Month: April 2021

Хаврын улиралд ой, хээрийн болон өнжмөл шар өвсний түймэр ихэсдэг. Иргэддээ сэрэмжлүүлэг болгох үүднээс Нийслэлийн Онцгой байдлын газар /НОБГ/-ын Гамшгаас урьдчилан сэргийлэх хэлтсийн дарга хурандаа Г.Нэргүйтэй ярилцлаа.

-Нийслэлийн ногоон бүсэд эргүүл ажиллаж эхлээд байгаа. Энэ талаарх мэдээллийг өгнө үү.

-Улсын болон Нийслэлийн онцгой комисс, Онцгой байдлын ерөнхий газар, Нийслэлийн Засаг даргын Ой, хээрийн түймрээс урьдчилан сэргийлэх, тэмцэх албан даалгавар болон захирамжууд гарсан. Үүнийг хэрэгжүүлэх зорилгоор дүүргүүдийн Онцгой комисс, дүүргүүдийн Засаг даргын албан даалгавар, захирамжууд гарч, ой хээрийн түймрээс урьдчилан сэргийлэх, нэгдсэн удирдлагаар хангах ажлыг дөрөвдүгээр сарын 1-нээс эхлүүлээд байна. Нийслэлийн хувьд 2019 онд ой, хээрийн түймэр, өнжмөл шар өвсний түймрийн нөхцөл байдал хүндхэн байсан. 2019 оны дөрөвдүгээр сарын 1-ний байдлаар 476 удаагийн ой, хээрийн, өнжмөл шар өвсний дуудлага ирсэн. Богд уул, Жаргалантын ам, Зайсан болон Гоодойн ам зэрэг зуслангийн бүсүүдэд өнжмөл шар өвсний түймэр их гарч, иргэдийн зуслангийн байшин, эд хөрөнгөд учирсан хохирлын хэмжээ маш их байгаа. Өнгөрсөн онд Нийслэлийн Засаг даргын захирамж гарч анх удаа НОБГ, НЦУГ, НБОГ, Тээврийн цагдаагийн албаны Замын цагдаагийн газар, дархан цаазат Богд уулын захиргааны гэсэн таван байгууллагын албан хаагчдаас бүрдсэн хөдөлгөөнт эргүүлийн баг ажилласан. Үүний үр дүнд 2020 онд нийслэл орчимд гал түймрийн дуудлага 22.6 хувиар, учирсан хохирлын хэмжээ 67 хувиар буурлаа. Энэ жил мөн Ой хээрийн түймэр, өнжмөл шар өвсний түймрээс урьдчилан сэргийлэх тухай Нийслэлийн Засаг даргын А/256 дугаар захирамж гарсан. Энэ дагуу дүүргүүдийн Онцгой комиссын албан даалгавар, Засаг даргын захирамж гарлаа. Он гарсаар нийслэлийн хэмжээд ой, хээрийн түймэр, өнжмөл шар өвсний түймрийн 26 дуудлага бүртгэгдээд байна. Үүний 19 түймрийг гал түймэр унтраах, аврах ангиуд, долоон түймрийг бэлтгэл ээлжийн буюу эргүүлд гарч байгаа иргэд, албан хаагчид унтраасан. Өнөөдрийн байдлаар нийслэлийн ногоон бүсэд НОБГ, НЦУГ, НБОГ, Тээврийн цагдаагийн албаны Замын цагдаагийн газар, дархан цаазат Богд уулын захиргаа гэсэн таван байгууллагын 75 морьт эргүүл, 276 албан хаагч 97 техник хэрэгсэлтэйгээр 80 чиглэлд эргүүл хяналтын ажлыг эхлүүлээд байна. Нийслэл Улаанбаатар хот маань өнөөдрийн байдлаар гал түймрийн нэн аюултай зэрэгт шилжээд байгаа. Ой хээрийн түймэр, өнжмөл шар өвсний түймэр нь маш их хохирол, эрсдэл учруулдаг, маш их хүн хүч, цаг хугацаа шаарддаг учраас бид урьдчилан сэргийлж ажиллаж байна. Баянгол дүүргээс бусад төвийн таван дүүрэг ногоон бүстэй учраас таван чиглэлд дээрх таван байгууллагын хөдөлгөөнт эргүүл ажиллаж байгаа юм. Үүнээс гадна НОБГ-ын 15 ангийн 120 орчим албан хаагч 24 цагаар үүргээ гүйцэтгэсний дараа бэлтгэл ээлж рүү шилжиж, үүрэг гүйцэтгэнэ. Мөн Тээврийн цагдаагийн албанаас 22, Нийслэлийн байгаль орчны газар болон дархан цаазат Богд уулын захиргааны газраас 113 албан хаагч үүрэг гүйцэтгэнэ. Коронавирусийн нөхцөл байдал хүндэрч иргэд агаар салхинд гарах хүсэл маш их болсон учраас Богд уул, Зүрх уул, Зайсан зэрэг хотын эргэн тойрны уул руу аялал, зугаалга хийж байна. Иргэд эрүүл мэндээ хамгаалж, хүүхдүүдээ агаарт гаргахыг бид үгүйсгэхгүй. Хамгийн гол нь ногоон бүсэд ил задгай гал гаргаж болохгүй, гагнуур хийж болохгүй, байгалийн баялгийг ашиглах зорилгоор самар түүх, бугийн эвэр түүх зэрэг хууль зөрчсөн үйл ажиллагаа хийж болохгүйг анхааруулж байна.

-Эргүүл хийх үед илрүүлсэн зөрчил, дутагдлыг та бүхэн хэрхэн шийдвэрлэж байна вэ?

-Нийслэлийн хэмжээнд ой, хээрийн болон өнжмөл шар өвсний түймрийн нөхцөл байдал хүндэрсэн. Өнгөрсөн онд таван байгууллагын хөдөлгөөнт эргүүл ажилласны үр дүнд гал түймрийн тоо буурсан. Хөдөлгөөнт эргүүл гарсны үр дүн их байдаг. Шар өвс шатаах, ил гал гаргаж байгаа иргэдийн зөрчлийг газар дээр нь унтрааж, хохирол болон түймэр тархах эрсдэлийг зогсоож байгаа. Зөрчил гаргаж байгаа иргэдэд Зөрчлийн тухай хууль, Галын аюулгүй байдлын тухай хууль, Гамшгийн тухай хуулиар хариуцлага хүлээлгэдэг. Зөрчил гаргасан иргэнд 100 нэгжээс дээш, аж ахуйн нэгжид 1000 нэгжээс дээш торгуулийн арга хэмжээ авна. Бусдын эд хөрөнгийг санаатай галдан шатаасан үүний улмаас хүний эрүүл мэнд, амь нас хохирсон бол эрүүгийн хариуцлага хүлээлгэх хуулийн заалттай.

-Маргаашаас буюу дөрөвдүгээр сарын 10-наас хатуу хөл хорио тогтоож байгаа. Зуслангийн бүсэд байгаа иргэдэд ямар зөвлөгөө өгөх вэ?

-Хашаандаа байгаа өнжмөл шар өвсийг шууд шатаахгүй байх, шатаах тохиолдолд зориулалтын тагтай төмөр саванд хийж шатаах, эсвэл шуудайд хийж хогийн цэгт хаяхыг зөвлөе. Мөн гагнуур хийхгүй байхыг анхааруулж байна. Гагнуурын очноос түймэр гарах тохиолдол их байдаг. Иргэд асаасан тамхи, чүдэнзээ бүрэн унтраагаагүйгээс, бага насны хүүхдэдээ хараа хяналт муу тавьснаас үүдэн хүүхдүүд чүдэнз, галт хэрэгслээр тоглосноос болж, шар өвсний түймэр их гарч байна. Түймэр ой мод руу орсон тохиолдолд унтраах гэж цаг хугацаа, хүн хүч маш их зарцуулдаг. Таны санамсар болгоомжгүй ганцхан үйлдэл, асааж орхисон ил задгай галаас болж байгаль экологи, эдийн засагт учрах хохирол тэрбумаар тооцогддог гэдгийг анхаарах хэрэгтэй. Бид коронавирусийн цар тахлын хүнд үетэй тэмцэхийн хажуугаар бусад гамшиг осолтой тэмцэх, урьдчилан сэргийлэх ажлаа эрчимжүүлэн ажиллаж байна. Манай албан хаагчид үндсэн үүргээ гүйцэтгэхээс гадна ой, хээрийн түймрийн эргүүлд, коронавирусийн тахалтай тэмцэх, мөн авто тээврийн шалган нэвтрүүлэх товчоодод эргүүлээр ажиллаж байна. Тийм учраас онцгой байдлын албаны алба хаагчид, бусад төрийн албаны алба хаагчдын хууль ёсны шаардлагыг биелүүлэхийг хүсье. Өөрийнхөө болон бусдын эд хөрөнгө, амь насыг авран хамгаалах нь иргэн бүрийн үүрэг тул ухамсартай хандахыг уриалж байна.

Эх сурвалж: НЗДТГ-ын хэвлэл мэдээлэлтэй харилцах хэлтэс

Хөдөлмөр эрхлэлтийн үйлчилгээг ажил хайгч иргэдэд цахим хэлбэрээр хүргэх ажлын явц, үр дүнтэй танилцлаа. Энэ сарын 1-ний өдрөөс шинээр хэрэгжиж эхэлсэн хөдөлмөр эрхлэлтийн цахим үйлчилгээг www.ejob.gov.mn вэбсайтаар дамжуулан ажил хайгч иргэн, ажилтан хайж байгаа ажил олгогчид үзүүлэхээр болсон.

Гуравдугаар сарын байдлаар улсын хэмжээнд нийт 25105 иргэн ажил хайж, төрийн болон хувийн хөдөлмөрийн биржид 6413 ажлын байр нээлттэй бүртгэгдсэн байна.

Коронавируст халдварын цар тахлын үед ажилгүй иргэдэд хөдөлмөр эрхлэлтийн үйлчилгээг биечлэн үзүүлж, ажилд зуучлахад хүндрэлтэй болж байгаа энэ үед төрийн хөдөлмөр эрхлэлтийн байгууллага болон хөдөлмөрийн хувийн биржүүд www.ejob.gov.mn цахим системээр дамжуулан иргэдэд хөдөлмөр эрхлэлтийн үйлчилгээг хурдан шуурхай, цаг алдахгүй хүргэж, хөдөлмөр зуучлалын ажлыг зохион байгуулах юм.

Цахим системд ажил хайгч иргэн хандсанаар дараах боломжуудыг ашиглана. Үүнд:

• Өөрийн хөдөлмөр эрхлэх боломжийн үнэлгээг хийлгүүлэх;
• Ажил хөдөлмөр эрхлэх төлөвлөгөөгөө боловсруулах, ажил, мэргэжлийн чиг баримжаа олгох зөвлөгөө авах;
• Холбогдох шаардлагатай дэмжлэг, туслалцааг цахимаар хэлбэрээр үнэ төлбөргүйгээр авах;
• Өөрийн ур чадвар, ажил, мэргэжилд нийцсэн ажлын байрны захиалгын дэлгэрэнгүй мэдээллийг хүлээн авч ажилд зуучлуулах;
• Нөгөө талаас ажил олгогч сул чөлөөтэй ажлын байрандаа өөрийн эрэлт хэрэгцээнд нийцсэн ажилтныг зуучлуулан авах.

Хөдөлмөр зуучлалын энэхүү цахим системийг БНСУ-ын Засгийн газрын буцалтгүй тусламжийн хүрээнд хэрэгжүүлж байгаа “Монгол Улсын төрийн хөдөлмөр эрхлэлтийн үйлчилгээний мэдээллийн системийг хөгжүүлэх төсөл”-ийн дэмжлэгтэйгээр илүү өргөжүүлэн хөгжүүлж, тоног төхөөрөмж, программ хангамжийн шинэчлэлийн ажлыг энэ оны 6 дугаар сард багтаан хийж дуусгахаар ажиллаж байна.

Эх сурвалж: ХНХЯ

Өчигдөр буюу дөрөвдүгээр сарын 8-ны өдөр Соёлын сайд Ч.Номин Бүгд Найрамдах Энэтхэг Улсаас Монгол Улсад суугаа Элчин сайд М.П.Сингхийг хүлээн авч уулзаж, соёл урлагийн салбарт хамтын ажиллагааг хэрэгжүүлэх талаар санал солилцсон.

Энэ үеэр Бүгд Найрамдах Энэтхэг Улсын зүгээс:

• Монголын Бурхны Шашинтны Төв Гандантэгчэнлин хийдийн орчимд номын сан музей барих,
• Монголын Үндэсний номын сан болон Гандантэгчэнлин хийдэд хадгалагдаж буй Төвөд, Монгол ном судруудыг цахим хэлбэрт шилжүүлэх,
• Богд Хааны Ордон музейг нөхөн сэргээн засварлахад дэмжлэг үзүүлэн хамтран ажиллахаа илэрхийлсэн юм.

Өнөөдөр Соёлын сайд Ч.Номин Бүгд Найрамдах Энэтхэг Улсаас Монгол Улсад суугаа Элчин сайд М.П.Сингх нар Гандантэгчэнлин хийдэд очиж, Хамба лам Д.Чойжамц тэргүүтэй лам нартай уулзлаа.

Энэ үеэр Соёлын сайд Ч.Номин, Гандантэгчэнлин хийд бол манай улсад байгаа баялаг соёлын өвтэй газрын нэг. Энд байгаа үзмэр, судар номуудыг олон нийтэд таниулах, цаашлаад эрдэм шинжилгээний хүрээнд судлахад хэрэгцээтэй номын сан, музейн барилгыг Энэтхэг улстай хамтран хийх төлөвлөгөөтэй байгаа. Өнөөдөр Гандантэгчэнлин хийдэд ирж, тус барилгыг барих боломжтой газрыг үзэж Хамба лам Д.Чойжамц тэргүүтэй лам нартай уулзлаа. Номын сан, музейн барилгын ажлыг явуулахдаа хэрхэн түүхийн өв болсон бусад сүм, хийдийн барилгад сэв болгохооргүй хийх вэ гэдэг талаар ярилцан, санал солилцлоо.

Гандантэгчэнлин хийдийн хүрээлэлд бүтээн байгуулагдах зүйлсийг том зургаар харж, урт хугацааны өөрчлөлтүүдийг хийхээр ярилцсан гэлээ.

“ГАНДАНТЭГЧЭНЛИН ХИЙДЭД “БУРХАН БАГШИЙН ЦЭЦЭРЛЭГТ ХҮРЭЭЛЭН”-Г БАЙГУУЛНА

УИХ-ын нэгдсэн чуулганы хуралдаанаар үеэр Сангийн сайд Б.Жавхлан 10 их наядын цогц төлөвлөгөө болон вакцинжуулалтын талаар мэдээллээ. Тэрээр:

“Долдугаар сарын нэгэн гэхэд нийт хүн амаа бүрэн вакцинжуулах зорилт тавьсан. Тиймээс вакцинжуулалтаа хамгаалахын тулд 14 хоногийн хөл хориог тавилаа. Вакцин бол эмчилгээ биш, дархлаа тогтоодог. Дархлаа тогтоход хугацаа хэрэгтэй. Энэ хооронд бид алдаа гаргаж болохгүй. Эрүүл мэндээ болон эдийн засгаа ч аврах боломж үүгээр улам нэмэгдэж учиртай. Тиймээс бид энэ арга хэмжээг авч байна. нийт улсын төсөв 4.1 их наяд төгрөгийн ачаалал авсан. энэнээс цааш бид төсөв дээр ачаалал авах ямар ч орон зай байхгүй. Бидэнд нэмэлт эх үүсвэр хэрэгтэй байсан. Харин энэ жил үе үеийн Засгийн газруудын авч тууштай хэрэгжүүлсэн үр дүнд “Оюу Толгой”-гоос энэ жил тооцоолоогүй нэмэлт эх үүсвэр орж ирсэн. Сүүлийн сар гаруйхугацаанд нийтдээ 1 их наяд 26 тэрбум төгрөгийн эх үүсвэр орж ирлээ.Үндсэн хуулиараа иргэн бүр байгалийн баялагийг хүртэх эрхтэй” гэлээ.

Засгийн газрын ээлжит бус хуралдаан өчигдөр болж Монгол Улсын иргэд бүр нэг удаагийн дэмжлэг хэмээн 300 мянган төгрөг олгохоор болсон.

Дээрх шийдвэрийн дагуу өчигдөр 1 сая 196 мянган хүүхдийн данс руу гүйлгээ хийгдсэн бол өнөөдөр 1 сая 651 мянга орчим иргэний гүйлгээг хийхээр бэлтгэж байгаа талааар Сангийн яамнаас мэдээллээ. Ингэхдээ иргэдийн ebarimt.mn болон ekhalamj.mn-д бүртгэлтэй данс уруу шилжүүлэх юм байна.

Сангийн яамны Төрийн сангийн газрын дарга М.Батхуяг “Хүүхдийн мөнгө авдаг хүүхдүүдэд 300 мянган төгрөгийг олгосон. Нийт 1.196.578 хүүхдэд олгосон. Нийгмийн хамгаалал хөдөлмөрийн сайд болон Сангийн сайд нар Засгийн газрын тогтоолыг хэрэгжүүлж байгаа бөгөөд НХХЯ-наас иргэдийн бүртгэлийг өгч байна” гэлээ.

ebarimt систем нь НӨАТ-ын буцаан олголтыг иргэдийн данс руу оруулж өгдөг бөгөөд Засгийн газрын шийдвэртэй холбоотойгоор 1.6 сая иргэний 300 мянган төгрөгийг шилжүүлэхэд бэлэн болоод байгаа аж. Харин бүртгэл хийлгээгүй иргэд ebarimt.mn-д бүртгүүлэн дансаа оруулснаар төрөөс олгож байгаа дэмжлэгийг авах боломжтой юм байна. Шинээр бүртгэл хийлгэсэн иргэд гурван хоногийн дараа бүртгэл нь баталгаажиж, мөнгөө авах боломжтой бөгөөд банк, төрийн байгууллагад очих шаардлагагүй юм байна.

Татварын албанаас Оюу толгойд ногдуулсан нөхөн татвар, торгууль, алданги болох 1 их наяд 26тэрбум төгрөгийг өнгөрөгч сард 3 удаагийн шилжүүлгээр Оюу толгойгоос барагдуулсан. Дээрх орлогыг цар тахлын хөл хорионы хүнд үеэр иргэдэд дэмжлэг болгож байна гэж Сангийн яамнаас мэдээллээ.

Улсын онцгой комиссын хөл хорио тогтоох шийдвэрээ өчигдөр танилцуулсан. Хатуу хөл хориог дөрөвдүгээр сарын 10-25-ны 06:00 цаг хүртэл тогтоох юм. Ингэхдээ нийслэлийн хэмжээнд хязгаарлахгүй үйл ажиллагаа явуулах иргэн, аж ахуй нэгж байгууллага тодорхой маршрутын дагуу зорчих QR код олгох, 18 градусаас дээш агууламжтай согтууруулах ундааны зүйлс, түүгээр үйлчлэхийг хориглох шийдвэр гарсан билээ.

Түүнчлэн тогтоолд хөл хорионы үеэр иргэд оршин суугаа газрын гадна талбайд алхах, дугуй унах нээлттэй ч нэг дор гурваас олон хүн цуглахгүй байхыг үүрэг болгов. Уг асуудлыг нарийвчлан шийдэх үүргийг НОК-д олгосон ба автомашины тэгш сондгойгоор зорчуулах байр суурьтай байгаа аж. НОК энэ асуудлыг эцэслээд, 17:00 цагт мэдээлэл хийх юм.

Монгол Улсын Засгийн газрын 2021 оны 4 дүгээр сарын 8-ны өдрийн ээлжит бус хуралдаанаар цар тахлын үед эдийн засгийн эргэлтийг дэмжих зорилгоор Монгол Улсын иргэн бүрд 300 мянган төгрөгийн нэг удаагийн тусламжийг олгохоор шийдвэрлэсэн.

Энэхүү тусламжийг хилийн чанадад оршин суугаа Монгол Улсын иргэдийн эзэмшиж буй дотоодын банкин дахь дансаар дамжуулан өгөх бөгөөд дараах байдлаар олгохыг үүгээр мэдэгдэж байна:

1. Гадаадад оршин суугаа Монгол Улсын иргэн та цахим төлбөрийн баримтын систем болох www.ebarimt.mn /апп болон портал/ бүртгэлтэй бол дотоодын банкны өөрийн дансаа холбоорой. Таны ибаримтад бүртгэлтэй дотоодын банкны хувийн данс руу тусламжийн мөнгийг шилжүүлнэ.
2. Хэрэв EBarimt-д бүртгэлгүй бол www.ebarimt.mn сайтаар эсвэл аппликейшнийг татан авч, шинээр бүртгэл үүсгэн дотоодын буюу Монгол Улсын банкин дахь хувийн дансаа холбоорой. Ингэснээр уг системд бүртгэлтэй таны хувийн данс руу тусламжийн мөнгийг шилжүүлнэ.