Month: April 2021

Хөл хорионы хугацаанд Эрүүл мэндийн салбарын ажилчид хувийн унаагаар зорчих боломжтой болжээ.

Энэ талаар Эрүүл мэндийн сайд С.Энхболд “Хатуу хөл хорионы үед Эрүүл мэндийн салбарын ажилчид хувийн унаагаар зорчих боломжтой боллоо. Улсын онцгой комиссын шуурхай хуралд эмч, эмнэлгийн ажилчдад тулгарч буй бэрхшээлийг танилцуулж, шийдвэр гаргууллаа. Өнөөдрөөс Эрүүл мэндийн салбарын ажилчид замын хөдөлгөөнд хувийн унаагаар, дугаарын хязгаарлалтгүй оролцож болно” хэмээн өөрийн цахим хуудаснаа мэдээлээд байна.

“Ковидын нэгдсэн лавлах 119 төв”-ийн утсанд өнгөрсөн 24 цагийн хугацаанд иргэдээс 7465 дуудлага, мэдээлэл бүртгэгдсэн байна. Нийт хүлээн авсан дуудлагын 6147 буюу 82 хувийг шийдвэрлэн ажиллалаа.

Сүүлийн өдрүүдэд “Ковидын нэгдсэн лавлах 119 төв”-д ажиллах ажлын байрны тоог хоёр дахин нэмэгдүүлж 16 ажлын байраар үйл ажиллагаа явуулж эхэлсэн.

Ингэснээр 119 лавлах утсанд хандах иргэдийн хандалтын тоо өмнөх өдрүүдээс 30-50 хүртэлх хувиар буурсан үзүүлэлттэй байгаа бөгөөд иргэдээс ирсэн санал, хүсэлтийн шийдвэрлэлт хоёр дахин өссөн байна.

2021 оны дөрөвдүгээр сард 119 лавлах утсаар нийт 102422 дуудлага хүлээн авч иргэдэд үйлчилсэн байна гэж УОК-ын Шуурхай штабаас мэдээлж байна.

Үндсэн хуулийн Цэцийн хоёр гишүүний хугацаа дуусгавар болсон учраас хоёр гишүүний орон тоонд нэр дэвшигчдийг бүртгэж эхэлсэн.

Гамшгаас хамгаалах бүх нийтийн бэлэн байдлын зэрэг шилжүүлж, хөл хорио тогтоосонтой холбоотойгоор дөрөвдүгээр сарын 2-ны өдөр нийтэд мэдээлсэн. Үндсэн хуулийн цэцийн гишүүний албан тушаалд нэрээ дэвшүүлэх бүртгэлийн хугацааг дөрөвдүгээр сарын 29-ний 17.30 цаг хүртэл сунгах шийдвэрийг Дээд шүүхийн Тамгын газраас гаргажээ.

Самар түүхээр явсан иргэд автомашины тэвшин дээр унтаж байхдаа угаартаж нас барсан хэрэг гарчээ.

Тодруулбал, Сэлэнгэ аймгийн Мандал сумын Түнхэл тавдугаар багийн нутаг дэвсгэрт энэ оны дөрөвдүгээр сарын 12-ны 14:30 цагийн үед зургаан хүн угаартаж, нас барсан байдалтай олдсон талаарх дуудлага цагдаагийн байгууллагад ирсэн байна.

Хэргийг тодруулбал, тус багт оршин суух 22-46 насны Т, Г, Ү, О, Х, М нар нь тус багийн нутаг дэвсгэрт самарт явж байхдаа бүхээгтэй /битүү/ машины тэвшин дээр унтаж байгаад угаартаж нас барсан хэрэг гарчээ.

Хэргийг тус сумын цагдаагийн хэлтэс шалгаж байгааг ЦЕГ-ын Хэвлэл мэдээллийн төвөөс мэдээллээ.

Өмнөд Солонгос улсын засгийн газар тус улс дахь 115000 орчим гадаад ажилчдын визний хугацааг нэг жилээр сунгах болсноо өнөөдөр зарлажээ.

Энэ нь цар тахалтай холбоотой хилийн хоригийн улмаас жижиг бизнесийн салбарууд, хөдөө аж ахуй, загасчлалын аж ахуйд үүссэн ажиллах хүчний дутагдлыг нөхөх шийдэл юм байна.

E-9 болон H-2 төрлийн виз эзэмшигчдэд энэ сунгалт үйлчлэх ба өнөөдрөөс эхлээд арванхоёрдугаар сарын 31 хүртэл хугацаанд визний хугацаа нь дуусч байгаа бол дахин нэг жилээр сунгах ажээ.

Дээрх сунгалтад хамрагдах боломжтой E-9 төрлийн виз эзэмшигч 62,239, H-2 төрлийн виз эзэмшигч 52,357 гадаадын иргэн Өмнөд Солонгост өнөөдөр оршин сууж байгаа юм байна.

2019 онд E-9 визээр ирсэн хүний тоо 51,365 байсан бол 2020 онд 6,688 болж буурсан нь коронавирусийн цар тахлын улмаас олон улсын нислэгүүд цуцлагдаж, хил хаагдсантай холбоотой гэнэ.

Ижил хугацаанд H-2 визээр гадаад орнуудаас ирсэн хүний тоо 63,339-өөс 6,044 болж огцом буурчээ.

Нийслэлийн Зам, тээврийн асуудал хариуцсан төслүүдийн удирдагч Б.Одсүрэн болон Нийтийн тээврийн үйлчилгээний газрын удирдлагууд бүх нийтийн бэлэн байдлын зэрэгт шилжсэн хугацаанд нийтийн тээврийн үйлчилгээний нөхцөл байдалтай газар дээр нь очиж танилцлаа.

Улаанбаатар хотын хэмжээнд 870 гаруй автобусны буудал байдаг. Тэдгээрээс Таван шар, Саппоро, Офицеруудын ордон, Багшийн дээд, 21-р хороолол зэрэг 10 гаруй автобусны буудал хөл хөдөлгөөн ихтэй, хамгийн өндөр ачаалалтай байдаг аж. Учир нь эдгээр буудлаас иргэд хамгийн их дамжин суудаг. Иймээс иргэдийн ачаалал их байдаг 21-р хороолол болон Таван шарын автобусны буудал дээр очсон юм.

Өчигдөр нийтийн тээврийн 58 чиглэлд 315 автобус үйлчилгээнд явж байсан бол өнөөдөр автобусны тоог нэмж 641 болгожээ. Энэ талаар Нийтийн тээврийн үйлчилгээний газрын орлогч дарга Х.Булгаа “Тээврийн хэрэгслийн тоог хоёр дахин нэмсэн. Иргэдийн зорчилт өндөр байна. Хяналт, шалгалтын байцаагч нар иргэд хоорондын зай барилтыг шалгаж байгаа ч зорчигчдын тоо буурахгүй байна” гэлээ.

Энэ үеэр “Улаанбаатар смарт карт” ХХК-ийн Бизнес хэрэгжилтийн хэлтсийн дарга М.Мөнхболд “Өчигдөр нийтийн тээврээр 110898 зорчигч үйлчлүүлсэн. Үүний 63 хувь нь энгийн картаар төлбөр төлж зорчсон иргэд. Өөрөөр хэлбэл, хязгаарлалт тогтоогоогүй 15 салбарын иргэд нийт зорчигчдын 63 хувийг эзэлж байна гэж ойлгож болно. 36 хувь буюу 40623 зорчигч хөнгөлөлттэй карт ашигласан. Ахмадын картаар зорчигчид 23 хувийг, хөгжлийн бэрхшээлтэй иргэд есөн хувийг эзэлж байна” хэмээн ярилаа.

Мөн иргэдэд хяналт тавьж буй Нийтийн тээврийн үйлчилгээний газрын шалгагч нар “Ачаалал их байна. Тэр дундаа өглөө 07:00-08:00 цагийн хооронд ачаалал хамгийн их байдаг. Өдөр бол харьцангуй бага байна. Өчигдөр нийт зорчигчдын 30 гаруй хувийг ахмад настан, хөгжлийн бэрхшээлтэй иргэд эзэлж байсан. Өнөөдөр ч мөн ялгаагүй байх дүр зураг ажиглагдаж байна. Албан хаагчид иргэдийн бичиг баримтыг шалгаж, зарим хүнийг буцааж байгаа. Зөвшөөрөгдсөн 15 салбарын иргэд бичиг баримттайгаа явж байгаа ч бичиг баримтгүй иргэд нийтийн тээврээр үйлчлүүлж байна. Энгийн иргэд бичиг баримтаа шалгуулдаггүй. Ажилдаа явж байна гэж хэлдэг” хэмээсэн бол иргэд “Автобус ойрхон ирж байгаа ч хүн их байна” гэдгийг хэлж байлаа.

Нийслэлийн Зам, тээврийн асуудал хариуцсан төслүүдийн удирдагч Б.Одсүрэн энэ үеэр автобусны тоог нэмж байгаа ч иргэдийн зорчих хөдөлгөөн буурахгүй байна. Уг нь хөл хорионы үеэр хязгаарлалт тогтоогоогүй салбарынхан л нийтийн тээврээр үйлчлүүлэх ёстой. Гэтэл энгийн иргэд олноор үйлчлүүлж байгааг онцолсон. Мөн үүнд хяналт тавьж, эдгээрт анхаарсан зохицуулалт хийх ёстойг холбогдох албаныханд санууллаа.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС