Month: April 2021

Хатуу хөл хорио тогтоохтой холбоотойгоор өнөөдөр нийслэлд вакцинжуулалтын цөөн цэг ажиллаж байна. Энэ талаар нийслэлийн Эрүүл мэндийн газрын орлогч дарга Л.Зэндмаа “Нийслэлд өнөөдөр вакцинжуулалтын хоёрдугаар тунг хийж байна. Эхний тунг хийх вакцины хүрэлцээ, нөөц байхгүй байна. Нийслэлийн хэмжээнд нийт 29 цэгт вакцины хоёрдугаар тунг хийх бөгөөд үлдсэн цэгүүдэд ариутгал халдваргүйжүүлэлт хийнэ. Хатуу хөл хориогоор тусламж үйлчилгээ зохицуулсан тушаал гарна. Энэ үеэр хэрхэн ажиллах талаар Нийслэлийн Онцгой комиссоос өгсөн үүрэг чиглэлийн дагуу ажиллана” хэмээлээ.

Улаанбаатар хотод өчигдөр дархлаажуулалтын 75 цэгт 158 багийн 1295 ажилтан 32506 иргэнийг вакцинжуулсан байна. Нийслэлийн хэмжээнд вакцинжуулалт эхэлснээс хойш нийт 487408 иргэнийг дархлаажуулалтад хамруулсан талаар албаныхан мэдээлсэн юм.

Нэр бүхий иргэд Монгол Улсын Үндсэн хуулийн цэцэд хандаж Улсын Их Хурлаас 2020 оны 12 дугаар сарын 24-ний өдөр баталсан Монгол Улсын Ерөнхийлөгчийн сонгуулийн тухай хуулийн 3 дугаар зүйлийн 3.1.2 дахь заалт, 5 дугаар зүйлийн 5.4, 5.6, 26 дугаар зүйлийн 26.2 дахь хэсэг Үндсэн хуулийн зарим заалтад нийцээгүй байна гэсэн мэдээлэл ирүүлсэн билээ.

Энэхүү мэдээллийн дагуу үүсгэсэн маргааныг хянан хэлэлцэх Үндсэн хуулийн цэцийн дунд суудлын хуралдааныг 2021 оны 4 дүгээр сарын 16-ны өдөр хийхээр товлоод байна гэж Цэцийн Хэвлэл, мэдээлэл, олон нийттэй харилцах албанаас мэдээлэв.

Ус цаг уур, орчны шинжилгээний газраас ой хээрийн түймрийн эрсдэл их буюу аюултай зэрэгт хүрснийг мэдээллэсэн. Нийслэлийн хэмжээнд 2021 он гарсаар ногоон бүсэд өнжмөл шар өвс шатсан 26 дуудлага мэдээлэл ирснийг Гал түймэр унтраах, Аврах ангийн бүрэлдэхүүн шуурхай унтрааж ажиллажээ.

Нийслэлийн ногоон бүсэд ой хээрийн түймрээс урьдчилан сэргийлэх чиглэлээр нийслэлийн Онцгой байдлын газар, нийслэлийн Цагдаагийн удирдах газар, нийслэлийн Байгаль орчны газар, Тээврийн Цагдаагийн албаны Замын Цагдаагийн газар, Богдхан уулын Дархан цаазат газрын хамгаалалтын газрын захиргааны нийт нийт 276 алба хаагч, 97 автомашин техник, 75 морьтой үүрэг гүйцэтгэж байна.

Иймд иргэд, олон нийт хаврын хуурайшилтын үед асаасан гал, шүдэнз, татсан тамхины гал, цог, үнс нурмыг бүрэн унтраах, халуун үнс, нурмыг тусгайлан бэлдсэн таглаа бүхий нүх, саванд хийх, гэр сууц, хашаа хорооны гадуур түймрээс хамгаалах зурвас татах, ой, хээрт ил задгай гал түлэхгүй байхыг анхааруулж байна.

Баян-Өлгий аймагт эхний ээлжид 5461 хүн вакцинд хамрагдах ёстойгоос 3764 нь өчигдөр дархлаажуулалтдаа хамрагдсан болохыг тус аймгийн Засаг даргын Тамгын газраас мэдээллээ.

Тус аймагт дөрөвдүгээр сарын 7-ны өглөө 07:00 цагт КОВИД 19-ийн эсрэг вакцинжуулалт эхэлжээ.

Энэ удаа Хятад улсын Синофарм үйлдвэрийн Verocell вакцины 5461 тун вакцин Улаанбаатар хотоос цагдаагийн хяналт дор хүргэсэн байна.

Эхний ээлжид эрүүл мэндийн байгууллагын эмч, ажилчид, Зооноз өвчин судлалын төв, онцгой, цагдаа, тагнуул, шүүх, автотээврийн төв, мэргэжлийн хяналтын газрын албан хаагчид болон сургууль, цэцэрлэг, ажилчид, стратегийн ач холбогдол бүхий байгууллагын ажилтнуудыг хамруулж эхэлжээ. Үүний дараа шат дараатай ахмад настан, хөгжлийн бэрхшээлтэй иргэдийг хамруулахаар төлөвлөжээ.

Өлгий сумын хэмжээнд вакцинжуулалт хийх 4 цэг ажиллаж байгаа бөгөөд бүх суманд вакцин хуваарилан хүргэлт хийгдсэн байна. Төлөвлөгөөгөөр эхний 5461 тун вакциныг 2 хоногт хийнэ.

Дараагийн ээлж буюу 2 дахь ээлжийн вакцин татан авах ажлыг энэ 7 хоногт багтаан зохион байгуулна.

Аймгийн хэмжээнд нийт насанд хүрсэн 71800 хүн бий. Бүх иргэнийг вакцинжуулалтад хамруулахаар ажиллаж байгааг мэдээлэв.

Коронавируст халдвараар нас барсан хүмүүсийн асуудлаар Хүний эрхийн комиссоос Эрүүл мэндийн сайдад зөвлөмж хүргүүлжээ. Тодруулбал, нас баралт нэмэгдэж байгаа тул нас барсан хүмүүс, тэдний гэр бүлийн эрхэм байдал, хүний эрх, хүсэл зоригийг хүндэтгэх, хүний эрхийн зөрчлөөс урьдчилан сэргийлэх зорилгоор Хүний эрхийн үндэсний комиссын гишүүн Г.Нарантуяагаас Эрүүл мэндийн сайд С.Энхболдод 2021 оны дөрөвдүгээр сарын 8-ны өдрийн 3/09 тоот зөвлөмж хүргүүлсэн байна.

Уг зөвлөмжид

• Covid-19-өөр нас барсан хүмүүсийн цогцсыг хадгалах,
• Цогцост эмгэг судлалын шинжилгээ хийх,
• Оршуулах асуудлыг тусгайлан зохицуулах,
• Нас барсан хүмүүсийн гэр бүлийн хүсэл зориг, ёс заншил, шашин шүтлэгийг хүндэтгэх,
• Халдвар, хамгааллын дэглэмийг сахиулахын зэрэгцээ салах ёс гүйцэтгэх боломжийг дээд зэргээр бүрдүүлэх,
• Цогцос хадгалах, оршуулахад шаардагдах байгууламж, хэрэгслийн нөөцөд хяналт тавих, бүрдүүлэх,
• Нас барсан хүмүүстэй ажилладаг эрүүл мэндийн салбарын ажилтнуудыг халдвараас хамгаалах хувцас, хэрэглэлээр бүрэн хангах;
• Хорих анги, асрамжийн газруудад эрсдэлийг урьдчилан тооцоолж, бэлэн байдлыг хангах чиглэлээр эрх бүхий байгууллагуудтай хамтран ажиллах асуудлуудыг тусгасан байна.

Эх сурвалж: ХҮНИЙ ЭРХИЙН ҮНДЭСНИЙ КОМИСС

Говь-Алтай аймаг дахь хилийн 0214 дүгээр ангийн дугаар салбарын хилийн харуулд үүрэг гүйцэтгэж байсан Ховд аймгийн Чандмань сумын харьяат байлдагч Х, Орхон аймгийн Баян-Өндөр сумын харьяат байлдагч М нар нь 2021 оны дөрөвдүгээр сарын 08-ны 18.30 цагийн орчимд харуулын даргаар үүрэг гүйцэтгэж байсан ахлах ахлагч Г-г буудан амь насыг нь хөнөөж, зэвсэглэн харуулын байрлалаа орхин оргосон хэрэг гараад байна.

Дээрх хэргийг шалгахаар ХХЕГ, ЦЕГ-ын хамтарсан бүлэг /2021.04.09/ шөнийн 03.30 цагт Улаанбаатараас нисдэг тэргээр хөдөлгөөн үйлдэж, газар дээр нь шуурхай очин, одоогийн байдлаар аймгийн цагдаа, тагнуулын байгууллагын алба хаагчид мөрөөр нь мөрдөн ажиллаж байна.

Эл хэрэгтэй холбогдуулан Хил хамгаалах ерөнхий газраас мэдээлэл өглөө. Тэд “Хилийн цэргийн 0214 дүгээр ангийн дөрөвдүгээр заставд өнгөрсөн өдөр хилийн манаанд үүрэг гүйцэтгэж байсан байлдагч Х, М нар зэвсэг хэрэглэж, харуулын даргын амь насыг хөнөөсөн гэдэг мэдээллийг авсан. Энэ хэрэгтэй холбогдуулан Говь-Алтай аймгийн цагдаа, тагнуулынхантай өнгөрсөн шөнө ажиллаж, хоёр цэргийн мөрөөр мөшгин ажиллаж байна” гэв.

Түүнчлэн “Оргосон хоёр цэргийн нэг нь Ховд, хөгөө нь Орхон аймгийн харьяат. Өнгөрсөн намар цэрэгт татагдаж ирсэн. Ар гэртэй нь холбогдсон, хамтран ажиллаж байна. Одоогоор хоёр нөхөр өнгөрсөн шөнөжин явж, өглөө айлын хүнээс мотоциклийг нь гуйж авч явсан байна. Тэд уул руу бүгсэн байдалтай байна. Нэг цэрэг 25 сумтай байдаг. Одоогоор тухайн хоёр цэрэг 45 сумтай яваа нь тогтоогдоод байна” гэлээ.

Харин ЦЕГ-аас өгсөн мэдээллээр тухайн хоёр цэргийн байршлыг тогтоосон, баривчлаагүй гэх мэдээллийг өглөө.

AstraZeneca компанийн бүтээсэн коронавирусийн эсрэг вакцин нь тархины цусны бүлэгнэл үүсгэдэг байж болзошгүй гэсэн дүгнэлтийг Европын эрүүл мэндийн зохицуулах байгууллага EMA гаргаад байгаа. Тиймээс улс орнууд уг вакциныг ямар хүрээнд хэрэглэхээ өөрийн нөхцөл байдалд тохируулан тус тусдаа шийдэх нь зөв гэсэн зөвлөмж гаргасан билээ.

Үүний дагуу Европын орнууд AstraZeneca вакцинаар дархлаажуулах хүний насны хязгаарыг тогтоож эхэлсэн.

Тэгвэл Австрали өчигдөр өөрийн шийдвэрийг гаргасан сүүлчийн улс боллоо. Пүрэв гарагт болсон шуурхай хуралдааны дараа тус улсын засгийн газар AstraZeneca вакциныг 50 хүртэл насныханд хэрэглэхгүй байх зөвлөмж гаргажээ.

50 хүртэл насныханд Pfizer/BioNTech компанийн вакцинаар дархлаа тогтоох нь зөв гэж шийдсэн байна.

Дөрөвдүгээр сарын 4-ний байдлаар EMA тархины цусны бүлэгнэлийн (CVST) нийт 169 тохиолдол бүртгэж авсан байна. Гэхдээ энэ нь Европын Холбооны гишүүн орнууд даяар тарьсан 34 сая тун вакцины дараа илэрсэн тохиолдлууд гэнэ. Тархины цусны бүлэгнэлийн ховор тохиолдол голдуу 60-аас доош насны эмэгтэйчүүдэд AstraZeneca вакциныг тариулснаас нь хойш хоёр долоо хоногийн дотор илэрч байжээ.

Эх сурвалж: Associated Press