Month: April 2021

Нийслэлийн ИТХ-ын Тэргүүлэгчид өнөөдөр хуралдаж хүндэтгэлийн самбар байршуулах тухай, цэргийн албыг биеэр дүйцүүлэн хаах иргэдийн тоог батлах, хөрөнгө шилжүүлэх зэрэг асуудлыг хэлэлцлээ.

Монголын төр нийгэм, соёл, гэгээрэл, шинжлэх ухааны нэрт зүтгэлтэн, гоо зүй, утга зохиолч судлаач, доктор, профессор С.Лувсанвандангийн амьдарч байсан орон сууцыг “Гэр музей” болгон түүх, соёлыг олон нийтэд таниулах, сурталчлах ажлыг үр хүүхэд болон “С.Лувсанвандан сан”-гаас зохион байгуулж байгаа аж. Энэ хүрээндээ гэр музейн хүндэтгэлийн шинэчилсэн самбарыг тус орон сууцанд байршуулах хүсэлт ирүүлжээ.

Мөн Монгол Улсын Хөдөлмөрийн баатар, Ардын уран зохиолч, Соёлын гавьяат зүтгэлтэн зохиолч Б.Баастын 1959-2019 онд амьдарч байсан байранд хүндэтгэлийн самбар байршуулах хүсэлтийг үр хүүхэд, ач зээ нараас ирүүлсэн юм. Тэргүүлэгчид дээрх хүсэлтүүдийг хэлэлцэн шийдвэрлэлээ.

Мөн өнөөдрийн хуралдаанаар Чингэлтэй дүүргийн Засаг даргын Тамгын газрын өмчид бүртгэлтэй барилгыг нийслэлийн Онцгой байдлын газарт шилжүүллээ. Ингэснээр НОБГ хээрийн дадлага, сургуулилалт хийх төвтэй болж байна.

Нийслэлийн ИТХ-ын ээлжит VI хуралдааныг энэ сарын 29-ний өдрийн 11.00 цагт товлолоо.

Дээд шүүхийн Эрүүгийн хэргийн танхимд “Жи тайм корпорейшн” ХХК-ийн Э.Оюунчимэгт холбогдох хэргийн шүүх хурал энэ сарын 23-нд болохоор товлогджээ.

“Жи тайм корпорейшн” ХХК нь нийт 12 365 иргэнийг 27 965 хөтөлбөрт элсүүлж, 25 тэрбум 801 сая 307 мянган төгрөгийн хохирлыг нийт 11 398 иргэнд учруулан залилангийн гэмт хэрэг үйлдсэн хэрэгт анхан шатны шүүхээс шүүгдэгч Э.Оюунчимэгт Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2-т зааснаар 5 жилийн хорих ялыг нээлттэй хорих ангид эдлүүлэхээр шийдвэрлэснийг давж заалдах шатны шүүх хэвээр үлдээсэн юм.

Нийслэлийн Засаг дарга бөгөөд Улаанбаатар хотын захирагч Д.Сумъяабазар Гамшгаас хамгаалах бүх нийтийн бэлэн байдалд шилжсэн хугацаанд нийслэлийн зам засварын ажлыг эрчимжүүлэхийг үүрэг болгосон. Тэрбээр өнөөдөр Төв шуудангийн уулзвараас Энхтайваны гүүр хүртэлх зам засварын ажилтай танилцлаа.

Замын заадсаар ус чийг орж эвдрэл үүсдэг. Замын заадас засах ажил нь суурь эвдрэл үүсэхээс сэргийлдэг гэдгийг Нийслэлийн Авто замын хөгжлийн газрын Зам засвар, ашиглалт, хяналтын хэлтсийн дарга Д.Ганбат хэллээ. Өнөөдрийн байдлаар Энхтайваны өргөн чөлөө, Чингисийн өргөн чөлөө, Нарны зам, Их тойруу зэрэг гол замуудын засварын ажлыг эхлүүлээд байгаа юм. Тээврийн хэрэгслийн хөдөлгөөн ихтэй үед зам засварын ажлыг шөнийн цагаар хийдэг байсан бол одоо бага байгаа учир зам засварын ажил эрчимтэй явж байгааг мөн танилцууллаа. Өчигдөр Төв шуудангийн уулзвараас Зүүн дөрвөн зам хүртэлх замын нэгдүгээр эгнээнээс бусад хэсгийн засварын ажлыг хийсэн бол өнөөдөр нэгдүгээр эгнээний засварын ажлыг дуусгахаар дөрвөн бригад ажиллаж байгаа юм.

Улаанбаатар зам засвар, арчлалтын газар Сонгинохайрхан, Баянзүрх, Сүхбаатар дүүргийн гол замуудын зам засварын ажлыг хийж байна. Нийт 188 мянган ам метр замын заадас нөхөх ажлыг 14 хоногийн хугацаанд хийж дуусгахаар ажиллаж байгааг Улаанбаатар зам засвар, арчлалтын газрын дарга Б.Галхүү хэллээ. Тавдугаар сарын 10-наас замын нөхөөсний ажил эхлэх юм.

Нийслэлийн зургаан дүүргийн 33 гол гудамж, замын 300 мянган ам метр замын заадас засварын ажлыг хийхээр төлөвлөсөн. Хяналтын инженерүүд шаардлага хангахгүй болсон тэмдэг, тэмдэглэгээг газар дээр нь сольж, угааж цэвэрлэх ажлыг эрчимтэй хийж байна.

Төсвийн орлого тасарсан, эдийн засгийн нөхцөл байдал хүндэрсэн хэдий ч зам засварын ажлыг цалгардуулалгүй гүйцэтгэхийг Хотын дарга үүрэг болгож, анхааруулсан юм.

Санхүүгийн зохицуулах хорооны ээлжит долдугаар хуралдаан өнөөдөр болж нийт 31 асуудлыг хэлэлцэж шийдвэрлэлээ.

Коронавирус /Covid-19-/ын халдварт цар тахлын нөхцөл байдалтай холбогдуулж хөл хорио тогтоосон ч салбартай холбоотой бодлого шийдвэрийг шуурхай тасалдалгүй гаргах, хуулийн этгээдүүдийн бизнесийн үйл ажиллагаатай холбоотой асуудлуудыг цаг тухай бүрт нь шийдвэрлэх зорилгоор Хороо ээлжит хуралдаануудыг цахим хэлбэрээр тогтмол хуралдуулж ажиллаж байна.

Өнөөдрийн хуралдаанаар хоёр компанид хаалттай хүрээнд нэмж гаргаж буй энгийн хувьцааг нийтэд санал болгохыг зөвшөөрсөн үнэт цаасны бүртгэлд бүртгэхээр мөн үнэт цаасны зах зээлд хөрөнгө оруулалтын менежментийн үйл ажиллагаа эрхлэх тусгай зөвшөөрөл олгохоор шийдвэрлэлээ. Түүнчлэн хоёр хуулийн этгээдэд банк бус санхүүгийн богино хугацаат санхүүгийн хэрэгсэлд хөрөнгө оруулалт хийх үйл ажиллагаа эрхлэх, банк бус санхүүгийн зээл болон гадаад валютын арилжааны үйл ажиллагаа эрхлэх тусгай зөвшөөрөл олгохоор боллоо.

Мөн найман хадгаламж зээлийн хоршооны хадгаламж, зээлийн үйл ажиллагаа эрхлэх тусгай зөвшөөрлийн хугацааг сунгахаар, таван компанид үл хөдлөх эд хөрөнгө зуучлалын байгууллагын үйл ажиллагаа эрхлэх, нэр бүхий нэг компани, дөрвөн иргэнд үнэт металл, үнэт чулууны арилжаа эрхлэгчийн үйл ажиллагаа эрхлэх тусгай зөвшөөрөл олгохоор шийдвэрлэсэн. Үүний зэрэгцээ хоёр хуулийн этгээдийн хувьцаа эзэмшигчийн бүтэц бүрэлдэхүүнд өөрчлөлт оруулах болон үнэт цаасны зах зээлд хөрөнгө оруулалтын менежментийн үйл ажиллагаа эрхлэх тусгай зөвшөөрлийг нь сэргээхээр тус тус шийдвэрлэлээ.

Хуралдаанаар мөн “Үл хөдлөх эд хөрөнгө зуучлалын байгууллагын мэргэжлийн холбоонд тавигдах шаардлагыг тодорхойлох журам”-ыг хэлэлцэн баталлаа. Үл хөдлөх эд хөрөнгө зуучлалын байгууллагын мэргэжлийн нэгдсэн холбоо салбараа хөгжүүлэх хүрээнд Санхүүгийн зохицуулах хороотой хамтран ажиллах, үйл ажиллагаагаа уялдуулах саналыг Хороонд гаргасан. Үүний дагуу дээрх журмыг боловсруулсан бөгөөд ийнхүү батлагдсанаар нэгдсэн холбоо үйл ажиллагаагаа шуурхай явуулах, Хороотой холбогдох хууль тогтоомжид заасны дагуу үл хөдлөх эд хөрөнгө зуучлалын чиглэлээр хамтран ажиллаж, зуучлалын байгууллагуудад мэргэжил арга зүйн дэмжлэг үзүүлэх, сургалт зохион байгуулах боломж бүрдэж байна гэж Санхүүгийн зохицуулах хорооноос мэдээллээ.

Уран зургийн галерей хаагдаж, тоглолтууд цуцлагдаж байгаа энэ үед дэлхийн өнцөг булан бүрд үзэгчид гэртээ өнжиж байна. Ковид-19 цар тахлын үед нийгэмд хүн хоорондын зай холдож байгаагийн хэрээр урлаг урьд урьдынхаас илүү чухал болж байна. Бусад улс орнуудын нэгэн адил Монголын уран бүтээлчид шинэ нөхцөл байдалд дасан зохицож, гадаад дотоодын үзэгчидтэй холбоотой байх бүтээлч замыг эрэн хайж байна.

Зургаан орны Элчин сайдын яамд, тухайн улсын соёл урлагийн байгууллагууд “Mongolian Artists in Resilience: зургаан орон, зургаан уран бүтээлч, зургаан бүтээл” нэрийн дор уран бүтээлчдийн видео болон цахим хэлэлцүүлгийг зохион байгуулахаар болжээ.

Олон улсын хэлхээ холбоо бүхий Монголын эдгээр уран бүтээлчид хэрхэн ажиллаж уран бүтээлээ туурвиж байгааг харуулахын тулд Монгол-Францын төв, Францын Элчин сайдын яам, Их Британийн Элчин сайдын яам, Германы Элчин сайдын яам, Монгол дахь Гёте-Институт, Японы Элчин сайдын яам, Швейцарын хөгжлийн агентлаг болон АНУ-ын Элчин сайдын яам энэхүү төслийг анх удаа хамтран санаачлаад байна.

• 4-р сарын 13, 19:30 цаг: Erdenekhuu Edu, бүжигчин – Швейцар улс
• 4-р сарын 13, 19:45 цаг: Gantuya, арт куратор – АНУ
• 4-р сарын 14, 19:30 цаг: Bayra Bela, жүжигчин, продюсер – Их Британи
• 4-р сарын 14, 19:45 цаг: Hulgo, тайко бөмбөрчин – Япон
• 4-р сарын 15, 19:30 цаг: Jojo, жазз дуучин – Герман
• 4-р сарын 15, 19:45 цаг: Tamir Samandbadraa, каллиграфич – Франц

Facebook Live арга хэмжээ дөрөвдүгээр сарын 16-ны 19:00 цагт: “Mongolian Artists in Resilience: зургаан орон, зургаан уран бүтээлч, зургаан бүтээл” https://www.facebook.com/events/478086556944796/ хаяг дээр явагдана.

Дэлгэрэнгүй мэдээллийг та Элчин сайдын яамдын албан ёсны фэйсбүүк хуудаснаас аваарай. Монгол-Францын төв, Францын Элчин сайдын яам, Их Британийн Элчин сайдын яам, Германы Элчин сайдын яам, Монгол дахь Гёте-Институт, Японы Элчин сайдын яам, Швейцарын хөгжлийн агентлаг болон АНУ-ын Элчин сайдын яам.