэрэгжүүлэхээр шийдвэрлэсэн билээ.

Зам барилгын ажлын гүйцэтгэгчийг сонгон шалгаруулах олон улсын тендерийн үйл ажиллагааг Азийн хөгжлийн банкны Худалдан авах ажиллагааны журмын дагуу зохион байгуулж, гүйцэтгэгчийг сонгон шалгаруулж, гүйцэтгэгчээр шалгарсан “Эйч кэй би интернэйшнл холдинг” ХХК-тай зам барилгын ажлын гүйцэтгэх 13.97 сая ам.долларын өртөг бүхий гэрээг 2021 оны гуравдугаар сарын 31-нд гэрээ байгуулсан.

Зам барилгын ажлыг 2021 оны дөрөвдүгээр сарын 20-нд эхлүүлэхээр холбогдох бэлтгэл ажлыг хангаж байгаа бөгөөд гэрээгээр зам барилгын ажлыг 24 сарын хугацаанд гүйцэтгэж ашиглалтад оруулах юм хэмээн ЗТХЯ-наас мэдээллээ.

Сүүлийн 24 цагт хөдөө орон нутагт 102 иргэнээс “Covid-19” илэрсэн. Архангай аймагт халдварын долоон шинэ тохиолдол бүртгэгдэж, нийт батлагдсан тохиолдлын тоо 125 болоод байна. Уг 125 тохиолдлоос 42 нь бүрэн эдгэрч, гэрийн тусгаарлалтад шилжсэн талаар Архангай аймгийн Онцгой комиссоос мэдээллээ.

Шинээр батлагдсан тохиолдлууд нь Эрдэнэбулган, Эрдэнэмандал, Хайрхан, Чулуут зэрэг сумдаас илэрсэн байна. Одоогоор Архангай аймагт биеийн байдал хүндэвтэр 13, хөнгөн 70 иргэн эмчлүүлж байгаа аж.

Архангай аймгийн засаг даргын орлогч Ц.Мөнхбат “Аймгийн хэмжээнд 1351 хүний Covid-19-ийн эсрэг дархлаажуулалтад хамруулаад байна. Шинээр батлагдсан тохиолдлууд нь ойрын болон дам хавьтлууд дундаас илэрсэн. Аймгийн Шуурхай штабын тандалт, хариу арга хэмжээний баг Эрдэнэмандал суманд үүсээд буй голомтод шуурхай арга хэмжээ авч ажиллаж байна” гэсэн юм.

Тус аймгийн хэмжээнд батлагдсан тохиолдлуудын ойрын хавьтлын 1431 иргэн тусгаарлалтанд байгаа. Харин дам хавьтлын 2816 иргэн гэрийн тусгаарлалтад байна. Мөн Эрдэнэмандал суманд 18, Хайрхан суманд зургаан ортой тусгай эмнэлэг дэлгэж, батлагдсан тохиолдлуудыг эмчилж эхэлжээ.

Засгийн газар энэ сарын 10-аас хатуу хөл хорио тогтоох шийдвэр гаргаж, иргэн бүрт өнөөдрөөс 300 мянган төгрөгийн дэмжлэг үзүүлэхээр боллоо.

Уг ажлыг 7-10 хоногийн хугацаанд багтаан олгохоор төлөвлөжээ.

Дансгүй иргэдийг дансжуулах зэрэг асуудлууд дагаад гарч байгаа. НӨАТ-ын системд холбогдсон данс, Хүүхдийн мөнгөний данс зэрэг бэлэн байгаа сувгуудаар бол гүйлгээнүүд хийгдэж эхэлнэ гэв.

Тэгвэл үүнийг дагаад зах зээлд өргөн хэрэглээний бараа бүтээгдэхүүний үнэ нэмэгдэх, төгрөгийн үнэ цэн унахтай холбоотой эрсдэл бий эсэхийг тодруулахад Сангийн сайд Б.Жавхлан “Наймдугаар сараас хойш төгрөгийн ам.доллартай харьцах ханш 2850 орчимд тогтвортой байна. Энэ жилийн инфляцын зорилтот түвшин 6 хувь юм. Одоо инфляц 2.6 хувь байна. Өөрөөр хэлбэл зорилтот түвшнээсээ нам дор байгаа гэсэн үг. Тэгэхээр ийм хэмжээний мөнгөний нийлүүлэлтийг даана. Дээрээс нь төв банк өөрөө зорилтот түвшнийхээ төлөө ажиллана. Зүгээр хараад суухгүй шүү дээ. Мөнгөний бодлогын өөрийнх нь олон янзын хэрэгслүүд бий. Үүгээрээ дамжуулж инфляцыг зорилтот түвшинд байлгах бүрэн боломжтой гэж харж байна” гэсэн хариултыг өглөө.

2020 онд хүүхдийн мѳнгѳ 100 мянган төгрөг зэрэг халамжийн бодлого ихээр хэрэгжүүлсэн ч инфляц 2 хувьд хадгалагдаж, иргэдийн хадгаламж нэмэгдсэн юм. Эдийн засгийн хүндрэлийн үед хүмүүс мѳнгѳѳ үрэх бус хадгалах хандлага ажиглагддаг байна.