Month: April 2021

Categories
мэдээ нийгэм онцлох-нийтлэл туслах-ангилал

Шадар сайд мөн л эргэж буцсан юм ярьж, ажлаа мэддэггүйгээ батлав

Засгийн газраас вакцинжуулалт хойшилсонтой холбогдуулан мэдээлэл өгөх үеэр Шадар сайд С.Амарсайхан сэтгүүлчдийн асуултуудын нэгэнд нь ч оновчтой, голтой хариулт өгч чадсангүй. Эргэж буцсан юм ярьж, ажлаа мэддэггүй дахин баталлаа. Дэргэд нь суусан бусад сайд, дарга нар урдуур нь асуултад нь зөв хариулт өгч “аварсан”-ыг бүгд харсан. Сүүлдээ тойруулж, бултуулж, оршил ярьсаар сэтгүүлчид болоод лайвыг үзэж байсан иргэдийн дургүйцлийг төрүүллээ. Түүнийг сэтгүүлчдийн асуултад хэрхэн “бөөрөнхий” хариу өгснийг доорхоос харж болно.
Сэтгүүлч: Хоёр хоногийн өмнө Засгийн газраас хэвлэлийн хурал зарлаж хатуу хөл хорио тогтоож, вакцинжуулалтыг эрчимжүүлнэ гэж мэдээлсэн. Тэгээд хоёр хоногийн дараа вакцин хийхгүй гэж байна. Энэ ямар учиртай вэ. Вакцин хийхгүй бол хөл хорио тогтоох хэрэг байна уу?

Шадар сайд С.Амарсайхан: Цар тахлын үед бид амаргүй нөхцөл байдалд тэмцэж байна. Дэлхийн улс орон хатуу хөл хорионоос эхлүүлэн чадах бүх хүчээ дайчилж байна. Вакцины талаар бид мэдлэгтэй болсон. Хөл хорио үр дүнтэй байх ёстой. Энэ тоглоом биш. Цар тахлаар бид тоглоогүй. Үнэн бодитой нөхцөл байдал ийм байгаа. Засгийн газар, УОК бүхий л арга хэмжээг авч ажиллаж, цар тахлыг хохирол багатай даван туулахыг хичээж ажиллаж байна. Үүнд иргэдийн оролцоо маш чухал. Тавдугаар сарын 1-нээс өмнө нийслэлийн насанд хүрсэн иргэдэд вакцины нэг тунг хийж хоёр дахь тунг эхлүүлнэ. Бид мэргэжлийн байгууллагын зөвлөгөөг дагаж ажиллана. Өнөөдрийн байдлаар 68 цэгт хоёрдугаар сарын 23-наас вакцинжуулалт хийсээр ирсэн. Цаашид 160 цэг болгон нэмэгдүүлж үргэлжлүүлэн вакцинжуулна. Энэ 15 хоногийн хөл хориог аж ахуйн нэгж гээд бүгд үр дүнтэй байлгах ёстой. Хүссэн хүсээгүй хүн бүрийн үүрэг гэж ойлгох хэрэгтэй. Тиймээс долдугаар сарын 1-нээс өмнө улсын хэмжээнд вакцинжуулалтаа дуусгах ажлаа өөрчлөөгүй байгаа. Өмнө хэлсэнчлэн энэ сарын 9, 10-нд ирэх тус бүр 300 мянган тун тодорхой хугацаагаар хойшилсон. Энэ бидний үндсэн төлөвлөгөөнд нөлөөлөхгүй. Бид бусдын хараат байгаа гэдгийг ойлгох хэрэгтэй.

Эрүүл мэндийн сайд С.Энхболд: Өчигдөөс 2 дахь тунг эхэлсэн. Гэвч хөл хорио болон вакцинжуулалтын нийлүүлэлт хойшилсон зэргээс 2 дахь тунг мөн хойшлуулсан. 21-ээс 56 хоногийн хооронд хийхэд дархлал тогтох чанарт өөрчлөлт орохгүй. Хөл хорионы энэ үед өндөр настан, хууч өвчтэй хүмүүсийг гэрээр нь явж дархлаажуулна. Нийслэлд 50 наснаас дээш 260 мянган иргэн байгаагийн 50 орчим мянгыг вакцинжуулалтад хамруулсан. Тооцооллоор хүн амын 60 хувь буюу 2 сая 100 мянган хүн амд нийт 4.2 сая тун шаардлагатай. Үүнээс шаардлагатай үлдэгдэл нь 3.3 сая тун байна. Гэрээ хийн, төлбөрийг шилжсэн 1.7 сая тун байна.

Сэтгүүлч: Дөрөвдүгээр сарын 9-нд орж ирэх 300 мянган тун 12-нд орж ирэх 300 мянган тун вакцин яагаад саатсан талаар тодорхой хариулт өгнө үү. Ямар төрлийн вакциныг хаанаас авах вэ?

-Өнгөрсөн хугацаанд дөрвөн удаагийн татан авалтаар 474.400 тун вакцин авсан гэх мэдээлэл байна. Манай улс 608 мянган хүнд тун хийсэн. Цаана нь 192 мянган тун вакцин үлдчихсэн гэх юм. Үүнд тодорхой дэлгэрэнгүй мэдээлэл өгөөч?

Шадар сайд С.Амарсайхан: Хамгийн гол нь бодитой мэдээллийг түгээж анхаарч ажиллах хэрэгтэй. Хандив тусламжаар вакцин ирсэн. Худалдаж авч байгаа. БНХАУ-аас Монгол улсад нийлүүлсэн 12 сая долларын үнэ бүхий 300 мянган тун хандиваар ирсэн. Мөн Манай улс 300 мянган тунг худалдаж авсныг мэдэж байгаа. Ингээд нийлүүлээд 750 мянган тун байна. Үүнд Астразенека 14700, Пфайзер 24750 тун, Спутник гээд нийт 800 мянган тун болж байгаа юм. Зарим улс орон гадаад экспортуудаа хойшлуулсан байгаа. Тиймээс үйлдвэрлэлийн хүчин чадлаас үүдэн хугацаа хойшилсон. Бид аль болох түргэн хугацаанд нийлүүлэхийг хичээж байна. Хэдийгээр хэд хоногоор хойшилж буй хэдий ч төр засгийн тэргүүний түвшинд хүртэл асуудал яригдаж байж шийдэж байна.

Сэтгүүлч: Хэвлэл мэдээллийн байгууллага тодорхойгүй зүйлийг та бүгдээс асууж олон нийтэд хүргэдэг. Үүнийг хэвлэл мэдээллийн байгууллага ташаа мэдээлээл цацдаг, харлуулаад байна хэмээн хэд хэдэн хэвлэлээр хэлсэн. Хэвлэл мэдээллийн байгууллага Засгийн газар хоёр дайсан биш?

Шадар сайд С.Амарсайхан: Хэвлэл мэдээллийн байгууллагыг үгүйсгэж байгаа асуудал байхгүй. Үүнийг ойлгож байгаа. Хамгийн гол нь бодит мэдээллийг түгээж, анхаарч ажиллах хэрэгтэй. Зарим нэг ойлголтын зөрүү байгаа. Тиймээс аль аль талдаа зөвөөр ойлгох ёстой. Хэн нэгнийг буруутгах, зөвтгөх гэсэн зүйл огт байхгүй гэдгийг хэлмээр байна.

Сэтгүүлч: Өмнөх хөл хорио тогтооход “Нэг өрх-Нэг шинжилгээ”-г авч байсан. Одоо энэ хатуу хөл хорионы дүнд юу хийж амжуулах вэ. Үр нөлөөг нь тайлбарлаж өгнө үү?

Шадар сайд С.Амарсайхан: Үр нөлөө байхгүй гэж хэлж болохгүй. Бид мэргэжлийн байгууллагын зөвлөмж зөвлөгөөг дагаж хөл хорио тогтоож байгаа. Эх үүсвэр нь тодорхойгүй голомтуудыг хумих, халдварын тархалтыг багасгах юм. Хөл хориотой холбогдуулж вакцинжуулалтыг зогсоож байгаа асуудал гэж ойлгож болохгүй. Энэ хугацаанд 60-аас дээш насны ахмадуудыг гэрээр очиж вакцинжуулна. Хөл хорионы үеэр тархалтыг нэмэгдүүлэхгүй, ажил амьдралаа хэвийн байлгах талаас бүх талын арга хэмжээг аваад байна. Нөгөөтэйгүүр, энэ хугацаанд 60-аас дээш 248 мянган ахмадыг вакцинжуулалтад хамруулна.

Дархлаажуулалтыг эрчимжүүлнэ гэдэг нь энэ хөл хорионы хугацаанд бэлтгэл ажлаа хангаж байгаа. 68 цэгийг 168 цэг болгож тоог нь нэмэгдүүлж, явуулын 40 цэг болгоно. Эрсдэлгүй аюулгүй орчин нөхцөлийг хангах, халдваргүйтгэлийг ажлыг ч мөн сайжруулж үр дүн гаргах гээд хичээж байна.

Сэтгүүлч: Халдвар аваад гэртээ байгаа иргэдэд хэр хүрч ажиллах вэ?

Шадар сайд С.Амарсайхан: Үүнд манай тандалт судалгааны баг ажиллаж байгаа. Холбогдох мэргэжлийн байгууллагууд өмнө нь тус тусдаа ажилладаг байсан бол одоо нэг дор үйл ажиллагаагаа явуудж байна. Бид илрүүлэлтээ нарийвчилж, тандалт судалгааны ажлаа өргөтгөсөн багаар хийсэн болохоор тохиолдлын энэ тоонд нөлөөлсөн. Мөн гэрээр батлагдсан тохиолдлыг УОК-ын хоёрдугаар сарын 23-ны өдөр баталсан түр журмын дагуу дүүрэг хорооны хэсгийн ажилтан алба хаагчид хяналт тавьж, зөвлөмж өгч ажиллаж байгаа.




Categories
мэдээ нийгэм

“Синофарм”-ын вакцины хоёр тун хоорондын зай нь хэр хол байж болох вэ?

КОВИД-19 вирусийн тархалт Монголд газар авч, нийслэл Улаанбаатар хот болон 21 аймгийн 18-д нь одоогоор уг вирусийн дотоодын халдвар бүртгэгдээд байна. Үүнтэй холбоотойгоор Монгол Улсын Засгийн газар 4 дүгээр сарын 10-наас 25-ны хооронд улс орон даяар бүх нийтийн хатуу хөл хорио тогтоогоод байгаа билээ. Хөл хориог илүү үр дүнтэй болгож, хүмүүсийн бөөгнөрөл үүсгэхгүйн тул дархлаажуулалтыг хөл хорио дуустал зогсоож буйгаа Эрүүл мэндийн яам мэдэгдсэн.

Коронавирусийн эсрэг дархлаажуулалтад Монгол Улсын хувьд 4 төрлийн вакцин ашиглаж байгаа юм. Эдгээрийн дотроос манай улсад одоогоор хамгийн ихээр орж ирээд буй нь БНХАУ-ын төрийн өмчийн “Синофарм” эмийн үйлдвэрийн үйлдвэрлэсэн “Вероцелл” вакцин юм. КОВИД-19 цар тахлын эсрэг Монгол Улсын тэмцэлд дэмжлэг болох зорилгоор хоёрдугаар сарын сүүлчээр БНХАУ “Синофарм”-ын 300 мянган тун вакциныг Монгол Улсад хандивласан. Мөн Хятад улсаас Монгол Улсын Засгийн газрын худалдан авсан 300 мянган тун вакцин 4 дүгээр сарын 2-нд Улаанбаатарт буусан билээ.

“Синофарм”-ын вакцины хоёр тун хоорондын зай хэр хол байж болох вэ?

БНХАУ-ын Үндэсний эрүүл мэндийн хорооны албан ёсны цахим хуудаст бичсэнээр, илүү дархлаа тогтоохын тулд вирусийн идэвхгүйжүүлсэн вакцинуудыг ерөнхийдөө нэгээс илүү тунгаар хийдэг аж.

Шинэ коронавирусийн идэвхгүйжүүлсэн вакцины хувьд эхний тун нь бие махбодийн дархлааны хариу урвалыг өдөөдөг бол хоёр дахь тун нь дархлааг илүү тогтоож өгдөг байна.

Хэрвээ вакцины хоёр дахь тунг дархлаажуулалтын товлосон хугацаанд хийлгүүлж чадаагүй бол боломжтой үедээ аль болох эрт хийлгэхэд болох бөгөөд дархлаажуулалтыг дахин эхлүүлэх шаардлагагүй гэжээ.

“Синофарм”-ын үйлдвэрлэсэн “Вероцелл” вакцин нь уламжлалт аргаар гарган авсан буюу вирусийн идэвхгүйжүүлсэн вакцин юм.

Тус үйлдвэрээс гаргасан мэдээдэлд дурдсанаар, уг вакцины хоёр дахь тунг эхний тунг хийлгэснээс хойш багадаа 3-4 долоо хоногийн зайтай хийлгэх нь тохиромжтой аж. Цаашилбал, хоёр дахь тунг 8 долоо хоногийн зайтай хийгэж болно.

КОВИД-19 вакцины хоёр дахь тунг товлосон хугацаанд хийлгэж чадахгүй бол үр дүнд нь нөлөөлөх үү?

Дэлхийн бүх л улс орон энэ цар тахлыг дарж авахын тулд вакцинжуулалтыг өрнүүлж байна. Гэхдээ вакцин үйлдвэрлэл, нийлүүлэлт зэрэг олон хүчин зүйлээс шалтгаалан вакцинжуулалтыг хойшлуулах асуудал гарч байна. Вакцины эхний тунг хийлгэсэн хүмүүс дараагийн тунг товлосон хугацаанд хийлгэж чадахгүй бол үр дүн нь буурах, эсвэл нэмэлт тунгаар хийлгэх шаардлагатай болох болов уу гэж Монголын төдийгүй дэлхийн олон улсын орны иргэд санаа зовж байна.

Тэгвэл АНУ-ын Нью-Йорк хотын Рочестер их сургуулийн дархлаа судлаач, микробиологич Дэвид Топхэм саяхны нэгэн ярилцлагадаа “Одоогоор дэлхий даяар гарган аваад буй коронавирусийн вакцинууд нь ерөнхийдөө хоёр тунгаар хийлгэдэг вакцинууд байна. Эхний тунг хийлгэсэн хүмүүс 3-4 долоо хоног, түүнээс ч урт хугацааны завсарлага авч байж хоёр дахь тунг хийлгэж байна” гэв.Тэрбээр цааш нь ярихдаа “Дархлаажуулалтын товлосон хугацааг хойшлууллаа гэхэд ямар ч асуудал байхгүй бөгөөд вакцины үр дүн буурахгүй” гэжээ.

Мөн Америкийн Нью-Йоркийн их сургуулийн харьяа “NYU Langone Health” эрүүл мэндийн эрдэм шинжилгээний төвийн халдварт өвчний эмч, вакцин судлаач Адам Ратнер“Time” сэтгүүлд ярилцлага өгөхдөө “Коронавирусийн вакцинуудын хоёр тун хоорондын зай нь 3-4 долоо хоногийн зайтай байх нь хамгийн тохиромжтой. Эхний тарилгаас 6 долоо хоног буюу түүнээс дээш хугацааны дараа хоёр дахь тунгаа хийлгэлээ гээд вакцинжуулалт үр дүнгүй болно гэсэн үг биш” гэжээ.

Дэлхийн хэд хэдэн улс орон, тухайлбал Их Британи коронавирусийн вакцины эхний тунг илүү олон хүнд хүртээхийн тулд хоёр дахь тунг хийх хугацааг зориудаар хойшлуулж буй бөгөөд АНУ-ын зарим мэргэжилтэн ч адил бодлого хэрэгжүүлэхийг улс орнуудад зөвлөж байна.

Бичсэн: Солонго

Ашигласан эх сурвалжууд:

http://www.nhc.gov.cn/wjw/hygq/202104/8e62004e41d6…

https://time.com/5952716/missed-second-vaccine-app…

http://www.health.gov.sc/index.php/2021/02/09/chan…

https://qz.com/1962114/what-if-i-dont-get-my-secon…

Categories
мэдээ улс-төр

С.Энхболд: Ирэх сарын 31-н гэхэд нийслэлийн хүн амыг хоёр дахь тунгаар бүрэн дархлаажуулна гэж төлөвлөсөн

Коронавируст халдварын эсрэг вакцины нийлүүлэлт хойшилсон гэдгийг Эрүүл мэндийн сайд С.Энхболд хэллээ.

Тэрбээр “Өнөөдрөөс 15 хоногийн хугацаатай хатуу хөл хорионы дэглэмд шилжсэн. Энэ хугацаанд вакцинжуулалтыг түр хугацаанд хойшлуулсан.

Учир нь дөрөвдүгээр сарын 10, 12-нд тус бүр 300 мянган тун коронавирусийн эсрэг вакцин манай улсад ирэх байсан боловч хойшилсон. 21-56 хоногийн хооронд хийхэд дархлал тогтох чанарт өөрчлөлт орохгүй. Хөл хорионы энэ үед өндөр настан, хууч өвчтэй хүмүүсийг гэрээр нь явж дархлаажуулна. Нийслэлд 50 наснаас дээш 260 мянган иргэн байгаагийн 50 орчим мянгыг вакцинжуулалтад хамруулсан.

Тооцооллоор хүн амын 60 хувь буюу 2 сая 100 мянган хүн амд нийт 4.2 сая тун шаардлагатай. Үүнээс шаардлагатай үлдэгдэл нь 3.3 сая тун байна. Гэрээ хийн, төлбөрийг шилжсэн 1.7 сая тун байна.

Гуравдугаар сарын 25-наас хойш л гэхэд нийт 25 хүн коронавирусийн улмаас нас барлаа. Өнөөдрийн байдлаар эрчимт эмчилгээний тасагт 20 хүн эмчилгээ хийлгэж байна.

Хэрэв дөрөвдүгээр сарын 26-наас хойш вакцин хуваарийн дагуу нийлүүлэгдвэл 80 цэгийг вакцинжуулалтад зориулж гаргасан.

Бид төлөвлөгөөний дагуу тавдугаар сарын 1-н гэхэд нийслэлийн насанд хүрсэн хүмүүсийг коронавирусийн эсрэг эхний тунгаар бүрэн дархлаажуулсан байх болно.

Ингээд тавдугаар сарын 31-н гэхэд нийслэлийн хүн амыг хоёр дахь тунгаар бүрэн дархлаажуулна гэж төлөвлөсөн.

Бид 15 хоногийн хугацаанд 120-160 цэгийг нэмж байгуулж буй. Ингээд хөл хорионы хугацаа дуусмагц өдөрт 60,000-аас дээш хүний вакцинд хамруулахаар бэлтгэж байна” гэв.

Categories
мэдээ эдийн-засаг

“Rio Tinto” Оюу толгойн санхүүжилтийн талаар “Turquoise Hill”-тэй тохиролцоонд хүрчээ

Австралийн “Rio Tinto” групп Монгол дахь Оюу толгой зэс, алтны уурхайн бүтээн байгуулалтын санхүүжилтийн асуудлаар “Turquoise Hill Resources” компанитай тохиролцоонд хүрснээ мэдэгдлээ.

Талуудын зөвшилцсөн санхүүжилтийн шинэчилсэн төлөвлөгөө нь далд уурхайн төсөлд шаардлагатай үлдсэн 2.3 тэрбум орчим ам.долларын талаар тусгасан бөгөөд өнгөрсөн есдүгээр сард байгуулсан харилцан ойлголцлын санамж бичгийн хүрээнд байгуулсан гэрээнүүдийг орлох ажээ.
“Rio Tinto”-гийн мэдээлснээр, талууд 1.4 тэрбум хүртэлх ам.долларын өрийн төлөлтийн бүтцийг дахин өөрчилж, 500 сая хүртэлх ам.долларыг санхүүжилтийн одоогийн зохицуулалтуудын дагуу нэмэлт зээлийн хувиар босгохыг эрмэлзэх гэх мэт тохиролцоонд хүрчээ. Уг баримт бичгийг одоо Оюу толгой компани, Монголын Засгийн газар баталгаажуулах юм.

“Энэхүү гэрээ нь дэлхийн хамгийн том зэсийн уурхайн нэг болж, Монголын эдийн засагт урт хугацаанд үр өгөөжөө өгөх Оюу толгойн бүтээн байгуулалт үргэлжлэхэд томоохон алхам боллоо. Монголын Засгийн газрын дэвшүүлсэн асуудлуудыг сонсон шийдвэрлэж буй нь Оюу толгойн далд уурхайн төслийг хугацаанд нь хэрэгжүүлэхэд тун чухал юм” гэж “Rio Tinto”-гийн Зэсийн группийн гүйцэтгэх захирал Б.Болд мэдэгджээ.

Мөн “Turquoise Hill” компанийн гүйцэтгэх захирлын үүргийг түр гүйцэтгэгч Стив Тибо, “Бид Оюу толгойн далд уурхайн бүтээн байгуулалтыг санхүүжүүлэх талаар “Rio Tinto”-той бүтээлч, шударга тохиролцоонд хүрсэндээ баяртай байна. Цаашдын үйл ажиллагааг тодорхой цаг хугацаатайгаар тусгасан гэрээг байгуулснаар далд уурхайн бүтээн байгуулалтыг түргэн шуурхай гүйцэтгэх боломж бүрдэнэ. Бид Монгол Улс, монголчууд гэх мэт хувьцаа эзэмшигч бүх талд үр өгөөжөө хүртээхэд үргэлжлүүлэн анхаарна” гэв. Мөн “Rio Tinto”, “Turquoise Hill” одоо үргэлжилж буй арбитрын ажиллагааг зогсоохоор тохиролцсон байна.

Эх сурвалж: Montsame.mn

Categories
мэдээ спорт

Б.Хонгорзул хэсгийн аварга болов

Олимпийн эрхийн тэмцээний 57 кг-ын жинд өнгөрсөн жилийн насанд хүрэгчдийн улсын аварга Баянхонгор аймгийн 19 настай тамирчин Болдсайханы Хонгорзул Узбекистаны Шохида Ахмедова, Кыргызстаны Назира Марсбек Кызы нарыг тус бүр оноогоор цэвэр (10:0) ялснаар хэсгийн аварга боллоо.

Ингэснээр тэрбээр хагас шигшээд нөгөө зооноос хоёроор гарсан бөхтэй олимпийн эрхийн төлөө өрсөлдөнө.

Монголын Чөлөөт бөхийн холбоо

Categories
мэдээ нийгэм

Өнжмөл шар өвс шатааснаас гал гарах эрсдэл нэмэгдэж байгааг анхааруулж байна

Өнгөрсөн хоногт /2021.04.09/ Онцгой байдлын байгууллагад иргэдээс ахуйн гал түймрийн 5 дуудлага ирсний дийлэнх хувийг шар өвс шатаасны улмаас гал алдсан дуудлага эзэлж байна.

Тухайлбал, Сэлэнгэ аймаг, Сүхбаатар сум Хонгорморьт багийн 1 дүгээр гудамжинд Өнжмөл шар өвс шатаж байна гэсэн дуудлагаар /2021.04.09/ аймгийн Онцгой байдлын газрын Гал түймэр унтраах, аврах 36 дугаар ангийн алба хаагчид ажиллан иргэн Б-гийн 0.5 га хашаанд өнжмөл шар өвс шатаж байсныг унтраасан.

Чингэлтэй дүүргийн 17 хороо, Сурагчийн 85 дугаар гудамжинд гэр шатаж байна гэсэн дуудлагаар /2021.04.09/ Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид ажиллан иргэн Б-гийн 5 ханатай гэр, 9×5 метрийн хэмжээтэй байшингийн дээвэр, 3 га талбайд өнжмөл шар өвс шатаж байсныг унтраасан.

Сонгинохайрхан дүүргийн 24 дүгээр хороо, Шороотын 1 дүгээр гудамжинд өнжмөл шар өвс шатаж байна гэсэн дуудлагаар /2021.04.09/ тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид ажиллан иргэн Т-ын хашаанд 2х2 метрийн хэмжээтэй амбаар, 2 га талбайд өнжмөл шар өвс шатаж байсныг унтраасан.

Хэнтий аймгийн Дадал суманд Агац багийн “Угалзын-Арал” гэдэг газар /аймгийн төвөөс зүүн хойд зүгт 270 км-т сумын төвөөс урд зүгт 20 км-т/ /2021.04.09/ өвөлжөө шатсан тухай дуудлагаар /2021 04.09/ тус сумын ЗДТГ-ын албан хаагчид ажиллан малчин Б-гийн 50х30 метрийн хэмжээтэй өвөлжөө шатсаныг унтраасан.

Улаанбаатар хот, Сонгинохайрхан дүүрэг, 25 дугаар хороо, Хайрханы 6 дүгээр гудамжны 40 тоот Байшин шатаж байна гэсэн дуудлагаар /2021.04.09/ тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид ажиллан иргэн Т-гийн 35х10 метрийн хэмжээтэй байшингийн дээвэр шатаж байсныг унтраасан байна.

Иймд, хаврын хуурайшилтын үед иргэд асаасан гал, шүдэнз, татсан тамхины гал, цог, үнс нурмыг бүрэн унтраах, халуун үнс, нурмыг тусгайлан бэлдсэн таглаа бүхий нүх, саванд хийх, гэр сууц, хашаа хорооны гадуур түймрээс хамгаалах зурвас татах, ил задгай гал түлэхгүй байх, хашааны өнжмөл шар өвсийг шууд шатаахгүй байх, шатаах тохиолдолд зориулалтын тагтай төмөр саванд хийж шатаах, эсвэл шуудайд хийж хогийн цэгт хаях, гагнуур хийхгүй байхыг анхааруулж байна.

Мөн бага насны хүүхдэдээ хараа хяналт муу тавьснаас үүдэн хүүхдүүд чүдэнз, галт хэрэгслээр тоглосноос болж, шар өвсний түймэр гарах тохиолдол гарч байна гэж Онцгой байдлын ерөнхий газраас анхаарууллаа.

Categories
мэдээ спорт

Чөлөөт бөхийн олимпын тэмцээн өнөөдөр эхэлнэ


Казахстаны Алматы хотноо чөлөөт бөхийн Азийн эрхийн тэмцээн өнөөдөр эхэлж, манай эрчүүд 5 жинд хүч үзнэ. Өчигдөр сонгомол бөхийн төрлөөр эхэлсэн тивийн эрх олгох тэмцээнд манай тамирчдаас “Улаанбаатар-2019” 23 хүртэлх насны Азийн АШТ-ий хүрэл медальт, ОУХМ Мөнх-Эрдэнийн Даваабанди 60 кг-ын жинд хүч үзэв. Манай улсаас энэ төрөлд ганцаараа оролцсон тэрбээр 1/4 шигшээд өсвөр үеийн ДАШТ-ий хүрэл медальт, Азийн аварга Тажикистаны Фируз Мирзоржабовтой барилдаж оноогоор цэвэр ялагдлаа.
Түүнийг ялсан тажик залууолимпийн эрхийн буюу хагас шигшээд Хятадын бөхөд ялагдснаар М.Даваабанди дагах барилдаан хийх боломжгүй болжээ. М.Даваабанди нь энэ тэмцээний дараа сонгомол бөхийн Азийн аваргад үргэлжлүүлэн өөрийн үндсэн жин 55 кг-д зодоглох юм.
Өнөөдөр чөлөөт бөхийн төрөлд манай эмэгтэй 5 бөх хүч үзэх бөгөөд 50 кг-д Цогт-Очирын Намуунцэцэг хүч үзнэ. Түүний жинд нийт 5 бөх байгаа бөгөөд тойргоор өрсөлдөж, эхний хоёр байр олимпийн эрхээ авах учиртай. Манай тамирчин эхлээд Энэтхэг, дараа нь БНСУ, Узбекистан, Японы бөхчүүдтэй барилдахаар сугалаа таарчээ.
53 кг-д нийт 6 бөх хоёр хэсэгт хуваагдахад ДАШТ-ий хүрэл медальт Бат-Очирын Болортуяа Тажикстан, Казахстаны бөхчүүдтэй нэг хэсэгт орсон бөгөөд хэсгээ тэргүүлбэл олимпийн эрх авна.
57 кг-д нийт 6 бөх өрсөлдөх энэ хэсэгт Болдсайханы Хонгорзул Узбекистан, Кыргызстаны бөхчүүдтэй нэг хэсэгт багтжээ.
62 кг-д ДАШТ-ий алт, мөнгөн медальт гавьяат тамирчин Сүхээгийн Цэрэнчимэдийн жинд долоон тамирчин оролцож, байгаа бөгөөд манай тамирчин БНСУ, Казахстан, Узбекистаны бөхчүүдтэй нэг хэсэгт тойргоор барилдахаар болсон байна.
76 кг-д нийт таван тамирчин олимпийн эрхийн төлөө хүч үзэхээр болж, Монгол Улсын гавьяат тамирчин Очирбатын Бурмаа эхлээд Энэтхэг, дараа нь БНСУ, Кыргызстан, Узбекистаны бөхчүүдтэй хүч үзнэ.
Маргааш олимпийн эрхийн тэмцээний сүүлийн өдөр 57 кг-д ДАШТ-ий хүрэл медальт ОУХМ Түмэнбилэгийн Түвшинтулга, 74 кг-д ОУХМ Бямбасүрэнгийн Бат-Эрдэнэ, 86 кг-д ОУХМ Ганбаатарын Ганхуяг, 97 кг-д ОУХМ Өлзийсайханы Батзул, 125 кг-д ОУХМ Мөнхтөрийн Лхагвагэрэл нар өрсөлдөнө.
57 кг-д Т.Түвшинтулга тэгштгэлд “Рио-2016” олимпийн мөнгөн медальт Рэй Хигүчитэй эхний тойрогт учраа таарлаа. Р.Хигүчи нь Риогийн олимпоос хойш жин өгсөн 65 кг-д хүртэл барилдаж байсан бөгөөд олимпийн эрхийн тэмцээнд өөрийн үндсэн жинд жин хасч орж иржээ. Японы бөхийг ялсан тохиолдолд БНХАУ-ын бөхтэй цаашлаад олимпийн эрхийн төлөө Тажикстан, Туркменистаны бөхчүүдийн ялсантай учраа таарах юм.
74 кг-д Б.Батэрдэнэ эхний даваандаа ДАШТ-ий хошой хүрэл, Азийн наадмын хошой аварга, Рио-2016 олимпийн тавдугаар байрт Узбекстаны Бекзод Абдурахмоновтой учраа таарсан. Энэ бөх нь 2016 оны олимпод алдарт Жордан Барроуз аваргыг өрсөлдөөнөөс хасч байсан шаггүй өрсөлдөгч юм. Энэ бөхийг ялсан тохиолдолд манай бөх олимпийн эрхийн төлөө Кыргызстан, БНСУ-ын бөхчүүдийн ялсантай учраа таарна.
86 кг-д Г.Ганхуяг эхний даваандаа 2014 оны ДАШТ-ий мөнгөн меальт Японы Сосүке Такатанитай таарчээ. Тэдний ялсан нь олимпийн эрхийн төлөө БНХАУ, Кыргызстаны бөхчүүдийн ялсантай учраа таарна.
97 кг-д Ө.Батзул БНСУ-ын Сио Мин-Вонтой учраа таарсан. Улмаар өрсөлдөгчөө ялбал Энэтхэгийн Сативарт Кадиантай, цаашлаад олимпийн эрхийн төлөө ДАШТ-ий хүрэлтэй Ираны Аскари Мохамадиантай учраа таарах оноолт байна.
125 кг-д М.Лхагвагэрэл эхний тойрогт Пакистаны бөхтэй таарсан бол ¼ шигшээд Кыргызстаны Айаал Лазарев, олимпийн эрхийн төлөө Тажикстаны Рустам Искандартай оноолт таарах магадлалтай байна.
Тэмцээн Улаанбаатарын цагаар 13:00 цагаас эхлэх бөгөөд та бүхэн доорх линкээр үзэх боломжтой.
Categories
мэдээ нийгэм цаг-үе

“Хоёр дахь тунг 28-56 хоногийн зайтай тариулахад сөрөг нөлөөгүй” гэв

Коронавирусийн эсрэг вакцины хоёр дахь тунг 15 хоног хойшлуулсан нь дархлаа тогтцод сөрөг нөлөөгүй гэдгийг ЭМЯ-ны хэвлэлийн төлөөлөгч Б.Ууганбаяр хэллээ.

Тэрбээр “Өнөөдрөөс эхлэн дархлаажуулалтын ажлыг 15 хоногийн хугацаатайгаар хойшлуулсан. Вакцины хоёр дахь тунгаа хийлгэх хугацааг 15 хоногоор хойшлуулах нь ямар нэг эрсдэлгүй гэдгийг мэргэжилтнүүд хэлж байна. Тодруулбал, Синофарм болон АстраЗенека вакцины хоёр дахь тунг 28-56 хоногийн зайтай хийхэд ямар нэг эрсдэлгүй. Тун хоорондын зай хэдий хол байна тэр хэрээр дархлал тогтоц сайн байна гэх судалгаанууд гарч байгааг тэд хэлж байгаа юм. Өөрөөр хэлбэл, вакцины хоёр дахь тунгийн хугацаа хойшилсноор дархлаа тогтцод сөрөг нөлөөгүй” гэв.

Мөн “Хоёр дахь тунг найман 7 хоногийн дотор амжиж хийж болно гэж БНХАУ-ын Эрүүл мэндийн хорооноос зөвлөсөн байна. Анх АстраЗенека вакцины тун хоорондын зай 21 хоног байсан нь 56 болж өөрчлөгдсөн шиг зөвлөгөө, зөвлөмжүүд өөрчлөгдсөн” гэсэн тайлбар өглөө.

Categories
гадаад мэдээ

Cент-Винсент арлын галт уул дэлбэрчээ

Карибын тэнгисийн Сент-Винсент арал дээр оршдог Ла Суфриер галт уул дэлбэрсний улмаас олон мянган хүн орон гэрээ орхин явахаас өөр аргагүйд хүрчээ.

Ла Суфриер уул нь сүүлийн хэдэн арван жилийн турш идэвхгүй байсан боловч өнгөрсөн оны 12 дугаар сараас идэвхжил ажиглагдаж, энэ долоо хоногт дээд цэгтээ хүрсэн байна.

Үүнтэй холбогдуулан Сент-Винсент ба Гренадин улсын Ерөнхий сайд Ральф Гонсалвес “улаан бүсэд” байгаа 16 мянга гаруй оршин суугчийг нүүлгэн шилжүүлэхийг үүрэг болгожээ.

Дэлбэрэлтийн эхний шинж пүрэв гаргийн орой ажиглагдаж эхэлсэнтэй холбогдуулан Р.Гонсалвес нүүлгэн шилжүүлэх ажиллагааг түргэвчлэхийг уриалжээ. Тэдгээр оршин суугчийг аяллын хөлөг онгоцоор арлын аюулгүй хэсгүүдэд хүргэсэн байна.

Галт уул зургаан километрийн өндөрт үнс нурам цацсан бөгөөд баасан гарагт хоёр удаа дэлбэрчээ. Сент-Винсент ба Гренадины Улаан загалмай нийгэмлэгийн дарга Дора Жеймсийн “CNN” сувагт мэдээлснээр, дэлбэрэлтийн улмаас хэн нэгэн гэмтэж бэртсэн тухай мэдээлэл алга байна.

Image

Image

Another explosion observed. The vertical ash column estimated to have gone approximately 4km into the atmosphere. We continue to monitor and update. #lasoufrière #volcano #svg #redalert #stilldangerous
Categories
мэдээ нийгэм цаг-үе

Хязгаарлалт тогтоохгүй үйл ажиллагааны жагсаалт

Засгийн газрын 45, 91 дүгээр тогтоол, УОК-ын 02 дугаар тогтоолыг үндэслэн Нийслэлийн Засаг даргын “Гамшгаас хамгаалах бүх нийтийн бэлэн байдлын зэрэгт шилжүүлсэнтэй холбогдуулан авч хэрэгжүүлэх зарим арга хэмжээний тухай” захирамж гарсан.

Захирамжаар хязгаарлалт тогтоохгүй худалдаа, үйлчилгээний байгууллагын үйл ажиллагаа явуулах цагийн хязгаарыг 07:00-21:00 цаг хүртэл хугацаагаар тогтоолоо.

Мөн хязгаарлалт тогтоогоогүй төрийн байгууллага, хуулийн этгээдийн ажилтан, албан хаагчдын 10 хүртэл хувийг ажлын газрын үнэмлэх, албан байгууллагын тодорхойлолтыг үндэслэн хувийн болон албаны тээврийн хэрэгслээр хуанлийн өдрөөр автомашины улсын дугаарын сүүлчийн орон тэгш, сондгой тоогоор төгссөнөөр тодорхой маршрутын дагуу оролцуулж, замын хөдөлгөөний түгжрэл саатлыг үүсгэхгүй байх хариу арга хэмжээ авч ажиллана.

Өөрөөр хэлбэл, үйл ажиллагаа явуулахыг зөвшөөрсөн салбарын ажилтнууд дөрөвдүгээр сарын 10, 12, 14, 16, 18, 20, 22, 24-нд тэгш, 11, 13, 15, 17, 19, 21, 23, 25-нд сондгой тоогоор төгссөн улсын дугаартай тээврийн хэрэгслээр хөдөлгөөнд оролцох юм.

Харин нийтийн тээврийн үйлчилгээний цагийн хуваарийг тусгай горимд шилжүүлж, өглөө 06:30-10:00, өдөр 12:00-15:00, орой 17:30-22:00 цагийн хооронд зөвхөн хязгаарлалт тогтоохгүй төрийн байгууллага, хуулийн этгээдийн ажилтан, албан хаагчдыг халдвар хамгааллын дэглэмийг мөрдүүлэн зорчуулна.

No description available.

No description available.